Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "baalaa"

Nazm MATCHES FOR "baalaa"

Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

aawara

muntazir hai ek tuufaan-e-balaa mere liye
ab bhii jaane kitne darvaaze hai.n vaa mere liye
par musiibat hai miraa ahd-e-vafaa mere liye
ai Gam-e-dil kyaa karuu.n ai vahshat-e-dil kyaa karuu.n

Asrarul Haq Majaz
Nazm

shayad

mashaam-e-jaa.n me.n mere aashtii-mandaana aatii ho
judaa.ii me.n balaa kaa iltifaat-e-mehramaana hai

Jaun Eliya
Nazm

dil-e-man musafir-e-man

mire dil, mire musaafir
hu.aa phir se hukm saadir
ki vatan-badar ho.n ham tum
de.n galii galii sadaa.e.n
kare.n ruKH nagar nagar, kaa
ki suraaG ko.ii paa.e.n
kisii yaar-e-naama-bar kaa
har ik ajnabii se puuchhe.n
jo pataa thaa apne ghar kaa
sar-e-kuu-e-naa-shanaayaa.n
hame.n din se raat karnaa
kabhii is se baat karnaa
kabhii us se baat karnaa
tumhe.n kyaa kahuu.n ki kyaa hai
shab-e-Gam burii balaa hai
hame.n ye bhii thaa Ganiimat
jo ko.ii shumaar hotaa
hame.n kyaa buraa thaa marnaa
agar ek baar hotaa!

Faiz Ahmad Faiz
Nazm

safar ke waqt

bahut sataatii ho jaanam bahut sataatii ho
mai.n bhuul jaa.uu.n magar kaise bhuul jaa.uu.n bhalaa
azaab-e-jaa.n kii haqiiqat kaa apnii afsaana
mire safar ke vo lamhe tumhaarii pur-haalii
vo baat baat mujhe baar baar samjhaanaa

Jaun Eliya
Nazm

masjid-e-qurtuba

silsila-e-roz-o-shab naqsh-gar-e-haadsaat
silsila-e-roz-o-shab asl-e-hayaat-o-mamaat
silsila-e-roz-o-shab taar-e-hariir-e-do-ra.ng
jis se banaatii hai zaat apnii qabaa-e-sifaat
silsila-e-roz-o-shab saaz-e-azal kii fuGaa.n
jis se dikhaatii hai zaat zer-o-bam-e-mumkinaat
tujh ko parakhtaa hai ye mujh ko parakhtaa hai ye
silsila-e-roz-o-shab sairafi-e-kaa.enaat
tuu ho agar kam ayaar mai.n huu.n agar kam ayaar
maut hai terii baraat maut hai merii baraat
tere shab-o-roz kii aur haqiiqat hai kyaa
ek zamaane kii rau jis me.n na din hai na raat
aani-o-faanii tamaam mojaza-haa-e-hunar
kaar-e-jahaa.n be-sabaat kaar-e-jahaa.n be-sabaat
avval o aaKHir fanaa baatin o zaahir fanaa
naqsh-e-kuhan ho ki nau manzil-e-aaKHir fanaa
hai magar is naqsh me.n ra.ng-e-sabaat-e-davaam
jis ko kiyaa ho kisii mard-e-KHudaa ne tamaam
mard-e-KHudaa kaa amal ishq se saahab faroG
ishq hai asl-e-hayaat maut hai us par haraam
tund o subuk-sair hai garche zamaane kii rau
ishq KHud ik sail hai sail ko letaa hai thaam
ishq kii taqviim me.n asr-e-ravaa.n ke sivaa
aur zamaane bhii hai.n jin kaa nahii.n ko.ii naam
ishq dam-e-jibra.iil ishq dil-e-mustafaa
ishq KHudaa kaa rasuul ishq KHudaa kaa kalaam
ishq kii mastii se hai paikar-e-gil taabnaak
ishq hai sahbaa-e-KHaam ishq hai kaas-ul-karaam
ishq faqiih-e-haram ishq amiir-e-junuuud
ishq hai ibnus-sabiil is ke hazaaro.n maqaam
ishq ke mizraab se naGma-e-taar-e-hayaat
ishq se nuur-e-hayaat ishq se naar-e-hayaat
ai haram-e-qurtuba ishq se teraa vajuud
ishq saraapaa davaam jis me.n nahii.n raft o buud
ra.ng ho yaa KHisht o sang cha.ng ho yaa harf o saut
mojaza-e-fan kii hai KHuun-e-jigar se numuud
qatra-e-KHuun-e-jigar sil ko banaataa hai dil
KHuun-e-jigar se sadaa soz o suruur o suruud
terii fazaa dil-faroz merii navaa siina-soz
tujh se dilo.n kaa huzuur mujh se dilo.n kii kushuud
arsh-e-mo.allaa se kam siina-e-aadam nahii.n
garche kaf-e-KHaak kii had hai sip.har-e-kabuud
paikar-e-nuurii ko hai sajda mayassar to kyaa
us ko mayassar nahii.n soz-o-gudaaz-e-sajuud
kaafir-e-hindi huu.n mai.n dekh miraa zauq o shauq
dil me.n salaat o duruud lab pe salaat o duruud
shauq mirii lai me.n hai shauq mirii nai me.n hai
naGma-e-allaah-huu mere rag-o-pai me.n hai
teraa jalaal o jamaal mard-e-KHudaa kii daliil
vo bhii jaliil o jamiil tuu bhii jaliil o jamiil
terii binaa paa.edaar tere sutuu.n be-shumaar
shaam ke sahraa me.n ho jaise hujuum-e-nuKHiil
tere dar-o-baam par vaadii-e-aiman kaa nuur
teraa minaar-e-buland jalva-gah-e-jibra.iil
miT nahii.n saktaa kabhii mard-e-musalmaa.n ki hai
us kii azaano.n se faash sirr-e-kaliim-o-KHaliil
us kii zamii.n be-huduud us kaa ufuq be-saGuur
us ke samundar kii mauj dajla o danyuub o niil
us ke zamaane ajiib us ke fasaane Gariib
ahd-e-kuhan ko diyaa us ne payaam-e-rahiil
saaqi-e-rabaab-e-zauq faaras-e-maidaan-e-shauq
baada hai us kaa rahiiq teG hai us kii asiil
mard-e-sipaahii hai vo us kii zirah laa-ilaah
saaya-e-shamshiir me.n us kii panah laa-ilaah
tujh se hu.aa aashkaar banda-e-momin kaa raaz
us ke dino.n kii tapish us kii shabo.n kaa gudaaz
us kaa maqaam-e-buland us kaa KHayaal-e-aziim
us kaa suruur us kaa shauq us kaa niyaaz us kaa naaz
haath hai allaah kaa banda-e-momin kaa haath
Gaalib o kaar-aafrii.n kaar-kushaa kaarsaaz
KHaakii o nuurii-nihaad banda-e-maulaa-sifaat
har do-jahaa.n se Ganii us kaa dil-e-be-niyaaz
us kii umiide.n qaliil us ke maqaasid jaliil
us kii adaa dil-fareb us kii nigah dil-navaaz
aaj bhii is des me.n aam hai chashm-e-Gazaal
aur nigaaho.n ke tiir aaj bhii hai.n dil-nashii.n
buu-e-yaman aaj bhii us kii havaa.o.n me.n hai
ra.ng-e-hijaaz aaj bhii us kii navaa.o.n me.n hai
diida-e-anjum me.n hai terii zamii.n aasmaa.n
aah ki sadiyo.n se hai terii fazaa be-azaa.n
kaun sii vaadii me.n hai kaun sii manzil me.n hai
ishq-e-balaa-KHez kaa qaafla-e-saKHt-jaa.n
dekh chukaa almanii shorish-e-islaah-e-dii.n
jis ne na chho.De kahii.n naqsh-e-kuhan ke nishaa.n
harf-e-Galat ban ga.ii ismat-e-piir-e-kunisht
aur hu.ii fikr kii kashti-e-naazuk ravaa.n
chashm-e-faraansiis bhii dekh chukii inqalaab
jis se digar-guu.n hu.aa maGrabiyo.n kaa jahaa.n
millat-e-ruumii-nizhaad kohna-parastii se piir
lazzat-e-tajdiida se vo bhii hu.ii phir javaa.n
ruuh-e-musalmaa.n me.n hai aaj vahii iztiraab
raaz-e-KHudaa.ii hai ye kah nahii.n saktii zabaa.n
narm dam-e-guftuguu garm dam-e-justujuu
razm ho yaa bazm ho paak-dil o paak-baaz
nuqta-e-parkaar-e-haq mard-e-KHudaa kaa yaqii.n
aur ye aalam tamaam vahm o tilism o majaaz
aql kii manzil hai vo ishq kaa haasil hai vo
halqa-e-aafaaq me.n garmi-e-mahfil hai vo
kaaba-e-arbaab-e-fan satvat-e-diin-e-mubii.n
tujh se haram martabat undulusiyo.n kii zamii.n
hai tah-e-garduu.n agar husn me.n terii naziir
qalb-e-musalmaa.n me.n hai aur nahii.n hai kahii.n
aah vo mardaan-e-haq vo arabii shahsavaar
haamil-e-KHalq-e-aziim saahab-e-sidq-o-yaqii.n
jin kii hukuumat se hai faash ye ramz-e-Gariib
saltanat-e-ahl-e-dil faqr hai shaahii nahii.n
jin kii nigaaho.n ne kii tarbiyat-e-sharq-o-Garb
zulmat-e-europe me.n thii jin kii KHirad-raah-bii.n
jin ke lahuu ke tufail aaj bhii hai.n undulusii
KHush-dil o garam-iKHtilaat saada o raushan-jabii.n
dekhiye is bahr kii tah se uchhaltaa hai kyaa
gumbad-e-niilofarii rang badaltaa hai kyaa
vaadi-e-koh-saar me.n Garq-e-shafaq hai sahaab
laal-e-badaKHshaa.n ke Dher chho.D gayaa aaftaab
saada o pur-soz hai duKHtar-e-dahqaa.n kaa giit
kashtii-e-dil ke liye sail hai ahd-e-shabaab
aab-e-ravaan-e-kabiir tere kinaare ko.ii
dekh rahaa hai kisii aur zamaane kaa KHvaab
aalam-e-nau hai abhii parda-e-taqdiir me.n
merii nigaaho.n me.n hai us kii sahar be-hijaab
parda uThaa duu.n agar chehra-e-afkaar se
laa na sakegaa fara.ng merii navaa.o.n kii taab
jis me.n na ho inqalaab maut hai vo zindagii
ruuh-e-umam kii hayaat kashmakash-e-inqilaab
suurat-e-shamshiir hai dast-e-qazaa me.n vo qaum
kartii hai jo har zamaa.n apne amal kaa hisaab
naqsh hai.n sab naa-tamaam KHuun-e-jigar ke baGair
naGma hai saudaa-e-KHaam KHuun-e-jigar ke baGair

Allama Iqbal
Nazm

taswir-e-dard

nahii.n minnat-kash-e-taab-e-shuniidan daastaa.n merii
KHamoshii guftuguu hai be-zabaanii hai zabaa.n merii
ye dastuur-e-zabaa.n-bandii hai kaisaa terii mahfil me.n
yahaa.n to baat karne ko tarastii hai zabaa.n merii
uThaa.e kuchh varaq laale ne kuchh nargis ne kuchh gul ne
chaman me.n har taraf bikhrii hu.ii hai daastaa.n merii
u.Daa lii qumriyo.n ne tuutiyo.n ne andaliibo.n ne
chaman vaalo.n ne mil kar luuT lii tarz-e-fuGaa.n merii
Tapak ai sham.a aa.nsuu ban ke parvaane kii aa.nkho.n se
saraapaa dard huu.n hasrat bharii hai daastaa.n merii
ilaahii phir maza kyaa hai yahaa.n duniyaa me.n rahne kaa
hayaat-e-jaavedaa.n merii na marg-e-naa-gahaa.n merii
miraa ronaa nahii.n ronaa hai ye saare gulistaa.n kaa
vo gul huu.n mai.n KHizaa.n har gul kii hai goyaa KHizaa.n merii
darii.n hasrat saraa umriist afsuun-e-jaras daaram
z faiz-e-dil tapiidan-haa KHarosh-e-be-nafas daaram
riyaaz-e-dahr me.n naa-aashnaa-e-bazm-e-ishrat huu.n
KHushii rotii hai jis ko mai.n vo mahruum-e-masarrat huu.n
mirii big.Dii hu.ii taqdiir ko rotii hai goyaa.ii
mai.n harf-e-zer-e-lab sharminda-e-gosh-e-samaa.at huu.n
pareshaa.n huu.n mai.n musht-e-KHaak lekin kuchh nahii.n khultaa
sikandar huu.n ki aa.iina huu.n yaa gard-e-kuduurat huu.n
ye sab kuchh hai magar hastii mirii maqsad hai qudrat kaa
saraapaa nuur ho jis kii haqiiqat mai.n vo zulmat huu.n
KHaziina huu.n chhupaayaa mujh ko musht-e-KHaak-e-sahraa ne
kisii ko kyaa KHabar hai mai.n kahaa.n huu.n kis kii daulat huu.n
nazar merii nahii.n mamnuun-e-sair-e-arsa-e-hastii
mai.n vo chhoTii sii duniyaa huu.n ki aap apnii vilaayat huu.n
na sahbaa huu.n na saaqii huu.n na mastii huu.n na paimaana
mai.n is mai-KHaana-e-hastii me.n har shai kii haqiiqat huu.n
mujhe raaz-e-do-aalam dil kaa aa.iina dikhaataa hai
vahii kahtaa huu.n jo kuchh saamne aa.nkho.n ke aataa hai
ataa aisaa bayaa.n mujh ko hu.aa ra.ngii.n-bayaano.n me.n
ki baam-e-arsh ke taa.ir hai.n mere ham-zabaano.n me.n
asar ye bhii hai ik mere junuun-e-fitna-saamaa.n kaa
miraa aa.iina-e-dil hai qazaa ke raaz-daano.n me.n
rulaataa hai tiraa nazzaara ai hindostaa.n mujh ko
ki ibrat-KHez hai teraa fasaana sab fasaano.n me.n
diyaa ronaa mujhe aisaa ki sab kuchh de diyaa goyaa
likhaa kalk-e-azal ne mujh ko tere nauha-KHvaano.n me.n
nishaan-e-barg-e-gul tak bhii na chho.D us baaG me.n gulchii.n
tirii qismat se razm-aaraa.iyaa.n hai.n baaGbaano.n me.n
chhupaa kar aastii.n me.n bijliyaa.n rakkhii hai.n garduu.n ne
anaadil baaG ke Gaafil na baiThe.n aashiyaano.n me.n
sun ai Gaafil sadaa merii ye aisii chiiz hai jis ko
vaziifa jaan kar pa.Dhte hai.n taa.ir bostaano.n me.n
vatan kii fikr kar naadaa.n musiibat aane vaalii hai
tirii barbaadiyo.n ke mashvare hai.n aasmaano.n me.n
zaraa dekh us ko jo kuchh ho rahaa hai hone vaalaa hai
dharaa kyaa hai bhalaa ahd-e-kuhan kii daastaano.n me.n
ye KHaamoshii kahaa.n tak lazzat-e-fariyaad paidaa kar
zamii.n par tuu ho aur terii sadaa ho aasmaano.n me.n
na samjhoge to miT jaa.oge ai hindostaa.n vaalo
tumhaarii daastaa.n tak bhii na hogii daastaano.n me.n
yahii aa.iin-e-qudrat hai yahii usluub-e-fitrat hai
jo hai raah-e-amal me.n gaam-zan mahbuub-e-fitrat hai
huvaidaa aaj apne zaKHm-e-pinhaa.n kar ke chho.Duu.ngaa
lahuu ro ro ke mahfil ko gulistaa.n kar ke chho.Duu.ngaa
jalaanaa hai mujhe har sham-e-dil ko soz-e-pinhaa.n se
tirii taariik raato.n me.n charaaGaa.n kar ke chho.Duu.ngaa
magar Guncho.n kii suurat huu.n dil-e-dard-aashnaa paidaa
chaman me.n musht-e-KHaak apnii pareshaa.n kar ke chho.Duu.ngaa
pironaa ek hii tasbiih me.n in bikhre daano.n ko
jo mushkil hai to is mushkil ko aasaa.n kar ke chho.Duu.ngaa
mujhe ai ham-nashii.n rahne de shaGl-e-siina-kaavii me.n
ki mai.n daaG-e-mohabbat ko numaayaa.n kar ke chho.Duu.ngaa
dikhaa duu.ngaa jahaa.n ko jo mirii aa.nkho.n ne dekhaa hai
tujhe bhii suurat-e-aa.iina hairaa.n kar ke chho.Duu.ngaa
jo hai pardo.n me.n pinhaa.n chashm-e-biinaa dekh letii hai
zamaane kii tabii.at kaa taqaazaa dekh letii hai
kiyaa rif.at kii lazzat se na dil ko aashnaa tuu ne
gizaarii umr pastii me.n misaal-e-naqsh-e-paa tuu ne
rahaa dil-basta-e-mahfil magar apnii nigaaho.n ko
kiyaa bairuun-e-mahfil se na hairat-aashnaa tuu ne
fidaa kartaa rahaa dil ko hasiino.n kii adaa.o.n par
magar dekhii na us aa.iine me.n apnii adaa tuu ne
ta.assub chho.D naadaa.n dahr ke aa.iina-KHaane me.n
ye tasviire.n hai.n terii jin ko samjhaa hai buraa tuu ne
saraapaa naala-e-bedaad-e-soz-e-zindagii ho jaa
sapand-aasaa girah me.n baa.ndh rakkhii hai sadaa tuu ne
safaa-e-dil ko kyaa aaraa.ish-e-ra.ng-e-ta.alluq se
kaf-e-aa.iina par baa.ndhii hai o naadaa.n hinaa tuu ne
zamii.n kyaa aasmaa.n bhii terii kaj-biinii pe rotaa hai
Gazab hai satr-e-qur.aa.n ko chaliipaa kar diyaa tuu ne
zabaa.n se gar kiyaa tauhiid kaa daavaa to kyaa haasil
banaayaa hai but-e-pindaar ko apnaa KHudaa tuu ne
ku.e.n me.n tuu ne yuusuf ko jo dekhaa bhii to kyaa dekhaa
are Gaafil jo mutlaq thaa muqayyad kar diyaa tuu ne
havas baalaa-e-mimbar hai tujhe ra.ngii.n-bayaanii kii
nasiihat bhii tirii suurat hai ik afsaana-KHvaanii kii
dikhaa vo husn-e-aalam-soz apnii chashm-e-pur-nam ko
jo ta.Dpaataa hai parvaane ko rulvaataa hai shabnam ko
zaraa nazzaara hii ai bul-havas maqsad nahii.n us kaa
banaayaa hai kisii ne kuchh samajh kar chashm-e-aadam ko
agar dekhaa bhii us ne saare aalam ko to kyaa dekhaa
nazar aa.ii na kuchh apnii haqiiqat jaam se jam ko
shajar hai firqa-aaraa.ii ta.assub hai samar us kaa
ye vo phal hai ki jannat se nikalvaataa hai aadam ko
na uTThaa jazba-e-KHurshiid se ik barg-e-gul tak bhii
ye rif.at kii tamannaa hai ki le u.Dtii hai shabnam ko
phiraa karte nahii.n majruuh-e-ulfat fikr-e-darmaa.n me.n
ye zaKHmii aap kar lete hai.n paidaa apne marham ko
mohabbat ke sharar se dil saraapaa nuur hotaa hai
zaraa se biij se paidaa riyaaz-e-tuur hotaa hai
davaa har dukh kii hai majruuh-e-teG-e-aarzuu rahnaa
ilaaj-e-zaKHm hai aazaad-e-ehsaan-e-rafuu rahnaa
sharaab-e-be-KHudii se taa-falak parvaaz hai merii
shikast-e-ra.ng se siikhaa hai mai.n ne ban ke buu rahnaa
thame kyaa diida-e-giryaa.n vatan kii nauha-KHvaanii me.n
ibaadat chashm-e-shaa.ir kii hai har dam baa-vazuu rahnaa
banaa.e.n kyaa samajh kar shaaKH-e-gul par aashiyaa.n apnaa
chaman me.n aah kyaa rahnaa jo ho be-aabruu rahnaa
jo tuu samjhe to aazaadii hai poshiida mohabbat me.n
Gulaamii hai asiir-e-imtiyaaz-e-maa-o-tuu rahnaa
ye istiGnaa hai paanii me.n niguu.n rakhtaa hai saaGar ko
tujhe bhii chaahiye misl-e-habaab-e-aabjuu rahnaa
na rah apno.n se be-parvaa isii me.n KHair hai terii
agar manzuur hai duniyaa me.n o begaana-KHuu rahnaa
sharaab-e-ruuh-parvar hai mohabbat nau-e-insaa.n kii
sikhaayaa is ne mujh ko mast be-jaam-o-subuu rahnaa
mohabbat hii se paa.ii hai shifaa biimaar qaumo.n ne
kiyaa hai apne baKHt-e-KHufta ko bedaar qaumo.n ne
bayaabaan-e-mohabbat dasht-e-Gurbat bhii vatan bhii hai
ye viiraana qafas bhii aashiyaana bhii chaman bhii hai
mohabbat hii vo manzil hai ki manzil bhii hai sahraa bhii
jaras bhii kaarvaa.n bhii raahbar bhii raahzan bhii hai
maraz kahte hai.n sab is ko ye hai lekin maraz aisaa
chhupaa jis me.n ilaaj-e-gardish-e-charKH-e-kuhan bhii hai
jalaanaa dil kaa hai goyaa saraapaa nuur ho jaanaa
ye parvaana jo sozaa.n ho to sham-e-anjuman bhii hai
vahii ik husn hai lekin nazar aataa hai har shai me.n
ye shiirii.n bhii hai goyaa be-sutuu.n bhii kohkan bhii hai
ujaa.Daa hai tamiiz-e-millat-o-aa.ii.n ne qaumo.n ko
mire ahl-e-vatan ke dil me.n kuchh fikr-e-vatan bhii hai
sukuut-aamoz tuul-e-daastaan-e-dard hai varna
zabaa.n bhii hai hamaare mu.nh me.n aur taab-e-suKHan bhii hai
namii-gardiid ko tah rishta-e-ma.anii rihaa kardam
hikaayat buud be-paayaa.n ba-KHaamoshii adaa kardam

Allama Iqbal
Nazm

hum to majbur-e-wafa hain

''balaa-kashaan-e-mohabbat pe jo hu.aa so hu.aa
jo mujh pe guzrii mat us se kaho, hu.aa so hu.aa
mabaadaa ho ko.ii zaalim tiraa garebaa.n-giir
lahuu ke daaG tuu daaman se dho, hu.aa so hu.aa''

Faiz Ahmad Faiz
Nazm

lekin baDi der ho chuki thi

aa.nkho.n me.n savaal the hazaaro.n
ho.nTo.n pe magar vahii tabassum!
chehre pe likhii hu.ii udaasii
lahje me.n magar balaa kaa Thahraa.o
aavaaz me.n guu.njtii judaa.ii
baa.nhe.n thii.n magar visaal-e-saamaa.n!

Parveen Shakir
Nazm

ek laDka

dayaar-e-sharq kii aabaadiyo.n ke uu.nche Tiilo.n par
kabhii aamo.n ke baaGo.n me.n kabhii kheto.n kii me.nDo.n par
kabhii jhiilo.n ke paanii me.n kabhii bastii kii galiyo.n me.n
kabhii kuchh niim uryaa.n kam-sino.n kii ra.ng-raliyo.n me.n
sahar-dam jhuTpuTe ke vaqt raato.n ke a.ndhere me.n
kabhii melo.n me.n naaTak-Toliyo.n me.n un ke Dere me.n
ta.aaqub me.n kabhii gum titliyo.n ke suunii raaho.n me.n
kabhii nanhe parindo.n kii nahufta KHvaab-gaaho.n me.n
barhana paa.nv jaltii ret yaKH-basta havaa.o.n me.n
gurezaa.n bastiyo.n se madraso.n se KHaanqaaho.n me.n
kabhii ham-sin hasiino.n me.n bahut KHush-kaam o dil-rafta
kabhii pechaa.n baguula saa.n kabhii jyuu.n chashm-e-KHuu.n-basta
havaa me.n tairtaa KHvaabo.n me.n baadal kii tarah u.Dtaa
parindo.n kii tarah shaaKHo.n me.n chhup kar jhuultaa mu.Dtaa
mujhe ik la.Dkaa aavaara-manush aazaad sailaanii
mujhe ik la.Dkaa jaise tund chashmo.n kaa ravaa.n paanii
nazar aataa hai yuu.n lagtaa hai jaise ye balaa-e-jaa.n
miraa ham-zaad hai har gaam par har mo.D par jaulaa.n
ise ham-raah paataa huu.n ye saa.e kii tarah meraa
ta.aaqub kar rahaa hai jaise mai.n mafruur mulzim huu.n
ye mujh se puuchhtaa hai aKHtar-ul-iimaan tum hii ho

Akhtarul Iman
Nazm

walida marhuma ki yaad mein

zarra zarra dahr kaa zindaanii-e-taqdiir hai
parda-e-majbuurii o bechaargii tadbiir hai
aasmaa.n majbuur hai shams o qamar majbuur hai.n
anjum-e-siimaab-paa raftaar par majbuur hai.n
hai shikast anjaam Gunche kaa subuu gulzaar me.n
sabza o gul bhii hai.n majbuur-e-numuu gulzaar me.n
naGma-e-bulbul ho yaa aavaaz-e-KHaamosh-e-zamiir
hai isii zanjiir-e-aalam-giir me.n har shai asiir
aa.nkh par hotaa hai jab ye sirr-e-majbuurii ayaa.n
KHushk ho jaataa hai dil me.n ashk kaa sail-e-ravaa.n
qalb-e-insaanii me.n raqs-e-aish-o-Gam rahtaa nahii.n
naGma rah jaataa hai lutf-e-zer-o-bam rahtaa nahii.n
ilm o hikmat rahzan-e-saamaan-e-ashk-o-aah hai
ya.anii ik almaas kaa Tuk.Daa dil-e-aagaah hai
garche mere baaG me.n shabnam kii shaadaabii nahii.n
aa.nkh merii maaya-daar-e-ashk-e-unnaabii nahii.n
jaantaa huu.n aah me.n aalaam-e-insaanii kaa raaz
hai navaa-e-shikva se KHaalii mirii fitrat kaa saaz
mere lab par qissa-e-naira.ngi-e-dauraa.n nahii.n
dil miraa hairaa.n nahii.n KHanda nahii.n giryaa.n nahii.n
par tirii tasviir qaasid girya-e-paiham kii hai
aah ye tardiid merii hikmat-e-mohkam kii hai
girya-e-sarshaar se buniyaad-e-jaa.n paa.inda hai
dard ke irfaa.n se aql-e-sa.ng-dil sharminda hai
mauj-e-duud-e-aah se aa.iina hai raushan miraa
ganj-e-aab-aavrd se maamuur hai daaman miraa
hairatii huu.n mai.n tirii tasviir ke e.ajaaz kaa
ruKH badal Daalaa hai jis ne vaqt kii parvaaz kaa
rafta o haazir ko goyaa paa-ba-paa is ne kiyaa
ahd-e-tiflii se mujhe phir aashnaa is ne kiyaa
jab tire daaman me.n paltii thii vo jaan-e-naa-tavaa.n
baat se achchhii tarah mahram na thii jis kii zabaa.n
aur ab charche hai.n jis kii shoKHii-e-guftaar ke
be-bahaa motii hai.n jis kii chashm-e-gauhar-baar ke
ilm kii sa.njiida-guftaarii bu.Dhaape kaa shu.uur
dunyavii e.azaaz kii shaukat javaanii kaa Guruur
zindagii kii auj-gaaho.n se utar aate hai.n ham
sohbat-e-maadar me.n tifl-e-saada rah jaate hai.n ham
be-takalluf KHanda-zan hai.n fikr se aazaad hai.n
phir usii kho.e hu.e firdaus me.n aabaad hai.n
kis ko ab hogaa vatan me.n aah meraa intizaar
kaun meraa KHat na aane se rahegaa be-qaraar
KHaak-e-marqad par tirii le kar ye fariyaad aa.uu.ngaa
ab du.aa-e-niim-shab me.n kis ko mai.n yaad aa.uu.ngaa
tarbiyat se terii me.n anjum kaa ham-qismat hu.aa
ghar mire ajdaad kaa sarmaaya-e-izzat hu.aa
daftar-e-hastii me.n thii zarrii.n varaq terii hayaat
thii saraapaa diin o duniyaa kaa sabaq terii hayaat
umr bhar terii mohabbat merii KHidmat-gar rahii
mai.n tirii KHidmat ke qaabil jab hu.aa tuu chal basii
vo javaa.n-qaamat me.n hai jo suurat-e-sarv-e-buland
terii KHidmat se hu.aa jo mujh se ba.Dh kar bahra-mand
kaarobaar-e-zindagaanii me.n vo ham-pahluu miraa
vo mohabbat me.n tirii tasviir vo baazuu miraa
tujh ko misl-e-tiflak-e-be-dast-o-paa rotaa hai vo
sabr se naa-aashnaa sub.h o masaa rotaa hai vo
tuKHm jis kaa tuu hamaarii kisht-e-jaa.n me.n bo ga.ii
shirkat-e-Gam se vo ulfat aur mohkam ho ga.ii
aah ye duniyaa ye maatam-KHaana-e-barnaa-o-piir
aadmii hai kis tilism-e-dosh-o-fardaa me.n asiir
kitnii mushkil zindagii hai kis qadar aasaa.n hai maut
gulshan-e-hastii me.n maanind-e-nasiim arzaa.n hai maut
zalzale hai.n bijliyaa.n hai.n qaht hai.n aalaam hai.n
kaisii kaisii duKHtaraan-e-maadar-e-ayyaam hai.n
kalba-e-iflaas me.n daulat ke kaashaane me.n maut
dasht o dar me.n shahr me.n gulshan me.n viiraane me.n maut
maut hai ha.ngaama-aaraa qulzum-e-KHaamosh me.n
Duub jaate hai.n safiine mauj kii aaGosh me.n
ne majaal-e-shikva hai ne taaqat-e-guftaar hai
zindagaanii kyaa hai ik tauq-e-guluu-afshaar hai
qaafile me.n Gair fariyaad-e-diraa kuchh bhii nahii.n
ik mataa-e-diida-e-tar ke sivaa kuchh bhii nahii.n
KHatm ho jaa.egaa lekin imtihaa.n kaa daur bhii
hai.n pas-e-noh parda-e-garduu.n abhii daur aur bhii
siina chaak is gulsitaa.n me.n laala-o-gul hai.n to kyaa
naala o fariyaad par majbuur bulbul hai.n to kyaa
jhaa.Diyaa.n jin ke qafas me.n qaid hai aah-e-KHizaa.n
sabz kar degii unhe.n baad-e-bahaar-e-jaavedaa.n
KHufta-KHaak-e-pai sipar me.n hai sharaar apnaa to kyaa
aarzii mahmil hai ye musht-e-Gubaar apnaa to kyaa
zindagii kii aag kaa anjaam KHaakistar nahii.n
TuuTnaa jis kaa muqaddar ho ye vo gauhar nahii.n
zindagii mahbuub aisii diida-e-qudrat me.n hai
zauq-e-hifz-e-zindagii har chiiz kii fitrat me.n hai
maut ke haatho.n se miT saktaa agar naqsh-e-hayaat
aam yuu.n us ko na kar detaa nizaam-e-kaa.enaat
hai agar arzaa.n to ye samjho ajal kuchh bhii nahii.n
jis tarah sone se jiine me.n KHalal kuchh bhii nahii.n
aah Gaafil maut kaa raaz-e-nihaa.n kuchh aur hai
naqsh kii naa-paa.edaarii se ayaa.n kuchh aur hai
jannat-e-nazaara hai naqsh-e-havaa baalaa-e-aab
mauj-e-muztar to.D kar ta.amiir kartii hai habaab
mauj ke daaman me.n phir us ko chhupaa detii hai ye
kitnii bedardii se naqsh apnaa miTaa detii hai ye
phir na kar saktii habaab apnaa agar paidaa havaa
to.Dne me.n us ke yuu.n hotii na be-parvaa havaa
is ravish kaa kyaa asar hai haiyat-e-taamiir par
ye to hujjat hai havaa kii quvvat-e-taamiir par
fitrat-e-hastii shahiid-e-aarzuu rahtii na ho
KHuub-tar paikar kii us ko justujuu rahtii na ho
aah siimaab-e-pareshaa.n anjum-e-garduu.n-faroz
shoKH ye chi.ngaariyaa.n mamnuun-e-shab hai jin kaa soz
aql jis se sar-ba-zaanuu hai vo muddat in kii hai
sarguzisht-e-nau-e-insaa.n ek saa.at un kii hai
phir ye insaa.n aa.n suu-e-aflaak hai jis kii nazar
qudsiyo.n se bhii maqaasid me.n hai jo paakiiza-tar
jo misaal-e-sham.a raushan mahfil-e-qudrat me.n hai
aasmaa.n ik nuqta jis kii vus.at-e-fitrat me.n hai
jis kii naadaanii sadaaqat ke liye betaab hai
jis kaa naaKHun saaz-e-hastii ke liye mizraab hai
sho.ala ye kam-tar hai garduu.n ke sharaaro.n se bhii kyaa
kam-bahaa hai aaftaab apnaa sitaaro.n se bhii kyaa
tuKHm-e-gul kii aa.nkh zer-e-KHaak bhii be-KHvaab hai
kis qadar nashv-o-numaa ke vaaste betaab hai
zindagii kaa sho.ala is daane me.n jo mastuur hai
KHud-numaa.ii KHud-fazaa.ii ke liye majbuur hai
sardi-e-marqad se bhii afsurda ho saktaa nahii.n
KHaak me.n dab kar bhii apnaa soz kho saktaa nahii.n
phuul ban kar apnii turbat se nikal aataa hai ye
maut se goyaa qabaa-e-zindagii paataa hai ye
hai lahad is quvvat-e-aashufta kii shiiraaza-band
Daaltii hai gardan-e-garduu.n me.n jo apnii kamand
maut tajdiid-e-mazaaq-e-zindagii kaa naam hai
KHvaab ke parde me.n bedaarii kaa ik paiGaam hai
KHuugar-e-parvaaz ko parvaaz me.n Dar kuchh nahii.n
maut is gulshan me.n juz sanjiidan-e-par kuchh nahii.n
kahte hai.n ahl-e-jahaa.n dard-e-ajal hai laa-davaa
zaKHm-e-furqat vaqt ke marham se paataa hai shifaa
dil magar Gam marne vaalo.n kaa jahaa.n aabaad hai
halqa-e-zanjiir-e-sub.h-o-shaam se aazaad hai
vaqt ke afsuu.n se thamtaa naala-e-maatam nahii.n
vaqt zaKHm-e-teG-e-furqat kaa ko.ii marham nahii.n
sar pe aa jaatii hai jab ko.ii musiibat naa-gahaa.n
ashk paiham diida-e-insaa.n se hote hai.n ravaa.n
rabt ho jaataa hai dil ko naala o fariyaad se
KHuun-e-dil bahtaa hai aa.nkho.n kii sarishk-aabaad se
aadmii taab-e-shakebaa.ii se go mahruum hai
us kii fitrat me.n ye ik ehsaas-e-naa-maaluum hai
jauhar-e-insaa.n adam se aashnaa hotaa nahii.n
aa.nkh se Gaa.eb to hotaa hai fanaa hotaa nahii.n
raKHt-e-hastii KHaak-e-Gam kii sho.ala-afshaanii se hai
sard ye aag is latiif ehsaas ke paanii se hai
aah ye zabt-e-fuGaa.n Gaflat kii KHaamoshii nahii.n
aagahii hai ye dilaasaa.ii faraamoshii nahii.n
parda-e-mashriq se jis dam jalva-gar hotii hai sub.h
daaG shab kaa daaman-e-aafaaq se dhotii hai sub.h
laala-e-afsurda ko aatish-qabaa kartii hai ye
be-zabaa.n taa.ir ko sarmast-e-navaa kartii hai ye
siina-e-bulbul ke zindaa.n se sarod aazaad hai
saik.Do.n naGmo.n se baad-e-sub.h-dam-aabaad hai
KHuftagaan-e-laala-zaar o kohsaar o ruud baar
hote hai.n aaKHir uruus-e-zindagii se ham-kanaar
ye agar aa.iin-e-hastii hai ki ho har shaam sub.h
marqad-e-insaa.n kii shab kaa kyuu.n na ho anjaam sub.h
daam-e-siimiin-e-taKHayyul hai miraa aafaaq-giir
kar liyaa hai jis se terii yaad ko mai.n ne asiir
yaad se terii dil-e-dard aashnaa maamuur hai
jaise ka.abe me.n du.aa.o.n se fazaa maamuur hai
vo faraa.ez kaa tasalsul naam hai jis kaa hayaat
jalva-gaahe.n us kii hai.n laakho.n jahaan-e-be-sabaat
muKHtalif har manzil-e-hastii ko rasm-o-raah hai
aaKHirat bhii zindagii kii ek jaulaa.n-gaah hai
hai vahaa.n be-haasilii kisht-e-ajal ke vaaste
saazgaar aab-o-havaa tuKHm-e-amal ke vaaste
nuur-e-fitrat zulmat-e-paikar kaa zindaanii nahii.n
ta.ng aisaa halqa-e-afkaar-e-insaanii nahii.n
zindagaanii thii tirii mahtaab se taabinda-tar
KHuub-tar thaa sub.h ke taare se bhii teraa safar
misl-e-aivaan-e-sahar marqad farozaa.n ho tiraa
nuur se maamuur ye KHaakii shabistaa.n ho tiraa
aasmaa.n terii lahad par shabnam-afshaanii kare
sabza-e-nau-rasta is ghar kii nigahbaanii kare

Allama Iqbal
Nazm

muflisi

jab aadmii ke haal pe aatii hai muflisii
kis kis tarah se us ko sataatii hai muflisii
pyaasaa tamaam roz biThaatii hai muflisii
bhuukaa tamaam raat sulaatii hai muflisii
ye dukh vo jaane jis pe ki aatii hai muflisii
kahiye to ab hakiim kii sab se ba.Dii hai shaa.n
ta.aziim jis kii karte hai.n to ab aur KHaa.n
muflis hu.e to hazrat-e-luqmaa.n kiyaa hai yaa.n
iisaa bhii ho to ko.ii nahii.n puuchhtaa miyaa.n
hikmat hakiim kii bhii Dubaatii hai muflisii
jo ahl-e-fazl aalim o faazil kahaate hai.n
muflis hu.e to kalma talak bhuul jaate hai.n
vo jo Gariib-Gurabaa ke la.Dke pa.Dhaate hai.n
un kii to umr bhar nahii.n jaatii hai muflisii
muflis kare jo aan ke mahfil ke biich haal
sab jaane.n roTiyo.n kaa ye Daalaa hai is ne jaal
gir gir pa.De to ko.ii na liye use sambhaal
muflis me.n hove.n laakh agar ilm aur kamaal
sab KHaak bech aa ke milaatii hai muflisii
jab roTiyo.n ke baTne kaa aa kar pa.De shumaar
muflis ko deve.n ek tava.ngar ko chaar chaar
gar aur maa.nge vo to use jhi.Dke.n baar baar
muflis kaa haal aah bayaa.n kyaa karuu.n mai.n yaar
muflis ko is jagah bhii chabaatii hai muflisii
muflis kii kuchh nazar nahii.n rahtii hai aan par
detaa hai apnii jaan vo ek ek naan par
har aan TuuT pa.Dtaa hai roTii ke KHvaan par
jis tarah kutte la.Dte hai.n ik ustuKHvaan par
vaisaa hii mufliso.n ko la.Daatii hai muflisii
kartaa nahii.n hayaa se jo ko.ii vo kaam aah
muflis kare hai us ke ta.ii.n insiraam aah
samjhe na kuchh halaal na jaane haraam aah
kahte hai.n jis ko sharm-o-hayaa na.ng-o-naam aah
vo sab hayaa-o-sharm u.Daatii hai muflisii
ye muflisii vo shai hai ki jis ghar me.n bhar ga.ii
phir jitne ghar the sab me.n usii ghar ke dar ga.ii
zan bachche rote hai.n goyaa naanii guzar ga.ii
ham-saaya puuchhte hai.n ki kyaa daadii mar ga.ii
bin murde ghar me.n shor machaatii hai muflisii
laazim hai gar Gamii me.n ko.ii shor-Gul machaa.e
muflis baGair Gam ke hii kartaa hai haa.e haa.e
mar jaave gar ko.ii to kahaa.n se use uThaa.e
is muflisii kii KHvaariyaa.n kyaa kyaa kahuu.n mai.n haa.e
murde ko be kafan ke ga.Daatii hai muflisii
kyaa kyaa muflisii kii kahuu.n KHvaarii phaka.Diyaa.n
jhaa.Duu baGair ghar me.n bikhartii hai.n jhaka.Diyaa.n
kone me.n jaale lapTe hai.n chhappar me.n maka.Diyaa.n
paisaa na hove jin ke jalaane ko lak.Diyaa.n
dariyaa me.n un ke murde bahaatii hai muflisii
biibii kii nath na la.Dko.n ke haatho.n ka.De rahe
kap.De miyaa.n ke baniye ke ghar me.n pa.De rahe
jab ka.Diyaa.n bik ga.ii.n to kha.nDar me.n pa.De rahe
zanjiir ne kivaa.D na patthar ga.De rahe
aaKHir ko ii.nT ii.nT khudaatii hai muflisii
naqqaash par bhii zor jab aa muflisii kare
sab rang dam me.n kar de musavvir ke kirkire
suurat bhii us kii dekh ke mu.nh khi.nch rahe pare
tasviir aur naqsh me.n kyaa rang vo bhare
us ke to mu.nh kaa rang u.Daatii hai muflisii
jab KHuub-ruu pe aan ke pa.Dtaa hai din siyaah
phirtaa hai bose detaa hai har ik ko KHvaah-maKHvaah
hargiz kisii ke dil ko nahii.n hotii us kii chaah
gar husn ho hazaar ruupe kaa to us ko aah
kyaa kau.Diyo.n ke mol bikaatii hai muflisii
us KHuub-ruu ko kaun de ab daam aur diram
jo kau.Dii kau.Dii bose ko raazii ho dam-ba-dam
Topii puraanii do to vo jaane kulaah-e-jism
kyuu.nkar na jii ko us chaman-e-husn ke ho Gam
jis kii bahaar muft luTaatii hai muflisii
aashiq ke haal par bhii jab aa muflisii pa.De
ma.ashuuq apne paas na de us ko baiThne
aave jo raat ko to nikaale vahii.n use
is Dar se ya.anii raat o dhannaa kahii.n na de
tohmat ye aashiqo.n ko lagaatii hai muflisii
kaise hii dhuum-dhaam kii ranDii ho KHush-jamaal
jab muflisii ho kaan pa.De sar pe us ke jaal
dete hai.n us ke naach ko ThaTThe ke biich Daal
naache hai vo to farsh ke uupar qadam sambhaal
aur us ko u.ngliyo.n pe nachaatii hai muflisii
us kaa to dil Thikaane nahii.n bhaav kyaa bataa.e
jab ho phaTaa dupaTTa to kaahe se mu.nh chhupaa.e
le shaam se vo sub.h talak go ki naache gaa.e
auro.n ko aaTh saat to vo do Take hii paa.e
is laaj se ise bhii lajaatii hai muflisii
jis kasbii ranDii kaa ho halaakat se dil hazii.n
rakhtaa hai us ko jab ko.ii aa kar tamaash-bii.n
ik paun paise tak bhii vo kartii nahii.n nahii.n
ye dukh usii se puuchhiye ab aah jis ke ta.ii.n
sohbat me.n saarii raat jagaatii hai muflisii
vo to ye samjhe dil me.n ki Dhelaa jo paa.uu.ngii
dam.Dii ke paan dam.Dii ke missii ma.ngaa.uu.ngii
baaqii rahii chhadaam so paanii bharaa.uu.ngii
phir dil me.n sochtii hai ki kyaa KHaak khaa.uu.ngii
aaKHir chabiinaa us kaa bhunaatii hai muflisii
jab muflisii se hove kalaavant kaa dil udaas
phirtaa hai le tambuure ko har ghar ke aas-paas
ik paav ser aane kii dil me.n lagaa ke aas
gorii kaa vaqt hove to gaataa hai vo babhaas
yaa.n tak havaas us ke u.Daatii hai muflisii
muflis biyaah beTii kaa kartaa hai bol bol
paisaa kahaa.n jo jaa ke vo laave jahez mol
joruu kaa vo galaa ki phuuTaa ho jaise Dhol
ghar kii halaal-KHorii talak kartii hai ThiThol
haibat tamaam us kii uThaatii hai muflisii
beTe kaa biyaah ho to na byaahii na saathii hai
ne raushnii na baaje kii aavaaz aatii hai
maa.n piichhe ek mailii chadar o.Dhe jaatii hai
beTaa banaa hai duulhaa to baavaa baraatii hai
muflis kii ye baraat cha.Dhaatii hai muflisii
gar byaah kar chalaa hai sahar ko to ye balaa
shahdaar naanaa hiij.Daa aur bhaaT mu.nDcha.Daa
khii.nche hu.e use chale jaate hai.n jaa-ba-jaa
vo aage aage la.Dtaa hu.aa jaataa hai chalaa
aur piichhe Tap.Diyo.n ko bajaatii hai muflisii
darvaaze par zanaane bajaate hai.n taaliyaa.n
aur ghar me.n baiThii Domnii detii hai.n gaaliyaa.n
maalan gale kii haar ho dau.Dii le Daaliyaa.n
saqqaa kha.Daa sunaataa hai baate.n razaaliyaa.n
ye KHvaarii ye KHaraabii dikhaatii hai muflisii
ko.ii shuum be-hayaa ko.ii bolaa nikhaTTuu hai
beTii ne jaanaa baap to meraa nikhaTTuu hai
beTe pukaarte hai.n ki baabaa nikhaTTuu hai
biibii ye dil mai.n kahtii hai achchhaa nikhaTTuu hai
aaKHir nikhaTTuu naam dharaatii hai muflisii
muflis kaa dard dil me.n ko.ii Thaantaa nahii.n
muflis kii baat ko bhii ko.ii maantaa nahii.n
zaat aur hasab-nasab ko ko.ii jaantaa nahii.n
suurat bhii us kii phir ko.ii pahchaantaa nahii.n
yaa.n tak nazar se us ko giraatii hai muflisii
jis vaqt muflisii se ye aa kar hu.aa tabaah
phir ko.ii is ke haal pa kartaa nahii.n nigaah
daaliidarii kahe ko.ii Thahraa de ruu-siyaah
jo baate.n umr bhar na sunii hove.n us ne aah
vo baate.n us ko aa ke sunaatii hai.n muflisii
chuulhaa tavaanaa paanii ke maTke me.n aabii hai
piine ko kuchh na khaane ko aur ne rakaabii hai
muflis ke saath sab ke ta.ii.n be-hijaabii hai
muflis kii joruu sach hai ki yaa.n sab kii bhaabii hai
izzat sab us ke dil kii ga.nvaatii hai muflisii
kaisaa hii aadmii ho par iflaas ke tufail
ko.ii gadhaa kahe use Thahraa de ko.ii bail
kap.De phaTe tamaam ba.Dhe baal phail phail
mu.nh KHushk daa.nt zard badan par jamaa hai mail
sab shakl qaidiyo.n kii banaatii hai muflisii
har aan dosto.n kii mohabbat ghaTaatii hai
jo aashnaa hai.n un kii to ulfat ghaTaatii hai
apne kii mehr Gair kii chaahat ghaTaatii hai
sharm-o-hayaa o izzat-o-hurmat ghaTaatii hai
haa.n naaKHun aur baal ba.Dhaatii hai muflisii
jab muflisii hu.ii to sharaafat kahaa.n rahii
vo qadr zaat kii vo najaabat kahaa.n rahii
kap.De phaTe to logo.n me.n izzat kahaa.n rahii
ta.aziim aur tavaazo.a kii baabat kahaa.n rahii
majlis kii juutiyo.n pe biThaatii hai muflisii
muflis kisii kaa la.Dkaa jo le pyaar se uThaa
baap us kaa dekhe haath kaa aur paa.nv kaa ka.Daa
kahtaa hai ko.ii juutii na leve kahii.n churaa
naT-khaT uchakkaa chor daGaabaaz gaTh-kaTaa
sau sau tarah ke aib lagaatii hai muflisii
rakhtii nahii.n kisii kii ye Gairat kii aan ko
sab KHaak me.n milaatii hai hurmat kii shaan ko
sau mehnato.n me.n us kii khapaatii hai jaan ko
chorii pe aa ke Daale hii muflis ke dhyaan ko
aaKHir nadaan bhiik ma.ngaatii hai muflisii
duniyaa me.n le ke shaah se ai yaar taa-faqiir
KHaaliq na muflisii me.n kisii ko kare asiir
ashraaf ko banaatii hai ik aan me.n faqiir
kyaa kyaa mai.n muflisii kii KHaraabii kahuu.n 'naziir'
vo jaane jis ke dil ko jalaatii hai muflisii

Nazeer Akbarabadi
Nazm

to behtar hai yahi

vo jo is Gam se ziyaada jaa.n-gusil qaatil rahaa
vo jo ik sail-e-balaa-a.ngez thaa apne liye
jis ke pal pal me.n the sadiyo.n ke samundar maujzan
chiiKHtii yaade.n liye uj.De hu.e sapne liye

Ahmad Faraz
Nazm

ramayan ka ek scene

ruKHsat hu.aa vo baap se le kar KHudaa kaa naam
raah-e-vafaa kii manzil-e-avval hu.ii tamaam
manzuur thaa jo maa.n kii ziyaarat kaa intizaam
daaman se ashk po.nchh ke dil se kiyaa kalaam
iz.haar-e-be-kasii se sitam hogaa aur bhii
dekhaa hame.n udaas to Gam hogaa aur bhii
dil ko sa.nbhaaltaa hu.aa aaKHir vo naunihaal
KHaamosh maa.n ke paas gayaa suurat-e-KHayaal
dekhaa to ek dar me.n hai baiThii vo KHasta-haal
saktaa saa ho gayaa hai ye hai shiddat-e-malaal
tan me.n lahuu kaa naam nahii.n zard rang hai
goyaa bashar nahii.n ko.ii tasviir-e-sa.ng hai
kyaa jaane kis KHayaal me.n gum thii vo be-gunaah
nuur-e-nazar ye diida-e-hasrat se kii nigaah
jumbish hu.ii labo.n ko bharii ek sard aah
lii gosha-ha-e-chashm se ashko.n ne ruKH kii raah
chehre kaa rang haalat-e-dil kholne lagaa
har muu-e-tan zabaa.n kii tarah bolne lagaa
aaKHir asiir-e-yaas kaa qufl-e-dahan khulaa
afsaana-e-shadaa.id-e-ra.nj-o-mehan khulaa
ik daftar-e-mazaalim-e-charKH-e-kuhan khulaa
vaa thaa dahaan-e-zaKHm ki baab-e-suKHan khulaa
dard-e-dil-e-Gariib jo sarf-e-bayaa.n hu.aa
KHuun-e-jigar kaa rang suKHan se 'ayaa.n hu.aa
ro kar kahaa KHamosh kha.De kyuu.n ho merii jaa.n
mai.n jaantii huu.n jis liye aa.e ho tum yahaa.n
sab kii KHushii yahii hai to sahraa ko ho ravaa.n
lekin mai.n apne mu.nh se na hargiz kahuu.ngii haa.n
kis tarah ban me.n aa.nkho.n ke taare ko bhej duu.n
jogii banaa ke raaj-dulaare ko bhej duu.n
duniyaa kaa ho gayaa hai ye kaisaa lahuu sapiid
andhaa kiye hu.e hai zar-o-maal kii umiid
anjaam kyaa ho ko.ii nahii.n jaantaa ye bhed
soche bashar to jism ho larzaa.n misaal-e-biid
likkhii hai kyaa hayaat-e-abad in ke vaaste
phailaa rahe hai.n jaal ye kis din ke vaaste
letii kisii faqiir ke ghar me.n agar janam
hote na merii jaan ko saamaan ye baham
Dastaa na saa.np ban ke mujhe shaukat-o-hasham
tum mere laal the mujhe kis saltanat se kam
mai.n KHush huu.n phuu.nk de ko.ii is taKHt-o-taaj ko
tum hii nahii.n to aag lagaa duu.ngii raaj ko
kin kin riyaazato.n se guzaare hai.n maah-o-saal
dekhii tumhaarii shakl jab ai mere naunihaal
puuraa hu.aa jo byaah kaa armaan thaa kamaal
aafat ye aa.ii mujh pe hu.e jab safed baal
chhaTtii huu.n un se jog liyaa jin ke vaaste
kyaa sab kiyaa thaa mai.n ne isii din ke vaaste
aise bhii naa-muraad bahut aa.e.nge nazar
ghar jin ke be-charaaG rahe aah 'umr bhar
rahtaa miraa bhii naKHl-e-tamannaa jo be-samar
ye jaa-e-sabr thii ki du'aa me.n nahii.n asar
lekin yahaa.n to ban ke muqaddar biga.D gayaa
phal phuul laa ke baaG-e-tamannaa uja.D gayaa
sarzad hu.e the mujh se KHudaa jaane kyaa gunaah
ma.njdhaar me.n jo yuu.n mirii kashtii hu.ii tabaah
aatii nazar nahii.n ko.ii amn-o-amaa.n kii raah
ab yaa.n se kuuch ho to 'adam me.n mile panaah
taqsiir merii KHaaliq-e-aalam bahal kare
aasaan mujh Gariib kii mushkil ajal kare
sun kar zabaa.n se maa.n kii ye fariyaad-e-dard-KHez
us KHasta-jaa.n ke dil pe chalii Gam kii teG-e-tez
'aalam ye thaa qariib ki aa.nkhe.n ho.n ashk-rez
lekin hazaar zabt se rone se kii gurez
sochaa yahii ki jaan se bekas guzar na jaa.e
naashaad ham ko dekh ke maa.n aur mar na jaa.e
phir arz kii ye maadar-e-naashaad ke huzuur
maayuus kyuu.n hai.n aap alam kaa hai kyuu.n vafuur
sadma ye shaaq 'aalam-e-piirii me.n hai zaruur
lekin na dil se kiijiye sabr-o-qaraar duur
shaayad KHizaa.n se shakl 'ayaa.n ho bahaar kii
kuchh maslahat isii me.n ho parvardigaar kii
ye jaa'l ye fareb ye saazish ye shor-o-shar
honaa jo hai sab us ke bahaane hai.n sar-ba-sar
asbaab-e-zaahirii me.n na in par karo nazar
kyaa jaane kyaa hai parda-e-qudrat me.n jalva-gar
KHaas us kii maslahat ko.ii pahchaantaa nahii.n
manzuur kyaa use hai ko.ii jaantaa nahii.n
raahat ho yaa ki ranj KHushii ho ki intishaar
vaajib har ek rang me.n hai shukr-e-kird-gaar
tum hii nahii.n ho kushta-e-naira.ng-e-rozgaar
maatam-kade me.n dahr ke laakho.n hai.n sogvaar
saKHtii sahii nahii.n ki uThaa.ii ka.Dii nahii.n
duniyaa me.n kyaa kisii pe musiibat pa.Dii nahii.n

Chakbast Braj Narayan
Nazm

intisab

hamaarii chaahato.n kii buz-dilii thii
varna kyaa hotaa
agar ye shauq ke mazmuu.n
vafaa ke ahd-naame
aur dilo.n ke marsiye
ik duusre ke naam kar dete
ziyaada se ziyaada
chaahate.n bad-naam ho jaatii.n
hamaarii dostii kii daastaane.n aam ho jaatii.n
to kyaa hotaa
ye ham jo ziist ke har ishq me.n sachchaa.iyaa.n soche.n
ye ham jin kaa asaasa tishnagi,i tanhaa.iyaa.n soche.n
ye tahriire.n
hamaarii aarzuu-mandii kii tahriire.n
baham paiavastagii aur KHvaab paivandagii kii tahriire.n
firaaq o vasl o mahruumii o KHursandii kii tahriire.n
ham in par munfa.il kyuu.n huu.n
ye tahriire.n
agar ik duusre ke naam ho jaa.e.n
to kyaa is se hamaare fan ke rasiyaa
sher ke maddaah
ham par tohmate.n dharte
hamaarii hamdamii par tanz karte
aur ye baate.n
aur ye afvaahe.n
kisii piilii nigaarish me.n
hamesha ke liye marquum huu jaatii.n
hamaarii hastiyaa.n mazmuum ho jaatii.n
nahii.n aisaa na hotaa
aur agar bil-farz hotaa bhii
to phir ham kyaa
subuk-saaraan-e-shahr-e-harf kii chaalo.n se Darte hai.n
sagaan-e-kuucha-e-shohrat ke GauGaa
kaale baazaaro.n ke dallaalo.n se Darte hai.n
hamaare harf jazbo.n kii tarah
sachche hai.n, paakiiza hai.n, zinda hai.n
balaa se ham agar masluub ho jaate
ye saudaa kyaa buraa thaa
gar hamaarii qabr ke katbe
tumhaare aur hamaare naam se mansuub ho jaate!

Ahmad Faraz
Nazm

mohabbat

uruus-e-shab kii zulfe.n thii.n abhii naa-aashnaa KHam se
sitaare aasmaa.n ke be-KHabar the lazzat-e-ram se
qamar apne libaas-e-nau me.n begaana saa lagtaa thaa
na thaa vaaqif abhii gardish ke aa.iin-e-musallam se
abhii imkaa.n ke zulmat-KHaane se ubhrii hii thii duniyaa
mazaaq-e-zindagii poshiida thaa pahnaa-e-aalam se
kamaal-e-nazm-e-hastii kii abhii thii ibtidaa goyaa
huvaidaa thii nagiine kii tamannaa chashm-e-KHaatam se
sunaa hai aalam-e-baalaa me.n ko.ii kiimiyaa-gar thaa
safaa thii jis kii KHaak-e-paa me.n ba.Dh kar saaGar-e-jam se
likhaa thaa arsh ke paa.e pe ik iksiir kaa nusKHa
chhupaate the farishte jis ko chashm-e-ruuh-e-aadam se
nigaahe.n taak me.n rahtii thii.n lekin kiimiyaa-gar kii
vo is nusKHe ko ba.Dh kar jaantaa thaa ism-e-aazam se
ba.Dhaa tasbiih-KHvaanii ke bahaane arsh kii jaanib
tamannaa-e-dilii aaKHir bar aa.ii sa.i-e-paiham se
phiraayaa fikr-e-ajzaa ne use maidaan-e-imkaa.n me.n
chhupegii kyaa ko.ii shai baargaah-e-haq ke mahram se
chamak taare se maa.ngii chaa.nd se daaG-e-jigar maa.ngaa
u.Daa.ii tiirgii tho.Dii sii shab kii zulf-e-barham se
ta.Dap bijlii se paa.ii huur se paakiizgii paa.ii
haraarat lii nafas-haa-e-masiih-e-ibn-e-maryam se
zaraa sii phir rubuubiyat se shaan-e-be-niyaazii lii
malak se aajizii uftaadgii taqdiir shabnam se
phir in ajzaa ko gholaa chashma-e-haivaa.n ke paanii me.n
murkkab ne mohabbat naam paayaa arsh-e-aazam se
muhavvis ne ye paanii hasti-e-nau-KHez par chhi.Dkaa
girah kholii hunar ne us ke goyaa kaar-e-aalam se
hu.ii jumbish ayaa.n zarro.n ne lutf-e-KHvaab ko chho.Daa
gale milne lage uTh uTh ke apne apne hamdam se
KHiraam-e-naaz paayaa aaftaabo.n ne sitaaro.n ne
chaTak Guncho.n ne paa.ii daaG paa.e laala-zaaro.n ne

Allama Iqbal
Nazm

apni malka-e-suKHan se

tujh se nazar milaa.e ye kis kii bhalaa majaal
tere qadam kaa naqsh hasiino.n ke KHadd-o-KHaal
allaah re tere husn-e-malak-soz kaa jalaal
jab dekhtii hai.n KHuld se huure.n tiraa jamaal
partav se tere chehra-e-parvii.n-sarisht ke
ghabraa ke band kartii hai.n Gurfe bahisht ke

Josh Malihabadi
Nazm

hinDola

dayaar-e-hind thaa gahvaara yaad hai hamdam
bahut zamaana hu.aa kis ke kis ke bachpan kaa
isii zamiin pe khelaa hai 'raam' kaa bachpan
isii zamiin pe un nanhe nanhe haatho.n ne
kisii samay me.n dhanush-baan ko sambhaalaa thaa
isii dayaar ne dekhii hai 'krishn' kii liilaa
yahii.n gharo.ndo.n me.n siitaa sulochanaa raadhaa
kisii zamaane me.n gu.Diyo.n se kheltii ho.ngii
yahii zamii.n yahii dariyaa pahaa.D jangal baaG
yahii havaa.e.n yahii sub.h-o-shaam suuraj chaa.nd
yahii ghaTaa.e.n yahii barq-o-ra.ad o qaus-e-quzah
yahii.n ke giit rivaayaat mausamo.n ke juluus
hu.aa zamaana ki 'siddhaarth' ke the gahvaare
inhii nazaaro.n me.n bachpan kaTaa thaa 'vikram' kaa
sunaa hai 'bhartarharii' bhii inhii.n se khelaa thaa
'bharat' agastya' 'kapil' 'vyaas' 'pashii' 'kautilya'
'janak' vashishth' 'manu' 'vaalmik' vishvaamitr
'kanaad' 'gautam' o ramanuj 'kumaaril-bhatt'
mohanjoDaaro ha.Dappaa ke aur ajantaa ke
banaane vaale yahii.n ballamo.n se khele the
isii hi.nDole me.n 'bhavabhut' o 'kaaliidaas' kabhii
humak humak ke jo tutlaa ke gungunaa.e the
sarasvatii ne zabaano.n ko un kii chuumaa thaa
yahii.n ke chaa.nd va suuraj khilaune the un ke
inhii.n fazaa.o.n me.n bachpan palaa thaa 'KHusrav' kaa
isii zamii.n se uThe 'tansen' aur 'akbar'
'rahiim' 'nanak' o 'chaitanya' aur 'chishti' ne
inhii.n fazaa.o.n me.n bachpan ke din guzaare the
isii zamii.n pe kabhii shazaada-e-'KHurram'
zaraa sii dil-shikanii par jo ro diyaa hogaa
bhar aayaa thaa dil-e-naazuk to kyaa ajab is me.n
in aa.nsu.o.n me.n jhalak taaj kii bhii dekhii ho
'ahalyabaa.i' 'daman' 'padmini' o 'raziya' ne
yahii.n ke pe.Do.n kii shaaKHo.n me.n Daale the jhuule
isii fazaa me.n ba.Dhaa.ii thii pe.ng bachpan kii
inhii nazaaro.n me.n saavan ke giit gaa.e the
isii zamiin pe ghuTno.n ke bal chale ho.nge
'malik-mohammad' o 'raskhan' aur 'tulsi-das'
inhii.n fazaa.o.n me.n guu.njii thii totlii bolii
'kabir-das' 'Tukaaraam' 'suur' o 'miiraa' kii
isii hi.nDole me.n 'viddypati' kaa ka.nTh khulaa
isii zamiin ke the laal 'miir' o 'Gaalib' bhii
Thumak Thumak ke chale the gharo.n ke aa.ngan me.n
'aniis' o 'haalii' o 'iqbaal' aur 'vaaris-shaah'
yahii.n kii KHaak se ubhre the 'premchand' o 'tagore'
yahii.n se uTThe the tahziib-e-hind ke me.amaar
isii zamiin ne dekhaa thaa baal-pan in kaa
yahii.n dikhaa.ii thii.n in sab ne baal-liilaa.e.n
yahii.n har ek ke bachpan ne tarbiyat paa.ii
yahii.n har ek ke jiivan kaa baalkaa.nD khulaa
yahii.n se uThte baguulo.n ke saath dau.De hai.n
yahii.n kii mast ghaTaa.o.n ke saath jhuume hai.n
yahii.n kii madh-bharii barsaat me.n nahaa.e hai.n
lipaT ke kiicha.D o paanii se bachpane un ke
isii zamiin se uTThe vo desh ke saava.nt
u.Daa diyaa thaa jinhe.n company ne topo.n se
isii zamiin se uThii hai.n an-ginat nasle.n
pale hai.n hind hi.nDole me.n an-ginat bachche
mujh aise kitne hii gumnaam bachche khele hai.n
isii zamii.n se isii me.n supurd-e-KHaak hu.e
zamiin-e-hind ab aaraam-gaah hai un kii
is arz-e-paak se uTThii.n bahut sii tahziibe.n
yahii.n tuluu hu.ii.n aur yahii.n Guruub hu.ii.n
isii zamiin se ubhre ka.ii uluum-o-funuun
faraaz-e-koh-e-himaala ye daur-e-ga.ng-o-jaman
aur in kii god me.n parvarda kaarvaano.n ne
yahii.n rumuuz-e-KHiraam-e-sukuu.n-numaa siikhe
nasiim-e-sub.h-e-tamaddun ne bhairvii.n chhe.Dii
yahii.n vatan ke taraano.n kii vo pave.n phuuTe.n
vo be-qaraar sukuu.n-zaa tarannum-e-saharii
vo kapkapaate hu.e soz-o-saaz ke sho.ale
inhii fazaa.o.n me.n a.ng.Daa.iyaa.n jo le ke uThe
lavo.n se jin ke charaaGaa.n hu.ii thii bazm-e-hayaat
jinho.n ne hind kii tahziib ko zamaana hu.aa
bahut se zaaviyo.n se aa.iina dikhaayaa thaa
isii zamii.n pe Dhalii hai mirii hayaat kii shaam
isii zamiin pe vo sub.h muskuraa.ii hai
tamaam sho.ala o shabnam mirii hayaat kii sub.h
sunaa.uu.n aaj kahaanii mai.n apne bachpan kii
dil-o-dimaaG kii kaliyaa.n abhii na chaTkii thii.n
hamesha kheltaa rahtaa thaa bhaa.ii bahno.n me.n
hamaare saath mohalle kii la.Dkiyaa.n la.Dke
machaa.e rakhte the baalak udham har ek gha.Dii
lahuu tara.ng uchhal-phaa.nd kaa ye aalam thaa
mohalla sar pe uThaa.e phire jidhar guzre
hamaare chahchahe aur shor guu.njte rahte
chahaar-samt mohalle ke goshe goshe me.n
fazaa me.n aaj bhii laa-raib guu.njte ho.nge
agarche duusre bachcho.n kii tarah thaa mai.n bhii
ba-zaahir auro.n ke bachpan saa thaa miraa bachpan
ye sab sahii mire bachpan kii shaKHsiyat bhii thii ek
vo shaKHsiyat ki bahut shoKH jis ke the KHad-o-KHaal
adaa adaa me.n ko.ii shaan-e-infiraadii thii
Garaz kuchh aur hii lachchhan the mere bachpan ke
mujhe thaa chhoTe ba.Do.n se bahut shadiid lagaav
har ek par mai.n chhi.Daktaa thaa apnii nannhii sii jaa.n
dil umDaa aataa thaa aisaa ki jii ye chaahtaa thaa
uThaa ke rakh luu.n kaleje me.n apnii duniyaa ko
mujhe hai yaad abhii tak ki khel-kuud me.n bhii
kuchh aise vaqfe pur-asraar aa hii jaate the
ki jin me.n sochne lagtaa thaa kuchh miraa bachpan
ka.ii ma.aanii-e-be-lafz chhuune lagte the
butuun-e-Gaib se mere shu.uur-e-asGar ko
har ek manzar-e-maanuus ghar kaa har gosha
kisii tarah kii ho ghar me.n sajii hu.ii har chiiz
mire mohalle kii galiyaa.n makaa.n dar-o-diivaar
chabuutre ku.e.n kuchh pe.D jhaa.Diyaa.n bele.n
vo pherii vaale ka.ii un ke bhaa.nt bhaa.nt ke bol
vo jaane buujhe manaazir vo aasmaa.n o zamii.n
badalte vaqt kaa aa.iina garmii-o-KHunkii
Guruub-e-mahr me.n ra.ngo.n kaa jaagtaa jaaduu
shafaq ke shiish-mahal me.n gudaaz-e-pinhaa.n se
javaahro.n kii chaTaane.n sii kuchh pighaltii hu.ii.n
shajar hajar kii vo kuchh sochtii hu.ii duniyaa
suhaanii raat kii maanuus ramaziyat kaa fusuu.n
alassabaah ufuq kii vo thartharaatii bhave.n
kisii kaa jhaa.nknaa aahista phuuTtii pau se
vo dopahar kaa samay darja-e-tapish kaa cha.Dhaav
thakii thakii sii fazaa me.n vo zindagii kaa utaar
hu.aa kii bansiyaa.n ba.nsvaa.Diyo.n me.n bajtii hu.ii.n
vo din ke ba.Dhte hu.e saa.e sah-pahar kaa sukuu.n
sukuut shaam kaa jab dono.n vaqt milte hai.n
Garaz jhalakte hu.e sarsarii manaazir par
mujhe gumaan paristaaniyat kaa hotaa thaa
har ek chiiz kii vo KHvaab-naak asliyyat
mire shu.uur kii chilman se jhaa.nktaa thaa ko.ii
liye rubuubiyat-e-kaa.enaat kaa ehsaas
har ek jalve me.n Gaib o shuhuud kaa vo milaap
har ik nazaara ik aa.iina-KHaana-e-hairat
har ek manzar-e-maanuus ek hairat-zaar
kahii.n rahuu.n kahii.n khelo.n kahii.n pa.Dhuu.n likhuu.n
mire shu.uur pe ma.nDlaate the manaazir-e-dahr
mai.n akasr un ke tasavvur me.n Duub jaataa thaa
vafuur-e-jazba se ho jaatii thii mizha pur-nam
mujhe yaqiin hai in unsurii manaazir se
ki aam bachcho.n se letaa thaa mai.n ziyaada asar
kisii samay mirii tiflii rahii na be-parvaa
na chhuu sakii mirii tiflii ko Gaflat-e-tiflii
ye khel-kuud ke lamho.n me.n hotaa thaa ehsaas
du.aa.e.n detaa ho jaise mujhe sukuut-e-davaam
ki jaise haath abad rakh de dosh-e-tiflii par
har ek lamha ke raKHno.n se jhaa.nktii sadiyaa.n
kahaaniyaa.n jo sunuu.n un me.n Duub jaataa thaa
ki aadmii ke liye aadmii kii jag-biitii
se ba.Dh ke kaun sii shai aur ho hii saktii hai
inhii fasaano.n me.n pinhaa.n the zindagii ke rumuuz
inhii fasaano.n me.n khulte the raaz-haa-e-hayaat
unhe.n fasaano.n me.n miltii thii.n ziist kii qadre.n
rumuuz-e-besh-bahaa TheTh aadmiyat ke
kahaaniyaa.n thii.n ki sad-dars-gaah-e-riqqat-e-qalb
har ik kahaanii me.n shaa.istagi-e-Gam kaa sabaq
vo unsur aa.nsu.o.n kaa daastaan-e-insaa.n me.n
vo nal-daman kii kathaa sarguzasht-e-savitrii
'shakuntlaa' kii kahaanii 'bharat' kii qurbaanii
vo marg-e-bhishm-pitaamah vo sej tiiro.n kii
vo paan.cho paa.nDav kii sovarg-yaatraa kii kathaa
vatan se ruKHsat-e-'siddhaarth' 'raam' kaa ban-baas
vafaa ke baa'd bhii 'siitaa' kii vo jalaa-vatanii
vo raato.n-raat 'sirii-krishn' ko uThaa.e hu.e
balaa kii qaid se 'basdev' kaa nikal jaanaa
vo a.ndhkaar vo baarish, ba.Dhii hu.ii jamunaa
Gam-e-aafriin kahaanii vo 'hiir' 'raa.njhaa' kii
shu.uur-e-hind ke bachpan kii yaadgaar-e-aziim
ki aise vaise taKHayyul kii saa.ns ukha.D jaa.e
ka.ii muhayyur-e-idraak dev-maalaaye.n
hitopdesh ke qisse kathaa sarat-saagar
karo.Do.n siino.n me.n vo guu.njtaa hu.aa aalhaa
mai.n puuchhtaa huu.n kisii aur malak vaalo.n se
kahaaniyo.n kii ye daulat ye be-bahaa daulat
fasaane dekh lo in ke nazar bhii aatii hai
mai.n puuchhtaa huu.n ki gahvaare aur qaumo.n ke
base hu.e hai.n kahii.n aisii daastaano.n se
kahaaniyaa.n jo mai.n suntaa thaa apne bachpan me.n
mire liye vo na thii.n mahz baa.is-e-tafriih
fasaano.n se mire bachpan ne sochnaa siikhaa
fasaano.n se mujhe sanjiidgii ke dars mile
fasaano.n me.n nazar aatii thii mujh ko ye duniyaa
Gam o KHushii me.n rachii pyaar me.n basaa.ii hu.ii
fasaano.n se mire dil ne ghulaavaTe.n paa.ii.n
yahii nahii.n ki mashaahiir hii ke afsaane
zaraa sii umr me.n karte ho.n mujh ko muta.assir
mohalle Tole ke gumnaam aadamiyyo.n ke
kuchh aise sun.ne me.n aate the vaaqi.aat-e-hayaat
jo.n yuu.n to hote the farsuuda aur ma.amuulii
magar the aa.iine iKHlaas aur sharaafat ke
ye chand aa.ii ga.ii baate.n aisii baate.n thii.n
ki jin kii oT chamaktaa thaa dard-e-insaanii
ye vaardaat nahii.n razmiyye hayaat ke the
Garaz ki ye hai.n mire bachpane kii tasviire.n
nadiim aur bhii kuchh KHatt-o-KHaal hai.n un ke
ye merii maa.n kaa hai kahnaa ki jab mai.n bachcha thaa
mai.n aise aadmii kii god me.n na jaataa thaa
jo bad-qimaar ho aibii ho yaa ho bad-suurat
mujhe bhii yaad hai nau das baras hii kaa mai.n thaa
to mujh pe kartaa thaa jaaduu saa husn-e-insaanii
kuchh aisaa hotaa thaa mahsuus jab mai.n dekhtaa thaa
shagufta rang tar-o-taaza ruup vaalo.n kaa
ki un kii aa.nch mirii haDDiyaa.n galaa degii
ik aazmaa.ish-e-jaa.n thii ki thaa shu.uur-e-jamaal
aur us kii nashtariyyat us kii ustuKHaa.n-sozii
Gam o nashaat lagaavaT mohabbat o nafrat
ik intishaar-e-sakuu.n iztiraab pyaar itaab
vo be-panaah zakii-ul-hisii vo hilm o Guruur
kabhii kabhii vo bhare ghar me.n hiss-e-tanhaa.ii
vo vahshate.n mirii maahaul-e-KHush-gavaar me.n bhii
mirii sarisht me.n ziddain ke ka.ii jo.De
shuruu.a hii se the maujuud aab-o-taab ke saath
mire mizaaj me.n pinhaa.n thii ek jadaliyyat
rago.n me.n chhuuTte rahte the be-shumaar anaar
nadiim ye hai.n mire baal-pan ke kuchh aasaar
vafuur o shiddat-e-jazbaat kaa ye aalam thaa
ki kau.nde jast kare.n dil ke aabgiine me.n
vo bachpanaa jise bardaasht apnii mushkil ho
vo bachpanaa jo KHud apnii hii tevriyaa.n sii cha.Dhaa.e
nadiim zikr-e-javaanii se kaa.np jaataa huu.n
javaanii aa.ii dabe paa.nv aur yuu.n aa.ii
ki us ke aate hii big.Daa banaa-banaayaa khel
vo KHvaahishaat ke jazbaat ke umaDte hu.e
vo ho.nkte hu.e be-naam aag ke tuufaa.n
vo phuuTtaa hu.aa jvaalaa-mukhii javaanii kaa
rago.n me.n uThtii hu.ii aa.ndhiyo.n ke vo jhaTke
ki jo tavaazun-e-hastii jhi.njho.D ke rakh de.n
vo zalzale ki pahaa.Do.n ke pair ukha.D jaa.e.n
buluuGiyat kii vo Tiise.n vo karb-e-nashv-o-numaa
aur aise me.n mujhe byaahaa gayaa bhalaa kis se
jo ho na saktii thii hargiz mirii shariik-e-hayaat
ham ek duusre ke vaaste bane hii na the
siyaah ho ga.ii duniyaa mirii nigaaho.n me.n
vo jis ko kahte hai.n shaadii-e-KHaanaa-aabaadii
mire liye vo banii bevgii javaanii kii
luTaa suhaag mirii zindagii kaa maa.nDo me.n
nadiim khaa ga.ii mujh ko nazar javaanii kii
balaa-e-jaan mujhe ho gayaa shu.uur-e-jamaal
talaash-e-shola-e-ulfat se ye hu.aa haasil
ki nafrato.n kaa agan-ku.nD ban ga.ii hastii
vo halq o siina o rag rag me.n be-panaah chubhaa
nadiim jaise nigal lii ho mai.n ne naag-phanii
z ishq-zaadam o ishqam kamusht zaar-o-dareG
KHabar na burd ba-rustam kase ki sohraabam
na puuchh aalam-e-kaam-o-dahan nadiim mire
samar hayaat kaa jab raakh bin gayaa mu.nh me.n
mai.n chaltii-phirtii chitaa ban gayaa javaanii kii
mai.n kaa.ndhaa detaa rahaa apne jiite murde ko
ye sochtaa thaa ki ab kyaa karuu.n kahaa.n jaa.uu.n
bahut se aur masaa.ib bhii mujh pe TuuT pa.De
mai.n Dhuu.nDhne lagaa har samt sachchii jhuuTii panaah
talaash-e-husn me.n sher-o-adab me.n dostii me.n
ru.ndhii sadaa se mohabbat kii bhiik maa.ngii hai
na.e sire se samajhnaa pa.Daa hai duniyaa ko
ba.De jatan se sambhaalaa hai KHud ko mai.n ne nadiim
mujhe sambhalne me.n to chaaliis saal guzre hai.n
merii hayaat to vish-paan kii kathaa hai nadiim
mai.n zahr pii ke zamaane ko de sakaa amrit
na puuchh mai.n ne jo zahraaba-e-hayaat piyaa
magar huu.n dil se mai.n is ke liye sipaas-guzaar
larazte haatho.n se daaman KHuluus kaa na chhaTaa
bachaa ke rakkhii thii mai.n ne amaanat-e-tiflii
ise na chhiin sakii mujh se dast-burd-e-shabaab
ba-qaul shaa.er-e-mulk-e-fara.ng har bachcha
KHud apne ahd-e-javaanii kaa baap hotaa hai
ye kam nahii.n hai ki tiflii-e-rafta chho.D ga.ii
dil-e-hazii.n me.n ka.ii chhoTe chhoTe naqsh-e-qadam
mirii anaa kii rago.n me.n pa.De hu.e hai.n abhii
na jaane kitne bahut narm u.ngliyo.n ke nishaa.n
hanuuz vaqt ke be-dard haath kar na sake
hayaat-e-rafta kii zinda nishaaniyo.n ko fanaa
zamaana chhiin sakegaa na merii fitrat se
mirii safaa mire tahtush-shu.uur kii ismat
taKHaiyyulaat kii doshiizgii kaa radd-e-amal
javaan ho ke bhii be-laus tifl-vash jazbaat
syaanaa hone pe bhii ye jibillate.n merii
ye sarKHushii o Gam be-riyaa ye qalb-gudaaz
baGair bair ke an-ban Garaz se paak tapaak
Garaz se paak ye aa.nsuu Garaz se paak ha.nsii
ye dasht-e-dahr me.n hamdardiyo.n kaa sar-chashma
qubuuliyat kaa ye jazba ye kaa.enaat o hayaat
is arz-e-paak par iimaan ye ham-aaha.ngii
har aadmii se har ik KHvaab o ziist se ye lagaav
ye maa.n kii god kaa ehsaas sab manaazir me.n
qariib o duur zamii.n me.n ye buu-e-vataniyyat
nizaam-e-shams-o-qamar me.n payaam-e-hifz-e-hayaat
ba-chashm-e-shaam-o-sahar maamtaa kii shabnam sii
ye saaz o dil me.n mire naGma-e-analkaunain
har iztiraab me.n ruuh-e-sukuun-e-be-paayaa.n
zamaana-e-guzaraa.n me.n davaam kaa sargam
ye bazm-e-jashn-e-hayaat-o-mamaat sajtii hu.ii
kisii kii yaad kii shahnaa.iyaa.n sii bajtii hu.ii
ye ramaziiyat ke anaasir shu.uur-e-puKHta me.n
falak pe vajd me.n laatii hai jo farishto.n ko
vo shaa.erii bhii buluuG-e-mizaaj-e-tiflii hai
ye nashtariyyat-e-hastii ye is kii sheriyat
ye pattii pattii pe gulzaar-e-zindagii ke kisii
latiif nuur kii parchhaa.iyaa.n sii pa.Dtii hu.ii
baham ye hairat o maanuusiyat kii sargoshii
bashar kii zaat ki mahr-e-uluuhiyat ba-jabii.n
abad ke dil me.n ja.De.n maartaa hu.aa sabza
Gam-e-jahaa.n mujhe aa.nkhe.n dikhaa nahii.n saktaa
ki aa.nkhe.n dekhe hu.e huu.n mai.n ne apne bachpan kii
mire lahuu me.n abhii tak sunaa.ii detii hai.n
sukuut-e-huzn me.n bhii ghu.nghru.o.n kii jhankaare.n
ye aur baat ki mai.n is pe kaan de na sakuu.n
isii vadii.at-e-tiflii kaa ab sahaaraa hai
yahii hai.n marham-e-kaafuur dil ke zaKHmo.n par
unhii ko rakhnaa hai mahfuuz taa-dam-e-aaKHir
zamiin-e-hind hai gahvaara aaj bhii hamdam
agar hisaab kare.n das karo.D bachcho.n kaa
ye bachche hind kii sab se ba.Dii amaanat hai.n
har ek bachche me.n hai.n sad-jahaan-e-imkaanaat
magar vatan kaa hal-o-aqd jin ke haath me.n hai
nizaam-e-zindagii-e-hind jin ke bas me.n hai
ravayya dekh ke un kaa ye kahnaa pa.Dtaa hai
kise pa.Dii hai ki samjhe vo is amaanat ko
kise pa.Dii hai ki bachcho.n kii zindagii ko bachaa.e
KHaraab hone se Talne se suukh jaane se
bachaa.e kaun in aazurda honhaaro.n ko
vo zindagii jise ye de rahe hai.n bhaarat ko
karo.Do.n bachcho.n ke miTne kaa ik alamiyya hai
churaa.e jaate hai.n bachche abhii gharo.n se yahaa.n
ki jism to.D diye jaa.e.n un ke taaki mile
churaane vaalo.n ko KHairaat maagh-mele kii
jo is azaab se bach jaa.e.n to gale pa.D jaa.e.n
vo la.ante.n ki hamaare karo.Do.n bachcho.n kii
nadiim KHair se miTTii KHaraab ho jaa.e
vo muflisii ki KHushii chhiin le vo be-bargii
udaasiyo.n se bharii zindagii kii be-ra.ngii
vo yaasiyaat na jis ko chhu.e shu.aa-e-umiid
vo aa.nkhe.n dekhtii hai.n har taraf jo be-nuurii
vo TukTukii ki jo pathraa ke rah ga.ii ho nadiim
vo be-dilii kii ha.nsii chhiin le jo ho.nTo.n se
vo dukh ki jis se sitaaro.n kii aa.nkh bhar aa.e
vo gandagii vo kasaafat maraz-zada paikar
vo bachche chhin ga.e ho.n jin se bachpane un ke
hamii.n ne gho.nT diyaa jis ke bachpane kaa galaa
jo khaate-piite gharo.n ke hai.n bachche un ko bhii kyaa
samaaj phuulne-phalne ke de sakaa saadhan
vo saa.ns lete hai.n tahziib-kush fazaa.o.n me.n
ham un ko dete hai.n be-jaan aur Galat ta.aliim
milegaa ilm-e-jihaalat-numaa se kyaa un ko
nikal ke madraso.n aur universitiyyo.n se
ye bad-nasiib na ghar ke na ghaaT ke ho.nge
mai.n puuchhtaa huu.n ye ta.aliim hai ki makkaarii
karo.Do.n zindagiyo.n se ye be-panaah daGaa
nisaab aisaa ki mehnat kare.n agar is par
bajaa.e ilm jahaalat kaa iktisaab kare.n
ye ulTaa dars-e-adab ye sa.Dii hu.ii ta.aliim
dimaaG kii ho Gizaa yaa Gizaa-e-jismaanii
har ik tarah kii Gizaa me.n yahaa.n milaavaT hai
vo jis ko bachcho.n kii ta.aliim kah ke dete hai.n
vo dars ulTii chhurii hai gale pe bachpan ke
zamiin-e-hind hi.nDolaa nahii.n hai bachcho.n kaa
karo.Do.n bachcho.n kaa ye des ab janaaza hai
ham inqalaab ke KHatro.n se KHuub vaaqif hai.n
kuchh aur roz yahii rah ga.e jo lail-o-nahaar
to mol lenaa pa.Degaa hame.n ye KHatra bhii
ki bachche qaum kii sab se ba.Dii amaanat hai.n

Firaq Gorakhpuri
Nazm

hubb-e-watan

ai sip.har-e-barii.n ke sayyaaro
ai fazaa-e-zamii.n ke gul-zaaro
ai pahaa.Do.n kii dil-fareb fazaa
ai lab-e-juu kii ThanDii ThanDii havaa
ai anaadil ke naGma-e-saharii
ai shab-e-maahtaab taaro.n bharii
ai nasiim-e-bahaar ke jho.nko
dahr-e-naa-paa.edaar ke dhoko
tum har ik haal me.n ho yuu.n to aziiz
the vatan me.n magar kuchh aur hii chiiz
jab vatan me.n hamaaraa thaa ramnaa
tum se dil baaG baaG thaa apnaa
tum mirii dil-lagii ke saamaa.n the
tum mire dard-e-dil ke darmaa.n the
tum se kaTtaa thaa ra.nj-e-tanhaa.ii
tum se paataa thaa dil shakebaa.ii
aan ik ik tumhaarii bhaatii thii
jo adaa thii vo jii lubhaatii thii
karte the jab tum apnii Gam-KHvaarii
dho.ii jaatii thii.n kulfate.n saarii
jab havaa khaane baaG jaate the
ho ke KHush-haal ghar me.n aate the
baiTh jaate the jab kabhii lab-e-aab
dho ke uThte the dil ke daaG shitaab
koh o sahraa o aasmaan o zamii.n
sab mirii dil-lagii kii shakle.n thii.n
par chhuTaa jis se apnaa mulk o dayaar
jii hu.aa tum se KHud-ba-KHud bezaar
na gulo.n kii adaa KHush aatii hai
na sadaa bulbulo.n kii bhaatii hai
sair-e-gulshan hai jii kaa ik janjaal
shab-e-mahtaab jaan ko hai vabaal
koh o sahraa se taa lab-e-dariyaa
jis taraf jaa.e.n jii nahii.n lagtaa
kyaa hu.e vo din aur vo raate.n
tum me.n aglii sii ab nahii.n baate.n
ham hii Gurbat me.n ho ga.e kuchh aur
yaa tumhaare badal ga.e kuchh taur
go vahii ham hai.n aur vahii duniyaa
par nahii.n ham ko lutf duniyaa kaa
ai vatan ai mire bahisht-e-barii.n
kyaa hu.e tere aasmaan o zamii.n
raat aur din kaa vo samaa.n na rahaa
vo zamii.n aur vo aasmaa.n na rahaa
terii duurii hai morid-e-aalaam
tere chhuTne se chhuT gayaa aaraam
kaaTe khaataa hai baaG bin tere
gul hai.n nazro.n me.n daaG bin tere
miT gayaa naqsh kaamraanii kaa
tujh se thaa lutf zindagaanii kaa
jo ki rahte hai.n tujh se duur sadaa
in ko kyaa hogaa zindagii kaa mazaa
ho gayaa yaa.n to do hii din me.n ye haal
tujh bin ek ek pal hai ik ik saal
sach bataa to sabhii ko bhaataa hai
yaa ki mujh se hii teraa naataa hai
mai.n hii kartaa huu.n tujh pe jaan nisaar
yaa ki duniyaa hai terii aashiq-e-zaar
kyaa zamaane ko tuu aziiz nahii.n
ai vatan tuu to aisii chiiz nahii.n
jin o insaan kii hayaat hai tuu
murG o maahii kii kaa.enaat hai tuu
hai nabaataat kaa numuu tujh se
ruukh tujh bin hare nahii.n hote
sab ko hotaa hai tujh se nashv-o-numaa
sab ko bhaatii hai terii aab-o-havaa
terii ik musht-e-KHaak ke badle
luu.n na hargiz agar bahisht mile
jaan jab tak na ho badan se judaa
ko.ii dushman na ho vatan se havaa

Altaf Hussain Hali
Nazm

jaun-eliya se aaKHri mulaqat

vo ek tarz-e-suKHan kii KHushbuu
vo ek mahkaa hu.aa takallum
labo.n se jaise gulo.n kii baarish
ki jaise jharnaa saa gir rahaa ho
ki jaise KHushbuu bikhar rahii ho
ki jaise resham ulajh rahaa ho
ajab balaaGat thii guftuguu me.n
ravaa.n thaa dariyaa fasaahato.n kaa
vo ek maktab thaa aagahii kaa
vo ilm-o-daanish kaa mai-kada thaa
vo qalb aur zehn kaa tasaadum
jo guftuguu me.n ravaa.n-davaa.n thaa
vo us ke alfaaz kii ravaanii
vo us kaa ruk ruk ke baat karnaa
vo sho.ala-e-lafz aur ma.aanii
kahii.n lapaknaa kahii.n Thaharnaa
Thahar ke phir vo kalaam karnaa
bahut se jazbo.n kii parda-daarii
bahut se jazbo.n ko aam karnaa
jo mai.n ne puuchhaa
guzishta shab ke mushaa.ere me.n bahut se shaidaa.ii muntazir the
mujhe bhii ye hii pata chalaa thaa ki aap tashriif laa rahe hai.n
magar hu.aa kyaa
zaraa tavaqquf ke baa'd bole nahii.n gayaa mai.n
na jaa sakaa mai.n
suno hu.aa kyaa
mai.n KHud ko maa.il hii kar na paayaa
ye merii haalat merii tabii.at
phir us pe merii ye bad-mizaajii-o-bad-havaasii
ye vahshat-e-dil
miyaa.n haqiiqat hai ye bhii sun lo ki ab hamaare mushaa.ere bhii
nahii.n hai.n un vahshato.n ke haamil
jo merii taqdiir ban chukii hai.n
jo merii tasviir ban chukii hai.n
jo merii taqsiir ban chukii hai.n
phir ik tavaqquf
ki jis tavaqquf kii kaifiyat par garaa.n samaa.at guzar rahii thii
us ek saa.at kaa haath thaame ye ik vazaahat guzar rahii thii
adab-farosho.n ne jaahilo.n ne mushaa.ere ko bhii ik tamaasha banaa diyaa hai
Gazal kii taqdiis luuT lii hai adab ko mujraa banaa diyaa hai
suKHan-varo.n ne bhii jaane kyaa kyaa hamaare hisse me.n rakh diyaa hai
sitam to ye hai ki chiiKH ko bhii suKHan ke zumre me.n rakh diyaa hai
ilaahii tauba
samaa.ato.n me.n KHaraashe.n aane lagii hai.n ab aur shigaaf zehno.n me.n pa.D ga.e hai.n
miyaa.n hamaare qadam to kab ke zamii.n me.n KHiffat se ga.D ga.e hai.n
KHamoshiyo.n ke dabiiz kohre se chand lamho.n kaa phir guzarnaa
vo jaise KHud ko udaasiyo.n ke samundaro.n me.n talaash karnaa
vo jaise phir surma.ii ufuq par sitaare alfaaz ke ubharnaa
ye zindagii se jo be-niyaazii hai kis liye hai
ye roz-o-shab kii jo bad-havaasii hai kis liye hai
bas itnaa samjho
ki KHud ko barbaad kar chukaa huu.n
suKHan to aabaad KHair kyaa ho
magar jahaa.n dil dha.Dak rahe ho.n vo shahr aabaad kar chukaa huu.n
bachaa hii kyaa hai
thaa jis ke aane kaa KHauf mujh ko vo ek saa.at guzar chukii hai
vo ek saf.ha ki jis pe likkhaa thaa zindagii ko vo kho chukaa hai
kitaab-e-hastii bikhar chukii hai
pa.Dhaa thaa mai.n ne bhii zindagii ko
magar tasalsul nahii.n thaa us me.n
idhar-udhar se yahaa.n vahaa.n se ajab kahaanii ga.Dhii ga.ii thii
samajh me.n aa.ii na is liye bhii ke darmiyaa.n se pa.Dhii ga.ii thii
samajhtaa kaise
na falsafii mai.n na ko.ii aalim
uquubato.n ke safar pe niklaa mai.n ik sitaara huu.n aagahii kaa
ajal ke haatho.n me.n haath Daale ik isti.aara huu.n zindagii kaa
itaab naazil hu.aa hai jis par mai.n vo hii ma.atuub aadmii huu.n
sitamgaro.n ko talab hai jis kii mai.n vo hii matluub aadmii huu.n
kabhii mohabbat ne ye kahaa thaa mai.n ek mahbuub aadmii huu.n
magar vo zarb-e-jafaa pa.Dii hai ki ek mazruub aadmii huu.n
mai.n ek bekal saa aadmii huu.n bahut hii bojhal saa aadmii huu.n
samajh rahii hai ye duniyaa mujh ko mai.n ek paagal saa aadmii huu.n
magar ye paagal ye niim-vahshii KHirad ke maaro.n se muKHtalif hai
jo kahnaa chaahaa thaa kah na paayaa
kahaa gayaa jo use ye duniyaa samajh na paa.ii
na baat ab tak kahii ga.ii hai
na baat ab tak sunii ga.ii hai
sharaab-o-sh.er-o-shu.uur kaa jo ik ta'alluq hai us ke baare me.n raa.e kyaa hai
sunaa hai ham ne ki aap par bhii bahut se fatve lage hai.n lekin
sharaab-noshii haraam hai to
ye mas.ala bhii ba.Daa ajab hai
mai.n ek mai-kash huu.n ye to sach hai
magar ye mai-kash kabhii kisii ke lahuu se sairaab kab hu.aa hai
hamesha aa.nsuu piye hai.n us ne hamesha apnaa lahuu piyaa hai
ye bahs chho.Do haraam kyaa hai halaal kyaa hai azaab kyaa hai savaab kyaa hai
sharaab kyaa hai
aziyyato.n se najaat hai ye hayaat hai ye
sharaab-o-shab aur shaa.irii ne ba.Daa sahaaraa diyaa hai mujh ko
sambhaal rakkhaa sharaab ne aur rahii hai mohsin ye raat merii
isii ne mujh ko diye dilaase sunii hai is ne hii baat merii
hamesha mere hii saath jaagii hamesha mere hii saath so.ii
mai.n KHush hu.aa to ye muskuraa.ii mai.n ro diyaa to ye saath ro.ii
ye sher-go.ii hai KHud-kalaamii kaa ik zariiya
isii zariiye isii vasiile se mai.n ne KHud se vo baate.n kii hai.n
jo duusro.n se mai.n kah na paayaa
haraam kyaa hai halaal kyaa hai ye sab tamaashe hai.n muftiyo.n ke
ye saare fitne hai.n maulvii ke
haraam kar dii thii KHud-kushii bhii ki apnii marzii se mar na paa.e
ye mai-kashii bhii haraam Thahrii ki ham ko apnaa lahuu bhii piine kaa haq nahii.n hai
ki apnii marzii se ham ko jiine kaa haq nahii.n hai
kise bataa.e.n
zamiir-o-zarf-e-bashar pe mauquuf hai.n masaa.il
samundaro.n me.n u.nDel jitnii sharaab chaahe
na harf paanii pe aa.egaa aur na us kii taqdiis KHatm hogii
to mai-kashii ko haraam kahne se pahle dekho
ki piine vaale kaa zarf kyaa hai hai.n kis ke haatho.n me.n jaam-o-miinaa
ye nukta-sanjii ye nukta-daanii jo maulvii kii samajh me.n aatii to baat bantii
na diin-o-maz.hab ko jis ne samjhaa na jis ne samjhaa hai zindagii ko
tahuuraa piine kii baat kar ke haraam kahtaa hai mai-kashii ko
jo diin-o-maz.hab kaa zikr aayaa to mai.n ne puuchhaa
ki is havaale se raa.e kyaa hai
ye KHud-parastii KHudaa-parastii ke darmiyaa.n kaa jo faasla hai
jo ik KHalaa hai ye kyaa balaa hai
ye diin-o-maz.hab faqat kitaabe.n
ba-juz kitaabo.n ke aur kyaa hai
kitaabe.n aisii jinhe.n samajhne kii koshishe.n kam hai.n aur ziyaada pa.Dhaa gayaa hai
kitaabe.n aisii ki aam insaa.n ko in ke pa.Dhne kaa haq hai lekin
inhe.n samajhne kaa haq na hargiz diyaa gayaa hai
ki in kitaabo.n pe diin-o-maz.hab ke Thekedaar ijaara-daaro.n kii dastaras hai
isii liye to ye diin-o-maz.hab fasaad-o-fitna bane hu.e hai.n
ye diin-o-maz.hab
jo ilm-o-hikmat ke saath ho to sukuun hogaa
jo dastaras me.n ho jaahilo.n kii junuun hogaa
ye ishq kyaa hai ye husn kyaa hai
ye zindagii kaa javaaz kyaa hai
ye tum ho jii jii ke mar rahe ho ye mai.n huu.n mar mar ke jii rahaa huu.n
ye raaz kyaa hai
hai kyaa haqiiqat majaaz kyaa hai
sivaa.e KHvaabo.n ke kuchh nahii.n hai
ba-juz saraabo.n ke kuchh nahii.n hai
ye ik safar hai tabaahiyo.n kaa udaasiyo.n kii ye rahguzar hai
na is ko duniyaa kaa ilm ko.ii na is ko apnii ko.ii KHabar hai
kabhii kahii.n par nazar na aa.e kabhii har ik shai me.n jalva-gar hai
kabhii ziyaa.n hai kabhii zarar hai
na KHauf is ko na kuchh KHatar hai
kabhii KHudaa hai kabhii bashar hai
hu.aa haqiiqat se aashnaa to ye suu-e-daar-o-rasan gayaa hai
kabhii ha.nsaa hai ye zer-e-KHanjar kabhii ye suulii pe ha.ns diyaa hai
kabhii ye gulnaar ho gayaa hai sinaa.n pe guftaar ho gayaa hai
kabhii hu.aa hai ye Garq-e-dariyaa
kabhii ye taqdiir-e-dasht-o-sahraa
raqam hu.aa hai ye aa.nso.o.n me.n
kabhii lahuu ne hai is ko likkhaa
hikaayat-e-dil hikaayat-e-jaa.n hikaayat-e-zindagii yahii hai
agar saliiqe se likkhii jaa.e ibaarat-e-zindagii yahii hai
ye husn hai us dhanak kii suurat
ki jis ke ra.ngo.n kaa falsafa hii kabhii kisii par nahii.n khulaa hai
ye falsafa jo fareb-e-paiham kaa silsila hai
ki is ke ra.ngo.n me.n ik ishaara hai be-ruKHii kaa
ik isti.aara hai zindagii kaa
kabhii alaamat hai shoKHiyo.n kii
kabhii kinaaya hai saadgii kaa
badalte mausam kii kaifiyat ke hai.n rang pinhaa.n isii dhanak me.n
kashish sharaarat-o-jaazbiyyat ke shoKH ra.ngo.n ne is dhanak ko ajiib paikar ataa kiyaa hai ik aisaa manzar ataa kiyaa hai
ki jis ke sehr-o-asar me.n aa kar
lahuu bahut aa.nkhe.n ro chukii hai.n bahut to biinaa.ii kho chukii hai.n
basaarte.n kyaa basiirate.n bhii to aql-o-daanaa.ii kho chukii hai.n
na jaane kitne hii rang maKHfii hai.n is dhanak me.n
bas ek ra.ng-e-vafaa nahii.n hai.n
is ek ra.ngat kii aarzuu ne lahuu rulaayaa hai aadmii ko
yahii bataayaa hai aagahii ko
ye ik chhalaavaa hai zindagii kaa
hasiin dhoka hai zindagii kaa
magar muqaddar hai aadmii kaa
fareb-e-gandum samajh me.n aayaa to mai.n ne jaanaa
ye ishq kyaa hai ye husn kyaa hai
ye ek laGzish hai jis ke dam se hayaat-e-nau kaa bharam khulaa hai

Tariq Qamar
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now