سب نے بنا بنا کے تماشا ہمیں تمہیں

حیرت ہوئی جو غور سے دیکھا ہمیں تمہیں

ان کا غم ان کا تصور ان کی یاد

کٹ رہی ہے زندگی آرام سے

بڑی طویل ہے محشرؔ کسی کے ہجر کی بات

کوئی غزل ہی سناؤ کہ نیند آ جائے

چلے بھی آؤ مرے جیتے جی اب اتنا بھی

نہ انتظار بڑھاؤ کہ نیند آ جائے

نہ غیر ہی مجھے سمجھو نہ دوست ہی سمجھو

مرے لیے یہ بہت ہے کہ آدمی سمجھو

ہر ایک بات زباں سے کہی نہیں جاتی

جو چپکے بیٹھے ہیں کچھ ان کی بات بھی سمجھو

قسم جب اس نے کھائی ہم نے اعتبار کر لیا

ذرا سی دیر زندگی کو خوش گوار کر لیا

میں دیوانہ سہی لیکن وہ خوش قسمت ہوں اے محشرؔ

کہ دنیا کی زباں پر آ گیا ہے آج نام اپنا

کسی کی بزم کے حالات نے سمجھا دیا مجھ کو

کہ جب ساقی نہیں اپنا تو مے اپنی نہ جام اپنا

اگر اپنے دل بیتاب کو سمجھا لیا میں نے

تو یہ کافر نگاہیں کر سکیں گی انتظام اپنا

نہ باتیں کرے ہے نہ دیکھا کرے ہے

مگر میرے بارے میں سوچا کرے ہے

لب پہ اک نام ہمیشہ کی طرح

اور کیا کام ہمیشہ کی طرح

اک انہیں دیکھو اک مجھے دیکھو

وقت کتنا کرشمہ کار سا ہے

سنتے تھے محشرؔ کبھی پتھر بھی ہو جاتا ہے موم

آج وہ آئے تو پلکوں کو بھگونا پڑ گیا