غم دل اب کسی کے بس کا نہیں

کیا دوا کیا دعا کرے کوئی

تم عزیز اور تمہارا غم بھی عزیز

کس سے کس کا گلا کرے کوئی

وہ پوچھتے ہیں دل مبتلا کا حال اور ہم

جواب میں فقط آنسو بہائے جاتے ہیں

اس نے اس انداز سے دیکھا مجھے

زندگی بھر کا گلہ جاتا رہا

مرا وجود حقیقت مرا عدم دھوکا

فنا کی شکل میں سرچشمۂ بقا ہوں میں

بے درد مجھ سے شرح غم زندگی نہ پوچھ

کافی ہے اس قدر کہ جیے جا رہا ہوں میں

اب وہ پیری میں کہاں عہد جوانی کی امنگ

رنگ موجوں کا بدل جاتا ہے ساحل کے قریب

اب کیوں گلہ رہے گا مجھے ہجر یار کا

بے تابیوں سے لطف اٹھانے لگا ہوں میں

اٹھنے کو تو اٹھا ہوں محفل سے تری لیکن

اب دل کو یہ دھڑکا ہے جاؤں تو کدھر جاؤں

لطف جفا اسی میں ہے یاد جفا نہ آئے پھر

تجھ کو ستم کا واسطہ مجھ کو مٹا کے بھول جا

غضب ہے یہ احساس وارستگی کا

کہ تجھ سے بھی خود کو بری چاہتا ہوں

تو ہے بہار تو دامن مرا ہو کیوں خالی

اسے بھی بھر دے گلوں سے تجھے خدا کی قسم

اشک غم عقدہ کشائے خلش جاں نکلا

جس کو دشوار میں سمجھا تھا وہ آساں نکلا

دل سرشار مرا چشم سیہ مست تری

جذبہ ٹکرا دے نہ پیمانے سے پیمانے کو