ham siiñ mastoñ ko bas hai terī nigāh

sub.h uTh kar ḳhumār kī ḳhātir

hum sin maston ko bas hai teri nigah

subh uTh kar KHumar ki KHatir

maiñ us kī chashm se aisā girā huuñ

mire rone pe hañstā hai mirā dil

main us ki chashm se aisa gira hun

mere rone pe hansta hai mera dil

gulshan-e-dahr meñ sau rañg haiñ 'hātim' us ke

vo kahīñ gul hai kahīñ bū hai kahīñ buuTā hai

gulshan-e-dahr mein sau rang hain 'hatim' us ke

wo kahin gul hai kahin bu hai kahin buTa hai

qayāmat tak judā hove na yā-rab

junūñ ke dast se merā garebāñ

qayamat tak juda howe na ya-rab

junun ke dast se mera gareban

raat din jaarī haiñ kuchh paidā nahīñ in kā kanār

mere chashmoñ kā do-ābā majma-ul-bahrain hai

raat din jari hain kuchh paida nahin in ka kanar

mere chashmon ka do-aba majma-ul-bahrain hai

nahīñ hai shikva agar vo nazar nahīñ aatā

kisū ne dekhī nahīñ apnī jaan kī sūrat

nahin hai shikwa agar wo nazar nahin aata

kisu ne dekhi nahin apni jaan ki surat

kohkan jāñ-kanī hai mushkil kaam

varna bahtere haiñ pathar phoḌe

kohkan jaan-kani hai mushkil kaam

warna bahtere hain pathar phoDe

nāseh baġhal meñ aa kar dushman huā hamārā

jā.egā kab ilāhī majlis se ḳhaar dil kā

naseh baghal mein aa kar dushman hua hamara

jaega kab ilahi majlis se KHar dil ka

gadā ko gar qanā.at ho to phāTā chīthaḌā bas hai

vagarna hirs aage thaan sau gaz kā lañgoTī hai

gada ko gar qanaat ho to phaTa chithaDa bas hai

wagarna hirs aage than sau gaz ka langoTi hai

jis ke muñh kī utar ga.ī loī

ġham nahīñ us ko kuchh kaho koī

jis ke munh ki utar gai loi

gham nahin us ko kuchh kaho koi

rishta-e-umar-darāz apnā maiñ kotāh karūñ

aave ye taar agar tere ba-kār-e-dāman

rishta-e-umar-daraaz apna main kotah karun

aawe ye tar agar tere ba-kar-e-daman

tirī mehrāb meñ abrū kī ye ḳhaal

kidhar se aa gayā masjid meñ hindū

teri mehrab mein abru ki ye KHal

kidhar se aa gaya masjid mein hindu

kyūñkar in kaalī balāoñ se bachegā āshiq

ḳhat siyah ḳhaal siyah zulf siyah chashm siyāh

kyunkar in kali balaon se bachega aashiq

KHat siyah KHal siyah zulf siyah chashm siyah

aariz se us ke zulf meñ kyūñ-kar hai raushnī

zulmāt meñ to naam nahīñ āftāb kā

aariz se us ke zulf mein kyun-kar hai raushni

zulmat mein to nam nahin aaftab ka

kyuuñ mozāhim hai mere aane se

kui tirā ghar nahīñ ye rastā hai

kyun mozahim hai mere aane se

kui tera ghar nahin ye rasta hai

kapḌe safed dho ke jo pahne to kyā huā

dhonā vahī jo dil kī siyāhī ko dhoiye

kapDe safed dho ke jo pahne to kya hua

dhona wahi jo dil ki siyahi ko dhoiye

phaḌkūñ to sar phaTe hai na phaḌkūñ to jī ghaTe

tañg is qadar diyā mujhe sayyād ne qafas

phaDkun to sar phaTe hai na phaDkun to ji ghaTe

tang is qadar diya mujhe sayyaad ne qafas

kabhū jo shaiḳh dikhā.ūñ maiñ apne but ke ta.iiñ

ba-rabb-e-ka.aba tujhe hasrat-e-haram na rahe

kabhu jo shaiKH dikhaun main apne but ke tain

ba-rabb-e-kaba tujhe hasrat-e-haram na rahe

na maiñ ne kuchh kahā tujh se na tū ne mujh se kuchh pūchhā

yūñhī din raat milte mujh ko tujh ko merī jaañ guzrā

na main ne kuchh kaha tujh se na tu ne mujh se kuchh puchha

yunhi din raat milte mujh ko tujh ko meri jaan guzra

TuuTe dil ko banā dikhāve

aisā koī kārī-gar na dekhā

TuTe dil ko bana dikhawe

aisa koi kari-gar na dekha

kis se kahūñ maiñ hāl-e-dil apnā ki tā sune

is shahr meñ rahā bhī koī dard-mañd hai

kis se kahun main haal-e-dil apna ki ta sune

is shahr mein raha bhi koi dard-mand hai

zāhid ko ham ne dekh ḳharābāt meñ kahā

masjid ko apnī chhoḌ kaho tum yahāñ kahāñ

zahid ko hum ne dekh KHarabaat mein kaha

masjid ko apni chhoD kaho tum yahan kahan

kyā madrase meñ dahr ke ulTī havā bahī

vaa.iz nahī ko amr kahe amr ko nahī

kya madrase mein dahr ke ulTi hawa bahi

waiz nahi ko amr kahe amr ko nahi

kesar meñ is tarah se ālūda hai sarāpā

sunte the ham so dekhā to shāḳh-e-za.afarāñ hai

kesar mein is tarah se aaluda hai sarapa

sunte the hum so dekha to shaKH-e-zafaran hai

dil-e-ushshāq parindoñ kī tarah uḌte haiñ

is bayābān meñ kyā ek bhī sayyād nahīñ

dil-e-ushshaq parindon ki tarah uDte hain

is bayaban mein kya ek bhi sayyaad nahin

dostoñ se dushmanī aur dushmanoñ se dostī

be-muravvat bevafā be-rahm ye kyā Dhañg hai

doston se dushmani aur dushmanon se dosti

be-murawwat bewafa be-rahm ye kya Dhang hai

sabr bin aur kuchh na lo hamrāh

kūcha-e-ishq tañg hai yaaro

sabr bin aur kuchh na lo hamrah

kucha-e-ishq tang hai yaro

ḳhūbān-e-jahāñ hoñ jis se tasḳhīr

aisā koī ham ne hunar na dekhā

KHuban-e-jahan hon jis se tasKHir

aisa koi hum ne hunar na dekha

mirī bātoñ se ab āzurda na honā saaqī

is ghaḌī aql mirī mujh se judā phirtī hai

meri baaton se ab aazurda na hona saqi

is ghaDi aql meri mujh se juda phirti hai

rone talak to kis ko hai fursat yahāñ sahāb

tūfāñ huā bhī jo Tuk ik āb-dīda huuñ

rone talak to kis ko hai fursat yahan sahab

tufan hua bhi jo Tuk ek aab-dida hun

dekh kar har uzv un kā dil ho paanī bah chalā

khol chhātī be-takalluf jab nahā.eñ baaġh meñ

dekh kar har uzw un ka dil ho pani bah chala

khol chhati be-takalluf jab nahaen bagh mein

hastī se tā-adam hai safar do qadam kī raah

kyā chāhiye hai ham ko sar anjām ke liye

hasti se ta-adam hai safar do qadam ki rah

kya chahiye hai hum ko sar anjam ke liye

ham bahut dekhe farañgistān ke husn-e-sabīh

charb hai sab par butān-e-hind kā rañg-e-malīh

hum bahut dekhe farangistan ke husn-e-sabih

charb hai sab par butan-e-hind ka rang-e-malih

dil kī lahroñ kā tūl-o-arz na pūchh

kabhū dariyā kabhū safīnā hai

dil ki lahron ka tul-o-arz na puchh

kabhu dariya kabhu safina hai

vo vahshī is qadar bhaḌkā hai sūrat se mire yaaro

ki apne dekh saa.e ko mujhe hamrāh jaane hai

wo wahshi is qadar bhaDka hai surat se mere yaro

ki apne dekh sae ko mujhe hamrah jaane hai

ilāhī tujh se ab kahtā hai 'hātim' is zamāne meñ

sharam rakhnā bharam rakhnā dharam rakhnā karam rakhnā

ilahi tujh se ab kahta hai 'hatim' is zamane mein

sharam rakhna bharam rakhna dharam rakhna karam rakhna

itnā maiñ intizār kiyā us kī raah meñ

jo rafta rafta dil mirā bīmār ho gayā

itna main intizar kiya us ki rah mein

jo rafta rafta dil mera bimar ho gaya

tere aane se yū ḳhushī hai dil

juuñ ki bulbul bahār kī ḳhātir

tere aane se yu KHushi hai dil

jun ki bulbul bahaar ki KHatir

koī hai surḳh-posh koī zard-posh hai

aa dekh bazm meñ ki huī hai bahār-e-jām

koi hai surKH-posh koi zard-posh hai

aa dekh bazm mein ki hui hai bahaar-e-jam

vasf añkhiyoñ kā likhā ham ne gul-e-bādām par

kar ke nargis ko qalam aur chashm-e-āhū kī davāt

wasf ankhiyon ka likha hum ne gul-e-baadam par

kar ke nargis ko qalam aur chashm-e-ahu ki dawat

rahn-e-sharāb-ḳhāna kiyā shaiḳh haif hai

jo pairahan banāyā thā ehrām ke liye

rahn-e-sharab-KHana kiya shaiKH haif hai

jo pairahan banaya tha ehram ke liye

mastoñ kā dil hai shīsha aur sañg-dil hai saaqī

achraj hai jo na TuuTe patthar se ābgīna

maston ka dil hai shisha aur sang-dil hai saqi

achraj hai jo na TuTe patthar se aabgina

tirī nigah se ga.e khul kivāḌ chhātī ke

hisār-e-qalb kī goyā thī fat.h tere naam

teri nigah se gae khul kiwaD chhati ke

hisar-e-qalb ki goya thi fath tere nam

bas nahīñ chaltā jo us dam un ke uupar gar paḌe

āshiq o ma.ashūq ko jab ek jā paatā hai charḳh

bas nahin chalta jo us dam un ke upar gar paDe

aashiq o mashuq ko jab ek ja pata hai charKH

suno hindū musalmāno ki faiz-e-ishq se 'hātim'

huā āzād qaid-e-maz.hab-o-mashrab se ab fāriġh

suno hindu musalmano ki faiz-e-ishq se 'hatim'

hua aazad qaid-e-mazhab-o-mashrab se ab farigh

jā bhiḌātā hai hamesha mujhe ḳhūñ-ḳhvāroñ se

dil baġhal-bīch mirā dushman-e-jāñ hai goyā

ja bhiData hai hamesha mujhe KHun-KHwaron se

dil baghal-bich mera dushman-e-jaan hai goya

fānūs tan meñ dekh le raushan haiñ juuñ charāġh

jo daaġh dil pe ishq meñ tere diye haiñ ham

fanus tan mein dekh le raushan hain jun charagh

jo dagh dil pe ishq mein tere diye hain hum

hājat charāg kī hai kab anjuman meñ dil ke

mānind-e-sham.a raushan har ek ustuḳhvāñ hai

hajat charag ki hai kab anjuman mein dil ke

manind-e-shama raushan har ek ustuKHwan hai

kabhū pahuñchī na us ke dil talak rah hī meñ thak baiThī

bajā is āh-e-be-tāsīr par tāsīr hañstī hai

kabhu pahunchi na us ke dil talak rah hi mein thak baiThi

baja is aah-e-be-tasir par tasir hansti hai

sham.a har shaam tere rone par

sub.h-dam tak charāġh hañstā hai

shama har sham tere rone par

subh-dam tak charagh hansta hai