مایوس دلوں کو اب چھیڑو بھی تو کیا حاصل

ٹوٹے ہوئے پیمانے فریاد نہیں کرتے

دل ہے مرا رنگینیٔ آغاز پہ مائل

نظروں میں ابھی جام ہے انجام نہیں ہے

فضا کا تنگ ہونا فطرت آزاد سے پوچھو

پر پرواز ہی کیا جو قفس کو آشیاں سمجھے

اک تیرا آسرا ہے فقط اے خیال دوست

سب بجھ گئے چراغ شب انتظار میں

کیا ملا عرض مدعا سے فگارؔ

بات کہنے سے اور بات گئی

ساقی نے نگاہوں سے پلا دی ہے غضب کی

رندان ازل دیکھیے کب ہوش میں آئیں

ان پہ قربان ہر خوشی کر دی

زندگی نذر زندگی کر دی

غم و الم سے جو تعبیر کی خوشی میں نے

بہت قریب سے دیکھی ہے زندگی میں نے

بقدر ذوق میرے اشک غم کی ترجمانی ہے

کوئی کہتا ہے موتی ہے کوئی کہتا ہے پانی ہے

پھولوں کو گلستاں میں کب راس بہار آئی

کانٹوں کو ملا جب سے اعجاز مسیحائی

ایک خواب و خیال ہے دنیا

اعتبار نظر کو کیا کہئے

حسرت دل نامکمل ہے کتاب زندگی

جوڑ دے ماضی کے سب اوراق مستقبل کے ساتھ

عجیب کشمکش ہے کیسے حرف مدعا کہوں

وہ پوچھتے ہیں حال دل میں سوچتا ہوں کیا کہوں

دل مرا شاکیٔ جفا نہ ہوا

یہ وفادار بے وفا نہ ہوا

کسی سے شکوۂ محرومئی نیاز نہ کر

یہ دیکھ لے کہ تری آرزو تو خام نہیں

شکست دل کی ہر آواز حشر آثار ہوتی ہے

مگر سوئی ہوئی دنیا کہاں بیدار ہوتی ہے

دل چوٹ سہے اور اف نہ کرے یہ ضبط کی منزل ہے لیکن

ساغر ٹوٹے آواز نہ ہو ایسا تو بہت کم ہوتا ہے

آداب عاشقی سے تو ہم بے خبر نہ تھے

دیوانے تھے ضرور مگر اس قدر نہ تھے

چھپ گیا دن قدم بڑھا راہی

دور منزل ہے مفت رات نہ کر

دیوانے کو مجاز و حقیقت سے کیا غرض

دیر و حرم ملے نہ ملے تیرا در ملے

کس کام کا ایسا دل جس میں رنجش ہے غبار ہے کینہ ہے

ہم کو ہے ضرورت اس دل کی سب جس کو کہیں آئینہ ہے

ہیں یہ جذبات مرے درد بھرے دل کے فگار

لفظ بن بن کے جو اشعار تک آ پہنچے ہیں

قدم قدم پہ دونوں جرم عشق میں شریک ہیں

نظر کو بے خطا کہوں کہ دل کو بے خطا کہوں

دل کی بنیاد پہ تعمیر کر ایوان حیات

قصر شاہی تو ذرا دیر میں ڈھ جاتے ہیں

میری جبین شوق نے سجدے جہاں کئے

وہ آستاں بنا جو کبھی آستاں نہ تھا

ترے غم کے سامنے کچھ غم دو جہاں نہیں ہے

ہے جہاں ترا تصور وہاں این و آں نہیں ہے

یقین وعدۂ فردا ہمیں باور نہیں آتا

زباں سے لاکھ کہئے آپ کے تیور نہیں کہتے

سر محفل ہمارے دل کو لوٹا چشم ساقی نے

ادھر تقدیر گردش میں ادھر گردش میں جام آیا

قدم اپنے حریم ناز میں اس شوق سے رکھنا

کہ جو دیکھے مرے دل کو تمہارا آستاں سمجھے

محفل کون و مکاں تیری ہی بزم ناز ہے

ہم کہاں جائیں گے اس محفل سے اٹھ جانے کے بعد

کعبہ بھی گھر اپنا ہے صنم خانہ بھی اپنا

ہر حسن کا جلوہ مرا ایمان نظر ہے

کعبے میں ہو یا بت خانے میں ہونے کو تو سر خم ہوتا ہے

ہوتا ہے جہاں تو جلوہ نما کچھ اور ہی عالم ہوتا ہے

پرتو حسن سے ذرے بھی بنے آئینے

کتنے جلوے کئے ارزاں تری رعنائی نے