وہ کسی کو یاد کر کے مسکرایا تھا ادھر

اور میں نادان یہ سمجھا کہ وہ میرا ہوا

آج پھر نیند کو آنکھوں سے بچھڑتے دیکھا

آج پھر یاد کوئی چوٹ پرانی آئی

مدتوں بعد میسر ہوا ماں کا آنچل

مدتوں بعد ہمیں نیند سہانی آئی

نہ جانے کتنے چراغوں کو مل گئی شہرت

اک آفتاب کے بے وقت ڈوب جانے سے

لے گئیں دور بہت دور ہوائیں جس کو

وہی بادل تھا مری پیاس بجھانے والا

سوچتا ہوں تری تصویر دکھا دوں اس کو

روشنی نے کبھی سایہ نہیں دیکھا اپنا

سنو سمندر کی شوخ لہرو ہوائیں ٹھہری ہیں تم بھی ٹھہرو

وہ دور ساحل پہ ایک بچہ ابھی گھروندے بنا رہا ہے

ٹھہری ٹھہری سی طبیعت میں روانی آئی

آج پھر یاد محبت کی کہانی آئی

وہی تو مرکزی کردار ہے کہانی کا

اسی پہ ختم ہے تاثیر بے وفائی کی

پیاس دریا کی نگاہوں سے چھپا رکھی ہے

ایک بادل سے بڑی آس لگا رکھی ہے

کسی کو کھو کے پا لیا کسی کو پا کے کھو دیا

نہ انتہا خوشی کی ہے نہ انتہا ملال کی

تیری باتوں کو چھپانا نہیں آتا مجھ سے

تو نے خوشبو مرے لہجے میں بسا رکھی ہے

پھر ترا ذکر کیا باد صبا نے مجھ سے

پھر مرے دل کو دھڑکنے کے بہانے آئے

تیرے کردار کو اتنا تو شرف حاصل ہے

تو نہیں تھا تو کہانی میں حقیقت کم تھی

آرزو ہے سورج کو آئنہ دکھانے کی

روشنی کی صحبت میں ایک دن گزارا ہے

سبھی اپنے نظر آتے ہیں بظاہر لیکن

روٹھنے والا ہے کوئی نہ منانے والا

مدتوں بعد پشیماں ہوا دریا ہم سے

مدتوں بعد ہمیں پیاس چھپانی آئی

جو اس کے ہونٹوں کی جنبش میں قید تھا اشہرؔ

وہ ایک لفظ بنا بوجھ میرے شانوں کا

ویسے بھی اس سے کوئی ربط نہ رکھا میں نے

یوں بھی دنیا میں کشش تیری بہ نسبت کم تھی