Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "gazanfar"

Nazm MATCHES FOR "gazanfar"

Nazm

kale safed paron wala parinda aur meri ek sham

din to u.D jaate hai.n
ye sab kaale par vaale bagule hai.n
jo ha.nste khelte lamho.n ko
apne pa.nkho.n me.n muu.nd ke aa.nkho.n se ojhal ho jaate hai.n
raahat jaise KHvaab hai aise insaano.n kaa
jin kii ummiido.n ke daaman me.n paivand lage hai.n
jaama ek taraf siite hai.n duusrii jaanib phaT jaataa hai
ye duniyaa lamha lamha jiitii hai
'maryam' ab kap.De setii hai
aa.nkho.n kii biinaa.ii saath nahii.n detii ab
aur 'Gazanfar'
jo ruumaal me.n laDDuu baa.ndh ke us ke ghar me.n phe.nkaa kartaa thaa
aur us kii aa.nkho.n kii tausiif me.n Gazle.n likhvaa kar laayaa kartaa thaa
us ne aur kahii.n shaadii kar lii hai
ab apnii lak.Dii kii Taal pe baiThaa
apnii kaj-raa.ii aur javaanii ke qisse dohraayaa kartaa hai
Taal se uTh kar jab ghar me.n aataa hai
beTii par qadGan rakhtaa hai
na.e zamaane kii aulaad ab vaisii nahii.n rah ga.ii
badkaarii ba.Dhtii jaatii hai
jo din biit ga.e kitne achchhe the!

Akhtarul Iman
Nazm

bahut KHub-surat hamara watan hai

bahut KHuubsuurat hamaaraa vatan hai
anokhaa hai sab se niraalaa vatan hai
sabhii rang ke phuul is me.n khile hai.n
bahishtii manaazir bhii is ko mile hai.n
kahii.n raat-raanii kii KHushbuu basii hai
kahii.n par chamelii kii nik.hat ghulii hai
kahii.n par dhanak saat-ra.ngii tanii hai
kahii.n nuur kii ko.ii chaadar bichhii hai
kisii samt me.n ko.ii dariyaa ravaa.n hai
kahii.n kohsaaro.n kaa dilkash samaa.n hai
kahii.n laal piile hare qumqume hai.n
kahii.n paaniyo.n me.n diye jal rahe hai.n
kahii.n paa.e jaamo.n me.n Topii kha.Dii hai
kahii.n paa.nv me.n ko.ii dhotii ba.ndhii hai
kahii.n suiT saa.Dii kii raunaq lagii hai
kahii.n ghaaghre kii ajab dilkashii hai
kisii kii hathelii pe meh.ndii rachii hai
kisii paa.nv me.n ko.ii laalii lagii hai
kisii sar pe baalo.n ke guchchhe bane hai.n
kahii.n baal pairo.n pe laTke hu.e hai.n
kahii.n saat rango.n kii pichkaariyaa.n hai.n
ki jin se badan-biich gul-kaariyaa.n hai.n
kahii.n ge.nd balle se lag kar hai u.Dtii
kahii.n ko.ii DanDe se gillii uchhaltii
zamii.n ko bichhaa.e ko.ii so rahaa hai
ka.ii KHvaab bhii nii.nd me.n bo rahaa hai
ko.ii paaniyo.n me.n chhalaa.nge.n lagaataa
KHalaa.o.n me.n ko.ii hai kartab dikhaataa
ko.ii saa.np ko apnaa saathii banaataa
use biin kii apnii dhun par nachaataa
ko.ii apne a.ngo.n kaa aasan lagaataa
ko.ii apne tan kaa tamaashaa dikhaataa
ko.ii apnii aa.nkho.n se man jiit.taa hai
adaa.o.n se duniyaa kaa dhan jiit.taa hai
jidhar dekhiye ik anokhaa samaa.n hai
udaasii me.n bhii zindagii shaadmaa.n hai
har ik tarah se ye niyaaraa vatan hai
bahut KHuubsuurat hamaaraa vatan hai

Ghazanfar
Nazm

patthar

mai.n ik ma.asuum shahrii thaa
sharaafat se sabhii ke saath rahtaa thaa
mohazzab taur se jiitaa thaa
sab ke kaam aataa thaa
kabhii mai.n ne kisii kaa dil nahii.n to.Daa
kisii kaa sar nahii.n pho.Daa
kisii tarkash se ko.ii tiir kyaa tinkaa nahii.n chho.Daa
kisii kii piiTh me.n KHanjar nahii.n bho.nkaa
kisii ke jism par baaruud kaa golaa nahii.n phe.nkaa
kisii ko aag me.n mai.n ne nahii.n jho.nkaa
kisii kaa haq nahii.n maaraa
kisii kaa zar nahii.n luuTaa
ko.ii KHirman nahii.n phuu.nkaa
kisii building kisii gaa.Dii kisii mahfil me.n ko.ii bam nahii.n rakkhaa
mire haatho.n kisii kaa ghar nahii.n uj.Daa
kisii kaa dar nahii.n ukh.Daa
ko.ii kumba nahii.n bikhraa
ko.ii maathaa nahii.n siku.Daa
kisii kii raah me.n ro.Daa nahii.n aTkaa
kisii ke kaam me.n mai.n ne kabhii raKHna nahii.n Daalaa
kisii ke vaaste dil me.n kabhii kiina nahii.n paalaa
ko.ii farmaan haakim kaa kabhii mai.n ne nahii.n Taalaa
ko.ii gheraa nahii.n laa.nghaa
ko.ii aa.ngan nahii.n phaa.ndaa
magar phir bhii qayaamat mujh pe TuuTii hai
ajab Gaarat-garii kaa qahr barsaa hai
ajab saffaak KHanjar dil me.n utraa hai
ki merii ruuh ab tak tilmilaatii hai
ki meraa zehn ab bhii jhunjhunaataa hai
ki merii saa.ns ab bhii la.Dkha.Daatii hai
samajh me.n kuchh nahii.n aataa
ki mai.n ne kyaa bigaa.Daa hai
mire kis jurm kii mujh ko milii hai
ye sazaa aaKHir
ye gutthii kis tarah kholuu.n
sabab kis se yahaa.n puuchhuu.n
kidhar jaa.uu.n
kise rokuu.n
sabhii chehre yahaa.n patthar
sabhii aa.nkhe.n yahaa.n patthar
basaarat me.n bharaa patthar
samaa.at me.n basaa patthar
zabaano.n me.n ga.Daa patthar
adaalat me.n kha.Daa patthar
har ik qaanuun me.n patthar
har ik aa.iin me.n patthar
har ik insaaf me.n patthar
har ik aavaaz me.n patthar
har ik ehsaas me.n patthar
ye patthar yug ke patthar se bhii bhaarii hai
nagiine kii tarah tarshaa hu.aa hai
aur hiire kii anii kii tarah us kii tez noke.n hai.n
bahut shaffaaf hai ye aur is me.n ik tamaddun hai
mai.n is patthar se sar pho.Duu.n
ki apnii zindagii chho.Duu.n
ki apnaa raasta mo.Duu.n
ki ban jaa.uu.n mai.n KHud patthar
samajh me.n kuchh nahii.n aataa

Ghazanfar
Nazm

insha

kabhii khul ke jab khilkhilaatii hai inshaa
fazaa.o.n me.n sargam bajaatii hai inshaa
har ik lab pe titlii biThaatii hai inshaa
jha.Dii qahqaho.n kii lagaatii hai inshaa
masarrat kii duniyaa basaatii hai inshaa
mire ghar ko jannat banaatii hai inshaa
kabhii maaysha ko ha.nsaatii hai inshaa
kabhii maaysha ko rulaatii hai inshaa
kabhii paas us ko bulaatii hai inshaa
kabhii duur us ko bhagaatii hai inshaa
bahan se to kasrat karaatii hai inshaa
mire ghar ko jannat banaatii hai inshaa
kahaanii sunaatii hai naanii ko inshaa
adaa.e.n dikhaatii hai naanii ko inshaa
masarrat dilaatii hai naanii ko inshaa
divaana banaatii hai naanii ko inshaa
javaanii bu.Dhaape me.n laatii hai inshaa
mire ghar ko jannat banaatii hai inshaa
kabhii Dhuu.nD laatii hai naanuu kaa chashma
kabhii phe.nk aatii hai naanuu kaa chashma
kabhii KHud lagaatii hai naanuu kaa chashma
kahii.n se bhii paatii hai naanuu kaa chashma
to aavaaz fauran lagaatii hai inshaa
mire ghar ko jannat banaatii hai inshaa
mobile par is tarah u.nglii ghumaa.e
ki jaise ko.ii shaKHs jaaduu chalaa.e
mobile ke parde pe hairat ugaa.e
hazaaro.n tarah ke karishme dikhaa.e
dikhaa kar karishme rijhaatii hai inshaa
mire ghar ko jannat banaatii hai inshaa
kabhii ko.ii khaane kaa manzar dikhaa.e
kabhii apnii u.nglii se pizza banaa.e
kabhii to mazedaar murGaa pakaa.e
salaado.n se khaane kii thaalii sajaa.e
kabhii chaa.e kaafii pilaatii hai inshaa
mire ghar ko jannat banaatii hai inshaa
falak paas jaa kar kabhii muskuraatii
kabhii chhe.Dtii to kabhii gudgudaatii
mahak ko kabhii apnaa kartab dikhaatii
kabhii baby nannaa ko poem sunaatii
har ik aadmii ko lubhaatii hai inshaa
mire ghar ko jannat banaatii hai inshaa
malaahat me.n is kii chamak hai Gazab kii
saraape me.n is ke lachak hai Gazab kii
sadaa.o.n me.n is kii khanak hai Gazab kii
adaa.o.n me.n is kii chahak hai Gazab kii
Gazab kaa nazaaraa dikhaatii hai inshaa
mire ghar ko jannat banaatii hai inshaa
chahetii kisii kii kisii kii dulaarii
kisii ko lage saare duniyaa se nyaarii
kisii ko ho mahsuus phuulo.n se bhaarii
sunny ko to hai jaan-o-dil se bhii pyaarii
bahut aamna ko bhii bhaatii hai inshaa
mire ghar ko jannat banaatii hai inshaa
mobile pe abbaa ko dekhe to Dole
chahak kar lapak kar zabaa.n apnii khole
masarrat se labrez alfaaz bole
shahd kaan me.n apne abbaa ke ghole
qatar tak mohabbat luTaatii hai inshaa
mire ghar ko jannat banaatii hai inshaa
mobile pe farhaan KHaa.n kii zabaanii
har ik raat suntii hai vo ik kahaanii
kahaanii me.n aatii hai jab ko.ii raanii
to bachchii se ban jaatii hai vo siyaanii
bahut daad abbaa se paatii hai inshaa
mire ghar ko jannat banaatii hai inshaa
kabhii apne gho.De se bhau.n bhau.n karaa.e
kabhii sher chiite ko bakrii banaa.e
kabhii sar pe billii ke haathii biThaa.e
kabhii doremon ko bhii paTTii pa.Dhaaye
anokhe tamaashe dikhaatii hai inshaa
mire ghar ko jannat banaatii hai inshaa
magar khaane piine se jii hai churaatii
zaraa der me.n mu.nh me.n luqma giraatii
bahut apnii ammaa.n se kasrat karaatii
kabhii naach tig.Dii kaa bhii vo nachaatii
khilaane me.n paagal banaatii hai inshaa
mire ghar ko jannat banaatii hai inshaa

Ghazanfar
Nazm

maysha

chain hai KHvaab hai kahaanii hai
maaysha merii zindagaanii hai
har taraf is se shaadmaanii hai
har nazaare kaa rang dhaanii hai
rang me.n ruup me.n nazaakat me.n
sab me.n pariyo.n kii vo to raanii hai
us kii aa.nkho.n se nuur chhantaa hai
us ke ho.nTo.n pe gul-fishaanii hai
aisii naazuk ki pankhu.Dii bhii nahii.n
phuul ko.ii vo daastaanii hai
mustaqil baam-o-dar mahakte hai.n
vo mire ghar kii raat-raanii hai
us kii ma.asuum muskuraahaT me.n
kuchh farishto.n kii bhii nishaanii hai
naGmagii jism-o-jaa.n me.n ghul jaa.e
aisii ho.nTo.n pe KHush-bayaanii hai
aisaa gul-kaariyo.n me.n jaaduu hai
aag bhii jis ke dam se paanii hai
hech maKHmal hai jild ke aage
rang bhii rashk-e-arGavaanii hai
us ke talvo.n ke lams me.n bhii ajab
nasha-e-kaif-e-jaavedaanii hai
us se har aa.nkh me.n basaarat hai
us se har dil me.n shaadmaanii hai
us ke hone se mere aa.ngan me.n
tapish-e-dhuup bhii suhaanii hai
be-zarar be-zabaan hai lekin
har taraf us kii hukmraanii hai
baap qurbaan maa.n fidaa us par
aur naanii to bas diivaanii hai
daadaa daadii ke dil kii dha.Dkan hai
sunny maamuu.n kii jaan-e-jaanii hai
shaahida ho.n ki baby baajii huu.n
har ko.ii us parii kii naanii hai
faKHr in.aam kii chahetii hai
salluu shaadaab kii bhii raanii hai
dil mahak kaa chahak rahaa us se
lab pe safiya ke lan-taraanii hai
bin bulaa.e hame.n bulaatii hai
vo to gu.Diyaa ajab siyaanii hai
ai 'Gazanfar' bataa ki mahfil me.n
kyaa ko.ii maaysha kaa saanii hai

Ghazanfar
Nazm

duri

ammii abbaa kaise hai.n
Te.Dhe hai.n yaa siidhe hai.n
gum-sum rahne vaale hai.n
baate.n karne vaale hai.n
zehn-o-dil ke kaise hai.n
garm hai.n yaa phir ThanDe hai.n
pyaar luTaane vaale hai.n
aa.nkh dikhaane vaale hai.n
naaz uThaane vaale hai.n
Daa.nT pilaane vaale hai.n
dillii me.n kyo.n rahte hai.n
dillii me.n kyaa karte hai.n
khaanaa kaun banaataa hai
un ko kaun khilaataa hai
kin se baate.n karte hai.n
kin kii baate.n sunte hai.n
tanhaa kaise rahte hai.n
tanhaa.ii kyo.n sahte hai.n
kyo.n sunday me.n aate hai.n
uncle jaise lagte hai.n
sunday me.n bhii sote hai.n
chhuTTii ko bhii khote hai.n
ammii un se bolo naa
ho.nT zaraa tum kholo naa
bolo un se paas rahe.n
ham se bhii kuchh baat kare.n
ham logo.n kaa haal sune.n
apnii ko.ii baat kahe.n
bolo naa ki chust rahe.n
aise bhii na sust rahe.n
ham ko le kar shahr chale.n
ghuume.n phire.n aur mauj kare.n
ham me.n kaisii duurii hai
ye kaisii majbuurii hai

Ghazanfar
Nazm

amn ka Damru Dam Dam Dam

aman kaa Damruu Dam Dam Dam
chain kii Dholak Dham Dham Dham
aa.o bajaa.e.n tum aur ham
jhuume.n naache.n chham chham chham
jab tak apne dam me.n dam
des ye chamke cham cham cham
golii golaa aur na bam
aa.nsuu aah na dard-o-alam
dahshat KHauf na ko.ii Gam
KHushiyaa.n barse.n jham jham jham
jhuum ke gaa.e.n ram pam pam
des ye chamke cham cham cham
gautam kii ta.abiir hai.n ham
KHvaaja kii tafsiir hai.n ham
naanak kii tasviir hai.n ham
gaa.ndhii jii kii jaagiir hai.n ham
ham se amn-o-amaa.n kaa dam
des ye chamke cham cham cham
sukh dukh sab me.n saathii ham
baa.nTe.n KHushiyaa.n baa.nTe.n Gam
kabhii na ko.ii aa.nkh ho nam
ham ik ik ke hai.n ham-dam
ham se KHushiyo.n kii jham jham
des ye chamke cham cham cham
aisaa ko.ii kaam kare.n
jag me.n is ko aam kare.n
mehnat sub.h-o-shaam kare.n
duniyaa bhar me.n naam kare.n
apnaa uu.nchaa ho parcham
des ye chamke cham cham cham
maulaa teraa rahm-o-karam
is dhartii par ho har dam
rahe hamesha miTTii nam
phuul khilaa.e har mausam
saa.nse.n mahke.n chahke dam
des ye chamke cham cham cham
har chehre par phuul khile
har maathe par chaa.nd uge
aa.nkh me.n ik ik diip jale
ik ik lab par giit saje
Dhal jaa.e har shaam-e-Gam
des ye chamke cham cham cham
nafrat kii diivaar gire
raste se banduuq haTe
kiina ranjish bair miTe
dahshat kaa har shor thame
ruk jaa.e ye dham dham dham
des ye chamke cham cham cham

Ghazanfar
Nazm

maha-bhaarat

bin-laaden
toraa-boraa me.n hotaa
to aisii mahsharii maar
jis se
pahaa.D surma ban ga.e
zamiin raakh ho ga.ii
aasmaan siyaah pa.D gayaa
kab kaa KHatm ho chukaa hotaa
magar kurra-e-arz par jagah jagah
haibatnaak aatishii.n phu.nkaare.n
karbnaak dil-doz chiiKHe.n
is haqiiqat kii Gammaaz hai.n
ki bin-laaden
miraa nahii.n
zinda hai
ye phu.nkaare.n aur chiiKHe.n
is baat kii bhii daliil hai.n
ki laaden
toraa-boraa ke alaava
duusre KHitto.n me.n bhii maujuud hai
savaal ye hai ki
laaden KHatm kyuu.n nahii.n hu.aa
kyaa vo vaaqa.ii itnaa zabardast hai
ki saare jahaan kii majmuu.ii taaqat bhii
us ke aage hech hai
kyaa us ne aab-e-hayaat pii lii hai
ki kabhii mar nahii.n saktaa
kyaa vo qafas bin gayaa hai
ki apnii KHaakistar se phir paidaa ho jaataa hai
kyaa vo shud sikandarii hai
ki yaajuuj-maajuuj kii zabaane.n
use puurii tarah chaaT nahii.n paatii.n
kyaa vo raavan hai
ki us kaa ek sar afghanistan me.n
to baaqii nau duusre jahaa.n me.n
aur kyaa us ne ko.ii vardaan paa liyaa hai
ki sar kaT kar phir dha.D se aa lagtaa hai
kyaa vo bhisham-pitaama hai
ki apnii achchhaa ke baGair mar nahii.n saktaa
kyaa us ne apnaa clone banaa liyaa hai
ki us kaa KHaatma naa-mumkin ho gayaa hai
savaal ye bhii hai
ki miizaa.ilo.n kaa nishaana chuuk kyuu.n jaataa hai
kyaa un ke purze Dhiile hai.n
ki vo apnaa tavaazun kho baiThtii hai.n
be-samtii kaa shikaar ho jaatii hai.n
kyaa vo andhii hai.n
ki bin-laaden ko dekh nahii.n paatii.n
kyaa un kii biinaa.ii kamzor hai
ki vo laaden aur Gair-laaden me.n tamiiz nahii.n kar paatii.n
bin laaden ko.ii sach to nahii.n
ki shakunii kii chaal us ke aage naakaam ho jaa.e
vo laakshaa girah se bach kar nikal jaa.e
agyaat-bass se vaapas aa jaa.e
us kaa chiir-haran na ho sake
tiiro.n kii shayyaa par zinda rah jaa.e
kahii.n aisaa to nahii.n
ki missile.n use maarnaa hii nahii.n chaahatii.n
agar aisaa hai
to ye mahsharii maar
kis ke liye
ye musalsal yalGaar
kyuu.n
hairaan-o-pareshaan arjun
krukshetra me.n chiiKHtaa phir rahaa hai
magar aaj kii mahaa-bhaarat me.n
in savaalo.n kaa javaab dene vaalaa
ko.ii kirshn nahii.n
ko.ii kirshn nahii.n

Ghazanfar
Nazm

nae aadmi ka confession

kabhii ye bhii KHvaahish pareshaan kartii hai mujh ko
ki mai.n apne bhiitar ke mai.n ko nikaaluu.n
magar mere mai.n kii to suurat bahut hii burii hai
KHabaasat kaa ambaar jis me.n nihaa.n hai
saraafa se jis kii karaahat ayaa.n hai
jabii.n par KHatarnaak socho.n ke jangal uge hai.n
bhayaanak iraado.n ke vahshii chhupe hai.n
nigaaho.n me.n jis kii havasnaakiyo.n ke manaazir bhare hai.n
manaazir bhii aise ki jin me.n
zinaa aise logo.n ke hamraah karne ko sochaa gayaa hai
badan jin ke jinsii buluuGat ko pahu.nche nahii.n hai.n
yaa vo jo buluuGat kii saarii kashish kho chuke hai.n
yaa vo jin se ko.ii muqaddas saa rishta ju.Daa hai
mire mai.n kii suurat burii hai
ki dandaa.n darindo.n kii suurat
kisii sahme simTe ku.nvaare badan me.n ga.De hai.n
ki maatam-kade me.n bhii aa.nkhe.n kisii jism kii burjiyo.n par Tikii hai.n
ki biivii baGal me.n magar zehn me.n aur hii ko.ii tan-man khilaa hai
ki paglii bhikaaran ke tan aur andhe bhikaarii ke kashkol par bhii nazar hai
burii hai bahut hii burii hai
ki dil me.n a.izzaa kii amvaat kii KHvaahishe.n bhii dabii hai.n
ka.ii be-gunah gardane.n u.ngliyo.n me.n pha.nsii hai.n
ki lafz-e-ayaadat me.n biimaar kii maut kii bhii du.aa hai
burii hai burii hai
ki ahbaab kii jiit par dil dukhii hai
ki aulaad kii bartarii se chubhan hai
ki bhaa.ii ke raushan jahaa.n se jabii.n par shikan hai
burii hai burii hai
ki jo paaltaa hai usii kii nafii hai
ki jo puujtaa hai usii se daGaa hai
ajab uuba.D-khaaba.D sii mai.n kii zamii.n hai
ki us me.n kahii.n bhii tavaazun nahii.n hai
kisii bhii tarah kaa tanaasub nahii.n hai
jahaa.n chaahiye hausla buzdilii hai
jahaa.n raastii kii zaruurat kajii hai
jahaa.n chaahiye aman Gaarat-garii hai
jahaa.n chaahiye qurb vaa.n faasla hai
jahaa.n sulh-e-kul chaahiye garmiyaa.n sardiyaa.n hai.n
agar mere mai.n kii ye suurat mire KHol kii baahar sat.h par aa ga.ii
to zamaana mujhe kyaa kahegaa
yahii soch kar apnii is aarzuu ke badan me.n
tabar bhau.nk detaa huu.n aksar
magar ye tamannaa
ki mai.n apne bhiitar ke mai.n ko nikaaluu.n
mire dil me.n rah rah ke kyuu.n jaagtii hai
sabab us kaa ye to nahii.n hai
ki mai.n apne andar kii shaffaaf makruuh suurat dikhaa kar
zamaane kii aa.nkho.n me.n KHud ko ba.Daa dekhnaa chaahtaa huu.n
yaa ye ki musalsal sharaafat ke naaTak se ta.ng aa chukaa huu.n
yaa phir ye ki ab
baaharii shakl-o-suurat me.n merii
kashish ko.ii
baaqii
nahii.n hai

Ghazanfar
Nazm

hijrat

vo aaGosh jis me.n pale
aur pal kar javaa.n ham hu.e hai.n
use chho.Dne kii tadaabiir karne me.n masruuf aise hu.e hai.n
ki zindaa.n se qaidii rihaa.ii kii raaho.n kii
ta.amiir karne me.n mashGuul hote hai.n jaise
vo aaGosh jis me.n javaa.n ham hu.e hai.n
use chho.D kar duur jaane ke ehsaas se
jo KHushii mil rahii hai
kisii bhii tarah is se kamtar nahii.n hai
jo zindaa.n se baahar nikalne me.n mahsuus hotii hai zindaaniyo.n ko
KHush kaa ye ehsaas
aisaa nahii.n ki faqat ek ham tak hii mahduud ho
ye KHushii ghar ke diivaar-o-dar me.n bhii ghar kar ga.ii hai
maa.n bahan baap bhaa.ii bhii gardan uThaa.e hu.e
apne ham-saayo.n se kahte phirte nazar aa rahe hai.n
ki meraa qamar bhii arab jaa rahaa hai
shariik-e-safar kii rago.n me.n bhii KHushiyaa.n uchhalne lagii hai.n
vo raato.n kii sab lazzate.n bhuul kar
jaane vaale kii taiyaariyo.n me.n
ba.De chaav se munhamik ho ga.ii hai
ajab jaa.n-fizaa hai ye hijrat kaa manzar
magar ye rivaayat hai
makke se yasrib ko jaate hu.e
mustafaa aur saare sahaabii bahut ro rahe the
vatan kii mohabbat inhe.n roktii thii
judaa.ii jigar me.n tabar bhau.nktii thii
vo hijrat kaa manzar ba.Daa jaa.n-gusil thaa
magar aaj hijrat kaa manzar badal saa gayaa hai
ye manzar to sach-much ba.Daa jaa.n-fizaa hai
magar aisaa kyuu.n hu.aa hai
yahaa.n to mazaalim kii vo saKHtiyaa.n bhii nahii.n hai.n

Ghazanfar
Nazm

jadu ki Dibiya

suno chunnuu munnuu mire paas aa.o
shakiila jamiila ko bhii saath laa.o
ye dekho mire paas kyaa aa ga.ii hai
ye chhoTii sii Dibiyaa ba.De kaam kii hai
ye Dibiyaa nahii.n mantaro.n kii chha.Dii hai
suno is me.n jaaduu kii pu.Diyaa pa.Dii hai
ise jab ghumaav to duniyaa ghumaa.e
ye ghar baiThe baiThe siyaahat karaa.e
ise khaTkhaTaa.o to ghu.nghaT uThaa.e
hame.n chaa.nd sii apnii suurat dikhaa.e
ise jab dabaa.o to ye gungunaa.e
anokhe niraale dhuno.n ko sunaa.e
binaa kuchh dabaa.e bhii ye boltii hai
binaa kuchh hilaa.e bhii to Doltii hai
zaruurat ho jis kii ise ye bulaa de
bulaa kar use ham se baate.n karaa de
hame.n apne bichh.Do.n se ham ko milaa de
hamaare dilo.n me.n mohabbat jagaa de
ye chaahe to jis se bhii jis ko milaa de
kisii ko kisii se bhii chaahe bhi.Daa de
kabhii ajnabii ko bhii saathii banaa de
kabhii dost ko bhii ye dushman banaa de
kabhii jo sharaarat ye karne pe aa.e
to chaahe jise raat din ye sataa.e
tilismii fazaa.e.n bhii is me.n chhupii hai.n
hazaaro.n balaa.e.n bhii is me.n dabii hai.n
kabhii to ye duniyaa kaa naqsha ubhaare
kabhii aasmaa.n ko zamii.n par utaare
kahaa.n kyaa hu.aa saaraa qissa sunaa.e
yahaa.n kaa vahaa.n kaa tamaasha dikhaa.e
ye mashriq ko maGrib se pal me.n milaa.e
bas ik aan me.n duuriyo.n ko miTaa.e
ye photo bhii to baiThe baiThe utaare
hamaare bhii chehre kaa naqsha ubhaare
ye dekho tumhaaraa bhii photo khi.nchaa hai
tumhaare bhii chehro.n kaa naqsha banaa hai
nahii.n vaqt kaa sirf chakkar chalaa.e
ye Dibiyaa to taariiKH din bhii bataa.e
alarm bhii to raat me.n ye bajaa.e
hame.n vaqt par Gaflato.n se jagaa.e
mire dil me.n kyaa hai ise ye KHabar hai
mire dil ke andar bhii is kii nazar hai
ilah-diin kaa ye diyaa to nahii.n hai
ki is me.n bhii to ko.ii jin saa basaa hai
ki jab bhii bulaa.o to dekho kha.Daa hai
jo shai chaahiye is se haazir kiyaa hai
chha.Dii kii jha.Dii dekh bachche ye bole
bahut der ke baad mu.nh apnaa khole
ye Dibiyaa to sach-much ba.De kaam kii hai
hame.n bhii bataa.o kahaa.n se milii hai
bataa.o ki is kaa ko.ii naam bhii hai
free me.n milii hai yaa kuchh daam bhii hai

Ghazanfar
Nazm

gandum ki baaliyan

bhuuk se bharii aa.nkhe.n
aasmaan kii jaanib
tak rahii hai.n dhartii se
ik hasiin rocket ko
jis ke surKH parcham par
baaliyaa.n hai.n gandum kii
bhuuk se bharii aa.nkhe.n
jaantii nahii.n lekin
baaliyaa.n to gehuu.n kii
KHushnumaa bahaane hai.n
chamchamaate KHosho.n me.n
zahr-naak daane hai.n
surKH surKH daano.n me.n
itemi balaa.e.n hai.n
jaa.n-gusil davaa.e.n hai.n

Ghazanfar
Nazm

aarzu

Dham Dham Dham Dham Dholak baaje
chham-chham chham-chham bhaaluu naache
Thumak Thumak kar maadho naache
maTak maTak kar raaghav naache
chhoTaa bhayyaa bhuTTuu naache
har pinjre kaa miTThuu naache
suu.nD uThaa kar haathii naache
haathii kaa har saathii naache
hin hin kar ke gho.Daa naache
gho.De kaa har jo.Daa naache
bhaabhii naache bhayyaa naache
taataa taataa thayyaa naache
goraa naache kaalaa naache
mastii me.n dil vaalaa naache
ghu.nghruu chhan-chhan chhan-chhan naache
chuu.Dii naache ka.ngan naache
nannhii bhii to paa.el baa.ndhe
apne nanhe paa.nv ko saadhe
maTak maTak kar chham-chham naache
paa.nv paTak kar dham dham naache
aisaa ko.ii mausam aa.e
mastii me.n har man lahraa.e

Ghazanfar
Nazm

bataKH ka bachcha

bataKH kaa ik bachcha pak.De
aa.ngan se ik billii bhaagii
billii piichhe kuttaa dau.Daa
chunnuu munnuu guDDuu pappuu
kalluu salluu saare bachche
ballaa le kar piichhe dau.De
saath me.n dau.De.n shanno appii
guDDaa guDDii le kar apne
nannhii munnii chunnii dau.Dii
abbaa dau.De ammii dau.Dii.n
dau.De Dabbuu chachchaa bhii
achhan bhaa.ii kallan bhaa.ii
chuTTan bhaa.ii mannan bhaa.ii
piichhe piichhe vo bhii dau.De
billii ruk kar Gurraa.ii
sher kii KHaala lahraa.ii
aa.nkhe.n apnii chamkaa.ii.n
niilii tope.n damkaa.ii.n
himmat sab kii tharraa.ii
suurat ik ik murjhaa.ii
kuttaa dum dabaa kar bhaagaa
billii se ghabraa kar bhaagaa
dekh ye manzar sab ghabraa.e
battaKH ko ab kaun bachaa.e

Ghazanfar
Nazm

zawal

kal talak jo dhartii par
sar-buland parcham thaa
aaftaab kii suurat
ra.ng jis ke chehre kaa
duur tak chamaktaa thaa
aaj us se lipTii hai.n
TiDDiyaa.n havaa.o.n kii
surKHiyo.n ke sho.alo.n ko
le rahii hai.n narGe me.n
badliyaa.n fazaa.o.n kii
'marx'-jii ke putle par
baiThaa kaalaa kavvaa ek
beat karne vaalaa hai
paas hii me.n na.ara ek
inqalaab zindaabaad
guu.njtaa hai rah rah kar

Ghazanfar
Nazm

ek hindostani ki munajat

dilo.n me.n hamaare mohabbat jagaa de
rag-o-pai se nafrat kaa jazba miTaa de
KHudaayaa sabaq ektaa kaa pa.Dhaa de
hame.n aaj phir bhaa.ii bhaa.ii banaa de
ki aasaan ho jaa.e jiinaa hamaaraa
nigaaho.n me.n chamke sukuu.n kaa sitaara
har ik samt me.n aaj halchal machii hai
kahii.n bekalii hai kahii.n khalbalii hai
kahii.n aag diivaar-o-dar me.n lagii hai
kisii ghar kii buniyaad me.n thartharii hai
hu.aa hai sukuu.n kaa samaa.n paara-paara
sharaarat kaa sulgaa hu.aa hai sharaara
sharaarat ke sho.alo.n ko ko.ii bujhaa.e
junuunii dimaaGo.n ko ankush lagaa.e
ahinsaa kii pothii ko.ii phir pa.Dhaaye
tashaddud ke haatho.n se ham ko bachaa.e
jalaa.e na ab ko.ii bastii dobaara
na chhiine ko.ii zindagii kaa sahaaraa
hame.n phir ye ehsaas ko.ii dilaa.e
ko.ii Thiik se ye haqiiqat bataa.e
nahii.n farq ra.ngo.n me.n kuchh bhii dikhaa.e
lahuu ek kaa duusre se milaa.e
dikhaa.e ki dono.n kaa hai ek dhaaraa
bataa.e ki dono.n kaa hai ik nazaara

Ghazanfar
Nazm

dharti

dhartii kitnii achchhii hai
dhartii kitnii pyaarii hai
dhartii pe.D ugaatii hai
dhartii phuul khilaatii hai
dhartii rang banaatii hai
dhartii nuur luTaatii hai
dhartii kitnii achchhii hai
dhartii kitnii pyaarii hai
dhartii sab ko paanii de
chehra sab ko dhaanii de
sab ko josh javaanii de
KHuu.n me.n mast ravaanii de
dhartii kitnii achchhii hai
dhartii kitnii pyaarii hai
dhartii Thor Thikaana de
dhartii sab ko daana de
mausam sabz suhaanaa de
sukh kaa ek KHazaana de
dhartii kitnii achchhii hai
dhartii kitnii pyaarii hai

Ghazanfar
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now