شام کو جس وقت خالی ہاتھ گھر جاتا ہوں میں

مسکرا دیتے ہیں بچے اور مر جاتا ہوں میں

کسی دن زندگانی میں کرشمہ کیوں نہیں ہوتا

میں ہر دن جاگ تو جاتا ہوں زندہ کیوں نہیں ہوتا

یہاں ہر شخص ہر پل حادثہ ہونے سے ڈرتا ہے

کھلونا ہے جو مٹی کا فنا ہونے سے ڈرتا ہے

جتنی بٹنی تھی بٹ چکی یہ زمیں

اب تو بس آسمان باقی ہے

مرے دل کے کسی کونے میں اک معصوم سا بچہ

بڑوں کی دیکھ کر دنیا بڑا ہونے سے ڈرتا ہے

یہ جو زندگی کی کتاب ہے یہ کتاب بھی کیا کتاب ہے

کہیں اک حسین سا خواب ہے کہیں جان لیوا عذاب ہے

کس نے پایا سکون دنیا میں

زندگانی کا سامنا کر کے

دل بھی اک ضد پہ اڑا ہے کسی بچے کی طرح

یا تو سب کچھ ہی اسے چاہئے یا کچھ بھی نہیں

میں نے تو بعد میں توڑا تھا اسے

آئینہ مجھ پہ ہنسا تھا پہلے

دوستوں کا کیا ہے وہ تو یوں بھی مل جاتے ہیں مفت

روز اک سچ بول کر دشمن کمانے چاہئیں

کون پڑھتا ہے یہاں کھول کے اب دل کی کتاب

اب تو چہرے کو ہی اخبار کیا جانا ہے

کیا جانے کس جہاں میں ملے گا ہمیں سکون

ناراض ہیں زمیں سے خفا آسماں سے ہم

کچھ پرندوں کو تو بس دو چار دانے چاہئیں

کچھ کو لیکن آسمانوں کے خزانے چاہئیں

نیند کو ڈھونڈ کے لانے کی دوائیں تھیں بہت

کام مشکل تو کوئی خواب حسیں ڈھونڈھنا تھا

ملتے نہیں ہیں اپنی کہانی میں ہم کہیں

غائب ہوئے ہیں جب سے تری داستاں سے ہم

بہانہ کوئی تو اے زندگی دے

کہ جینے کے لئے مجبور ہو جاؤں

سفر میں اب کے عجب تجربہ نکل آیا

بھٹک گیا تو نیا راستہ نکل آیا

بلندی کے لیے بس اپنی ہی نظروں سے گرنا تھا

ہماری کم نصیبی ہم میں کچھ غیرت زیادہ تھی

کچھ اس طرح گزارا ہے زندگی کو ہم نے

جیسے کہ خود پہ کوئی احسان کر لیا ہے

مری اک زندگی کے کتنے حصے دار ہیں لیکن

کسی کی زندگی میں میرا حصہ کیوں نہیں ہوتا

دل بھی بچے کی طرح ضد پہ اڑا تھا اپنا

جو جہاں تھا ہی نہیں اس کو وہیں ڈھونڈھنا تھا

سب لوگ اس سے پہلے کہ دیوتا سمجھتے

ہم نے ذرا سا خود کو انسان کر لیا ہے

میسر مفت میں تھے آسماں کے چاند تارے تک

زمیں کے ہر کھلونے کی مگر قیمت زیادہ تھی

مری غزل میں کسی بے وفا کا ذکر نہ تھا

نہ جانے کیسے ترا تذکرہ نکل آیا

غم بک رہے تھے میلے میں خوشیوں کے نام پر

مایوس ہو کے لوٹے ہیں ہر اک دکاں سے ہم

کیا ایجاد جس نے بھی خدا کو

وہ خود کو کیسے بہلاتا تھا پہلے

ساتھ غالبؔ کے گئی فکر کی گہرائی بھی

اور لہجہ بھی گیا میرتقی میرؔ کے ساتھ

آدمی ہی کے بنائے ہوئے زنداں ہیں یہ سب

کوئی پیدا نہیں ہوتا کسی زنجیر کے ساتھ

اب تو سراب ہی سے بجھانے لگے ہیں پیاس

لینے لگے ہیں کام یقیں کا گماں سے ہم

بڑی تصویر لٹکا دی ہے اپنی

جہاں چھوٹا سا آئینہ تھا پہلے

اجازت کم تھی جینے کی مگر مہلت زیادہ تھی

ہمارے پاس مرنے کے لیے فرصت زیادہ تھی

سوچ لو کل کہیں آنسو نہ بہانے پڑ جائیں

خون کا کیا ہے رگوں میں وہ یونہی کھولتا ہے

ہاتھ اٹھاتا ہے دعاؤں کو فلک بھی اس دم

جب پرندہ کوئی پرواز کو پر تولتا ہے

جستجو کا اک عجب سلسلہ تا عمر رہا

خود کو کھونا تھا کہیں اور کہیں ڈھونڈھنا تھا

یا خدا اب کے یہ کس رنگ میں آئی ہے بہار

زرد ہی زرد ہے پیڑوں پہ ہرا کچھ بھی نہیں

وہ دل سے کم زباں ہی سے زیادہ بات کرتا تھا

جبھی اس کے یہاں گہرائی کم وسعت زیادہ تھی

مسئلہ یہ نہیں کہ عشق ہوا ہے ہم کو

مسئلہ یہ ہے کہ اظہار کیا جانا ہے

میری آنکھیں یہ کہا کرتی ہیں اکثر مجھ سے

آپ دیکھی ہوئی چیزوں کو بہت دیکھتے ہیں