ہر ایک آنکھ میں ہوتی ہے منتظر کوئی آنکھ

ہر ایک دل میں کہیں کچھ جگہ نکلتی ہے

یاد بھی تیری مٹ گئی دل سے

اور کیا رہ گیا ہے ہونے کو

کہیں کوئی چراغ جلتا ہے

کچھ نہ کچھ روشنی رہے گی ابھی

بھر لائے ہیں ہم آنکھ میں رکھنے کو مقابل

اک خواب تمنا تری غفلت کے برابر

قصے سے ترے میری کہانی سے زیادہ

پانی میں ہے کیا اور بھی پانی سے زیادہ

ہم یقیناً یہاں نہیں ہوں گے

غالباً زندگی رہے گی ابھی

میں ٹھہرتا گیا رفتہ رفتہ

اور یہ دل اپنی روانی میں رہا

جس کام میں ہم نے ہاتھ ڈالا

وہ کام محال ہو گیا ہے

تو کہیں بیٹھ اور حکم چلا

ہم جو ہیں تیرا بوجھ ڈھونے کو

گو فراموشی کی تکمیل ہوا چاہتی ہے

پھر بھی کہہ دو کہ ہمیں یاد وہ آیا نہ کرے

فراق و وصل سے ہٹ کر کوئی رشتہ ہمارا ہے

کہ اس کو چھوڑ پاتا ہوں نہ اس کو تھام رکھتا ہوں

ڈھنگ کے ایک ٹھکانے کے لیے

گھر کا گھر نقل مکانی میں رہا

گنجائش افسوس نکل آتی ہے ہر روز

مصروف نہیں رہتا ہوں فرصت کے برابر

جو بھی یکجا ہے بکھرتا نظر آتا ہے مجھے

جانے یوں ہے بھی کہ ایسا نظر آتا ہے مجھے

یوں ہی نمٹا دیا ہے جس کو تو نے

وہ قصہ مختصر ایسا نہیں تھا

مرکز جاں تو وہی تو ہے مگر تیرے سوا

لوگ ہیں اور بھی اس یاد پرانی میں کہیں

کبھی تو ایسا ہے جیسے کہیں پہ کچھ بھی نہیں

کبھی یہ لگتا ہے جیسے یہاں وہاں کوئی ہے

یہ داغ عشق جو مٹتا بھی ہے چمکتا بھی ہے

یہ زخم ہے کہ نشاں ہے مجھے نہیں معلوم

ہر رخ ہے کہیں اپنے خد و خال سے باہر

ہر لفظ ہے کچھ اپنے معانی سے زیادہ

یہ اونٹ اور کسی کے ہیں دشت میرا ہے

سوار میرے نہیں سارباں نہیں میرا

یہ یقیں یہ گماں ہی ممکن ہے

تجھ سے ملنا یہاں ہی ممکن ہے