apnī mastī ki tire qurb kī sarshārī meñ

ab maiñ kuchh aur bhī āsān huuñ dushvārī meñ

apni masti ki tere qurb ki sarshaari mein

ab main kuchh aur bhi aasan hun dushwari mein

ḳhalā meñ tairte phirte haiñ haath pakḌe hue

zamīñ kī ek sadī ek saal sūraj kā

KHala mein tairte phirte hain hath pakDe hue

zamin ki ek sadi ek sal suraj ka

maiñ de rahā huuñ tujhe ḳhud se iḳhtilāf kā haq

ye iḳhtilāf kā haq hai muḳhālifat kā nahīñ

main de raha hun tujhe KHud se iKHtilaf ka haq

ye iKHtilaf ka haq hai muKHalifat ka nahin

merā ye dukh ki maiñ sikka huuñ ga.e vaqtoñ kā

terā ho kar bhī tire kaam nahīñ aa saktā

mera ye dukh ki main sikka hun gae waqton ka

tera ho kar bhi tere kaam nahin aa sakta

tire makāñ kā taqaddus aziiz thā itnā

maiñ aa rahā huuñ galī se pare utaar ke paañv

tere makan ka taqaddus aziz tha itna

main aa raha hun gali se pare utar ke panw