Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ",eFg2"

Nazm MATCHES FOR ",efg2"

Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

mere pyare watan

mere vatan, pyaare vatan
raahat ke gahvaare vatan
har dil ke ujyaare vatan
har aa.nkh ke taare vatan
gul-posh terii vaadiyaa.n
farhat-nishaa.n raahat-rasaa.n
tere chaman-zaaro.n pe hai
gulzaar-e-jannat kaa gumaa.n
har shaaKH phuulo.n kii chha.Dii
har naKHl-e-tuubaa hai yahaa.n
kausar ke chashme jaa-ba-jaa
tasniim har aab-e-ravaa.n
har barg ruuh-e-taazgii
har phuul jaan-e-gulsitaa.n
har baaG baaG-e-dil-kashii
har baaG baaG-e-be-KHizaa.n
dilkash charaagaahe.n tirii
Dhoro.n ke jin me.n kaarvaa.n
anjum-sifat gulhaa-e-nau
har taKHta-e-gul aasmaa.n
naqsh-e-surayyaa jaa-ba-jaa
har har ravish ik kahkashaa.n
terii bahaare.n daa.imii
terii bahaare.n jaavedaa.n
tujh me.n hai ruuh-e-zindagii
paiham ravaa.n paiham davaa.n
dariyaa vo tere tund-KHuu
jhiile.n vo terii be-karaa.n
shaam-e-avadh ke lab pe hai
husn-e-azal kii daastaa.n
kahtii hai raaz-e-sarmadii
sub.h-e-banaras kii zabaa.n
u.Dtaa hai haft-aflaak par
un kaar-KHaano.n kaa dhu.aa.n
jin me.n hai.n laakho.n mehnatii
san.at-garii ke paasbaa.n
terii banaras kii zarii
rashk-e-hariir-o-parniyaa.n
biidar kii fankaarii me.n hai.n
san.at kii sab baariikiyaa.n
azmat tire iqbaal kii
tere pahaa.Do.n se ayaa.n
dariyaa.o.n kaa paanii, tarii
taqdiis kaa andaaza-daa.n
kyaa 'bhaarte.ndu' ne kiyaa
ga.ngaa kii lahro.n kaa bayaa.n
'iqbaal' aur chakbast hai.n
azmat ke terii naGma-KHvaa.n
'josh' o 'firaaq' o 'pant' hai.n
tere adab ke tarjumaa.n
'tulsii' o 'KHusrav' hai.n terii
taariif me.n ratb-ul-lisaa.n
gaate hai.n naGma mil ke sab
uu.nchaa rahe teraa nishaa.n
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
tere nazaaro.n ke nagii.n
duniyaa kii KHaatam me.n nahii.n
saare jahaa.n me.n muntaKHab
kashmiir kii arz-e-hasii.n
fitrat kaa ra.ngii.n mo.ajaza
firdaus bar-ruu-e-zamii.n
firdaus bar-ruu-e-zamii.n
haa.n haa.n hamii.n ast o hamii.n
sarsabz jis ke dasht hai.n
jis ke jabal hai.n surmagii.n
meve ba-kasrat hai.n jahaa.n
shiirii.n misaal-e-a.ngbii.n
har za.afaraa.n ke phuul me.n
aks-e-jamaal-e-huura.ii.n
vo maalve kii chaa.ndnii
gum jis me.n ho.n duniyaa-o-dii.n
is KHitta-e-naira.ng me.n
har ik fazaa husn-aafrii.n
har shai me.n husn-e-zindagii
dilkash makaa.n dilkash zamii.n
har mard mard-e-KHuub-ruu
har ek aurat naaznii.n
vo taaj kii KHush-paikarii
har zaaviye se dil-nashii.n
san.at-garo.n ke daur kii
ik yaadgaar-e-marmarii.n
hotii hai jo har shaam ko
faiz-e-shafaq se ahmarii.n
dariyaa kii maujo.n se alag
yaa ik bat-e-nazzaara-bii.n
yaa taa.er-e-nuurii ko.ii
parvaaz karne ke qarii.n
yaa ahl-e-duniyaa se alag
ik aabid-e-uzlat-guzii.n
naqsh-e-ajantaa kii qasam
jachtaa nahii.n arzha.ng-e-chii۔n
shaan-e-ellora dekh kar
jhuktii hai aazar kii jabii.n
chittau.D ho yaa aagara
aise nahii.n qil.e kahii.n
but-gar ho yaa naqqaash ho
tuu sab kii azmat kaa amii.n
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
dilkash tire dasht o chaman
ra.ngii.n tire shahr o chaman
tere javaa.n raa.anaa javaa.n
tere hasii.n gul pairahan
ik anjuman duniyaa hai ye
tuu is me.n sadr-e-anjuman
tere muGannii KHush-navaa
shaa.er tire shiirii.n-suKHan
har zarra ik maah-e-mubii.n
har KHaar rashk-e-nastarii.n
Guncha tire sahraa kaa hai
ik naafa-e-mushk-e-KHutan
ka.nkar hai.n tere be-bahaa
patthar tire laal-e-yaman
bastii se jangal KHuub-tar
baaGo.n se husn afroz ban
vo mor vo kabk-e-darii
vo chauk.Dii bharte hiran
ra.ngii.n-adaa vo titliyaa.n
baa.nbnii me.n vo naago.n ke phan
vo sher jin ke naam se
larze me.n aa.e ahrman
kheto.n kii barkat se ayaa.n
faizaan-e-rabb-e-zul-minan
chashmo.n ke shiirii.n aab se
lazzat-kashaa.n kaam-o-dahan
taabinda teraa ahd-e-nau
raushan tiraa ahd-e-kuhan
kitno.n ne tujh par kar diyaa
qurbaan apnaa maal dhan
kitne shahiido.n ko mile
tere liye daar-o-rasan
kitno.n ko teraa ishq thaa
kitno.n ko thii terii lagan
tere jafaa-kash mehnatii
rakhte hai.n azm-e-kohkan
tere sipaahii suurmaa
be-misl yaktaa-e-zaman
'bhisham' saa jin me.n hausla
'arjun' saa jin me.n baa.nkpan
aalim jo faKHr-e-ilm hai.n
fankaar naazaa.n jin pe fan
'raa.e' o 'bos' o 'shergil'
'dinkar,' 'jigar' 'maithli-sharan'
'vallathol' 'maahir', bhaartii
'bachchan', 'mahaadevii' 'suman'
'krishnan', 'niraalaa', 'prem-chand'
'tagore' o 'aazaad' o 'raman'
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
khetii tirii har ik harii
dilkash tirii KHush-manzarii
terii bisaat-e-KHaak ke
zarre hai.n mahr-o-mushtarii
jhelum kaveri naag vo
ga.ngaa kii vo ga.ngotarii
vo narbadaa kii tamkanat
vo shaukat-e-godaavarii
paakiizgii sarjuu kii vo
jamunaa kii vo KHush-gauharii
dullarba aab-e-niil-guu.n
kashmiir kii niilam-parii
dilkash papiihe kii sadaa
koyal kii taane.n mad-bharii
tiitar kaa vo haq sirrahu
tuutii kaa vo vird-e-harii
suufii tire har daur me.n
karte rahe paiGambarii
'chishtii' o 'nanak' se milii
faqr-o-Ginaa ko bartarii
adl-e-jahaa.ngiirii me.n thii
muzmar re.aayaa-parvarii
vo nau-ratan jin se hu.ii
tahziib-e-daur-e-akbarii
rakhte the afGaan-o-muGal
ik saulat-e-askandarii
raanaa.on ke iqbaal kii
hotii hai kis se ham-sarii
saava.nt vo yodhdhaa tire
tere jiyaale vo jarii
niiatii vidur kii aaj tak
kartii hai terii rahbarii
ab tak hai mash.huur-e-zamaa.n
'chanakya' kii daanish-varii
vayaas aur vishvamitr se
muniyo.n kii shaan-e-qaisarii
paatanjalii o saa.nkh se
rishiyo.n kii hikmat-parvarii
baKHshe tujhe in.aam-e-nau
har daur charKH-e-chambarii
KHush-gauharii de aab ko
aur KHaak ko KHush-jauharii
zarro.n ko mahr-afshaaniyaa.n
qatro.n ko dariyaa-gustarii
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
tuu rahbar-e-nau-e-bashar
tuu amn kaa paiGaam-bar
paale hai.n tuu ne god me.n
saahib-KHirad saahib-e-nazar
afzal-tarii.n in sab me.n hai
baapuu kaa naam-e-mo'tabar
har lafz jis kaa dil-nashii.n
har baat jis kii pur-asar
jis ne lagaayaa dahr me.n
na.ara ye be-KHauf-o-KHatar
be-kaar hai.n tiir-o-sinaa.n
be-suud hai.n teG-o-tabar
hinsaa kaa rasta jhuuT hai
haq hai ahinsaa kii Dagar
darmaa.n hai ye har dard kaa
ye har maraz kaa chaara-gar
ja.ngaah-e-aalam me.n ko.ii
is se nahii.n behtar sipar
kartaa huu.n mai.n tere liye
ab ye du.aa-e-muKHtasar
raunaq pe ho.n tere chaman
sarsabz ho.n tere shajar
naKHl-e-umiid-e-behtarii
har fasl me.n ho baarvar
koshish ho duniyaa me.n ko.ii
KHitta na ho zer-o-zabar
teraa har ik baasii rahe
neko-sifat neko-siyar
har zan saliiqa-ma.nd ho
har mard ho saahib-hunar
jab tak hai.n ye arz o falak
jab tak hai.n ye shams o qamar
mere vatan, pyaare vatan
raahat ke gahvaare vatan
har dil ke ujyaare vatan
har aa.nkh ke taare vatan

Arsh Malsiyani
Nazm

KHatm hui barish-e-sang

naa-gahaa.n aaj mire taar-e-nazar se kaT kar
Tuk.De Tuk.De hu.e aafaaq pe KHurshiid o qamar
ab kisii samt a.ndheraa na ujaalaa hogaa
bujh ga.ii dil kii tarah raah-e-vafaa mere baad
dosto qaafila-e-dard kaa ab kyaa hogaa
ab ko.ii aur kare parvarish-e-gulshan-e-Gam
dosto KHatm hu.ii diida-e-tar kii shabnam
tham gayaa shor-e-junuu.n KHatm hu.ii baarish-e-sa.ng
KHaak-e-rah aaj liye hai lab-e-dildaar kaa ra.ng
kuu-e-jaanaa.n me.n khulaa mere lahuu kaa parcham
dekhiye dete hai.n kis kis ko sadaa mere baad
'kaun hotaa hai hariif-e-mai-e-mard-afgan-e-ishq'
'hai mukarrar lab-e-saaqii pe salaa mere baad'

Faiz Ahmad Faiz
Nazm

mera hona na hona

miraa honaa na honaa munhasir hai
ek nuqte par
vo ik nuqta
jo do harfo.n ko aapas me.n milaa kar
lafz kii tashkiil kartaa hai
vo ik nuqta simaT jaa.e to
hone kaa har ik imkaa.n
na hone tak kaa saaraa faasla
pal-bhar me.n tai kar le
vahii nuqta bikhar jaa.e
to har ik shai
na hone ke qafas kii tiiliyo.n ko to.D kar rakh de
vo ek nuqta mirii aa.nkho.n me.n akasr
raushnii ke saath ra.ngo.n ko ugaataa hai
mire idraak me.n shabnam kii suurat
yaa sitaare kii tarah lauh-e-yaqii.n par jagmagaataa hai
vahii nuqta mujhe tashkiik ke jangal me.n
jugnuu ban ke manzil kii taraf rasta dikhaataa hai
mujhe akasr bataataa hai
miraa honaa na hone kaa amal se
mire hone kii bhii takmiil hotii hai
vo ik nuqta kahaa.n hai
kaun hai
kis ke labo.n me.n chhup ke har isbaat ko
inkaar me.n tabdiil kartaa hai
jo do harfo.n ko aapas me.n milaa kar lafz kii tashkiil kartaa hai
ye nukta bhii isii nuqte me.n muzmar hai
vo ek nuqta ki ab tak jis ke hone kaa amii.n huu.n mai.n
vo ifshaa ho to mai.n samjhuu.n
ki huu.n bhii yaa nahii.n huu.n mai.n

Mohsin Naqvi
Nazm

raqqasa

uTThii hai maGrib se ghaTaa
piine kaa mausam aa gayaa
hai raqs me.n ik mah-laqaa
naazuk adaa naaz-aafrii.n
haa.n naachtii jaa gaa.e jaa
nazro.n se dil barmaa.e jaa
ta.Dpaa.e jaa ta.Dpaa.e jaa
o dushman-e-duniyaa-o-dii.n!
teraa thiraknaa KHuub hai
terii adaa.e.n dil-nashii.n
lekin Thahar tuu kaun hai
o niim-uryaa.n naaznii.n
kyaa mashriqii aurat hai tuu
hargiz nahii.n hargiz nahii.n
terii ha.nsii bebaak hai
terii nazar chaalaak hai
uff kis qadar dil-soz hai
taqriir baazaarii tirii
kitnii havas-aamoz hai
ye saada purkaarii tirii
sharm aur izzat vaaliyaa.n
hotii hai.n iffat vaaliyaa.n
vo husn kii shahzaadiyaa.n
parde kii hai.n aabaadiyaa.n
chashm-e-falak ne aaj tak
dekhii nahii.n un kii jhalak
sarmaaya-e-sharm-o-hayaa
zevar hai un ke husn kaa
shauhar ke dukh sahtii hai.n vo
mu.nh se nahii.n kahtii hai.n vo
kab saamne aatii hai.n vo
Gairat se kaT jaatii hai.n vo
e.azaaz-e-millat un se hai
naam-e-sharaafat un se hai
iimaan par qaa.em hai.n vo
paakiiza-o-saa.em hai.n vo
tujh me.n nahii.n sharm-o-hayaa
tujh me.n nahii.n mehr-o-vafaa
sach sach bataa tuu kaun hai
o be-hayaa tuu kaun hai
ehsaas-e-izzat kyuu.n nahii.n
sharm aur Gairat kyuu.n nahii.n
ye pur-fusuu.n Gamze tire
naa-mahramo.n ke saamne
haT saamne se duur ho
marduud ho maqhuur ho
taqdiir kii heTii hai tuu
shaitaan kii beTii hai tuu
jis qaum kii aurat hai tuu
us qaum par la.anat hai tuu
lekin Thahar jaanaa zaraa
terii nahii.n ko.ii KHataa
mardo.n me.n Gairat hii nahii.n
qaumii hamiiyat hii nahii.n
vo millat-e-baizaa ki thii
saare jahaa.n kii raushnii
jam.iyyat-e-islaamiyaa.n
shaahanshah-e-hindostaa.n
ab is me.n dam kuchh bhii nahii.n
ham kyaa hai.n ham kuchh bhii nahii.n
millii siyaasat uTh ga.ii
baazuu kii taaqat uTh ga.ii
shaan-e-hijaazii ab kahaa.n
vo turktaazii ab kahaa.n
ab Gaznavii himmat ga.ii
ab baabarii shaukat ga.ii
iimaan aalamgiir kaa
muslim ke dil se uTh gayaa
qaum ab jafaa-pesha hu.ii
izzat gadaa-pesha hu.ii
ab rang hii kuchh aur hai
be-Gairatii kaa daur hai
ye qaum ab miTne ko hai
ye nard ab piTne ko hai
afsos ye hindostaa.n!
ye gulshan-e-jannat-nishaa.n!
iimaan-daaro.n kaa vatan
taa.at-guzaaro.n kaa vatan
rah jaa.egaa viiraana phir
ban jaa.egaa but-KHaana phir
lekin mujhe kyaa KHabt hai
taqriir kyuu.n be-rabt hai
aisaa bahak jaataa huu.n mai.n
mu.nh aa.ii bak jaataa huu.n mai.n
itnaa sharaabii ho gayaa
aql-o-KHirad ko kho gayaa
mujh ko zamaane se Garaz
miTne miTaane se Garaz
hindostaa.n se kaam kyaa
andesha-e-anjaam kyaa
jiine do jiine do mujhe
piine do piine do mujhe
jab hashr kaa din aa.egaa
us vaqt dekhaa jaa.egaa
haa.n naachtii jaa gaa.e jaa
nazro.n se dil barmaa.e jaa
ta.Dpaa.e jaa ta.Dpaa.e jaa
o dushman-e-duniyaa-o-dii.n

Hafeez Jalandhari
Nazm

bhaarat ke musalman

zaahir kii mohabbat se muravvat se guzar jaa
baatin kii adaavat se kuduurat se guzar jaa
be-kaar dil-afgaar qayaadat se guzar jaa
is daur kii bosiida siyaasat se guzar jaa

Jagan Nath Azad
Nazm

paisa

naqsh yaa.n jis ke miyaa.n haath lagaa paise kaa
us ne tayyaar har ik ThaaTh kiyaa paise kaa
ghar bhii paakiiza imaarat se banaa paise kaa
khaanaa aaraam se khaane ko milaa paise kaa
kap.Daa tan kaa bhii milaa zeb-fazaa paise kaa
jab hu.aa paise kaa ai dosto aa kar sanjog
ishrate.n paas hu.ii.n duur hu.e man ke rog
khaa.e jab maal-puu.e duudh dahii mohan-bhog
dil ko aanand hu.e bhaag ga.e rog aur dhog
aisii KHuubii hai jahaa.n aanaa hu.aa paise kaa
saath ik dost ke ik din jo mai.n gulshan me.n gayaa
vaa.n ke sarv-o-suman-o-laala-o-gul ko dekhaa
puuchhaa us se ki ye hai baaG bataa.o kis kaa
us ne tab gul kii tarah ha.ns diyaa aur mujh se kahaa
mehrbaa.n mujh se ye tum puuchhaa ho kyaa paise kaa
ye to kyaa aur jo hai.n is se ba.De baaG-o-chaman
hai.n khile kiyaariyo.n me.n nargis-o-nasriin-o-suman
hauz favvaare hai.n ba.nglo.n me.n bhii parde chalvan
jaa-ba-jaa qumrii-o-bulbul kii sadaa shor-afgan
vaa.n bhii dekhaa to faqat gul hai khilaa paise kaa
vaa.n ko.ii aayaa liye ek murassaa pi.nj.Daa
laal dastaar-o-dupaTTaa bhii haraa juu.n-totaa
is me.n ik baiThii vo mainaa ki ho bulbul bhii fidaa
mai.n ne puuchhaa ye tumhaaraa hai rahaa vo chupkaa
niklii minqaar se mainaa ke sadaa paise kaa
vaa.n se niklaa to makaa.n ik nazar aayaa aisaa
dar-o-diivaar se chamke thaa pa.Daa aab-e-talaa
siim chuune kii jagah us kii thaa ii.nTo.n me.n lagaa
vaah-vaa kar ke kahaa mai.n ne ye hogaa kis kaa
aql ne jab mujhe chupke se kahaa paise kaa
ruuThaa aashiq se jo maashuuq ko.ii haT kaa bharaa
aur vo minnat se kisii taur nahii.n hai mantaa
KHuubiyaa.n paise kii ai yaaro kahuu.n mai.n kyaa kyaa
dil agar sang se bhii us kaa ziyaada thaa ka.Daa
mom-saa ho gayaa jab naam sunaa paise kaa
jis gha.Dii hotii hai ai dosto paise kii numuud
har tarah hotii hai KHush-vaqti-o-KHuubii bahbuud
KHush-dilii taazgii aur KHurmii kartii hai duruud
jo KHushii chaahiye hotii hai vahii.n aa maujuud
dekhaa yaaro to ye hai aish-o-mazaa paise kaa
paise vaale ne agar baiTh ke logo.n me.n kahaa
jaisaa chaahuu.n to makaa.n vaisaa hii Daaluu.n banvaa
harf-e-takraar kisii kii jo zabaa.n par aayaa
us ne banvaa ke diyaa jaldii se vaisaa hii dikhaa
us kaa ye kaam hai ai dosto yaa paise kaa
naach aur raag kii bhii KHuub-sii tayyaarii hai
husn hai naaz hai KHuubii hai tarah-daarii hai
rabt hai pyaar hai aur dostii hai yaarii hai
Gaur se dekhaa to sab aish kii bisyaarii hai
ruup jis vaqt hu.aa jalva-numaa paise kaa
daam me.n daam ke yaaro jo miraa dil hai asiir
is liye hotii hai ye merii zabaa.n se taqriir
jii me.n KHush rahtaa hai aur dil bhii bahut aish-paziir
jis qadar ho sakaa mai.n ne kiyaa tahriir 'naziir'
vasf aage mai.n likhuu.n taa-ba-kujaa paise kaa

Nazeer Akbarabadi
Nazm

nur-jahan ka mazar

hasrat hai Tapaktii dar-o-diivaar se kyaa kyaa
hotaa hai asar dil pe in aasaar se kyaa kyaa
naale hai.n nikalte dil-afgaar se kyaa kyaa
uThte hai.n sharar aah sharbaar se kyaa

Tilok Chand Mahroom
Nazm

lafzon ke darmiyan

dekhte hii dekhte unho.n ne sayyaare ko lafzo.n se bhar diyaa
faislo.n aur faaslo.n ko tuul dene kaa fan unhe.n KHuub aataa hai
jahaaz bandar-gaaho.n me.n kha.De hai.n
aur gharo.n, godaamo.n, dukaano.n me.n
kisii lafz ke liye jagah nahii.n rahii
itne bahut se lafz... uff KHudaayaa!
mujhe is zamiin par chalte hu.e aThThaa.iis baras ho ga.e
baap, maa.n, bahno.n, bhaa.iyo.n aur mahbuubaa.o.n ke darmiyaan
insaano.n ke darmiyaan
mai.n ne dekhaa
in ta.ariifo.n, ta.aarufo.n aur ta.aziyato.n ke liye
un ke paas larazte hu.e ho.nT hai.n
DabDabaa.ii hu.ii aa.nkhe.n hai.n
garm hatheliyaa.n hai.n
unhe.n kisii iblaaG kii zaruurat nahii.n
naan-baa.ii gungunaataa hai
use lafz nahii.n chaahiye
ek naand... aaTaa ghuu.ndhne ke liye
ek taKHta... pe.De banaane ke liye
ek salaaKH tannuur se roTii nikaalne ke liye
naan-baa.ii kaa kaam KHatm kar lo to mere paas aanaa
yahaa.n kinaare par sarkando.n kaa jangal aap hii aap ug aayaa hai
kuchh qalam mai.n ne taraashe hai.n
aur ek baa.nsurii...
baaqii sarkando.n se ek kashtii banaa.ii hai
gaDaryaa, kisaan, kaashtkaar, mausiiqaar, aahan-gar
sab tayyaar hai.n
kuchh aavaaze.n kashtii me.n rakh lii hai.n
madrase kii ghanTii...
ek lorii
aur ek du.aa
ek na.ii zamiin par zinda rahne ke liye is se ziyaada kuchh nahii.n chaahiye

Sarvat Husain
Nazm

naqqad

mujh se aa.nkhe.n to milaa ai dushman-e-soz-o-gudaaz
tujh pe kyaa azdaad kii tauhiid kaa ifshaa hai raaz

Josh Malihabadi
Nazm

zaifa

piichhe piichhe aa rahaa hai kaun ye kyaa baat hai
baj rahe hai.n kaan uff kaisii bhayaanak raat hai

Josh Malihabadi
Nazm

mujhe abhi bahut dur jaana hai

kyaa pairo.n kii thakan is safar ko rok saktii hai
kyaa raaste ke ro.De mere iraade ko to.D sakte hai.n
kyaa mai.n yahaa.n se vaapas lauT jaa.uu.ngaa
kyaa mai.n aur aage chal nahii.n paa.uu.ngaa
nahii.n nahii.n
shaayad mujhe jaanaa hai bahut duur
go huu.n mai.n thakan se chuur
aur be-zaar har manzar se
jo baar baar lauT kar nazar kii uktaahaT ban jaataa hai
vahii aasmaan
vahii zamiin
vahii chaa.nd vahii sitaare
chaa.ndnii me.n chamakte aur mahakte vahii phuul
haatho.n me.n chubhte vahii babuul
vahii mere man ko salaaKHo.n me.n lahuu karne vaale aqvaal
lekin shaayad uktaahaT bhii maane na ho
qadmo.n kii
shaayad zindagii qaidii na bane lamho.n kii
ye to havaa-e-barg-o-baar kii tarah hai
jo kabhii na kabhii guzar jaa.egii
mere zehn ke KHazaane kii uuprii sat.h ko bhii
kabhii na chhuu paa.egii
shaayad abhii aage bahut duur jaanaa hai
aur in baar baar aate lamho.n
har baar aa.nkh ke saamne ubharte manzaro.n
dariyaa.o.n sahraa.o.n ja.ngalo.n
gaa.nv aur shahro.n
ke bhii.D se mujhe ko.ii nayaa ra.ng
nikaalnaa hogaa
apne paraaganda zehn ko qabr me.n dafn kar ke
nayaa but nayaa mandir banaanaa hogaa
puraane lafzo.n se nayaa lafz
puraane ma.aanii se na.e ma.aanii
KHalq karne ho.nge
yahii nahii.n
mujhe paariina kaano.n me.n
samaa.ato.n ke na.e paimaane
aa.nkho.n ke liye
na.e manzar-naame se tartiib dene ho.nge
chalte chalte mere juute bhii ghis ga.e hai.n
mujhe uff juuto.n ko hii badalnaa hogaa
aur aa.nkho.n par na.ii ainak lagaanii hogii
taaki puraane shiishe me.n na.e ra.ng
puraane na dikhaa.ii de.n
shaayad ye thakan mujhe rok na paa.e
shaayad mai.n in roado.n ko phalaa.ng duu.n
shaayad apne haatho.n se babuulo.n ko noch
phe.nkuu.n
shaayad mai.n sin kii salaaKHo.n ko to.D kar
baahar aa jaa.uu.n
aur malgajii chaa.ndnii ke aks ghar
apne lahuu se surKH-ruu kar duu.n
aur qadam ba.Dhaate aage nigal jaa.uu.n
shaayad mujhe abhii bahut duur jaanaa hai

Khaleel Mamoon
Nazm

mehnati log

engineer
likh pa.Dh ke mai.n to ik din
ahl-e-hunar banuu.ngaa
chaahaa agar KHudaa ne
engineer banuu.ngaa
hogii mire hunar se ta.amiir is vatan kii
jaagegii mere fan se taqdiir is vatan kii
chaltii rahe.n mashiine.n san.at tamaam chamke
jis tarah sub.h chamke vaise hii shaam chamke
ahl-e-hunar banuu.ngaa
engineer banuu.ngaa
doctor
jise takliif me.n paa.uu.n
use aaraam pahu.nchaa.uu.n
jahaa.n Gam kaa a.ndheraa ho
KHushii kii raushnii laa.uu.n
jahaa.n aa.nsuu baraste ho.n
ha.nsii us ghar me.n bikhraa.uu.n
du.aa hai doctor ban kar
dukhii logo.n ke kaam aa.uu.n
vatan kaa sipaahii
vatan kaa bahaadur sipaahii banuu.n
shujaa.at kii duniyaa kaa raahii banuu.n
left right left
left right left
vatan me.n jahaa.n ho zaruurat mirii
vahii.n kaam aa.e shujaa.at mirii
dilerii kaa mai.n sab ko paiGaam duu.n
jo mushkil ho vo kaam anjaam duu.n
hamesha taraqqii kii raaho.n me.n ham
chale.n saathiyo.n se milaa ke qadam
left right left
left right left
teacher
naa chaa.ndii naa sonaa chaahuu.n
mai.n to teacher honaa chaahuu.n
haasil jo ta.aliim karuu.n mai.n
sab me.n use taqsiim karuu.n mai.n
nanhe munne bachche aa.e.n
ilm kii daulat lete jaa.e.n
kam na ho ye taqsiim kiye se
jaltaa ho jaise diyaa diye se
pilot
bulandii pe jaa ke safar karne vaalaa
havaa-baaz uu.nchaa havaa-baaz a.alaa
vo runway pe aayaa jo Take-off karne
to suuraj ne pahnaa.ii kirno.n kii maalaa
passenger hai.n siiTo.n pe be-fikr baiThe
u.Daa.e liye jaa rahaa hai jiyaalaa
hamaarii uma.ngo.n se kyaa kah rahaa hai
fazaa.o.n me.n u.Dtaa hu.aa ye ujaalaa
vakiil
insaaf kii shaan dikhaa.uu.n
insaaf kaa rang jamaa.uu.n
mazluum se ho hamdardii
zaalim ko sazaa dilvaa.uu.n
mujrim ke kaale dil me.n
qaanuun kii sham.a jalaa.uu.n
har baat me.n sab se aage
insaaf kii baat ba.Dhaa.uu.n
insaaf kii shaan dikhaa.uu.n
insaaf kaa rang jamaa.uu.n
haarii
sochaa hai mai.n ne
haarii banuu.ngaa
kheto.n me.n jhuumuu.n
gandum ugaa ke
dhartii ko chuumuu.n
fasle.n sajaa ke
saare vatan ko
KHush-haal kar duu.n
KHushiyo.n se sab ke
daaman ko bhar duu.n
haarii banuu.ngaa

Rais Farogh
Nazm

numaish mein

vo kuchh doshiizgaan-e-naaz-parvar
kha.Dii hai.n ik bisaatii kii dukaa.n par
nazar ke saamne hai ek mahshar
aur ik mahshar hai mere dil ke andar
sunahraa kaam ra.ngii.n saa.riyo.n par
bisaat-e-aasmaa.n par maah-o-aKHtar
jamaal-o-husn ke pur-ro.ab tevar
numaayaa.n chaa.nd sii peshaaniyo.n par
vo ruKHsaaro.n pe halkii halkii surKHii
labo.n me.n pur-fishaa.n ruuh-e-gul-e-tar
siyah zulfo.n me.n ruuh-e-sumbulistaa.n
nazar sar-chashma-e-tasniim-o-kausar
adaa-e-naaz Garq-e-kaif-e-sahbaa
siyah mizhgaa.n sharaab-aaluuda nashtar
chamak taaro.n kii chashm-e-surmagii.n me.n
jhalak chaa.ndii kii jism-e-marmarii.n me.n
vo KHushbuu aa rahii hai pairahan se
fazaa hai duur tak jis se mo.attar
tabassum aur ha.nsii ke narm tuufaa.n
fazaa.o.n me.n musalsal baarish-e-zar
nishaat-e-ra.ng-o-buu se chuur aa.nkhe.n
sharaab-e-naab se labrez saaGar
vo mehraabe.n sii siino.n par numaayaa.n
fazaa-e-nuur me.n cupid ke shah-par
nafas ke aamad-o-shud se talaatum
shab-e-mahtaab me.n jaise samundar
sitaaro.n kii nigaahe.n jhuk ga.ii hai.n
zamii.n phir KHanda-zan hai aasmaa.n par
ko.ii aa.iina-daar-e-husn-e-faaras
kisii me.n husn-e-yuunaanii ke jauhar
kisii me.n aks-e-''ma.asuum-e-kaliisaa''
kisii me.n partav-e-asnaam-e-aazar
ye shiirii.n hai vo naushaaba hai shaayad
nahii.n yaa.n farq-e-farhaad-o-sikandar
ye apne husn me.n azraa-e-vaamiq
vo apne naaz me.n salmaa-e-'aKHtar'
ye taabaanii me.n KHurshiid-e-daraKHshaa.n
vo ra.anaa.ii me.n us se bhii fuzuu.n-tar
ha.nsii us kii tuluu-e-sub.h-e-KHandaa.n
navaa us kii suruud-e-kaif-aavar
ye sholaa-aafrii.n vo barq-afgan
ye aa.ii.na-jabii.n vo maah-paikar
vo jumbish sii hu.ii kuchh aa.nchalo.n ko
vo lahre.n sii uThii.n kuchh saa.riyo.n par
KHiraam-e-naaz se naGme jagaatii
vo chal dii.n ek jaanib muskuraa kar
kisii kii hasrate.n paamaal kartii
kisii kii hasrate.n ham-raah le kar
kabhii aa.nkhe.n dukaano.n par jamii hai.n
kabhii KHud apnii hii barnaaiyo.n par
idhar ham ne ik aah-e-sard khii.nchii
ha.nsii phir aa ga.ii apne kiye par

Asrarul Haq Majaz
Nazm

ajnabi

mai.n bhii us vaqt sar-e-raah thaa hairaa.n hairaa.n
paa-barahna nazar-aavaara tan-afgaar KHamosh
dard se mohr-ba-lab suurat-e-diivaar KHamosh
KHalish-e-hasrat-e-jaa.n thii ki ko.ii pahchaane
sham.a sii dil ke nihaa.n-KHaane me.n larzaa.n larzaa.n
mujh pe kyaa biit ga.ii kaun sune kyaa jaane
chashm-e-KHuu.n-basta ko aaseb kaa maaman samjhaa
qaafile vaalo.n ne shaayad mujhe rahzan samjhaa

Shaz Tamkanat
Nazm

nadir shah afghan

حضور حق سے چلا لے کے لولوئے لالا
وہ ابر جس سے رگ گل ہے مثل تار نفس
بہشت راہ ميں ديکھا تو ہو گيا بيتاب
عجب مقام ہے ، جي چاہتا ہے جاؤں برس
صدا بہشت سے آئي کہ منتظر ہے ترا
ہرات و کابل و غزني کا سبزئہ نورس
سرشک ديدہ نادر بہ داغ لالہ فشاں
چناں کہ آتش او را دگر فرونہ نشاں!

Allama Iqbal
Nazm

jafa-e-dil-shikan

farsh-e-gul kii jaa hai bistar KHaar kaa
ra.ng faq hai har jigar-afgaar kaa
sadma hai andoh ke aazaar kaa
dil fasurda-haal hai biimaar kaa
paa-barahna ghar se nikle mard o zan
log dehlii ke hai.n saare na.ara-zan

Gulam Dastgeer Mubeen
Nazm

unT

laqq-o-daq sahraa me.n yaa maidaan me.n
yaa arab ke garm registaan me.n
saya-afgan hai na vaa.n ko.ii chaTaan
sard paanii kaa na dariyaa kaa nishaan
chilchilaatii dhuup hai aur chup havaa
vaa.n parinda bhii nahii.n par maartaa
tuu vahaa.n ke marhale kartaa hai tai
din-ba-din aur hafta hafta pai-ba-pai
qiimtii ashyaa hai.n terii pusht par
taajiro.n kaa resham aur shaaho.n kaa zar
toda toda tere uupar lad rahaa
hai bharaa goyaa jahaaz-e-pur-bahaa
chand hafte jab ki jaate hai.n guzar
aur thakaa detaa hai raakib ko safar
uu.nT! ghabraataa nahii.n tuu baar se
dekhtaa hai us kii jaanib pyaar se
goyaa kahtaa hai ki ai mere savaar
ek din tuu aur bhii himmat na haar
haa.n na be-dil ho na raste me.n ThiThak
saaf sar-chashma hai aage dhar lapak
mujh ko aatii hai havaa se buu-e-aab
naa-umiidii se na kar tuu iztiraab
uu.nT tuu kartaa hai us kii rahbarii
yuu.n banaa detaa hai raakib ko jarii
aaKHirash manzil pe pahu.nchaataa hai tuu
aur suukhe KHaar-o-KHas khaataa hai tuu
sabr se kartaa hai tai raah-e-daraaz
sach kahaa hai tuu hai KHushkii kaa jahaaz
al-Garaz tuu hai haliim o KHush-KHisaal
tarbiyat me.n chhoTe bachcho.n kii misaal

Ismail Merathi
Nazm

doraha

rail-gaa.Dii ye ghamsaan ilaahii tauba
na muravvat na takalluf na tabassum na adaa
yuu.nhii ik Gair-shu.uurii sii KHushuunat kaa KHarosh
be-iraada hai to kyaa Gair-shu.uurii hai to kyaa
ye na.e daur ke ehsaas-e-Gulaamii kaa zuhuur
intiqaama tahakkum kii numuud
is me.n ik iz.haar-e-baGaavat bhii to hai
yuu.nhii yuu.nhii sahii
ik shaa.iba-e-daad-e-shujaa.at bhii to hai
chaak to kartaa huu.n mai.n apnaa garebaa.n hii sahii
kulbulaatii hu.ii maKHluuq kii is daldal me.n
siina taane hu.e kuchh log ba.Dhe jaate hai.n
KHuub phunkaarte phan phailaa.e
log vo log nahii.n
jin ko Thukraate hu.e jaate hai.n
ye log ba.De saahab log
ye jo hukkaam hamaare hai.n ye hukkaam nahii.n
jo hame.n se hai.n magar ham me.n nahii.n
ye jo bando.n ke hai.n aaqaa magar aaqaa ke Gulaam
baa-vafaa huu.n to huu.n be-daam nahii.n
tuu dost kisii kaa bhii sitamgar na hu.aa thaa
un pe duniyaa kii har ik raah kushaada hai magar
aaj ik sa.ng-e-garaa.n haa.il hai
ki uThaa.e na uThe aur hilaa.e na hile
duusre darje ke darvaaze me.n
un ke aaqaa.o.n kaa ik fard fara.ngii goraa
baahe.n phailaa.e hu.e raasta roke hai kha.Daa
kaun hotaa hai hariif-e-mai-e-mard afgan-e-ishq
siiTiyaa.n bajne lagii.n KHidmat-e-sarkaar bajaa laanaa hai
aur sarkaar hii KHud sa.ng-e-rah-e-manzil hai
zindagii aa ga.ii doraahe par
der kyuu.n karte ho bhaago bhaago
dau.D kar third ke Darbe me.n ghuso
apne ham-jins Gulaamo.n me.n milo
zindagii aa ga.ii doraahe par

Mohammad Deen Taseer
Nazm

jila-watan hone se pahle

is KHabar ke aane ke ba.ad
mai.n apne ghar kii khi.Dkiyaa.n
band kartii huu.n
bijlii ke taar switch-off kar detii huu.n
freeze me.n rakhaa khaanaa
pa.Dos me.n de detii huu.n
bachaa hu.aa duudh galii kii billii ke aage
Daal detii huu.n
aur ek gilass ThanDaa paanii piitii huu.n
tamaam darvaaze lock kar ke
sa.Dak par nikal jaatii huu.n
dopahar se pahle
yaa raat ke kisii pahar
sarkaarii gaa.Dii me.n
sarkaarii murda-KHaane me.n
mujhe baaqii jilaa-vatano.n ke saath
phe.nk diyaa jaa.egaa
aur ek KHabar chhapegii
mulzima fulaa.n-bint-e-fulaa.n ke ghar
puraane sanduuq me.n
puraane kap.Do.n kii taho.n me.n
bahut sii nazme.n
qaabil-e-e'tiraaz haalat me.n paa.ii ga.ii.n

Azra Abbas
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now