Pareshan Dilon ki Shayari

chāñd bhī hairān dariyā bhī pareshānī meñ hai

aks kis kā hai ki itnī raushnī paanī meñ hai

chand bhi hairan dariya bhi pareshani mein hai

aks kis ka hai ki itni raushni pani mein hai

kyuuñ merī tarah rātoñ ko rahtā hai pareshāñ

ai chāñd batā kis se tirī aañkh laḌī hai

kyun meri tarah raaton ko rahta hai pareshan

ai chand bata kis se teri aankh laDi hai

apne qātil kī zehānat se pareshān huuñ maiñ

roz ik maut na.e tarz kī ījād kare

apne qatil ki zehanat se pareshan hun main

roz ek maut nae tarz ki ijad kare

dekh lete jo mire dil kī pareshānī ko

aap baiThe hue zulfeñ na sañvārā karte

dekh lete jo mere dil ki pareshani ko

aap baiThe hue zulfen na sanwara karte

be-nām se ik ḳhauf se dil kyuuñ hai pareshāñ

jab tai hai ki kuchh vaqt se pahle nahīñ hogā

be-nam se ek KHauf se dil kyun hai pareshan

jab tai hai ki kuchh waqt se pahle nahin hoga

ham ko junūñ kyā sikhlāte ho ham the pareshāñ tum se ziyāda

chaak kiye haiñ ham ne azīzo chaar garebāñ tum se ziyāda

hum ko junun kya sikhlate ho hum the pareshan tum se ziyaada

chaak kiye hain hum ne azizo chaar gareban tum se ziyaada

jaane kis ḳhvāb-e-pareshāñ kā hai chakkar saarā

bikhrā bikhrā huā rahtā hai mirā ghar saarā

jaane kis KHwab-e-pareshan ka hai chakkar sara

bikhra bikhra hua rahta hai mera ghar sara

pareshāñ ho ke dil tark-e-ta.alluq par hai āmāda

mohabbat meñ ye sūrat bhī na raas aa.ī to kyā hogā

pareshan ho ke dil tark-e-talluq par hai aamada

mohabbat mein ye surat bhi na ras aai to kya hoga

tum apnā ranj-o-ġham apnī pareshānī mujhe de do

tumheñ ġham kī qasam is dil kī vīrānī mujhe de do

tum apna ranj-o-gham apni pareshani mujhe de do

tumhein gham ki qasam is dil ki virani mujhe de do

ḳhaak maiñ us kī judā.ī meñ pareshān phirūñ

jab ki ye milnā bichhaḌnā mirī marzī niklā

KHak main us ki judai mein pareshan phirun

jab ki ye milna bichhaDna meri marzi nikla

ham tere paas aa ke pareshān haiñ bahut

ham tujh se duur rahne ko tayyār bhī nahīñ

hum tere pas aa ke pareshan hain bahut

hum tujh se dur rahne ko tayyar bhi nahin

chhalke hue the jaam pareshāñ thī zulf-e-yār

kuchh aise hādsāt se ghabrā ke pī gayā

chhalke hue the jam pareshan thi zulf-e-yar

kuchh aise hadsat se ghabra ke pi gaya

aql gum hai dil pareshāñ hai nazar betāb hai

justujū se bhī nahīñ miltā surāġh-e-zindagī

aql gum hai dil pareshan hai nazar betab hai

justuju se bhi nahin milta suragh-e-zindagi

zehn par bojh rahā, dil bhī pareshān huā

in baḌe logoñ se mil kar baḌā nuqsān huā

zehn par bojh raha, dil bhi pareshan hua

in baDe logon se mil kar baDa nuqsan hua

sumbul ko pareshān kiyā bād-e-sabā ne

jab baaġh meñ bāteñ tirī zulfoñ kī chalā.īñ

sumbul ko pareshan kiya baad-e-saba ne

jab bagh mein baaten teri zulfon ki chalain

zindagī meñ pahle itnī to pareshānī na thī

tañg-dāmānī thī lekin chāk-dāmānī na thī

zindagi mein pahle itni to pareshani na thi

tang-damani thi lekin chaak-damani na thi

guftugū kar ke pareshāñ huuñ ki lahje meñ tire

vo khulā-pan hai ki dīvār huā jaatā hai

guftugu kar ke pareshan hun ki lahje mein tere

wo khula-pan hai ki diwar hua jata hai

phirte haiñ ka.ī qais se hairān o pareshān

is ishq kī sarkār meñ bahbūd nahīñ hai

phirte hain kai qais se hairan o pareshan

is ishq ki sarkar mein bahbud nahin hai

is chashm-e-siyah-mast pe gesū haiñ pareshāñ

mai-ḳhāne pe ghanghor ghaTā khel rahī hai

is chashm-e-siyah-mast pe gesu hain pareshan

mai-KHane pe ghanghor ghaTa khel rahi hai

sach batā ishq mujhe saḳht pareshāñ huuñ maiñ

kyuuñ ḳhafā hotā nahīñ dost ḳhatā par merī

sach bata ishq mujhe saKHt pareshan hun main

kyun KHafa hota nahin dost KHata par meri

ab maiñ huuñ aur ḳhvāb-e-pareshāñ hai mere saath

kitnā paḌegā aur abhī jāgnā mujhe

ab main hun aur KHwab-e-pareshan hai mere sath

kitna paDega aur abhi jagna mujhe

dil hai pareshāñ un kī ḳhātir

pal bhar ko ārām nahīñ hai

dil hai pareshan un ki KHatir

pal bhar ko aaram nahin hai

dil ḳhush na huā zulf-e-pareshāñ se nikal kar

pachhtā.e ham is shām-e-ġharībāñ se nikal kar

dil KHush na hua zulf-e-pareshan se nikal kar

pachhtae hum is sham-e-ghariban se nikal kar

ham gabrū ham musalmāñ ham jam.a ham pareshāñ

ik silsila bañdhā us zulf-e-dotā se dekhā

hum gabru hum musalman hum jama hum pareshan

ek silsila bandha us zulf-e-dota se dekha