Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ",vIS"

Nazm MATCHES FOR ",vis"

Nazm

tum bilkul hum jaise nikle

tum bilkul ham jaise nikle
ab tak kahaa.n chhupe the bhaa.ii
vo muurakhtaa vo ghaama.D-pan
jis me.n ham ne sadii ga.nvaa.ii
aaKHir pahu.nchii dvaar tuhaare
are badhaa.ii bahut badhaa.ii
pret dharm kaa naach rahaa hai
qaa.em hinduu raaj karoge
saare ulTe kaaj karoge
apnaa chaman taaraaj karoge
tum bhii baiThe karoge sochaa
puurii hai vaisii tayyaarii
kaun hai hinduu kaun nahii.n hai
tum bhii karoge fatvaa jaarii
hogaa kaThin yahaa.n bhii jiinaa
daa.nto.n aa jaa.egaa pasiinaa
jaisii-taisii kaTaa karegii
yahaa.n bhii sab kii saa.ns ghuTegii
bhaa.D me.n jaa.e shikshaa-vikshaa
ab jaahil-pan ke gun gaanaa
aage ga.Dhaa hai ye mat dekho
vaapas laa.o gayaa zamaana
mashq karo tum aa jaa.egaa
ulTe paa.nv chalte jaanaa
dhyaan na duujaa man me.n aa.e
bas piichhe hii nazar jamaanaa
ek jaap saa karte jaa.o
baaram-baar yahii doharaa.o
kaisaa viir mahaan thaa bhaarat
kitnaa 'aalii-shaan thaa bhaarat
phir tum log pahu.nch jaa.oge
bas parlok pahu.nch jaa.oge
ham to hai.n pahle se vahaa.n par
tum bhii samay nikaalte rahnaa
ab jis nark me.n jaa.o vahaa.n se
chiTThii-viTThii Daalte rahnaa

Fahmida Riaz
Nazm

hinDola

dayaar-e-hind thaa gahvaara yaad hai hamdam
bahut zamaana hu.aa kis ke kis ke bachpan kaa
isii zamiin pe khelaa hai 'raam' kaa bachpan
isii zamiin pe un nanhe nanhe haatho.n ne
kisii samay me.n dhanush-baan ko sambhaalaa thaa
isii dayaar ne dekhii hai 'krishn' kii liilaa
yahii.n gharo.ndo.n me.n siitaa sulochanaa raadhaa
kisii zamaane me.n gu.Diyo.n se kheltii ho.ngii
yahii zamii.n yahii dariyaa pahaa.D jangal baaG
yahii havaa.e.n yahii sub.h-o-shaam suuraj chaa.nd
yahii ghaTaa.e.n yahii barq-o-ra.ad o qaus-e-quzah
yahii.n ke giit rivaayaat mausamo.n ke juluus
hu.aa zamaana ki 'siddhaarth' ke the gahvaare
inhii nazaaro.n me.n bachpan kaTaa thaa 'vikram' kaa
sunaa hai 'bhartarharii' bhii inhii.n se khelaa thaa
'bharat' agastya' 'kapil' 'vyaas' 'pashii' 'kautilya'
'janak' vashishth' 'manu' 'vaalmik' vishvaamitr
'kanaad' 'gautam' o ramanuj 'kumaaril-bhatt'
mohanjoDaaro ha.Dappaa ke aur ajantaa ke
banaane vaale yahii.n ballamo.n se khele the
isii hi.nDole me.n 'bhavabhut' o 'kaaliidaas' kabhii
humak humak ke jo tutlaa ke gungunaa.e the
sarasvatii ne zabaano.n ko un kii chuumaa thaa
yahii.n ke chaa.nd va suuraj khilaune the un ke
inhii.n fazaa.o.n me.n bachpan palaa thaa 'KHusrav' kaa
isii zamii.n se uThe 'tansen' aur 'akbar'
'rahiim' 'nanak' o 'chaitanya' aur 'chishti' ne
inhii.n fazaa.o.n me.n bachpan ke din guzaare the
isii zamii.n pe kabhii shazaada-e-'KHurram'
zaraa sii dil-shikanii par jo ro diyaa hogaa
bhar aayaa thaa dil-e-naazuk to kyaa ajab is me.n
in aa.nsu.o.n me.n jhalak taaj kii bhii dekhii ho
'ahalyabaa.i' 'daman' 'padmini' o 'raziya' ne
yahii.n ke pe.Do.n kii shaaKHo.n me.n Daale the jhuule
isii fazaa me.n ba.Dhaa.ii thii pe.ng bachpan kii
inhii nazaaro.n me.n saavan ke giit gaa.e the
isii zamiin pe ghuTno.n ke bal chale ho.nge
'malik-mohammad' o 'raskhan' aur 'tulsi-das'
inhii.n fazaa.o.n me.n guu.njii thii totlii bolii
'kabir-das' 'Tukaaraam' 'suur' o 'miiraa' kii
isii hi.nDole me.n 'viddypati' kaa ka.nTh khulaa
isii zamiin ke the laal 'miir' o 'Gaalib' bhii
Thumak Thumak ke chale the gharo.n ke aa.ngan me.n
'aniis' o 'haalii' o 'iqbaal' aur 'vaaris-shaah'
yahii.n kii KHaak se ubhre the 'premchand' o 'tagore'
yahii.n se uTThe the tahziib-e-hind ke me.amaar
isii zamiin ne dekhaa thaa baal-pan in kaa
yahii.n dikhaa.ii thii.n in sab ne baal-liilaa.e.n
yahii.n har ek ke bachpan ne tarbiyat paa.ii
yahii.n har ek ke jiivan kaa baalkaa.nD khulaa
yahii.n se uThte baguulo.n ke saath dau.De hai.n
yahii.n kii mast ghaTaa.o.n ke saath jhuume hai.n
yahii.n kii madh-bharii barsaat me.n nahaa.e hai.n
lipaT ke kiicha.D o paanii se bachpane un ke
isii zamiin se uTThe vo desh ke saava.nt
u.Daa diyaa thaa jinhe.n company ne topo.n se
isii zamiin se uThii hai.n an-ginat nasle.n
pale hai.n hind hi.nDole me.n an-ginat bachche
mujh aise kitne hii gumnaam bachche khele hai.n
isii zamii.n se isii me.n supurd-e-KHaak hu.e
zamiin-e-hind ab aaraam-gaah hai un kii
is arz-e-paak se uTThii.n bahut sii tahziibe.n
yahii.n tuluu hu.ii.n aur yahii.n Guruub hu.ii.n
isii zamiin se ubhre ka.ii uluum-o-funuun
faraaz-e-koh-e-himaala ye daur-e-ga.ng-o-jaman
aur in kii god me.n parvarda kaarvaano.n ne
yahii.n rumuuz-e-KHiraam-e-sukuu.n-numaa siikhe
nasiim-e-sub.h-e-tamaddun ne bhairvii.n chhe.Dii
yahii.n vatan ke taraano.n kii vo pave.n phuuTe.n
vo be-qaraar sukuu.n-zaa tarannum-e-saharii
vo kapkapaate hu.e soz-o-saaz ke sho.ale
inhii fazaa.o.n me.n a.ng.Daa.iyaa.n jo le ke uThe
lavo.n se jin ke charaaGaa.n hu.ii thii bazm-e-hayaat
jinho.n ne hind kii tahziib ko zamaana hu.aa
bahut se zaaviyo.n se aa.iina dikhaayaa thaa
isii zamii.n pe Dhalii hai mirii hayaat kii shaam
isii zamiin pe vo sub.h muskuraa.ii hai
tamaam sho.ala o shabnam mirii hayaat kii sub.h
sunaa.uu.n aaj kahaanii mai.n apne bachpan kii
dil-o-dimaaG kii kaliyaa.n abhii na chaTkii thii.n
hamesha kheltaa rahtaa thaa bhaa.ii bahno.n me.n
hamaare saath mohalle kii la.Dkiyaa.n la.Dke
machaa.e rakhte the baalak udham har ek gha.Dii
lahuu tara.ng uchhal-phaa.nd kaa ye aalam thaa
mohalla sar pe uThaa.e phire jidhar guzre
hamaare chahchahe aur shor guu.njte rahte
chahaar-samt mohalle ke goshe goshe me.n
fazaa me.n aaj bhii laa-raib guu.njte ho.nge
agarche duusre bachcho.n kii tarah thaa mai.n bhii
ba-zaahir auro.n ke bachpan saa thaa miraa bachpan
ye sab sahii mire bachpan kii shaKHsiyat bhii thii ek
vo shaKHsiyat ki bahut shoKH jis ke the KHad-o-KHaal
adaa adaa me.n ko.ii shaan-e-infiraadii thii
Garaz kuchh aur hii lachchhan the mere bachpan ke
mujhe thaa chhoTe ba.Do.n se bahut shadiid lagaav
har ek par mai.n chhi.Daktaa thaa apnii nannhii sii jaa.n
dil umDaa aataa thaa aisaa ki jii ye chaahtaa thaa
uThaa ke rakh luu.n kaleje me.n apnii duniyaa ko
mujhe hai yaad abhii tak ki khel-kuud me.n bhii
kuchh aise vaqfe pur-asraar aa hii jaate the
ki jin me.n sochne lagtaa thaa kuchh miraa bachpan
ka.ii ma.aanii-e-be-lafz chhuune lagte the
butuun-e-Gaib se mere shu.uur-e-asGar ko
har ek manzar-e-maanuus ghar kaa har gosha
kisii tarah kii ho ghar me.n sajii hu.ii har chiiz
mire mohalle kii galiyaa.n makaa.n dar-o-diivaar
chabuutre ku.e.n kuchh pe.D jhaa.Diyaa.n bele.n
vo pherii vaale ka.ii un ke bhaa.nt bhaa.nt ke bol
vo jaane buujhe manaazir vo aasmaa.n o zamii.n
badalte vaqt kaa aa.iina garmii-o-KHunkii
Guruub-e-mahr me.n ra.ngo.n kaa jaagtaa jaaduu
shafaq ke shiish-mahal me.n gudaaz-e-pinhaa.n se
javaahro.n kii chaTaane.n sii kuchh pighaltii hu.ii.n
shajar hajar kii vo kuchh sochtii hu.ii duniyaa
suhaanii raat kii maanuus ramaziyat kaa fusuu.n
alassabaah ufuq kii vo thartharaatii bhave.n
kisii kaa jhaa.nknaa aahista phuuTtii pau se
vo dopahar kaa samay darja-e-tapish kaa cha.Dhaav
thakii thakii sii fazaa me.n vo zindagii kaa utaar
hu.aa kii bansiyaa.n ba.nsvaa.Diyo.n me.n bajtii hu.ii.n
vo din ke ba.Dhte hu.e saa.e sah-pahar kaa sukuu.n
sukuut shaam kaa jab dono.n vaqt milte hai.n
Garaz jhalakte hu.e sarsarii manaazir par
mujhe gumaan paristaaniyat kaa hotaa thaa
har ek chiiz kii vo KHvaab-naak asliyyat
mire shu.uur kii chilman se jhaa.nktaa thaa ko.ii
liye rubuubiyat-e-kaa.enaat kaa ehsaas
har ek jalve me.n Gaib o shuhuud kaa vo milaap
har ik nazaara ik aa.iina-KHaana-e-hairat
har ek manzar-e-maanuus ek hairat-zaar
kahii.n rahuu.n kahii.n khelo.n kahii.n pa.Dhuu.n likhuu.n
mire shu.uur pe ma.nDlaate the manaazir-e-dahr
mai.n akasr un ke tasavvur me.n Duub jaataa thaa
vafuur-e-jazba se ho jaatii thii mizha pur-nam
mujhe yaqiin hai in unsurii manaazir se
ki aam bachcho.n se letaa thaa mai.n ziyaada asar
kisii samay mirii tiflii rahii na be-parvaa
na chhuu sakii mirii tiflii ko Gaflat-e-tiflii
ye khel-kuud ke lamho.n me.n hotaa thaa ehsaas
du.aa.e.n detaa ho jaise mujhe sukuut-e-davaam
ki jaise haath abad rakh de dosh-e-tiflii par
har ek lamha ke raKHno.n se jhaa.nktii sadiyaa.n
kahaaniyaa.n jo sunuu.n un me.n Duub jaataa thaa
ki aadmii ke liye aadmii kii jag-biitii
se ba.Dh ke kaun sii shai aur ho hii saktii hai
inhii fasaano.n me.n pinhaa.n the zindagii ke rumuuz
inhii fasaano.n me.n khulte the raaz-haa-e-hayaat
unhe.n fasaano.n me.n miltii thii.n ziist kii qadre.n
rumuuz-e-besh-bahaa TheTh aadmiyat ke
kahaaniyaa.n thii.n ki sad-dars-gaah-e-riqqat-e-qalb
har ik kahaanii me.n shaa.istagi-e-Gam kaa sabaq
vo unsur aa.nsu.o.n kaa daastaan-e-insaa.n me.n
vo nal-daman kii kathaa sarguzasht-e-savitrii
'shakuntlaa' kii kahaanii 'bharat' kii qurbaanii
vo marg-e-bhishm-pitaamah vo sej tiiro.n kii
vo paan.cho paa.nDav kii sovarg-yaatraa kii kathaa
vatan se ruKHsat-e-'siddhaarth' 'raam' kaa ban-baas
vafaa ke baa'd bhii 'siitaa' kii vo jalaa-vatanii
vo raato.n-raat 'sirii-krishn' ko uThaa.e hu.e
balaa kii qaid se 'basdev' kaa nikal jaanaa
vo a.ndhkaar vo baarish, ba.Dhii hu.ii jamunaa
Gam-e-aafriin kahaanii vo 'hiir' 'raa.njhaa' kii
shu.uur-e-hind ke bachpan kii yaadgaar-e-aziim
ki aise vaise taKHayyul kii saa.ns ukha.D jaa.e
ka.ii muhayyur-e-idraak dev-maalaaye.n
hitopdesh ke qisse kathaa sarat-saagar
karo.Do.n siino.n me.n vo guu.njtaa hu.aa aalhaa
mai.n puuchhtaa huu.n kisii aur malak vaalo.n se
kahaaniyo.n kii ye daulat ye be-bahaa daulat
fasaane dekh lo in ke nazar bhii aatii hai
mai.n puuchhtaa huu.n ki gahvaare aur qaumo.n ke
base hu.e hai.n kahii.n aisii daastaano.n se
kahaaniyaa.n jo mai.n suntaa thaa apne bachpan me.n
mire liye vo na thii.n mahz baa.is-e-tafriih
fasaano.n se mire bachpan ne sochnaa siikhaa
fasaano.n se mujhe sanjiidgii ke dars mile
fasaano.n me.n nazar aatii thii mujh ko ye duniyaa
Gam o KHushii me.n rachii pyaar me.n basaa.ii hu.ii
fasaano.n se mire dil ne ghulaavaTe.n paa.ii.n
yahii nahii.n ki mashaahiir hii ke afsaane
zaraa sii umr me.n karte ho.n mujh ko muta.assir
mohalle Tole ke gumnaam aadamiyyo.n ke
kuchh aise sun.ne me.n aate the vaaqi.aat-e-hayaat
jo.n yuu.n to hote the farsuuda aur ma.amuulii
magar the aa.iine iKHlaas aur sharaafat ke
ye chand aa.ii ga.ii baate.n aisii baate.n thii.n
ki jin kii oT chamaktaa thaa dard-e-insaanii
ye vaardaat nahii.n razmiyye hayaat ke the
Garaz ki ye hai.n mire bachpane kii tasviire.n
nadiim aur bhii kuchh KHatt-o-KHaal hai.n un ke
ye merii maa.n kaa hai kahnaa ki jab mai.n bachcha thaa
mai.n aise aadmii kii god me.n na jaataa thaa
jo bad-qimaar ho aibii ho yaa ho bad-suurat
mujhe bhii yaad hai nau das baras hii kaa mai.n thaa
to mujh pe kartaa thaa jaaduu saa husn-e-insaanii
kuchh aisaa hotaa thaa mahsuus jab mai.n dekhtaa thaa
shagufta rang tar-o-taaza ruup vaalo.n kaa
ki un kii aa.nch mirii haDDiyaa.n galaa degii
ik aazmaa.ish-e-jaa.n thii ki thaa shu.uur-e-jamaal
aur us kii nashtariyyat us kii ustuKHaa.n-sozii
Gam o nashaat lagaavaT mohabbat o nafrat
ik intishaar-e-sakuu.n iztiraab pyaar itaab
vo be-panaah zakii-ul-hisii vo hilm o Guruur
kabhii kabhii vo bhare ghar me.n hiss-e-tanhaa.ii
vo vahshate.n mirii maahaul-e-KHush-gavaar me.n bhii
mirii sarisht me.n ziddain ke ka.ii jo.De
shuruu.a hii se the maujuud aab-o-taab ke saath
mire mizaaj me.n pinhaa.n thii ek jadaliyyat
rago.n me.n chhuuTte rahte the be-shumaar anaar
nadiim ye hai.n mire baal-pan ke kuchh aasaar
vafuur o shiddat-e-jazbaat kaa ye aalam thaa
ki kau.nde jast kare.n dil ke aabgiine me.n
vo bachpanaa jise bardaasht apnii mushkil ho
vo bachpanaa jo KHud apnii hii tevriyaa.n sii cha.Dhaa.e
nadiim zikr-e-javaanii se kaa.np jaataa huu.n
javaanii aa.ii dabe paa.nv aur yuu.n aa.ii
ki us ke aate hii big.Daa banaa-banaayaa khel
vo KHvaahishaat ke jazbaat ke umaDte hu.e
vo ho.nkte hu.e be-naam aag ke tuufaa.n
vo phuuTtaa hu.aa jvaalaa-mukhii javaanii kaa
rago.n me.n uThtii hu.ii aa.ndhiyo.n ke vo jhaTke
ki jo tavaazun-e-hastii jhi.njho.D ke rakh de.n
vo zalzale ki pahaa.Do.n ke pair ukha.D jaa.e.n
buluuGiyat kii vo Tiise.n vo karb-e-nashv-o-numaa
aur aise me.n mujhe byaahaa gayaa bhalaa kis se
jo ho na saktii thii hargiz mirii shariik-e-hayaat
ham ek duusre ke vaaste bane hii na the
siyaah ho ga.ii duniyaa mirii nigaaho.n me.n
vo jis ko kahte hai.n shaadii-e-KHaanaa-aabaadii
mire liye vo banii bevgii javaanii kii
luTaa suhaag mirii zindagii kaa maa.nDo me.n
nadiim khaa ga.ii mujh ko nazar javaanii kii
balaa-e-jaan mujhe ho gayaa shu.uur-e-jamaal
talaash-e-shola-e-ulfat se ye hu.aa haasil
ki nafrato.n kaa agan-ku.nD ban ga.ii hastii
vo halq o siina o rag rag me.n be-panaah chubhaa
nadiim jaise nigal lii ho mai.n ne naag-phanii
z ishq-zaadam o ishqam kamusht zaar-o-dareG
KHabar na burd ba-rustam kase ki sohraabam
na puuchh aalam-e-kaam-o-dahan nadiim mire
samar hayaat kaa jab raakh bin gayaa mu.nh me.n
mai.n chaltii-phirtii chitaa ban gayaa javaanii kii
mai.n kaa.ndhaa detaa rahaa apne jiite murde ko
ye sochtaa thaa ki ab kyaa karuu.n kahaa.n jaa.uu.n
bahut se aur masaa.ib bhii mujh pe TuuT pa.De
mai.n Dhuu.nDhne lagaa har samt sachchii jhuuTii panaah
talaash-e-husn me.n sher-o-adab me.n dostii me.n
ru.ndhii sadaa se mohabbat kii bhiik maa.ngii hai
na.e sire se samajhnaa pa.Daa hai duniyaa ko
ba.De jatan se sambhaalaa hai KHud ko mai.n ne nadiim
mujhe sambhalne me.n to chaaliis saal guzre hai.n
merii hayaat to vish-paan kii kathaa hai nadiim
mai.n zahr pii ke zamaane ko de sakaa amrit
na puuchh mai.n ne jo zahraaba-e-hayaat piyaa
magar huu.n dil se mai.n is ke liye sipaas-guzaar
larazte haatho.n se daaman KHuluus kaa na chhaTaa
bachaa ke rakkhii thii mai.n ne amaanat-e-tiflii
ise na chhiin sakii mujh se dast-burd-e-shabaab
ba-qaul shaa.er-e-mulk-e-fara.ng har bachcha
KHud apne ahd-e-javaanii kaa baap hotaa hai
ye kam nahii.n hai ki tiflii-e-rafta chho.D ga.ii
dil-e-hazii.n me.n ka.ii chhoTe chhoTe naqsh-e-qadam
mirii anaa kii rago.n me.n pa.De hu.e hai.n abhii
na jaane kitne bahut narm u.ngliyo.n ke nishaa.n
hanuuz vaqt ke be-dard haath kar na sake
hayaat-e-rafta kii zinda nishaaniyo.n ko fanaa
zamaana chhiin sakegaa na merii fitrat se
mirii safaa mire tahtush-shu.uur kii ismat
taKHaiyyulaat kii doshiizgii kaa radd-e-amal
javaan ho ke bhii be-laus tifl-vash jazbaat
syaanaa hone pe bhii ye jibillate.n merii
ye sarKHushii o Gam be-riyaa ye qalb-gudaaz
baGair bair ke an-ban Garaz se paak tapaak
Garaz se paak ye aa.nsuu Garaz se paak ha.nsii
ye dasht-e-dahr me.n hamdardiyo.n kaa sar-chashma
qubuuliyat kaa ye jazba ye kaa.enaat o hayaat
is arz-e-paak par iimaan ye ham-aaha.ngii
har aadmii se har ik KHvaab o ziist se ye lagaav
ye maa.n kii god kaa ehsaas sab manaazir me.n
qariib o duur zamii.n me.n ye buu-e-vataniyyat
nizaam-e-shams-o-qamar me.n payaam-e-hifz-e-hayaat
ba-chashm-e-shaam-o-sahar maamtaa kii shabnam sii
ye saaz o dil me.n mire naGma-e-analkaunain
har iztiraab me.n ruuh-e-sukuun-e-be-paayaa.n
zamaana-e-guzaraa.n me.n davaam kaa sargam
ye bazm-e-jashn-e-hayaat-o-mamaat sajtii hu.ii
kisii kii yaad kii shahnaa.iyaa.n sii bajtii hu.ii
ye ramaziiyat ke anaasir shu.uur-e-puKHta me.n
falak pe vajd me.n laatii hai jo farishto.n ko
vo shaa.erii bhii buluuG-e-mizaaj-e-tiflii hai
ye nashtariyyat-e-hastii ye is kii sheriyat
ye pattii pattii pe gulzaar-e-zindagii ke kisii
latiif nuur kii parchhaa.iyaa.n sii pa.Dtii hu.ii
baham ye hairat o maanuusiyat kii sargoshii
bashar kii zaat ki mahr-e-uluuhiyat ba-jabii.n
abad ke dil me.n ja.De.n maartaa hu.aa sabza
Gam-e-jahaa.n mujhe aa.nkhe.n dikhaa nahii.n saktaa
ki aa.nkhe.n dekhe hu.e huu.n mai.n ne apne bachpan kii
mire lahuu me.n abhii tak sunaa.ii detii hai.n
sukuut-e-huzn me.n bhii ghu.nghru.o.n kii jhankaare.n
ye aur baat ki mai.n is pe kaan de na sakuu.n
isii vadii.at-e-tiflii kaa ab sahaaraa hai
yahii hai.n marham-e-kaafuur dil ke zaKHmo.n par
unhii ko rakhnaa hai mahfuuz taa-dam-e-aaKHir
zamiin-e-hind hai gahvaara aaj bhii hamdam
agar hisaab kare.n das karo.D bachcho.n kaa
ye bachche hind kii sab se ba.Dii amaanat hai.n
har ek bachche me.n hai.n sad-jahaan-e-imkaanaat
magar vatan kaa hal-o-aqd jin ke haath me.n hai
nizaam-e-zindagii-e-hind jin ke bas me.n hai
ravayya dekh ke un kaa ye kahnaa pa.Dtaa hai
kise pa.Dii hai ki samjhe vo is amaanat ko
kise pa.Dii hai ki bachcho.n kii zindagii ko bachaa.e
KHaraab hone se Talne se suukh jaane se
bachaa.e kaun in aazurda honhaaro.n ko
vo zindagii jise ye de rahe hai.n bhaarat ko
karo.Do.n bachcho.n ke miTne kaa ik alamiyya hai
churaa.e jaate hai.n bachche abhii gharo.n se yahaa.n
ki jism to.D diye jaa.e.n un ke taaki mile
churaane vaalo.n ko KHairaat maagh-mele kii
jo is azaab se bach jaa.e.n to gale pa.D jaa.e.n
vo la.ante.n ki hamaare karo.Do.n bachcho.n kii
nadiim KHair se miTTii KHaraab ho jaa.e
vo muflisii ki KHushii chhiin le vo be-bargii
udaasiyo.n se bharii zindagii kii be-ra.ngii
vo yaasiyaat na jis ko chhu.e shu.aa-e-umiid
vo aa.nkhe.n dekhtii hai.n har taraf jo be-nuurii
vo TukTukii ki jo pathraa ke rah ga.ii ho nadiim
vo be-dilii kii ha.nsii chhiin le jo ho.nTo.n se
vo dukh ki jis se sitaaro.n kii aa.nkh bhar aa.e
vo gandagii vo kasaafat maraz-zada paikar
vo bachche chhin ga.e ho.n jin se bachpane un ke
hamii.n ne gho.nT diyaa jis ke bachpane kaa galaa
jo khaate-piite gharo.n ke hai.n bachche un ko bhii kyaa
samaaj phuulne-phalne ke de sakaa saadhan
vo saa.ns lete hai.n tahziib-kush fazaa.o.n me.n
ham un ko dete hai.n be-jaan aur Galat ta.aliim
milegaa ilm-e-jihaalat-numaa se kyaa un ko
nikal ke madraso.n aur universitiyyo.n se
ye bad-nasiib na ghar ke na ghaaT ke ho.nge
mai.n puuchhtaa huu.n ye ta.aliim hai ki makkaarii
karo.Do.n zindagiyo.n se ye be-panaah daGaa
nisaab aisaa ki mehnat kare.n agar is par
bajaa.e ilm jahaalat kaa iktisaab kare.n
ye ulTaa dars-e-adab ye sa.Dii hu.ii ta.aliim
dimaaG kii ho Gizaa yaa Gizaa-e-jismaanii
har ik tarah kii Gizaa me.n yahaa.n milaavaT hai
vo jis ko bachcho.n kii ta.aliim kah ke dete hai.n
vo dars ulTii chhurii hai gale pe bachpan ke
zamiin-e-hind hi.nDolaa nahii.n hai bachcho.n kaa
karo.Do.n bachcho.n kaa ye des ab janaaza hai
ham inqalaab ke KHatro.n se KHuub vaaqif hai.n
kuchh aur roz yahii rah ga.e jo lail-o-nahaar
to mol lenaa pa.Degaa hame.n ye KHatra bhii
ki bachche qaum kii sab se ba.Dii amaanat hai.n

Firaq Gorakhpuri
Nazm

muslim umma ka America se shikwa

kyuu.n gunahgaar banuu.n visa-faraamosh rahuu.n
kab talak KHauf-zada suurat-e-KHargosh rahuu.n
vaqt kaa ye bhii taqaaza hai ki KHaamosh rahuu.n
ham-navaa! mai.n ko.ii mujrim huu.n ki ruu-posh rahuu.n

Khalid Irfan
Nazm

diwali

ghuT gayaa a.ndhere kaa aaj dam akele me.n
har nazar Tahaltii hai raushnii ke mele me.n
aaj Dhuu.nDhne par bhii mil sakii na taariikii
maut kho ga.ii shaayad zindagii ke rele me.n
is tarah se ha.nstii hai.n aaj diip-maalaa.e.n
shoKHiyaa.n kare.n jaise saath mil ke baalaa.e.n
har galii na.ii dulhan har sa.Dak hasiina hai
har dehaat a.nguuThii hai har nagar nagiina hai
pa.D ga.ii hai KHatre me.n aaj yam kii yamraajii
maut ke bhii maathe par maut kaa pasiina hai
raat ke karuu.n mai.n hai aaj raat kaa ka.ngan
ik suhaaganii ban kar chhaa.ii jaatii hai jogan
qumqume jale ghar ghar raushnii hai paT paT par
le ke ko.ii ma.ngal-ghaT chhaa gayaa hai ghaT ghaT par
raushnii karo lekin farz par na aa.nch aa.e
ho nigaah siimaa par aur kaan aahaT par
hoshiyaar un se bhii jo nigaah phere hai.n
paak hii nahii.n tanhaa aur bhii luTere hai.n
chho.D apnii naapaakii yaa badal de apnii dhun
maut legaa yaa jiivan do me.n jis ko chaahe chun
ham hai.n krishn kii liilaa ham hai.n viir bhaarat ke
ham nakul hai.n ham sahdev ham hai.n bhiim ham arjun
daropdii se durghaTnaa duur kar ke chho.De.nge
ai samay ke duryodhan chuur kar ke chho.De.nge
qabr ho samaadhii ho sab ko jagmagaa.e.nge
dhuum se shahiido.n kaa sog ham manaae.nge
tum se kaam lenaa hai ham ko diip-maalaa.o
saare diip kii lau se dil kii lau ba.Dhaa.e.nge
sab se garmiyaa.n le kar siine me.n chhupaanaa hai
dil ko is divaalii se agnii bam banaanaa hai

Nazeer Banarasi
Nazm

urmila

ye raamaayan
jo hindustaan kii rag rag me.n shaamil hai
jise ik baalmiikii naam ke shaa.ir ne likkhaa thaa
bahut hii KHuubsuurat ek epic hai
fasaana-dar-fasaana baat ko.ii munjamid hai
emotion qaid hai.n laakho.n tarah ke
ka.ii kirdaar hai.n jo saahab-e-kirdaar lagte hai.n
magar ik baat hai
jo muddato.n se mujh ko khaltii hai
ki afsaane me.n
sab ke dard-o-Gam kaa zikr miltaa hai
magar vo ek la.Dkii
phuul se bhii sau gunaa naazuk
jo siitaa kii bahan thii
aur jis kii maa.ng me.n sinduur bharte vaqt hii
shrii raam ke bhaa.ii lakhan ne
aag kii maujuudgii me.n ye kahaa thaa
mai.n tum se zindagii-bhar ishq farmaayaa karuu.ngaa
aur saa.e kii tarah hii saath me.n har-dam rahuu.ngaa
jo la.Dkii ek pal me.n
saat janmo.n ke liye biivii lakhan kii ho ga.ii thii
vahii la.Dkii
jise sab urmilaa kah kar bulaate the
jo apne baap ke siine se lag kar vaqt-e-ruKHsat KHuub ro.ii
us ke ashko.n se
fasaane kaa ko.ii hissa kahii.n bhiigaa nahii.n hai
aur us ke dard kii ko.ii nishaanii tak nahii.n miltii
magar sach hai
ki raamaayan me.n vaisaa Gam-zada kirdaar ko.ii bhii nahii.n miltaa
mai.n us kirdaar se KHaasaa muta.assir huu.n
ki jab chaudah baras ke vaaste shrii-raam ko ban-vaas jaanaa thaa
aamaada the lakhan bhii bhaa.ii kii sevaa me.n jaane ko
zaraa saa bhii nahii.n sochaa
ki jis la.Dkii se puurii zindagii kaa rabt jo.Daa hai
ki jis ne KHuubsuurat nain me.n kuchh KHvaab bo.e hai.n
use kis ke sahaare chho.D kar vo jaa rahe hai.n
magar vo urmilaa ko chho.D kar bhaa.ii ke piichhe chal pa.De
ko.ii ta.Daptii aarzuu sii
urmilaa ke ho.nTh se gir kar
ka.ii Tuk.Do.n me.n niiche farsh par bikhrii hu.ii thii
zor se aavaaz nannhii pha.Dpha.Daa.ii
aur zaKHmii ho gayaa thaa pyaar kaa vo ek daaman
jo kabhii phuulo.n kii KHushbuu me.n bhigoyaa thaa
mahz kaa.nTe hii kaa.nTe har taraf the
ik imaarat ban.ne se pahle hii TuuTii thii
to ya.anii urmilaa chaudah baras tak
KHalvato.n ke mausamo.n se roz la.Dtii thii
sahelii saath thii
lekin sabhii KHushiyo.n ko vo ignore kartii thii
tamannaa.e.n agar baadal kii tarah ghirne lagtii thii.n
tamannaa.o.n kii baarish me.n nahaane se vo bachtii thii
churaa letii thii vo aa.nkhe.n
agar Galatii se ko.ii aa.ina taariif kar detaa
havaa.e.n jism me.n us ke agar siharan jagaa detii.n
to KHud ko apnii hii baa.nho.n me.n bhar kar
KHud se ye kahtii
lakhan aa.e.nge jaldii maan bhii jaa.o bahaaro.n
aur so jaa.o sitaaro.n tum
ki mujh ko raat din jagne kii aadat ho ga.ii hai
aur mohabbat ke liye ye umr kii daulat pa.Dii hai
magar jab KHvaahisho.n ke baa.ndh aksar TuuTte ho.nge
to phir sailaab me.n
kyaa kyaa na bah kar kho gayaa hogaa
hazaaro.n adh-khile armaan bhii murjhaa ga.e ho.nge
tabassum ne
kisii pal Das liyaa hogaa labo.n ko gar
to saaraa zahar mauqa dekh kar
us ke badan me.n raqs kartaa phir rahaa hogaa
kabhii koyal kii kaalii kuuk gar kaano.n me.n pahu.nchii ho
to shiryaano.n me.n bahtaa KHuun saaraa jam gayaa hogaa
paraa.e mard kaa ko.ii tasavvur chhuune se pahle
vo la.Dkii Dar ga.ii hogii
achaanak mar ga.ii hogii

Tripurari
Nazm

punjab

viir-singh aur amritaa-piriitam yahaa.n maahir yahaa.n
'arsh' 'aKHtar' 'josh' aur 'mahruum' se shaa.ir yahaa.n

Arsh Malsiyani
Nazm

maine bhi aam rakh diya

baiThii hu.ii hai aaj vo baalo.n kii vig utaar kar
goyaa sharaab phe.nk kar mez pe jaam rakh diyaa

Khalid Irfan
Nazm

yaaden

bhaarat ke viir sipaahii se
vo vaqt hai ab tak yaad mujhe

Sami Sultanpuri
Nazm

mera watan hindostan

meraa vatan hindostaa.n har raah jis kii kahkashaa.n
koh-e-giraa.n se kam nahii.n jis ke jiyaale naujavaa.n
ye viir-o-gautam kii zamii.n amn-o-ahinsaa kaa chaman
akbar ke KHvaabo.n kaa jahaa.n chishtii-o-naanak kaa vatan
sham.e.n hazaaro.n hai.n magar hai ektaa kii anjuman
tahziib kaa gahvaara hai.n ga.ng-o-jaman kii vaadiyaa.n
meraa vatan hindostaa.n
taariiKH kii azmat hai ye jamhuuriyat kii shaan hai
ruuhaaniyat kii ruuh hai sab maz.habo.n kii jaan hai
ye apnaa hindostaan hai ye apnaa hindostaan hai
haasil yahaa.n insaan ko har tarah kii aazaadiyaa.n
meraa vatan hindostaa.n
jab dil se dil milte ga.e miTte ga.e sab faasle
ye aaj kaa naGma nahii.n sadiyo.n ke hai.n ye silsile
sadiyo.n se mil kar hii ba.Dhe sab ahl-e-dil ke qaafile
ik saath uThtii hai yahaa.n aavaaz-e-naaquus-o-azaa.n
meraa vatan hindostaa.n
taariiKH ke is mo.D par ham farz se Gaafil nahii.n
qaabuu na jis par paa sake.n aisii ko.ii mushkil nahii.n
jis ko na ham sar kar sake.n aisii ko.ii manzil nahii.n
haa.n baa.nkpan kii shaan se hai kaarvaa.n apnaa ravaa.n
meraa vatan hindostaa.n

Rifat Sarosh
Nazm

pam ke peD se guftugu

miraa jaal KHaalii
magar dil masarrat ke ehsaas se bhar gayaa
tum usii baa.nkpan se
usii tarha
ganjii pahaa.Dii par
apnii harii vig lagaa.e kha.De ho
ye hai.at-kazaa.ii jo bhaa.ii
to nazdiik se dekhne aa gayaa huu.n

Saqi Faruqi
Nazm

holi

mohtasib mast hai aur hazrat-e-vaa.is sarshaar
mai-kada ban gayaa hai aish-nagar holii me.n

Zareef Dehlvi
Nazm

jyamiti

jiivan bhii jyaamitii kii tarah
puurak aur anuupuurak kono.n se hotaa hai sanchaalit
kuchh paka.Dte hai.n to chhuuT jaataa hai bahut kuchh
kuchh chhuuTtaa hai to mil jaataa hai kuchh
apne hisse kaa maan hii nahii.n miltaa
yahaa.n paanaa hotaa hai apmaan bhii
jo khaataa hai kaT.hal kaa ko.aa
use hii pachaanaa hotaa hai biij aur muusal bhii
keval devtaa.o.n ke hisse aa.e
vish kaa paan karte hai.n shiv
manushyya ko KHud hii piinaa hotaa hai
apne hisse kaa vish

Sudhanshu Firdaus
Nazm

waba ke dinon mein 6

haath milaane kii rasm
tab iijaad hu.ii
jab hathiyaar phe.nknaa
siikhaa jaa chukaa thaa
aur baGlo.n me.n chhuriyaa.n
aam hone lagii thii.n
zindagiyo.n me.n badlaav aayaa
jaapaaniyo.n ne duur se jhuk kar salaam kahnaa siikhaa
dushman aur dost se munaasib faasla
hamesha banaa.e rakkhaa
atomii taaqat se tabaah kiye ga.e
zindagiyo.n me.n badlaav aayaa
ahal-e-faaras ne chuuhe se
taa.uun kaa ta'alluq pahchaanaa
na.ash ko kaaT kar a.azaa kaa naqsha banaayaa
pahlii jarraahii kii
aur murdo.n kii be-hurmatii kii paadaash me.n
buu-alii-siinaa ko sazaa dii
zindagiyo.n me.n badlaav aayaa
francisiyo.n ne chaaliis din kaa quarantine iijaad kiyaa
bandar-gaaho.n par biimaariyo.n kaa visa cancel hu.aa
sehat-mand insaano.n ko visa milne lagaa
zindagiyo.n me.n badlaav aayaa
yahuud kii manDii me.n
sone ke sikke insaano.n se kam pa.D ga.e
kaaGaz kaa note iijaad hu.aa
aur phir sab adyaan kii
e'tibaar kii aayaat ko
noTo.n par likh diyaa gayaa
zindagiyo.n me.n badlaa.o aayaa
agle na.e badlaa.o ke liye
stage tayyaar karne me.n
vabaa kii madad karo

Arsalan Ahmad
Nazm

ye kashmir hamara hai

is ke viir bahaadur beTe
ban jaa.e.n taqdiir ke heTe
daulat is kii Gair sameTe

Arsh Malsiyani
Nazm

bhaarat ke wir sipahi

ham hai.n bahaadur yodhdhaa anthak
desh kii siimaa.o.n ke rakshak
jaate hai.n shatru ke ghar tak
bhaaratvarsh ke sachche sevak
detii hai duniyaa ye gavaahii
ham bhaarat ke viir sipaahii
ta.D ta.D gole barsaa kar
khaT khaT khaT khaT tank chalaa kar
hath golo.n ko kaam me.n laa kar
banduuqo.n kii maar dikhaa kar
laate hai.n shatru pe tabaahii
ham bhaarat ke viir sipaahii
gaa.e.n viiro.n kii gaathaa.e.n
janm-bhuumii kaa qarz chukaa.e.n
vijay pataakaa jab lahraa.e.n
jai jaykaar kaa naad bajaa.e.n
vijay kii manzil ke sab raahii
ham bhaarat ke viir sipaahii
dhoke kii har baat bhii jiite.n
dushman kii har ghaat bhii jiite.n
saa.njh bhii aur parbhaat bhii jiite.n
din bhii jiite.n raat bhii jiite.n
kaisaa ujaalaa kaisii siyaahii
ham bhaarat ke viir sipaahii
bhay se mai.n ghabraa nahii.n saktaa
ko.ii saamne aa nahii.n saktaa
ko.ii hame.n bahkaa nahii.n saktaa
dushman chhup kar jaa nahii.n saktaa
aisii hamaarii tez nigaahii
ham bhaarat ke viir sipaahii
dushman ke sar kaTe pa.De hai.n
jahaa.n a.De hai.n DaT ke a.De hai.n
jhanDe ranbhuumii me.n ga.De hai.n
desh prem me.n jam ke la.De hai.n
ham ne desh se priit nibaahii
ham bhaarat ke viir sipaahii

Arsh Malsiyani
Nazm

wasiyyat

iksaTh saal guzarte hai.n
afGaano.n kii ik bastii me.n laDDan-KHaa.n ne janm liyaa thaa
daaroGa ke beTe the vo naanaa un ke maulaanaa the
khaataa-piitaa ghar thaa un kaa
laDDan-KHaa.n achchhe bachche the bilkul vaise jaise tum ho
un ke ghar vaale bhii un se utnii hii ulfat karte the jitnii ham tum se karte hai.n
jab vo tho.De ba.De hu.e to
naanaa un ko maktab me.n daaKHil kar aa.e
laDDan-KHaa.n ne pa.Dhnaa siikhaa
likhnaa siikhaa la.Dnaa siikhaa aaKHir vo afGaanii bhii the
chaudah pa.ndrah barso.n hii me.n laDDan-KHaa.n ko ye be-fikrii raas na aa.ii
naanaa aur abbuu dono.n ne laDDan-KHaa.n se kaTTii kar lii
marnaa jiinaa tum kyaa samjho
tab majbuuran
laDDan-KHaa.n ne pa.Dhnaa chho.Daa
apne ghar se naanaa jo.Daa
Tuition karte lashTam-pashTam apne ghar kaa KHarch chalaate
un kii ammaa.n ko raaja se tho.Dii sii pension miltii thii kaam kisii suurat chal jaataa
maa.n ne un kii shaadii kar dii
lekin biivii KHush-qismat thii jis ne jald hii ka.ii kar lii
guDDuu beTe
honii ho kar hii rahtii hai
maktab me.n rah kar laDDan-KHaa.n Gazle.n kahnaa siikh chuke the
afGaanii hone ke naate logo.n se Darte bhii nahii.n the
apnii Gazlo.n me.n nazmo.n me.n tiikhii tiikhii baate.n kahte logo.n par phabtii kaste the
apne ho.n yaa Gair sabhii par
sach kahne me.n sach likhne me.n baak na karte ye to ek nasha hotaa hai
bas phir kyaa thaa apne Gair sabhii un ke dushman ban baiThe
Tuition chhuuTe vii-menii kii vii-menii se munshii-giirii
dar dar bhaTke baaz na aa.e
ka.Dvii tiikhii Gazle.n nazme.n kah kah kar ambaar lagaayaa
itne se bhii chal saktaa thaa
lekin vo to raaja-jii par phabtii kas kar ammii kii pension le Duube
bolo un kii kyaa aTkii thii raaja jo kuchh bhii kartaa thaa laDDan-KHaa.n se kyaa matlab thaa
ammii bechaarii is Gam me.n ku.Dh ku.Dh kar pardes sidhaarii.n yuu.n samjho bas ruuTh ga.ii.n vo laDDan-KHaa.n se
lekin beTaa marne me.n paise lagte hai.n laDDan-KHaa.n ne ghar bhii bechaa
aage piichhe ko.ii nahii.n thaa ab to laDDan-KHaa.n khul-khele
sachchii sachchii baate.n kah kar ka.Dvii tiikhii Gazle.n likh kar zahr-aaluuda nazme.n pa.Dh kar
ek sire se sab logo.n ko dushman-dar-dushman kar baiThe
saarii duniyaa dushman ho to laDDan-KHaa.n bachte bhii kaise
sab ne mil kar gheraa Daalaa
aage dushman piichhe dushman daa.e.n dushman baa.e.n dushman uupar dushman niiche dushman
laDDan-KHaa.n me.n aql nahii.n thii ab bhii chiknii-chup.Dii baate.n kar ke chupke se bach lete
laDDan-KHaa.n ne apnii Gazle.n apnii nazme.n saarii chiize.n chho.D kar
chupke se mar jaane hii ko behtar jaanaa

Muzaffar Hanfi
Nazm

front-page

kisii ne aaj phir masjid pe bam phe.nkaa
namaazii KHuun me.n Galtaa.n
scope achchhaa hai
ye puuraa quarter page le legaa
kisii mazduur par chhat aa girii hai
aur kisii ne KHud-kushii kii hai
kisii VIP ne chhii.nk maarii hai
ye sah column
vo do column
yahaa.n par cartoon aa jaa.egaa
aur laash us kone me.n fiT hogii
ye baaqii ishtihaaro.n kii jagah maKHsuus rakkhii hai
mubaarakbaad hai aur Sale hai
aur ek tender hai
KHushii kaa raaz hai
barqii clinic hai
chalo sab paste up kar do
mujhe ab duusraa saf.ha dikhaa do

Hasan Shahnawaz Zaidi
Nazm

hindostan

har maz.hab kii uu.nchii shaan
jis se banaa hai desh mahaan
sab ko detaa prem kaa daan
prem pyaar kii hai ye khaan
hinduu muslim sikh iisaa.ii
bodh aur jainii kii hai aan
paaTh yahii hai pahlaa bas
ban jaa.o saare insaan
viir bano ai pyaare bachcho
tum bhaarat kii ho santaan
kisii ko ko.ii kashT nahii.n
sab so.e hai.n chaadar taan
har maz.hab kaa aadar kartaa meraa bhaarat hindostaan

Betab Alipuri
Nazm

sarhaden

ko.ii to ho is jahaa.n me.n aisaa
ki jis ke bas me.n ho saarii duniyaa
kii sarhado.n kii sabhii lakiire.n
jahaa.n ke naqshe se ek pal me.n
kisii jatan se miTaa ke rakh de
ye aahanii KHaar-daar taare.n
zamiin ke saath dil ke rishte bhii baa.nTtii hai.n
ka.ii dilo.n me.n taviil arse se chubh rahii hai.n
ko.ii to un ko ukhaa.D phe.nke
ko.ii to ho jo tamaam duniyaa
ko ek KHitte kii shakl de de
agar ko.ii mo.ajiza dikhaa de
to saare insaan jab bhii chaahe.n
phir apne pyaaro.n se mil sake.nge
baGair visa kii bandisho.n ke
sahuulato.n se masarrato.n se
phir is ke badle agar vo mujh se
mirii mataa-e-hayaat maa.nge
to ek pal ko bhii mai.n na sochuu.n
KHushii KHushii us ko daan kar duu.n

Shahnaz Parveen Shazi
Nazm

mukalima

aadaab aadaab
tasliimat tasliimat
mizaaj-e-aqdas
fazl-e-rabbii hai
namaaze.n pa.Dhte hai.n
faraaGato.n se Darte hai.n
allaah KHair-o-barkat de
sunaa hai aap ne na.ii gaa.Dii
KHariid lii
jii haa.n mercedes hai
allaah ke fazl se
green card holder bhii hai.n
magar aap kaa vo communism
aap to KHaase radical the
shukr baari-e-ta.aalaa kaa
jis ne a.ndhero.n me.n
raushnii dikhaa.ii
allaah ba.Daa baadshaah hai
los angeles ke posh qabristaan me.n
jagah book karaa dii hai
aap kaa kyaa iraada hai
fitna-o-fasaad se
najaat milii hai na milegii
kyaa aap ko visa bhijvaa.e.n
peshkash kaa shukriya
magar apne desii qabristaan jaisii
taaza havaa.e.n america me.n kahaa.n
aur phir apne yahaa.n booking kii
bhii zaruurat nahii.n
mai.n to kahtaa huu.n qibla
aap bhii yahii.n ruk jaa.e.n
umr kii aaKHirii kagaar par kha.De hai.n
mai.n nahii.n samajhtaa ki bulaavaa aane me.n
ko.ii der hogii
qiil-o-qaal se kaam na le.n
ek duusre kaa haath thaam le.n
qabristaan kii harii-bharii fazaa.o.n me.n
KHuub guzregii
jo mil baiThe.nge
diivaane do

Faiyaz Rifat
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now