Search result for ".ynb" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ".ynb"

Nazm MATCHES FOR ".ynb"

Nazm

magar zulm ke KHilaf

ham amn chaahte hai.n magar zulm ke KHilaaf
gar ja.ng laazmii hai to phir ja.ng hii sahii
zaalim ko jo na roke vo shaamil hai zulm me.n
qaatil ko jo na Toke vo qaatil ke saath hai
ham sar-ba-kaf uThe hai.n ki haq fata.h-yaab ho
kah do use jo lashkar-e-baatil ke saath hai
is Dha.ng par hai zor to ye Dha.ng hii sahii
zaalim kii ko.ii zaat na maz.hab na ko.ii qaum
zaalim ke lab pe zikr bhii in kaa gunaah hai
phaltii nahii.n hai shaaKH-e-sitam is zamiin par
taariiKH jaantii hai zamaana gavaah hai
kuchh kor-baatino.n kii nazar ta.ng hii sahii
ye zar kii ja.ng hai na zamiino.n kii ja.ng hai
ye ja.ng hai baqaa ke usuulo.n ke vaaste
jo KHuun ham ne nazr diyaa hai zamiin ko
vo KHuun hai gulaab ke phuulo.n ke vaaste
phuuTegii sub.h-e-amn lahuu-ra.ng hii sahii

Sahir Ludhianvi

Nazm

26 january

aa.o ki aaj Gaur kare.n is savaal par
dekhe the ham ne jo vo hasii.n KHvaab kyaa hu.e
daulat ba.Dhii to mulk me.n iflaas kyuu.n ba.Dhaa
KHush-haalii-e-avaam ke asbaab kyaa hu.e
jo apne saath saath chale ku-e-daar tak
vo dost vo rafiiq vo ahbaab kyaa hu.e
kyaa mol lag rahaa hai shahiido.n ke KHuun kaa
marte the jin pe ham vo sazaa-yaab kyaa hu.e
be-kas barahnagii ko kafan tak nahii.n nasiib
vo va.ada-haa-e-atlas-o-kim-KHvaab kyaa hu.e
jamhuuriyat-navaaz bashar-dost amn-KHvaah
KHud ko jo KHud diye the vo alqaab kyaa hu.e
maz.hab kaa rog aaj bhii kyuu.n laa-'ilaaj hai
vo nusKHa-haa-e-naadir-o-naayaab kyaa hu.e
har kuucha sho'la-zaar hai har shahr qatl-gaah
yak-jehtii-e-hayaat ke aadaab kyaa hu.e
sahraa-e-tiirgii me.n bhaTaktii hai zindagii
ubhre the jo ufuq pe vo mahtaab kyaa hu.e
mujrim huu.n mai.n agar to gunahgaar tum bhii ho
ai rahbaraan-e-qaum KHataa-kaar tum bhii ho

Sahir Ludhianvi

Nazm

zauq o shauq

qalb o nazar kii zindagii dasht me.n sub.h kaa samaa.n
chashma-e-aaftaab se nuur kii naddiyaa.n ravaa.n!
husn-e-azal kii hai numuud chaak hai parda-e-vajuud
dil ke liye hazaar suud ek nigaah kaa ziyaa.n!
surKH o kabuud badliyaa.n chho.D gayaa sahaab-e-shab!
koh-e-izam ko de gayaa ra.ng-ba-ra.ng tailisaa.n!
gard se paak hai havaa barg-e-naKHiil dhul ga.e
reg-e-navaah-e-kaazima narm hai misl-e-parniyaa.n
aag bujhii hu.ii idhar, TuuTii hu.ii tanaab udhar
kyaa KHabar is maqaam se guzre hai.n kitne kaarvaa.n
aa.ii sadaa-e-jibra.iil teraa maqaam hai yahii
ahl-e-firaaq ke liye aish-e-davaam hai yahii
kis se kahuu.n ki zahr hai mere liye mai-e-hayaat
kohna hai baz-e-kaa.inaat taaza hai.n mere vaardaat!
kyaa nahii.n aur Gaznavii kaargah-e-hayaat me.n
baiThe hai.n kab se muntazir ahl-e-haram ke somnaat!
zikr-e-arab ke soz me.n, fikr-e-ajam ke saaz me.n
ne arabii mushaahidaat, ne ajamii taKHaiyyulaat
qaafilaa-e-hijaaz me.n ek husain bhii nahii.n
garche hai taab-daar abhii gesuu-e-dajla-o-furaat!
aql o dil o nigaah kaa murshid-e-avvalii.n hai ishq
ishq na ho to shar-o-dii.n butkada-e-tasavvuraat!
sidq-e-KHaliil bhii hai ishq sabr-e-husain bhii hai ishq!
ma.arka-e-vajuud me.n badr o hunain bhii hai ishq!
aaya-e-kaa.enaat kaa ma.anii-e-der-yaab tuu!
nikle tirii talaash me.n qaafila-haa-e-ra.ng-o-buu!
jalvatiyaan-e-madrasa kor-nigaah o murda-zauq
jalvatyaan-e-maikada kam-talab o tahii-kaduu!
mai.n ki mirii Gazal me.n hai aatish-e-rafta kaa suraaG
merii tamaam sarguzisht kho.e hu.o.n kii justujuu!
baad-e-sabaa kii mauj se nash-o-numaa-e-KHaar-o-KHas!
mere nafas kii mauj se nashv-o-numaa-e-aarzuu!
KHuun-e-dil o jigar se hai merii navaa kii parvarish
hai rag-e-saaz me.n ravaa.n saahib-e-saaz kaa lahuu!
fursat-e-kashmukash me.n ii.n dil be-qaraar raa
yak do shikan zyaada kun gesuu-e-taabdaar raa
lauh bhii tuu, qalam bhii tuu, teraa vajuud al-kitaab!
gumbad-e-aabgiina-ra.ng tere muhiit me.n habaab!
aalam-e-aab-o-KHaak me.n tere zuhuur se faroG
zarra-e-reg ko diyaa tuu ne tuluu-e-aaftaab!
shaukat-e-sanjar-o-saliim tere jalaal kii numuud!
faqr-e-'juned'-o-'baayaziid' teraa jamaal be-naqaab!
shauq tiraa agar na ho merii namaaz kaa imaam
meraa qayaam bhii hijaab! meraa sujuud bhii hijaab!
terii nigaah-e-naaz se dono.n muraad paa ga.e
aql, Gayaab o justujuu ishq, huzuur o iztiraab!
tiira-o-taar hai jahaa.n gardish-e-aaftaab se!
tab-e-zamaana taaza kar jalva-e-be-hijaab se!
terii nazar me.n hai.n tamaam mere guzishta roz o shab
mujh ko KHabar na thii ki hai ilm-e-naKHiil be-rutab!
taaza mire zamiir me.n ma.arka-e-kuhan hu.aa!
ishq tamaam mustafaa! aql tamaam buu-lahab!
gaah ba-hiila mii-barad, gaah ba-zor mii-kashad
ishq kii ibtidaa ajab ishq kii intihaa ajab!
aalam-e-soz-o-saaz me.n vasl se ba.Dh ke hai firaaq
vasl me.n marg-e-aarzuu! hijr me.n lazzat-e-talab!
ain-e-visaal me.n mujhe hausla-e-nazar na thaa
garche bahaana-juu rahii merii nigaah-e-be-adab!
garmii-e-aarzuu firaaq! shorish-e-haa-o-huu firaaq!
mauj kii justujuu firaaq! qatre kii aabruu firaaq!

Allama Iqbal

Nazm

kaun dekhega

us ek din ko jo hai umr ke zavaal kaa din
inhii.n dino.n me.n numuu-yaab kaun dekhegaa

Majeed Amjad

Nazm

karl marx

marx ke ilm o fataanat kaa nahii.n ko.ii javaab
kaun us ke dark se hotaa nahii.n hai faiz-yaab

Wamiq Jaunpuri

Nazm

subhash-chandr-bos bahadur-shah-zafar ke mazar par

mai.n tirii kho.ii hu.ii azmat ko vaapas laa.uu.ngaa
aur tire marqad pe nusrat-yaab ho kar aa.uu.ngaa

Jagan Nath Azad

Nazm

zafar

sub.h farGaana me.n thii aur hu.ii ra.ngo.n me.n shaam
aal-e-taimuur kii aashufta-sarii tujh ko salaam
lama-e-aaKHir KHurshed sirajuddiin thaa
maqtaa-e-dard fazaa-e-Gazal-e-ra.ngii.n thaa
vo shah-e-nek-nafs nek-nasab nek-nazhaad
vo shah-e-nek-nazar nek-nishaa.n nek-nihaad
paikar-e-KHalq-o-vafaa KHuugar-e-aamaal-e-husn
KHusrav-e-fikr-o-rasaa baadshah-e-fahm-o-fatin
saahab-e-tarz-e-nevii maalik-e-andaaz-e-kuhan
faKHr-e-dii.n faKHr-e-zamii.n faKHr-e-zamaa.n faKHr-e-zaman
laal-qile kaa vo suufii vo mohabbat kaa amii.n
jis kii miTTii se bhii mahruum hai dillii kii zamii.n
martaba-daan-e-adiibaan-o-hakiimaan-e-vatan
qadr-daan-e-sher ai hama-daan-o-hama-fan
'Gaalib'-o-'zauq' ke afkaar kaa vo qadr-shanaas
jis ko thaa 'momin'-o-'aazurda' kii azmat kaa paas
arz-e-dillii ne baGaavat kaa jab elaan kiyaa
surKH-ruu ho gayaa aulaad ko qurbaan kiyaa
jab bidesii kii hukuumat se zamii.n ta.ng hu.ii
usii qaa.id kii qayaadat me.n ba.Dii ja.ng hu.ii
jis kaa darbaar thaa ik majma.a-e-aalii-nishaa.n
jis jagah kausar-o-tasniim se dhultii thii zabaa.n
saaz-e-hindii kii navaa naGma-e-urduu kii sadaa
jis ke ash.aar se aatii hai uKHuvvat kii nidaa
mard-e-darvesh sharaafat kaa gunahgaar bhii thaa
paarsaa ri.nd bhii thaa shaa.ir-e-diin-daar bhii thaa
jis ko kahte hai.n zamiino.n kaa shah-e-arsh-nishaa.n
mushkil asnaaf-e-suKHan jis ke liye the aasaa.n
na ho agarche zafar-mand-o-zafar-yaab magar
falak-e-sher pe taabinda hai az-naam-e-zafar

Arsh Malsiyani

Nazm

hawa se baat karo

qazaa se baat karo
qazaa se baat magar kyaa
ki har qabiila-e-dard
ik aise jabr-e-azal-yaab kaa havaala hai
jo pahle din kii gavaahii sanad me.n laataa hai
agar javaab se phir ik savaal bantaa hai
fanaa ke vaaste kyo.n baab-e-harf baaz rahe
bahaa jahaan kii laa hai to laa se baat karo
ibtidaa se baat karo

Ehsan Akbar

Nazm

qissa-KHwani

us ne sochaa
yaad-gaarii chauk me.n chaaro.n taraf
ye bolte baazaar hai.n
is liye afsurdagii me.n gum kha.De
us bed-e-majnuu.n par
nazar pa.Dtii nahii.n
jo akelaa rah gayaa hai qissaa-KHvaano.n me.n yahaa.n
be-ra.ng ukha.Dtii chhaal par
chaaquu se kanda naam phiikaa pa.D gayaa hai
kandaa-kaarii jaa milii hai KHaak se
vaqt kii Gaflat ne kyaa saabit kiyaa
zaKHm khaane aur lagaane vaalo.n me.n
kaun fata.h-yaab hai.n

Yameen

Nazm

muqaffal chup

aaj bhii bhii.D thii logo.n kii mire chaaro.n-taraf
mai.n ne har ek ko baato.n me.n sukuu.n-yaab kiyaa
phir ko.ii duur se detaa hai sadaa kaun ho tum
aa.e ho kaun sii nagrii se zaraa naam to lo

Faisal Hashmi

Nazm

raushni

zindagii ke shor me.n
vaqt kaa futuur hai
haq shikast-yaab hai
baatilo.n kaa raaj hai
zulmato.n ke daur me.n
chal pa.Daa hai ik hujuum
manzilo.n kii justujuu
raaste hai.n pur-KHatar
la.Dkha.Daate ye qadam
haath me.n liye qalam
shaa'iro.n kaa qaafila
shahr-e-husn chho.D kar
nuur kii talaash me.n

Ahmar Nadeem

Nazm

jazira

vahaa.n huu.n mai.n
jahaa.n chaaro.n taraf mere
samundar aa.nsuu.o.n ke bah rahe hai.n
agar mai.n bhaagnaa chaahuu.n
to un me.n Duub jaa.uu.ngaa
mafar kaa raasta ko.ii nahii.n hai
to mai.n ik jail me.n rakkhe ga.e
ik aise qaidii kii tarah huu.n
ki jis ko kaaTnii hogii sazaa-e-qaid-e-umr
magar kis jurm kii paadaash me.n
aisii sazaa kaaTuu.n
har ik qaidii sazaa-e-umr-e-dauraa.n kaaT kar
aazaad samto.n me.n ravaana ho chukaa hai
magar mai.n aaj bhii anjaane jurmo.n kaa sazaa-yaab
saliib-e-Gam uThaa.e phir rahaa huu.n
mai.n apnii zaat ke tanhaa jaziire me.n rahuu.n kab tak

Shahid Kaleem

Nazm

maine kab ishq ke aadab

mai.n ne kab 'ishq ke aadaab sikhaa.e tum ko
kab kahaa Tuut ke chaaho mujhe paagal kar do
mai.n musaafir thii tire shahr me.n ik roz faqat
raat aa.nkho.n me.n basar karne chalii aa.ii thii
tuu ne is jism-e-mujassam ko ishaara de kar
apnii be-laus vafaa.o.n kaa sahaaraa de kar
husn ko 'ishq ke paikar me.n badal Daalaa thaa
mai.n jo ulfat ko giraa.n-yaab samajhtii thii kabhii
laa'l-o-gauhar jise naayaab samajhtii thii kabhii
tuu ne vo qiimtii patthar mirii jholii me.n bhare
tuu mirii soch se aage mire KHvaabo.n se pare
mujhe ulfat ke ka.ii shahr ghumaa laayaa thaa
mai.n jo titlii ke ta'aaqub me.n phiraa kartii thii
phuul dar phuul havaa.o.n me.n u.Daa kartii thii
tuu ne ik roz jo haule se chhu.aa thaa mujh ko
usii lamhe me.n ye ehsaas hu.aa thaa mujh ko
mai.n hii titlii huu.n havaa huu.n mai.n vafaa kii KHushbuu
mai.n hii naazuk sii kalii huu.n mai.n hayaa kii KHushbuu
merii aa.nkho.n se jahaa.n bhar ke sitaare raushan
sirf do chaar nahii.n saare ke saare raushan
par achaanak hii mujhe chho.D ke jaane vaale
merii aa.nkho.n ko bhii patthar kaa banaane vaale
vo tiraa 'ishq saraabo.n kii tarah hii thaa naa
tuu haqiiqat me.n bhii KHvaabo.n kii tarah thaa jaanaa.n
ab ye sochuu.n to mujhe ye bhii gumaa.n hotaa hai
yaar ye rog-e-mohabbat bhii hai saahir kii tarah
jis ko lag jaa.e piriitam hii banaa detaa hai
pahle 'aashiq ko dikhaataa hai ka.ii KHvaab hasii.n
phir unhe.n chhiin ke aa.nkho.n ko sazaa detaa hai

Zeba Khan Hina

Nazm

tishna-e-azali

sab me.n shaamil hai
lab-e-saahil pe ujle sa.ng-rezo kaa vajuud
jagmagaatii sii jabiino.n se
ye andaaza bhii kar sakte hai.n
vo mutma.in se hai.n magar
tishnagii kaa karb
ho.nTo.n se bayaa.n hotaa nahii.n
aatii jaatii mauj-e-dariyaa
ye samajhtii hai hamesha
sa.ng-reze bhii hai.n us se faiz-yaab
jab bhii chhuuTii sa.ng-rezo se ridaa-e-ehtiyaat
un kii saf par
dhuup kaa hamla hu.aa
tishnagii kaa maajraa rusvaa hu.aa

Hameed Almas

Nazm

kirshn ka KHitab

fanaa hone lagtaa hai jis vaqt dharm
masiihaa-nafas ban ke aataa huu.n mai.n
ataa kar ke us ko na.ii zindagii
tabaahii kii zad se bachaataa huu.n mai.n
miTaa kar zamaane se baatil kaa naam
sadaaqat kaa Dankaa bajaataa huu.n mai.n
kamar-basta hote hai.n jo jang par
unhe.n raah-e-ulfat dikhaataa huu.n mai.n
sune.n jo na phir bhii nasiihat mirii
zamaane se un ko miTaataa huu.n mai.n
jo la.Dte hai.n duniyaa me.n haq ke liye
zafar-yaab un ko banaataa huu.n mai.n
bajaa kar kabhii to madhur bansurii
mohabbat ke naGme sunaataa huu.n mai.n
kabhii garm kartaa huu.n maidaan-e-jang
shujaa.at ke jauhar dikhaataa huu.n mai.n
kabhii jang me.n bahr-e-irfaan-e-haq
fasaahat ke dariyaa bahaataa huu.n mai.n
sikhaa kar bashar ko rumuuz-e-hayaat
farishto.n kaa ham-sar banaataa huu.n mai.n
jo laate hai.n iimaa.n mirii zaat par
gunaaho.n se un ko bachaataa huu.n mai.n
unhe.n baKHshtaa huu.n baqaa-e-davaam
jinhe.n mo'taqid apnaa paataa huu.n mai.n
sharan me.n jo aate hai.n 'saabir' mirii
tanaasuKH se un ko chhu.Daataa huu.n mai.n

Sabir Abuhari

Nazm

be-tawajjohi

hazaaro.n divaane tirii raah me.n
sar kaTaane ko tayyaar baiThe hu.e hai.n
terii zulfo.n kii halkii sii jumbish pe
ye raat kii tiirgii
kahkashaa.o.n kii jhurmuT
falak-dar-falak aur jahaa.n-dar-jahaa.n
'aalam-e-vajd me.n aa ga.e hai.n
terii aa.nkho.n kii mastii ke aage
ahl-e-mashriq-o-maGrib ke sab mai-kade
phiike pa.De hai.n
terii ho.nTo.n kii laalii kii bas ik jhalak dekh kar
gul-o-laala-o-yaasman-o-nargis-o-hinaa
baaG ke ek goshe me.n hairat se murjhaa ga.ii.n hai.n
ye sab Thiik hai.n aur bajaa hai
magar ek 'aashiq-e-soKHta-baKHt
soKHta dil liye
apne kamre ke kone me.n
chup-chaap terii judaa.ii me.n nauha-kunaa.n hai
vo 'aashiq dard kii chaarpaa.ii pe leTaa hu.aa
maut aur zindagii se ulajhtaa hu.aa
raat bhar jaagtaa hai
tujhe kuchh KHabar hai
vo 'aashiq
tirii ek bas ek
chashm-e-karam se shifaa-yaab hogaa

Akmal Gudaaz

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now