اب نہ وہ جوش وفا ہے نہ وہ انداز طلب

اب بھی لیکن ترے کوچے سے گزر ہوتا ہے

کیوں ہوا مجھ کو عنایت کی نظر کا سودا

آج رسوائی ہی رسوائی ہے کچھ اور نہیں

نکلو بھی کبھی سود و زیاں سے ورنہ

کوچے میں ترے کون بھلا آئے گا

خاک نے کتنے بد اطوار کئے ہیں پیدا

یہ نہ ہوتے تو اسی خاک سے کیا کیا ہوتا

کوئی تو خیر کا پہلو بھی نکلے

اکیلا کس طرح یہ شر رہے گا

آؤ خوش ہو کے پیو کچھ نہ کہو واعظ کو

میکدے میں وہ تماشائی ہے کچھ اور نہیں

تجھ سے پردہ نہیں مرے غم کا

تو مری زندگی کا محرم ہے

دل نہ کعبہ ہے نے کلیسا ہے

تیرا گھر ہے حریم مریم ہے

خالی بھی تو کر خانۂ دل دنیا سے

اس گھر میں مری جان خدا آئے گا

میری دنیا میں ابھی رقص شرر ہوتا ہے

جو بھی ہوتا ہے بہ انداز دگر ہوتا ہے

علاج اس کا گزر جانا ہے جاں سے

گزر جانے کا جاں سے ڈر رہے گا

غلط ہے جذبۂ دل پر نہیں کوئی الزام

خوشی ملی نہ ہمیں جب تو غم کی خو کر لی

بٹھا کے سامنے تم کو بہار میں پی ہے

تمہارے رند نے توبہ بھی روبرو کر لی