دل میں اب کچھ بھی نہیں ان کی محبت کے سوا

سب فسانے ہیں حقیقت میں حقیقت کے سوا

تمہاری ذات سے منسوب ہے دیوانگی میری

تمہیں سے اب مری دیوانگی دیکھی نہیں جاتی

کیسے ممکن ہے کہ ہم دونوں بچھڑ جائیں گے

اتنی گہرائی سے ہر بات کو سوچا نہ کرو

غم عقبیٰ غم دوراں غم ہستی کی قسم

اور بھی غم ہیں زمانے میں محبت کے سوا

تم پہ الزام نہ آ جائے سفر میں کوئی

راستہ کتنا ہی دشوار ہو ٹھہرا نہ کرو

مجھ سے یہ پوچھ رہے ہیں مرے احباب عزیزؔ

کیا ملا شہر سخن میں تمہیں شہرت کے سوا

اک وقت تھا کہ دل کو سکوں کی تلاش تھی

اور اب یہ آرزو ہے کہ درد نہاں رہے

محبت لفظ تو سادہ سا ہے لیکن عزیزؔ اس کو

متاع دل سمجھتے تھے متاع دل سمجھتے ہیں

جہاں میں ہم جسے بھی پیار کے قابل سمجھتے ہیں

حقیقت میں اسی کو زیست کا حاصل سمجھتے ہیں

تری محفل میں فرق کفر و ایماں کون دیکھے گا

فسانہ ہی نہیں کوئی تو عنواں کون دیکھے گا

خوشی محسوس کرتا ہوں نہ غم محسوس کرتا ہوں

بہر عالم تمہارا ہی کرم محسوس کرتا ہوں

مری تقدیر سے پہلے سنورنا جن کا مشکل ہے

تری زلفوں میں کچھ ایسے بھی خم محسوس کرتا ہوں

محتسب آؤ چلیں آج تو مے خانے میں

ایک جنت ہے وہاں آپ کی جنت کے سوا