Search result for "dars" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "dars"

Nazm MATCHES FOR "dars"

Nazm

KHwab jo bikhar gae

KHushaa vo daur-e-be-KHudii ki justujuu-e-yaar thii
jo dard me.n suruur thaa to be-kalii qaraar thii
kisii ne zahr-e-Gam diyaa to muskuraa ke pii ga.e
ta.Dap me.n bhii sukuu.n na thaa, KHalish bhii saazgaar thii
hayaat-e-shauq kaa vahii saraab Dhuu.nDhtaa huu.n mai.n
jinhe.n sahar nigal ga.ii vo KHvaab Dhuu.nDhtaa huu.n mai.n
kahaa.n ga.ii vo nii.nd kii sharaab Dhuu.nDhtaa huu.n mai.n

Amir Usmani

Nazm

kis se mohabbat hai

vo merii jur.ato.n par be-niyaazii kii sazaa denaa
havas kii zulmato.n par naaz kii bijlii giraa denaa
nigaah-e-shauq kii bebaakiyo.n par muskuraa denaa
junuu.n ko dars-e-tamkii.n de ga.ii.n naadaaniyaa.n us kii

Asrarul Haq Majaz

Nazm

hinDola

dayaar-e-hind thaa gahvaara yaad hai hamdam
bahut zamaana hu.aa kis ke kis ke bachpan kaa
isii zamiin pe khelaa hai 'raam' kaa bachpan
isii zamiin pe un nanhe nanhe haatho.n ne
kisii samay me.n dhanush-baan ko sambhaalaa thaa
isii dayaar ne dekhii hai 'krishn' kii liilaa
yahii.n gharo.ndo.n me.n siitaa sulochanaa raadhaa
kisii zamaane me.n gu.Diyo.n se kheltii ho.ngii
yahii zamii.n yahii dariyaa pahaa.D jangal baaG
yahii havaa.e.n yahii sub.h-o-shaam suuraj chaa.nd
yahii ghaTaa.e.n yahii barq-o-ra.ad o qaus-e-quzah
yahii.n ke giit rivaayaat mausamo.n ke juluus
hu.aa zamaana ki 'siddhaarth' ke the gahvaare
inhii nazaaro.n me.n bachpan kaTaa thaa 'vikram' kaa
sunaa hai 'bhartarharii' bhii inhii.n se khelaa thaa
'bharat' agastya' 'kapil' 'vyaas' 'pashii' 'kautilya'
'janak' vashishth' 'manu' 'vaalmik' vishvaamitr
'kanaad' 'gautam' o ramanuj 'kumaaril-bhatt'
mohanjoDaaro ha.Dappaa ke aur ajantaa ke
banaane vaale yahii.n ballamo.n se khele the
isii hi.nDole me.n 'bhavabhut' o 'kaaliidaas' kabhii
humak humak ke jo tutlaa ke gungunaa.e the
sarasvatii ne zabaano.n ko un kii chuumaa thaa
yahii.n ke chaa.nd va suuraj khilaune the un ke
inhii.n fazaa.o.n me.n bachpan palaa thaa 'KHusrav' kaa
isii zamii.n se uThe 'tansen' aur 'akbar'
'rahiim' 'nanak' o 'chaitanya' aur 'chishti' ne
inhii.n fazaa.o.n me.n bachpan ke din guzaare the
isii zamii.n pe kabhii shazaada-e-'KHurram'
zaraa sii dil-shikanii par jo ro diyaa hogaa
bhar aayaa thaa dil-e-naazuk to kyaa ajab is me.n
in aa.nsu.o.n me.n jhalak taaj kii bhii dekhii ho
'ahalyabaa.i' 'daman' 'padmini' o 'raziya' ne
yahii.n ke pe.Do.n kii shaaKHo.n me.n Daale the jhuule
isii fazaa me.n ba.Dhaa.ii thii pe.ng bachpan kii
inhii nazaaro.n me.n saavan ke giit gaa.e the
isii zamiin pe ghuTno.n ke bal chale ho.nge
'malik-mohammad' o 'raskhan' aur 'tulsi-das'
inhii.n fazaa.o.n me.n guu.njii thii totlii bolii
'kabir-das' 'Tukaaraam' 'suur' o 'miiraa' kii
isii hi.nDole me.n 'viddypati' kaa ka.nTh khulaa
isii zamiin ke the laal 'miir' o 'Gaalib' bhii
Thumak Thumak ke chale the gharo.n ke aa.ngan me.n
'aniis' o 'haalii' o 'iqbaal' aur 'vaaris-shaah'
yahii.n kii KHaak se ubhre the 'premchand' o 'tagore'
yahii.n se uTThe the tahziib-e-hind ke me.amaar
isii zamiin ne dekhaa thaa baal-pan in kaa
yahii.n dikhaa.ii thii.n in sab ne baal-liilaa.e.n
yahii.n har ek ke bachpan ne tarbiyat paa.ii
yahii.n har ek ke jiivan kaa baalkaa.nD khulaa
yahii.n se uThte baguulo.n ke saath dau.De hai.n
yahii.n kii mast ghaTaa.o.n ke saath jhuume hai.n
yahii.n kii madh-bharii barsaat me.n nahaa.e hai.n
lipaT ke kiicha.D o paanii se bachpane un ke
isii zamiin se uTThe vo desh ke saava.nt
u.Daa diyaa thaa jinhe.n company ne topo.n se
isii zamiin se uThii hai.n an-ginat nasle.n
pale hai.n hind hi.nDole me.n an-ginat bachche
mujh aise kitne hii gumnaam bachche khele hai.n
isii zamii.n se isii me.n supurd-e-KHaak hu.e
zamiin-e-hind ab aaraam-gaah hai un kii
is arz-e-paak se uTThii.n bahut sii tahziibe.n
yahii.n tuluu hu.ii.n aur yahii.n Guruub hu.ii.n
isii zamiin se ubhre ka.ii uluum-o-funuun
faraaz-e-koh-e-himaala ye daur-e-ga.ng-o-jaman
aur in kii god me.n parvarda kaarvaano.n ne
yahii.n rumuuz-e-KHiraam-e-sukuu.n-numaa siikhe
nasiim-e-sub.h-e-tamaddun ne bhairvii.n chhe.Dii
yahii.n vatan ke taraano.n kii vo pave.n phuuTe.n
vo be-qaraar sukuu.n-zaa tarannum-e-saharii
vo kapkapaate hu.e soz-o-saaz ke sho.ale
inhii fazaa.o.n me.n a.ng.Daa.iyaa.n jo le ke uThe
lavo.n se jin ke charaaGaa.n hu.ii thii bazm-e-hayaat
jinho.n ne hind kii tahziib ko zamaana hu.aa
bahut se zaaviyo.n se aa.iina dikhaayaa thaa
isii zamii.n pe Dhalii hai mirii hayaat kii shaam
isii zamiin pe vo sub.h muskuraa.ii hai
tamaam sho.ala o shabnam mirii hayaat kii sub.h
sunaa.uu.n aaj kahaanii mai.n apne bachpan kii
dil-o-dimaaG kii kaliyaa.n abhii na chaTkii thii.n
hamesha kheltaa rahtaa thaa bhaa.ii bahno.n me.n
hamaare saath mohalle kii la.Dkiyaa.n la.Dke
machaa.e rakhte the baalak udham har ek gha.Dii
lahuu tara.ng uchhal-phaa.nd kaa ye aalam thaa
mohalla sar pe uThaa.e phire jidhar guzre
hamaare chahchahe aur shor guu.njte rahte
chahaar-samt mohalle ke goshe goshe me.n
fazaa me.n aaj bhii laa-raib guu.njte ho.nge
agarche duusre bachcho.n kii tarah thaa mai.n bhii
ba-zaahir auro.n ke bachpan saa thaa miraa bachpan
ye sab sahii mire bachpan kii shaKHsiyat bhii thii ek
vo shaKHsiyat ki bahut shoKH jis ke the KHad-o-KHaal
adaa adaa me.n ko.ii shaan-e-infiraadii thii
Garaz kuchh aur hii lachchhan the mere bachpan ke
mujhe thaa chhoTe ba.Do.n se bahut shadiid lagaav
har ek par mai.n chhi.Daktaa thaa apnii nannhii sii jaa.n
dil umDaa aataa thaa aisaa ki jii ye chaahtaa thaa
uThaa ke rakh luu.n kaleje me.n apnii duniyaa ko
mujhe hai yaad abhii tak ki khel-kuud me.n bhii
kuchh aise vaqfe pur-asraar aa hii jaate the
ki jin me.n sochne lagtaa thaa kuchh miraa bachpan
ka.ii ma.aanii-e-be-lafz chhuune lagte the
butuun-e-Gaib se mere shu.uur-e-asGar ko
har ek manzar-e-maanuus ghar kaa har gosha
kisii tarah kii ho ghar me.n sajii hu.ii har chiiz
mire mohalle kii galiyaa.n makaa.n dar-o-diivaar
chabuutre ku.e.n kuchh pe.D jhaa.Diyaa.n bele.n
vo pherii vaale ka.ii un ke bhaa.nt bhaa.nt ke bol
vo jaane buujhe manaazir vo aasmaa.n o zamii.n
badalte vaqt kaa aa.iina garmii-o-KHunkii
Guruub-e-mahr me.n ra.ngo.n kaa jaagtaa jaaduu
shafaq ke shiish-mahal me.n gudaaz-e-pinhaa.n se
javaahro.n kii chaTaane.n sii kuchh pighaltii hu.ii.n
shajar hajar kii vo kuchh sochtii hu.ii duniyaa
suhaanii raat kii maanuus ramaziyat kaa fusuu.n
alassabaah ufuq kii vo thartharaatii bhave.n
kisii kaa jhaa.nknaa aahista phuuTtii pau se
vo dopahar kaa samay darja-e-tapish kaa cha.Dhaav
thakii thakii sii fazaa me.n vo zindagii kaa utaar
hu.aa kii bansiyaa.n ba.nsvaa.Diyo.n me.n bajtii hu.ii.n
vo din ke ba.Dhte hu.e saa.e sah-pahar kaa sukuu.n
sukuut shaam kaa jab dono.n vaqt milte hai.n
Garaz jhalakte hu.e sarsarii manaazir par
mujhe gumaan paristaaniyat kaa hotaa thaa
har ek chiiz kii vo KHvaab-naak asliyyat
mire shu.uur kii chilman se jhaa.nktaa thaa ko.ii
liye rubuubiyat-e-kaa.enaat kaa ehsaas
har ek jalve me.n Gaib o shuhuud kaa vo milaap
har ik nazaara ik aa.iina-KHaana-e-hairat
har ek manzar-e-maanuus ek hairat-zaar
kahii.n rahuu.n kahii.n khelo.n kahii.n pa.Dhuu.n likhuu.n
mire shu.uur pe ma.nDlaate the manaazir-e-dahr
mai.n akasr un ke tasavvur me.n Duub jaataa thaa
vafuur-e-jazba se ho jaatii thii mizha pur-nam
mujhe yaqiin hai in unsurii manaazir se
ki aam bachcho.n se letaa thaa mai.n ziyaada asar
kisii samay mirii tiflii rahii na be-parvaa
na chhuu sakii mirii tiflii ko Gaflat-e-tiflii
ye khel-kuud ke lamho.n me.n hotaa thaa ehsaas
du.aa.e.n detaa ho jaise mujhe sukuut-e-davaam
ki jaise haath abad rakh de dosh-e-tiflii par
har ek lamha ke raKHno.n se jhaa.nktii sadiyaa.n
kahaaniyaa.n jo sunuu.n un me.n Duub jaataa thaa
ki aadmii ke liye aadmii kii jag-biitii
se ba.Dh ke kaun sii shai aur ho hii saktii hai
inhii fasaano.n me.n pinhaa.n the zindagii ke rumuuz
inhii fasaano.n me.n khulte the raaz-haa-e-hayaat
unhe.n fasaano.n me.n miltii thii.n ziist kii qadre.n
rumuuz-e-besh-bahaa TheTh aadmiyat ke
kahaaniyaa.n thii.n ki sad-dars-gaah-e-riqqat-e-qalb
har ik kahaanii me.n shaa.istagi-e-Gam kaa sabaq
vo unsur aa.nsu.o.n kaa daastaan-e-insaa.n me.n
vo nal-daman kii kathaa sarguzasht-e-savitrii
'shakuntlaa' kii kahaanii 'bharat' kii qurbaanii
vo marg-e-bhishm-pitaamah vo sej tiiro.n kii
vo paan.cho paa.nDav kii sovarg-yaatraa kii kathaa
vatan se ruKHsat-e-'siddhaarth' 'raam' kaa ban-baas
vafaa ke baa'd bhii 'siitaa' kii vo jalaa-vatanii
vo raato.n-raat 'sirii-krishn' ko uThaa.e hu.e
balaa kii qaid se 'basdev' kaa nikal jaanaa
vo a.ndhkaar vo baarish, ba.Dhii hu.ii jamunaa
Gam-e-aafriin kahaanii vo 'hiir' 'raa.njhaa' kii
shu.uur-e-hind ke bachpan kii yaadgaar-e-aziim
ki aise vaise taKHayyul kii saa.ns ukha.D jaa.e
ka.ii muhayyur-e-idraak dev-maalaaye.n
hitopdesh ke qisse kathaa sarat-saagar
karo.Do.n siino.n me.n vo guu.njtaa hu.aa aalhaa
mai.n puuchhtaa huu.n kisii aur malak vaalo.n se
kahaaniyo.n kii ye daulat ye be-bahaa daulat
fasaane dekh lo in ke nazar bhii aatii hai
mai.n puuchhtaa huu.n ki gahvaare aur qaumo.n ke
base hu.e hai.n kahii.n aisii daastaano.n se
kahaaniyaa.n jo mai.n suntaa thaa apne bachpan me.n
mire liye vo na thii.n mahz baa.is-e-tafriih
fasaano.n se mire bachpan ne sochnaa siikhaa
fasaano.n se mujhe sanjiidgii ke dars mile
fasaano.n me.n nazar aatii thii mujh ko ye duniyaa
Gam o KHushii me.n rachii pyaar me.n basaa.ii hu.ii
fasaano.n se mire dil ne ghulaavaTe.n paa.ii.n
yahii nahii.n ki mashaahiir hii ke afsaane
zaraa sii umr me.n karte ho.n mujh ko muta.assir
mohalle Tole ke gumnaam aadamiyyo.n ke
kuchh aise sun.ne me.n aate the vaaqi.aat-e-hayaat
jo.n yuu.n to hote the farsuuda aur ma.amuulii
magar the aa.iine iKHlaas aur sharaafat ke
ye chand aa.ii ga.ii baate.n aisii baate.n thii.n
ki jin kii oT chamaktaa thaa dard-e-insaanii
ye vaardaat nahii.n razmiyye hayaat ke the
Garaz ki ye hai.n mire bachpane kii tasviire.n
nadiim aur bhii kuchh KHatt-o-KHaal hai.n un ke
ye merii maa.n kaa hai kahnaa ki jab mai.n bachcha thaa
mai.n aise aadmii kii god me.n na jaataa thaa
jo bad-qimaar ho aibii ho yaa ho bad-suurat
mujhe bhii yaad hai nau das baras hii kaa mai.n thaa
to mujh pe kartaa thaa jaaduu saa husn-e-insaanii
kuchh aisaa hotaa thaa mahsuus jab mai.n dekhtaa thaa
shagufta rang tar-o-taaza ruup vaalo.n kaa
ki un kii aa.nch mirii haDDiyaa.n galaa degii
ik aazmaa.ish-e-jaa.n thii ki thaa shu.uur-e-jamaal
aur us kii nashtariyyat us kii ustuKHaa.n-sozii
Gam o nashaat lagaavaT mohabbat o nafrat
ik intishaar-e-sakuu.n iztiraab pyaar itaab
vo be-panaah zakii-ul-hisii vo hilm o Guruur
kabhii kabhii vo bhare ghar me.n hiss-e-tanhaa.ii
vo vahshate.n mirii maahaul-e-KHush-gavaar me.n bhii
mirii sarisht me.n ziddain ke ka.ii jo.De
shuruu.a hii se the maujuud aab-o-taab ke saath
mire mizaaj me.n pinhaa.n thii ek jadaliyyat
rago.n me.n chhuuTte rahte the be-shumaar anaar
nadiim ye hai.n mire baal-pan ke kuchh aasaar
vafuur o shiddat-e-jazbaat kaa ye aalam thaa
ki kau.nde jast kare.n dil ke aabgiine me.n
vo bachpanaa jise bardaasht apnii mushkil ho
vo bachpanaa jo KHud apnii hii tevriyaa.n sii cha.Dhaa.e
nadiim zikr-e-javaanii se kaa.np jaataa huu.n
javaanii aa.ii dabe paa.nv aur yuu.n aa.ii
ki us ke aate hii big.Daa banaa-banaayaa khel
vo KHvaahishaat ke jazbaat ke umaDte hu.e
vo ho.nkte hu.e be-naam aag ke tuufaa.n
vo phuuTtaa hu.aa jvaalaa-mukhii javaanii kaa
rago.n me.n uThtii hu.ii aa.ndhiyo.n ke vo jhaTke
ki jo tavaazun-e-hastii jhi.njho.D ke rakh de.n
vo zalzale ki pahaa.Do.n ke pair ukha.D jaa.e.n
buluuGiyat kii vo Tiise.n vo karb-e-nashv-o-numaa
aur aise me.n mujhe byaahaa gayaa bhalaa kis se
jo ho na saktii thii hargiz mirii shariik-e-hayaat
ham ek duusre ke vaaste bane hii na the
siyaah ho ga.ii duniyaa mirii nigaaho.n me.n
vo jis ko kahte hai.n shaadii-e-KHaanaa-aabaadii
mire liye vo banii bevgii javaanii kii
luTaa suhaag mirii zindagii kaa maa.nDo me.n
nadiim khaa ga.ii mujh ko nazar javaanii kii
balaa-e-jaan mujhe ho gayaa shu.uur-e-jamaal
talaash-e-shola-e-ulfat se ye hu.aa haasil
ki nafrato.n kaa agan-ku.nD ban ga.ii hastii
vo halq o siina o rag rag me.n be-panaah chubhaa
nadiim jaise nigal lii ho mai.n ne naag-phanii
z ishq-zaadam o ishqam kamusht zaar-o-dareG
KHabar na burd ba-rustam kase ki sohraabam
na puuchh aalam-e-kaam-o-dahan nadiim mire
samar hayaat kaa jab raakh bin gayaa mu.nh me.n
mai.n chaltii-phirtii chitaa ban gayaa javaanii kii
mai.n kaa.ndhaa detaa rahaa apne jiite murde ko
ye sochtaa thaa ki ab kyaa karuu.n kahaa.n jaa.uu.n
bahut se aur masaa.ib bhii mujh pe TuuT pa.De
mai.n Dhuu.nDhne lagaa har samt sachchii jhuuTii panaah
talaash-e-husn me.n sher-o-adab me.n dostii me.n
ru.ndhii sadaa se mohabbat kii bhiik maa.ngii hai
na.e sire se samajhnaa pa.Daa hai duniyaa ko
ba.De jatan se sambhaalaa hai KHud ko mai.n ne nadiim
mujhe sambhalne me.n to chaaliis saal guzre hai.n
merii hayaat to vish-paan kii kathaa hai nadiim
mai.n zahr pii ke zamaane ko de sakaa amrit
na puuchh mai.n ne jo zahraaba-e-hayaat piyaa
magar huu.n dil se mai.n is ke liye sipaas-guzaar
larazte haatho.n se daaman KHuluus kaa na chhaTaa
bachaa ke rakkhii thii mai.n ne amaanat-e-tiflii
ise na chhiin sakii mujh se dast-burd-e-shabaab
ba-qaul shaa.er-e-mulk-e-fara.ng har bachcha
KHud apne ahd-e-javaanii kaa baap hotaa hai
ye kam nahii.n hai ki tiflii-e-rafta chho.D ga.ii
dil-e-hazii.n me.n ka.ii chhoTe chhoTe naqsh-e-qadam
mirii anaa kii rago.n me.n pa.De hu.e hai.n abhii
na jaane kitne bahut narm u.ngliyo.n ke nishaa.n
hanuuz vaqt ke be-dard haath kar na sake
hayaat-e-rafta kii zinda nishaaniyo.n ko fanaa
zamaana chhiin sakegaa na merii fitrat se
mirii safaa mire tahtush-shu.uur kii ismat
taKHaiyyulaat kii doshiizgii kaa radd-e-amal
javaan ho ke bhii be-laus tifl-vash jazbaat
syaanaa hone pe bhii ye jibillate.n merii
ye sarKHushii o Gam be-riyaa ye qalb-gudaaz
baGair bair ke an-ban Garaz se paak tapaak
Garaz se paak ye aa.nsuu Garaz se paak ha.nsii
ye dasht-e-dahr me.n hamdardiyo.n kaa sar-chashma
qubuuliyat kaa ye jazba ye kaa.enaat o hayaat
is arz-e-paak par iimaan ye ham-aaha.ngii
har aadmii se har ik KHvaab o ziist se ye lagaav
ye maa.n kii god kaa ehsaas sab manaazir me.n
qariib o duur zamii.n me.n ye buu-e-vataniyyat
nizaam-e-shams-o-qamar me.n payaam-e-hifz-e-hayaat
ba-chashm-e-shaam-o-sahar maamtaa kii shabnam sii
ye saaz o dil me.n mire naGma-e-analkaunain
har iztiraab me.n ruuh-e-sukuun-e-be-paayaa.n
zamaana-e-guzaraa.n me.n davaam kaa sargam
ye bazm-e-jashn-e-hayaat-o-mamaat sajtii hu.ii
kisii kii yaad kii shahnaa.iyaa.n sii bajtii hu.ii
ye ramaziiyat ke anaasir shu.uur-e-puKHta me.n
falak pe vajd me.n laatii hai jo farishto.n ko
vo shaa.erii bhii buluuG-e-mizaaj-e-tiflii hai
ye nashtariyyat-e-hastii ye is kii sheriyat
ye pattii pattii pe gulzaar-e-zindagii ke kisii
latiif nuur kii parchhaa.iyaa.n sii pa.Dtii hu.ii
baham ye hairat o maanuusiyat kii sargoshii
bashar kii zaat ki mahr-e-uluuhiyat ba-jabii.n
abad ke dil me.n ja.De.n maartaa hu.aa sabza
Gam-e-jahaa.n mujhe aa.nkhe.n dikhaa nahii.n saktaa
ki aa.nkhe.n dekhe hu.e huu.n mai.n ne apne bachpan kii
mire lahuu me.n abhii tak sunaa.ii detii hai.n
sukuut-e-huzn me.n bhii ghu.nghru.o.n kii jhankaare.n
ye aur baat ki mai.n is pe kaan de na sakuu.n
isii vadii.at-e-tiflii kaa ab sahaaraa hai
yahii hai.n marham-e-kaafuur dil ke zaKHmo.n par
unhii ko rakhnaa hai mahfuuz taa-dam-e-aaKHir
zamiin-e-hind hai gahvaara aaj bhii hamdam
agar hisaab kare.n das karo.D bachcho.n kaa
ye bachche hind kii sab se ba.Dii amaanat hai.n
har ek bachche me.n hai.n sad-jahaan-e-imkaanaat
magar vatan kaa hal-o-aqd jin ke haath me.n hai
nizaam-e-zindagii-e-hind jin ke bas me.n hai
ravayya dekh ke un kaa ye kahnaa pa.Dtaa hai
kise pa.Dii hai ki samjhe vo is amaanat ko
kise pa.Dii hai ki bachcho.n kii zindagii ko bachaa.e
KHaraab hone se Talne se suukh jaane se
bachaa.e kaun in aazurda honhaaro.n ko
vo zindagii jise ye de rahe hai.n bhaarat ko
karo.Do.n bachcho.n ke miTne kaa ik alamiyya hai
churaa.e jaate hai.n bachche abhii gharo.n se yahaa.n
ki jism to.D diye jaa.e.n un ke taaki mile
churaane vaalo.n ko KHairaat maagh-mele kii
jo is azaab se bach jaa.e.n to gale pa.D jaa.e.n
vo la.ante.n ki hamaare karo.Do.n bachcho.n kii
nadiim KHair se miTTii KHaraab ho jaa.e
vo muflisii ki KHushii chhiin le vo be-bargii
udaasiyo.n se bharii zindagii kii be-ra.ngii
vo yaasiyaat na jis ko chhu.e shu.aa-e-umiid
vo aa.nkhe.n dekhtii hai.n har taraf jo be-nuurii
vo TukTukii ki jo pathraa ke rah ga.ii ho nadiim
vo be-dilii kii ha.nsii chhiin le jo ho.nTo.n se
vo dukh ki jis se sitaaro.n kii aa.nkh bhar aa.e
vo gandagii vo kasaafat maraz-zada paikar
vo bachche chhin ga.e ho.n jin se bachpane un ke
hamii.n ne gho.nT diyaa jis ke bachpane kaa galaa
jo khaate-piite gharo.n ke hai.n bachche un ko bhii kyaa
samaaj phuulne-phalne ke de sakaa saadhan
vo saa.ns lete hai.n tahziib-kush fazaa.o.n me.n
ham un ko dete hai.n be-jaan aur Galat ta.aliim
milegaa ilm-e-jihaalat-numaa se kyaa un ko
nikal ke madraso.n aur universitiyyo.n se
ye bad-nasiib na ghar ke na ghaaT ke ho.nge
mai.n puuchhtaa huu.n ye ta.aliim hai ki makkaarii
karo.Do.n zindagiyo.n se ye be-panaah daGaa
nisaab aisaa ki mehnat kare.n agar is par
bajaa.e ilm jahaalat kaa iktisaab kare.n
ye ulTaa dars-e-adab ye sa.Dii hu.ii ta.aliim
dimaaG kii ho Gizaa yaa Gizaa-e-jismaanii
har ik tarah kii Gizaa me.n yahaa.n milaavaT hai
vo jis ko bachcho.n kii ta.aliim kah ke dete hai.n
vo dars ulTii chhurii hai gale pe bachpan ke
zamiin-e-hind hi.nDolaa nahii.n hai bachcho.n kaa
karo.Do.n bachcho.n kaa ye des ab janaaza hai
ham inqalaab ke KHatro.n se KHuub vaaqif hai.n
kuchh aur roz yahii rah ga.e jo lail-o-nahaar
to mol lenaa pa.Degaa hame.n ye KHatra bhii
ki bachche qaum kii sab se ba.Dii amaanat hai.n

Firaq Gorakhpuri

Nazm

east india company ke farzandon se KHitab

kis zabaa.n se kah rahe ho aaj tum saudaagaro
dahr me.n insaaniyat ke naam ko uu.nchaa karo
jis ko sab kahte hai.n hitler bhe.Diyaa hai bhe.Diyaa
bhe.Diye ko maar do golii pa.e-amn-o-baqaa
baaG-e-insaanii me.n chalne hii pe hai baad-e-KHizaa.n
aadamiyyat le rahii hai hichkiyo.n par hichkiyaa.n
haath hai hitler kaa raKHsh-e-KHud-sarii kii baag par
teG kaa paanii chhi.Dak do germany kii aag par
saKHt hairaa.n huu.n ki mahfil me.n tumhaarii aur ye zikr
nau-e-insaanii ke mustaqbil kii ab karte ho fikr
jab yahaa.n aa.e the tum saudaagarii ke vaaste
nau-e-insaanii ke mustaqbil se kiyaa vaaqif na the
hindiyo.n ke jism me.n kyaa ruuh-e-aazaadii na thii
sach bataa.o kyaa vo insaano.n kii aabaadii na thii
apne zulm-e-be-nihaayat kaa fasaana yaad hai
company kaa phir vo daur-e-mujrimaana yaad hai
luuTte phirte the jab tum kaarvaa.n-dar-kaarvaa.n
sar-barahna phir rahii thii daulat-e-hindostaa.n
dast-kaaro.n ke a.nguuThe kaaTte phirte the tum
sard laasho.n se ga.Dho.n ko paaTte phirte the tum
san.at-e-hindostaa.n par maut thii chhaa.ii hu.ii
maut bhii kaisii tumhaare haat kii laa.ii hu.ii
allaah allaah kis qadar insaaf ke taalib ho aaj
miir-ja.afar kii qasam kyaa dushman-e-haq thaa 'siraaj'
kyaa avadh kii begamo.n kaa bhii sataanaa yaad hai
yaad hai jhaa.nsii kii raanii kaa zamaana yaad hai
hijrat-e-sultaan-e-dehlii kaa samaa.n bhii yaad hai
sher-dil 'Tiipuu' kii KHuunii.n daastaa.n bhii yaad hai
tiisare faaqe me.n ik girte hu.e ko thaamne
kas ke tum laa.e the sar shaah-e-zafar ke saamne
yaad to hogii vo maTiyaa-burj kii bhii daastaa.n
ab bhii jis kii KHaak se uThtaa hai rah rah kar dhu.aa.n
tum ne qaisar-e-baaG ko dekhaa to hogaa baarhaa
aaj bhii aatii hai jis se haa.e 'aKHtar' kii sadaa
sach kaho kyaa haafize me.n hai vo zulm-e-be-panaah
aaj tak ragoon me.n ik qabr hai jis kii gavaah
zehn me.n hogaa ye taaza hindiyo.n kaa daaG bhii
yaad to hogaa tumhe.n jallianwala-bagh bhii
puuchh lo is se tumhaaraa naam kyuu.n taabinda hai
'dyer'-e-gurg-e-dahan-aaluud ab bhii zinda hai
vo 'bhagat-singh' ab bhii jis ke Gam me.n dil naashaad hai
us kii gardan me.n jo Daalaa thaa vo phandaa yaad hai
ahl-e-aazaadii rahaa karte the kis hanjaar se
puuchh lo ye qaid-KHaano.n ke dar-o-diivaar se
ab bhii hai mahfuuz jis par tantana sarkaar kaa
aaj bhii guu.njii hu.ii hai jin me.n ko.Do.n kii sadaa
aaj kashtii amn ke amvaaj par khete ho kyuu.n
saKHt hairaa.n huu.n ki ab tum dars-e-haq dete ho kyuu.n
ahl-e-quvvat daam-e-haq me.n to kabhii aate nahii.n
''bankii'' aKHlaaq ko KHatre me.n bhii laate nahii.n
lekin aaj aKHlaaq kii talqiin farmaate ho tum
ho na ho apne me.n ab quvvat nahii.n paate ho tum
ahl-e-haq raushan-nazar hai.n ahl-e-baatin kor hai.n
ye to hai.n aqvaal un qaumo.n ke jo kamzor hai.n
aaj shaayad manzil-e-quvvat me.n tum rahte nahii.n
jis kii laaThii us kii bhai.ns ab kis liye kahte nahii.n
kyaa kahaa insaaf hai insaa.n kaa farz-e-avvalii.n
kyaa fasaad-o-zulm kaa ab tum me.n kas baaqii nahii.n
der se baiThe ho naKHl-e-raastii kii chhaa.nv me.n
kyaa KHudaa-naa-karda kuchh moch aa ga.ii hai paa.nv me.n
guu.nj Taapo.n kii na aabaadii na viiraane me.n hai
KHair to hai asp-e-taazii kyaa shifaa-KHaane me.n hai
aaj kal to har nazar me.n rahm kaa andaaz hai
kuchh tabii.at kyaa nasiib-e-dushmanaa.n naa-saaz hai
saa.ns kyaa ukh.Dii ki haq ke naam par marne lage
nau-e-insaa.n kii havaa-KHvaahii kaa dam bharne lage
zulm bhuule raagnii insaaf kii gaane lage
lag ga.ii hai aag kyaa ghar me.n ki chillaane lage
mujrmo.n ke vaaste zebaa nahii.n ye shor-o-shain
kal 'yaziid' o 'shimr' the aur aaj bante ho 'husain'
KHair ai saudaagaro ab hai to bas is baat me.n
vaqt ke farmaan ke aage jhukaa do gardane.n
ik kahaanii vaqt likkhegaa na.e mazmuun kii
jis kii surKHii ko zaruurat hai tumhaare KHuun kii
vaqt kaa farmaan apnaa ruKH badal saktaa nahii.n
maut Tal saktii hai ab farmaan Tal saktaa nahii.n

Josh Malihabadi

Nazm

school-teacher

school ke hamaare
ustaad pyaare pyaare
ham ko pa.Dhaa rahe hai.n
insaa.n banaa rahe hai.n
kyaa kyaa nahii sikhaayaa
yuu.n hausla ba.Dhaayaa
baat an-sunii bataa.ii
duniyaa na.ii dikhaa.ii
kii duur har buraa.ii
tahziib bhii sikhaa.ii
karnaa nahii la.Daa.ii
hotii hai jag-ha.nsaa.ii
hote hai.n baap saaya
un se ye dars paayaa
ta.aliim kaa asar hai
uu.nchaa hamaaraa sar hai
un kaa jo ye amal hai
ehsaan-e-be-badal hai
un kii kare.nge izzat
paate rahe.nge shafqat
KHuubii 'faraaG' ne bhii
ustaad kii bayaa.n kii

Faragh Rohvi

Nazm

madrasa ali-gaDh

KHudaa alii-ga.Dh ke madrase ko tamaam amraaz se shifaa de
bhare hu.e hai.n raiis-zaade amiir-zaade shariif-zaade
latiif o KHush-vaz.a chust o chaalaak o saaf o paakiiza shaad-o-KHurram
tabii.ato.n me.n hai in kii jaudat dilo.n me.n in ke hai.n nek iraade
kamaal-e-mehnat se pa.Dh rahe hai.n kamaal-e-Gairat se pa.Dh rahe hai.n
savaar mashriq raah me.n hai.n to maGribii raah me.n piyaade
har ik hai in me.n kaa be-shak aisaa ki aap use chaahte hai.n jaisaa
dikhaave mahfil me.n qadd-e-ra.anaa jo aap aa.e.n to sar jhukaa de
faqiir maa.nge to saaf kah de.n ki tuu hai mazbuut jaa kamaa khaa
qubuul farmaa.e.n aap daavat to apnaa sarmaaya kul khilaa de
buto.n se in ko nahii.n lagaavaT miso.n kii lete nahii.n vo aahaT
tamaam quvvat hai sarf-e-KHvaandan nazar ke bhole hai.n dil ke saade
nazar bhii aa.e jo zulf-e-pechaa.n to samjhe.n ye ko.ii policy hai
electric light us ko samjhe.n jo barq-vash ko.ii kuude
nikalte hai.n kar ke Gol-bandii ba-naam-e-tahziib o dard-mandii
ye kah ke lete hai.n sab se chande jo tum hame.n do tumhe.n KHudaa de
unhe.n isii baat par yaqii.n hai ki bas yahii asl kaar-e-dii.n hai
isii se hogaa faroG-e-qaumii isii se chamke.nge baap daade
makaan-e-college ke sab makii.n hai.n abhii unhe.n tajrabe nahii.n hai.n
KHabar nahii.n hai ki aage chal kar hai kaisii manzil hai.n kaise jaade
dilo.n me.n in ke hai.n nuur-e-iimaa.n qavii nahii.n hai magar nigahbaa.n
havaa-e-mantiq adaa-e-tiflii ye sham.a aisaa na ho bujhaa de
fareb de kar nikaale matlab sikhaa.e tahqiir-e-diin-o-mazhab
miTaa de aaKHir ko diin-o-maz.hab numuud-e-zaatii ko go ba.Dhaa de
yahii bas 'akbar' kii iltijaa hai janaab baarii me.n ye du.aa hai
uluum o hikmat kaa dars in ko professor de.n samajh KHudaa de

Akbar Allahabadi

Nazm

bhagwan krishn ki taswir dekh kar

mujhe tere tasavvur se KHushii mahsuus hotii hai
dil-e-murda me.n bhii kuchh zindagii mahsuus hotii hai
ye taaro.n kii chamak me.n hai na phuulo.n hii kii KHushbuu me.n
tirii tasviir me.n jo dilkashii mahsuus hotii hai
tujhe mai.n aaj tak masruuf-e-dars-o-va.az paataa huu.n
tirii hastii mukammal aagahii mahsuus hotii hai
ye kyaa mumkin nahii.n tuu aa ke KHud ab is kaa darmaa.n kar
fazaa-e-dahr me.n kuchh barhamii mahsuus hotii hai
ujaalaa saa ujaalaa hai tirii sham-e-hidaayat kaa
shab-e-tiira me.n bhii ik raushnii mahsuus hotii hai
mai.n aa.uu.n bhii to kyaa mu.nh le ke aa.uu.n saamne tere
KHud apne-aap se sharmindagii mahsuus hotii hai
taKHayyul me.n tire nazdiik jab mai.n KHud ko paataa huu.n
mujhe us vaqt ik-tarfa KHushii mahsuus hotii hai
tuu hii jaane kahaa.n le aa.ii mujh ko aarzuu terii
ye manzil ab saraapaa be-KHudii mahsuus hotii hai
'ka.nval' jis vaqt kho jaataa huu.n mai.n us ke tasavvur me.n
mujhe to zindagii hii zindagii mahsuus hotii hai

Kanval M. A

Nazm

KHatun-e-mashriq

ilm se har chand tujh ko kam kiyaa hai bahra-mand
lekin is se ho na ai ma.asuum aurat dard-mand

Josh Malihabadi

Nazm

ai nai nasl

mere ajdaad kaa vatan ye shahr
merii ta.aliim kaa jahaa.n ye maqaam
mere bachpan kii dost ye galiyaa.n
jin me.n rusvaa hu.aa shabaab kaa naam
yaad aate hai.n in fazaa.o.n me.n
kitne nazdiik aur duur ke naam
kitne KHvaabo.n ke malgaje chehre
kitnii yaado.n ke marmarii.n ajsaam
kitne ha.ngaame kitnii tahriike.n
kitne na.are jo the zabaa.n zad-e-aam
mai.n yahaa.n jab shu.uur ko pahu.nchaa
ajnabii qaum kii thii qaum Gulaam
union jaik dars-gaah pe thaa
aur vatan me.n thaa saamraajii nizaam
isii miTTii ko haath me.n le kar
ham bane the baGaavato.n ke imaam
yahii.n jaa.nche the dharm ke vishvaas
yahii.n parkhe the diin ke auhaam
hai.n munkir bane rivaayat ke
yahii.n to.De rivaaj ke asnaam
yahii.n nikhraa thaa zauq-e-naGma-garii
yahii.n utraa thaa sher kaa ilhaam
mai.n jahaa.n bhii rahaa yahii.n kaa rahaa
mujh ko bhuule nahii.n hai.n ye dar-o-baam
naam meraa jahaa.n jahaa.n pahu.nchaa
saath pahu.nchaa hai is dayaar kaa naam
mai.n yahaa.n mezbaa.n bhii mehmaa.n bhii
aap jo chaahe.n diijiye mujhe naam
nazr kartaa huu.n un fazaa.o.n kii
apnaa dil apnii ruuh apnaa kalaam
aur faizaan-e-ilm jaarii ho
aur uu.nchaa ho is dayaar kaa naam
aur shaadaab ho ye arz-e-hasii.n
aur mahke ye vaadii-e-gulfaam
aur ubhre.n sanam-garii ke nuquush
aur chhalke.n mai-e-suKHan ke jaam
aur nikle.n vo be-navaa jin ko
apnaa sab kuchh kahe.n vatan ke avaam
qaafile aate jaate rahte hai.n
kab hu.aa hai yahaa.n kisii kaa qayaam
nasl-dar-nasl kaam jaarii hai
kaar-e-duniyaa kabhii hu.aa na tamaam
kal jahaa.n mai.n thaa aaj tuu hai vahaa.n
ai na.ii nasl tujh ko meraa salaam

Sahir Ludhianvi

Nazm

unki taswir dekh kar

aaj kyaa hai jo milaa shoKH nigaaho.n ko qaraar?
kyaa hu.aa husn kii ma.asuum hayaa.o.n kaa vaqaar
aaj kyuu.n tum mujhe dekhe hii chale jaate ho?
daf.atan TuuT gayaa kis liye bajtaa hu.aa saaz
kyaa hu.e naGme vo ab kyuu.n nahii.n aatii aavaaz
aaj ho.nTo.n pe KHamoshii hii KHamoshii kyuu.n hai?
KHuub tadbiir nikaalii hai manaane kii mujhe
aatish-e-soz-e-mohabbat me.n jalaane kii mujhe
bhole-bhaale ho to de do mire shikvo.n kaa javaab
tum ne kyaa peshtar apnaa na banaayaa mujh ko
phir yakaayak na nigaaho.n se giraayaa mujh ko
ye agar jhuuT hai to mu.nh se kaho chup kyuu.n ho
tuu ne ik dil ko mire dars-e-mohabbat na diyaa
aur phir jaan ke daaG-e-Gam-e-furqat na diyaa
ye agar jhuuT hai to mu.nh se kaho, chup kyuu.n ho
tum ne kyaa mujh se kisii qism kaa va.ada na kiyaa
ye agar jhuuT hai to mu.nh se kaho, chup kyuu.n ho?
de sake tum na mire ek bhii shikve kaa javaab
ab mai.n samjhaa ki hai kyaa raaz-e-ba-daamaan-e-hijaab
vaaqa.ii tum ko nadaamat hai jo KHaamosh ho tum
yaa kisii parda-e-tasviir me.n ruu-posh ho tum!

Shakeel Badayuni

Nazm

mahatma-gandhi ka qatl

har saa.ns se dars-e-aman diyaa har jabr pe daad-e-ulfat dii
qaatil ko bhii gar lab hil na sake aa.nkho.n se du.aa-e-rahmat dii

Anand Narayan Mulla

Nazm

haweli

ik musalsal gard me.n Duube hu.e sab baam-o-dar
jis taraf dekho a.ndheraa jis taraf dekho kha.nDar

Makhdoom Mohiuddin

Nazm

mahatma-gandhi

sunaa rahaa huu.n tumhe.n daastaan gaa.ndhii kii
zamaane-bhar se niraalii hai shaan gaa.ndhii kii
rahe rahe na rahe is me.n jaan gaa.ndhii kii
na ruk sakii na rukegii zabaan gaa.ndhii kii
yahii sabab hai jo vo dil se sab ko pyaaraa hai
vatan kaa apne chamaktaa hu.aa sitaaraa hai
banaa thaa mast ko.ii aur ko.ii saudaa.ii
har ek samt thii Gaflat kii jab ghaTaa chhaa.ii
to us kii aql-e-rasaa kaam vaqt par aa.ii
mariiz-e-mulk hai mamnuun-e-chaara-farmaa.ii
na.e KHayaal me.n ik ik kaa dil asiir hu.aa
udhar amiir hu.aa aur udhar faqiir hu.aa
jafaa-o-jaur ne kii KHuub apnii barbaadii
KHaraab-haal na dil raat kyuu.n huu.n fariyaadii
banaa diyaa thaa qafas kaa burii tarah aadii
magar hai shukr milaa ham ko dars-e-aazaadii
zamaana kahtaa hai gaa.ndhii mahaatmaa vo hai
bashar nahii.n hai haqiiqat me.n devtaa vo hai
jo dil me.n yaad hai to lab pe naam us kaa hai
jo hai to zikr faqat sub.h-o-shaam us kaa hai

Bismil Allahabadi

Nazm

pandrah-august

ai laila-e-jamhuuriyat
ai dilbar-e-hindostaa.n
tujh se faroG-e-sham.a-e-shab
mahfil me.n lau kii ibtidaa
ahl-e-vafaa ke des me.n
taariiKH-e-nau kii ibtidaa
zulmat-bad-aamaa.n KHaak par
suuraj kii zau kii ibtidaa
har lab pe terii daastaa.n
zulfe.n tirii ambar-fashaa.n
ai dilbar-e-hindostaa.n
tuu apne dast-e-naaz me.n
ik KHushnumaa parcham liye
apne jilau me.n nau-ba-nau
KHushiyo.n kaa ik aalam liye
manzil ke raahii ke liye
ik rau liye ik rum liye
ha.nstii hu.ii gaatii hu.ii
aavaaz sii detii hu.ii
sa.ngiit kii har taan me.n
dars-e-amal detii hu.ii
ban kar uma.ngo.n kaa nishaa.n
aa.ii hamaare darmiyaa.n
ai dilbar-e-hindostaa.n
ab jagmagaatii raah hai
aur rahravo.n ke qaafile
ab tez hai.n sab ke qadam
ab miT rahe hai.n faasle
ab zindagii hai vajd me.n
ab jaagte hai.n valvale
thak kar ko.ii sotaa nahii.n
ab pe.D ke saa.e tale
naGmaat-e-aazaadii kii dhun
kitnii junuu.n-a.ngez hai
ab nashsha-e-mai hai sivaa
ab saaz kii lai tez hai
ab ruuh ko haasil yahaa.n
sad ishrat-e-parvez hai
masruur hai.n piir-o-javaa.n
ai dilbar-e-hindostaa.n
terii had-e-shaadaab me.n
ga.ng-o-jaman aabaad hai.n
kohsaar ke hai.n silsile
dasht-o-daman aabaad hai.n
ahl-e-yaqii.n aabaad hai.n
arbaab-e-fan aabaad hai.n
mahtaab aur taare liye
niile gagan aabaad hai.n
jannat-nishaa.n kashmiir ke
ra.ngii.n chaman aabaad hai.n
jo hai.n hamaarii aabruu
hai.n jamn ke ham sab paasbaa.n
ai dilbar-e-hindostaa.n
aa ham tire aa.nchal tale
parcham tiraa uu.nchaa kare.n
terii hifaazat ke liye
saif o qalam yakjaa kare.n
tujh ko banaa.e.n kaamraa.n
ai dilbar-e-hindostaa.n
mafhuum-e-aazaadii hai kyaa
nuur-e-sahar kii justujuu
kyaa hai mataa-e-hurriyat
insaa.n ke dil kii aarzuu
sad-aafrii.n bar-daur-e-mai
aazaad hai.n jaam-o-subuu
aazaad hai paa.el kii dhun
aazaad hai zulfo.n kii buu
aazaad hai soz-e-jigar
aazaad hai dil kaa lahuu
aazaad hai zauq-e-safar
aazaad hai jiine kii KHuu
jaa.e na kyuu.n dil kii lagan
mahfil-ba-mahfil kuu-ba-kuu
sad marhabaa puurii hu.ii
vo hasrat-e-kaif-e-numuu
jis ke sabab barbaad thaa
sadiyo.n se apnaa kaarvaa.n
ai dilbar-e-hindostaa.n
tuu zulmato.n ke sail me.n
sham-e-farozaa.n ban ga.ii
shab-taab ufuq par hind ke
nuur-e-daraKHshaa.n ban ga.ii
vaadii-e-nik.hat-bez me.n
juu-e-KHiraamaa.n ban ga.ii
KHushbuu se jis kii chaar suu
vo zulf-e-jaanaa.n ban ga.ii
dil kaa sukuu.n aaraam-e-jaa.n
ai dilbar-e-hindostaa.n

Owais Ahmad Dauran

Nazm

ram

aa.iina-e-KHuluus-o-mohabbat yahaa.n the raam
amn aur shaa.ntii kii zamaanat yahaa.n the raam
sachchaa.iyo.n kii ek alaamat yahaa.n the raam
ya.anii dil-o-nigaah kii chaahat yahaa.n the raam
qadmo.n se raam ke ye zamii.n sarfaraaz hai
hindostaa.n ko un kii shujaa.at pe naaz hai
un ke liye gunaah thaa ye zulm-o-intishaar
iisaar un kaa saare jahaa.n par hai aashkaar
daaman nahii.n thaa un kaa ta.assub se daaG-daar
hirs-o-havas se duur the vo saahab-e-vaqaar
be-shak unhii.n ke naam se raushan hai naam-e-hind
iqbaal ne bhii un ko kahaa hai imaam-e-hind
la.al-o-guhar kii ko.ii nahii.n thii talab unhe.n
izzat ke saath dil me.n basaate the sab unhe.n
bachpan se naa-pasand the Gaiz-o-Gazab unhe.n
logo.n kaa dil dukhaanaa gavaaraa thaa kab unhe.n
vo zaalimo.n pe qahr Gariibo.n kii Dhaal the
kirdaar-o-e'tibaar kii raushan misaal the
un ko thaa apnii rasm-e-uKHuvvat pe e'timaad
KHud khaa ke juuThe ber diyaa dars-e-ittihaad
farz-aashnaa the farz ko rakkhaa hamesha yaad
kahne pe apnii maa.n ke kahaa ghar ko KHair-baad
ruKHsat hu.e to lab pe na the shikva-o-fuGaa.n
ye hausla nasiib hu.aa hai kise yahaa.n
ban-baas par bhii lab pe na thaa un kaa ehtijaaj
bhaa.ii ke haq me.n chho.D diyaa apnaa taKHt-o-taaj
karte rahe vo chaudah baras tak dilo.n pe raaj
hindostaa.n me.n hai ko.ii un kii misaal aaj
raah-e-vafaa pe chal ke dikhaayaa hai raam ne
kahte hai.n kis ko tyaag bataayaa hai raam ne
rahbar ye shar-pasand kahaa.n aur kahaa.n vo raam
vo be-niyaaz-e-aish-o-tarab zar ke ye Gulaam
vo paikar-e-vafaa ye riyaa-kaar-o-bad-kalaam
vo amn ke naqiib ye shamshiir-e-be-niyaam
rasm-o-rivaaj-e-raam se aarii hai.n shar-pasand
raavan kii niitiyo.n ke pujaarii hai.n shar-pasand

Rahbar Jaunpuri

Nazm

gurunanak

ai rahbar-e-manzil tirii raftaar ke sadqe
ai mehr-e-munavvar tire anvaar ke sadqe
ai band-e-haq-go tirii guftaar ke sadqe
ai saahab-e-iimaa.n tire kirdaar ke sadqe
to banda-o-saahab bhii thaa muhtaaj-o-Ganii bhii
jalvo.n kaa amii.n bhii tire lab pe arinii bhii
har chehra-e-mardum ke KHad-o-KHaal bure the
dekho jise us shaKHs ke a.amaal bure the
mullaa ke bhii panDit ke bhii a.amaal bure the
jo jhuuT ne phailaa.e the vo jaal bure the
sachchaa tiraa din aur tirii raat bhii sachchii
sachchaa tiraa saudaa terii har baat bhii sachchii
is dar kaa pujaarii ko.ii us dar kaa pujaarii
maGrib kaa pujaarii ko.ii KHaavar kaa pujaarii
miinaa kaa pujaarii ko.ii saaGar kaa pujaarii
qabro.n kaa pujaarii ko.ii banjar kaa pujaarii
kasrat thii yahaa.n shirk kii tauhiid nahii.n thii
rozo.n kaa bhulaavaa thaa magar iid nahii.n thii
tuu hinduu-o-muslim ke gunaaho.n se thaa vaaqif
maz.hab kii sisaktii hu.ii aaho.n se thaa vaaqif
to sho.abada-baazo.n kii nigaaho.n se thaa vaaqif
to manzil-e-tauhiid kii raaho.n se thaa vaaqif
dar haq ke kabhii banda-e-haajii pe khule hai.n
ga.ngaa me.n nahaa kar bhii kabhii paap dhule hai.n
tuu ne ye kahaa sab se ba.Daa hukm-e-razaa.ii
tuu ne ye kahaa saa.nch kii qiimat nahii.n paa.ii
tuu ne ye kahaa so ke ye sab umr ga.nvaa.ii
tuu ne ye kahaa jhuuT hai sab zuhd-e-riyaa.ii
pur-maanii-o-pur-maGz hai.n nekii ke ishaare
har haal me.n har rang me.n rahbar hai.n hamaare
mai.n mast-e-mai-e-ishq huu.n tan riish-e-qalandar
tiirath hai agar ko.ii to is man ke hai andar
jaa.uu.n mai.n kahaa.n sajde ko man meraa hai mandir
hai azm miraa faateh-e-daaraa-o-sikandar
gaate hai.n jise devtaa bhii chaudah ratan bhii
raqsaa.n hai usii dar pe merii jaan bhii tan bhii
jo dars diyaa tuu ne vo azmat kaa amii.n hai
vo prem kii aKHlaaq kii KHaatam kaa nagii.n hai
kundan jo na ho jaa.e vo sonaa hii nahii.n hai
haq-go hai jo duniyaa hii me.n jannat kaa makii.n hai
sar jhukte hai.n sab ke tirii sarkaar me.n aa kar
ham sajda-kunaa.n hai.n tire darbaar me.n aa kar

Arsh Malsiyani

Nazm

nazr-e-Khaalida

tuu ne jo ehsaa.n kiyaa hai.n millat-e-ahraar par
naqsh hai.n ab tak sa.nvarnaa ke dar-o-diivaar par

Asrarul Haq Majaz

Nazm

hum ko aage jaana hai

dars hai ye har-chand adaq
kyuu.n ho is kaa hame.n qalaq
maazii se ab le ke sabaq
mustaqbil chamkaanaa hai

Ata Abidi

Nazm

gandhi-jayanti

bhuul ga.ii hai aaj to rahbar-e-haq-nigaah ko
bhuul ga.ii hai aaj tuu mard-e-jahaa.n-panaah ko
bhuul ga.ii hai aaj tuu zabt ke baadshaah ko
tujh se kahuu.n to kyaa kahuu.n ai mirii baa-muraad qaum
ai mirii zindabaad qaum ai mirii zindabaad qaum
tere mahant to abhii mast hai.n zaat-paat me.n
tere ba.De ba.De guruu Garq hai.n chhuut-chhaat me.n
aah ki Dhuu.nDhtii hai tuu nuur a.ndherii raat me.n
tujh se kahuu.n to kyaa kahuu.n ai mirii baa-muraad qaum
ai mirii zindabaad qaum ai mirii zindabaad qaum
aah ki tuu ne zabt ke dars ko bhii bhulaa diyaa
aah ki tuu ne qalb se naam-e-safaa miTaa diyaa
aah ki dosto.n ko bhii tuu ne aduu banaa diyaa
tujh se kahuu.n to kyaa kahuu.n ai mirii baa-muraad qaum
ai mirii zindabaad qaum ai mirii zindabaad qaum
tere mushiir be-amal tere vaziir be-amal
tere Gariib be-amal tere amiir be-amal
tere safiir be-amal tere kabiir be-amal
tujh se kahuu.n to kyaa kahuu.n ai mirii baa-muraad qaum
ai mirii zindabaad qaum ai mirii zindabaad qaum
uf ki qadam qadam pe hai teraa shariik ahrman
uf ki tujhe nasiib hai.n firqa-parast raahzan
uf ki tujhe aziiz hai.n charb-zabaan-o-bad-suKHan
tujh se kahuu.n to kyaa kahuu.n ai mirii baa-muraad qaum
ai mirii zindabaad qaum ai mirii zindabaad qaum
uf ki jahaalato.n pe bhii aql kaa hai gumaa.n tujhe
uf ki abhii pasand hai jahl kii daastaa.n tujhe
uf ki hai firqa dostii detii abhii amaa.n tujhe
tujh se kahuu.n to kyaa kahuu.n ai mirii baa-muraad qaum
ai mirii zindabaad qaum ai mirii zindabaad qaum
zulm kiye hai.n tuu ne jo zulm ke shaahido.n se puuchh
qatl kiye hai.n kis qadar apne mujaahido.n se puuchh
piite hai.n roz kitnii mai jhuuT ke zaahido.n se puuchh
tujh se kahuu.n to kyaa kahuu.n ai mirii baa-muraad qaum
ai mirii zindabaad qaum ai mirii zindabaad qaum
dars-e-mahaatmaa kaa bhii tujh par ko.ii asar nahii.n
qaul-e-mahaatmaa pe bhii aaj tirii nazar nahii.n
kaun hai us kaa jaa-nashii.n is kii tujhe KHabar nahii.n
tujh se kahuu.n to kyaa kahuu.n ai mirii baa-muraad qaum
ai mirii zindabaad qaum ai mirii zindabaad qaum
tujh ko bataa.e kaun aaj asl me.n raahbar hai kaun
tujh ko bataa.e kaun aaj banda-e-mo.tabar hai kaun
tujh ko bataa.e kaun aaj piir-e-javaa.n-nazar hai kaun
tujh se kahuu.n to kyaa kahuu.n ai mirii baa-muraad qaum
ai mirii zindabaad qaum ai mirii zindabaad qaum
dekh na chashm-e-shauq se pattharo.n ke to taur tuu
qadr-e-javaahar-e-hasii.n dekh ba-chashm-e-Gaur tuu
varna hazaar zillate.n tere liye hai.n aur tuu
tujh se kahuu.n to kyaa kahuu.n ai mirii baa-muraad qaum
ai mirii zindabaad qaum ai mirii zindabaad qaum

Arsh Malsiyani

Nazm

ayaadat

ye kaun aa gayaa ruKH-e-KHandaa.n liye hu.e
aariz pe ra.ng-o-nuur kaa tuufaa.n liye hu.e
biimaar ke qariib ba-sad-shaan-e-ehtiyaat
dildaarii-e-nasiim-e-bahaaraa.n liye hu.e
ruKHsaar par latiif sii ik mauj-e-sar-KHushii
lab par ha.nsii kaa narm saa tuufaa.n liye hu.e
peshaanii-e-jamiil pe anvaar-e-tamkanat
taabindagii-e-sub.h-e-daraKHshaa.n liye hu.e
zulfo.n ke pech-o-KHam me.n bahaare.n chhupii hu.ii
ik kaarvaan-e-nikhat-e-bustaa.n liye hu.e
aa hii gayaa vo meraa nigaar-e-nazar-navaaz
zulmat-kade me.n sham-e-farozaa.n liye hu.e
ik ik adaa me.n saika.Do.n pahluu-e-dildahii
ik ik nazar me.n pursish-e-pinhaa.n liye hu.e
mere savaad-e-shauq kaa KHurshiid-e-niim-shab
azm-e-shikast-e-maah-jabiinaa.n liye hu.e
dars-e-sukuun-o-sabr ba-ii.n ehtamaam-e-naaz
nishtar-zanii-e-jumbish-e-mizhgaa.n liye hu.e
aa.nkho.n se ek rau sii nikaltii hu.ii har aan
Garqaabii-e-hayaat kaa saamaa.n liye hu.e
hiltii hu.ii nigaah me.n bijlii bharii hu.ii
khilte hu.e labo.n me.n gulistaa.n liye hu.e
ye kaun hai 'majaaz' se sar-garm-e-guftuguu
dono.n hatheliyo.n pe zanaKHdaa.n liye hu.e

Asrarul Haq Majaz

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now