Search result for

SEARCH RESULTS

Showing search results for "dhotii"

MOST RELEVANT MATCHES FOR "dhotii"

Nazm

walida marhuma ki yaad mein

zarra zarra dahr kaa zindaanii-e-taqdiir hai
parda-e-majbuurii o bechaargii tadbiir hai
aasmaa.n majbuur hai shams o qamar majbuur hai.n
anjum-e-siimaab-paa raftaar par majbuur hai.n
hai shikast anjaam Gunche kaa subuu gulzaar me.n
sabza o gul bhii hai.n majbuur-e-numuu gulzaar me.n
naGma-e-bulbul ho yaa aavaaz-e-KHaamosh-e-zamiir
hai isii zanjiir-e-aalam-giir me.n har shai asiir
aa.nkh par hotaa hai jab ye sirr-e-majbuurii ayaa.n
KHushk ho jaataa hai dil me.n ashk kaa sail-e-ravaa.n
qalb-e-insaanii me.n raqs-e-aish-o-Gam rahtaa nahii.n
naGma rah jaataa hai lutf-e-zer-o-bam rahtaa nahii.n
ilm o hikmat rahzan-e-saamaan-e-ashk-o-aah hai
ya.anii ik almaas kaa Tuk.Daa dil-e-aagaah hai
garche mere baaG me.n shabnam kii shaadaabii nahii.n
aa.nkh merii maaya-daar-e-ashk-e-unnaabii nahii.n
jaantaa huu.n aah me.n aalaam-e-insaanii kaa raaz
hai navaa-e-shikva se KHaalii mirii fitrat kaa saaz
mere lab par qissa-e-naira.ngi-e-dauraa.n nahii.n
dil miraa hairaa.n nahii.n KHanda nahii.n giryaa.n nahii.n
par tirii tasviir qaasid girya-e-paiham kii hai
aah ye tardiid merii hikmat-e-mohkam kii hai
girya-e-sarshaar se buniyaad-e-jaa.n paa.inda hai
dard ke irfaa.n se aql-e-sa.ng-dil sharminda hai
mauj-e-duud-e-aah se aa.iina hai raushan miraa
ganj-e-aab-aavrd se maamuur hai daaman miraa
hairatii huu.n mai.n tirii tasviir ke e.ajaaz kaa
ruKH badal Daalaa hai jis ne vaqt kii parvaaz kaa
rafta o haazir ko goyaa paa-ba-paa is ne kiyaa
ahd-e-tiflii se mujhe phir aashnaa is ne kiyaa
jab tire daaman me.n paltii thii vo jaan-e-naa-tavaa.n
baat se achchhii tarah mahram na thii jis kii zabaa.n
aur ab charche hai.n jis kii shoKHii-e-guftaar ke
be-bahaa motii hai.n jis kii chashm-e-gauhar-baar ke
ilm kii sa.njiida-guftaarii bu.Dhaape kaa shu.uur
dunyavii e.azaaz kii shaukat javaanii kaa Guruur
zindagii kii auj-gaaho.n se utar aate hai.n ham
sohbat-e-maadar me.n tifl-e-saada rah jaate hai.n ham
be-takalluf KHanda-zan hai.n fikr se aazaad hai.n
phir usii kho.e hu.e firdaus me.n aabaad hai.n
kis ko ab hogaa vatan me.n aah meraa intizaar
kaun meraa KHat na aane se rahegaa be-qaraar
KHaak-e-marqad par tirii le kar ye fariyaad aa.uu.ngaa
ab du.aa-e-niim-shab me.n kis ko mai.n yaad aa.uu.ngaa
tarbiyat se terii me.n anjum kaa ham-qismat hu.aa
ghar mire ajdaad kaa sarmaaya-e-izzat hu.aa
daftar-e-hastii me.n thii zarrii.n varaq terii hayaat
thii saraapaa diin o duniyaa kaa sabaq terii hayaat
umr bhar terii mohabbat merii KHidmat-gar rahii
mai.n tirii KHidmat ke qaabil jab hu.aa tuu chal basii
vo javaa.n-qaamat me.n hai jo suurat-e-sarv-e-buland
terii KHidmat se hu.aa jo mujh se ba.Dh kar bahra-mand
kaarobaar-e-zindagaanii me.n vo ham-pahluu miraa
vo mohabbat me.n tirii tasviir vo baazuu miraa
tujh ko misl-e-tiflak-e-be-dast-o-paa rotaa hai vo
sabr se naa-aashnaa sub.h o masaa rotaa hai vo
tuKHm jis kaa tuu hamaarii kisht-e-jaa.n me.n bo ga.ii
shirkat-e-Gam se vo ulfat aur mohkam ho ga.ii
aah ye duniyaa ye maatam-KHaana-e-barnaa-o-piir
aadmii hai kis tilism-e-dosh-o-fardaa me.n asiir
kitnii mushkil zindagii hai kis qadar aasaa.n hai maut
gulshan-e-hastii me.n maanind-e-nasiim arzaa.n hai maut
zalzale hai.n bijliyaa.n hai.n qaht hai.n aalaam hai.n
kaisii kaisii duKHtaraan-e-maadar-e-ayyaam hai.n
kalba-e-iflaas me.n daulat ke kaashaane me.n maut
dasht o dar me.n shahr me.n gulshan me.n viiraane me.n maut
maut hai ha.ngaama-aaraa qulzum-e-KHaamosh me.n
Duub jaate hai.n safiine mauj kii aaGosh me.n
ne majaal-e-shikva hai ne taaqat-e-guftaar hai
zindagaanii kyaa hai ik tauq-e-guluu-afshaar hai
qaafile me.n Gair fariyaad-e-diraa kuchh bhii nahii.n
ik mataa-e-diida-e-tar ke sivaa kuchh bhii nahii.n
KHatm ho jaa.egaa lekin imtihaa.n kaa daur bhii
hai.n pas-e-noh parda-e-garduu.n abhii daur aur bhii
siina chaak is gulsitaa.n me.n laala-o-gul hai.n to kyaa
naala o fariyaad par majbuur bulbul hai.n to kyaa
jhaa.Diyaa.n jin ke qafas me.n qaid hai aah-e-KHizaa.n
sabz kar degii unhe.n baad-e-bahaar-e-jaavedaa.n
KHufta-KHaak-e-pai sipar me.n hai sharaar apnaa to kyaa
aarzii mahmil hai ye musht-e-Gubaar apnaa to kyaa
zindagii kii aag kaa anjaam KHaakistar nahii.n
TuuTnaa jis kaa muqaddar ho ye vo gauhar nahii.n
zindagii mahbuub aisii diida-e-qudrat me.n hai
zauq-e-hifz-e-zindagii har chiiz kii fitrat me.n hai
maut ke haatho.n se miT saktaa agar naqsh-e-hayaat
aam yuu.n us ko na kar detaa nizaam-e-kaa.enaat
hai agar arzaa.n to ye samjho ajal kuchh bhii nahii.n
jis tarah sone se jiine me.n KHalal kuchh bhii nahii.n
aah Gaafil maut kaa raaz-e-nihaa.n kuchh aur hai
naqsh kii naa-paa.edaarii se ayaa.n kuchh aur hai
jannat-e-nazaara hai naqsh-e-havaa baalaa-e-aab
mauj-e-muztar to.D kar ta.amiir kartii hai habaab
mauj ke daaman me.n phir us ko chhupaa detii hai ye
kitnii bedardii se naqsh apnaa miTaa detii hai ye
phir na kar saktii habaab apnaa agar paidaa havaa
to.Dne me.n us ke yuu.n hotii na be-parvaa havaa
is ravish kaa kyaa asar hai haiyat-e-taamiir par
ye to hujjat hai havaa kii quvvat-e-taamiir par
fitrat-e-hastii shahiid-e-aarzuu rahtii na ho
KHuub-tar paikar kii us ko justujuu rahtii na ho
aah siimaab-e-pareshaa.n anjum-e-garduu.n-faroz
shoKH ye chi.ngaariyaa.n mamnuun-e-shab hai jin kaa soz
aql jis se sar-ba-zaanuu hai vo muddat in kii hai
sarguzisht-e-nau-e-insaa.n ek saa.at un kii hai
phir ye insaa.n aa.n suu-e-aflaak hai jis kii nazar
qudsiyo.n se bhii maqaasid me.n hai jo paakiiza-tar
jo misaal-e-sham.a raushan mahfil-e-qudrat me.n hai
aasmaa.n ik nuqta jis kii vus.at-e-fitrat me.n hai
jis kii naadaanii sadaaqat ke liye betaab hai
jis kaa naaKHun saaz-e-hastii ke liye mizraab hai
sho.ala ye kam-tar hai garduu.n ke sharaaro.n se bhii kyaa
kam-bahaa hai aaftaab apnaa sitaaro.n se bhii kyaa
tuKHm-e-gul kii aa.nkh zer-e-KHaak bhii be-KHvaab hai
kis qadar nashv-o-numaa ke vaaste betaab hai
zindagii kaa sho.ala is daane me.n jo mastuur hai
KHud-numaa.ii KHud-fazaa.ii ke liye majbuur hai
sardi-e-marqad se bhii afsurda ho saktaa nahii.n
KHaak me.n dab kar bhii apnaa soz kho saktaa nahii.n
phuul ban kar apnii turbat se nikal aataa hai ye
maut se goyaa qabaa-e-zindagii paataa hai ye
hai lahad is quvvat-e-aashufta kii shiiraaza-band
Daaltii hai gardan-e-garduu.n me.n jo apnii kamand
maut tajdiid-e-mazaaq-e-zindagii kaa naam hai
KHvaab ke parde me.n bedaarii kaa ik paiGaam hai
KHuugar-e-parvaaz ko parvaaz me.n Dar kuchh nahii.n
maut is gulshan me.n juz sanjiidan-e-par kuchh nahii.n
kahte hai.n ahl-e-jahaa.n dard-e-ajal hai laa-davaa
zaKHm-e-furqat vaqt ke marham se paataa hai shifaa
dil magar Gam marne vaalo.n kaa jahaa.n aabaad hai
halqa-e-zanjiir-e-sub.h-o-shaam se aazaad hai
vaqt ke afsuu.n se thamtaa naala-e-maatam nahii.n
vaqt zaKHm-e-teG-e-furqat kaa ko.ii marham nahii.n
sar pe aa jaatii hai jab ko.ii musiibat naa-gahaa.n
ashk paiham diida-e-insaa.n se hote hai.n ravaa.n
rabt ho jaataa hai dil ko naala o fariyaad se
KHuun-e-dil bahtaa hai aa.nkho.n kii sarishk-aabaad se
aadmii taab-e-shakebaa.ii se go mahruum hai
us kii fitrat me.n ye ik ehsaas-e-naa-maaluum hai
jauhar-e-insaa.n adam se aashnaa hotaa nahii.n
aa.nkh se Gaa.eb to hotaa hai fanaa hotaa nahii.n
raKHt-e-hastii KHaak-e-Gam kii sho.ala-afshaanii se hai
sard ye aag is latiif ehsaas ke paanii se hai
aah ye zabt-e-fuGaa.n Gaflat kii KHaamoshii nahii.n
aagahii hai ye dilaasaa.ii faraamoshii nahii.n
parda-e-mashriq se jis dam jalva-gar hotii hai sub.h
daaG shab kaa daaman-e-aafaaq se dhotii hai sub.h
laala-e-afsurda ko aatish-qabaa kartii hai ye
be-zabaa.n taa.ir ko sarmast-e-navaa kartii hai ye
siina-e-bulbul ke zindaa.n se sarod aazaad hai
saik.Do.n naGmo.n se baad-e-sub.h-dam-aabaad hai
KHuftagaan-e-laala-zaar o kohsaar o ruud baar
hote hai.n aaKHir uruus-e-zindagii se ham-kanaar
ye agar aa.iin-e-hastii hai ki ho har shaam sub.h
marqad-e-insaa.n kii shab kaa kyuu.n na ho anjaam sub.h
daam-e-siimiin-e-taKHayyul hai miraa aafaaq-giir
kar liyaa hai jis se terii yaad ko mai.n ne asiir
yaad se terii dil-e-dard aashnaa maamuur hai
jaise ka.abe me.n du.aa.o.n se fazaa maamuur hai
vo faraa.ez kaa tasalsul naam hai jis kaa hayaat
jalva-gaahe.n us kii hai.n laakho.n jahaan-e-be-sabaat
muKHtalif har manzil-e-hastii ko rasm-o-raah hai
aaKHirat bhii zindagii kii ek jaulaa.n-gaah hai
hai vahaa.n be-haasilii kisht-e-ajal ke vaaste
saazgaar aab-o-havaa tuKHm-e-amal ke vaaste
nuur-e-fitrat zulmat-e-paikar kaa zindaanii nahii.n
ta.ng aisaa halqa-e-afkaar-e-insaanii nahii.n
zindagaanii thii tirii mahtaab se taabinda-tar
KHuub-tar thaa sub.h ke taare se bhii teraa safar
misl-e-aivaan-e-sahar marqad farozaa.n ho tiraa
nuur se maamuur ye KHaakii shabistaa.n ho tiraa
aasmaa.n terii lahad par shabnam-afshaanii kare
sabza-e-nau-rasta is ghar kii nigahbaanii kare

Allama Iqbal

Ghazal

'umr-e-safar jaarii hai bas ye khel dekhne ko
ruuh badan kaa bojh kahaa.n tak kab tak Dhotii hai

Shahryar

Nazm

hubb-e-watan

ai sip.har-e-barii.n ke sayyaaro
ai fazaa-e-zamii.n ke gul-zaaro
ai pahaa.Do.n kii dil-fareb fazaa
ai lab-e-juu kii ThanDii ThanDii havaa
ai anaadil ke naGma-e-saharii
ai shab-e-maahtaab taaro.n bharii
ai nasiim-e-bahaar ke jho.nko
dahr-e-naa-paa.edaar ke dhoko
tum har ik haal me.n ho yuu.n to aziiz
the vatan me.n magar kuchh aur hii chiiz
jab vatan me.n hamaaraa thaa ramnaa
tum se dil baaG baaG thaa apnaa
tum mirii dil-lagii ke saamaa.n the
tum mire dard-e-dil ke darmaa.n the
tum se kaTtaa thaa ra.nj-e-tanhaa.ii
tum se paataa thaa dil shakebaa.ii
aan ik ik tumhaarii bhaatii thii
jo adaa thii vo jii lubhaatii thii
karte the jab tum apnii Gam-KHvaarii
dho.ii jaatii thii.n kulfate.n saarii
jab havaa khaane baaG jaate the
ho ke KHush-haal ghar me.n aate the
baiTh jaate the jab kabhii lab-e-aab
dho ke uThte the dil ke daaG shitaab
koh o sahraa o aasmaan o zamii.n
sab mirii dil-lagii kii shakle.n thii.n
par chhuTaa jis se apnaa mulk o dayaar
jii hu.aa tum se KHud-ba-KHud bezaar
na gulo.n kii adaa KHush aatii hai
na sadaa bulbulo.n kii bhaatii hai
sair-e-gulshan hai jii kaa ik janjaal
shab-e-mahtaab jaan ko hai vabaal
koh o sahraa se taa lab-e-dariyaa
jis taraf jaa.e.n jii nahii.n lagtaa
kyaa hu.e vo din aur vo raate.n
tum me.n aglii sii ab nahii.n baate.n
ham hii Gurbat me.n ho ga.e kuchh aur
yaa tumhaare badal ga.e kuchh taur
go vahii ham hai.n aur vahii duniyaa
par nahii.n ham ko lutf duniyaa kaa
ai vatan ai mire bahisht-e-barii.n
kyaa hu.e tere aasmaan o zamii.n
raat aur din kaa vo samaa.n na rahaa
vo zamii.n aur vo aasmaa.n na rahaa
terii duurii hai morid-e-aalaam
tere chhuTne se chhuT gayaa aaraam
kaaTe khaataa hai baaG bin tere
gul hai.n nazro.n me.n daaG bin tere
miT gayaa naqsh kaamraanii kaa
tujh se thaa lutf zindagaanii kaa
jo ki rahte hai.n tujh se duur sadaa
in ko kyaa hogaa zindagii kaa mazaa
ho gayaa yaa.n to do hii din me.n ye haal
tujh bin ek ek pal hai ik ik saal
sach bataa to sabhii ko bhaataa hai
yaa ki mujh se hii teraa naataa hai
mai.n hii kartaa huu.n tujh pe jaan nisaar
yaa ki duniyaa hai terii aashiq-e-zaar
kyaa zamaane ko tuu aziiz nahii.n
ai vatan tuu to aisii chiiz nahii.n
jin o insaan kii hayaat hai tuu
murG o maahii kii kaa.enaat hai tuu
hai nabaataat kaa numuu tujh se
ruukh tujh bin hare nahii.n hote
sab ko hotaa hai tujh se nashv-o-numaa
sab ko bhaatii hai terii aab-o-havaa
terii ik musht-e-KHaak ke badle
luu.n na hargiz agar bahisht mile
jaan jab tak na ho badan se judaa
ko.ii dushman na ho vatan se havaa

Altaf Hussain Hali

Mazahiya

kursii kii sultaanii dekhii
dhotii par shervaanii dekhii

Asrar jamayee

Ghazal

KHaamosh a.ndherii raato.n me.n jab saarii duniyaa suutii hai
ik hijr kaa maaraa rotaa hai aur shabnam aa.nsuu dhotii hai

Talib Baghpati

See All

DICTIONARY MATCHES

REKHTA DICTIONARY

dhotii

धोतीدھُوتی

Sanskrit

dhoti, loincloth, cloth worn round the waist, passing between the legs and fastened behind

hotii

होतीہوتی

happen

goTii

गोटीگوٹی

Sanskrit

a small roundish stone or pebble

gotii

गोतीگوتی

ہم نسل، ایک ہی ذات یا قوم کا، رشتہ دار

See All

BOOKS MATCHES FOR "dhotii"

Gharelu Dhobi Ghat

Khwaja Hasan Nizami

Idustries & Profession

Dhobi

Maulwi Syed Husain Dehlvi

Others

Dholi Dagdu Doom

Ghayasur Rahman

Novel

MORE MATCHES FOR "dhotii"

Sher

umr-safar jaarii hai bas ye khel dekhne ko
ruuh badan kaa bojh kahaa.n tak kab tak Dhotii hai

Shahryar

Ghazal

mohabbat karne vaale jab kabhii aa.nsuu bahaate hai.n
dilo.n ke aa.ine dhotii hu.ii palke.n sa.nvartii hai.n

Bashir Badr

Nazm

ye kaun uTha hai sharmata

kuchh jaag rahii kuchh sotii hai
har mauj-e-sabaa mu.nh dhotii hai
naa-shushta ruKH yaa motii hai
a.ng.Daa.ii se jiz-biz hotii hai
ye kaun uThaa hai sharmaataa

Josh Malihabadi

Ghazal

mai.n tere va.ade ko jab aa.nsu.o.n se dhotii huu.n
har ek lafz tiraa rang chho.Dtaa kyuu.n hai

Aziz Bano Darab Wafa

Nazm

saf laDki

vaah ye la.Dkii hai kitnii paak saaf
saaf kap.De saaf chehra naak saaf
mail daa.nto.n par na naaKHun me.n kahii.n
aur kap.Do.n par kahii.n dhabba nahii.n
saaf suthre dhoyaa motii haath paa.nv
chaahtaa hai dil kaleje se lagaa.uu.n
aa.o baby aa.o jaldii paas aa.o
ik maze kaa pyaar ham ko de ke jaa.o
aate hii pahle kiyaa us ne salaam
phir jo puuchhaa to bataayaa apnaa naam
god me.n le kar kiyaa pahle to pyaar
phir kahaa beTii mai.n tum par se nisaar
aap kyaa pa.Dhtii hai.n kyaa kartii hai.n kaam
aap ke vaalid kaa hai kis jaa maqaam
bholii la.Dkii ne diyaa ham ko javaab
duusrii urdu kii pa.Dhtii huu.n kitaab
first reader pahlii diiniyaat kii
aur kalaam-ul-laah saaraa pa.Dh chukii
hifz hai kashf-ul-KHulaasa sab mujhe
yaad hai har sher kaa matlab mujhe
saaf suthrii hai merii har ek chiiz
mujh ko ammaa.n ne sikhaa.ii ye tamiiz
saaf bistar saaf kamra saaf ghar
mai.n ne puuchhaa baat us kii kaaT kar
haath mu.nh kab dhotii ho us ne kahaa
fajr-o-zohar asr-o-maGrib aur ishaa
paa.nch vaqto.n kii mai.n pa.Dhtii huu.n namaaz
juutii ko lagtaa nahii.n bol-o-baraaz
chauthe din nahaa kar badaltii huu.n libaas
chhaavaa.n saabun ka.nghii hai sab mere paas
daa.nt mere saaf bhii hai.n paak bhii
mere haa.n manjan bhii hai misvaak bhii
aa.ii pa.Dhne ko aligarh saal haal
umr ke guzre hai.n mere aaTh saal
is se bhii kam thaa bahut jab meraa sin
saaf rakkhii jaatii thii mai.n raat din
mere vaalid hai.n Gulaam panjatan
meraa ghar hai Hyderabad dakan
sun ke us paakiiza la.Dkii ke javaab
mai.n nai dii.n kaifii du.aa.e.n be-hisaab

Kaifi Hyderabadi

Nazm

tanha

laakh lahro.n se uThaa hai mirii fitrat kaa KHamiir
laakh qulzum mire siine me.n davaa.n rahte hai.n
din ko kirne.n mire afkaar kaa mu.nh dhotii hai.n
shab ko taare mirii jaanib nigraa.n rahte hai.n
mere maathe pe jhalaktaa hai nadaamat ban kar
ibn-e-maryam kaa vo jalva jo kaliisaa me.n nahii.n

Mustafa Zaidi

Mazahiya

vaah bii municipality jaan kyaa kahnaa tiraa
tuu chachii lailaa kii aashiq teraa majnuu.n kaa chachaa
apnii KHuddaarii ko kho kar tujh pe jo shaidaa hu.aa
be-KHudii me.n ye zabaan-e-haal se kahte sunaa
bas-ki diivaana shudam aql-e-rasaa darkaar niist
aashiq-e-municipality raahiyaa darkaar niist
teraa KHvaahish-mand har qaid-e-liiyaaqat se barii
jis kaa jii chaahe la.De aur la.D ke le le membarii
ahd-e-aazaadii ne aisii Daal dii hai abtarii
ab to har taaniis aur tazkiir me.n hai hamsarii
tujh ko kyaa ranDii hai ko.ii yaa ki ranDii-baaz hai
teraa darvaaza kas-o-naa-kas ke uupar baaz hai
jam.a kar de qarz hii le kar zamaanat ke pachaas
duur hotii jaa.e Gairat jab election aa.e paas
votaro.n ke haath jo.De KHuub ho kar bad-havaas
gi.Dgi.Daa kar har kas-o-naa-kas se ho ye iltimaas
rehn parche ke evaz izzat mirii kar liijiye
apne bachcho.n kaa tasadduq vote mujh ko diijiye
suniye ik saahab kaa qissa jab hu.ii shaamat savaar
ye zamaanat kar ke daaKHil ban ga.e ummiid-vaar
chho.D pesha tark farmaayaa jo kuchh thaa kaarobaar
kuchh asaas-ul-bait bechaa kuchh liyaa suudii udhaar
muztarib rahte the ye naam-aavarii ke vaaste
ghar se nikle vote lene membarii ke vaaste
sab se pahle un ko jis voter ke ghar jaanaa pa.Daa
shaiKH buddhuu naam thaa aur thaa julaahaa qaum kaa
dhotii baa.ndhe marza.ii pahne tanaa baiThaa hu.aa
ik sa.Dii miTTii kaa huqqa pii rahaa thaa kaj-adaa
jaate hii tasliim kii jab is ko baa-sad-ehtiraam
mu.nh ko Te.Dhaa kar ke bolaa ko hai baalekum-salaam''
bole ye pahle na aayaa mai.n hu.aa itnaa qusuur
shaiKH buddhuu aap mujh par rahm farmaa.e.n huzuur
aap ko vaalid kahaa karte the bhaa.ii ab se duur
mai.n bhatiijaa aap kaa huu.n vote le luu.ngaa zaruur
bole buddhuu kaa kahiyo ham kehkaa kehkaa boTe deii
boTe pahiye uu jo tirte hamkaa das kaa note de.ii
jab surtedaar bolaa laa.e ho kauno gavaah
ham kahaa sasuuraa jamaadarvaa kihis ham kaa tabaah
ham julaahaa aap ke aur aap Thahre baadshaah
kaun kah ke saamne muutat hai saahab vaah vaah
ha.ns ke kah dene.n mujhaD siikh jii jaa.o barii
rah ga.ii mu.nh haa.e ke sab lambaran kii lambarii
sun liyo saarii kathaa diiho ki naahii.n ye bataa.o
bote maa.nge aa.e ho ham se to ham kaa kuchh dilaa.o
kar chikan bakvaas ab bhayyaa na hamraa muu.D khaa.o
kah diyaa bas kah diyaa ab jaa.o chuppe ghar kaa jaa.o
jo rakam tum se kahaa sab peshgii le leb ham
boot de motor pe le jahiyo to haa.n de deb ham
jab miyaa.n buddhuu ke tevar is qadar dekhe ka.De
dahne baa.e.n dekh jhaT qadmo.n pe is ke gir pa.De
dil me.n pachhtaa.e ki aaKHir kyuu.n hu.e the ham kha.De
kahiye aise jaahilo.n se kyaa ko.ii kushtii la.De
aabruu ke saath de kar paa.nch raazii kar liyaa
kaamyaabii par hu.e KHush taa.o mo.nchho.n par diyaa
aage ba.Dh kar ek hazrat kaa hu.aa phir saamnaa
un se jaa kar is tarah kii arz baa-sad-iltijaa
banda parvar ek maz.hab hai hamaaraa aap kaa
vote diijegaa jo mujh ko aap KHush hogaa KHudaa
hai.n mire halqe me.n jo jo mere maz.hab ke KHilaaf
dekhiye member zaraa ho luu.n to kar duu.n sab ko saaf
mehtaraa.n ke dar pe jhaa.Duu dene aa.e kyaa majaal
aur saqqaa mushk se naalii dhulaa.e kyaa majaal
tex ghar-vaare kaa un par ba.ndh naa jaa.e kyaa majaal
le le.n bambaa ghar me.n be meter lagaa.e kyaa majaal
naach tignii kaa inhe.n ab mai.n nachaa.uu.ngaa huzuur
dekhe kis kis tarah un ko sataa.uu.ngaa huzuur
KHush hu.e sun kar janaab-e-maulvii-e-maktabii
haath pheraa riish par aur is tarah taqriir kii
aap is ke ahal hai.n merii nazar me.n vaaqa.ii
zaat-e-saamii ko samajhtaa huu.n mai.n faKHr-e-membarii
mohtaram mai.n va.ade qabl-az-vaqt kar saktaa nahii.n
farz hai iifaa-e-va.ada phir mukar saktaa nahii.n
is me.n ik ishkaal-e-shara.ii aur bhii hai kyaa kahuu.n
me.n iaanat aap kii bil-farz qirtaasan karuu.n
raa.e to apnii hiba kar duu.n evaz kuchh bhii na luu.n
kyuu.n badal zaa.e.a karuu.n kis vaaste musrif banuu.n
jaantaa huu.n ye ki merii raa.e hai kitnii vaaqii.a
muft zaa.e.a kyuu.n karuu.n jab mai.n nahii.n huu mustatii.a
hasb-e-KHvaahish gar badal mujh ko ataa kar de.n janaab
kyaa ajab pesh-e-KHudaa maajuur bhii huu.n aur masaab
mai.n ne dikhlaa dii huduud-e-shar.a me.n raah-e-savaab
mere maaruzaat ko farmaa.iye gar mustajaab
raa.e de dene me.n ahqar ko ta.ammul kuchh na ho
KHud karuu.n taajiil hatman phir tasaahul kuchh na ho
raa.e de duu.ngaa evaz mai.n aap ko KHamsiin ke
itne hii milte hai.n mujh ko va.az ke talqiin ke
hazrat-e-vaalaa to KHud paaband hai.n aa.iin ke
is se kam denaa muraadif hai mirii tauhiin ke
haa.n ye mumkin hai ki kuchh taqliil farmaa diijiye
hai ye kaar-e-KHair ab taajiil farmaa diijiye
KHullas-e-ahbaab se kyuu.n istishaara kiijiye
raaz poshiida rahe kyuu.n aashkaara kiijiye
sab se achchhaa hai zaraa zahmat gavaaraa kiijiye
liijiye tasbiih mujh se istiKHaara kiijiye
arz kii hai mai.n ne jo itnii raqam par dekhiye
man.a jab aa.e to phir kuchh is se kam par dekhiye
ye nihaayat kaa.e.n the dil me.n ye bole soch ke
shakl to achchhii hai par zebaa nahii.n mere liye
istiKHaara mai.n karuu.n kyaa aap ke hote hu.e
kartaa huu.n niyyat to mai.n aap istiKHaara kiijiye
niyyat un ke dil me.n thii tasbiih un ke haath me.n
chuhaa apnii ghaat me.n thaa billii apnii ghaat me.n
man.a aaya istiKHaara chhuuTte hii pahlii baar
maulvii saahab ke chehre par hu.aa kuchh antr-jaar
phir jo dekhaa vaajib aaya ho be-iKHtiyaar
puuchhaa niyyat kis qadar par kii thii bahr-e-KHaaksaar
bole niyyat das pe kii thii liijiye banda-navaaz
kaamyaabii kii du.aa farmaa.iye ba.ad-az-namaaz
is jagah se uTh ke ghar par ek saahab ke liye
das baras naakaam rahne par hu.e the jo b a
railway me.n the mulaazim KHud bhii the chalte hu.e
aap kii tanKHvaah to kam ThaaTh the lekin ba.De
english style pe rahne kaa jo un ko shauq thaa
boot batri paa.nv kii collar gale kaa tauq thaa
phuus ke chhappar me.n rahte the ye is saamaan se
aur furniture to KHaarij un ke thaa imkaan se
TuuTii phuuTii kursiyaa.n le kar kisii duukaan se
baiThte the un pe chhappar me.n nihaayat shaan se
naam ik taKHtii pe likh rakhaa thaa yuu.n bahr-e-vaqaar
mister abraahaam b-a T T c e aa.ii aar
dekh kar suurat ko un kii is tarah kahne lage
aa.ii aim very busy make heast jaldii boliye
phir udhar Tahle idhar Tahle gha.Dii ko dekh kar
apne kutte se kahaa kam suun un se go away
phir kahaa.n u aar candidate baT no bold man
tum ko apnii vote kaise degaa saahab old man
chuu.nki candidate a.ngrezii samajhte hii na the
gi.Dgi.Daa kar is tarah saahab se farmaane lage
ye to mumkin hii nahii.n hai aap paidal jaa.iye
mai.n ne motor maa.ng lii hai aap hii ke vaaste
aur kyuu.nkar is tarah chaliyegaa mujh ko dene vote
kiije pocket book pe taariiKH-e-election jald note
baat a.ngrezii-numaa urdu me.n yuu.n saahab ne kii
ham kahaa english me.n Tum samjhaa nahii.n o aa.ii c
dekho apnii vote rakhnii maa.nTgaa hai ham free
kis ko degaa pahle baTlaane nahii.n sakTaa ko.ii
ham city father nahii.n tum ko banaanaa maa.ngTaa
D.m. phir motor pe ham kaahe ko jaanaa maa.ngTaa
ho ke jab maayuus ye palTe vahaa.n se mu.nh banaa.e
dil me.n kahte the ki in kaa vote to jaanaa hai haa.e
saal bhar pahle ba.De din me.n jo Daalii de to paa.e
ab ba-juz is ke ko.ii suurat nahii.n bantii banaa.e
fees de kar nurse ik bahr-e-sifaarish laa.uu.ngaa
chal gayaa chakma to un se vote phir le jaa.uu.ngaa
phir ba.Dhe aage yahaa.n se vote ke armaan me.n
ghus pa.De ye ek buz qassaab kii duukaan me.n
nasr me.n pa.Dh kar qasiida pahle us kii shaan me.n
chaahte the ye kahii.n kuchh shaiKH jii ke kaan me.n
yuu.n kanautii ko badal kar shaiKH saahab ne kahaa
suniye hajrat ham lagii lipTii nahii.n rakhte jaraa
chaudharii ne kal kahaa thaa ham se ai bhayyaa sukuur
siikh munne jis ko kah de.n boot de denaa jaruur
par manaahii kar ga.e jab maulbii abdul gafuur
rafjii ko bote de sakte nahii.n ham to hujuur
sunte hai.n kuraan me.n farmaa ga.e the khud rasuul
diin kii jab baat Thahrii dakhl denaa be fajuul
vaa.n kutub-ud-diin bhii kahte the sachchii hai ye baat
gair majhab vaale ko lambar banaanaa baa-hiyaat
siikh jii majhab tumhaaraa aur un kii aur jaat
ho ke lambar vo khudaa jaane kare.n kiyaa vaardaat
haa.n ko.ii majhab kaa apne ho to is ko bote do
jab tumhe.n maukaa mile aiso.n ko bhayyaa choT do
in ko buz qassaab ne jab de diyaa ruukhaa javaab
ye uThe duukaan se maayuus baa-chashm-e-pur-aab
apne worker se kahaa jaa kar ki suniye to janaab
aap hii tadbiir ab kuchh kiijiye us kii shitaab
sarf kii parvaa nahii.n jo ho munaasib kiijiye
shaiKH jii ke vote ko lekin na jaane diijiye
dil me.n worker KHush hu.e kahne lage baa-sad suruur
is taraf se aap bilkul mutma.in rahiye huzuur
aur logo.n se zyaada sarf to hogaa zaruur
to sahii jab aap hii ko vote de.n abdushshukuur
piir louTan shaah kii KHidmat me.n jaataa huu.n abhii
hukm un kaa shaiKH jii ke paas laataa huu.n abhii
piir loTan shaah the ik KHaandaanii takiya-daar
aa.nkh me.n surma ka.ii rattii gale me.n chand haar
riish-e-aqdas paan ke dhabbo.n se rashk-e-laala zaar
geru.a kurtaa gale me.n haath me.n ik pusht KHaar
zard tahmad paa.nv me.n lak.Dii kii uu.nchii c kha.Daa.uu.n
ghuumte phirte the yuu.nhii shahr shahr aur gaa.nv gaa.nv
pahu.nche worker un kii KHidmat me.n ba-taajiil-e-tamaam
do ruupa.e nazraane ke de kar kiyaa jhuk kar salaam
arz kii hai.n aap to haajat ravaa-e-KHaas-o-aam
shaiKH jii kaa vote dilvaa diijiye bas hai ye kaam
chuu.nki hazrat kii hai.n bai.at me.n miyaa.n abdushshukuur
aap farmaa de.n agar tuu vote de de.nge zaruur
aap kii daavat kaa kal ghar par karuu.ngaa intizaam
shaiKH jii ko bhii bulaa luu.ngaa vahii.n par vaqt-e-shaam
tazkire me.n vote kaa chhe.Duu.ngaa maabain-e-ta.aam
aap un ko hukm de de.n ge to ho jaa.egaa kaam
bole loTan shaah baabaa KHush raho daavat qubuul
ham faqiiro.n kii du.aa se hogaa sab matlab husuul
muKHtasar se ibtidaa.ii vaaqiye jo kuchh likhe
kyaa ajab kaafii ho.n ye public kii ibrat ke liye
is tarah ke voter aur member huu.n jab is qism ke
kahiye is municipality se kise raahat mile
saakinaan-e-shahr ab hoshyaar honaa chaahiye
member aur voter kaa kuchh me.aar honaa chaahiye
KHatm bhii kar do 'zariif' ab tum bayaan-e-membarii
taa-ba-kai aaKHir rahoge qissa-KHvaan-e-memberii
KHvaab se chau.nke.n zaraa jab sar-giraan-e-membarii
phir sunaa denaa unhe.n tum daastaan-e-membarii
ab samand-e-fikr kii baag aur jaanib mo.D do
sone vaale so ga.e qissa adhuuraa chho.D do

Zareef Lakhnavi

Nazm

bichhDe ghar ka saya

sub.h-savere
vo bistar se saa.e jaisii uThtii hai
phir chuulhe me.n raat kii ThanDii aag ko
raushan kartii hai
itne me.n din cha.Dh jaataa hai
jaldii jaldii chaa.e banaa kar shauhar ko ruKHsat kartii hai
sayyaare gardish karte hai.n
shahr me.n sahraa sahraa.o.n me.n chaTyal maidaa.n
kohsaaro.n ke nasheb-o-faraaz banaa karte hai.n
saare ghar ko dhotii hai
kap.De tauliye tooth-brush bistar kii chaadar
ko.ii kitaab uThaatii hai rakh detii hai
radio on kiyaa phir rokaa on kiyaa
phir ko.ii puraanaa KHat pa.Dhtii hai
(ghanTii bajii)
''maryam! aa jaa.o''
''tum kaisii ho? vo kaise hai.n''
''kyaa us kaa ko.ii KHat aayaa?''
(tho.Dii KHaamoshii kaa vaqfa)
''tum kaisii ho''
''tum se matlab? sach kah duu.n to kyaa kar logii''
dekho sab kii sab baiThii ho.n
''achchhaa''
''achchhaa''
(darvaaza phir band ho gayaa)
''ab kyaa karnaa!
ghar to bilkul saaf pa.Daa hai
ko.ii shikan bistar pe nahii.n hai
diivaar-o-dar dhule-dhulaa.e
ko.ii dhabba yaa mak.Dii kaa jaalaa tinkaa
kahii.n kuchh nahii.n
kyaa karnaa hai!
uf! vo calendar
kitne baras ho ga.e phir bhii
aa.e.n to un se kahtii huu.n
bilkul nayaa calendar laa.e.n
kuchh bhuuk nahii.n
ab kyaa karnaa hai
leT rahuu.n? lekin kyaa leTuu.n
jaane kitnaa leT chukii huu.n
kha.Dii rahuu.n
haa.n kha.Dii rahuu.n
par mai.n to kab se kha.Dii hu.ii huu.n
khi.Dkii kaa parda hii kholuu.n
dhuup kahaa.n tak aa pahu.nchii hai
laa.o apnaa album dekhuu.n
nayyar shabnam shafaq subuuhii aKHtar juuhii
kaise ho.nge
aa.n! ye mai.n huu.n
ittii pyaarii pyaarii thii mai.n
mai.n bilkul hii bhuul ga.ii thii
sab kitnaa achchhaa lagtaa thaa
abbaa, ammaa.n, bhayyaa, appii
sab zinda the
saaya naanii gulshan aapaa
haa.n aur vo gaurayyaa baabaa
aa.nsuu naGme shor Thahaake saare ik sur me.n hote the
saarii duniyaa ghar lagtii thii
amaa.n udhar bulaayaa kartii.n
abbaa udhar pukaaraa karte
bhayyaa Daa.nTte
appii Dhero.n pyaar jataatii.n
khaanaa, piinaa, sonaa, jaagnaa, ha.nsnaa, ruuThnaa, man.naa
Dor ba.ndhii thii
ek me.n ek piroyaa hu.aa thaa
kal nammuu ke ghar shaadii hai
paas hii ko.ii maut hu.ii hai
college kii chhaTii kab hogii
iid phir ab kii tiis kii hogii
ham bhii lail-e-qadr jaage.nge
shahlaa kii ma.ngnii kyuu.n TuuTii?
kyaa iqbaal ko.ii shaa.er thaa?
chup ba.Dke abbaa sun le.nge
saa.e dau.D rahe hai.n ghar me.n
har goshe me.n uupar niiche andar baahar dau.D rahe hai.n
lambe chhoTe sabz o zard hazaaro.n saa.e
baahar shahr me.n ko.ii nahii.n hai
dhuup siyah pa.Dtii jaatii hai
qadd-e-aadam aa.iine me.n
us kaa na.ngaa jism kha.Daa hai
jism ke andar suuraj kaa Guncha mahkaa hai
sayyaare gardish karte hai.n
sab anjaane sayyaaro.n me.n bhuule-bisre ghar raushan hai.n
kis lamhe kaa hai ye tamaasha
hast-o-buud ke sannaaTe me.n
laa-maujuud kii taariikii me.n
sirf yahii aa.iina raushan
sirf ik aks-e-guzishta raushan
bichh.De ghar kaa saaya raushan

Farhat Ehsas

Nazm

bahut KHub-surat hamara watan hai

bahut KHuubsuurat hamaaraa vatan hai
anokhaa hai sab se niraalaa vatan hai
sabhii rang ke phuul is me.n khile hai.n
bahishtii manaazir bhii is ko mile hai.n
kahii.n raat-raanii kii KHushbuu basii hai
kahii.n par chamelii kii nik.hat ghulii hai
kahii.n par dhanak saat-ra.ngii tanii hai
kahii.n nuur kii ko.ii chaadar bichhii hai
kisii samt me.n ko.ii dariyaa ravaa.n hai
kahii.n kohsaaro.n kaa dilkash samaa.n hai
kahii.n laal piile hare qumqume hai.n
kahii.n paaniyo.n me.n diye jal rahe hai.n
kahii.n paa.e jaamo.n me.n Topii kha.Dii hai
kahii.n paa.nv me.n ko.ii dhotii ba.ndhii hai
kahii.n suiT saa.Dii kii raunaq lagii hai
kahii.n ghaaghre kii ajab dilkashii hai
kisii kii hathelii pe meh.ndii rachii hai
kisii paa.nv me.n ko.ii laalii lagii hai
kisii sar pe baalo.n ke guchchhe bane hai.n
kahii.n baal pairo.n pe laTke hu.e hai.n
kahii.n saat rango.n kii pichkaariyaa.n hai.n
ki jin se badan-biich gul-kaariyaa.n hai.n
kahii.n ge.nd balle se lag kar hai u.Dtii
kahii.n ko.ii DanDe se gillii uchhaltii
zamii.n ko bichhaa.e ko.ii so rahaa hai
ka.ii KHvaab bhii nii.nd me.n bo rahaa hai
ko.ii paaniyo.n me.n chhalaa.nge.n lagaataa
KHalaa.o.n me.n ko.ii hai kartab dikhaataa
ko.ii saa.np ko apnaa saathii banaataa
use biin kii apnii dhun par nachaataa
ko.ii apne a.ngo.n kaa aasan lagaataa
ko.ii apne tan kaa tamaashaa dikhaataa
ko.ii apnii aa.nkho.n se man jiit.taa hai
adaa.o.n se duniyaa kaa dhan jiit.taa hai
jidhar dekhiye ik anokhaa samaa.n hai
udaasii me.n bhii zindagii shaadmaa.n hai
har ik tarah se ye niyaaraa vatan hai
bahut KHuubsuurat hamaaraa vatan hai

Ghazanfar

Nazm

abhi bhuk se ek chuha mara hai

na kap.Daa na roTii na loTaa na dhotii
pareshaa.n hai potaa bilaktii hai potii
ki qiimat me.n gandum kaa daana hai motii
ye mumkin nahii.n thaa vilaadat na hotii
har ik samt koh-e-nidaa chiiKHtaa hai
jo paidaa hu.aa mubtalaa-e-balaa hai

Mohammad Yusuf Papa

SEARCH RESULTS

MOST RELEVANT MATCHES FOR "dhotii"

Nazm

Allama Iqbal

Ghazal

Shahryar

Nazm

Altaf Hussain Hali

Mazahiya

Asrar jamayee

Ghazal

Talib Baghpati

DICTIONARY MATCHES

REKHTA DICTIONARY

dhotii

hotii

goTii

gotii

BOOKS MATCHES FOR "dhotii"

MORE MATCHES FOR "dhotii"

Sher

Shahryar

Ghazal

Bashir Badr

Nazm

Josh Malihabadi

Ghazal

Aziz Bano Darab Wafa

Nazm

Kaifi Hyderabadi

Nazm

Mustafa Zaidi

Mazahiya

Zareef Lakhnavi

Nazm

Farhat Ehsas

Nazm

Ghazanfar

Nazm

Mohammad Yusuf Papa

Rekhta Foundation

Rekhta Dictionary

Sufinama

Hindwi

Rekhta Learning

Rekhta Books