Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ".phad"

Nazm MATCHES FOR ".phad"

Nazm

hoga yun hi

mai.n tumhe.n ek KHat likhuu.ngaa
magar use Daak me.n nahii.n Daaluu.ngaa
mai.n banaa.uu.ngaa us kii ek naav
jis pe savaar kar ke apnii soch
Thel duu.ngaa barsaat ke paanii me.n
tumhaarii or
tum bhii ek KHat likhnaa
javaabii
magar use Daak me.n mat Daal denaa
naav pahu.nchne se pahle hii
jab Duub jaa.egii
tum tak nahii.n pahu.nch paa.egii
merii soch
tum jhujhlaanaa mujh par
aur Gusse me.n aa kar
phaa.D denaa us KHat ko
jo tum ne abhii nahii.n likhaa

Irshad Kamil
Nazm

nashat-e-umid

ai mirii ummiid merii jaa.n-navaaz
ai mirii dil-soz merii kaarsaaz
merii sipar aur mire dil kii panaah
dard-o-musiibat me.n mirii takiya-gaah
aish me.n aur ranj mai.n merii shafiiq
koh me.n aur dasht me.n merii rafiiq
kaaTne vaalii Gam-e-ayyaam kii
thaamne vaalii dil-e-naakaam kii
dil pa pa.Daa aan ke jab ko.ii dukh
tere dilaase se milaa ham ko sukh
tuu ne na chho.Daa kabhii Gurbat me.n saath
tuu ne uThaayaa na kabhii sar se haath
jii ko ho kabhii agar usrat kaa ra.nj
khol diye tuu nai qanaa.at ke ganj
tujh se hai mohtaaj kaa dil be-hiraas
tujh se hai biimaar ko jiine kii aas
KHaatir-e-ranjuur kaa darmaa.n hai tuu
aashiq-e-mahjuur kaa iimaa.n hai tuu
nuuh kii kashtii kaa sahaaraa thii tuu
chaah me.n yuusuf kii dil-aaraa thii tuu
raam ke ham-raah cha.Dhii ran me.n tuu
paa.nDav ke bhii saath phirii ban me.n tuu
tuu ne sadaa qais kaa bahlaayaa dil
thaam liyaa jab kabhii ghabraayaa dil
ho gayaa farhaad kaa qissa tamaam
par tire fiqro.n pe rahaa KHush mudaam
tuu ne hii raa.njhe kii ye ba.ndhvaaii aas
hiir thii furqat me.n bhii goyaa ki paas
hotii hai tuu pusht pe himmat kii jab
mushkile.n aasaa.n nazar aatii hai.n sab
haath me.n jab aa ke liyaa tuu ne haat
saat samundar se guzarnaa hai baat
saath milaa jis ko tiraa do qadam
kahtaa hai vo ye hai arab aur ajam
gho.De kii lii apne jahaa.n tuu ne baag
saamne hai tere gayaa aur praag
azm ko jab detii hai tuu mel jast
gumbad-e-garduu.n nazar aataa hai past
tuu ne diyaa aa ke ubhaaraa jahaa.n
samjhe ki muTThii me.n hai saaraa jahaa.n
zarre ko KHurshiid me.n de khapaa
bande ko allaah se de tuu milaa
dono.n jahaa.n kii hai ba.ndhii tujh se la.D
diin kii tuu asl hai duniyaa kii ja.D
nekiyo.n kii tujh se hai qaa.em asaas
tuu na ho to jaa.e.n na nekii ke paas
diin kii tujh bin kahii.n pursish na ho
tuu na ho to haq kii parastish na ho
KHushk thaa bin tere daraKHt-e-amal
tuu ne lagaa.e hai.n ye sab phuul phal
dil ko lubhaatii hai kabhii ban ke huur
gaah dikhaatii hai sharaab-e-tahuur
naam hai sidra kabhii tuubaa tiraa
roz niraalaa hai tamaashaa tiraa
kausar o tasniim hai yaa salsabiil
jalve hai.n sab tere ye be-qaal-o-qiil
ruup hai.n har panth me.n tere alag
hai kahii.n firdaus kahii.n hai sovarg
chhuuT ga.e saare qariib aur ba.iid
ek na chhuuTii to na chhuuTii umiid
tere hii dam se kaTe jo din the saKHt
tere hii sadqe se milaa taaj-o-taKHt
KHaakiyo.n kii tujh se hai himmat buland
tuu na ho to kaam ho.n duniyaa ke band
tujh se hii aabaad hai kaun-o-makaa.n
tuu na ho to hai bhii barham jahaa.n
ko.ii pa.Dtaa phirtaa hai bahr-e-ma.aash
hai ko.ii iksiir ko kartaa talaash
ik tamannaa me.n hai aulaad kii
ek ko dil-daar kii hai lau lagii
ek ko hai dhan jo kuchh haath aa.e
dhuum se aulaad kii shaadii rachaa.e
ek ko kuchh aaj agar mil gayaa
kal kii hai ye fikr ki khaa.e.nge kyaa
qaum kii bahbuud kaa bhuukaa hai ek
jin me.n ho un ke liye anjaam-e-nek
ek ko hai tishnagii-e-qurb-e-haq
jis ne kiyaa dil se jigar tak hai shaq
jo hai Garaz us kii na.ii justujuu
laakh agar dil hai.n to laakh aarzuu
tujh se hai.n dil sab ke magar baaG baaG
gul ko.ii hone nahii.n paataa charaaG
sab ye samajhte hai.n ki paa.ii muraad
kahtii hai jab tuu ki ab aa.ii muraad
va.ada tiraa raast ho yaa ho daroG
tuu ne diye hai.n use kyaa kyaa faroG
va.ade vafaa kartii hai go chand tuu
rakhtii hai har ek ko KHursand tuu
bhaatii hai sab ko tirii lait-o-la.al
tuu ne kahaa.n siikhii hai ye aaj kal
talKH ko tuu chaahe to shiirii.n kare
bazm-e-azaa ko tarab-aagii.n kare
aane na de ranj ko muflis ke paas
rakhe Ganii us ko rahe jis ke paas
yaas kaa paatii hai jo tuu kuchh lagaav
saik.Do.n kartii hai utaar aur cha.Dhaa.o
aane nahii.n detii dilo.n par hiraas
TuuTne detii nahii.n taalib kii aas
jin ko mayassar na ho kamlii phaTii
KHush hai.n tavaqqo.a pe vo zar-baft kii
chaTnii se roTii kaa hai jin kii banaav
baiThe pakaate hai.n KHayaalii polaav
paa.nv me.n juutii nahii.n par hai ye zauq
gho.Daa jo sabza ho to niilaa ho tauq
faiz ke khole hai.n jahaa.n tuu ne baab
dekhte hai.n jho.npa.De mahlo.n ke KHvaab
tere karishme hai.n Gazab dil-fareb
dil me.n nahii.n chho.Dte sabr-o-shakeb
tujh se muhavvis ne jo shuuraa liyaa
phuu.nk diyaa kaan me.n kyaa jaane kyaa
dil se bhulaayaa zan o farzand ko
lag gayaa ghun naKHl-e-baroma.nd ko
khaane se piine se hu.aa sard jii
aisii kuchh iksiir kii hai lau lagii
diin kii hai fikr na duniyaa se kaam
dhun hai yahii raat din aur sub.h shaam
dho.nknii hai baiTh ke jab dho.nknaa
shah ko samajhtaa hai ik adnaa gadaa
paise ko jab taav pe detaa hai taav
puuchhtaa yaaro.n se hai sone kaa bhaav
kahtaa hai jab ha.nste hai.n sab dekh kar
rah ga.ii ik aa.nch kii baaqii kasar
hai isii dhu.nd me.n vo aasuuda-haal
tuu ne diyaa aql pe parda saa Daal
tol kar gar dekhiye us kii KHushii
ko.ii KHushii is ko na pahu.nche kabhii
phirte hai.n mohtaaj ka.ii tiira-baKHt
jan ke pairo.n me.n thaa kabhii taaj-o-taKHt
aaj jo bartan hai.n to kal ghar karo
maltii hai mushkil se inhe.n naan-e-jau
taire sivaa KHaak nahii.n in ke paas
saarii KHudaa.ii me.n hai le de ke aas
phuule samaate nahii.n is aas par
saahib-e-aalam unhe.n kahiye agar
khaate hai.n is aas pa qasme.n ajiib
jhuuTe ko ho taKHt na yaa-rab nasiib
hotaa hai naumiidiyo.n kaa jab hujuum
aatii hai hasrat kii ghaTaa jhuum jhuum
lagtii hai himmat kii kamar TuuTne
hausla kaa lagtaa hai jii chhuuTne
hotii hai be-sabrii o taaqat me.n ja.ng
arsa-e-aalam nazar aataa hai ta.ng
jii me.n ye aataa hai ki sam khaa.iye
phaa.D ke yaa kap.De nikal jaa.iye
baiThne lagtaa hai dil aave kii tarah
yaas Daraatii hai chhalaave kii tarah
hotaa hai shikva kabhii taqdiir kaa
u.Dtaa hai KHaaka kabhii tadbiir kaa
Thantii hai garduu.n se la.Daa.ii kabhii
hotii hai qismat kii ha.nsaa.ii kabhii
jaataa hai qaabuu se aaKHir dil nikal
kartii hai in mushkilo.n ko tuu hii hal
kaan me.n pahu.nchii tirii aahaT jo hai.n
raKHt-e-safar yaas nai baa.ndhaa vahii.n
saath ga.ii yaas ke pazhmurdagii
ho ga.ii kaafuur sab afsurdagii
tujh me.n chhupaa raahat-e-jaa.n kaa hai bhed
chho.Diyo 'haalii' kaa na saath ai umiid

Altaf Hussain Hali
Nazm

ali-bin-muttaqi roya

puraanii baat hai
lekin ye anhonii sii lagtii hai
alii-bin-muttaqii masjid ke mimbar par kha.Daa
kuchh aayato.n kaa vird kartaa thaa
jum.a kaa din thaa
masjid kaa sehn
allaah ke bando.n se KHaalii thaa
ye pahlaa din thaa masjid me.n ko.ii aabid nahii.n aayaa
alii-bin-muttaqii royaa
muqaddas aayato.n ko maKHmalii.n juz-daan me.n rakkhaa
imam-e-dil-giraftaa
niiche mimbar se utar aayaa
KHalaa me.n duur tak dekhaa
fazaa me.n har taraf phailii hu.ii thii
dhund kii kaa.ii
hu.aa phir yuu.n
mu.nDero.n gumbado.n par an-ginat par pha.D pha.Daa.e
kaasnii kaale kabuutar
sehn me.n niiche utar aa.e
vazuu ke vaaste rakkhe hu.e loTo.n par
ik ik kar ke aa baiThe
imam-e-dil-giraftaa
phir se mimbar par cha.Dhaa
juz-daan ko kholaa
safo.n par ik nazar Daalii
ye pahlaa din thaa masjid me.n
vazuu kaa hauz KHaalii thaa
safe.n ma.amuur thii.n saarii!

Zubair Rizvi
Nazm

apahij gaDi ka aadmi

me.n kab se zamii.n par zamii.n kii tarah chal rahaa huu.n
ye diivaana andhaa safar kab kahaa.n jaa ke chho.Degaa mujh ko?
mai.n is zindagii kii bahut sii bahaare.n Gizaa kii tarah khaa chukaa huu.n
pahan o.Dh kar pairahan kii tarah phaa.D dii hai.n
me.n resham kaa kii.Daa huu.n ko.e me.n chhap jaataa huu.n Dar ke maare
isii ko.e ko khaataa rahtaa huu.n aur kaaT kar is se aataa huu.n baahar
aur apne jiine kaa maqsad sabab jaan.naa chaahtaa huu.n
miraa dil KHudaa kii razaa Dhuu.nDhtaa phir rahaa hai
miraa jism lazzaat kii justujuu me.n lagaa hai
guzargaah-e-shaam-o-sahar par kahii.n ek din mai.n ugaa thaa
nabaataat kii tarah jiitaa huu.n is kaargaah-e-jahaa.n me.n
na ehsaas iimaan iiqaan ko.ii
na duniyaa me.n shaamil na KHud apnii pahchaan ko.ii
gunah aur jahannam savaab aur jannat?
ye kyuu.n hai ki be-muzad kuchh bhii nahii.n mil sakaa hai
na kal mil sakegaa
asaatiir farmaa.n-ravaa.on ke ahkaam aur suufiyaa kii karaamat ke qisse
payambar kii dil-soziyo.n ke mazaahir
qalam-band hai.n sab!
unhe.n ham ne ta.aviiz kii tarah apne galo.n me.n hamaa.il kiyaa hai
inhe.n ham ne tah-KHaano.n kii koTharii me.n muqaffal kiyaa hai
jahaa.n la.Dkha.Daate hai.n in kii madad le ke chalte hai.n aage
magar raasto.n kaa ta.ayyun nahii.n hai!

Akhtarul Iman
Nazm

chautha aadmi

baiThe baiThe yuu.nhii qalam le kar
mai.n ne kaaGaz ke ek kone par
apnii maa.n
apne baap ke do naam
ek gheraa banaa ke kaaT diye
aur
is gol daa.ere ke qariib
apnaa chhoTaa saa naam Taa.nk diyaa
mere uThte hii, mere bachche ne
puure kaaGaz ko le kar phaa.D diyaa!

Nida Fazli
Nazm

death certificate par likhi ek nazm

us maa.n ko sangsaar karnaa chaahtii huu.n
jis ne beTii ke KHvaab phaa.D kar
beTe kii kitaabo.n par kavar cha.Dhaa.e
aur beTii ko badbuu-daar shauhar dete hu.e
beTe se aatii koThe kii KHushbuu
nazar-andaaz kar dii

Sidra Sahar Imran
Nazm

an-paDh gunge ka rajaz

KHaamoshii meraa lashkar hai
lafzo.n kii daldal
aur us me.n palne vaalii jo.nke.n
ye muta.affin aavaaze.n
merii yalGaar ke aage saabit-qadam rahe.ngii?
kyaa tum vaaqa.ii aisaa samajhte ho
ki tumhaare maidaan itne faraaKH hai.n
ki mere asp-e-asiil ko thakaa de.nge
tumhaare samundar itne mavvaaj hai.n
ki meraa rizq ulaT de.nge
aur tumhaare pahaa.D itne sa.nglaaKH hai.n
ki meraa jhanDaa na thaame.nge

Ahmad Javaid
Nazm

sahaara

os kii buu.ndo.n me.n namkiinii nahii.n
phuul gar chaahe ki apnii raat ke anjaam ko
ek hii lamhe me.n yaksar jaan le
us ko laazim hai havaa ke sard jho.nke se kahe
jaa.o us ke aa.nsu.o.n ko chuum lo
aa.nsu.o.n ko chuum kar mahsuus ye hone lagaa
ek aa.nsuu ek buu.nd
ek pal me.n ek bahr-e-niilguu.n
ban ke chhaa jaataa hai tanhaa naav par
kyaa hu.aa gar os kii buu.ndo.n me.n namkiinii nahii.n
os kii buu.ndo.n me.n namkiinii agar hotii to kyaa
phuul is me.n tairte hii tairte
apnii manzil tak pahu.nch saktaa na thaa ik naav ban saktaa na thaa
phuul kyaa hai tuu ki mai.n
phuul mai.n huu.n tuu nahii.n
tuu to bahr-e-niilguu.n me.n ek tanhaa naav hai
bahtii jaatii hai zaraa ruktii nahii.n
tujh ko ye ma.aluum kab hai os kii buu.ndo.n me.n namkiinii nahii.n
tuu faqat baato.n ke bal par apnii raato.n kii rasiilii chhaa.nv me.n
ye samajhtii hai ki har lamha achaanak phail kar
shash-jihat par dil dha.Dakte hii me.n yuu.n chhaane lagaa
jaise ik Thahraav furqat kii a.ndherii raat me.n
dard ke ham-dosh lazzat ko bhii uksaataa rahe
le piyaala thaam le
is me.n baaqii hai abhii zahr-e-Gam
jis ko pii kar mai.n bhii apnii zindagii se bhaagtaa phirtaa rahaa
guftuguu se faa.eda kuchh bhii nahii.n lekin mujhe
har ishaaraa daam hai alfaaz kaa
jis me.n taa.ir pha.D-pha.Daate chiiKHte
chiiKHte hii chiiKHte KHaamosh ho jaate hu.e
jaan lete hai.n ki ab vo raat hii darmaa.n banegii dard ke ambaar kaa
jis ke bikhre daaman-e-sad-chaak me.n
phuul kii bhiigii hu.ii pattii pe buu.nde.n os kii
saath laatii hai.n gudaaz-e-ruuh kii halkii malaahat ko jise
chakh ke kahtii hai zabaa.n kyuu.n ab kaho
os kii buu.ndo.n me.n namkiinii nahii.n
dekh duur
ek tanhaa naav bahr-e-niilguu.n pe rafta rafta ba.Dhte ba.Dhte aa rahii hai paas dekh
duur kii chiize.n bhii yuu.n
baato.n baato.n me.n qariib aa jaa.e.ngii kyaa thii KHabar
dekh to
rishta-e-ahd-e-taKHayyul band thaa
khulne lagaa
rafta rafta ik na.ii suurat nazar aane lagii
ik na.ii suurat magar kuchh naqsh to maanuus hai.n
aur har lamhe se har aa.nsuu se qasr-e-niilguu.n istaada hai
duur us kii chhat me.n do faanuus hai.n

Meeraji
Nazm

rihai

sunaa hai ki buu.Dhii havelii me.n har shab
bhaTaktii hai ik ruuh jis ke badan par
puraanii rivaayaat ke
khokhle-pan kaa malbuus hai
jis kii peshaanii ke zaKHm se
KHuun bahtaa hai maazii kii tahziib kaa
aur vo chiiKHtii hai
ki buu.Dhii havelii se us ko nikaalo
puraanii rivaayaat ke khokhle-pan ke malbuus ko phaa.D Daalo
suno shahr vaalo

Kafeel Aazar Amrohvi
Nazm

apne apne suraKHon ka Dar

''na.ii sa.Dko.n ke naqshe'' kaar-KHaane
uu.nche uu.nche pul mire mansuube dekho aur kitaabo.n me.n pa.Dho''
us ne kahaa... ''mere badan par haath bhii phero
magar suuraaKH se u.nglii alag rakkho''
magar us ke badan par har taraf suuraaKH hii suuraaKH hai.n
u.nglii alag rakkho!
to kyaa mai.n u.ngliyo.n ko to.D duu.n?
mai.n u.ngliyo.n ko to.D duu.n?
phir kaun tere husn kii tafsiir likkhegaa? bataa!
phir ye tasalsul raat din kaa
chaa.nd suuraj kaa akele mausamo.n kaa
mas.alo.n aur mushkilo.n kaa
kaise TuuTegaa? bataa!
us ne hame.n ek duusre se chhup ke rahne ke liye
kap.De diye aur KHuubsuurat ghar diye
aur band kamro.n me.n zamiino.n aasmaano.n kii sabhii sachchaa.iyaa.n kahne aur un
par bahs karne aur mansuube banaane kii khulii aazaadii dii
yaaro! chalo sa.Dko.n pe na.nge sair karne jaa.e.n
shaayad rasm chal nikle
magar mere qabiile kaa ko.ii bhii mard
kap.De phaa.D kar ghar ko jalaa ke
na.ngii na.ngii baate.n kahne ke liye baahar na niklaa
sab ko apne apne suuraaKHo.n kaa Dar thaa

Abbas Athar
Nazm

rani

sar par moTii chaadar o.Dhe
haatho.n me.n
apne se bhaarii bachcha le kar
saa.nvlii ra.ngat vaalii raanii
chaltii bus me.n
miiThii sau.nf-supaarii bechne aatii hai
aur bas me.n chaaro.n jaanib baiThe logo.n kii ye bhuukii nazre.n
us ke kap.De phaa.D ke jism ke andar tak
utrii jaatii hai.n
lekin sab se be-parvaa vo saa.nvlii ra.ngat vaalii raanii
ek ruupa.e me.n ek supaarii kii aavaaze.n bechtii hai
aur seat pe baiThne vaale kutte
maas pe bhau.nkne vaale kutte
aksar us ko
chhuu lene ko sau.nf-supaarii bhii khaate hai.n
jab ko.ii us ke haath ko chhuu le
jaane kyo.n vo
bachche ko ek bosa de kar
apne sar se chaadar khii.nch ke apnaa jism chhapaa letii hai
us paagal la.Dkii ne jaane kitne bojh uThaa rakkhe hai.n
us bachche kaa us chaadar kaa
un bhuukii kaalii nazro.n kaa
lekin phir bhii
raat ko us la.Dkii ne us se ziyaada bojh uThaanaa hai
aur KHud se bhaarii us bachche ke bhaarii baap ko bahlaanaa hai

Atif tauqeer
Nazm

yakum january

phir ik
sard ThiThuraa hu.aa din
dabe paa.nv chaltaa hu.aa
balcony se
kamre me.n aayaa
mujhe apne bistar me.n
dubkaa hu.aa dekh kar
muskuraayaa
aur aaraam-kursii pe baiThaa
gha.Dii god me.n rakh ke
kaa.nTaa ghumaayaa
thake paa.nv chaltaa hu.aa
balcony ko lauTaa
to chaaro.n taraf se
a.ndhero.n ne ba.Dh ke
use phaa.D khaayaa

Mohammad Alvi
Nazm

wahshat

mujhe vahshat kaa matlab kab pata thaa aaj se pahle
kabhii aisaa hu.aa ye dil zaraa ghabraa gayaa
to kah diyaa ki dil bahut vahshat-zada hai
aur aisaa bhii hu.aa
gar saKHt lahje me.n kisii ne baat kii
yaa baat rad kar dii
na ko.ii kaam ho yaa na nii.nd aa.ii
to phir bhii kah diyaa vahshat bahut hai
mujhe ye lafz achchhaa hii bahut lagtaa thaa
par aise nahii.n dekho
ki mai.n ne us kaa matlab aaj samjhaa hai
mai.n gum-sum to nahii.n chup huu.n
mirii saarii tavajjoh mere haatho.n par lagii hai
mere naaKHun yuu.n hathelii me.n khube hai.n
dil ye kahtaa hai
ki merii u.ngliyaa.n is jild ke niiche dabe
ik iztiraabii se KHalaa ko pur kare.n
yaa phaa.D Daale.n ab
ka.ii lahre.n sii bechainii se yuu.n karvaT badaltii hai.n
miraa dil chaahtaa hai ye
ki mai.n khii.nch kar
ajab vahshat ke maqnaatiis se ju.D kar
KHud apne kaa.npte haatho.n kii poro.n se nikal jaa.uu.n
magar mai.n apne siine se ubhar kar
aa aTaktii huu.n halq me.n
KHushk hai jo pyaas se
un aa.nsu.o.n se
jo nahii.n bante
yahaa.n mai.n kahaa.n jaa.uu.n
na aage aa sakuu.n mai.n aur na vaapas jaa sakuu.n mai.n ab
mai.n jaise band huu.n shiishe ke Dabbe me.n
mai.n apne KHvaab se apne halq se
jis qadar koshish karuu.n
baahar nikalne kii ubharne kii
to meraa saa.ns ruktaa hai
ko.ii aavaaz aatii hai
kahii.n andar hii lekin Duub jaatii hai
mujhe sab kahii.n par bhii nahii.n hotii
kisii ko mai.n nazar aatii huu.n par shaayad
use bhii apne andar se nikalne kaa ko.ii rasta nahii.n miltaa

Ambarin Salahuddin
Nazm

dusre saeran se pahle

a.ndheraa hai
abhii tum apne ho.nTo.n ko
yuu.nhii mere labo.n se muttasil rakho
abhii us vaqt tak thaame raho
mere badan ko apnii baa.nho.n se
ki jab tak
ik dhamaake se phaTe
aatish-fishaa.n jismo.n kaa
aur kitne hii qarno.n kii chhupii hiddat
bahe laave kii suurat me.n
ki jab tak
saa.eran kii chiiKHtii makruuh mausiiqii
fazaa ko phaa.D de aur jagmagaa.e.n bijliyaa.n har suu

Anwar Maqsood Zahidi
Nazm

khir kaun kha gaya

thaaliyaa.n bhii saaf hai.n
pyaaliyaa.n bhii saaf hai.n
khiir kaun khaa gayaa
kuchh nahii.n hai degchii me.n taab me.n paraat me.n
ko.ii chor khaa gayaa hai khiir raat raat me.n
saaf hai.n rakaabiyaa.n gha.Doliyaa.n kaToriyaa.n
is me.n do kachauriyaa.n hai.n is me.n chaar toriyaa.n
khiir kaun khaa gayaa
ho na ho ye kaam hai tauqiir bhaa.ii jaan kaa
bhaaluu ehtishaam kaa loma.D imtinaan kaa
ammii jaan
ammii jaan
aap kaa luToraa beTaa merii khiir khaa gayaa
aap kaa chaToraa beTaa merii khiir khaa gayaa
merii khiir khaa gayaa
mai.n bhii phaa.D duu.ngaa dekh lenaa us kii copiyaa.n
kaaT duu.ngaa pencile.n
to.D duu.ngaa botale.n
pho.D duu.ngaa hit hit baal aur haakiyaa.n
jaaj bolii aahuu beTaa ye kyaa dhuum machaa.ii hai
mai.n ne khiir kii baat hii kii thii kis ne ye khiir pakaa.ii hai

Syed Zameer Jafri
Nazm

haji bhai pani wala

is maraz kaa faa.eda itnaa hu.aa
apnii chaukii se faraaGat paa gayaa
ye ki raddii phaa.D kar
apne thaile apnii godii me.n sameTe
vo unhii par
saarii pu.Dyaa.e.n banaataa

Saqi Faruqi
Nazm

teri yaad

sahar-o-shaam tujhe yaad kiyaa karte hai.n
terii hii yaad se dil shaad kiyaa karte hai.n
haq to ye hai ki shab-o-roz terii rahmat se
dil-e-barbaad ko aabaad kiyaa karte hai.n
tujh ko manzuur hai aasaa.ish-e-KHilqat yaa-rab
tere bande sitam iijaad kiyaa karte hai.n
ban ke panchhii jo giraftaar-e-balaa hote hai.n
vo faqat shikva-e-bedaad kiyaa karte hai.n
aag lag jaa.e mabaadaa kahii.n sayyaad ke ghar
Dar ke aah-e-dil-e-naashaad kiyaa karte hai.n
jo galaa phaa.D ke murGaan-e-sahar bolte hai.n
apne naalo.n ko vo barbaad kiyaa karte hai.n
ishq vaale ‘purii’ parvaana-sifat jalte hai.n
vo ta.Dapte hai.n na fariyaad kiyaa karte hai.n

Narayan Das Puri
Nazm

mere charagh bujh gae

mire charaaG bujh ga.e
mai.n tiirgii se raushnii kii bhiik maa.ngtaa rahaa
havaa.e.n saaz-baaz kar rahii thii.n jin dino.n siyaah raat se
unhii siyaah saa.ato.n me.n saaneha hu.aa
tamaam aa.iine Gubaar se be-nuur ho ga.e
saraa ke chaar samt haul-naak shab kii KHaamushii
chamaktii aa.nkh vaale bhe.Diyo.n ke Gol le ke aa ga.ii
qabaa-e-zindagii vo phaa.D le ga.e nukiile naaKHuno.n se us tarah
ki ruuh chiitha.Do.n me.n baT ga.ii
KHaraab mausamo.n kii chaal thii ki aas-paas baa.nbiyo.n se
aa ga.e nikal ke saa.np jhuumte hu.e
bujhaa diyaa safed raushnii kaa dil
madad ko mai.n pukaartaa thaa aur dekhtii thii.n putliyaa.n tamaashaa Gaur se
magar na aa.ii.n biin le ke amn vaalii bastiyo.n se jogiyo.n kii Toliyaa.n
siyaah aa.ndhiyo.n kaa zor kab talak sahaarte
mire charaaG bujh ga.e

Ali Akbar Natiq
Nazm

kutiya

magar billii ko ronaa chaahiye thaa
mujhe hoshiyaar kar ke hii is raat sonaa chaahiye thaa
ki vo ghar me.n hai
vo
yaanii mirii maut
use kuchh bhii nahii.n karnaa pa.Daa
mujhe to sirf lamhe bhar kii is sharmindagii ne maar Daalaa
vo mere haal par mu.nh phaa.D kar jab ha.ns rahii thii
ki jab vo saamne aa.ii
mirii aa.nkho.n me.n KHvaabo.n kii chamak thii
hathelii par davaa kii goliyaa.n thii.n jin ko badlaa thaa savere doctor ne
aur mai.n nihaayat mutma.in thaa kal ko le kar
ye manzar yuu.n nahii.n kuchh aur honaa chaahiye thaa
aur bahut mumkin hai hotaa bhii
agar mujh ko zaraa aagaah kar detii vo kutiyaa
vo mirii billii

Shariq Kaifi
Nazm

bharose ka qatl

maz.hab kii talvaar banaa kar
KHvaahisho.n ke andhe gho.De par savaar
mere man aa.ngan ko rau.nd Daalaa
mere bharose ko suulii par Taa.ng kar
tum ne duusraa byaah rachaa liyaa
tumhaare sang guzaare pal pal ko
mai.n ne apne maas par khaal kii tarah mundh liyaa thaa
tumhaare saath aa.nchal baa.ndh kar
baabaa kaa aa.ngan paar kar ke
tumhaare laa.e saa.nche me.n
mai.n ne paayaa thaa apnaa vajuud
pyaar kyaa hai ye nahii.n jaantii
par tumhaare ghar ne ba.D ke pe.D sii chhaa.nv kii thii mujh par
bachaayaa thaa zamaane ke gunaaho.n ke
tiiro.n kii bauchha.D se
is saa.nche me.n rahne kii KHaatir
mai.n apne vajuud ko kaaTtii chha.nTtii taraashtii rahii
tumhaare lahuu kii buu.nd ko apne maas me.n janm diyaa
aulaad bhii ham dono.n kaa bandhan na ban sakii
bandhan kyaa hai ye nahii.n jaantii
mujhe faqat ek sabaq pa.Dhaayaa gayaa thaa
tumhaaraa ghar merii aaKHirii panaah-gaah hai
mai.n ne ka.ii baar dekhaa hai
zamaane kii nigaaho.n se sa.ngsaar hote
talaaq-yaafta aurat ko
is liye baarish se Darii billii kii tarah
ghar ke ek kone aur tumhaare naam ke istiima.al par
qanaa.at kiye baiThii rahii
jannat kyaa hai jahannam kyaa hai ye nahii.n jaantii
magar itnaa yaqiin hai
jannat bharose se baalaa-tar nahii.n
aur jahannam saut ke qahqaho.n se ba.Dh kar giraa.n nahii.n
taano.n aur rahm bharii nazro.n se ba.Dh kar mushkil
ko.ii pul-siraat nahii.n
kabhii kabhii sot kaa chehra mujhe apnaa jaisaa lagtaa hai
us kii peshaanii par bhii
mai.n ne be-e'tibaarii kii shikne.n dekhii hai.n
jab vo mujhe dekhtii hai
KHushii us ke siine me.n
haatho.n me.n dabaa.e kabuutar kii tarah pha.D pha.Daa uThtii hai
mai.n un se la.D nahii.n saktii
un me.n tum shaamil ho
mai.n tum se la.D nahii.n saktii
maz.hab qaanuun aur samaaj tumhaare saath hai.n
riite.n rasme.n tumhaare hathiyaar hai.n
dil chaahtaa hai ki zindagii kii kitaab se
vo baab hii phaa.D kar phe.nk duu.n
jo apne mafaad me.n tum ne
mere muqaddar me.n likkhaa hai

Ateeya Daud
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now