پتا پتا بوٹا بوٹا حال ہمارا جانے ہے : میر تقی میر

نازکی اس کے لب کی کیا کہئے

پنکھڑی اک گلاب کی سی ہے

آگ تھے ابتدائے عشق میں ہم

اب جو ہیں خاک انتہا ہے یہ

لے سانس بھی آہستہ کہ نازک ہے بہت کام

آفاق کی اس کارگہ شیشہ گری کا

بے خودی لے گئی کہاں ہم کو

دیر سے انتظار ہے اپنا

دکھائی دیئے یوں کہ بے خود کیا

ہمیں آپ سے بھی جدا کر چلے

ہمارے آگے ترا جب کسو نے نام لیا

دل ستم زدہ کو ہم نے تھام تھام لیا

گفتگو ریختے میں ہم سے نہ کر

یہ ہماری زبان ہے پیارے

ہم جانتے تو عشق نہ کرتے کسو کے ساتھ

لے جاتے دل کو خاک میں اس آرزو کے ساتھ

آفاق کی منزل سے گیا کون سلامت

اسباب لٹا راہ میں یاں ہر سفری کا

کن نیندوں اب تو سوتی ہے اے چشم گریہ ناک

مژگاں تو کھول شہر کو سیلاب لے گیا

جم گیا خوں کف قاتل پہ ترا میرؔ زبس

ان نے رو رو دیا کل ہاتھ کو دھوتے دھوتے

اب کے جنوں میں فاصلہ شاید نہ کچھ رہے

دامن کے چاک اور گریباں کے چاک میں

مصائب اور تھے پر دل کا جانا

عجب اک سانحہ سا ہو گیا ہے

ہم فقیروں سے بے ادائی کیا

آن بیٹھے جو تم نے پیار کیا

ہم نہ کہتے تھے کہ نقش اس کا نہیں نقاش سہل

چاند سارا لگ گیا تب نیم رخ صورت ہوئی

کچھ ہو رہے گا عشق و ہوس میں بھی امتیاز

آیا ہے اب مزاج ترا امتحان پر

بال و پر بھی گئے بہار کے ساتھ

اب توقع نہیں رہائی کی

عالم عالم عشق و جنوں ہے دنیا دنیا تہمت ہے

دریا دریا روتا ہوں میں صحرا صحرا وحشت ہے

عجز و نیاز اپنا اپنی طرف ہے سارا

اس مشت خاک کو ہم مسجود جانتے ہیں

کہنا تھا کسو سے کچھ تکتا تھا کسو کا منہ

کل میر کھڑا تھا یاں سچ ہے کہ دوانہ تھا