Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "dilchasp"

Nazm MATCHES FOR "dilchasp"

Nazm

aurat

uTh mirii jaan mire saath hii chalnaa hai tujhe
qalb-e-maahaul me.n larzaa.n sharar-e-ja.ng hai.n aaj
hausle vaqt ke aur ziist ke yak-ra.ng hai.n aaj
aabgiino.n me.n tapaa.n valvala-e-sa.ng hai.n aaj
husn aur ishq ham-aavaaz o ham-aaha.ng hai.n aaj
jis me.n jaltaa huu.n usii aag me.n jalnaa hai tujhe
uTh mirii jaan mire saath hii chalnaa hai tujhe
tere qadmo.n me.n hai firdaus-e-tamaddun kii bahaar
terii nazro.n pe hai tahziib o taraqqii kaa madaar
terii aaGosh hai gahvaara-e-nafs-o-kirdaar
taa-ba-kai gird tire vahm o ta.ayyun kaa hisaar
kau.nd kar majlis-e-KHalvat se nikalnaa hai tujhe
uTh mirii jaan mire saath hii chalnaa hai tujhe
tuu ki be-jaan khilauno.n se bahal jaatii hai
taptii saa.nso.n kii haraarat se pighal jaatii hai
paa.nv jis raah me.n rakhtii hai phisal jaatii hai
ban ke siimaab har ik zarf me.n Dhal jaatii hai
ziist ke aahanii saa.nche me.n bhii Dhalnaa hai tujhe
uTh mirii jaan mire saath hii chalnaa hai tujhe
zindagii jehd me.n hai sabr ke qaabuu me.n nahii.n
nabz-e-hastii kaa lahuu kaa.npte aa.nsuu me.n nahii.n
u.Dne khulne me.n hai nik.hat KHam-e-gesuu me.n nahii.n
jannat ik aur hai jo mard ke pahluu me.n nahii.n
us kii aazaad ravish par bhii machalnaa hai tujhe
uTh mirii jaan mire saath hii chalnaa hai tujhe
goshe goshe me.n sulagtii hai chitaa tere liye
farz kaa bhes badaltii hai qazaa tere liye
qahr hai terii har ik narm adaa tere liye
zahr hii zahr hai duniyaa kii havaa tere liye
rut badal Daal agar phuulnaa phalnaa hai tujhe
uTh mirii jaan mire saath hii chalnaa hai tujhe
qadr ab tak tirii taariiKH ne jaanii hii nahii.n
tujh me.n sho.ale bhii hai.n bas ashk-fishaanii hii nahii.n
tuu haqiiqat bhii hai dilchasp kahaanii hii nahii.n
terii hastii bhii hai ik chiiz javaanii hii nahii.n
apnii taariiKH kaa unvaan badalnaa hai tujhe
uTh mirii jaan mire saath hii chalnaa hai tujhe
to.D kar rasm kaa but band-e-qadaamat se nikal
zof-e-ishrat se nikal vahm-e-nazaakat se nikal
nafs ke khii.nche hu.e halqa-e-azmat se nikal
qaid ban jaa.e mohabbat to mohabbat se nikal
raah kaa KHaar hii kyaa gul bhii kuchalnaa hai tujhe
uTh mirii jaan mire saath hii chalnaa hai tujhe
to.D ye azm-shikan daGdaGa-e-pand bhii to.D
terii KHaatir hai jo zanjiir vo saugand bhii to.D
tauq ye bhii hai zamurrad kaa guluu-band bhii to.D
to.D paimaana-e-mardaan-e-KHirad-mand bhii to.D
ban ke tuufaan chhalaknaa hai ubalnaa hai tujhe
uTh mirii jaan mire saath hii chalnaa hai tujhe
tuu falaatuun o arastuu hai tuu zahraa parvii.n
tere qabze me.n hai garduu.n tirii Thokar me.n zamii.n
haa.n uThaa jald uThaa paa-e-muqaddar se jabii.n
mai.n bhii rukne kaa nahii.n vaqt bhii rukne kaa nahii.n
la.Dkha.Daa.egii kahaa.n tak ki sambhalnaa hai tujhe
uTh mirii jaan mire saath hii chalnaa hai tujhe

Kaifi Azmi
Nazm

ai ishq hamein barbaad na kar

do din hii me.n ahd-e-tiflii ke ma.asuum zamaane bhuul ga.e
aa.ankho.n se vo KHushiyaa.n miT sii ga.ii.n lab ko vo taraane bhuul ga.e
un paak bahishtii KHvaabo.n ke dilchasp fasaane bhuul ga.e

Akhtar Shirani
Nazm

jashn-e-ghaalib

ye jashn ye ha.ngaame dilchasp khilaune hai.n
kuchh logo.n kii koshish hai kuchh log bahal jaa.e.n
jo vaada-e-fardaa par ab Tal nahii.n sakte hai.n
mumkin hai ki kuchh arsa is jashn pe Tal jaa.e.n

Sahir Ludhianvi
Nazm

o des se aane wale bata

o des se aane vaale bataa
kyaa shaam pa.De galiyo.n me.n vahii
dilchasp a.ndheraa hotaa hai
aur sa.Dko.n kii dhundlii sham.o.n par
saayo.n kaa baseraa hotaa hai
baaGo.n kii ghanerii shaaKHo.n me.n
jis tarah saveraa hotaa hai
o des se aane vaale bataa

Akhtar Shirani
Nazm

taj-mahal

nazro.n me.n abhii tak vahii dilchasp samaa.n hai
aa.nkho.n me.n mirii KHvaab-gah-e-shaahjaa.n hai

Mahshar Badayuni
Nazm

marsiya-e-dehli-e-marhum

tazkira dehli-e-marhuum kaa ai dost na chhe.D
na sunaa jaa.egaa ham se ye fasaanaa hargiz
daastaa.n gul kii KHizaa.n me.n na sunaa ai bulbul
ha.nste ha.nste hame.n zaalim na rulaanaa hargiz
Dhuu.nDhtaa hai dil-e-shoriida bahaane mutrib
dard-a.ngez Gazal ko.ii na gaanaa hargiz
sohbate.n aglii musavvar hame.n yaad aa.e.ngii
ko.ii dilchasp muraqqa.a na dikhaanaa hargiz
le ke daaG aa.egaa siine pe bahut ai sayyaah
dekh is shahr ke kha.nDaro.n me.n na jaanaa hargiz
chappa chappa pe hai.n yaa.n gauhar-e-yaktaa tah-e-KHaak
dafn hogaa na kahii.n itnaa KHazaana hargiz
miT ga.e tere miTaane ke nishaa.n bhii ab to
ai falak is se zyaada na miTaanaa hargiz
vo to bhuule the hame.n ham bhii unhe.n bhuul ga.e
aisaa badlaa hai na badlegaa zamaanaa hargiz
jis ko zaKHmo.n se havaadis ke achhuutaa samjhe.n
nazar aataa nahii.n ik aisaa gharaanaa hargiz
ham ko gar tuu ne rulaayaa to rulaayaa ai charKH
ham pe Gairo.n ko to zaalim na ha.nsaanaa hargiz
aaKHirii daur me.n bhii tujh ko qasam hai saaqii
bhar ke ik jaam na pyaaso.n ko pilaanaa hargiz
baKHt so.e hai.n bahut jaag ke ai daur-e-zamaa.n
na abhii nii.nd ke maato.n ko jagaanaa hargiz
kabhii ai ilm-o-hunar ghar thaa tumhaaraa dillii
ham ko bhuule ho to ghar bhuul na jaanaa hargiz
'Gaalib' o 'sheftaa' o 'nayyar' o 'aazurdaa' o 'zauq'
ab dikhaa.egaa na shaklo.n ko zamaanaa hargiz
'momin' o 'alvii' o 'sahbaa.ii' o 'mamnuun' ke ba.ad
sher kaa naam na legaa ko.ii daanaa hargiz
'daaG' o 'majruuh' ko sun lo ki phir is gulshan me.n
na sunegaa ko.ii bulbul kaa taraanaa hargiz
raat aaKHir hu.ii aur bazm hu.ii zer-o-zabar
ab na dekhoge kabhii lutf-e-shabaana hargiz
bazm-e-maatam to nahii.n bazm-e-suKHan hai 'haalii'
yaa.n munaasib nahii.n ro ro ke rulaanaa hargiz

Altaf Hussain Hali
Nazm

marsiya-e-dehli 4

tazkira dehlii-e-marhuum kaa ai dost na chhe.D
na sunaa jaa.egaa ham se ye fasaana hargiz
daastaa.n gul kii KHizaa.n me.n na sunaa ai bulbul
ha.nste ha.nste hame.n zaalim na rulaanaa hargiz
Dhuu.nDhtaa hai dil-e-shoriida bahaane mutrib
dard-a.ngez Gazal ko.ii na gaanaa hargiz
sohbate.n aglii musavvir hame.n yaad aa.e.ngii
ko.ii dilchasp muraqqa.a na dikhaanaa hargiz
maujzan dil me.n hai.n yaa.n KHuun ke dariyaa ai chashm
dekhnaa abr se aa.nkhe.n na churaanaa hargiz
le ke daaG aa.egaa siine pe bahut ai sayyaah
dekh is shahr ke kha.nDaro.n me.n na jaanaa hargiz
chappe chappe pe hai.n yaa.n gauhar-e-yaktaa tah-e-KHaak
dafn hogaa na kahii.n itnaa KHazaana hargiz
miT ga.e tere miTaane ke nishaa.n bhii ab to
ai falak is se ziyaada na miTaanaa hargiz
ham ko gar tuu ne rulaayaa to rulaayaa ai charKH
ham pe Gairo.n ko to zaalim na ha.nsaanaa hargiz
kabhii ai ilm-o-hunar ghar thaa tumhaaraa dillii
ham ko bhuule ho to ghar bhuul na jaanaa hargiz
shaa.irii mar chukii ab zinda na hogii hargiz
yaad kar kar ke use jii na ku.Dhaanaa hargiz
'Gaalib'-o-'shaifta'-o-'nayyar'-o-'aaruzda'-o-'zauq'
ab dikhaa.egaa ye shakle.n na zamaanaa hargiz

Altaf Hussain Hali
Nazm

arz-e-watan

KHayaalaat me.n saKHt hai intishaar
taKHayyul pareshaa.n qalam be-qaraar
jahaa.n KHuun-aaluuda-o-KHuu.n-ra.ng hai
vatan par pa.Daa saaya-e-ra.ng hai
gul-o-laala hai.n musta.id be-takaa.n
rafiiqo.n ne rakkhii hathelii pe jaa.n
har ik lab pe hai bas yahii ik suKHan
hasiin aur dilkash hai arz-e-vatan
KHuluus aaj paamaal hai aur tabaah
usuul aaj daryuuza-KHvaah-e-panaah
giraftaar-e-aazaar duniyaa hai aaj
mohabbat pariishaan-o-rusvaa hai aaj
usuul-e-mohabbat ke ham tarjumaa.n
KHuluus-o-mohabbat ke ham paasbaa.n
divaano.n ko mutlaq nahii.n hai qaraar
sadaaqat se betaab dil paa.edaar
har ik lab pe hai bas yahii ik suKHan
hasiin aur dilkash hai arz-e-vatan
vatan hai ye naanak kaa farmaa.n-paziir
thaa gautam isii kaarvaa.n kaa amiir
mohabbat ne rutba diyaa hai buland
mohabbat ne sab ko kiyaa arjumand
hai Gairat kaa tuufaan chhaayaa hu.aa
hai bachcho.n me.n bhii josh aayaa hu.aa
iraade hai.n sab ke bahut ustuvaar
Gayuur aur bedaar hai.n jaa.n-nisaar
har ik lab pe hai bas yahii ik suKHan
hasiin aur dilkash hai arz-e-vatan
na dii dushmano.n ko kabhii is ne raah
himaala hai rif.at se aalam-panaah
himaala kii dilchasp hai daastaa.n
ye azmat nishaa.n sab kaa hai paasbaa.n
zamaane pe ye baat hai aashkaar
amaa us kii hai duKHtar-e-naam-daar
himaala kii azmat kii ham ko qasam
himaala kii rif.at kii ham ko qasam
hifaazat himaala kii ab farz hai
himaala kaa ham par ba.Daa qarz hai
ye kahte hai.n sab mil ke KHurd-o-kalaa.n
ki Gairat kaa is vaqt hai imtihaa.n
hu.aa ruu-e-sha.nkar hai Gusse se laal
dikhaa.egaa ab raqs taanDau jalaal
iraade hai.n sab ke bahut ustuvaar
Gayuur aur bedaar sab jaa.n-nisaar
har ik lab pe hai bas yahii ik suKHan
hasiin aur dilkash hai arz-e-vatan
muhaafiz hai.n ham amn ke laa-kalaam
zamaane ko dete hai.n budh kaa payaam
sabaa apne gulshan se jaatii hai jab
miTaatii hai duniyaa ke ra.nj-o-ta.ab
rasiilii hai sub.h aur rasiilii hai shaam
nihaa.n in me.n hai zindagii kaa payaam
rivaayat kaa mahfuuz kar ke vaqaar
hame.n luuTnaa hai KHushii kii bahaar
zaraa dekhiyegaa rafiiqo.n kii aan
hai rakkhii jinho.n ne hathelii pe jaan
har ik lab pe hai bas yahii ik suKHan
hasiin aur dilkash hai arz-e-vatan
hai izzat kaa jur.at kaa ab imtihaa.n
kahii.n jhuk na jaa.e vatan kaa nishaa.n
farebo.n se ko.ii panaptaa nahii.n
kabhii jhuuT kaa meva paktaa nahii.n
sadaaqat kaa hai bol-baalaa sadaa
nahii.n kaam aate daroG iftiraa
fazaa hai chaman kii hame.n saazgaar
hai paabanda-tar is zamii.n kii bahaar
har ik lab pe hai bas yahii.n ik suKHan
hasiin aur dilkash hai arz-e-vatan
hayaa aur muravvat hai jo pur rahe.n
hu.ii hai.n vo aa.nkhe.n bahut KHashmagii.n
ba.Dhe hai.n vatan kii taraf bad-qimaash
kaleja zamii.n kaa hu.aa paash paash
pahaa.Do.n pe hai barf Gusse se laal
fazaa.e.n hu.ii.n garm aatish misaal
hai.n jehlam me.n aane ko tuGyaaniyaa.n
har ik mauj par hai Gazab kaa samaa.n
mohabbat kii duniyaa ko dil me.n liye
bahaar-e-javaanii se paimaa.n kiye
vatan kii hifaazat ko tayyaar hai.n
mohabbat ke baada se sarshaar hai.n
hifaazat hai farz apne armaan kii
hame.n aaj parvaa nahii.n jaan kii
har ik lab pe hai bas yahii ik suKHan
hasiin aur dilkash hai arz-e-vatan
2
aa.o ba.Dho maidaan me.n shero.n dushman par yalGaar kare.n
qabr bane maidaan me.n us kii aisaa us par vaar kare.n
za.ng na lagne paa.e apne bhaarat kii aazaadii ko
aa.o zer-e-daam kare.n sayyaado.n kii sayyaadii ko
lauh-e-dil par naqsh karo har haal me.n zinda rahnaa hai
mulk kii KHidmat ke raste me.n jo dukh aa.e sahnaa hai
ye sailaab-e-surKH nahii.n hai zulm-o-sitam kii aa.ndhii hai
is sailaab ko roke.nge ham himmat ham ne baa.ndhii hai
shero.n kii aulaad ho tum in viiro.n kii santaan ho tum
mard-e-mujaahid mard-e-jarii ho yodhdhaa ho balvaan ho tum
saa.nchii maduraa amaritsar ajmer kii azmat tum se hai
sub.h-e-banaras shaam-e-avadh kii asl-o-haqiiqat tum se hai
taaj ajantaa aur elora ke vaahid fankaar ho tum
KHush-siirat KHush-suuraat KHush-muurat KHush-kirdaar ho tum
bhiilaa.ii chitranjan tum se bhaaka.D ana.ngal tum se hai
daamodar kii shaan hai tum se azmat-e-chanbal tum se hai
tum ne basaa.e shahr niraale jangal tum se ma.ngal hai.n
tum ne nikaalii nahre.n itnii sahraa tum se jal-thal hai.n
tum ne itnii himmat se dariyaa.o.n ke ruKH mo.D diye
tum ne khodii.n sura.nge.n itnii duur ke rishte jo.D diye
tum kashmiir kii arz-e-hasii.n ke nazzaaro.n me.n palte ho
kohsaaro.n ko phaa.ndte ho tum dariyaa.o.n pe chalte ho
tum mysore me.n virindaa-ban ke baaG sajaane vaale ho
uuTii shimla daarjiling se shahr basaane vaale ho
taatya-Tope laxmii-baa.ii Tiipuu kii aulaad ho tum
ja.ng ke fan me.n qaabil ho tum maahir ho ustaad ho tum
hinduu muslim sikh iisaa.ii jainii bodh aur paarsii
dahqaa.n taajir aur mulaazim saadhuu-sant aur siyaasii
le ke vatan kaa jhanDaa aa.o dushman par yalGaar kare.n
qabr bane ran-bhuum me.n us kii aisaa us par vaar kare.n

Arsh Malsiyani
Nazm

na marne ka dukh

ye lagtaa thaa ki kuchh hii der me.n
maatam bapaa hogaa
mai.n un baato.n se
bistar par pa.Daa
aa.nkho.n ko tho.Dii sii khulii rakh kar
ba.De dilchasp muuD me.n thaa

Aabid Adeeb
Nazm

intizar

tumhe.n maaluum hai vo be-KHudii kaa kaisaa aalam thaa
mire ho.nTo.n me.n jaltii paTriyaa.n bhii muskuraatii thii.n
mirii aa.nkho.n ko raate.n jaagne kaa Gam nahii.n thaa jab
mire haatho.n me.n bikhrii silvaTe.n shikva na kartii thii.n
mire pairo.n kaa nangaa-pan kahii.n be-dam nahii.n thaa jab
mujhe khaddar ke malbuusaat bhii rusvaa na karte the
kisii khaane kii baasii badbu.o.n me.n Gam nahii.n thaa jab
ye saarii mehnate.n kyuu.n merii aa.nkho.n me.n utartii hai.n
ye ho.nTo.n me.n dimaaGo.n kaa khi.nchaa.o jaagtaa kyuu.n hai
ye chehre kii lakiire.n kyuu.n mujhe ranjiida kartii hai.n
ye kaise ranj hai.n aalaam hai.n Gam hai.n tabaahii hai
mirii KHud-aagahii ke sabz chashme KHushk se kyuu.n hai.n
ye kaisii dhuup hai jo jism kii ra.anaa.ii jhulsaa.e
ye kaisii chhaa.nv hai jo sardiyo.n kii barf ban jaa.e
ye mai.n ne chaa.ndnii ko muddato.n se kyuu.n nahii.n dekhaa
ye kyuu.n in baarisho.n me.n phuul rasto.n me.n nahii.n phaile
ab is mamtaa kii shabnam kyuu.n mire dil par nahii.n girtii
mirii aaGosh me.n bastii ke bachche kyuu.n nahii.n aate
vahii ha.ngaam ab kyuu.n ek paagal-pan saa lagtaa hai
kisii dilchasp KHaamoshii me.n kyuu.n vahshat sii hotii hai
ye aaKHir rafta rafta saarii duniyaa kyuu.n badaltii hai
magar jab sochtii huu.n mai.n to ye bohraan kaa aalam
ye saarii hosh kii duniyaa hai bas ik KHvaab ke piichhe
ye saare bolte aa.nsuu ye ho.nTo.n mai.n khi.nchaa.o saa
ye jaltii dhuup dushman chhaa.nv guzre chaa.nd kii kirne.n
ye aazurda se raste maamtaa se KHaalii aaGoshe.n
ye paagal-pan kii duniyaa vahshato.n kii ghor taariikii
ye merii ruuh ke andar badaltii aadato.n kaa Gam
tumhaaraa muntazir hai tum mujhe mazbuut baa.nho.n me.n
kabhii haule se le loge mire kaano.n me.n kah doge
tumhe.n kis baat kaa Gam hai tumhe.n kaisii pareshaanii
tumhaare paas hai.n jo huu.n tumhaare Gam mai.n le luu.ngaa

Tanveer Anjum
Nazm

uske nam

vahii maKHmuur raate.n ab bhii tasviir-e-taKHayyul hai.n
vahii dil-chasp baate.n ab bhii tasviir-e-taKHayyul hai.n
vahii pur-kaif ghaate.n ab bhii tasviir-e-taKHayyul hai.n
sitaaro.n kii baraate.n ab bhii tasviir-e-taKHayyul hai.n
vahii mauj-e-sabaa hotii hai lekin tum nahii.n hotii.n
ba.Dii ra.ngii.n fazaa hotii hai lekin tum nahii.n hotii.n

Shaukat Pardesi
Nazm

bulbul aur gulab

bulbul
ai rang bhare gulaab ke phuul
is shaan is aab-o-taab ke phuul
dilchasp bahut hai.n rang tere
hai.n mujh ko pasand Dhang tere
khiltaa hai jo tuu is anjuman me.n
lagtii hai ik aag sii chaman me.n
kyaa ye asar hai pankhu.Dii me.n
kaisii hai chaTak kalii kalii me.n
kis ne tujhe is-qadar sajaayaa
kis ne tujhe baaG me.n khilaayaa
kyo.n tujh me.n hai dilkashii ziyaada
kis mulk kaa tuu hai shaah-zaada

Seemab Akbarabadi
Nazm

bahaar ke din

aayaa hai bahaar kaa zamaana
baaGo.n ke nikhaar kaa zamaana
kaliyaa.n kyaa kyaa chaTak rahii hai.n
saarii raushe.n mahak rahii hai.n
halkii halkii ye un kii KHushbuu
phailii hu.ii hai chaman me.n har suu
chi.Diyaa.n gaatii hai.n giit pyaare
sunte hai.n chaman me.n phuul saare
shaaKHo.n kaa banaa liyaa hai jhuulaa
phuulo.n se ladaa hu.aa hai jhuulaa
ko.npal har ik hai kaisii pyaarii
sabzii me.n jhalak rahii hai surKHii
kitnii raahat-fazaa hu.aa hai
goyaa jannat kaa dar khulaa hai
KHush KHush har ek aadmii hai
har shai me.n balaa kii dilkashii hai
ye sub.h kaa dil-fareb manzar
ye shaam kaa husn ruuh-parvar
ye raat ko chaa.ndnii kaa aalam
allaah re be-KHudii kaa aalam
kaisii dilchasp chaa.ndnii hai
chaadar ik nuur kii tanii hai
har dil me.n uma.ng kis qadar hai
sab par hii bahaar kaa asar hai
sa.Dko.n pe jo log jaa rahe hai.n
Gazle.n 'afsar' kii gaar rahe hai.n

Hamidullah Afsar
Nazm

barsat ki sham

kis qadar dilkash suhaanii shaam hai barsaat kii
bolne vaalii hai ab tasviir goyaa raat kii
daaman-e-maGrib me.n poshiida ruKH-e-KHurshiid hai
aamad aamad hai qamar kii us kaa shauq-e-diid hai
KHaama-e-qudrat ke paa-e-Dhab shafaq ke rang me.n
sar-ba-sar Duube hu.e hai.n sab shafaq ke rang me.n
sar uThaa kar aasmaa.n kii jaama-zebii dekhiye
us kii ra.ngiinii me.n kyaa hai dil-farebii dekhiye
ye ruu-pahlaa ye sunahraa rang hii kuchh aur hai
ra.ng hii kuchh aur be-shak Dha.ng hii kuchh aur hai
kaam sone kaa banaa hai gumbad-e-aflaak par
zau-fagan hotaa hai aalam is kaa farsh-e-KHaak par
bazm-e-garduu.n par hu.aa hai anjuman-aaraa ko.ii
jhaa.nktaa parde se hai shaayad ye mah-paara ko.ii
mai.n na kyuu.n qurbaan jaa.uu.n is adaa is Dha.ng ke
aasmaa.n par khil rahe hai.n phuul laakho.n rang ke
hai.n lakiire.n muKHtalif ra.ngo.n kii ra.ngii.n daaG hai
ye KHudaa kii shaan hai kyaa aasmaa.n par baaG hai
shaam hai barsaat kii dilchasp manzar saath hai
dekhiye hotaa hai kyaa qudrat kaa is me.n haath hai
suurat-e-tasviir chup 'bismil' hu.e ye bol kar
husn kii duniyaa hai dekho diida-e-dil khol kar

Bismil Allahabadi
Nazm

hamari zaban

urdu kaho yaa hindostaanii
is kii ba.Daa.ii duniyaa ne maanii
aapas kii millat maqsuud is kaa
ulfat kii KHuugar vahdat kii baanii
guzre hu.o.n ke dil kii dulaarii
biite dino.n kii dilkash kahaanii
hai ittihaad-e-qaumii kaa naGma
aaGaaz is kaa us kii javaanii
ahl-e-vatan the aapas me.n yak dil
is baat kii hai urdu nishaanii
hone ko hai.n go sad.haa zabaane.n
par is ke aage bhartii hai.n paanii
uttar se dakshin puurab se pachchhim
har samt is kii hai hukmaraanii
hinduu bhii shaidaa muslim bhii shaidaa
hai saarii KHilqat is par divaanii
ho.n kyuu.n na is ke sab log haamii
hai ye saraasar hindostaanii
miltii hai khul kar har ik zabaa.n se
is baat me.n hai kaun is kaa saanii
tarz-e-nigaarish gar dekh paa.e.n
rah jaa.e.n hairaa.n bahzaad-o-maanii
is kii fasaahat is kii balaaGat
is kii salaasat is kii ravaanii
ra.ngiin qisse novel anokhe
dilchasp nazme.n shiirii.n-zabaanii
jaaduu-nigaarii shevaa-bayaanii
san.at-taraazii gauhar-fishaanii
har bol is kaa misrii saa miiThaa
har baat dilkash har lai suhaanii
merii du.aa hai ye mudda.aa hai
is par KHudaa kii ho mehrbaanii
'nayyar' jahaa.n me.n phuule-phale ye
jab tak hai baaqii duniyaa-e-faanii

Mohammad Shafiuddin Nayyar
Nazm

is shahr mein

KHuub-suurat hai zamii.n
dhuup me.n chamke hu.e is shahr me.n
zindagii dilchasp hai
aql kii baate.n jahannam kii dhadaktii aag hai.n
un se ham vaaqif nahii.n
amn hai aur nii.nd hai aur KHvaab hai.n
apnii hii lazzat me.n gum
jism hai.n
dosto.n se duur ha.ngaamo.n me.n mai.n khoyaa hu.aa
pur-sukuun
aah kitnii KHuub-suurat hai zamiin
dhuup me.n chamke hu.e is shahr me.n
zindagii dilchasp hai

Zahid Dar
Nazm

pyari baji

kitnii achchhii pyaarii baajii
pyaarii pyaarii pyaarii baajii
achchhe achchhe giit sunaa.e
pyaare pyaare giit sunaa.e
ek thaa raaja ek thii raanii
roz kahe dilchasp kahaanii
buujhe hai dilchasp pahelii
achchhii dost hai pyaarii sahelii
kitne qisse yaad hai.n us ko
KHuub latiife yaad hai.n us ko
mujh ko KHuub ha.nsaa.e baajii
ro.uu.n to bahlaa.e baajii
kitnii achchhii pyaarii baajii
pyaarii pyaarii pyaarii baajii
gu.Diyaa kaa jab byaah rachaa.e
sab bachcho.n ko saath khilaa.e
baaG me.n jaa kar jhuulaa jhuule
mauj me.n aa kar Daalii chhuu lii
khele mil-jul aa.nkh-micholii
bole sab se pyaar kii bolii
khele par school se pahle
ruk jaa.e har bhuul se pahle
pa.Dhne me.n hoshiyaar hai baajii
khel me.n bhii tayyaar hai baajii
kitnii achchhii pyaarii baajii
pyaarii pyaarii pyaarii baajii
mukh.Daa us kaa bholaa-bhaalaa
daa.nt us ke motii kii maalaa
ha.ns de to phul-jha.Diyaa.n chhuuTe
baat kare.n khul jaa.e buuTe
pyaarii pyaarii baate.n us kii
rahbar saarii baate.n us kii
sab ko achchhii baat bataa.e
sab ko sachchii baat sikhaa.e
sachchii chaah jataa.e baajii
siidhii raah dikhaa.e baajii
kitnii achchhii pyaarii baajii
pyaarii pyaarii pyaarii baajii

Haidar Bayabani
Nazm

achchhe din

phir gulzaar bane.n viiraane
phir ho.n vahii ra.ngii.n afsaane
phir aa jaa.e.n agle zamaane
phir ho.n vahii pur-kaif taraane
phir ho.n vahii dilchasp sadaa.e.n
mulk ke phir achchhe din aa.e.n

Ahmaq Phaphoondvi
Nazm

bablu ka git school jaane se pahle

apne ba.Dhte hu.e baalo.n ko kaTaa luu.n to chaluu.n
Gusl-KHaane me.n zaraa dhuum machaa luu.n to chaluu.n
aur ek cake mazedaar saa khaa luu.n to chaluu.n
abhii chaltaa huu.n zaraa pyaas bujhaa luu.n to chaluu.n
raat me.n ik ba.Daa dilchasp tamaashaa dekhaa
mujh se mat puuchh mire yaar ki kyaa kyaa dekhaa
Thiik kahte ho madhur saa ko.ii sapnaa dekhaa
aa.nkh to mal luu.n zaraa hosh me.n aa luu.n to chaluu.n
mai.n thakaa-haaraa thaa itne me.n madaarii aayaa
us ne kuchh pa.Dh ke mire sar ko zaraa sahlaayaa
mai.n ne KHud ko kisii rangiin mahal me.n paayaa
aise do-chaar mahal aur banaa luu.n to chaluu.n
jaane kyaa baat hai baajii ko jo hai mujh se jalan
sab se kahtii hai.n ki is lau.nDe ke big.De hai.n chalan
mujh ko piiTaa to miraa ashko.n se bhiigaa daaman
apne bhiige hu.e daaman ko sukhaa luu.n to chaluu.n
merii aa.nkho.n me.n abhii tak hai sharaarat kaa Guruur
apnii daanaa.ii kaa ya.anii ki himaaqat kaa Guruur
dost kahte hai.n ise to hai zehaanat kaa Guruur
aise vahmo.n se abhii KHud ko nikaaluu.n to chaluu.n

Rafia Shabnam Abidi
Nazm

rup-nagar ki sair

nanhe-munne do bachcho.n kii hai dilchasp kahaanii
ruup-nagar kii sair kare.nge baat jo dil me.n Thaanii
laakh manaayaa maa.n ne lekin baat na us kii maanii
sub.h-savere ghar se nikle ghar vaalo.n se chhup ke
chalte chalte dono.n bachche ik jangal me.n pahu.nche
shiddat kii garmii thii us pe dono.n hii the bhuuke
tho.Dii der chale jangal me.n dekhaa baaG anokhaa
phuul khile the rang-birange juuhii belaa champaa
nanhaa saa ik pe.D bhii dekhaa phal thaa jis kaa miiThaa
phal khaayaa dono.n ne mil kar apnii pyaas bujhaa.ii
itne me.n ik nannhii bachchii saamne un ke aa.ii
aage ba.Dh kar bolii tum ho kaun bataa.o bhaa.ii
sach sach bolo kyo.n tum dono.n mere des me.n aa.e
ye vo des hai bhaa.ii is me.n jo aa.e rah jaa.e
ruup-nagar me.n ko.ii aa kar kaise jaane paa.e
baat sunii jab bachcho.n ne to apnaa haal bataayaa
ruup-nagar kaa shauq hii ham ko is jangal me.n laayaa
barso.n se thii jis kii KHvaahish us ko dekh to paayaa
sun kar bachchii ha.ns kar bolii aa.o shahr dikhaa.e.n
sone chaa.ndii ke mahlo.n kii tum ko sair karaa.e.n
bhuuke ho to ghar pe chal kar pahle khaanaa khaa.e.n
jagmag kartii sa.Dke.n dekhii.n dekhe mahal do mahle
aisii duniyaa in bachcho.n ne kab dekhii thii pahle
bachche buu.Dhe aur javaa.n the sab aKHlaaq ke putle
nannhii bachchii ne dono.n ko apnaa bhaa.ii samjhaa
us ke abbuu ammii ne bhii pyaar se un ko rakkhaa
achchhe khaane KHuub diye phir achchhaa achchhaa kap.Daa
lekin ik bachche ko apnii maa.n kii yaad jo aa.ii
ro ro kar ammii ammii ko phir aavaaz lagaa.ii
haath paka.D kar ko.ii bolaa kyo.n rote ho bhaa.ii
aa.nkh khulii to ammii bolii.n dekh rahe the sapnaa
shaahid merii baate.n maano sun lo meraa kahnaa
ruup-nagar jaane ko jhag.Daa hargiz ab mat karnaa
naanii ammaa.n ke qisse ko bilkul jhuuT samajhnaa
varna merii maar se mushkil hai ab teraa bachnaa

Shabnam Kamali
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now