Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "baadshah"

Nazm MATCHES FOR "baadshah"

Nazm

ye khel kya hai

agar mai.n samjhuu.n
ke ye jo mohre hai.n
sirf lak.Dii ke hai.n khilaune
to jiitnaa kyaa hai haarnaa kyaa
na ye zaruurii
na vo aham hai
agar KHushii hai na jiitne kii
na haarne kaa hii ko.ii Gam hai
to khel kyaa hai
mai.n sochtaa huu.n
jo khelnaa hai
to apne dil me.n yaqiin kar luu.n
ye mohre sach-much ke baadshaah o vaziir
sach-much ke hai.n payaade
aur in ke aage hai
dushmano.n kii vo fauj
rakhtii hai jo ki mujh ko tabaah karne ke
saare mansuube
sab iraade
magar aisaa jo maan bhii luu.n
to sochtaa huu.n
ye khel kab hai
ye ja.ng hai jis ko jiitnaa hai
ye ja.ng hai jis me.n sab hai jaa.ez
ko.ii ye kahtaa hai jaise mujh se
ye ja.ng bhii hai
ye khel bhii hai
ye ja.ng hai par khilaa.Diyo.n kii
ye khel hai ja.ng kii tarah kaa
mai.n sochtaa huu.n
jo khel hai
is me.n is tarah kaa usuul kyuu.n hai
ki ko.ii mohara rahe ki jaa.e
magar jo hai baadshaah
us par kabhii ko.ii aa.nch bhii na aa.e
vaziir hii ko hai bas ijaazat
ki jis taraf bhii vo chaahe jaa.e

Javed Akhtar
Nazm

intisab

aaj ke naam
aur
aaj ke Gam ke naam
aaj kaa Gam ki hai zindagii ke bhare gulsitaa.n se KHafaa
zard patto.n kaa ban
zard patto.n kaa ban jo miraa des hai
dard kii anjuman jo miraa des hai
clerko.n kii afsurda jaano.n ke naam
kirm-KHurda dilo.n aur zabaano.n ke naam
post-mano.n ke naam
taa.nge vaalo.n kaa naam
rail-baano.n ke naam
kaar-KHaano.n ke bhuuke jiyaalo.n ke naam
baadshaah-e-jahaa.n vaalii-e-maa-sivaa, naa.eb-ul-allaah fil-arz
dahqaa.n ke naam
jis ke Dhoro.n ko zaalim ha.nkaa le ga.e
jis kii beTii ko Daaku uThaa le ga.e
haath bhar khet se ek a.ngusht paTvaar ne kaaT lii hai
duusrii maaliye ke bahaane se sarkaar ne kaaT lii hai
jis kii pag zor vaalo.n ke paa.nv-tale
dhajjiyaa.n ho ga.ii hai
un dukhii maa.o.n ke naam
raat me.n jin ke bachche bilakte hai.n aur
nii.nd kii maar khaa.e hu.e baazu.o.n me.n sambhalte nahii.n
dukh bataate nahii.n
minnato.n zaariyo.n se bahalte nahii.n

Faiz Ahmad Faiz
Nazm

kisan

naazir-e-gul paasbaan-e-ra.ng-o-buu gulshan-panaah
naaz-parvar lahlahaatii khetiyo.n kaa baadshaah

Josh Malihabadi
Nazm

taj-mahal

yaa taaj qariine se abhii rakh ke zamii.n par
soyaa hai ko.ii baadshah-e-vaqt yahii.n par

Mahshar Badayuni
Nazm

raat

gayaa din hu.ii shaam aa.ii hai raat
KHudaa ne ajab shai banaa.ii hai raat
na ho raat to din kii pahchaan kyaa
uThaa.e maza din kaa insaan kyaa
hu.ii raat KHilqat chhuTii kaam se
KHamoshii sii chhaa.ii sar-e-shaam se
lage hone ab hot baazaar band
zamaane ke sab kaar behvaar band
musaafir ne din bhar kiyaa hai safar
sar-e-shaam manzil pe kholii kamar
daraKHto.n ke patte bhii chup ho ga.e
havaa tham ga.ii pe.D bhii so ga.e
a.ndheraa ujaale pe Gaalib hu.aa
har ik shaKHs raahat kaa taalib hu.aa
hu.e raushan aabaadiyo.n me.n charaaG
hu.aa sab ko mehnat se haasil faraaG
kisaan ab chalaa khet ko chho.D kar
ki ghar me.n kare chain se shab basar
Gariib aadmii jo ki mazduur hai.n
mashaqqat se jin ke badan chuur hai.n
vo din bhar kii mehnat ke maare hu.e
vo maa.nde thake aur haare hu.e
nihaayat KHushii se ga.e apne ghar
hu.e baal bachche bhii KHush dekh kar
ga.e bhuul sab kaam-dhandhe kaa Gam
savere ko uTThe.nge ab taaza-dam
kahaa.n chain ye baadshah ko nasiib
ki jis be-Gamii se hai.n sote Gariib

Ismail Merathi
Nazm

fana

duniyaa me.n ko.ii shaad ko.ii dard-naak hai
yaa KHush hai yaa alam ke sabab siina-chaak hai
har ek dam se jaan kaa har-dam tapaak hai
naapaak tan paliid najis yaa ki paak hai
jo KHaak se banaa hai vo aaKHir ko KHaak hai
hai aadmii kii zaat kaa us jaa ba.Daa zuhuur
le arsh taa-ba-farsh chamaktaa hai jis kaa nuur
guzre hai un kii qabr pe jab vahsh aur tuyuur
ro ro yahii kahe hai har ik qabr ke huzuur
jo KHaak se banaa hai vo aaKHir ko KHaak hai
duniyaa se jab ki ambiyaa aur auliyaa uThe
ajsaam-e-paak un ke isii KHaak me.n rahe
ruuhe.n hai.n KHuub jaan me.n ruuho.n ke hai.n maze
par jism se to ab yahii saabit hu.aa mujhe
jo KHaak se banaa hai vo aaKHir ko KHaak hai.n
vo shaKHs the jo saat vilaayat ke baadshaah
hashmat me.n jin kii arsh se uu.nchii thii baargaah
marte hii un ke tan hu.e galiyo.n kii KHaak-e-raah
ab un ke haal kii bhii yahii baat hai gavaah
jo KHaak se banaa hai vo aaKHir ko KHaak hai
kis kis tarah ke ho ga.e mahbuub-e-kaj-kulaah
tan jin ke misl-e-phuul the aur mu.nh bhii rashk-e-maah
jaatii hai un kii qabr pe jis-dam mirii nigaah
rotaa huu.n jab to mai.n yahii kah kah ke dil me.n aah
jo KHaak se banaa hai vo aaKHir ko KHaak hai
vo gore gore tan ki jinho.n kii thii dil me.n jaa.e
hote the maile un ke ko.ii haath gar lagaa.e
so vaise tan ko KHaak banaa kar havaa u.Daa.e
ronaa mujhe to aataa hai ab kyaa kahuu.n mai.n haa.e
jo KHaak se banaa hai vo aaKHir ko KHaak hai
umdo.n ke tan ko taa.nbe ke sanduuq me.n dharaa
muflis kaa tan pa.Daa rahaa maaTii-upar pa.Daa
qaa.em yahaa.n ye aur na saabit vo vaa.n rahaa
dono.n ko KHaak khaa ga.ii yaaro kahuu.n me.n kyaa
jo KHaak se banaa hai vo aaKHir ko KHaak hai
gar ek ko hazaar ruupe kaa milaa kafan
aur ek yuu.n pa.Daa rahaa hai be-kas barhana-tan
kii.De mako.De khaa ga.e dono.n ke tan-badan
dekhaa jo ham ne aah to sach hai yahii suKHan
jo KHaak se banaa hai vo aaKHir ko KHaak hai
jitne jahaa.n me.n naach hai.n ka.ngnii se taa-gehuu.n
aur jitne meva-jaat hai.n tar KHushk guunaaguu.n
kap.De jahaa.n talak hai.n sapiida o siyah numuu.n
kim-KHvaab taash baadila kis kis kaa naam luu.n
jo KHaak se banaa hai vo aaKHir ko KHaak hai
jitne daraKHt dekho ho buuTe se taa-ba-jhaa.D
ba.D piipal aa.nb niib chhu.aaraa khajuur taa.D
sab KHaak ho.nge jab ki fanaa Daalegii ukhaa.D
kiyaa buuTe Dhe.Dh paat ke kyaa jhaa.D kyaa pahaa.D
jo KHaak se banaa hai vo aaKHir ko KHaak hai
jitnaa ye KHaak kaa hai tilismaat ban rahaa
phir KHaak us ko hotaa hai yaaro judaa judaa
tarkaarii saag paat zahr amrit aur davaa
zar siim kau.Dii laal zamurrad aur in savaa
jo KHaak se banaa hai vo aaKHir ko KHaak hai
ga.D.h coat top rahakla teG o kamaan-o-tiir
baaG-o-chaman mahall-o-makaanaat dil-paziir
honaa hai sab ko aah isii KHaak me.n KHamiir
merii zabaa.n pe ab to yahii baat hai 'naziir'
jo KHaak se banaa hai vo aaKHir ko KHaak hai

Nazeer Akbarabadi
Nazm

qissa gul-baadshah ka

naam meraa hai gul-baadshaah
umr merii hai terah baras
aur kahaanii
merii umar kii tarah se muntashir muntashir
muKHtasar muKHtasar

Zehra Nigaah
Nazm

nazm kya hai

shaa.irii kii do sinfe.n hai.n nazm-o-Gazal
urdu me.n in kii shohrat hai bachcho aTal
nazm paaband hai nazm aazaad bhii
ye kabhii nasr hai aur muarra kabhii
nazm-e-paaband me.n vazn hogaa myaa.n
aur aazaad me.n bhii hai is kaa nishaa.n
nazm-e-paaband kaa tarz hai jo latiif
is me.n paa.oge tum qaafiya-o-radiif
nasrii nazmo.n me.n bas nasr hii nasr hai
vazn aur qaafiya hai na hii bahr hai
vazn aur qaafiye jin ko mushkil hu.e
nasrii nazme.n umuuman vo kahte lage
vazn nazm-e-muarra me.n hai dosto
is ko tum be-radiif-o-qavaafii kaho
masnavii ho qasiida ho yaa marsiya
nazm kaa miltaa hai bachcho ham ko pataa
nazm me.n silsila hai KHayaalaat kaa
ek dariyaa saa hai dekho jazbaat kaa
vo muKHammas ho yaa ho musaddas ko.ii
ye bhii ik shakl hai nazm-e-paaband kii
vo Gazal ho ki ho nazm bachcho suno
dono.n yaksaa.n hai.n shohrat me.n bas jaan lo
'josh' kii nazme.n mash.huur hai.n har jagah
hai.n Gazal ke 'jigar' vaaqa.ii baadshah
nazm me.n jo kahaanii kahii jaa.egii
shauq se ai miyaa.n vo sunii jaa.egii
nazme.n siimaab-o-iqbaal ne bhii likhii.n
jo nihaayat hii mash.huur saabit hu.ii.n
kartaa huu.n bachcho.n ke vaaste mai.n du.aa
nazme.n bachcho.n kii likhtaa huu.n 'haafiz' sadaa

Hafiz Karnataki
Nazm

dilli dangon ke beach

dharm ke naam pe qaatil kii himaayat karnaa
aur phir mulk ke jalne kii shikaayat karnaa
kitnaa aasaan hai hinduu-o-musalmaa.n honaa
sirf mushkil hai kisii shaKHs kaa insaa.n honaa
zulm kii dhuup-o-imkaa.n bhii nahii.n chhaa.nv kaa
ek saa haal hai ab gaa.nv kaa sahraa.o.n kaa
aise haalaat me.n aa.nkho.n me.n lahuu ko laa.o
naGma-e-ishq ko sab zor se gaa.o gaa.o
ko.ii bhii daaG na nafrat kaa jabii.n par aa.e
baadshaah bahraa hai ab zor se chiiKHaa jaa.e

Ashu Mishra
Nazm

holi

kahaa kisii ne ki ai baadshaah-e-mah-ruu yaa.n
safed-o-zard ye aapas me.n la.D rahe hai.n yahaa.n
ye sun ke aap vo dono.n ke aa gayaa darmiyaa.n
idhar se thaa.nbaa use aur udhar us ko ki haa.n
tum is qadar na karo iKHtilaal holii me.n

Nazeer Akbarabadi
Nazm

jhonpaDa

ye tan jo hai har ik ke utaare kaa jho.npa.Daa
is se hai ab bhii sab ke sahaare kaa jho.npa.Daa
is se hai baadshah ke nazaare kaa jho.npa.Daa
is me.n hii hai faqiir bichaare kaa jho.npa.Daa
apnaa na mol kaa na ijaare kaa jho.npa.Daa
baabaa ye tan hai dam ke guzaare kaa jho.npa.Daa
is me.n hii bhole-bhaale isii me.n siyaane hai.n
is me.n hii hoshiyaar isii me.n divaane hai.n
is me.n hii dushman is me.n hii apne begaane hai.n
shaa-jho.npa.Daa bhii apne isii me.n namaane hai.n
apnaa na mol hai na ijaare kaa jho.npa.Daa
baabaa ye tan hai dam ke guzaare kaa jho.npa.Daa
is me.n hii log ishq-o-mohabbat ke maare hai.n
is me.n hii shoKH husn ke chaa.nd aur sitaare hai.n
is me.n hii yaar-dost isii me.n piyaare hai.n
shaa-jho.npa.Daa bhii apne isii me.n bichaare hai.n
apnaa na mol hai na ijaare kaa jho.npa.Daa
baabaa ye tan hai dam ke guzaare kaa jho.npa.Daa
is me.n hii ahl-e-daulat-o-mun.im amiir hai.n
is me.n hii rahte saare jahaa.n ke faqiir hai.n
is me.n hii shaah aur isii me.n vaziir hai.n
is me.n hii hai.n saGiir isii me.n kabiir hai.n
itnaa na mol kaa na ijaare kaa jho.npa.Daa
baabaa ye tan hai dam ke guzaare kaa jho.npa.Daa
is me.n hii chor-Thag hai.n isii me.n amol hai.n
is me.n hii ronii shakl isii me.n ThiThol hai.n
is me.n hii baaje aur naqaare-o-Dhol hai.n
shaa-jho.npa.Daa bhii is me.n hii karte kalol hai.n
itnaa na mol kaa na ijaare kaa jho.npa.Daa
baabaa ye tan hai dam ke guzaare kaa jho.npa.Daa
is me.n hii paarsaa hai.n isii me.n tavand hai.n
bedard bhii isii me.n hai aur dardmand hai.n
is me.n hii sab parand isii me.n charand hai.n
shaa-jho.npa.Daa bhii ab isii Dar be band hai.n
itnaa na mol kaa na ijaare kaa jho.npa.Daa
baabaa ye tan hai dam ke guzaare kaa jho.npa.Daa
is jho.npa.De me.n rahte hai.n sab shaah aur vaziir
is me.n vakiil baKHshii o mutasaddi aur amiir
is me.n hii sab Gariib hai.n is me.n hii sab faqiir
shaa-jho.npa.Daa jo kahte hai.n sach hai miyaa.n 'naziir'
itnaa na mol kaa na ijaare kaa jho.npa.Daa
baabaa ye tan hai dam ke guzaare kaa jho.npa.Daa

Nazeer Akbarabadi
Nazm

gandhi-jayanti

bhuul ga.ii hai aaj to rahbar-e-haq-nigaah ko
bhuul ga.ii hai aaj tuu mard-e-jahaa.n-panaah ko
bhuul ga.ii hai aaj tuu zabt ke baadshaah ko
tujh se kahuu.n to kyaa kahuu.n ai mirii baa-muraad qaum
ai mirii zindabaad qaum ai mirii zindabaad qaum
tere mahant to abhii mast hai.n zaat-paat me.n
tere ba.De ba.De guruu Garq hai.n chhuut-chhaat me.n
aah ki Dhuu.nDhtii hai tuu nuur a.ndherii raat me.n
tujh se kahuu.n to kyaa kahuu.n ai mirii baa-muraad qaum
ai mirii zindabaad qaum ai mirii zindabaad qaum
aah ki tuu ne zabt ke dars ko bhii bhulaa diyaa
aah ki tuu ne qalb se naam-e-safaa miTaa diyaa
aah ki dosto.n ko bhii tuu ne aduu banaa diyaa
tujh se kahuu.n to kyaa kahuu.n ai mirii baa-muraad qaum
ai mirii zindabaad qaum ai mirii zindabaad qaum
tere mushiir be-amal tere vaziir be-amal
tere Gariib be-amal tere amiir be-amal
tere safiir be-amal tere kabiir be-amal
tujh se kahuu.n to kyaa kahuu.n ai mirii baa-muraad qaum
ai mirii zindabaad qaum ai mirii zindabaad qaum
uf ki qadam qadam pe hai teraa shariik ahrman
uf ki tujhe nasiib hai.n firqa-parast raahzan
uf ki tujhe aziiz hai.n charb-zabaan-o-bad-suKHan
tujh se kahuu.n to kyaa kahuu.n ai mirii baa-muraad qaum
ai mirii zindabaad qaum ai mirii zindabaad qaum
uf ki jahaalato.n pe bhii aql kaa hai gumaa.n tujhe
uf ki abhii pasand hai jahl kii daastaa.n tujhe
uf ki hai firqa dostii detii abhii amaa.n tujhe
tujh se kahuu.n to kyaa kahuu.n ai mirii baa-muraad qaum
ai mirii zindabaad qaum ai mirii zindabaad qaum
zulm kiye hai.n tuu ne jo zulm ke shaahido.n se puuchh
qatl kiye hai.n kis qadar apne mujaahido.n se puuchh
piite hai.n roz kitnii mai jhuuT ke zaahido.n se puuchh
tujh se kahuu.n to kyaa kahuu.n ai mirii baa-muraad qaum
ai mirii zindabaad qaum ai mirii zindabaad qaum
dars-e-mahaatmaa kaa bhii tujh par ko.ii asar nahii.n
qaul-e-mahaatmaa pe bhii aaj tirii nazar nahii.n
kaun hai us kaa jaa-nashii.n is kii tujhe KHabar nahii.n
tujh se kahuu.n to kyaa kahuu.n ai mirii baa-muraad qaum
ai mirii zindabaad qaum ai mirii zindabaad qaum
tujh ko bataa.e kaun aaj asl me.n raahbar hai kaun
tujh ko bataa.e kaun aaj banda-e-mo.tabar hai kaun
tujh ko bataa.e kaun aaj piir-e-javaa.n-nazar hai kaun
tujh se kahuu.n to kyaa kahuu.n ai mirii baa-muraad qaum
ai mirii zindabaad qaum ai mirii zindabaad qaum
dekh na chashm-e-shauq se pattharo.n ke to taur tuu
qadr-e-javaahar-e-hasii.n dekh ba-chashm-e-Gaur tuu
varna hazaar zillate.n tere liye hai.n aur tuu
tujh se kahuu.n to kyaa kahuu.n ai mirii baa-muraad qaum
ai mirii zindabaad qaum ai mirii zindabaad qaum

Arsh Malsiyani
Nazm

unhen mujhse shikayat hai

unhe.n mujh se shikaayat hai ki mai.n maazii me.n jiitii huu.n
mire ash.aar me.n aaseb hai.n guzre zamaano.n ke
vo kahte hai.n kii yaade.n saa.e kii maanind mere saath rahtii hai.n
ye sach hai is se kab inkaar hai mujh ko
mai.n aksar jaagte din me.n bhii aa.nkhe.n muu.nd letii huu.n
ko.ii suurat ko.ii aavaaz ko.ii zaa.iqa yaa lams jab jaaduu jagaataa hai
to gard-aaluud miinaa-taur tasviire.n achaanak bolne lagtii hai.n naaTak-manch sajtaa hai
kisii TuuTe hu.e sanduuq me.n rakkhe hu.e
bosiida maKHtuute se ko.ii daastaa.n tamsiil ban jaatii hai
jii uThte hai.n sab kirdaar maazii ke
sipaahii baadshaah KHil.at navaadir raqs-o-mausiiqii
kisii ke paa.nv me.n paa.el dhanak aa.nchal
kisii shamshiir kii bijlii ghanii barsaat kii badlii
kisii baara-darii me.n raag diipak kaa
kisii sehn-e-gulistaa.n me.n kadam ke pe.D par baiThii hu.ii chi.Diyaa.n
achaanak jaag jaatii hai.n
kisii gumnaam qasbe me.n ko.ii TuuTii hu.ii mehraab KHasta-haal-Dev.Dhii kii jhalak
ma.aduum kar detii hai hotel chaa.e-KHaane bas ke adde Dher kuu.De ke
ka.ii sadiyaa.n guzar jaatii hai.n sar se
aur ko.ii gum-gashta shahr-e-raftagaa.n bedaar hotaa hai
isii manzar kaa hissa ban ke mai.n tasviir ho jaatii huu.n kho jaatii huu.n maazii me.n
me.n aksar aabnaa-e-vaqt par kaaGaz kii naav Daal detii huu.n
to paanii apnaa rasta mo.D detaa hai
mai.n jab chaahuu.n
salonii saa.nvlii naT-khaT madhur yaade.n uThaa laa.uu.n la.Dakpan ke gharo.ndo.n se
mai.n jab chaahuu.n to kaalii koTharii me.n qaid
ranjiida pashemaa.n zaKHm-KHuurda-saa.ato.n biite dino.n ko pyaar se chhuu kar
dilaasa duu.n thapak kar loriyaa.n duu.n
KHuub ro.uu.n KHuub ro.uu.n shaant ho jaa.uu.n
ye maazii meraa maazii hai
faqat mere tasarruf me.n hai
merii milkiyyat hai meraa virsa hai
na meraa haal par bas hai
aur aane vaalaa kal bhii kis ne dekhaa hai

Azra Naqvi
Nazm

bahadur shah zafar

ik yahaa.n baadshaah thaa bachcho
mulk kaa KHair-KHvaah thaa bachcho
sab ko bhaatii thii nek KHuu us kii
KHuub lagtii thii guftuguu us kii
vo ki sher-o-adab kaa maahir thaa
dar-haqiiqat aziim shaa.ir thaa
naam us ne abuu zafar paayaa
aaKHirii taajdaar kahlaayaa
us kii azmat pe dil hai farsh-e-raah
us ko kahte the sab bahaadur shaah
taKHt-e-dillii pe hukmaraa.n thaa vo
muGliya daur kaa nishaa.n thaa vo
ahal-e-hindostaa.n kaa qaa.id thaa
vo muhibb-e-vatan mujaahid thaa
raas us ko na taKHt-e-shaahii thaa
vo ki is baa-vafaa sipaahii thaa
us ke apne hii ek rishta-daar
na.ng-e-hindostaa.n hu.e Gaddaar
kar ke a.ngrez be-bas-o-majbuur
le ga.e phir use vatan se duur
zulm a.ngrez kaa sahaa barso.n
qaid ra.nguun me.n rahaa barso.n

Murtaza Sahil Tasleemi
Nazm

ek aanch ki kami

tiir kamaan se niklaa
aur baadshaah ban gayaa
shahzaada mahal se niklaa
aur jogii ban gayaa
KHayaal apne madaar se niklaa
aur nazm kyuu.n na ban sakaa

Asghar Nadeem Syed
Nazm

ghaalib aur aam

na the shaa.ir hii kuchh ba.De Gaalib
dil-lagii me.n bhii KHuub the Gaalib
KHuub ha.nste ha.nsaate rahte the
ba.Dii pur-lutf baat kahte the
aam un ko pasand the behad
ya.anii rasiyaa the aam ke behad
KHud bhii baazaar se ma.ngaate the
dost bhii aam un ko bhijvaate
phir bhii aamo.n se jii na bhartaa thaa
aam kaa shauq un ko itnaa thaa
un ke qisse tumhe.n sunaa.e.n ham
un kii baato.n se kuchh ha.nsaa.e.n ham
ek mahfil me.n vo bhii baiThe the
log aamo.n kaa zikr karte the
aam aisaa ho aam vaisaa ho
puuchhaa Gaalib se aam kaisaa ho
bole Gaalib ki puuchhte ho agar
sirf do KHuubiyo.n pe rakhiye nazar
baat pahlii ye hai ki miiThaa ho
duusrii baat ye bahut saa ho
ek din dost un ke ghar aa.e
aam Gaalib ne the bahut khaa.e
saamne ghar ke the pa.De chhilke
us galii me.n se kuchh gadhe guzre
un gadho.n ne na chhilke vo khaa.e
suu.ngh kar un ko ba.Dh ga.e aage
dost ne jab ye maajraa dekhaa
sochaa Gaalib ko ab hai samjhaanaa
dost bole hai shai burii sii aam
dekho khaate nahii.n gad.he bhii aam
ha.ns ke Gaalib ye dost se bole
jii haa.n be-shak gad.he nahii.n khaate
baadshah kar rahe the sair-e-baaG
KHush thaa aamo.n se un kaa qalb-o-dimaaG
baadshah ke the saath Gaalib bhii
Daalte the nazar vo lalchaa.ii
jii me.n ye thaa ki KHuub khaa.e.n aam
baadshah se jo aaj paa.e.n aam
ghuurte the jo Gaalib aamo.n ko
baadshah bole ghuurte kyaa ho
baadshah se ye bole vo ha.ns kar
muhr hotii hai daane daane par
dekhtaa huu.n yuu.n ghuur kar mai.n aam
shaayad un par likhaa ho meraa naam
maqsad un kaa jo baadshah paa.e
phir bahut aam un ko bhijvaa.e

Maftun Kotvi
Nazm

baadshah teri dahliz ka darban hai

ashtaar
ai aasmaano.n kii malika
baadshaah terii dahliiz kaa darbaan hai
lagaash
aur
aur
arj me.n
tere naam kaa sikka Dhaltaa hai
terii zulfe.n
zafar-mand lashkar kaa phareraa hai.n
aur
chehra
sub.h ke mashriq kaa aasmaan
furaat kaa chamaktaa paanii
teraa aa.iina hai
ku.nvaariyaa.n
tere muqaddas ahaate me.n
apnii ismat kaa sunahraa sikka
bhe.nT karne aatii hai.n

Jawaz Jafri
Nazm

kya KHabar thi

kyaa KHabar thii riyaasat-e-islaam
mujrmo.n kii panaah bhii hogii
kyaa KHabar thii ye adl kii jaagiir
rahm kii qatl-gaah bhii hogii
paa.e.nge dushmanaan-e-dii.n e.azaaz
qaatilo.n kii rifaah bhii hogii
zulm ke haath me.n asaa hogaa
aur sar par kulaah bhii hogii
jahl paa.egaa ilm par sabqat
aur KHirad gard-e-raah bhii hogii
a.alaa ohdo.n pe ho.nge sab naa-ahl
tang-nazarii athaah bhii hogii
ghaat me.n hogii fauj apnii bhii
dushmano.n kii sipaah bhii hogii
baadshah ke jo giit gaa.e.nge
un kii jaanib nigaah bhii hogii
jo likhegaa qasiida-e-shaahii
us ko taa.iid-e-shaah bhii hogii
jurm ho jaa.egaa bahut arzaa.n
ishtihaa-e-gunaah bhii hogii
sirf Gaddaar paa.e.nge tamGe
un kii hii izz-o-jaah bhii hogii
log har zulm par rahe.nge chup
is tarah se nibaah bhii hogii
qaum ta.Dpegii daad le.nge vaziir
aah bhii hogii vaah bhii hogii
phir giraanii kaa aa.egaa tuufaan
muflisii be-panaah bhii hogii
khul ke hogii zaKHiira-andozii
aur safed-o-siyaah bhii hogii
to.De.nge kamar avaam kii tex
aur ma.iishat tabaah bhii hogii
Gam kii parchhaa.iyo.n se arz-e-vatan
kyaa KHabar thii siyaah bhii hogii
aur vo vaqt phir se aa.egaa
jab taraqqii kii chaah bhii hogii
log maa.nge.nge ik na.ii hijrat
chal pa.De.nge to raah bhii hogii

Muhammad Rashid Athar
Nazm

payaade

shatranj kii bisaat par
baadshaah qil.a-band rahtaa hai
ja.ng vaziir la.Dtaa hai
baadshaah kii saarii ummiide.n
vaziir se vaabasta yuu.nhii hai.n
vaziir apne mohro.n ko tahaffuz detaa hai
duusre ke mohro.n ko shikaar kartaa hai
khel aage ba.Dhtaa hai
qilo.n me.n shigaaf pa.D jaataa hai
vaziir agle mahaaz par la.Dte la.Dte
kaam aa jaataa hai
lekin baazii KHatm nahii.n hotii
baadshaah qil.e se nikaltaa hai
pyaado.n par bharosaa kartaa hai
payaade hausla paate hai.n
raah kii rukaavaTe.n haTaate hai.n
aage ba.Dhte ba.Dhte
kuchh der me.n
vaziir ban jaate hai.n

Mubashshir Ali Zaidi
Nazm

mamul

mai.n bhii baadshaah kii hukuumat kaa
munkir huu.n
lekin jiine kii aarzuu me.n
roz us kii chaukhaT par
suuraj saa ubhartaa huu.n
shaam saa Duubtaa huu.n
ghar me.n
elaan-e-baGaavat ke taur par
biivii bachcho.n ko maartaa huu.n
raat raat jaagtaa huu.n

Farhat Ehsas
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now