Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "asal"

Nazm MATCHES FOR "asal"

Nazm

aurat

duniyaa ke liye tohfa-e-naayaab hai aurat
afsaana-e-hastii kaa hasii.n baab hai aurat
dekhaa thaa jo aadam ne vahii KHvaab hai aurat
be-misl hai aa.iina-e-aadaab hai aurat
qaa.em usii aurat se mohabbat kii fazaa hai
aurat kii ataa asal me.n ehsaan-e-KHudaa hai
hai maa.n to dil-o-jaa.n se luTaatii hai sadaa pyaar
mamtaa ke liye phirtii hai daulat sar-e-baazaar
aasaan banaatii hai du.aa se rah-e-dushvaar
apne Gam-o-aalaam kaa kartii nahii.n iz.haar
qadmo.n me.n liye rahtii hai jannat kaa KHazaana
aurat ke tasavvur me.n hai ta.amiir-e-zamaana
biivii hai to Gam-KHvaar hai paikar hai vafaa kaa
aa.nchal ko banaa letii hai faanuus hayaa kaa
ruKH dekh ke rakhtii hai qadam apnaa havaa kaa
girviida banaatii hai tabassum kii adaa kaa
KHvaab-e-nigah-e-ishq kii ta.abiir hai aurat
mardo.n ke liye husn kii zanjiir hai aurat
hai shakl me.n beTii kii bahaar-e-sahr-o-shaam
qudrat kaa atiya hai ye qudrat kaa hai in.aam
detii hai masarrat kaa dil-e-zaar ko paiGaam
hai ruuh ko taskiin jigar kaa hai ye aaraam
duKHtar hai to anmol guhar kahte hai.n us ko
allaah kii rahmat kaa samar kahte hai.n is ko
suurat me.n bahan kii hai chaman kaa ye hasii.n phuul
iisaar-o-mohabbat hai shab-o-roz kaa ma.amuul
be-kaar kii ranjish ko kabhii detii nahii.n tuul
ehsaas-e-muravvat me.n rahaa kartii hai mashGuul
likhii hai har ik rang me.n aurat kii kahaanii
kahte hai.n use azmat-e-insaa.n kii nishaanii
mariyam hai to paakiiza-o-shaffaf hai.n a.amaal
ban jaa.e zuleKHaa to hayaa ko kare paamaal
gar hai cleopatra to siyaasat kii chale chaal
lailaa hai to kartii hai ye diivaana-o-bad-haal
Dhal jaanaa har ik ruup me.n aasaan hai us ko
badle hu.e haalaat kii pahchaan hai us ko
'hinda' hai to saalaarii kaa dikhlaatii hai jauhar
hai 'raabi.a-basrii' to ye valiyo.n kii hai ham-sar
baiThii hai agar husn kaa baazaar sajaa kar
Gairat ko banaatii hai asiir-e-havas-e-zar
vaaqif hai bahar-taur ye jiine ke hunar se
be-KHauf guzar jaatii hai har raahguzar se
ik pal me.n ye sho.ala hai to ik pal me.n hai shabnam
ya.anii hai kabhii gul to kabhii KHaar-e-mujassam
ho sabr pe aamaada to sah jaa.e har ik Gam
ho jaa.e muKHaalif to palaT de saf-e-aalam
paaband-e-vafaa ho to dil-o-jaan luTaa de
aa jaa.e baGaavat pe to duniyaa ko hilaa de

Rahbar Jaunpuri
Nazm

saman diwali ka

makaan lep ke Thaliyaa jo korii rakhavaa.ii
jalaa charaaG ko kau.Dii vo jald jhankaa.ii
asal ju.aarii the un me.n to jaan sii aa.ii
KHushii se kuud uchhal kar pukaare o bhaa.ii
shuguun pahle karo tum zaraa divaalii kaa

Nazeer Akbarabadi
Nazm

tumhaari aankhen shararti hain

vo kho gayaa ye milii hai.n jis ko
ye jiitnaa chaahtii hai jis ko
usii se dar-asal haartii hai.n
tumhaarii aa.nkhe.n sharaartii hai.n

Muzaffar Warsi
Nazm

bataKH aur sanp

ab tuu samjhii ab tuu jaanii
ye baate.n hai.n aanii-jaanii
hai asal to ye kuchh kar ke dikhaa
duniyaa ye kahe kyaa KHuub kiyaa
jo gur siikho puuraa siikho
jo kaam karo achchhaa hii karo

Kishwar Naheed
Nazm

mulamma ki anguThi

chaa.ndii kii a.nguuThii pe jo sone kaa cha.Dhaa jhol
ochhii thii lagii bolne itraa ke ba.Daa bol
ai dekhne vaalo tumhii insaaf se kahnaa
chaa.ndii kii a.nguuThii bhii hai kuchh gahno.n me.n gahnaa
chaa.ndii kii a.nguuThii ke na mai.n saath rahuu.ngii
vo aur hai mai.n aur ye zillat na sahuu.ngii
mai.n qaum kii uu.nchii huu.n ba.Daa meraa gharaanaa
vo zaat kii ghaTiyaa hai nahii.n us kaa Thikaanaa
merii sii kahaa.n chaashnii meraa saa kahaa.n ra.ng
vo mol me.n aur tol me.n mere nahii.n paassa.ng
merii sii chamak us me.n na merii sii damak hai
chaa.ndii hai ki hai raa.ng mujhe is me.n bhii shak hai
ye sunte hii chaa.ndii kii a.nguuThii bhii ga.ii jal
allaah-re mulamme kii a.nguuThii tere chhal-bal
sone kii mulamme pe na itraa merii pyaarii
do din me.n bha.Dak us kii utar jaa.egii saarii
kuchh der haqiiqat ko chhupaayaa bhii to phir kyaa
jhuuTo.n ne jo sachcho.n ko cha.Dhaayaa bhii to phir kyaa
mat bhuul kabhii asal tuu apnii arii ahmaq
jab taav diyaa jaa.egaa ho jaa.egaa mu.nh faq
sachche kii to izzat hii ba.Dhegii jo kare.n jaa.nch
mash.huur masal hai ki nahii.n saa.nch ko kuchh aa.nch
khone ko kharaa ban ke nikharnaa nahii.n achchhaa
chhoTe ko ba.Daa ban ke ubharnaa nahii.n achchhaa

Ismail Merathi
Nazm

sabza-e-begana

hasab-nasab hai na taariiKH o jaa-e-paidaa.ish
kahaa.n se aayaa thaa maz.hab na valdiyat ma.aluum
maqaamii chhoTe se KHairaatii aspataal me.n vo
kahii.n se laayaa gayaa thaa vahaa.n ye hai marquum
mariiz raato.n ko chillaataa hai ''mire andar
asiir zaKHmii parinda hai ik, nikaalo ise
guluu-girafta hai ye habs-e-dam hai KHaa.if hai
sitam-rasiida hai mazluum hai bachaa lo ise''
mariiz chiiKHtaa hai dard se karaahtaa hai
ye vietnam, kabhii dominican, kabhii kashmiir
zar-e-kasiir, siyah qaume.n, KHaam madniyaat
kasiif tel ke chashme, avaam, istehsaal
zamii.n kii maut bahaa.im, fizaa.ii ja.ng, sitam
ijaara-daarii, subuk gaam, dilrubaa, atfaal
sarod-o-naGma, adab, sher, amn, barbaadii
janaaza ishq kaa, daf kii sadaa.e.n, murda KHayaal
taraqqii, ilm ke gahvaare, ruuh kaa madfan
KHudaa kaa qatl, ayaa.n zer-e-naaf zohra jamaal
tamaam raat ye be-rabt baate.n kartaa hai
mariiz saKHt pareshaanii kaa sabab hai yahaa.n
Garaz ki jo thaa shikaayat kaa ek daftar thaa
natiija ye hai usii roz muntaqil karke
use ik aur shifaa-KHaane ko ravaana kiyaa
sunaa gayaa hai vahaa.n nafsiyaat ke maahir
tabiib haaziq o nabbaaz doctor kitne
talab kiye ga.e aur sab ne ittifaaq kiyaa
ye ko.ii zehnii maraz hai, mariiz ne shaayad
kabhii parinda ko.ii paalaa hogaa lekin vo
adam-e-tavajjohii yaa ittifaaq se yuu.nhii
bichaara mar gayaa us maut kaa asar hai ye
ajiib chiiz hai taht-e-shu.uur insaa.n kaa
ye aur kuchh nahii.n ehsaas-e-jurm hai jis ne
dil o dimaaG pe qabza kiyaa hai is darja
mariiz qaatil o mujrim samajhtaa hai KHud ko!
kisii kii raa.e thii pasmaa.nda qaum kaa ik fard
mariiz hogaa isii vaaste siyah qaume.n
Gariib ke liye ik taboo ban ga.ii.n afsos
ko.ii ye kahtaa thaa ye asal me.n hai hubb-e-vatan
mariiz chaahtaa thaa ham kafiil ho.n apne
kisii bhii qaum ke aage na haath phailaa.e.n
yahii.n pe tel ke chashme hai.n, vo kare.n daryaaft!
gumaan kuchh ko thaa ye shaKHs ko.ii shaa.er hai
jo chaahtaa thaa jahaa.n-gardii me.n guzaare vaqt
hasiin aurte.n maa.il ho.n lutf-o-aish rahe
qalam ke zor se shohrat mile zamaane me.n
zar-e-kasiir bhii haath aa.e is bahaane se
magar Gariib kii sab koshishe.n ga.ii.n naakaam
shikast-e-paiham o ehsaas-e-naa-rasaa.ii ne
ye haal kar diyaa majruuh hoga.e a.asaab
Garaz ki nukta-rassii me.n guzar gayaa sab vaqt
vo chiiKHtaa hii rahaa dard kii davaa na milii
nashist baa'd nashist aur mu.aa.ene shab o roz
inhii.n me.n vaqt guzartaa gayaa shifaa na milii
phir ek shaam vahaa.n surma-dar-guluu aa.ii
jo us ke vaaste goyaa tabiib-e-haaziq thii
kisii ne phir na sunii dard se bharii aavaaz
karaahtaa thaa jo KHaamosh ho gayaa vo saaz

Akhtarul Iman
Nazm

kahani bas itni si thi

kahaanii to merii kuchh thii hii nahii.n
ki merii ye zindagii to merii thii hii nahii.n
ye to bas aate-jaate logo.n kii raahdaarii thii
yaa ek bas stop thaa
jahaa.n kuchh der ko log aate the
aur chale jaate the
jaise ek hotel thaa jahaa.n kuchh der ke liye log Thaharte the
aur mai.n in ko apnii kahaanii me.n kuchh der kirdaar rakhtii thii
kahaanii merii thii hii kyaa
meraa apnaa kirdaar to sab me.n baTaa hu.aa thaa
jo dikhaa.ii kisii ko na detaa thaa
mai.n apnii zindagii kii kahaanii me.n hii KHud
ek kirdaar ko janm detii thii
ek kirdaar ko maartii thii
merii kahaanii bhii kitnii ajiib thii
ki is me.n asal aur KHaalis kuchh thaa hii nahii.n
ek gha.Dii ho.ii naqlii aur banaavaTii zindagii
ke alaava
kahaanii to bas itnii sii thii
ki kahaanii kuchh thii hii nahii.n

Maryam Tasleem Kiyani
Nazm

mohabbat

mohabbat KHudaa kii haqiiqat kaa nuur
mohabbat kisii kaa payaam-e-zuhuur
mohabbat ke paiGaambar ambiyaa
mohabbat ke zer-e-asar auliyaa
mohabbat nuquush-e-bayaaz-e-vajuud
tar-o-taaza is se riyaaz-e-shuhuud
mohabbat nahii.n to nahii.n zindagii
mohabbat se hai dil-nashii.n zindagii
mohabbat se har zarra paivasta hai
tarab zaa mohabbat kaa guldasta hai
nashaat-e-mohabbat rafiiq-e-hayaat
kiye us ne hal zindagii ke nikaat
mohabbat se har ik haqiiqat ayaa.n
mohabbat se maa.n kii faziilat ayaa.n
mohabbat se shaan-e-pidar sar-buland
mohabbat se vasf-e-pisar arjumand
mohabbat se mazbuut ajzaa-e-qaum
mohabbat se marbuut aaraa-e-qaum
mohabbat se qaa.em nizaam-e-hayaat
taGayyur me.n bhii un kaa nuur-e-sabaat
mohabbat nahii.n hai to kuchh bhii nahii.n
mohabbat hii hai asal duniyaa-o-dii.n

Ali Manzoor Hyderabadi
Nazm

ye ek fitri amal hai

mohabbat
zindagii kaa aarizii Thikaanaa hai
aur
shahr me.n tafriihii maqaamaat kii qillat
aabaadii me.n izaafe kii asal vaj.h

Ali Sahil
Nazm

patang uDane se pahle

pata.ng u.Daane se pahle ye jaan lenaa thaa
ki is kii asal hai kyaa aur maahiyat kyaa hai
bahut nahiif sii do baa.ns kii khapanche.n hai.n
aur un se lipTaa murabbe me.n naa-tavaa.n kaaGaz
ye jis ke dam pe havaa me.n kulele.n bhartii hai
zaraa sii zarb se vo Dor TuuT jaatii hai
pata.ng kaT ga.ii to is kaa itnaa Gam kyuu.n hai
pata.ng u.Daane se pahle ye jaan lenaa thaa
ki is kii asal hai kyaa aur maahiyat kyaa hai

Shahram Sarmadi
Nazm

murda-KHana

duniyaa kii iilaa-billaa Thasii pa.Dii hai mujh me.n
haa.n kuchh kaam kii chiize.n bhii hai.n is kabaa.D-KHaane me.n
ilhaamii kitaabo.n se le kar falsafa-e-adab aur shaa.irii tak kii
libraryaa.n bharii pa.Dii hai.n dimaaG me.n
aa.nkho.n me.n utar kar dekhe.n to husn-e-do-aalam paa.e.nge jalva-afroz
puure puure nigaar-KHaane mere bhii sanam-KHaane tere bhii sanam-KHaane
kaano.n me.n baiThu.o.n se le kar kop-land kii samfaniyaa.n
aur tansen kii bandisho.n se raushan-aaraa begam kii gaa.ikii tak mahfuuz hai aaj bhii
lekin ga.nd to machaa rakkhaa hai mere jism ne
aur is ke andar dha.Dakte dil ne
gandagii kaa Dipo hai meraa ye jism
balki kaarKHaana hai gandagii kaa
achchhii se achchhii chiiz Daale.n aap is me.n
bol-o-baraaz banaa kar rakh detaa hai use
Daal kar dekhe.n haa.n haa.n ye phal Daale.n ye miThaa.ii
ye tikke aur kabaab Daale.n is me.n
aur phir naak par ruumaal rakh kar dekhe.n ki bantaa kyaa hai in kaa
KHair jahaa.n kaar-KHaane huu.n vahaa.n gandagii to hotii hai laaziman
gandagii na ho to aaluudgii sahii
iid-e-qurbaan par shahr kaa chakkar to lagyaa hii hogaa aap ne
aziiz-o-aqaarib se milne ke liye
jo kuchh sa.Dko.n aur galiyo.n me.n nazar aataa hai ojha.Diyo.n aur aa.nto.n se ubaltaa hu.aa
vahii kuchh hai mere andar bhii
ye to merii khaal kaa kamaal hai jo aap ne paas biThaa rakkhaa hai mujhe
aur agar aap me.n jhaa.nkne kii himmat ho mere dil me.n
to shaayad abhii uThaa de.n apne paas se mujhe
karda gunaaho.n kii nahii.n naa-karda gunaaho.n kii baat kar rahaa huu.n mai.n
KHvaahisho.n aur hasrato.n ke janaaze pa.De hai.n
mere dil me.n qataar-andar-qataar
mai.n ne tashbiih dii thii kabaa.D-KHaane se apne aap ko
asal me.n to ek bahut ba.Daa murda-KHaana huu.n mai.n
fasaadaat me.n qatl-e-aam dekhaa ho shaayad aap ne
zalzale me.n maare jaane vaalo.n kii laashe.n nikaalte to dekhaa hogaa logo.n ko
yaa phir television par bosina aur kosvo me.n ijtimaa.ii qabro.n kii khudaa.ii ke manaazir
jab lavaahiqiin koshish kar rahe hote hai.n laasho.n ko pahchaan.ne kii
aur naak phaT rahe hote hai.n un ke sa.Daa.nd se
jald-az-jald dobaara dafnaa dii jaatii hai.n ye laashe.n
lekin mere dil me.n KHvaahisho.n aur hasrato.n kii laashe.n gal-sa.D ga.ii hai.n pa.De pa.De
aur mai.n phir bhii dafan nahii.n kartaa unhe.n
dafn karnaa chaahtaa hii nahii.n
aur chaahuu.n bhii to kahaa.n karuu.n dafn unhe.n
dimaaG me.n
dimaaG me.n kulbulaataa haafiza kahaa.n mohlat detaa hai us kii
dil hii to hai jis me.n dafnaa saktaa huu.n unhe.n
inhii murda KHvaahisho.n aur hasrato.n ko dekh dekh kar to jiitaa huu.n mai.n
ye to dafan ho.ngii mere saath hii
aur ab samajh me.n aataa hai ki kyuu.n banaa.ii jaatii hai.n ba.Dii ba.Dii qabre.n
baadshaah log to marne se pahle hii banvaa liyaa karte the apne maqbare aur ehraam
mujhe ghin aatii thii ba.Dii ba.Dii qabro.n se
mai.n kahaa kartaa thaa dekho un maal-zaado.n ko
zindagii me.n bhii ghere rakhte the zaruurat se ziyaada zamiin
aur mar kar bhii itnii jagah gher lete hai.n ki KHudaa kii zinda maKHluuq ko mayassar nahii.n sar chhupaane ko
mar kar bhii nahii.n miTtii zamiin kii hirs un kii
magar ab sochtaa huu.n shaayad unhe.n vaaqa.ii zaruurat ho ba.Dii qabro.n kii
shaayad un ke andar pa.De huu.n mujh se bhii ziyaada janaaze
KHvaahisho.n aur hasrato.n ke
shaayad un kii ojha.Diyo.n aur aa.nto.n me.n Galaazat ho mujh se bhii ziyaada
vaise kahii.n mai.n bhii to javaaz nahii.n Dhuu.nDh rahaa apne liye kushaada qabr kaa

Mohammad Haneef Rame
Nazm

main wapas aaunga

Gaar-e-hara-e-shaa.erii me.n
baiThne jaataa huu.n mai.n
aur mai.n hisaar-e-zaat bhii kar ke rakhuu.ngaa
is hisaar-e-zaat ke baahar
ko.ii bhii daashta shohrat kii
shahr-nau lagaa baiThe na apnaa
dekhte rahnaa
na karnaa intizaar is kaa
ki mai.n taaza sahiifa laane vaalaa huu.n
ki har taaza sahiifa
ek din mansuuKH honaa hai
use vo ma.anii-o-mafhuum khonaa hai
jo asal mudda.aa hai

Shahram Sarmadi
Nazm

shora-e-pakistan ka KHair-maqdam

ai ham-suKHano asal me.n rahbar to hamii.n hai.n
maayuus KHalaa.iq ke payambar to hamii.n hai.n
jo auj pe rahte hai.n vo aKHtar to hamii.n hai.n
mai-paash jo sab par hai.n vo saaGar to hamii.n hai.n

Arsh Malsiyani
Nazm

aur jo dastaras mein nahin

jab vo Gusse me.n hotii hai to
kuchh bhii kah jaatii hai
dukh to hotaa hai par
asal me.n mujh ko tashviish rahtii hai
is baare jo
us ke ho.nTo.n pe aataa nahii.n
dil me.n rah jaataa hai
dost kitne hai.n jo
dil me.n aane se pahle hii bak dete hai.n
kahte rahte hai.n achchhii burii
aur vo dost jo har jagah
baiThaa rahtaa hai KHaamosh
bas sar hilaataa hai haa.n mai.n
magar kuchh bhii kahtaa nahii.n
ko.ii laavaa hai is me.n ubaltaa hu.aa
jaan.ne kaa use
kis qadar ishtiyaaq hai mujhe
maa.n kii aa.nkho.n me.n
rahmat kii ThanDak
mujhe maa.n ke haatho.n me.n
shafqat kii hiddat
mujhe maa.n ke dil me.n
du.aa.o.n kii kasrat
bahut hai yaqiinan bahut hai
magar mujh ko vo pyaar bhii dekhnaa hai
jo sattar gunaa hai
pahaa.Do.n se lag kar nazar ruk sii jaatii hai
dil un kii haibat se larzaa.n saa rahtaa hai
par kaa.npte kaa.npte bhii
yahii zehn me.n guu.njtaa hai
ki us paar kyaa hai
jo aa.nkho.n se ojhal hai
bas dekh letaa huu.n mai.n
nazm me.n nazm maujuud hai
nazm me.n nazm kaa zikr hai
haa.n magar
nazm se bhii ziyaada mujhe
nazm se maavaraa nazm kii fikr hai

Bilal Aswad
Nazm

wo dil hairan nahin hote

havaa aur dhuup kaa qarno.n puraanaa saath hai
aur zindagii mauj-e-ravaa.n hai
vo kisii pal ruk nahii.n saktii
na-jaane kitne barso.n kii ye pur-asraar tanhaa.ii
mire dil me.n
khajuuro.n ke daraKHto.n kii tarah
yuu.n iistaada hai
ki uj.De qartaba ke saare manzar
merii aa.nkho.n me.n larazte hai.n
na-jaane kitne barso.n kii udaasii ke
a.ndhere gumbado.n me.n guu.njte
jaa.n-soz andeshe
musalsal mujh pe yuurish karte hai.n
aur undulus ke kuucha-o-baazaar aur baaGo.n ko
faulaadii sumo.n se rau.ndte
gho.Do.n kii Taapo.n se
miraa siina dhamaktaa hai
mire ehsaas kii ye ranjishe.n
aur ruuh ke ye dukh kisii ik saa.at-e-saffaak ne
mujh ko nahii.n sau.npe
ki ye to asal me.n vo jaal hai
taariiKH kii mak.Dii jo sadiyo.n se
mire andar kahii.n
chup-chaap buntii hai
havaa aur dhuup merii zindagii ke manzaro.n me.n
be-sabaatii kii alaamat hai.n
zamii.n kii gardisho.n se tez hai
haalaat kii gardish
isii ne mere sar me.n KHaak Daalii hai
yahii to merii aa.nkho.n me.n
pighaltii barf kii diivaar chuntii hai
ye kis kii baat suntii hai
mirii saa.nso.n me.n
Garnaata kii dhuul
u.Dtii hai
aur KHaamosh dehlii kii
havaa.e.n sarsaraatii hai.n
huu.n
havaa kaa ruKH badalne par
vo dil hairaa.n nahii.n hote

Mubeen Mirza
Nazm

muntazar saya-e-muntazir aankhen

Gairat hai ki hayaa
naam us kaa na liyaa jis ko pukaaraa us ne
us ga.ii raat ke sannaaTe me.n kaun aayaa hai
band darvaaze ke majas me.n to siitaa hii hai
aur baahar
ko.ii raavan to nahii.n
kaun hai kaun kii sahmii sii sadaa
vo bhii kuchh kah na sakaa mai.n ke sivaa
dastake.n raam ke maKHsuus zabaa.n rakhtii hai.n
gosh-e-siitaa ke liye muzhda-e-jaa.n rakhtii hai.n
bulb raushan hu.aa aur chaap qadam kii ubhrii
chuu.Diyaa.n bol uThii.n
u.ngliyaa.n kaaTh kii mizraab pe phir re.ng ga.ii.n
dono.n paT KHvaab se chau.nke to ma.an chiiKH uThe
ek ha.ngaama hu.aa raat kaa afsuu.n TuuTaa
muntazar saaya-e-KHajaalat ke dhu.aa.n se ubhraa
raat kaafii hu.ii tum jaag rahii ho ab tak
aaj phir der hu.ii
asal me.n aaj ajab baat hu.ii
Thiik hai Thiik ko.ii baat nahii.n
muntazir shaaKH jo lachkii to ka.ii phuul jha.De
aap mu.nh haath to dho le.n pahle
aur minTo.n me.n mai.n saal ko zaraa garm karuu.n
pyaar kii aag bhii raushan hu.ii stove ke saath
dasht-e-tanhaa.ii ke ifriit bahut duur hu.e
vasvase jitne the dil me.n sabhii kaafuur hu.e
harakat aur haraarat me.n magan dono.n badan
ye kiraaya kaa makaa.n hai ki mohabbat kaa chaman
ek ek luqma pe hotii hai.n nigaahe.n do-chaar
ek ek jur.e me.n mahluul tabassum kii bahaar
muztarib dil me.n munavvar hai.n masarrat ke charaaG
jaanii-pahchaanii sii KHushbuu me.n hai mas.huur-e-dimaaG
aa.nkho.n aa.nkho.n me.n siyah raat kaTegii ab to
ho.nT se ho.nT kii sauGaat baTegii ab to

Zaheer Siddiqui
Nazm

jahan main hun

jahaa.n mai.n huu.n
hazaaro.n KHvaahishe.n aasuudgii kii zindagii kaa pairahan ban kar
mirii majbuuriyo.n ko apne daaman me.n chhupaatii hai.n
taKHayyul kaa jahaa.n aabaad gaahe kuchh na.e
lekin hazaaro.n vaqt-KHurda KHush-nazar gosho.n kii zindaanii
tilsmaatii fazaa me.n dilkashii kaa nuur bhartaa hai
inhii gosho.n me.n aavaara KHiraamii kii hikaayat
mujh ko kaif-e-sarmadii ke be-zabaa.n lamho.n kii
ra.anaa.ii se ham-aaGosh kartii hai
shabaana roz kii jehd-e-musalsal se
anokhii azmato.n ke daa.ero.n me.n laa ke naa-aasuudgii kii zindagii ko mai.n
kamaal-e-andaaz istiGnaa se apnaataa huu.n
apne jii me.n ye Thaane
ko.ii us ko na jaanegaa
ko.ii mujh ko na paa.egaa
zamaane kii haqiiqat me.n nigaaho.n ko
bhalaa rokaa kisii ne asal kii tag tak pahu.nchne se
ye merii dil-girafta kaifiyat jis ne
piyaa hai zindagii-bhar KHuun-e-rag-e-jaa.n kaa
barahna baat kahne par bhii mujh ko is tarah uryaa.n nahii.n kartii
nigaah-e-ahl-e-dil me.n faash kartii hai.n mujhe jaise
mirii majbuuriyaa.n jin kii pyaas ra.nj-e-mahruumii
tah-e-daaman lahuu se apne sii.nchaa thaa

Qayyum Nazar
Nazm

asal mein ye dasht tha

is me.n ye dasht thaa
is dasht me.n
maKHluuq kab vaarid hu.ii
KHudaa maaluum
lekin
sab ba.De buu.Dhe ye kahte hai.n
udhar ik dasht thaa
jaane kyuu.n un ko yahaa.n
lambii qataaro.n
shahr kii gunjaan galiyo.n
daftaro.n
shaah-raaho.n
raasto.n aur resturaano.n
jalse juluuso.n
railiyo.n aur
iivaan-haa-e-baalaa-o-ziirii.n me.n
KHush-libaasii ke bharam me.n
naachtii vahshat nazar aatii nahii.n

Khalid Karrar
Nazm

mushtarka KHwab ki qabr par

raat va.ade sabhii asal ke
jo na puure hu.e
kyuu.n kiye
kor aa.nkhe.n bhikaarii banii hai.n
mujassam savaalii banii hai.n
KHamoshii kaa kaasa liye
vasl kii rezgaarii ke hai.n muntazir
chhan chhanan
ko.ii aavaaz ko.ii bhii
KHushiyo.n ke sakuu.n se labrez aavaaz
aa.nkhe.n sunii.n
kaise lekin sunii.n

Dawood Rizwan
Nazm

nazm

laa.o zaraa pahan luu.n tumhe.n
tanhaa.ii utaar dii mai.n ne
baahar corridor me.n pa.Dii sisak rahii hai
apne dhiime lahje me.n
vo saarii daastaane.n sunaatii
jinhe.n sun kar mai.n dhiimii aa.nch par
pahro.n sulagtii thii
laa.o zaraa pahan luu.n tumhe.n
vo key-hole se jhaa.nk rahii hai
jaise ham mauqa paate hii
apne asal me.n jhaa.nkte hai.n
is se pahle ki vo
mujhe na.ngaa dekh paa.e
laa.o ek duusre kii asl me.n
shaamil ho jaa.e.n
mai.n apnii saarii shabnam
tumhaarii palko.n pe giraatii huu.n
tum merii saa.nso.n kii pagDanDii se
mere andar utar aa.o
mai.n Dhak jaa.uu.ngii
apnii asl kii amaa.n paa.uu.ngii
laa.o zaraa pahan luu.n tumhe.n

Shabnam Ashai
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now