mujhe ḳhabar nahīñ ġham kyā hai aur ḳhushī kyā hai

ye zindagī kī hai sūrat to zindagī kyā hai

mujhe KHabar nahin gham kya hai aur KHushi kya hai

ye zindagi ki hai surat to zindagi kya hai

saaqī o vaa.iz meñ zid hai bāda-kash chakkar meñ hai

tauba lab par aur lab Duubā huā sāġhar meñ hai

saqi o waiz mein zid hai baada-kash chakkar mein hai

tauba lab par aur lab Duba hua saghar mein hai

kisī māshūq kā āshiq se ḳhafā ho jaanā

ruuh kā jism se goyā hai judā ho jaanā

kisi mashuq ka aashiq se KHafa ho jaana

ruh ka jism se goya hai juda ho jaana

hamārā intiḳhāb achchhā nahīñ ai dil to phir tū hī

ḳhayāl-e-yār se behtar koī mehmān paidā kar

hamara intiKHab achchha nahin ai dil to phir tu hi

KHayal-e-yar se behtar koi mehman paida kar

rok le ai zabt jo aañsū ki chashm-e-tar meñ hai

kuchh nahīñ bigḌā abhī tak ghar kī daulat ghar meñ hai

rok le ai zabt jo aansu ki chashm-e-tar mein hai

kuchh nahin bigDa abhi tak ghar ki daulat ghar mein hai