Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ",Bud"

Nazm MATCHES FOR ",bud"

Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

abhi to main jawan hun

havaa bhii KHush-gavaar hai
gulo.n pe bhii nikhaar hai
tarannum-e-hazaar hai
bahaar pur-bahaar hai
kahaa.n chalaa hai saaqiyaa
idhar to lauT idhar to aa
are ye dekhtaa hai kyaa
uThaa subuu subuu uThaa
subuu uThaa pyaala bhar
pyaala bhar ke de idhar
chaman kii samt kar nazar
samaa.n to dekh be-KHabar
vo kaalii kaalii badliyaa.n
ufuq pe ho ga.ii.n ayaa.n
vo ik hujuum-e-mai-kashaa.n
hai suu-e-mai-kada ravaa.n
ye kyaa gumaa.n hai bad-gumaa.n
samajh na mujh ko naa-tavaa.n
KHayaal-e-zohd abhii kahaa.n
abhii to mai.n javaan huu.n
ibaadato.n kaa zikr hai
najaat kii bhii fikr hai
junuun hai savaab kaa
KHayaal hai azaab kaa
magar suno to shaiKH jii
ajiib shai hai.n aap bhii
bhalaa shabaab o aashiqii
alag hu.e bhii hai.n kabhii
hasiin jalva-rez ho.n
adaa.e.n fitna-KHez ho.n
havaa.e.n itr-bez ho.n
to shauq kyuu.n na tez ho.n
nigaar-haa-e-fitnagar
ko.ii idhar ko.ii udhar
ubhaarte ho.n aish par
to kyaa kare ko.ii bashar
chalo jii qissa-muKHtasar
tumhaaraa nuqta-e-nazar
durust hai to ho magar
abhii to mai.n javaan huu.n
ye gasht kohsaar kii
ye sair juu-e-baar kii
ye bulbulo.n ke chahchahe
ye gul-ruKHo.n ke qahqahe
kisii se mel ho gayaa
to ranj o fikr kho gayaa
kabhii jo baKHt so gayaa
ye ha.ns gayaa vo ro gayaa
ye ishq kii kahaaniyaa.n
ye ras bharii javaaniyaa.n
udhar se mehrbaaniyaa.n
idhar se lan-taraaniyaa.n
ye aasmaan ye zamii.n
nazaara-haa-e-dil-nashii.n
inhe.n hayaat-aafrii.n
bhalaa mai.n chho.D duu.n yahii.n
hai maut is qadar qarii.n
mujhe na aa.egaa yaqii.n
nahii.n nahii.n abhii nahii.n
abhii to mai.n javaan huu.n
na Gam kushuud o bast kaa
buland kaa na past kaa
na buud kaa na hast kaa
na vaada-e-alast kaa
ummiid aur yaas gum
havaas gum qayaas gum
nazar se aas paas gum
hama-bajuz gilaas gum
na mai me.n kuchh kamii rahe
qadah se hamdamii rahe
nashist ye jamii rahe
yahii hamaa-hamii rahe
vo raag chhe.D mutribaa
tarab-fazaa, alam-rubaa
asar sadaa-e-saaz kaa
jigar me.n aag de lagaa
har ek lab pe ho sadaa
na haath rok saaqiyaa
pilaa.e jaa pilaa.e jaa
abhii to mai.n javaan huu.n

Hafeez Jalandhari
Nazm

masjid-e-qurtuba

silsila-e-roz-o-shab naqsh-gar-e-haadsaat
silsila-e-roz-o-shab asl-e-hayaat-o-mamaat
silsila-e-roz-o-shab taar-e-hariir-e-do-ra.ng
jis se banaatii hai zaat apnii qabaa-e-sifaat
silsila-e-roz-o-shab saaz-e-azal kii fuGaa.n
jis se dikhaatii hai zaat zer-o-bam-e-mumkinaat
tujh ko parakhtaa hai ye mujh ko parakhtaa hai ye
silsila-e-roz-o-shab sairafi-e-kaa.enaat
tuu ho agar kam ayaar mai.n huu.n agar kam ayaar
maut hai terii baraat maut hai merii baraat
tere shab-o-roz kii aur haqiiqat hai kyaa
ek zamaane kii rau jis me.n na din hai na raat
aani-o-faanii tamaam mojaza-haa-e-hunar
kaar-e-jahaa.n be-sabaat kaar-e-jahaa.n be-sabaat
avval o aaKHir fanaa baatin o zaahir fanaa
naqsh-e-kuhan ho ki nau manzil-e-aaKHir fanaa
hai magar is naqsh me.n ra.ng-e-sabaat-e-davaam
jis ko kiyaa ho kisii mard-e-KHudaa ne tamaam
mard-e-KHudaa kaa amal ishq se saahab faroG
ishq hai asl-e-hayaat maut hai us par haraam
tund o subuk-sair hai garche zamaane kii rau
ishq KHud ik sail hai sail ko letaa hai thaam
ishq kii taqviim me.n asr-e-ravaa.n ke sivaa
aur zamaane bhii hai.n jin kaa nahii.n ko.ii naam
ishq dam-e-jibra.iil ishq dil-e-mustafaa
ishq KHudaa kaa rasuul ishq KHudaa kaa kalaam
ishq kii mastii se hai paikar-e-gil taabnaak
ishq hai sahbaa-e-KHaam ishq hai kaas-ul-karaam
ishq faqiih-e-haram ishq amiir-e-junuuud
ishq hai ibnus-sabiil is ke hazaaro.n maqaam
ishq ke mizraab se naGma-e-taar-e-hayaat
ishq se nuur-e-hayaat ishq se naar-e-hayaat
ai haram-e-qurtuba ishq se teraa vajuud
ishq saraapaa davaam jis me.n nahii.n raft o buud
ra.ng ho yaa KHisht o sang cha.ng ho yaa harf o saut
mojaza-e-fan kii hai KHuun-e-jigar se numuud
qatra-e-KHuun-e-jigar sil ko banaataa hai dil
KHuun-e-jigar se sadaa soz o suruur o suruud
terii fazaa dil-faroz merii navaa siina-soz
tujh se dilo.n kaa huzuur mujh se dilo.n kii kushuud
arsh-e-mo.allaa se kam siina-e-aadam nahii.n
garche kaf-e-KHaak kii had hai sip.har-e-kabuud
paikar-e-nuurii ko hai sajda mayassar to kyaa
us ko mayassar nahii.n soz-o-gudaaz-e-sajuud
kaafir-e-hindi huu.n mai.n dekh miraa zauq o shauq
dil me.n salaat o duruud lab pe salaat o duruud
shauq mirii lai me.n hai shauq mirii nai me.n hai
naGma-e-allaah-huu mere rag-o-pai me.n hai
teraa jalaal o jamaal mard-e-KHudaa kii daliil
vo bhii jaliil o jamiil tuu bhii jaliil o jamiil
terii binaa paa.edaar tere sutuu.n be-shumaar
shaam ke sahraa me.n ho jaise hujuum-e-nuKHiil
tere dar-o-baam par vaadii-e-aiman kaa nuur
teraa minaar-e-buland jalva-gah-e-jibra.iil
miT nahii.n saktaa kabhii mard-e-musalmaa.n ki hai
us kii azaano.n se faash sirr-e-kaliim-o-KHaliil
us kii zamii.n be-huduud us kaa ufuq be-saGuur
us ke samundar kii mauj dajla o danyuub o niil
us ke zamaane ajiib us ke fasaane Gariib
ahd-e-kuhan ko diyaa us ne payaam-e-rahiil
saaqi-e-rabaab-e-zauq faaras-e-maidaan-e-shauq
baada hai us kaa rahiiq teG hai us kii asiil
mard-e-sipaahii hai vo us kii zirah laa-ilaah
saaya-e-shamshiir me.n us kii panah laa-ilaah
tujh se hu.aa aashkaar banda-e-momin kaa raaz
us ke dino.n kii tapish us kii shabo.n kaa gudaaz
us kaa maqaam-e-buland us kaa KHayaal-e-aziim
us kaa suruur us kaa shauq us kaa niyaaz us kaa naaz
haath hai allaah kaa banda-e-momin kaa haath
Gaalib o kaar-aafrii.n kaar-kushaa kaarsaaz
KHaakii o nuurii-nihaad banda-e-maulaa-sifaat
har do-jahaa.n se Ganii us kaa dil-e-be-niyaaz
us kii umiide.n qaliil us ke maqaasid jaliil
us kii adaa dil-fareb us kii nigah dil-navaaz
aaj bhii is des me.n aam hai chashm-e-Gazaal
aur nigaaho.n ke tiir aaj bhii hai.n dil-nashii.n
buu-e-yaman aaj bhii us kii havaa.o.n me.n hai
ra.ng-e-hijaaz aaj bhii us kii navaa.o.n me.n hai
diida-e-anjum me.n hai terii zamii.n aasmaa.n
aah ki sadiyo.n se hai terii fazaa be-azaa.n
kaun sii vaadii me.n hai kaun sii manzil me.n hai
ishq-e-balaa-KHez kaa qaafla-e-saKHt-jaa.n
dekh chukaa almanii shorish-e-islaah-e-dii.n
jis ne na chho.De kahii.n naqsh-e-kuhan ke nishaa.n
harf-e-Galat ban ga.ii ismat-e-piir-e-kunisht
aur hu.ii fikr kii kashti-e-naazuk ravaa.n
chashm-e-faraansiis bhii dekh chukii inqalaab
jis se digar-guu.n hu.aa maGrabiyo.n kaa jahaa.n
millat-e-ruumii-nizhaad kohna-parastii se piir
lazzat-e-tajdiida se vo bhii hu.ii phir javaa.n
ruuh-e-musalmaa.n me.n hai aaj vahii iztiraab
raaz-e-KHudaa.ii hai ye kah nahii.n saktii zabaa.n
narm dam-e-guftuguu garm dam-e-justujuu
razm ho yaa bazm ho paak-dil o paak-baaz
nuqta-e-parkaar-e-haq mard-e-KHudaa kaa yaqii.n
aur ye aalam tamaam vahm o tilism o majaaz
aql kii manzil hai vo ishq kaa haasil hai vo
halqa-e-aafaaq me.n garmi-e-mahfil hai vo
kaaba-e-arbaab-e-fan satvat-e-diin-e-mubii.n
tujh se haram martabat undulusiyo.n kii zamii.n
hai tah-e-garduu.n agar husn me.n terii naziir
qalb-e-musalmaa.n me.n hai aur nahii.n hai kahii.n
aah vo mardaan-e-haq vo arabii shahsavaar
haamil-e-KHalq-e-aziim saahab-e-sidq-o-yaqii.n
jin kii hukuumat se hai faash ye ramz-e-Gariib
saltanat-e-ahl-e-dil faqr hai shaahii nahii.n
jin kii nigaaho.n ne kii tarbiyat-e-sharq-o-Garb
zulmat-e-europe me.n thii jin kii KHirad-raah-bii.n
jin ke lahuu ke tufail aaj bhii hai.n undulusii
KHush-dil o garam-iKHtilaat saada o raushan-jabii.n
dekhiye is bahr kii tah se uchhaltaa hai kyaa
gumbad-e-niilofarii rang badaltaa hai kyaa
vaadi-e-koh-saar me.n Garq-e-shafaq hai sahaab
laal-e-badaKHshaa.n ke Dher chho.D gayaa aaftaab
saada o pur-soz hai duKHtar-e-dahqaa.n kaa giit
kashtii-e-dil ke liye sail hai ahd-e-shabaab
aab-e-ravaan-e-kabiir tere kinaare ko.ii
dekh rahaa hai kisii aur zamaane kaa KHvaab
aalam-e-nau hai abhii parda-e-taqdiir me.n
merii nigaaho.n me.n hai us kii sahar be-hijaab
parda uThaa duu.n agar chehra-e-afkaar se
laa na sakegaa fara.ng merii navaa.o.n kii taab
jis me.n na ho inqalaab maut hai vo zindagii
ruuh-e-umam kii hayaat kashmakash-e-inqilaab
suurat-e-shamshiir hai dast-e-qazaa me.n vo qaum
kartii hai jo har zamaa.n apne amal kaa hisaab
naqsh hai.n sab naa-tamaam KHuun-e-jigar ke baGair
naGma hai saudaa-e-KHaam KHuun-e-jigar ke baGair

Allama Iqbal
Nazm

taswir-e-dard

nahii.n minnat-kash-e-taab-e-shuniidan daastaa.n merii
KHamoshii guftuguu hai be-zabaanii hai zabaa.n merii
ye dastuur-e-zabaa.n-bandii hai kaisaa terii mahfil me.n
yahaa.n to baat karne ko tarastii hai zabaa.n merii
uThaa.e kuchh varaq laale ne kuchh nargis ne kuchh gul ne
chaman me.n har taraf bikhrii hu.ii hai daastaa.n merii
u.Daa lii qumriyo.n ne tuutiyo.n ne andaliibo.n ne
chaman vaalo.n ne mil kar luuT lii tarz-e-fuGaa.n merii
Tapak ai sham.a aa.nsuu ban ke parvaane kii aa.nkho.n se
saraapaa dard huu.n hasrat bharii hai daastaa.n merii
ilaahii phir maza kyaa hai yahaa.n duniyaa me.n rahne kaa
hayaat-e-jaavedaa.n merii na marg-e-naa-gahaa.n merii
miraa ronaa nahii.n ronaa hai ye saare gulistaa.n kaa
vo gul huu.n mai.n KHizaa.n har gul kii hai goyaa KHizaa.n merii
darii.n hasrat saraa umriist afsuun-e-jaras daaram
z faiz-e-dil tapiidan-haa KHarosh-e-be-nafas daaram
riyaaz-e-dahr me.n naa-aashnaa-e-bazm-e-ishrat huu.n
KHushii rotii hai jis ko mai.n vo mahruum-e-masarrat huu.n
mirii big.Dii hu.ii taqdiir ko rotii hai goyaa.ii
mai.n harf-e-zer-e-lab sharminda-e-gosh-e-samaa.at huu.n
pareshaa.n huu.n mai.n musht-e-KHaak lekin kuchh nahii.n khultaa
sikandar huu.n ki aa.iina huu.n yaa gard-e-kuduurat huu.n
ye sab kuchh hai magar hastii mirii maqsad hai qudrat kaa
saraapaa nuur ho jis kii haqiiqat mai.n vo zulmat huu.n
KHaziina huu.n chhupaayaa mujh ko musht-e-KHaak-e-sahraa ne
kisii ko kyaa KHabar hai mai.n kahaa.n huu.n kis kii daulat huu.n
nazar merii nahii.n mamnuun-e-sair-e-arsa-e-hastii
mai.n vo chhoTii sii duniyaa huu.n ki aap apnii vilaayat huu.n
na sahbaa huu.n na saaqii huu.n na mastii huu.n na paimaana
mai.n is mai-KHaana-e-hastii me.n har shai kii haqiiqat huu.n
mujhe raaz-e-do-aalam dil kaa aa.iina dikhaataa hai
vahii kahtaa huu.n jo kuchh saamne aa.nkho.n ke aataa hai
ataa aisaa bayaa.n mujh ko hu.aa ra.ngii.n-bayaano.n me.n
ki baam-e-arsh ke taa.ir hai.n mere ham-zabaano.n me.n
asar ye bhii hai ik mere junuun-e-fitna-saamaa.n kaa
miraa aa.iina-e-dil hai qazaa ke raaz-daano.n me.n
rulaataa hai tiraa nazzaara ai hindostaa.n mujh ko
ki ibrat-KHez hai teraa fasaana sab fasaano.n me.n
diyaa ronaa mujhe aisaa ki sab kuchh de diyaa goyaa
likhaa kalk-e-azal ne mujh ko tere nauha-KHvaano.n me.n
nishaan-e-barg-e-gul tak bhii na chho.D us baaG me.n gulchii.n
tirii qismat se razm-aaraa.iyaa.n hai.n baaGbaano.n me.n
chhupaa kar aastii.n me.n bijliyaa.n rakkhii hai.n garduu.n ne
anaadil baaG ke Gaafil na baiThe.n aashiyaano.n me.n
sun ai Gaafil sadaa merii ye aisii chiiz hai jis ko
vaziifa jaan kar pa.Dhte hai.n taa.ir bostaano.n me.n
vatan kii fikr kar naadaa.n musiibat aane vaalii hai
tirii barbaadiyo.n ke mashvare hai.n aasmaano.n me.n
zaraa dekh us ko jo kuchh ho rahaa hai hone vaalaa hai
dharaa kyaa hai bhalaa ahd-e-kuhan kii daastaano.n me.n
ye KHaamoshii kahaa.n tak lazzat-e-fariyaad paidaa kar
zamii.n par tuu ho aur terii sadaa ho aasmaano.n me.n
na samjhoge to miT jaa.oge ai hindostaa.n vaalo
tumhaarii daastaa.n tak bhii na hogii daastaano.n me.n
yahii aa.iin-e-qudrat hai yahii usluub-e-fitrat hai
jo hai raah-e-amal me.n gaam-zan mahbuub-e-fitrat hai
huvaidaa aaj apne zaKHm-e-pinhaa.n kar ke chho.Duu.ngaa
lahuu ro ro ke mahfil ko gulistaa.n kar ke chho.Duu.ngaa
jalaanaa hai mujhe har sham-e-dil ko soz-e-pinhaa.n se
tirii taariik raato.n me.n charaaGaa.n kar ke chho.Duu.ngaa
magar Guncho.n kii suurat huu.n dil-e-dard-aashnaa paidaa
chaman me.n musht-e-KHaak apnii pareshaa.n kar ke chho.Duu.ngaa
pironaa ek hii tasbiih me.n in bikhre daano.n ko
jo mushkil hai to is mushkil ko aasaa.n kar ke chho.Duu.ngaa
mujhe ai ham-nashii.n rahne de shaGl-e-siina-kaavii me.n
ki mai.n daaG-e-mohabbat ko numaayaa.n kar ke chho.Duu.ngaa
dikhaa duu.ngaa jahaa.n ko jo mirii aa.nkho.n ne dekhaa hai
tujhe bhii suurat-e-aa.iina hairaa.n kar ke chho.Duu.ngaa
jo hai pardo.n me.n pinhaa.n chashm-e-biinaa dekh letii hai
zamaane kii tabii.at kaa taqaazaa dekh letii hai
kiyaa rif.at kii lazzat se na dil ko aashnaa tuu ne
gizaarii umr pastii me.n misaal-e-naqsh-e-paa tuu ne
rahaa dil-basta-e-mahfil magar apnii nigaaho.n ko
kiyaa bairuun-e-mahfil se na hairat-aashnaa tuu ne
fidaa kartaa rahaa dil ko hasiino.n kii adaa.o.n par
magar dekhii na us aa.iine me.n apnii adaa tuu ne
ta.assub chho.D naadaa.n dahr ke aa.iina-KHaane me.n
ye tasviire.n hai.n terii jin ko samjhaa hai buraa tuu ne
saraapaa naala-e-bedaad-e-soz-e-zindagii ho jaa
sapand-aasaa girah me.n baa.ndh rakkhii hai sadaa tuu ne
safaa-e-dil ko kyaa aaraa.ish-e-ra.ng-e-ta.alluq se
kaf-e-aa.iina par baa.ndhii hai o naadaa.n hinaa tuu ne
zamii.n kyaa aasmaa.n bhii terii kaj-biinii pe rotaa hai
Gazab hai satr-e-qur.aa.n ko chaliipaa kar diyaa tuu ne
zabaa.n se gar kiyaa tauhiid kaa daavaa to kyaa haasil
banaayaa hai but-e-pindaar ko apnaa KHudaa tuu ne
ku.e.n me.n tuu ne yuusuf ko jo dekhaa bhii to kyaa dekhaa
are Gaafil jo mutlaq thaa muqayyad kar diyaa tuu ne
havas baalaa-e-mimbar hai tujhe ra.ngii.n-bayaanii kii
nasiihat bhii tirii suurat hai ik afsaana-KHvaanii kii
dikhaa vo husn-e-aalam-soz apnii chashm-e-pur-nam ko
jo ta.Dpaataa hai parvaane ko rulvaataa hai shabnam ko
zaraa nazzaara hii ai bul-havas maqsad nahii.n us kaa
banaayaa hai kisii ne kuchh samajh kar chashm-e-aadam ko
agar dekhaa bhii us ne saare aalam ko to kyaa dekhaa
nazar aa.ii na kuchh apnii haqiiqat jaam se jam ko
shajar hai firqa-aaraa.ii ta.assub hai samar us kaa
ye vo phal hai ki jannat se nikalvaataa hai aadam ko
na uTThaa jazba-e-KHurshiid se ik barg-e-gul tak bhii
ye rif.at kii tamannaa hai ki le u.Dtii hai shabnam ko
phiraa karte nahii.n majruuh-e-ulfat fikr-e-darmaa.n me.n
ye zaKHmii aap kar lete hai.n paidaa apne marham ko
mohabbat ke sharar se dil saraapaa nuur hotaa hai
zaraa se biij se paidaa riyaaz-e-tuur hotaa hai
davaa har dukh kii hai majruuh-e-teG-e-aarzuu rahnaa
ilaaj-e-zaKHm hai aazaad-e-ehsaan-e-rafuu rahnaa
sharaab-e-be-KHudii se taa-falak parvaaz hai merii
shikast-e-ra.ng se siikhaa hai mai.n ne ban ke buu rahnaa
thame kyaa diida-e-giryaa.n vatan kii nauha-KHvaanii me.n
ibaadat chashm-e-shaa.ir kii hai har dam baa-vazuu rahnaa
banaa.e.n kyaa samajh kar shaaKH-e-gul par aashiyaa.n apnaa
chaman me.n aah kyaa rahnaa jo ho be-aabruu rahnaa
jo tuu samjhe to aazaadii hai poshiida mohabbat me.n
Gulaamii hai asiir-e-imtiyaaz-e-maa-o-tuu rahnaa
ye istiGnaa hai paanii me.n niguu.n rakhtaa hai saaGar ko
tujhe bhii chaahiye misl-e-habaab-e-aabjuu rahnaa
na rah apno.n se be-parvaa isii me.n KHair hai terii
agar manzuur hai duniyaa me.n o begaana-KHuu rahnaa
sharaab-e-ruuh-parvar hai mohabbat nau-e-insaa.n kii
sikhaayaa is ne mujh ko mast be-jaam-o-subuu rahnaa
mohabbat hii se paa.ii hai shifaa biimaar qaumo.n ne
kiyaa hai apne baKHt-e-KHufta ko bedaar qaumo.n ne
bayaabaan-e-mohabbat dasht-e-Gurbat bhii vatan bhii hai
ye viiraana qafas bhii aashiyaana bhii chaman bhii hai
mohabbat hii vo manzil hai ki manzil bhii hai sahraa bhii
jaras bhii kaarvaa.n bhii raahbar bhii raahzan bhii hai
maraz kahte hai.n sab is ko ye hai lekin maraz aisaa
chhupaa jis me.n ilaaj-e-gardish-e-charKH-e-kuhan bhii hai
jalaanaa dil kaa hai goyaa saraapaa nuur ho jaanaa
ye parvaana jo sozaa.n ho to sham-e-anjuman bhii hai
vahii ik husn hai lekin nazar aataa hai har shai me.n
ye shiirii.n bhii hai goyaa be-sutuu.n bhii kohkan bhii hai
ujaa.Daa hai tamiiz-e-millat-o-aa.ii.n ne qaumo.n ko
mire ahl-e-vatan ke dil me.n kuchh fikr-e-vatan bhii hai
sukuut-aamoz tuul-e-daastaan-e-dard hai varna
zabaa.n bhii hai hamaare mu.nh me.n aur taab-e-suKHan bhii hai
namii-gardiid ko tah rishta-e-ma.anii rihaa kardam
hikaayat buud be-paayaa.n ba-KHaamoshii adaa kardam

Allama Iqbal
Nazm

parchhaiyan

1
ye shaam ik aa.iina-e-niil-guu.n ye nam ye mahak
ye manzaro.n kii jhalak khet baaG dariyaa gaa.nv
vo kuchh sulagte hu.e kuchh sulagne vaale alaav
siyaahiyo.n kaa dabe-paa.nv aasmaa.n se nuzuul
laTo.n ko khol de jis tarah shaam kii devii
puraane vaqt ke bargad kii ye udaas jaTaa.e.n
qariib o duur ye go dhuul kii ubhartii ghaTaa.e.n
ye kaa.enaat kaa Thahraa.o ye athaah sukuut
ye niim-tiirah fazaa roz-e-garm kaa taabuut
dhu.aa.n dhu.aa.n sii zamii.n hai ghulaa ghulaa saa falak
2
ye chaa.ndnii ye havaa.e.n ye shaaKH-e-gul kii lachak
ye daur-e-baada ye saaz-e-KHamosh fitrat ke
sunaa.ii dene lagii jagmagaate siino.n me.n
dilo.n ke naazuk o shaffaaf aabgiino.n me.n
tire KHayaal kii pa.Dtii hu.ii kiran kii khanak
3
ye raat chhantii havaa.o.n kii so.ndhii so.ndhii mahak
ye khet kartii hu.ii chaa.ndnii kii narm damak
sugandh raat kii raanii kii jab machaltii hai
fazaa me.n ruuh-e-tarab karvaTe.n badaltii hai
ye ruup sar se qadam tak hasiin jaise gunaah
ye aarizo.n kii damak ye fusuun-e-chashm-e-siyaah
ye dhaj na de jo ajantaa kii san.ato.n ko panaah
ye siina pa.D hii ga.ii dev lok kii bhii nigaah
ye sar-zamiin se aakaash kii parastish-gaah
utaarte hai.n tirii aartii sitaara o maah
sajal badan kii bayaa.n kis tarah ho kaifiyyat
sarasvatii ke bajaate hu.e sitaar kii gat
jamaal-e-yaar tire gulsitaa.n kii rah rah ke
jabiin-e-naaz tirii kahkashaa.n kii rah rah ke
dilo.n me.n aa.iina-dar-aa.iina suhaanii jhalak
4
ye chhab ye ruup ye joban ye saj ye dhaj ye lahak
chamakte taaro.n kii kirno.n kii narm narm phuvaar
ye rasmasaate badan kaa uThaan aur ye ubhaar
fazaa ke aa.iina me.n jaise lahlahaa.e bahaar
ye be-qaraar ye be-iKHtiyaar josh-e-numuud
ki jaise nuur kaa favvaara ho shafaq-aaluud
ye jalve paikar-e-shab-taab ke ye bazm-e-shohuud
ye mastiyaa.n ki mai-e-saaf-o-durd sab be-buud
KHajil ho laal-e-yaman uzv uzv kii vo Dalak
5
bas ik sitaara-e-shi.ngaraf kii jabii.n pe jhamak
vo chaal jis se labaalab gulaabiyaa.n chhalke.n
sakuu.n-numaa KHam-e-abru ye adh-khulii.n palke.n
har ik nigaah se aiman kii bijliyaa.n lapke.n
ye aa.nkh jis me.n ka.ii aasmaa.n dikhaa.ii pa.De.n
u.Daa de.n hosh vo kaano.n kii saada saada lave.n
ghaTaa.e.n vajd me.n aa.e.n ye gesu.o.n kii laTak
6
ye kaif-o-ra.ng-e-nazaara ye bijliyo.n kii lapak
ki jaise krishn se raadhaa kii aa.nkh ishaare kare
vo shoKH ishaare ki rabbaaniyat bhii jaa.e jhapak
jamaal sar se qadam tak tamaam sho.ala hai
sukuun jumbish o ram tak tamaam sho.ala hai
magar vo sho.ala ki aa.nkho.n me.n Daal de ThanDak
7
ye raat nii.nd me.n Duube hu.e se hai.n diipak
fazaa me.n bujh ga.e u.D u.D ke jugnu.o.n ke sharaar
kuchh aur taaro.n kii aa.nkho.n kaa ba.Dh chalaa hai KHumaar
fasurda chhiTkii hu.ii chaa.ndnii kaa dhundlaa Gubaar
ye bhiigii bhiigii uudaahaT ye bhiigaa bhiigaa nuur
ki jaise chashma-e-zulmaat me.n jale kaafuur
ye Dhaltii raat sitaaro.n ke qalb kaa ye gudaaz
KHunuk fazaa me.n tiraa shabnamii tabassum-e-naaz
jhalak jamaal kii ta.abiir KHvaab aa.iina-saaz
jahaa.n se jism ko dekhe.n tamaam naaz-o-niyaaz
jahaa.n nigaah Thahar jaa.e raaz-andar-raaz
sukuut-e-niim-shabii lahlahe badan kaa nikhaar
ki jaise nii.nd kii vaadii me.n jaagtaa sansaar
hai bazm-e-maah ki parchhaa.iyo.n kii bastii hai
fazaa kii oT se vo KHaamushii barastii hai
ki buu.nd buu.nd se paidaa ho gosh o dil me.n khanak
8
kisii KHayaal me.n hai Garq chaa.ndnii kii chamak
havaa.e.n nii.nd ke kheto.n se jaise aatii ho.n
hayaat o maut me.n sargoshiyaa.n sii hotii hai.n
karo.Do.n saal ke jaage sitaare nam-diida
siyaah gesu.o.n ke saa.np niim-KHvaabiida
ye pichhlii raat ye rag rag me.n narm narm kasak

Firaq Gorakhpuri
Nazm

chala aa raha hun samundaron ke visal se

ye barahnagii jise dekh kar ba.Dhe.n dast o paa na khule zabaa.n
na KHayaal hii me.n rahe tavaa.n
to vo reg-zaar ki jaise rah-zan-e-piir ho
jise tab-e-raah-zanii na ho
ki misaal-e-taa.er-e-niim-jaa.n
jise yaad-e-baal-o-parii na ho
kisii raah-rau se umiid-e-rahm-o-karam liye
mai.n bharaa hu.aa huu.n samundaro.n ke jalaal se
chalaa aa rahaa huu.n mai.n saahilo.n kaa hasham liye
hai abhii inhii kii taraf miraa dar-e-dil khulaa
ki nasiim-e-KHandaa ko rah mile
mirii tiirgii ko nigah mile
vo suruur-o-soz-e-sadaf abhii mujhe yaad hai
abhii chaaTtii hai samundaro.n kii zabaa.n mujhe
mire paa.nv chhuu ke nikal ga.ii ko.ii mauj-e-saaz ba-kaf abhii
vo halaavate.n mire hast o buud me.n bhar ga.ii.n
vo jaziire jin ke ufuq hujuum-e-sahar se diid-bahaar the
vo parinde apnii talab me.n jo sar-e-kaar the
vo parinde jin kii safiir me.n thii.n risaalate.n
abhii us safiir kii jalvate.n mire KHuu.n me.n hai.n
abhii zehn hai vo sanam liye
jo samundaro.n ke fusuu.n me.n hai.n
chalaa aa rahaa huu.n samundaro.n ke jamaal se
sadaf o kanaar kaa Gam liye

Noon Meem Rashid
Nazm

israfil ki maut

marg-e-israafiil par aa.nsuu bahaa.o
vo KHudaa.o.n kaa muqarrab vo KHudaavand-e-kalaam
saut-e-insaanii kii ruuh-e-jaavedaa.n
aasmaano.n kii nidaa-e-be-karaa.n
aaj saakit misl-e-harf-e-naa-tamaam
marg-e-israafiil par aa.nsuu bahaa.o
aa.o israafiil ke is KHvaab-e-be-ha.ngaam par aa.nsuu bahaa.e.n
aaramiida hai vo yuu.n qarnaa ke paas
jaise tuufaa.n ne kinaare par ugal Daalaa use
reg-e-saahil par chamaktii dhuup me.n chup chaap
apne suur ke pahluu me.n vo KHvaabiida hai
us kii dastaar us ke gesuu us kii riish
kaise KHaak-aaluuda hai.n
the kabhii jin kii tahe.n buud-o-nabuud
kaise is kaa suur is ke lab se duur
apnii chiiKHo.n apnii fariyaado.n me.n gum
jhilmilaa uThte the jis se dair-o-zuud
marg-e-israafiil par aa.nsuu bahaa.o
vo mujassam hamhama thaa vo mujassam zamzama
vo azal se taa abad phailii hu.ii Gaibii sadaa.o.n kaa nishaa.n
marg-e-israafiil se
halqa dar halqa farishte nauha gar
ibn-e-aadam zulf-dar-KHaak-o-nazaar
hazrat-e-yazdaa.n kii aa.nkhe.n Gam se taar
aasmaano.n kii safiir aatii nahii.n
aalam-e-laahuut se ko.ii nafiir aatii nahii.n
marg-e-israafiil se
is jahaa.n par band aavaazo.n kaa rizq
mutribo.n kaa rizq aur saazo.n kaa rizq
ab muGannii kis tarah gaa.egaa aur gaa.egaa kyaa
sun.ne vaalo.n ke dilo.n ke taar chup
ab ko.ii raqqaas kyaa thirkegaa lahraa.egaa kyaa
bazm ke farsh-o-dar-o-diivaar chup
ab KHatiib-e-shahr farmaa.egaa kyaa
masjido.n ke aastaan-o-gumbad-o-miinaar chup
fikr kaa sayyaad apnaa daam phailaa.egaa kyaa
taa.iraan-e-manzil-o-kohsaar chup
marg-e-israafiil hai
gosh-e-shanvaa kii lab-e-goyaa kii maut
chashm-e-biinaa kii dil-e-daanaa kii maut
thii isii ke dam se durvesho.n kii saarii haav-huu
ahl-e-dil kii ahl-e-dil se guftuguu
ahl-e-dil jo aaj gosha-giir-o-surma-dar-guluu
ab tanaa taa-huu bhii Gaa.eb aur yaa-rab haa bhii gum
ab galii kuucho.n kii har aavaa bhii gum
ye hamaaraa aaKHirii maljaa bhii gum
marg-e-israafiil se
is jahaa.n kaa vaqt jaise so gayaa pathraa gayaa
jaise ko.ii saarii aavaazo.n ko yaksar khaa gayaa
aisii tanhaa.ii ki husn-e-taam yaad aataa nahii.n
aisaa sannaaTaa ki apnaa naam yaad aataa nahii.n
marg-e-israafiil se
dekhte rah jaa.e.nge duniyaa ke aamir bhii
zabaa.n-bandii ke KHvaab
jis me.n majbuuro.n kii sargoshii to ho
us KHudaavandii ke KHvaab

Noon Meem Rashid
Nazm

surud-e-shabana

niim-shab chaa.nd KHud-faraamoshii
mahfil-e-hast-o-buud viiraa.n hai
paikar-e-iltijaa hai KHaamoshii
bazm-e-anjum fasurda-saamaa.n hai
aabshaar-e-sukuut jaarii hai
chaar-suu be-KHudii sii taarii hai
zindagii juzv-e-KHavaab hai goyaa
saarii duniyaa saraab hai goyaa
so rahii hai ghane daraKHto.n par!
chaa.ndnii kii thakii hu.ii aavaaz
kahkashaa.n niim-vaa nigaaho.n se
kah rahii hai hadiis-e-shauq-e-niyaaz
saaz-e-dil ke KHamosh taaro.n se
chhan rahaa hai KHumaar-e-kaif-aagii.n
aarzuu KHvaab teraa ruu-e-hasii.n

Faiz Ahmad Faiz
Nazm

aaftab

ai aaftaab ruuh-o-ravaan-e-jahaa.n hai tuu
shiiraaza-band daftar-e-kaun-o-makaa.n hai tuu
baa.is hai tuu vajuud-o-adam kii numuud kaa
hai sabz tere dam se chaman hast-o-buud kaa
qaa.em ye unsuro.n kaa tamaashaa tujhii se hai
har shai me.n zindagii kaa taqaazaa tujhii se hai
har shai ko terii jalva-garii se sabaat hai
teraa ye soz-o-saaz saraapaa hayaat hai
vo aaftaab jis se zamaane me.n nuur hai
dil hai KHirad hai ruuh-e-ravaa.n hai shu.uur hai
a aaftaab ham ko ziyaa-e-shu.uur de
chashm-e-KHirad ko apnii tajallii se nuur de
hai mahfil-e-vajuud kaa saamaa.n-taraaz to
yazdaan-e-saakinaan-e-nasheb-o-faraaz tuu
teraa kamaal-e-hastii har jaan-daar me.n
terii numuud silsila-e-kohsaar me.n
har chiiz kii hayaat kaa parvardigaar tuu
zaa.iidgaan-e-nuur kaa hai taajdaar tuu
nai ibtidaa ko.ii na ko.ii intihaa tirii
aazaad qaid-e-avval-o-aaKHir ziyaa tirii

Allama Iqbal
Nazm

raqqasa-e-hayat se

phuulo.n pe raqs aur na bahaaro.n pe raqs kar
gulzaar-e-hast-e-buud me.n KHaaro.n pe raqs kar
ho kar jumuud-e-gulshan-e-jannat se be-niyaaz
dozaKH ke be-panaah sharaaro.n pe raqs kar
sham-e-sahar fusuun-e-tabassum, hayaat-e-gul
fitrat ke in ajiib nazaaro.n pe raqs kar
tanziim-e-kaa.enaat-e-junuu.n kii ha.nsii u.Daa
uj.De hu.e chaman kii bahaaro.n pe raqs kar
sahmii hu.ii sadaa-e-dil-e-naa-tavaa.n na sun
bahkii hu.ii nazar ke ishaaro.n par raqs kar
jo mar ke jii rahe the tujhe un se kyaa Garaz
tuu apne aashiqo.n ke mazaaro.n pe raqs kar
har har adaa ho ruuh kii gahraa.iyo.n me.n gum
yuu.n ra.ng-o-buu kii raah-guzaaro.n pe raqs kar
tuu apnii dhun me.n mast hai tujh ko bataa.e kaun
terii zamii.n falak hai sitaaro.n par raqs kar
is tarah raqs kar ki saraapaa asar ho tuu
ko.ii nazar uThaa.e to pesh-e-nazar ho tuu

Shakeel Badayuni
Nazm

tarah-e-nau

sehn-e-jahaa.n me.n raqs-kunaa.n hai.n tabaahiyaa.n
aaqaa-e-hast-o-buud kii san.at-garii kii KHair

Sahir Ludhianvi
Nazm

bulbul

chaman me.n laa.ii hai phuulo.n kii aarzuu tujh ko
milaa kahaa.n se ye ehsaas-e-ra.ng-o-buu tujh ko
tirii tarah ko.ii sar-gashta-e-jamaal nahii.n
gulo.n me.n mahv hai kaa.nTo.n kaa kuchh KHayaal nahii.n
KHizaa.n kaa KHauf na hai baaGbaa.n kaa Dar tujh ko
ma.aal-e-kaar kaa bhii kuchh KHatar nahii.n tujh ko
KHush-e'tiqaad o KHush-aaha.ng KHush-navaa bulbul
jigar ke daaG ko pur-nuur kar diyaa kis ne
tujhe is aag se ma.amuur kar diyaa kis ne
ye dil ye dard ye saudaa kahaa.n se laa.ii hai
kahaa.n kii tuu ne ye tarz-e-fuGaa.n u.Daa.ii hai

Majnoon Gorakhpuri
Nazm

padmani

andaliibo.n ko milii aah-o-bukaa kii taaliim
aur parvaano.n ko dii soz-e-vafaa kii taaliim
jab har ik chiiz ko qudrat ne ataa kii taaliim
aa.ii hisse me.n tire zauq-e-fanaa kii taaliim
narm o naazuk tujhe aazaa diye jalne ke liye
dil diyaa aag ke sholo.n pe pighalne ke liye
ra.ng tasviir ke parde me.n jo chamkaa teraa
KHud-ba-KHud luuT gayaa jalva-e-raanaa teraa
Dhaal kar kaal-bud-nuur me.n putlaa teraa
yad-e-qudrat ne banaayaa jo saraapaa teraa
bhar diyaa kuuT ke soz-e-Gam-e-shauhar dil me.n
rakh diyaa chiir ke ik shola-e-muztar dil me.n
tuu vo thii sham.a ki parvaana banaayaa tujh ko
tuu vo lailaa thii ki diivaana banaayaa tujh ko
raunaq-e-KHavlat-e-shaahaana banaayaa tujh ko
naazish-e-himaat-e-mardaana banaayaa tujh ko
naaz aayaa tire hisse me.n adaa bhii aa.ii
jaa.n-faroshii bhii, mohabbat bhii, vafaa bhii, aa.ii
aa.ii duniyaa me.n jo tuu husn me.n yaktaa ban kar
chaman-e-dahr me.n phuulii gul-e-raanaa ban kar
rahii maa.n baap kii aa.nkho.n kaa jo taaraa ban kar
dil-e-shauhar me.n rahii KHaal-e-suvaidaa ban kar
Husn-e-KHidmat se shagufta dil-e-shauhar rakkhaa
ki qadam jaada-e-taa.at se na baahar rakkhaa
terii fitrat me.n muravvat bhii thii Gam-KHvaarii bhii
terii suurat me.n adaa bhii tarah-daarii bhii
jalva-e-husn me.n shaamil thii niko-kaarii bhii
dard aayaa tire hisse me.n, to KHuddaarii bhii
aag par bhii na tujhe aah machalte dekhaa
tapish-e-husn ko pahluu na badalte dekhaa
tuu vo ismat kii thii o aa.iina-siimaa tasviir
husn-e-siirat se thii terii mutajalaa tasviir
laakh tasviiro.n se thii ik tirii zebaa tasviir
tujh ko qudrat ne banaayaa thaa saraapaa tasviir
nuur hii nuur tire jalva-e-mastuur me.n thaa
anjum-e-naaz kaa jhurmuT ruKH-e-pur-nuur me.n thaa
lab me.n ejaaz hayaa chashm-e-fusuu.n-saaz me.n thii
ki qayaamat kii adaa tere har andaaz me.n thii
shakl phirtii jo tirii diida-e-Gammaaz me.n thii
barq-e-betaab tirii jalva-gaah-e-naaz me.n thii
ye vo bijlii thii qayaamat kii ta.Dap thii jis me.n
shola-e-naar-e-uquubat kii ta.Dap thii jis me.n
ye vo bijlii thii jo teG-e-sharar-afshaa.n ho kar
kau.nd uThii qila-e-chittau.D me.n jaulaa.n ho kar
ye vo bijlii thii jo soz-e-Gam-e-hirmaa.n ho kar
KHaak sii loT ga.ii terii pashiimaa.n ho kar
ye vo bijlii thii tujhe jis ke asar ne phuu.nkaa
rafta rafta tapish-e-soz-e-jigar ne phuu.nkaa
aah o ishva o andaaz o adaa kii devii
aah o hind ke naamuus-e-vafaa kii devii
aah o partav-e-anvaar-e-safaa kii devii
o ziyaarat-kada-e-sharm-o-hayaa kii devii
terii taqdiis kaa qaa.el hai zamaana ab tak
terii iffat kaa zabaa.n par hai fasaana ab tak
aafrii.n hai tirii jaa.n-baazii o himmat ke liye
aafrii.n hai tirii iffat tirii ismat ke liye
kyaa miTaa.egaa zamaana tirii shohrat ke liye
ki chalii aatii hai ik KHalq ziyaarat ke liye
naqsh ab tak tirii azmat kaa hai baiThaa dil me.n
tuu vo devii hai, tiraa lagtaa hai mela dil me.n

Suroor Jahanabadi
Nazm

urdu-e-mualla

faarsii hindii kii aamezish se hai is kaa vajuud
yaadgaar-e-ittihaad-e-ahl-e-islaam-o-hanuud
dhuup chhaa.n ke rang kii hai vo qabaa-e-hast-o-buud
kaar-gaah-e-hind se mansuub jis ke taar-o-puud
suft-o-sa.ngii.n yaa libaas-e-aariyat baariik hai
jaama-zebii se qad-e-mauzuu.n par is ke Thiik hai

Safi Lakhnavi
Nazm

waqt-e-murawwat

hasiin KHvaab se chau.nke the rasmasaa.e hu.e
machal rahii thii havaa.o.n me.n buu-e-ambar-o-buud

Josh Malihabadi
Nazm

bichhDe ghar ka saya

sub.h-savere
vo bistar se saa.e jaisii uThtii hai
phir chuulhe me.n raat kii ThanDii aag ko
raushan kartii hai
itne me.n din cha.Dh jaataa hai
jaldii jaldii chaa.e banaa kar shauhar ko ruKHsat kartii hai
sayyaare gardish karte hai.n
shahr me.n sahraa sahraa.o.n me.n chaTyal maidaa.n
kohsaaro.n ke nasheb-o-faraaz banaa karte hai.n
saare ghar ko dhotii hai
kap.De tauliye tooth-brush bistar kii chaadar
ko.ii kitaab uThaatii hai rakh detii hai
radio on kiyaa phir rokaa on kiyaa
phir ko.ii puraanaa KHat pa.Dhtii hai
(ghanTii bajii)
''maryam! aa jaa.o''
''tum kaisii ho? vo kaise hai.n''
''kyaa us kaa ko.ii KHat aayaa?''
(tho.Dii KHaamoshii kaa vaqfa)
''tum kaisii ho''
''tum se matlab? sach kah duu.n to kyaa kar logii''
dekho sab kii sab baiThii ho.n
''achchhaa''
''achchhaa''
(darvaaza phir band ho gayaa)
''ab kyaa karnaa!
ghar to bilkul saaf pa.Daa hai
ko.ii shikan bistar pe nahii.n hai
diivaar-o-dar dhule-dhulaa.e
ko.ii dhabba yaa mak.Dii kaa jaalaa tinkaa
kahii.n kuchh nahii.n
kyaa karnaa hai!
uf! vo calendar
kitne baras ho ga.e phir bhii
aa.e.n to un se kahtii huu.n
bilkul nayaa calendar laa.e.n
kuchh bhuuk nahii.n
ab kyaa karnaa hai
leT rahuu.n? lekin kyaa leTuu.n
jaane kitnaa leT chukii huu.n
kha.Dii rahuu.n
haa.n kha.Dii rahuu.n
par mai.n to kab se kha.Dii hu.ii huu.n
khi.Dkii kaa parda hii kholuu.n
dhuup kahaa.n tak aa pahu.nchii hai
laa.o apnaa album dekhuu.n
nayyar shabnam shafaq subuuhii aKHtar juuhii
kaise ho.nge
aa.n! ye mai.n huu.n
ittii pyaarii pyaarii thii mai.n
mai.n bilkul hii bhuul ga.ii thii
sab kitnaa achchhaa lagtaa thaa
abbaa, ammaa.n, bhayyaa, appii
sab zinda the
saaya naanii gulshan aapaa
haa.n aur vo gaurayyaa baabaa
aa.nsuu naGme shor Thahaake saare ik sur me.n hote the
saarii duniyaa ghar lagtii thii
amaa.n udhar bulaayaa kartii.n
abbaa udhar pukaaraa karte
bhayyaa Daa.nTte
appii Dhero.n pyaar jataatii.n
khaanaa, piinaa, sonaa, jaagnaa, ha.nsnaa, ruuThnaa, man.naa
Dor ba.ndhii thii
ek me.n ek piroyaa hu.aa thaa
kal nammuu ke ghar shaadii hai
paas hii ko.ii maut hu.ii hai
college kii chhaTii kab hogii
iid phir ab kii tiis kii hogii
ham bhii lail-e-qadr jaage.nge
shahlaa kii ma.ngnii kyuu.n TuuTii?
kyaa iqbaal ko.ii shaa.er thaa?
chup ba.Dke abbaa sun le.nge
saa.e dau.D rahe hai.n ghar me.n
har goshe me.n uupar niiche andar baahar dau.D rahe hai.n
lambe chhoTe sabz o zard hazaaro.n saa.e
baahar shahr me.n ko.ii nahii.n hai
dhuup siyah pa.Dtii jaatii hai
qadd-e-aadam aa.iine me.n
us kaa na.ngaa jism kha.Daa hai
jism ke andar suuraj kaa Guncha mahkaa hai
sayyaare gardish karte hai.n
sab anjaane sayyaaro.n me.n bhuule-bisre ghar raushan hai.n
kis lamhe kaa hai ye tamaasha
hast-o-buud ke sannaaTe me.n
laa-maujuud kii taariikii me.n
sirf yahii aa.iina raushan
sirf ik aks-e-guzishta raushan
bichh.De ghar kaa saaya raushan

Farhat Ehsas
Nazm

wo ishq jo hum ko lahiq tha

bahr-e-maujuud ke markaz se
ik mauj-e-talaatum-KHez uTThii
ik dard kii lahar uThii dil ke rauzan se
jis me.n simaT ga.e
dono.n aalam ke ranj o tarab
aur hast-o-buud ke mahvar par
ranj o raahat ham-raqs hu.e

Sajida Zaidi
Nazm

ek sitara aadarsh ka

rustgaar az-panja-e-bedardii-e-lail-o-nahaar
band aa.nkho.n ke nagar me.n
kaif-e-aalamgiir kaa armaa.n milaa
jis se vaavailaa nashebo.n kaa na Takraayaa kabhii
vo auj-e-baam
sarsarii us se guzar jaane me.n pinhaa.n aafiyat
ai rah-navard
ai nazar-var ai dil-aasaa
rauzan-e-zulmaat hast-o-buud
ai paik-e-jahaa.n-paimaa KHizar

Shafiq Fatima Shera
Nazm

ek shahr tha ek bagh tha

ik shahr thaa ik baaG thaa
ik shahr thaa
yaa taaza mevo.n se ladaa ik baaG thaa
ik baaG thaa
yaa shoKH ra.ngo.n se bharaa baazaar thaa
baazaar thaa yaa jugnu.o.n kii raushnii se kheltii ik raat thii
ik raat thii
yaa gungunaatii jhuumtii
naGmaat kii baarish me.n bhiigii
vasl kii sauGaat thii
ik shahr thaa ik baaG thaa ik raat thii
aur un ke daaman me.n
bahaar-e-vasl kii sauGaat thii
ik roz ra.ng-o-nuur ke mausam ko
baad-e-shart u.Daa kar le ga.ii
ik mauj-e-KHuu.n kahiye use
us shahr ke us baaG ke
naam-o-nishaa.n saare bahaa kar le ga.ii
ai nauhagar
ai raaqim-e-afsaana-e-zer-o-zabar
ai chashm-e-hairat chashm-e-tar
ibrat kii jaa hai kis qadar
ab yaad kaa hai ek afsurda nagar
is shahr me.n
kuchh der ko Thahre.n zaraa
nauha kare.n
qissa likhe.n
taariiKH ke auraaq me.n
ik baab khole.n yaad kaa
taqdiir-e-hast-o-buud kaa
maGmuum afsaana likhe.n

Ain Tabish
Nazm

shab-o-roz tamasha

zehn jab tak hai
KHayaalaat kii zanjiir kahaa.n kaTtii hai
ho.nT jab tak hai.n
savaalaat kii zanjiir kahaa.n kaTtii hai
bahs karte raho likhte raho nazme.n Gazle.n
zehn par sadiyo.n se taarii hai jo majlis kii fazaa
is KHunuk aa.nch se kyaa pighlegii
soch lene hii se haalaat kii zanjiir kahaa.n kaTtii hai
nii.nd me.n Duubii hu.ii aa.nkho.n se vaabasta KHvaab
tez kirno.n kii sinaano.n pe hii rusvaa sar-e-aam
ye shahiid apnii saliibo.n se palaT aate hai.n dil me.n har shaam
sub.h hotii hai magar raat kii zanjiir kahaa.n kaTtii hai
din guzar jaataa hai be-faiz kad-o-kaavish me.n
ek an-dekhe jahannam kii tab-o-taabish me.n
jism aur jaa.n kii tag-o-taaz kii har pursish me.n
dard-o-Gam hasrat-o-mahruumii kii har kaahish me.n
talab-o-tark-e-talab silsila-e-be-paayaa.n
marg hii ziist kaa unvaan hai har KHuun-shuda KHvaahish me.n
Gam se bhaage.n bhii to faryaad-o-shikaayaat kii zanjiir kahaa.n kaTtii hai
vaqt vo daulat-e-naayaab hai aataa nahii.n haath
ham mashiino.n kii tarah jiite hai.n paabandi-e-auqaat ke saath
vaqt be-kaar guzartaa hii chalaa jaataa hai
kursiyo.n mezo.n se be-ma.anii mulaaqaato.n me.n
sai.nka.Do.n baar kii aglii hu.ii dohraa.ii hu.ii baato.n me.n
mandgii rahne kii tamannaa kii mudaaraato.n me.n
shikam-o-jaa.n kii ibaadaat kii zanjiir kahaa.n kaTtii hai
sub.h se shaam talak itne KHudaa milte hai.n har kaafir ko
sajda-e-shukr se inkaar kii mohlat nahii.n milne paatii
sai.nka.Do.n laakho.n KHudaa.o.n kii nazar se chhup kar
KHud se mil lene kii ruKHsat nahii.n milne paatii
KHud-parasto.n se bhii taa.aat kii zanjiir kahaa.n kaTtii hai
raat aatii hai to dil kahtaa hai ham apne hai.n
KHalvat-e-KHvaab me.n duniyaa se kinaaraa kar le.n
kal bhii denaa hai lahuu apnaa dil-o-diida kii jholii bhar le.n
jism ke shor se aur ruuh kii fariyaad se dam ghuTtaa hai
din ke be-kaar KHayaalaat kii zanjiir kahaa.n kaTtii hai
be-niyaazaana bhii jiinaa hai faqat ek gumaa.n
fikr-e-maujuud ko chho.De.n to Gam-e-naa-maujuud
saath har saa.ns ke hai silsila-e-hast-o-buud
Gam-e-aafaaq ko Thukraa.e.n kare.n tark-e-jahaa.n
phir bhii ye fikr ki jiine kaa ho ko.ii unvaa.n
be-niyaazii se Gam-e-zaat kii zanjiir kahaa.n kaTtii hai
zehn me.n andhe aqiido.n kii siyaahii bhar lo
taaki is nagrii me.n
kabhii afkaar ke sho.alo.n kaa guzar ho na sake
jabr kaa hukm suno
ho.nTo.n ko apne sii lo
taaki un raaho.n se
kabhii lafzo.n kaa safar ho na sake
zehn-o-lab phir bhii nahii.n chup hote
un ke KHaamosh savaalaat kii
pech-dar-pech KHayaalaat kii
zanjiir kahaa.n kaTtii hai

Waheed Akhtar
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now