Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "dhotii"

Nazm MATCHES FOR "dhotii"

Nazm

walida marhuma ki yaad mein

zarra zarra dahr kaa zindaanii-e-taqdiir hai
parda-e-majbuurii o bechaargii tadbiir hai
aasmaa.n majbuur hai shams o qamar majbuur hai.n
anjum-e-siimaab-paa raftaar par majbuur hai.n
hai shikast anjaam Gunche kaa subuu gulzaar me.n
sabza o gul bhii hai.n majbuur-e-numuu gulzaar me.n
naGma-e-bulbul ho yaa aavaaz-e-KHaamosh-e-zamiir
hai isii zanjiir-e-aalam-giir me.n har shai asiir
aa.nkh par hotaa hai jab ye sirr-e-majbuurii ayaa.n
KHushk ho jaataa hai dil me.n ashk kaa sail-e-ravaa.n
qalb-e-insaanii me.n raqs-e-aish-o-Gam rahtaa nahii.n
naGma rah jaataa hai lutf-e-zer-o-bam rahtaa nahii.n
ilm o hikmat rahzan-e-saamaan-e-ashk-o-aah hai
ya.anii ik almaas kaa Tuk.Daa dil-e-aagaah hai
garche mere baaG me.n shabnam kii shaadaabii nahii.n
aa.nkh merii maaya-daar-e-ashk-e-unnaabii nahii.n
jaantaa huu.n aah me.n aalaam-e-insaanii kaa raaz
hai navaa-e-shikva se KHaalii mirii fitrat kaa saaz
mere lab par qissa-e-naira.ngi-e-dauraa.n nahii.n
dil miraa hairaa.n nahii.n KHanda nahii.n giryaa.n nahii.n
par tirii tasviir qaasid girya-e-paiham kii hai
aah ye tardiid merii hikmat-e-mohkam kii hai
girya-e-sarshaar se buniyaad-e-jaa.n paa.inda hai
dard ke irfaa.n se aql-e-sa.ng-dil sharminda hai
mauj-e-duud-e-aah se aa.iina hai raushan miraa
ganj-e-aab-aavrd se maamuur hai daaman miraa
hairatii huu.n mai.n tirii tasviir ke e.ajaaz kaa
ruKH badal Daalaa hai jis ne vaqt kii parvaaz kaa
rafta o haazir ko goyaa paa-ba-paa is ne kiyaa
ahd-e-tiflii se mujhe phir aashnaa is ne kiyaa
jab tire daaman me.n paltii thii vo jaan-e-naa-tavaa.n
baat se achchhii tarah mahram na thii jis kii zabaa.n
aur ab charche hai.n jis kii shoKHii-e-guftaar ke
be-bahaa motii hai.n jis kii chashm-e-gauhar-baar ke
ilm kii sa.njiida-guftaarii bu.Dhaape kaa shu.uur
dunyavii e.azaaz kii shaukat javaanii kaa Guruur
zindagii kii auj-gaaho.n se utar aate hai.n ham
sohbat-e-maadar me.n tifl-e-saada rah jaate hai.n ham
be-takalluf KHanda-zan hai.n fikr se aazaad hai.n
phir usii kho.e hu.e firdaus me.n aabaad hai.n
kis ko ab hogaa vatan me.n aah meraa intizaar
kaun meraa KHat na aane se rahegaa be-qaraar
KHaak-e-marqad par tirii le kar ye fariyaad aa.uu.ngaa
ab du.aa-e-niim-shab me.n kis ko mai.n yaad aa.uu.ngaa
tarbiyat se terii me.n anjum kaa ham-qismat hu.aa
ghar mire ajdaad kaa sarmaaya-e-izzat hu.aa
daftar-e-hastii me.n thii zarrii.n varaq terii hayaat
thii saraapaa diin o duniyaa kaa sabaq terii hayaat
umr bhar terii mohabbat merii KHidmat-gar rahii
mai.n tirii KHidmat ke qaabil jab hu.aa tuu chal basii
vo javaa.n-qaamat me.n hai jo suurat-e-sarv-e-buland
terii KHidmat se hu.aa jo mujh se ba.Dh kar bahra-mand
kaarobaar-e-zindagaanii me.n vo ham-pahluu miraa
vo mohabbat me.n tirii tasviir vo baazuu miraa
tujh ko misl-e-tiflak-e-be-dast-o-paa rotaa hai vo
sabr se naa-aashnaa sub.h o masaa rotaa hai vo
tuKHm jis kaa tuu hamaarii kisht-e-jaa.n me.n bo ga.ii
shirkat-e-Gam se vo ulfat aur mohkam ho ga.ii
aah ye duniyaa ye maatam-KHaana-e-barnaa-o-piir
aadmii hai kis tilism-e-dosh-o-fardaa me.n asiir
kitnii mushkil zindagii hai kis qadar aasaa.n hai maut
gulshan-e-hastii me.n maanind-e-nasiim arzaa.n hai maut
zalzale hai.n bijliyaa.n hai.n qaht hai.n aalaam hai.n
kaisii kaisii duKHtaraan-e-maadar-e-ayyaam hai.n
kalba-e-iflaas me.n daulat ke kaashaane me.n maut
dasht o dar me.n shahr me.n gulshan me.n viiraane me.n maut
maut hai ha.ngaama-aaraa qulzum-e-KHaamosh me.n
Duub jaate hai.n safiine mauj kii aaGosh me.n
ne majaal-e-shikva hai ne taaqat-e-guftaar hai
zindagaanii kyaa hai ik tauq-e-guluu-afshaar hai
qaafile me.n Gair fariyaad-e-diraa kuchh bhii nahii.n
ik mataa-e-diida-e-tar ke sivaa kuchh bhii nahii.n
KHatm ho jaa.egaa lekin imtihaa.n kaa daur bhii
hai.n pas-e-noh parda-e-garduu.n abhii daur aur bhii
siina chaak is gulsitaa.n me.n laala-o-gul hai.n to kyaa
naala o fariyaad par majbuur bulbul hai.n to kyaa
jhaa.Diyaa.n jin ke qafas me.n qaid hai aah-e-KHizaa.n
sabz kar degii unhe.n baad-e-bahaar-e-jaavedaa.n
KHufta-KHaak-e-pai sipar me.n hai sharaar apnaa to kyaa
aarzii mahmil hai ye musht-e-Gubaar apnaa to kyaa
zindagii kii aag kaa anjaam KHaakistar nahii.n
TuuTnaa jis kaa muqaddar ho ye vo gauhar nahii.n
zindagii mahbuub aisii diida-e-qudrat me.n hai
zauq-e-hifz-e-zindagii har chiiz kii fitrat me.n hai
maut ke haatho.n se miT saktaa agar naqsh-e-hayaat
aam yuu.n us ko na kar detaa nizaam-e-kaa.enaat
hai agar arzaa.n to ye samjho ajal kuchh bhii nahii.n
jis tarah sone se jiine me.n KHalal kuchh bhii nahii.n
aah Gaafil maut kaa raaz-e-nihaa.n kuchh aur hai
naqsh kii naa-paa.edaarii se ayaa.n kuchh aur hai
jannat-e-nazaara hai naqsh-e-havaa baalaa-e-aab
mauj-e-muztar to.D kar ta.amiir kartii hai habaab
mauj ke daaman me.n phir us ko chhupaa detii hai ye
kitnii bedardii se naqsh apnaa miTaa detii hai ye
phir na kar saktii habaab apnaa agar paidaa havaa
to.Dne me.n us ke yuu.n hotii na be-parvaa havaa
is ravish kaa kyaa asar hai haiyat-e-taamiir par
ye to hujjat hai havaa kii quvvat-e-taamiir par
fitrat-e-hastii shahiid-e-aarzuu rahtii na ho
KHuub-tar paikar kii us ko justujuu rahtii na ho
aah siimaab-e-pareshaa.n anjum-e-garduu.n-faroz
shoKH ye chi.ngaariyaa.n mamnuun-e-shab hai jin kaa soz
aql jis se sar-ba-zaanuu hai vo muddat in kii hai
sarguzisht-e-nau-e-insaa.n ek saa.at un kii hai
phir ye insaa.n aa.n suu-e-aflaak hai jis kii nazar
qudsiyo.n se bhii maqaasid me.n hai jo paakiiza-tar
jo misaal-e-sham.a raushan mahfil-e-qudrat me.n hai
aasmaa.n ik nuqta jis kii vus.at-e-fitrat me.n hai
jis kii naadaanii sadaaqat ke liye betaab hai
jis kaa naaKHun saaz-e-hastii ke liye mizraab hai
sho.ala ye kam-tar hai garduu.n ke sharaaro.n se bhii kyaa
kam-bahaa hai aaftaab apnaa sitaaro.n se bhii kyaa
tuKHm-e-gul kii aa.nkh zer-e-KHaak bhii be-KHvaab hai
kis qadar nashv-o-numaa ke vaaste betaab hai
zindagii kaa sho.ala is daane me.n jo mastuur hai
KHud-numaa.ii KHud-fazaa.ii ke liye majbuur hai
sardi-e-marqad se bhii afsurda ho saktaa nahii.n
KHaak me.n dab kar bhii apnaa soz kho saktaa nahii.n
phuul ban kar apnii turbat se nikal aataa hai ye
maut se goyaa qabaa-e-zindagii paataa hai ye
hai lahad is quvvat-e-aashufta kii shiiraaza-band
Daaltii hai gardan-e-garduu.n me.n jo apnii kamand
maut tajdiid-e-mazaaq-e-zindagii kaa naam hai
KHvaab ke parde me.n bedaarii kaa ik paiGaam hai
KHuugar-e-parvaaz ko parvaaz me.n Dar kuchh nahii.n
maut is gulshan me.n juz sanjiidan-e-par kuchh nahii.n
kahte hai.n ahl-e-jahaa.n dard-e-ajal hai laa-davaa
zaKHm-e-furqat vaqt ke marham se paataa hai shifaa
dil magar Gam marne vaalo.n kaa jahaa.n aabaad hai
halqa-e-zanjiir-e-sub.h-o-shaam se aazaad hai
vaqt ke afsuu.n se thamtaa naala-e-maatam nahii.n
vaqt zaKHm-e-teG-e-furqat kaa ko.ii marham nahii.n
sar pe aa jaatii hai jab ko.ii musiibat naa-gahaa.n
ashk paiham diida-e-insaa.n se hote hai.n ravaa.n
rabt ho jaataa hai dil ko naala o fariyaad se
KHuun-e-dil bahtaa hai aa.nkho.n kii sarishk-aabaad se
aadmii taab-e-shakebaa.ii se go mahruum hai
us kii fitrat me.n ye ik ehsaas-e-naa-maaluum hai
jauhar-e-insaa.n adam se aashnaa hotaa nahii.n
aa.nkh se Gaa.eb to hotaa hai fanaa hotaa nahii.n
raKHt-e-hastii KHaak-e-Gam kii sho.ala-afshaanii se hai
sard ye aag is latiif ehsaas ke paanii se hai
aah ye zabt-e-fuGaa.n Gaflat kii KHaamoshii nahii.n
aagahii hai ye dilaasaa.ii faraamoshii nahii.n
parda-e-mashriq se jis dam jalva-gar hotii hai sub.h
daaG shab kaa daaman-e-aafaaq se dhotii hai sub.h
laala-e-afsurda ko aatish-qabaa kartii hai ye
be-zabaa.n taa.ir ko sarmast-e-navaa kartii hai ye
siina-e-bulbul ke zindaa.n se sarod aazaad hai
saik.Do.n naGmo.n se baad-e-sub.h-dam-aabaad hai
KHuftagaan-e-laala-zaar o kohsaar o ruud baar
hote hai.n aaKHir uruus-e-zindagii se ham-kanaar
ye agar aa.iin-e-hastii hai ki ho har shaam sub.h
marqad-e-insaa.n kii shab kaa kyuu.n na ho anjaam sub.h
daam-e-siimiin-e-taKHayyul hai miraa aafaaq-giir
kar liyaa hai jis se terii yaad ko mai.n ne asiir
yaad se terii dil-e-dard aashnaa maamuur hai
jaise ka.abe me.n du.aa.o.n se fazaa maamuur hai
vo faraa.ez kaa tasalsul naam hai jis kaa hayaat
jalva-gaahe.n us kii hai.n laakho.n jahaan-e-be-sabaat
muKHtalif har manzil-e-hastii ko rasm-o-raah hai
aaKHirat bhii zindagii kii ek jaulaa.n-gaah hai
hai vahaa.n be-haasilii kisht-e-ajal ke vaaste
saazgaar aab-o-havaa tuKHm-e-amal ke vaaste
nuur-e-fitrat zulmat-e-paikar kaa zindaanii nahii.n
ta.ng aisaa halqa-e-afkaar-e-insaanii nahii.n
zindagaanii thii tirii mahtaab se taabinda-tar
KHuub-tar thaa sub.h ke taare se bhii teraa safar
misl-e-aivaan-e-sahar marqad farozaa.n ho tiraa
nuur se maamuur ye KHaakii shabistaa.n ho tiraa
aasmaa.n terii lahad par shabnam-afshaanii kare
sabza-e-nau-rasta is ghar kii nigahbaanii kare

Allama Iqbal
Nazm

hubb-e-watan

ai sip.har-e-barii.n ke sayyaaro
ai fazaa-e-zamii.n ke gul-zaaro
ai pahaa.Do.n kii dil-fareb fazaa
ai lab-e-juu kii ThanDii ThanDii havaa
ai anaadil ke naGma-e-saharii
ai shab-e-maahtaab taaro.n bharii
ai nasiim-e-bahaar ke jho.nko
dahr-e-naa-paa.edaar ke dhoko
tum har ik haal me.n ho yuu.n to aziiz
the vatan me.n magar kuchh aur hii chiiz
jab vatan me.n hamaaraa thaa ramnaa
tum se dil baaG baaG thaa apnaa
tum mirii dil-lagii ke saamaa.n the
tum mire dard-e-dil ke darmaa.n the
tum se kaTtaa thaa ra.nj-e-tanhaa.ii
tum se paataa thaa dil shakebaa.ii
aan ik ik tumhaarii bhaatii thii
jo adaa thii vo jii lubhaatii thii
karte the jab tum apnii Gam-KHvaarii
dho.ii jaatii thii.n kulfate.n saarii
jab havaa khaane baaG jaate the
ho ke KHush-haal ghar me.n aate the
baiTh jaate the jab kabhii lab-e-aab
dho ke uThte the dil ke daaG shitaab
koh o sahraa o aasmaan o zamii.n
sab mirii dil-lagii kii shakle.n thii.n
par chhuTaa jis se apnaa mulk o dayaar
jii hu.aa tum se KHud-ba-KHud bezaar
na gulo.n kii adaa KHush aatii hai
na sadaa bulbulo.n kii bhaatii hai
sair-e-gulshan hai jii kaa ik janjaal
shab-e-mahtaab jaan ko hai vabaal
koh o sahraa se taa lab-e-dariyaa
jis taraf jaa.e.n jii nahii.n lagtaa
kyaa hu.e vo din aur vo raate.n
tum me.n aglii sii ab nahii.n baate.n
ham hii Gurbat me.n ho ga.e kuchh aur
yaa tumhaare badal ga.e kuchh taur
go vahii ham hai.n aur vahii duniyaa
par nahii.n ham ko lutf duniyaa kaa
ai vatan ai mire bahisht-e-barii.n
kyaa hu.e tere aasmaan o zamii.n
raat aur din kaa vo samaa.n na rahaa
vo zamii.n aur vo aasmaa.n na rahaa
terii duurii hai morid-e-aalaam
tere chhuTne se chhuT gayaa aaraam
kaaTe khaataa hai baaG bin tere
gul hai.n nazro.n me.n daaG bin tere
miT gayaa naqsh kaamraanii kaa
tujh se thaa lutf zindagaanii kaa
jo ki rahte hai.n tujh se duur sadaa
in ko kyaa hogaa zindagii kaa mazaa
ho gayaa yaa.n to do hii din me.n ye haal
tujh bin ek ek pal hai ik ik saal
sach bataa to sabhii ko bhaataa hai
yaa ki mujh se hii teraa naataa hai
mai.n hii kartaa huu.n tujh pe jaan nisaar
yaa ki duniyaa hai terii aashiq-e-zaar
kyaa zamaane ko tuu aziiz nahii.n
ai vatan tuu to aisii chiiz nahii.n
jin o insaan kii hayaat hai tuu
murG o maahii kii kaa.enaat hai tuu
hai nabaataat kaa numuu tujh se
ruukh tujh bin hare nahii.n hote
sab ko hotaa hai tujh se nashv-o-numaa
sab ko bhaatii hai terii aab-o-havaa
terii ik musht-e-KHaak ke badle
luu.n na hargiz agar bahisht mile
jaan jab tak na ho badan se judaa
ko.ii dushman na ho vatan se havaa

Altaf Hussain Hali
Nazm

ye kaun uTha hai sharmata

kuchh jaag rahii kuchh sotii hai
har mauj-e-sabaa mu.nh dhotii hai
naa-shushta ruKH yaa motii hai
a.ng.Daa.ii se jiz-biz hotii hai
ye kaun uThaa hai sharmaataa

Josh Malihabadi
Nazm

saf laDki

vaah ye la.Dkii hai kitnii paak saaf
saaf kap.De saaf chehra naak saaf
mail daa.nto.n par na naaKHun me.n kahii.n
aur kap.Do.n par kahii.n dhabba nahii.n
saaf suthre dhoyaa motii haath paa.nv
chaahtaa hai dil kaleje se lagaa.uu.n
aa.o baby aa.o jaldii paas aa.o
ik maze kaa pyaar ham ko de ke jaa.o
aate hii pahle kiyaa us ne salaam
phir jo puuchhaa to bataayaa apnaa naam
god me.n le kar kiyaa pahle to pyaar
phir kahaa beTii mai.n tum par se nisaar
aap kyaa pa.Dhtii hai.n kyaa kartii hai.n kaam
aap ke vaalid kaa hai kis jaa maqaam
bholii la.Dkii ne diyaa ham ko javaab
duusrii urdu kii pa.Dhtii huu.n kitaab
first reader pahlii diiniyaat kii
aur kalaam-ul-laah saaraa pa.Dh chukii
hifz hai kashf-ul-KHulaasa sab mujhe
yaad hai har sher kaa matlab mujhe
saaf suthrii hai merii har ek chiiz
mujh ko ammaa.n ne sikhaa.ii ye tamiiz
saaf bistar saaf kamra saaf ghar
mai.n ne puuchhaa baat us kii kaaT kar
haath mu.nh kab dhotii ho us ne kahaa
fajr-o-zohar asr-o-maGrib aur ishaa
paa.nch vaqto.n kii mai.n pa.Dhtii huu.n namaaz
juutii ko lagtaa nahii.n bol-o-baraaz
chauthe din nahaa kar badaltii huu.n libaas
chhaavaa.n saabun ka.nghii hai sab mere paas
daa.nt mere saaf bhii hai.n paak bhii
mere haa.n manjan bhii hai misvaak bhii
aa.ii pa.Dhne ko aligarh saal haal
umr ke guzre hai.n mere aaTh saal
is se bhii kam thaa bahut jab meraa sin
saaf rakkhii jaatii thii mai.n raat din
mere vaalid hai.n Gulaam panjatan
meraa ghar hai Hyderabad dakan
sun ke us paakiiza la.Dkii ke javaab
mai.n nai dii.n kaifii du.aa.e.n be-hisaab

Kaifi Hyderabadi
Nazm

tanha

laakh lahro.n se uThaa hai mirii fitrat kaa KHamiir
laakh qulzum mire siine me.n davaa.n rahte hai.n
din ko kirne.n mire afkaar kaa mu.nh dhotii hai.n
shab ko taare mirii jaanib nigraa.n rahte hai.n
mere maathe pe jhalaktaa hai nadaamat ban kar
ibn-e-maryam kaa vo jalva jo kaliisaa me.n nahii.n

Mustafa Zaidi
Nazm

bichhDe ghar ka saya

sub.h-savere
vo bistar se saa.e jaisii uThtii hai
phir chuulhe me.n raat kii ThanDii aag ko
raushan kartii hai
itne me.n din cha.Dh jaataa hai
jaldii jaldii chaa.e banaa kar shauhar ko ruKHsat kartii hai
sayyaare gardish karte hai.n
shahr me.n sahraa sahraa.o.n me.n chaTyal maidaa.n
kohsaaro.n ke nasheb-o-faraaz banaa karte hai.n
saare ghar ko dhotii hai
kap.De tauliye tooth-brush bistar kii chaadar
ko.ii kitaab uThaatii hai rakh detii hai
radio on kiyaa phir rokaa on kiyaa
phir ko.ii puraanaa KHat pa.Dhtii hai
(ghanTii bajii)
''maryam! aa jaa.o''
''tum kaisii ho? vo kaise hai.n''
''kyaa us kaa ko.ii KHat aayaa?''
(tho.Dii KHaamoshii kaa vaqfa)
''tum kaisii ho''
''tum se matlab? sach kah duu.n to kyaa kar logii''
dekho sab kii sab baiThii ho.n
''achchhaa''
''achchhaa''
(darvaaza phir band ho gayaa)
''ab kyaa karnaa!
ghar to bilkul saaf pa.Daa hai
ko.ii shikan bistar pe nahii.n hai
diivaar-o-dar dhule-dhulaa.e
ko.ii dhabba yaa mak.Dii kaa jaalaa tinkaa
kahii.n kuchh nahii.n
kyaa karnaa hai!
uf! vo calendar
kitne baras ho ga.e phir bhii
aa.e.n to un se kahtii huu.n
bilkul nayaa calendar laa.e.n
kuchh bhuuk nahii.n
ab kyaa karnaa hai
leT rahuu.n? lekin kyaa leTuu.n
jaane kitnaa leT chukii huu.n
kha.Dii rahuu.n
haa.n kha.Dii rahuu.n
par mai.n to kab se kha.Dii hu.ii huu.n
khi.Dkii kaa parda hii kholuu.n
dhuup kahaa.n tak aa pahu.nchii hai
laa.o apnaa album dekhuu.n
nayyar shabnam shafaq subuuhii aKHtar juuhii
kaise ho.nge
aa.n! ye mai.n huu.n
ittii pyaarii pyaarii thii mai.n
mai.n bilkul hii bhuul ga.ii thii
sab kitnaa achchhaa lagtaa thaa
abbaa, ammaa.n, bhayyaa, appii
sab zinda the
saaya naanii gulshan aapaa
haa.n aur vo gaurayyaa baabaa
aa.nsuu naGme shor Thahaake saare ik sur me.n hote the
saarii duniyaa ghar lagtii thii
amaa.n udhar bulaayaa kartii.n
abbaa udhar pukaaraa karte
bhayyaa Daa.nTte
appii Dhero.n pyaar jataatii.n
khaanaa, piinaa, sonaa, jaagnaa, ha.nsnaa, ruuThnaa, man.naa
Dor ba.ndhii thii
ek me.n ek piroyaa hu.aa thaa
kal nammuu ke ghar shaadii hai
paas hii ko.ii maut hu.ii hai
college kii chhaTii kab hogii
iid phir ab kii tiis kii hogii
ham bhii lail-e-qadr jaage.nge
shahlaa kii ma.ngnii kyuu.n TuuTii?
kyaa iqbaal ko.ii shaa.er thaa?
chup ba.Dke abbaa sun le.nge
saa.e dau.D rahe hai.n ghar me.n
har goshe me.n uupar niiche andar baahar dau.D rahe hai.n
lambe chhoTe sabz o zard hazaaro.n saa.e
baahar shahr me.n ko.ii nahii.n hai
dhuup siyah pa.Dtii jaatii hai
qadd-e-aadam aa.iine me.n
us kaa na.ngaa jism kha.Daa hai
jism ke andar suuraj kaa Guncha mahkaa hai
sayyaare gardish karte hai.n
sab anjaane sayyaaro.n me.n bhuule-bisre ghar raushan hai.n
kis lamhe kaa hai ye tamaasha
hast-o-buud ke sannaaTe me.n
laa-maujuud kii taariikii me.n
sirf yahii aa.iina raushan
sirf ik aks-e-guzishta raushan
bichh.De ghar kaa saaya raushan

Farhat Ehsas
Nazm

bahut KHub-surat hamara watan hai

bahut KHuubsuurat hamaaraa vatan hai
anokhaa hai sab se niraalaa vatan hai
sabhii rang ke phuul is me.n khile hai.n
bahishtii manaazir bhii is ko mile hai.n
kahii.n raat-raanii kii KHushbuu basii hai
kahii.n par chamelii kii nik.hat ghulii hai
kahii.n par dhanak saat-ra.ngii tanii hai
kahii.n nuur kii ko.ii chaadar bichhii hai
kisii samt me.n ko.ii dariyaa ravaa.n hai
kahii.n kohsaaro.n kaa dilkash samaa.n hai
kahii.n laal piile hare qumqume hai.n
kahii.n paaniyo.n me.n diye jal rahe hai.n
kahii.n paa.e jaamo.n me.n Topii kha.Dii hai
kahii.n paa.nv me.n ko.ii dhotii ba.ndhii hai
kahii.n suiT saa.Dii kii raunaq lagii hai
kahii.n ghaaghre kii ajab dilkashii hai
kisii kii hathelii pe meh.ndii rachii hai
kisii paa.nv me.n ko.ii laalii lagii hai
kisii sar pe baalo.n ke guchchhe bane hai.n
kahii.n baal pairo.n pe laTke hu.e hai.n
kahii.n saat rango.n kii pichkaariyaa.n hai.n
ki jin se badan-biich gul-kaariyaa.n hai.n
kahii.n ge.nd balle se lag kar hai u.Dtii
kahii.n ko.ii DanDe se gillii uchhaltii
zamii.n ko bichhaa.e ko.ii so rahaa hai
ka.ii KHvaab bhii nii.nd me.n bo rahaa hai
ko.ii paaniyo.n me.n chhalaa.nge.n lagaataa
KHalaa.o.n me.n ko.ii hai kartab dikhaataa
ko.ii saa.np ko apnaa saathii banaataa
use biin kii apnii dhun par nachaataa
ko.ii apne a.ngo.n kaa aasan lagaataa
ko.ii apne tan kaa tamaashaa dikhaataa
ko.ii apnii aa.nkho.n se man jiit.taa hai
adaa.o.n se duniyaa kaa dhan jiit.taa hai
jidhar dekhiye ik anokhaa samaa.n hai
udaasii me.n bhii zindagii shaadmaa.n hai
har ik tarah se ye niyaaraa vatan hai
bahut KHuubsuurat hamaaraa vatan hai

Ghazanfar
Nazm

abhi bhuk se ek chuha mara hai

na kap.Daa na roTii na loTaa na dhotii
pareshaa.n hai potaa bilaktii hai potii
ki qiimat me.n gandum kaa daana hai motii
ye mumkin nahii.n thaa vilaadat na hotii
har ik samt koh-e-nidaa chiiKHtaa hai
jo paidaa hu.aa mubtalaa-e-balaa hai

Mohammad Yusuf Papa
Nazm

rasm

tirii parchhaa.ii.n tere baa'd bhii ghar bhar me.n phirtii hai
kabhii gul-daan me.n uljhe hu.e
phuulo.n kii KHushbuu kii
safe.n tartiib detii hai
kabhii sajde me.n sar rakkhe
girii bikhrii kitaabo.n kii
jamaa.at kii jabiino.n par lagii barso.n kii gard aur dhuul
palko.n kii namii se Dhotii almaarii me.n qaade baa.nTii takbiir detii hai
daruud-e-dostii se peshtar
daa.e.n taraf ke haath kii u.nglii uThaa kar
ik shahaadat ik gavaahii
naam kar detii hai chaahat ke
kabhii aa.iine me.n apnii puraanii daastaa.n kii aayato.n kaa vird kartii hai
kabhii chaukhaT pe aa ke yaad kii tasbiih kartii hai
piro letii hai daano.n me.n
ki har daane pe teraa naam pa.Dhtii hai
magar gintii nahii.n kartii
ki har tai.ntiis daano.n baa'd ik chhallaa nahii.n aataa
kabhii in panj-vaqta khi.Dkiyo.n se dhuup ke miinaar par cha.Dh kar
ye hai-ala-ssalaat-e-dil kii guu.nje.n chaak kartii hai
fazaa namnaak kartii hai
nigaaho.n ke gha.De se paanii chhalkaa kar vuzuu
yaa phir nigaahe.n KHushk ho jaa.e.n
to biite vaqt ke ik lams se tadbiir kii suurat
tayammum se mirii likkhii hu.ii nazme.n tilaavat karne lagtii hai
sub.h se shaam hone tak
kisii tasviir ko ka.aba banaatii hai
tavaaf kartii jaatii hai
na jaane kaun se kitne manaasik yaad ne
parchhaa.ii.n ke sar baa.ndh rakkhe hai.n
ye saare kashT kartii hai
par aaKHir me.n
vahii ik aaKHirii sunnat nibhaatii hai
ye apne aap ko har shaam
aa.ngan me.n giraa kar
haar ko tasliim kar ke
rasm ke ik khurdure KHanjar se
bin takbiir hii
qurbaan hotii hai

Atif tauqeer
Nazm

ghar ki raunaq

ham apne ahl siyaasat ke dil se qaa.el hai.n
ki haq me.n qaum ke vo maadar-e-masaa.il hai.n
qadam qadam pe na.e gul khilaate rahte hai.n
tarah tarah ke masaa.il ugaate rahte hai.n
kabhii ye dhun hai ki suubo.n kii phir se ho tashkiil
kabhii ye zid hai ki had-bi.ndiyaa.n na ho.n tabdiil
kabhii ye shor karo KHatm chor-baazaarii
munaafa-KHoro.n kii lekin na ho giraftaarii
baraa.e-bahs kha.Daa hai kabhii ye ha.ngaama
libaas qaum kaa dhotii ho yaa ki paajaama
har ek bahs me.n kuchh kisht-o-KHuu.n zaruurii hai
nahii.n to jo bhii hai tahriik vo adhuurii hai
har ek fitna-o-shorish kaa aaKHirii jalva
muzaaharaat o juluus o tasaadum o balva
yuu.nhii uThaa.ii ga.ii bahs jab zabaa.n ke liye
''suKHan bahaana hu.aa marg-e-naa-gahaa.n ke liye''
vo mas.ala ki jo daanish-kado.n me.n hal hotaa
balaa se aaj agar tai na hotaa kal hotaa
use bhii ahl-e-siyaasat ne kar liyaa iGvaa
aur is ke baa'd vo sab kuchh hu.aa jo honaa thaa
nifaaq o buGz o ta.assub ke aa ga.e rele
zabaa.n kii aa.D me.n ahl-e-fasaad khul-khele
muKHaalifat me.n hu.ii jaa-ba-jaa saf-aaraa.ii
juluus le ke chale ik taraf se balvaa.ii
labo.n pe GalGala-e-''inqilaab zindaabaad''
magar dilo.n mai.n dabaa.e hu.e sharaar-e-fasaad
dukaane.n lauTii ga.ii.n raah-giir maare ga.e
gharo.n me.n aag lagii tifl o piir maare ga.e
vo pahlaa shaKHs jau khaa kar chhure kaa zaKHm giraa
maze kii baat to ye hai, Gariib guu.ngaa thaa
maziid ye ki ise jaa.n se maarne vaale
kisii zabaan se vaaqif na the KHud an-pa.Dh the

Raza Naqvi Vahi
Nazm

diwali

kho ga.ii hai.n kaam ke andar ku.nvaarii la.Dkiyaa.n
saath vo ham-joliyaa.n bhii aa.ii hai.n jo mehmaa.n
ek naazuk u.ngliyo.n se devte dhotii hu.ii
duusrii dho.e hu.o.n ko chun ke KHush hotii hu.ii
aur ga.Dvaa tiisrii aafat kii par-kaalaa liye
battiyaa.n baTtii hai chauthii ruu.ii kaa gaalaa liye
paa.nchve.n har suu diye tartiib se dhartii chalii
aur chhaTii battii sajaa kar tel se bhartii chalii
ye jhamakkaa kar chukaa aaraasta jab taaq duur
sahn se ziine pe dau.Daa aur pahu.nchaa baam par
o.Dh kar kamlii savaad-e-shaam niklaa sharq se
juu.nhii ruu-kaaraao.n pe chhaayaa tho.De tho.De farq se
shaam kaa gesuu khulii aa.nkho.n pe jaaduu kar gayaa
bujh ga.ii sham-e-shafaq nazro.n me.n kohraa bhar gayaa
tuur kaa jalva charaaGo.n me.n simaT kar rah gayaa
aa.nkh malnaa thii ki nazzaara palaT kar rah gayaa
raushnii me.n saariyo.n ke rang lahraane lage
muKHtalif aa.nchal havaa ke ruKH pe bal khaane lage
ye diivaalii ke manaazir ye nigaahe.n kaamyaab
yaa ilaahii taa qayaamat bar na aayad aaftaab

Shaad Aarfi
Nazm

asia ki mazdur aurat

taGaarii sar pe dhare tar-ba-tar pasiine se
uThaa.e maamtaa kaa bojh nau mahiine se
dahaktii ret pe apne qadam jamaa.e hu.e
mashaqqato.n kii nazar se nazar milaa.e hu.e
ruto.n ke qahr ko ye imtihaan lagtii hai
ye chaa.ndnii se banii ik chaTaan lagtii hai
hunar kii chaadar-e-baa-zeb us ne pahnii hai
ma.aashiyaat kii paazeb us ne pahnii hai
phaTe libaas pe mehnat kii shaal o.Dhe hai
badan ke shiishe pe lohe kaa jaal o.Dhe hai
har ik makaan kii buniyaad us ne Daalii hai
gharo.n kii shaukat-o-azmat usii kii paalii hai
vo jis kalaa.ii pe be-himmatii ke ta.ane hai.n
usii ke panje me.n taaqat ke taane-baane hai.n
machaan baa.ndh ke jab chhat banaa.ii jaa.egii
taGaarii sar pe cement kii yahii uThaa.egii
cha.Dhegii ziina-ba-ziina sameTtii saarii
agarche bojh bhii bhaarii hai pair bhii bhaarii
ye jhuTpuTe ko thakii-haarii ghar jo jaa.egii
to apne kumbe kii har bhuuk ye miTaa.egii
ye yuu.n to piiTh pe patthar uThaa ke chaltii hai
zamaam-e-kaar ko qabze me.n karke chaltii hai
kabhii kudaal chalaatii hai bojh Dhotii hai
to hal chalaa ke kabhii ye zamiin botii hai
kabhii ye ghar kii gavaahii me.n jaan detii hai
haveliyo.n ko itaa.at kaa maan detii hai
Gariib hai so badan kaa KHiraaj detii hai
ye KHud ko piis ke ghar ko anaaj detii hai
ye be-bisaat hai lekin ye Gam-gusaar bhii hai
vafaa-shi.aar bhii hai jaan-e-rozgaar bhii hai

Naseem Syed
Nazm

barish

baadal kii dhutkaarii baarish
rotii phirtii hai
shaano.n pe dahakte sahraa.o.n kaa Gam
Dhotii phirtii hai
vo tiira pahnaa.ii me.n
saarii raat bhaTaktii hai
rah rah ke us ke siine me.n
bijlii kii yaad ta.Daptii hai
qahr se us ko kaale baadal
ghuurte rahte hai.n
us ke motii jaise aa.nsuu
parnaalo.n me.n bahte hai.n

Asif Raza
Nazm

ajnabi moD par

hai kahaa.n vo samaa.n
dard ke nuur me.n dhul ke nikhre hu.e jism-o-jaa.n
be-hisii kii chaTaane.n giraatii hu.ii
raah sa.ng-e-KHaar haTaatii hu.ii
karb-e-taKHliiq kii naddiyaa.n
ruuh ke zaKHm dhotii hu.ii
tund jazbaat kii badliyaa.n
aabshaar-e-ravaa.n
vo mataa-e-giraa.n
roz-o-shab kii faromaaya gardaan me.n kho ga.ii
lazzat-e-vasl kii bekalii
hijr-e-betaab kii raushnii
manzil-e-be-nishaa.n kii kasak
an-sune giit kii naGmagii
dasht-e-ayyaam ke jaane kis mo.D par
ajnabii rahguzaaro.n me.n gum ho ga.ii
dil gayaa dil kii vo be-qaraarii ga.ii
qalb-e-majruuh kii sogvaarii ga.ii
naala-e-shab gayaa be-sabab ashk-baarii ga.ii
jaagne ke jo aasaar the so ga.e
sub.h-o-shaam ajnabii ho ga.e
ai KHudaa
ai KHudaa
azhdahaam-e-tijaarat me.n tuu hii bataa
KHvaab aa.nkho.n me.n kaise basaa.e.nge ham
kaun sii raah par
garm ashko.n ke motii bichhaa.e.nge ham
aah kis aarzuu ke liye
sar-e-mizhgaa.n charaaG-e-basiirat jalaa.e.nge ham
ishq me.n kis tasavvur ke
ab jaa.n se jaa.e.nge ham

Sajida Zaidi
Nazm

maqsadiyat

mujhe aisaa bhii lagtaa hai
ki ye gutthii bahut par pech farsuuda KHayaalo.n kii
kabhii to hal bhii honii hai
aur is andher nagrii me.n
azal se kamtarii kaa bojh Dhotii bint-e-havvaa kii
daraKHshaa.n kal bhii honii hai

Saima Aftab
Nazm

tishnagi

ye chhalaktaa hu.aa jaam
mai.n ise pii na sakuu.ngaa saaqii
aazmaa.ii hu.ii shai
zaa.iqa talKH
asar phiikaa hai
chand lamho.n kaa suruur
jaise ik maah-jabii.n doshiiza
muskuraatii hu.ii tezii se guzar jaatii hai
chand lamho.n kaa suruur
tishnagii saaGar mai se bhii kahii.n jaatii hai
to.D de jaam-o-subuu
tishnagii naam hai jiine kaa
mujhe jiine de
tishnagii roz-e-azal se hai rafiiq-e-dil-o-jaa.n
tishnagii vaj.h-e-talab
zauq-e-talab husn-e-talab
tishnagii par hai zamaane kaa madaar
raate.n jo aa.nkho.n hii aa.nkho.n me.n basar hotii hai.n
raate.n jo pichhle pahar ashko.n se mu.nh dhotii hai.n
sub.h hotii hai to pii jaataa hai suuraj un ko
raat Dhal jaatii hai shabnam ke hasii.n qatro.n me.n
sub.h-dam phuulo.n ke laakho.n saaGar
muntazir hote hai.n suuraj ke liye
ye subuuhii
ki jise pii ke damak uThtaa hai
ruu-e-KHurshiid-e-jahaa.n-taab
shu.aa.e.n jis kii
naagine.n ban ke har ik buu.nd ko pii jaatii hai.n
buu.nd aa.nsuu kii ho
yaa shabnam kii
kurra-e-arz pe baaqii nahii.n rahne paatii
KHushk ho jaate hai.n sab
gul-e-tar
diida-e-tar
ko.ii KHurshiid kii saffaak tapish pii jaa.e
raat ke chaa.nd kaa aalam dekho
chaa.nd ik ghuu.nT me.n pii jaataa hai suuraj kii tapish
shabnam-o-ashk du.aa karte hai.n
ki zamaane me.n sahar ho na kabhii
aur ye silsila-e-tishna-labii
ai KHudaa dahr me.n jaarii hai na jaane kab se
kaise maanuu.n
lab-e-laalii.n ke hazaaro.n bose
ruuh kii pyaas bujhaa sakte hai.n
ishq sairaab nahii.n ho saktaa
ye chhalaktaa hu.aa jaam
mai.n ise pii na sakuu.ngaa saaqii

Niyaz Haidar
Nazm

yun bhi hota hai KHandan mein kya

mai.n
rozaana ek sau ruupe ujrat kaa mulaazim huu.n
meraa beTaa
tyre pa.nkchar kii duukaan par kaam kartaa hai
aur
ustaad kii gaaliyo.n aur thappa.Do.n ke alaava
tiis ruupa.e roz kamaataa hai
biivii aur nau-umr beTii
tiin chaar ba.De gharo.n me.n safaa.ii aur bartan dhotii hai.n!
mujhe yaad nahii.n
ki kabhii mere kumbe ne mil kar naashta kiyaa ho
yaa
raat ke khaane ke baa'd mil-jul kar baate.n kii ho.n
mere bachche ab
mujh se iidii nahii.n maa.ngte
aur
biivii baaliyo.n aur gajro.n kaa taqaaza nahii.n kartii
ham sab
KHuraak puurii karne ke liye marte hai.n
aur
utility bil dene ke liye zinda rahte hai.n
ham ek duusre se
ajnabiyo.n kii tarah milte hai.n
aur
aabaa.ii gharo.n me.n kiraaya-daaro.n kii tarah rahte hai.n

Zahid Masood
Nazm

aaftab aafat hai aab ke liye

aaftaab aafat hai aab ke liye lekin
mere dil ke chashmo.n me.n aaftaab khilte hai.n
mere dil ke chashme jo aasmaa.n ke pe.Do.n me.n
saaya saaya bahte hai.n
dhuup in ke paanii me.n KHvaab kii tarah uryaa.n
parbato.n kii jholii me.n baiTh kar nahaatii hai
apne phuul se paa.nv paaniyo.n me.n dhotii hai
arsh kii nigaaho.n me.n ye magar KHaraabii hai
aasmaan vaalo.n ne dil ke husn-e-uryaa.n ko
vo libaas baKHshaa hai jis ke saKHt pardo.n me.n
dhuup bhii hijaabii hai!!

Mubarak Haider
Nazm

mel utarna mushkil lagta hai

saare din ke mel ko
jism se utaarnaa mushkil lagtaa hai
sar ko din bhar kii dhuul se
faariG karnaa
aur phir gardan ke kaale daa.ere ko
halkaa karnaa
saabun ke bulbulo.n se
phir aahista aahista un golaa.iyo.n kii taraf
ba.Dhnaa
jin par mel kabhii nahii.n cha.Dhtaa
zaraa sii tirchhii
ek taraf ko jhukii hu.ii
sadaa kii chamkii-chamkaa.ii
unhe.n mai.n ab nahii.n dhotii
phir ubhre hu.e peT par
barso.n kaa pasiina
jame hu.e chewing-gum kii tarah
kabhii nahii.n utartaa

Azra Abbas
Nazm

mausam-e-barsat ki subh

aaj jis vaqt mujhe tum ne jagaayaa ammaa.n
apne aur nii.nd ke pahluu se uThaayaa ammaa.n
aasmaa.n kamlii thaa o.Dhe hu.e kaalii kaalii
taazgii aur safedii se fazaa thii KHaalii
na a.ndheraa hii thaa shab kaa na ujaalaa din kaa
raat ke gird nazar aataa thaa haalaa din kaa
ek bulandii kii ka.Dak pastii ko dhu.ndlaatii thii
dil hilaatii hu.ii aavaaz sunii jaatii thii
sub.h har chaar taraf rotii hu.ii phirtii thii
apnaa mu.nh aa.nsu.o.n se dhotii hu.ii phirtii thii
jaise nanhaa saa mai.n beTaa huu.n tumhaaraa ammaa.n
aise hii sub.h kaa ik laal hai pyaaraa ammaa.n
jaise mai.n khelne jaataa huu.n bahut duur kahii.n
aise hii sharq me.n hai aaj vo mastuur kahii.n

Hamidullah Afsar
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now