منڈے بلوز: آج تو بے سبب اداس ہے جی

دل دھڑکنے کا سبب یاد آیا

وہ تری یاد تھی اب یاد آیا

نہ جانے کس لیے امیدوار بیٹھا ہوں

اک ایسی راہ پہ جو تیری رہ گزر بھی نہیں

بھری دنیا میں جی نہیں لگتا

جانے کس چیز کی کمی ہے ابھی

کل کا دن ہائے کل کا دن اے جونؔ

کاش اس رات ہم بھی مر جائیں

دفتر سے مل نہیں رہی چھٹی وگرنہ میں

بارش کی ایک بوند نہ بیکار جانے دوں

آج تو بے سبب اداس ہے جی

عشق ہوتا تو کوئی بات بھی تھی

میں زندگی کے سبھی غم بھلائے بیٹھا ہوں

تمہارے عشق سے کتنی مجھے سہولت ہے

خدا کو مان کہ تجھ لب کے چومنے کے سوا

کوئی علاج نہیں آج کی اداسی کا

بات نکلے گی تو پھر دور تلک جائے گی

لوگ بے وجہ اداسی کا سبب پوچھیں گے

بہت مایوس بیٹھا ہوں میں تم سے

کبھی آ کر مجھے حیرت میں ڈالو

ہمارے دل کو اک آزار ہے ایسا نہیں لگتا

کہ ہم دفتر بھی جاتے ہیں غزل خوانی بھی کرتے ہیں

دن کو دفتر میں اکیلا شب بھرے گھر میں اکیلا

میں کہ عکس منتشر ایک ایک منظر میں اکیلا

آفس میں بھی گھر کو کھلا پاتا ہوں میں

ٹیبل پر سر رکھ کر سو جاتا ہوں میں

کتنی وحشت ہے درمیان ہجوم

جس کو دیکھو گیا ہوا ہے کہیں

یہ کس مقام پہ لائی ہے زندگی ہم کو

ہنسی لبوں پہ ہے سینے میں غم کا دفتر ہے

دفتر میں ذہن گھر پہ نگہ راستے میں پاؤں

جینے کی کاوشوں میں بدن ہاتھ سے گیا

کوئی پوچھے تو سہی ہم سے ہماری روداد

ہم تو خود شوق میں افسانہ بنے بیٹھے ہیں

ہوتی ہے تیرے نام سے وحشت کبھی کبھی

برہم ہوئی ہے یوں بھی طبیعت کبھی کبھی

تھکا ہارا نکل کر گھر سے اپنے

وہ پھر آفس میں سونے جا چکا ہے

میں کس سے کرتا یہاں گفتگو کوئی بھی نہ تھا

نہیں تھا میرے مقابل جو تو کوئی بھی نہ تھا