Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "farzand-e-khalf"

Nazm MATCHES FOR "farzand-e-khalf"

Nazm

lashkar-e-hind

uTTho is tarh ki maidaa.n me.n balii uThte hai.n
amn kaa le ke vo 'unvaan-e-jalii uThte hai.n
haq-parastii ke liye jaise valii uThte hai.n
hifz-e-dii.n ke liye farzand-e-'alii uThte hai.n

Gulzar Dehlvi
Nazm

hazrat-e-insan

jahaa.n me.n daanish o biinish kii hai kis darja arzaanii
ko.ii shai chhup nahii.n saktii ki ye aalam hai nuuraanii
ko.ii dekhe to hai baariik fitrat kaa hijaab itnaa
numaayaa.n hai.n farishto.n ke tabassum-haa-e-pinhaanii
ye duniyaa daavat-e-diidaar hai farzand-e-aadam ko
ki har mastuur ko baKHshaa gayaa hai zauq-e-uryaanii
yahii farzand-e-aadam hai ki jis ke ashk-e-KHuunii.n se
kiyaa hai hazrat-e-yazdaa.n ne dariyaa.o.n ko tuufaanii
falak ko kyaa KHabar ye KHaak-daa.n kis kaa nasheman hai
Garaz anjum se hai kis ke shabistaa.n kii nigahbaanii
agar maqsuud-e-kul mai.n huu.n to mujh se maavaraa kyaa hai
mire ha.ngaama-haa-e-nau-ba-nau kii intihaa kyaa hai

Allama Iqbal
Nazm

tahrir

havaa lahro.n pe likhtii hai to paanii par tahriir kartaa hai
ki ham farzand-e-aadam kii tarah sab naqsh-gar hai.n
ahl-e-fan hai.n
zindagii taKHliiq karte hai.n
sitaara TuuT jaataa hai
magar bujhne se pahle apnii is jagmag ibaarat se fanaa par KHanda-zan hotaa hai
mai.n miT kar bhii aane vaale lamho.n me.n daraKHshaa.n huu.n
jo pattaa shaaKH se girtaa hai
qirtaas-e-havaa par daa.ero.n me.n likhtaa aataa hai
ki shaaKHo.n par ta.Dapte dosto
aglii bahaaro.n me.n mujhe phir lauTnaa hai phuuTnaa hai TuuTnaa hai KHaak honaa hai
magar vo KHaak jo ashjaar kii maa.n hai
vo kau.ndaa jo ghaTaa par sabt kar ke dastaKHat apne
ba-zaahir jaa chukaa hotaa hai
chhup kar dekhtaa hai
kis tarah taariikiyo.n me.n zalzale aate hai.n
manzar jaag uThte hai.n
vo jaa.n jo pas-e-dar kitne barso.n se tanhaa hai
ik sahiifa hai
kabhii suuraj kii kirno.n me.n use dekho
to puurii kaa.enaat is me.n mujassam paa.oge aur jhuum jaa.oge
kitaabe.n pa.Dhne vaale to na maane.nge
magar az-KHaak-taa-aflaak jo kuchh bhii hai vo tahriir hai
alfaaz hai.n eraab hai.n nuqte hai.n shoshe hai.n kashe.n hai.n daa.ere hai.n harf hai.n jin me.n tilism-e-zindagii
asraar kaa iz.haar kartaa hai

Ahmad Nadeem Qasmi
Nazm

aankhen meri baqi un ka

KHud duudmaan-e-qibla-e-aalam kare.n KHayaal
dil me.n bahut dino.n se hai kaa.nTaa chubhaa hu.aa
us KHaandaa.n ke ek ra.ngiile piyaa ke ghar
farzand-e-arjumand ke KHatna pe kyaa hu.aa
chashme ubal rahe the suruur-o-nashaat ke
thaa chaav.Dii kaa naqsha-e-uryaa.n khi.nchaa hu.aa
is mahfil-e-nashaat ke narGe me.n vo bhii the
chehre pe jin ke zohd-o-vara.a thaa likhaa hu.aa
qavvaal gaa rahe the KHuzuu'-o-KHushuu' se
rindaan-e-bul-havas me.n thaa GauGaa machaa hu.aa
baada-gusaar khol ke baiThe the botale.n
thaa ranDiyo.n ke saamne huqqa dharaa hu.aa
na.at-e-nabii pe ismat-e-aavaara nukta-chii.n
KHauf-e-KHudaa thaa zohraa-vasho.n me.n ghiraa hu.aa
daulat ke Dher 'zaahidaa' parviin pe nisaar
dahqaan-e-KHasta-haal kaa chuulhaa bujhaa hu.aa
the KHaadimo.n ke peT pe patthar ba.ndhe hu.e
aur kanchano.n pe baab-e-saKHaavat khulaa hu.aa
'shorish' us ek manzar-e-zohra-gudaaz me.n
dast-e-du.aa thaa arsh kii jaanib uThaa hu.aa
is hashr-e-nau me.n qibla-e-aalam kahaa.n the aap
dekhaa to hogaa aap ne jo maajraa hu.aa

Shorish kashmiri
Nazm

shair

tumhe.n kyaa lagtaa hai allaah kii shaa'ir se ko.ii dushmanii hai
vo shaa'ir kii mazammat kis liye kartaa hai aur tum aayate.n sar par uThaa kar shaa'irii par thuukte ho
tumhe.n kyaa lagtaa hai tum vah.y ke maa'nii samajhte ho tumhe.n ilhaam kaa matlab pata hai
tumhe.n vo log hassaan-ibn-e-saabit kaa ta'aaruf kyo.n nahii.n karvaate jo tum ko bataate hai.n ki shaa'ir shar hai jhuuTaa hai fasaadii hai
vo hassaan-ibn-e-saabit mimbar-e-nabvii pe apnii shaa'irii gaataa hu.aa shaa'ir
tumhe.n maa'luum hai hassaan kii KHaatir du'aa.e.n kaun kartaa thaa
are iqbaal ke iqbaal ko sar par uThaane vaalo jab 'iqbaal' kahtaa hai
ye duniyaa daa’vat-e-diidaar hai farzand-e-aadam ko
ki har mastuur ko baKHshaa gayaa hai zauq-e-‘uryaanii
to tum mu.nh kyo.n chhupaate ho munaafiq ho
tumhe.n kyaa lagtaa hai tum she'r kii buniyaad par ash'aar ko dhutkaar doge shaa'iro.n ko maar doge
tumhe.n kyaa lagtaa hai mai.n tum pe kyo.n rotaa huu.n jab tum shaa'iro.n ke katbe Gaa.eb karte ho
tumhe.n kyaa lagtaa hai mai.n tum pe kyo.n ha.nstaa huu.n jab tum shaa'iro.n kii qabro.n ko raddii banaa kar bechte ho
tumhe.n maa'luum hai ye KHizr us ko bhii amar kar dete hai.n jis se mohabbat karte hai.n
tumhe.n kyaa lagtaa hai taKHliiq-kaarii kis kaa sheva hotaa hai
ilhaam kis pe hotaa hai aur vah.y kis pe aatii hai
tumhe.n kyaa lagtaa hai shaa'ir pe jab ilhaam hotaa hai to us ke zehn me.n aane se pahle misre kis ke haath me.n hote hai.n
un kaa kaun nahlaa kar na.e kap.Do.n me.n kanghii kar ke maathaa chuumtaa hai
tumhe.n kyaa lagtaa hai tum shaa'iro.n ke sochne kii had ko jaa sakte ho bachche ho
jahaa.n tum achchhaa ban.ne ke liye ghis ke pahu.nchte ho vahaa.n par shaa'iro.n kii mashq ke matruuk misre baasii ho kar marte hai.n
shaa'ir vahaa.n maayuus rahtaa hai jahaa.n tum muktii ke chakkar me.n jaanaa chaahte ho
tumhe.n kyaa lagtaa hai shaa'ir ke baare me.n tumhe.n jo lagtaa hai vo Thiik hai
kyaa Thiik hai aur kyaa nahii.n hai kaun jaane par mai.n itnaa jaantaa huu.n
ek achchhe aadmii se ik buraa shaa'ir ba.Daa hotaa hai 'mehtar'

Shahbaz Mehter
Nazm

mohabbat

'sa.iid' lekin usii ko chaahuu.n
jise du.aa-e-KHaliil maa.nge

Saeed Warsi
Nazm

etiraf

ko.ii suurat fan-e-arz-e-hunar aa jaa.e mujhe bhii
shaam ko shaam kahuu.n aur nigaaho.n pe a.ndhere utar aa.e.n
sub.h ko sub.h likhuu.n aur pas-e-satr-e-tapaa.n dhuup-bharaa din nikal aa.e
kal bhii taasiir-e-tahii thaa miraa daamaan-e-suKHan aaj bhii taasiir-e-tahii hai
meraa daamaan-e-du.aa sar-e-darbaar-e-ataa aaj bhii faizaan-e-talab hai

Khalid Ahmad
Nazm

DugDugi wale

tum ho DugDugii vaale
DugDugii bajaate ho
aur chaahte ho ye
DugDugii ke bajte hii
KHalaq-e-shahr-e-be-parvaa
naachne me.n lag jaa.e
tum ho DugDugii vaale
par ye log jin ko tum
DugDugii ke parde me.n
naachnaa sikhaate ho
aa.nkh bhii to rakhte hai.n
soch bhii to sakte hai.n
tum ho DugDugii vaale
ko.ii aane vaalaa din
is tarah bhii aa.egaa
DugDugii ke bajte hii
KHalaq-e-shahr-e-be-parvaa
Gaflato.n se jaagegii
aur tumhaare haatho.n me.n
DugDugii ke badle ik
aa.ina thamaa degii
tum ho DugDugii vaale
DugDugii bajaate ho

Khalid Moin
Nazm

etiraf

kuchh vaqf-e-tabassum ho.nT bhii hai.n, kuchh rasta taktii aa.nkhe.n bhii
kuchh vo hai.n jin se milne ko be-taab ho.n merii baa.nhe.n bhii
par, ek KHalish sii rahtii hai

Anjum Khaleeq
Nazm

man

jab bhii kabhii jannat ko tasavvur me.n basaayaa
ai maa.n mirii KHud ko tire qadmo.n me.n hii paayaa
duniyaa ke kisii pe.D kii chhaa.nv me.n nahii.n hai
jo mujh ko ataa kartaa hai ThanDak tiraa saaya
us rab kaa adaa shukr bhalaa kyo.n na karuu.n mai.n
jis ne tirii suurat me.n hii jannat ko dikhaayaa
dhartii pe mai.n ab is liye pairo.n pe kha.Daa huu.n
mai.n chalte hu.e jab bhii giraa tuu ne uThaayaa
yuu.n hii to nahii.n guzraa ye jho.nkaa mujhe chhuukar
'KHaalid' mujhe lagtaa hai mirii maa.n ne bulaayaa

Khalid Sajjad
Nazm

ek aarzu

huzuur merii bisaat kyaa hai ki naa't likkhuu.n
mai.n aap kaa ik bahut gunahgaar ummatii huu.n
mirii zabaa.n par kasaafate.n hai.n
dimaaG-o-dil me.n Galaazate.n hai.n
huzuur merii bisaat kyaa hai ki naa't likkhuu.n
magar nahii.n mai.n bahut hii 'aalii hasab nasab huu.n
ki aap hii kaa Gulaam-e-ibn-e-Gulaam-e-ibn-e-Gulaam huu.n mai.n
bhalaa bataa.e.n ki mere aage tamaam shaahaan-e-azminah kii bisaat kyaa hai
huzuur ye eqtidaar-zaade havas ke bande
mai.n in ke shajre se baa-KHabar huu.n ki KHvaahisho.n ke Gulaam-e-ibn-e-Gulaam-e-ibn-e-Gulaam hai.n ye
huzuur mai.n in Gulaam-zaado.n ke taKHt-o-taaj aur saltanat ke sabhii tilismaat jaantaa huu.n
mai.n in kii auqaat jaantaa huu.n
tamaam fir'auniyat ke qil’o.n kii aur fasiilo.n kii asl buniyaad ibn-e-aadam ke KHuun aur haDDiyo.n se taa'miir kii ga.ii hai
magar huzuur aap kii hukuumat tamaam shaaho.n se muKHtalif hai
ki aap ke paas ek chaadar hai ek tah-band ik 'amaama
khajuur kii chhaal aur patto.n kaa ek bistar
so ai zamaane ke baadshaaho
lo tum bhii dekho ye shaah-e-kaunain kaa asaasa
mai.n is zamaane ke saare namruud aur shaddaad aur qaaruun aur haamaan aur fir'aun ko dikhaa duu.n
ki mere aaqaa kii saltanat me.n ko.ii nahii.n hai jo bhuuk se bilbilaa rahaa ho
huzuur kii mamlikat me.n daulat kaa ek hissa Gariib logo.n kii milkiyat hai
suno rafiiqaan-e-ishtiraakii
tamaam jabr-e-ma’aash kaa bas yahii nizaam-e-zakaat hal hai
dalit kii mahruumiyo.n pe aa.nsuu bahaane vaalo
suno ye taariiKH kah rahii hai
bilaal jaise Gulaam jin ko mahaa-dalit se bhii past samjhaa gayaa 'arab me.n
rasuul-e-rahmat ne aise mahruum aadmii ko bhii aisaa darja 'ataa kiyaa hai
KHaliifa-e-vaqt kaa bhii aaqaa banaa diyaa hai
suno ai taaniisyat ke naa're lagaane vaalo
rasuul-e-insaaniyat ne mazluum 'aurato.n ko hayaat baKHshii
rusuum-e-vahshat ke KHuunii panjo.n se un ko raah-e-najaat baKHshii
tamaam 'izzat vaqaar kii kaa.enaat baKHshii
huzuur kyaa hai bisaat merii ki naa't likkhuu.n
magar mai.n duniyaa ke hitlero.n kii samaa'ato.n ko jagaa rahaa huu.n
tamaam dahshat-pasand logo.n ko aaj mai.n ye sunaa rahaa huu.n
tamaam insaaniyat ke qaatil giroho.n ko ye bataa rahaa huu.n
rasuul-e-rahmat kii zindagii kaa ye baab raushan dikhaa rahaa huu.n
mai.n aaj taa.ef hudaibiya aur fat.h-e-makka kii yaad un ko dilaa rahaa huu.n
huzuur merii bisaat kyaa hai ki naa't likkhuu.n
magar mirii ek aarzuu hai ki apne KHuun-e-jigar se auraaq-e-zindagii par bas aap hii kii sifaat likkhuu.n

Khalid Mubashshir
Nazm

ek d pi ki udasi

chaudhvii.n kii shab hai lekin maatamii malbuus me.n lipTii hu.ii hai
chaa.ndnii bhii aa.nsu.o.n me.n tar-ba-tar hai
aasmaa.n hadd-e-nazar tak aasmaa.n hai yaa dhu.aa.n hai
har taraf ik KHaamushii mahv-e-fuGaa.n hai
gul se KHushbuu bevafaa.ii kar chukii hai
maanii-o-bahzaad naqsh-o-rang saare kho chuke hai.n
barbat-o-nai se KHushii aur sarKHushii ruuThii hu.ii hai
raqs kii mauje.n badan kii harkato.n se aur adaa.o.n se KHafaa hai.n
shaa'irii se lafz-o-maa'nii kaa ta'alluq zaKHm-KHurda ho chukaa hai
aaj kii shab kyaa hu.aa hai
kyo.n zamiin-o-aasmaa.n me.n har taraf maatam bapaa hai
whatsapp par tum ko dekhaa
tab ye raaz ifshaa hu.aa hai
ek D-p kii udaasii kaa.enaatii ho ga.ii hai

Khalid Mubashshir
Nazm

kaweri

pa.D rahaa hai tujh pe aks-e-jibra.iil
tujh se hai sairaab gulzaar-e-KHaliil

Azeem Aambori
Nazm

ghunchagi ka safar

kisii sitaara-e-tanhaa kaa irti'aash-e-KHafii
kisii alaav me.n sahmii hu.ii sii chingaarii

Allama Talib Jauhari
Nazm

chand ki fariyaad

chaa.nd ne mujh se kahaa ai shaa.er-e-fikr-e-azal
mere baare me.n bhii likh de ko.ii sanjiida Gazal
har ta'alluq to.D rakkhaa hai hilaal-e-iid se
tujh ko fursat hii nahii.n hai mah-vasho.n kii diid se
rasm-e-diidaar-e-hilaal-e-iid, afsaana hu.ii
baam par us dam cha.Dhe, jis vaqt farzaana hu.ii
le ke nazraana kametii ne ujaalaa hai mujhe
gar nahii.n niklaa, zabardastii nikaalaa hai mujhe
me.n jo be-marzii nikal aayaa to Daa.nTaa hai bahut
maulvii ne muKHtalif KHaano.n me.n baa.nTaa hai bahut
is ko mat follow karo, is kii tariiqat maa.nd hai
tum bareilly ke ho aur ye deobandi chaa.nd hai
ye jo KHuu.n-aaluud hai, afGaaniyo.n kaa chaa.nd hai
muKHtalif Tuk.Do.n me.n pakistaniyo.n kaa chaa.nd hai
ik karachi se hai niklaa ik pas-e-lahore hai
sindh kaa chaa.nd aur hai punjab kaa chaa.nd aur hai
vo jo ham-saa.e kii biivii hai Gazaalaa chaa.nd hai
aur us ke saath jo rahtaa hai kaalaa chaa.nd hai
shaa.ero.n ne apne shero.n me.n bahut pelaa mujhe
'miir' o 'Gaalib' ne bhii samjhaa KHaak kaa Dhelaa mujhe
sher me.n, rashk-e-qamar lailaa ko farmaane lage
tube-light ko hilaal-e-iid batlaane lage
apnii biivii se kahaa untiisvii.n kaa chaa.nd ho
aur pa.Dosan se kahaa tum chaudhvii.n kaa chaa.nd ho
aam sii aurat ko mah-paara banaa kar rakh diyaa
chaa.nd ko TuuTaa hu.aa taara banaa kar rakh diyaa
chaa.nd par jis din se insaa.n ke qadam pa.Dne lage
chaa.ndnii jin se ho aaise balb kam pa.Dne lage
mai.n zamii.n se duur huu.n lekin bahut nazdiik huu.n
ai zamii.n vaalo mai.n tum se duur rah kar Thiik huu.n
mai.n zamii.n par aa gayaa to har bashar le jaa.egaa
sab se pahle ten-parsenT apne ghar le jaa.egaa

Khalid Irfan
Nazm

pak o hind yak-jehti

miyaan-e-hind-o-pakistan ik sarhad kaa jhag.Daa hai
vagarna is imaarat ke manaare ek jaise hai.n
karaachii kaa kitchen ho yaa vo dakan kii ''raso.ii'' ho
namak kaa farq hai be.ngan bhagaare ek jaise hai.n
pajaamo.n ke design ko badal Daalaa to kyaa Gam hai
hamaarii biiviyo.n ke to Garaare ek jaise hai.n
pareshaa.n haal hai public magar dono.n mumaalik ke
miraasii cricketer filmii sitaare ek jaise hai.n
ka.nvaare log to har mulk me.n aazaad phirte hai.n
magar shaadii-shudaa qismat ke maare ek jaise hai.n
baraa.e aqd-KHvaanii qaaziyo.n me.n farq hai lekin
karaachii aur dillii ke chuvaare ek jaise hai.n
ka.nvaaraa aadmii ho yaa ko.ii aazaad leader ho
jo be-pe.nde ke loTe hai.n vo saare ek jaise hai.n
nikamme rahnumaa aur aql se paidal siyaasat-daan
hamaare ek jaise hai.n tumhaare ek jaise hai.n
yahaa.n kaa KHaalid-e-irfaa.n vahaa.n ke 'raahat'-indorii
nire shaa.er hai.n dono.n ke sitaare ek jaise hai.n

Khalid Irfan
Nazm

roza-KHor se inTerwiew

mai.n ne inTerview kiyaa kal ek roza-KHor se
mai.n zabaa.n se boltaa thaa vo shikam ke zor se
mai.n ne puuchhaa aap ne roza ye kyuu.n rakkhaa nahii.n
peT dikhlaane lagaa bolaa ki yuu.n rakhaa nahii.n
roza yuu.n rakkhaa nahii.n chaltii nahii.n baad-e-sabaa
mausam-e-garmaa me.n roze aa.e hai.n is martaba
job karnii hai zaruurii kaam karnaa hai mujhe
cock pizza ke sahaare shaam karnaa hai mujhe
mai.n ne lassii ke gilaaso.n me.n piyaa kuchh aur hai
dopahar me.n murG khaane kaa mazaa kuchh aur hai
din me.n khaane ke liye iqraar kar letaa huu.n mai.n
shaam ko masjid me.n bhii iftaar kar letaa huu.n mai.n
ko.ii shai khaate hu.e mai.n ne chhupaa.ii hii nahii.n
aaj tak merii hu.ii roza-kushaa.ii hii nahii.n
roza-KHorii par mirii duniyaa ko hairaanii nahii.n
roza yuu.n rakkhaa nahii.n bijlii nahii.n paanii nahii.n
mai.n jo be-roza huu.n ye bhii tajiro.n kaa zarf hai
sau ruupe ujrat hai merii sau ruupe kaa barf hai
ruuh-afzaa ke binaa duniyaa kii huure.n rah ga.ii.n
roza-daaro.n ke liye suukhii khajuure.n rah ga.ii.n
roza yuu.n rakkhaa nahii.n ho jaa.egaa khaanaa KHaraab
lunch par aa.egii kal hotel me.n rashk-e-maahtaab
mai.n huu.n shaa.er mehrbaa.n hai mujh pe KHallaaq-e-azal
pesh karnii hai mujhe mahfil me.n ik taaza Gazal
ajr-e-roza kyaa hai ye shero.n me.n batlaa.uu.ngaa mai.n
lunch mai.n iftaar kii tashriih ban jaa.uu.ngaa mai.n
bhuuk aur shaa.er kaa chuu.n-kii cholii-daaman kaa hai saath
mujh se ba.Dh ke jaantaa hai kaun roza kii sifaat
pa.ndrah ghanTe kaa roza har javaan o piir kaa
shaam karnaa sub.h kaa laanaa hai juu-e-shiir kaa

Khalid Irfan
Nazm

chhuara dekhna

hai kisii tifl-e-muhaajir kii tarah sahmaa hu.aa
'KHaalid-e-irfaa.n' kii shaadii kaa chhu.aaraa dekhnaa

Khalid Irfan
Nazm

mahsus karna

mujhe hasrat hai
meraa nazm-karda falsafa tum ko samajh aa.e
tumhe.n ye falsafa baavar karaane ke liye mere sivaa aflaak se ab ko.ii bhii aadam nahii.n girnaa
tumhaare jism se mujh tak jo duurii hai
tumhe.n maaluum ho ye ek theory hai
aadam naam kaa dhabbaa
zamiin-o-aasmaa.n kaa faasla tai kar ke tum ko sirf itnaa bolne aayaa huu.n
sun lo
mujhe aa.nkho.n ke har viiraan sapne kii qasam hai
tumhaare jism kii taKHliiq ke dauraan jo miTTii bachii thii
usii miTTii se merii ruuh-e-pechiida banii hai
hariim-e-man
barahman naam kii uu.nchii pahaa.Dii se mohabbat naam kaa jharnaa nikalne tak
mujhe shuudar samajhnaa
agarche mai.n tumhaarii paak miTTii se banaa huu.n
mujhe tasviir karnaa
hinaa kii u.ngliyo.n par phuuTte ra.ngo.n se KHud me.n rang bharnaa muskuraanaa
aur mujh ko soch lenaa bhuul jaanaa
sivaa.e lams mai.n duniyaa ke har jazbe kii KHaalis shakl me.n tum ko miluu.ngaa
Dhuu.nDhnaa
ta.aviiz mat karnaa mujhe apne gale kaa
hamaare biich chhuu lene kii aasaanii nahii.n hai
hariim-e-jaan
mai.n aisaa sahiifa huu.n jo utraa huu.n tumhaare paak siine me.n
agar tum chaahtii ho mai.n amar ho jaa.uu.n to phir
mujhe mahsuus karnaa
saahilii miTTii se aadam zaat kii taKHliiq hone tak

Osama Khalid
Nazm

ishq-nama

'ishq hiiraa hai guhar hai to kabhii patthar hai
'ishq aaGaaz se anjaam talak rahbar hai
'ishq insaa.n ke liye besh-bahaa daulat hai
'ishq mil jaa.e jise us kii ba.Dii qismat hai
'ishq haivaan ko insaan banaa detaa hai
'ishq har kaam ko aasaan banaa detaa hai
'ishq kho jaa.e to insaan bikhar jaataa hai
'ishq mil jaa.e to shaitaan sa.nvar jaataa hai
'ishq andaaz-e-mohabbat kaa ka.nval hotaa hai
'ishq tahriir jo ban jaa.e Gazal hotaa hai
'ishq har tarah se pahchaan banaa letaa hai
'ishq kaa martaba duniyaa me.n bahut uu.nchaa hai
'ishq iimaan hai farmaan hai faizaan bhii hai
'ishq pahchaan hai miizaan hai nuqsaan bhii hai
'ishq mahruum hai mazluum hai masmuum bhii hai
'ishq kii saare zamaane me.n bahut dhuum bhii hai
'ishq tafsiil hai tashkiil hai tamsiil bhii hai
'ishq tashiil hai ta.amiil hai takmiil bhii hai
'ishq maa'buud hai maqsuud hai maujuud bhii hai
'ishq mahduud hai mahmuud hai mash.huud bhii hai
'ishq tamhiid hai taqliid hai tanqiid bhii hai
'ishq taa.iid hai tajdiid hai KHurshiid bhii hai
'ishq taalib bhii hai Gaalib bhii hai tahziib bhii hai
'ishq vaajib bhii hai raahib bhii hai tarGiib bhii hai
'ishq taqdiis hai aur baa.is-e-aGlaat bhii hai
'ishq afsos hai amraaz hai muhtaat bhii hai
'ishq se zaKHm jo mil jaa.e sa.nbhaale rakhiye
'ishq miT jaa.e to yaado.n ko ujaale rakhiye

Khalid Azmi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now