اور بھی کتنے طریقے ہیں بیان غم کے

مسکراتی ہوئی آنکھوں کو تو پر نم نہ کرو

ہم تو ترے ذکر کا ہوئے جزو

تو نے ہمیں کس طرح بھلایا

مرنا بھی نہیں ہے اپنے بس میں

جینا بھی عذاب ہو گیا ہے

جانے مجھ میں ہے کون سی خوبی

لوگ رکھتے ہیں مجھ سے بیر بہت

فطرتؔ دل کونین کی دھڑکن تو ذرا سن

یہ حضرت انساں ہی کی عظمت کا بیاں ہے

ہائے یہ انتظار کا عالم

تھم گئے وقت کے قدم جیسے

زندگی قید روایات سے گھبراتی ہے

موج مستی میں کنارے سے اچھل جاتی ہے

حسن قسمت سے ہمیشہ فطرتؔ

بخت بیدار رہا خوابوں میں

دل یزداں کو آئے پیار جن پر

وہ غم انساں کے سینے میں پلے ہیں

اے سکوت شب غم مبارک تجھے

بولتا ہے قریب رگ جاں کوئی

وہی ناقدریٔ ابنائے جہاں ہے لیکن

جاں نثاری وہی ایمان وفا آج بھی ہے

نظر ہے بے زبانی کی زباں بھی

نظر پر بے زبانی ہے گراں بھی

معیار درد مندیٔ انساں کا کیا کہیں

جینے کی آرزو ہمیں ننگ وفا لگی