کسی سے رسم و رہ دوستی تو کیا کرتے

ہمارا خود سے تعارف بھی غائبانہ تھا

یہ سوچ کر بھی ہنس نہ سکے ہم شکستہ دل

یاران غم گسار کا دل ٹوٹ جائے گا

طوفان غم کی تند ہواؤں کے باوجود

اک شمع آرزو ہے جو اب تک بجھی نہیں

ترا ہجر میرا نصیب ہے ترا غم ہی میری حیات ہے

مجھے تیری دوری کا غم ہو کیوں تو کہیں بھی ہو مرے پاس ہے

اتنا بھی ناامید دل کم نظر نہ ہو

ممکن نہیں کہ شام الم کی سحر نہ ہو

محفل ان کی ساقی ان کا

آنکھیں اپنی باقی ان کا

محسوس بھی ہو جائے تو ہوتا نہیں بیاں

نازک سا ہے جو فرق گناہ و ثواب میں

اللہ رے بے خودی کہ ترے پاس بیٹھ کر

تیرا ہی انتظار کیا ہے کبھی کبھی

عقل سے صرف ذہن روشن تھا

عشق نے دل میں روشنی کی ہے

گناہوں سے ہمیں رغبت نہ تھی مگر یا رب

تری نگاہ کرم کو بھی منہ دکھانا تھا

خدا سے کیا محبت کر سکے گا

جسے نفرت ہے اس کے آدمی سے

کسی کے جور و ستم کا تو اک بہانا تھا

ہمارے دل کو بہرحال ٹوٹ جانا تھا

زندگی سے تو خیر شکوہ تھا

مدتوں موت نے بھی ترسایا

زندگی نام ہے جدائی کا

آپ آئے تو مجھ کو یاد آیا

خدا سے لوگ بھی خائف کبھی تھے

مگر لوگوں سے اب خائف خدا ہے

تو مرے غم میں نہ ہنستی ہوئی آنکھوں کو رلا

میں تو مر مر کے بھی جی سکتا ہوں میرا کیا ہے