Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "gosh"

Nazm MATCHES FOR "gosh"

Nazm

shikwa

kyuu.n ziyaa.n-kaar banuu.n suud-faraamosh rahuu.n
fikr-e-fardaa na karuu.n mahv-e-Gam-e-dosh rahuu.n
naale bulbul ke sunuu.n aur hama-tan gosh rahuu.n
ham-navaa mai.n bhii ko.ii gul huu.n ki KHaamosh rahuu.n
jur.at-aamoz mirii taab-e-suKHan hai mujh ko
shikva allaah se KHaakam-ba-dahan hai mujh ko
hai bajaa sheva-e-tasliim me.n mash.huur hai.n ham
qissa-e-dard sunaate hai.n ki majbuur hai.n ham
saaz KHaamosh hai.n fariyaad se maamuur hai.n ham
naala aataa hai agar lab pe to ma.azuur hai.n ham
ai KHudaa shikva-e-arbaab-e-vafaa bhii sun le
KHuugar-e-hamd se tho.Daa saa gila bhii sun le
thii to maujuud azal se hii tirii zaat-e-qadiim
phuul thaa zeb-e-chaman par na pareshaa.n thii shamiim
shart insaaf hai ai saahib-e-altaaf-e-amiim
buu-e-gul phailtii kis tarah jo hotii na nasiim
ham ko jam.iiyat-e-KHaatir ye pareshaanii thii
varna ummat tire mahbuub kii diivaanii thii
ham se pahle thaa ajab tere jahaa.n kaa manzar
kahii.n masjuud the patthar kahii.n ma.abuud shajar
KHuugar-e-paikar-e-mahsuus thii insaa.n kii nazar
maantaa phir ko.ii an-dekhe KHudaa ko kyuu.nkar
tujh ko ma.aluum hai letaa thaa ko.ii naam tiraa
quvvat-e-baazu-e-muslim ne kiyaa kaam tiraa
bas rahe the yahii.n saljuuq bhii tuuraanii bhii
ahl-e-chii.n chiin me.n iiraan me.n saasaanii bhii
isii maamuure me.n aabaad the yuunaanii bhii
isii duniyaa me.n yahuudii bhii the nasraanii bhii
par tire naam pe talvaar uThaa.ii kis ne
baat jo big.Dii hu.ii thii vo banaa.ii kis ne
the hamii.n ek tire maarka-aaraa.o.n me.n
KHushkiyo.n me.n kabhii la.Dte kabhii dariyaa.o.n me.n
dii.n azaane.n kabhii europe ke kaliisaa.o.n me.n
kabhii africa ke tapte hu.e sahraa.o.n me.n
shaan aa.nkho.n me.n na jachtii thii jahaa.n-daaro.n kii
kalma pa.Dhte the hamii.n chhaa.nv me.n talvaaro.n kii
ham jo jiite the to jango.n kii musiibat ke liye
aur marte the tire naam kii azmat ke liye
thii na kuchh teGzanii apnii hukuumat ke liye
sar-ba-kaf phirte the kyaa dahr me.n daulat ke liye
qaum apnii jo zar-o-maal-e-jahaa.n par martii
but-faroshii ke evaz but-shikanii kyuu.n kartii
Tal na sakte the agar jang me.n a.D jaate the
paa.nv shero.n ke bhii maidaa.n se ukha.D jaate the
tujh se sarkash hu.aa ko.ii to biga.D jaate the
teG kyaa chiiz hai ham top se la.D jaate the
naqsh-e-tauhiid kaa har dil pe biThaayaa ham ne
zer-e-KHanjar bhii ye paiGaam sunaayaa ham ne
tuu hii kah de ki ukhaa.Daa dar-e-KHaibar kis ne
shahr qaisar kaa jo thaa us ko kiyaa sar kis ne
to.De maKHluuq KHudaa-vando.n ke paikar kis ne
kaaT kar rakh diye kuffaar ke lashkar kis ne
kis ne ThanDaa kiyaa aatish-kada-e-iiraa.n ko
kis ne phir zinda kiyaa tazkira-e-yazdaa.n ko
kaun sii qaum faqat terii talabgaar hu.ii
aur tere liye zahmat-kash-e-paikaar hu.ii
kis kii shamshiir jahaa.ngiir jahaa.n-daar hu.ii
kis kii takbiir se duniyaa tirii bedaar hu.ii
kis kii haibat se sanam sahme hu.e rahte the
mu.nh ke bal gir ke huu-allahu-ahad kahte the
aa gayaa ain la.Daa.ii me.n agar vaqt-e-namaaz
qibla-ruu ho ke zamii.n-bos hu.ii qaum-e-hijaaz
ek hii saf me.n kha.De ho ga.e mahmuud o ayaaz
na ko.ii banda rahaa aur na ko.ii banda-navaaz
banda o saahab o mohtaaj o Ganii ek hu.e
terii sarkaar me.n pahu.nche to sabhii ek hu.e
mahfil-e-kaun-o-makaa.n me.n sahar o shaam phire
mai-e-tauhiid ko le kar sifat-e-jaam phire
koh me.n dasht me.n le kar tiraa paiGaam phire
aur ma.aluum hai tujh ko kabhii naakaam phire
dasht to dasht hai.n dariyaa bhii na chho.De ham ne
bahr-e-zulmaat me.n dau.Daa diye gho.De ham ne
safha-e-dahr se baatil ko miTaayaa ham ne
nau-e-insaa.n ko Gulaamii se chhu.Daayaa ham ne
tere ka.abe ko jabiino.n se basaayaa ham ne
tere qur.aan ko siino.n se lagaayaa ham ne
phir bhii ham se ye gila hai ki vafaadaar nahii.n
ham vafaadaar nahii.n tuu bhii to dildaar nahii.n
ummate.n aur bhii hai.n un me.n gunahgaar bhii hai.n
ijz vaale bhii hai.n mast-e-mai-e-pindaar bhii hai.n
un me.n kaahil bhii hai.n Gaafil bhii hai.n hushyaar bhii hai.n
saik.Do.n hai.n ki tire naam se be-zaar bhii hai.n
rahmate.n hai.n tirii aGyaar ke kaashaano.n par
barq girtii hai to bechaare musalmaano.n par
but sanam-KHaano.n me.n kahte hai.n musalmaan ga.e
hai KHushii un ko ki ka.abe ke nigahbaan ga.e
manzil-e-dahr se uu.nTo.n ke hudii-KHvaan ga.e
apnii baGlo.n me.n dabaa.e hu.e qur.aan ga.e
KHanda-zan kufr hai ehsaas tujhe hai ki nahii.n
apnii tauhiid kaa kuchh paas tujhe hai ki nahii.n
ye shikaayat nahii.n hai.n un ke KHazaane maamuur
nahii.n mahfil me.n jinhe.n baat bhii karne kaa shu.uur
qahr to ye hai ki kaafir ko mile.n huur o qusuur
aur bechaare musalmaa.n ko faqat vaada-e-huur
ab vo altaaf nahii.n ham pe inaayaat nahii.n
baat ye kyaa hai ki pahlii sii mudaaraat nahii.n
kyuu.n musalmaano.n me.n hai daulat-e-duniyaa naayaab
terii qudrat to hai vo jis kii na had hai na hisaab
tuu jo chaahe to uThe siina-e-sahraa se habaab
rah-rav-e-dasht ho sailii-zada-e-mauj-e-saraab
taan-e-aGyaar hai rusvaa.ii hai naadaarii hai
kyaa tire naam pe marne kaa evaz KHvaarii hai
banii aGyaar kii ab chaahne vaalii duniyaa
rah ga.ii apne liye ek KHayaalii duniyaa
ham to ruKHsat hu.e auro.n ne sa.nbhaalii duniyaa
phir na kahnaa hu.ii tauhiid se KHaalii duniyaa
ham to jiite hai.n ki duniyaa me.n tiraa naam rahe
kahii.n mumkin hai ki saaqii na rahe jaam rahe
terii mahfil bhii ga.ii chaahne vaale bhii ga.e
shab kii aahe.n bhii ga.ii.n sub.h ke naale bhii ga.e
dil tujhe de bhii ga.e apnaa sila le bhii ga.e
aa ke baiThe bhii na the aur nikaale bhii ga.e
aa.e ushshaaq ga.e vaada-e-fardaa le kar
ab unhe.n Dhuu.nD charaaG-e-ruKH-e-zebaa le kar
dard-e-lailaa bhii vahii qais kaa pahluu bhii vahii
najd ke dasht o jabal me.n ram-e-aahuu bhii vahii
ishq kaa dil bhii vahii husn kaa jaaduu bhii vahii
ummat-e-ahmad-e-mursil bhii vahii tuu bhii vahii
phir ye aazurdagi-e-Gair sabab kyaa ma.anii
apne shaidaa.o.n pe ye chashm-e-Gazab kyaa ma.anii
tujh ko chho.Daa ki rasuul-e-arabii ko chho.Daa
but-garii pesha kiyaa but-shikanii ko chho.Daa
ishq ko ishq kii aashufta-sarii ko chho.Daa
rasm-e-salmaan o uvais-e-qaranii ko chho.Daa
aag takbiir kii siino.n me.n dabii rakhte hai.n
zindagii misl-e-bilaal-e-habashii rakhte hai.n
ishq kii KHair vo pahlii sii adaa bhii na sahii
jaada-paimaali-e-tasliim-o-razaa bhii na sahii
muztarib dil sifat-e-qibla-numaa bhii na sahii
aur paabandi-e-aa.iin-e-vafaa bhii na sahii
kabhii ham se kabhii Gairo.n se shanaasaa.ii hai
baat kahne kii nahii.n tuu bhii to harjaa.ii hai
sar-e-faaraa.n pe kiyaa diin ko kaamil tuu ne
ik ishaare me.n hazaaro.n ke liye dil tuu ne
aatish-andoz kiyaa ishq kaa haasil tuu ne
phuu.nk dii garmi-e-ruKHsaar se mahfil tuu ne
aaj kyuu.n siine hamaare sharer-aabaad nahii.n
ham vahii soKHta-saamaa.n hai.n tujhe yaad nahii.n
vaadii-e-najd me.n vo shor-e-salaasil na rahaa
qais diivaana-e-nazzaara-e-mahmil na rahaa
hausle vo na rahe ham na rahe dil na rahaa
ghar ye uj.Daa hai ki tuu raunaq-e-mahfil na rahaa
ai KHushaa aa.n roz ki aa.ii o ba-sad naaz aa.ii
be-hijaabaana suu-e-mahfil-e-maa baaz aa.ii
baada-kash Gair hai.n gulshan me.n lab-e-juu baiThe
sunte hai.n jaam-ba-kaf naGma-e-kuu-kuu baiThe
daur ha.ngaama-e-gulzaar se yaksuu baiThe
tere diivaane bhii hai.n muntazir-e-huu baiThe
apne parvaano.n ko phir zauq-e-KHud-afrozii de
barq-e-deriina ko farmaan-e-jigar-sozii de
qaum-e-aavaara inaa.n-taab hai phir suu-e-hijaaz
le u.Daa bulbul-e-be-par ko mazaaq-e-parvaaz
muztarib-e-baaG ke har Gunche me.n hai buu-e-niyaaz
tuu zaraa chhe.D to de tishna-e-mizraab hai saaz
naGme betaab hai.n taaro.n se nikalne ke liye
tuur muztar hai usii aag me.n jalne ke liye
mushkile.n ummat-e-marhuum kii aasaa.n kar de
mor-e-be-maaya ko ham-dosh-e-sulaimaa.n kar de
jins-e-naayaab-e-mohabbat ko phir arzaa.n kar de
hind ke dair-nashiino.n ko musalmaa.n kar de
juu-e-KHuu.n mii chakad az hasrat-e-dairiina-e-maa
mii tapad naala ba-nishtar kada-e-siina-e-maa
buu-e-gul le ga.ii bairuun-e-chaman raaz-e-chaman
kyaa qayaamat hai ki KHud phuul hai.n Gammaaz-e-chaman
ahd-e-gul KHatm hu.aa TuuT gayaa saaz-e-chaman
u.D ga.e Daaliyo.n se zamzama-pardaaz-e-chaman
ek bulbul hai ki mahv-e-tarannum ab tak
us ke siine me.n hai naGmo.n kaa talaatum ab tak
qumriyaa.n shaaKH-e-sanobar se gurezaa.n bhii hu.ii.n
pattiyaa.n phuul kii jha.D jha.D ke pareshaa.n bhii hu.ii.n
vo puraanii raushe.n baaG kii viiraa.n bhii hu.ii.n
Daaliyaa.n pairahan-e-barg se uryaa.n bhii hu.ii.n
qaid-e-mausam se tabii.at rahii aazaad us kii
kaash gulshan me.n samajhtaa ko.ii fariyaad us kii
lutf marne me.n hai baaqii na maza jiine me.n
kuchh maza hai to yahii KHuun-e-jigar piine me.n
kitne betaab hai.n jauhar mire aa.iine me.n
kis qadar jalve ta.Dapte hai.n mire siine me.n
is gulistaa.n me.n magar dekhne vaale hii nahii.n
daaG jo siine me.n rakhte ho.n vo laale hii nahii.n
chaak is bulbul-e-tanhaa kii navaa se dil ho.n
jaagne vaale isii baa.ng-e-daraa se dil ho.n
ya.anii phir zinda na.e ahd-e-vafaa se dil ho.n
phir isii baada-e-dairiina ke pyaase dil ho.n
ajamii KHum hai to kyaa mai to hijaazii hai mirii
naGma hindii hai to kyaa lai to hijaazii hai mirii

Allama Iqbal
Nazm

saqi-nama

hu.aa KHema-zan kaarvaan-e-bahaar
iram ban gayaa daaman-e-koh-saar
gul o nargis o sosan o nastaran
shahiid-e-azal laala-KHuunii.n kafan
jahaa.n chhup gayaa parda-e-ra.ng me.n
lahuu kii hai gardish rag-e-sang me.n
fazaa niilii niilii havaa me.n suruur
Thaharte nahii.n aashiyaa.n me.n tuyuur
vo juu-e-kohistaa.n uchaktii hu.ii
aTaktii lachaktii saraktii hu.ii
uchhaltii phisaltii sambhaltii hu.ii
ba.De pech khaa kar nikaltii hu.ii
ruke jab to sil chiir detii hai ye
pahaa.Do.n ke dil chiir detii hai ye
zaraa dekh ai saaqii-e-laala-faam
sunaatii hai ye zindagii kaa payaam
pilaa de mujhe vo mai-e-parda-soz
ki aatii nahii.n fasl-e-gul roz roz
vo mai jis se raushan zamiir-e-hayaat
vo mai jis se hai masti-e-kaa.enaat
vo mai jis me.n hai soz-o-saaz-e-azal
vo mai jis se khultaa hai raaz-e-azal
uThaa saaqiyaa parda is raaz se
la.Daa de mamuule ko shahbaaz se
zamaane ke andaaz badle ga.e
nayaa raag hai saaz badle ga.e
hu.aa is tarah faash raaz-e-fara.ng
ki hairat me.n hai shiisha-baaz-e-fara.ng
puraanii siyaasat-garii KHvaar hai
zamii.n miir o sultaa.n se be-zaar hai
gayaa daur-e-sarmaaya-daarii gayaa
tamaashaa dikhaa kar madaarii gayaa
giraa.n KHvaab chiinii sambhalne lage
himaala ke chashme ubalne lage
dil-e-tuur-e-siinaa-o-faaraan do-niim
tajallii kaa phir muntazir hai kaliim
musalmaa.n hai tauhiid me.n garam-josh
magar dil abhii tak hai zunnaar-posh
tamaddun tasavvuf sharii.at-e-kalaam
butaan-e-ajam ke pujaarii tamaam
haqiiqat KHuraafaat me.n kho ga.ii
ye ummat rivaayaat me.n kho ga.ii
lubhaataa hai dil ko kalaam-e-KHatiib
magar lazzat-e-shauq se be-nasiib
bayaa.n is kaa mantiq se suljhaa hu.aa
luGat ke bakhe.Do.n me.n uljhaa hu.aa
vo suufii ki thaa KHidmat-e-haq me.n mard
mohabbat me.n yaktaa hamiiyat me.n fard
ajam ke KHayaalaat me.n kho gayaa
ye saalik maqaamaat me.n kho gayaa
bujhii ishq kii aag andher hai
musalmaa.n nahii.n raakh kaa Dher hai
sharaab-e-kuhan phir pilaa saaqiyaa
vahii jaam gardish me.n laa saaqiyaa
mujhe ishq ke par lagaa kar u.Daa
mirii KHaak jugnuu banaa kar u.Daa
KHirad ko Gulaamii se aazaad kar
javaano.n ko piiro.n kaa ustaad kar
harii shaaKH-e-millat tire nam se hai
nafas is badan me.n tire dam se hai
ta.Dapne pha.Dakne kii taufiiq de
dil-e-murtazaa soz-e-siddiiq de
jigar se vahii tiir phir paar kar
tamannaa ko siino.n me.n bedaar kar
tire aasmaano.n ke taaro.n kii KHair
zamiino.n ke shab zinda-daaro.n kii KHair
javaano.n ko soz-e-jigar baKHsh de
miraa ishq merii nazar baKHsh de
mirii naav girdaab se paar kar
ye saabit hai to is ko sayyaar kar
btaa mujh ko asraar-e-marg-o-hayaat
ki terii nigaaho.n me.n hai kaa.enaat
mire diida-e-tar kii be-KHvaabiyaa.n
mire dil kii poshiida betaabiyaa.n
mire naala-e-niim-shab kaa niyaaz
mirii KHalvat o anjuman kaa gudaaz
uma.nge.n mirii aarzuu.e.n mirii
ummiide.n mirii justuju.e.n mirii
mirii fitrat aa.iina-e-rozgaar
Gazaalaan-e-afkaar kaa murG-zaar
miraa dil mirii razm-gaah-e-hayaat
gumaano.n ke lashkar yaqii.n kaa sabaat
yahii kuchh hai saaqii mataa-e-faqiir
isii se faqiirii me.n huu.n mai.n amiir
mire qaafile me.n luTaa de ise
luTaa de Thikaane lagaa de ise
damaa-dam ravaa.n hai yam-e-zindagii
har ik shai se paidaa ram-e-zindagii
isii se hu.ii hai badan kii numuud
ki sho'le me.n poshiida hai mauj-e-duud
giraa.n garche hai sohbat-e-aab-o-gil
KHush aa.ii ise mehnat-e-aab-o-gil
ye saabit bhii hai aur sayyaar bhii
anaasir ke phando.n se be-zaar bhii
ye vahdat hai kasrat me.n har dam asiir
magar har kahii.n be-chugo.n be-naziir
ye aalam ye but-KHaana-e-shash-jihaat
isii ne taraashaa hai ye somnaat
pasand is ko takraar kii KHuu nahii.n
ki tuu mai.n nahii.n aur mai.n tuu nahii.n
man o tuu se hai anjuman-aafrii.n
magar ain-e-mahfil me.n KHalvat-nashii.n
chamak us kii bijlii me.n taare me.n hai
ye chaa.ndii me.n sone me.n paare me.n hai
usii ke bayaabaa.n usii ke babuul
usii ke hai.n kaa.nTe usii ke hai.n phuul
kahii.n us kii taaqat se kohsaar chuur
kahii.n us ke phande me.n jibra.iil o huur
kahii.n jaza hai shaahiin siimaab ra.ng
lahuu se chakoro.n ke aaluuda chang
kabuutar kahii.n aashiyaane se duur
pha.Daktaa hu.aa jaal me.n naa-subuur
fareb-e-nazar hai sukuun o sabaat
ta.Daptaa hai har zarra-e-kaa.enaat
Thahartaa nahii.n kaarvaan-e-vajuud
ki har lahz hai taaza shaan-e-vajuud
samajhtaa hai tuu raaz hai zindagii
faqat zauq-e-parvaaz hai zindagii
bahut us ne dekhe hai.n past o buland
safar us ko manzil se ba.Dh kar pasand
safar zindagii ke liye barg o saaz
safar hai haqiiqat hazar hai majaaz
ulajh kar sulajhne me.n lazzat use
ta.Dapne pha.Dakne me.n raahat use
hu.aa jab use saamnaa maut kaa
kaThin thaa ba.Daa thaamnaa maut kaa
utar kar jahaan-e-makaafaat me.n
rahii zindagii maut kii ghaat me.n
mazaaq-e-du.ii se banii zauj zauj
uThii dasht o kohsaar se fauj fauj
gul is shaaKH se TuuTte bhii rahe
isii shaaKH se phuuTte bhii rahe
samajhte hai.n naadaa.n use be-sabaat
ubhartaa hai miT miT ke naqsh-e-hayaat
ba.Dii tez jaulaa.n ba.Dii zuud-ras
azal se abad tak ram-e-yak-nafs
zamaana ki zanjiir-e-ayyaam hai
damo.n ke ulaT-pher kaa naam hai
ye mauj-e-nafs kyaa hai talvaar hai
KHudii kyaa hai talvaar kii dhaar hai
KHudii kyaa hai raaz-daruun-hayaat
KHudii kyaa hai bedaari-e-kaa.enaat
KHudii jalva badmast o KHalvat-pasand
samundar hai ik buu.nd paanii me.n band
a.ndhere ujaale me.n hai taabnaak
man o tuu me.n paidaa man o tuu se paak
azal us ke piichhe abad saamne
na had us ke piichhe na had saamne
zamaane ke dariyaa me.n bahtii hu.ii
sitam us kii maujo.n ke sahtii hu.ii
tajassus kii raahe.n badaltii hu.ii
damaa-dam nigaahe.n badaltii hu.ii
subuk us ke haatho.n me.n sa.ng-e-giraa.n
pahaa.D us kii zarbo.n se reg-e-ravaa.n
safar us kaa anjaam o aaGaaz hai
yahii us kii taqviim kaa raaz hai
kiran chaa.nd me.n hai sharar sang me.n
ye be-ra.ng hai Duub kar rang me.n
ise vaasta kyaa kam-o-besh se
nasheb o faraaz o pas-o-pesh se
azal se hai ye kashmakash me.n asiir
hu.ii KHaak-e-aadam me.n suurat-paziir
KHudii kaa nasheman tire dil me.n hai
falak jis tarah aa.nkh ke til me.n hai
KHudii ke nigahbaa.n ko hai zahr-naab
vo naa.n jis se jaatii rahe us kii aab
vahii naa.n hai us ke liye arjumand
rahe jis se duniyaa me.n gardan buland
KHudii faal-e-mahmuud se darguzar
KHudii par nigah rakh ayaazii na kar
vahii sajda hai laa.iq-e-ehtimaam
ki ho jis se har sajda tujh par haraam
ye aalam ye ha.ngaama-e-ra.ng-o-saut
ye aalam ki hai zer-e-farmaan-e-maut
ye aalam ye but-KHaana-e-chashm-o-gosh
jahaa.n zindagii hai faqat KHurd o nosh
KHudii kii ye hai manzil-e-avvalii.n
musaafir ye teraa nasheman nahii.n
tirii aag is KHaak-daa.n se nahii.n
jahaa.n tujh se hai tuu jahaa.n se nahii.n
ba.Dhe jaa ye koh-e-giraa.n to.D kar
tilism-e-zamaan-o-makaa.n to.D kar
KHudii sher-e-maulaa jahaa.n us kaa said
zamii.n us kii said aasmaa.n us kaa said
jahaa.n aur bhii hai.n abhii be-numuud
ki KHaalii nahii.n hai zamiir-e-vajuud
har ik muntazir terii yalGaar kaa
tirii shauKHi-e-fikr-o-kirdaar kaa
ye hai maqsad gardish-e-rozgaar
ki terii KHudii tujh pe ho aashkaar
tuu hai faatah-e-aalam-e-KHuub-o-zisht
tujhe kyaa bataa.uu.n tirii sarnavisht
haqiiqat pe hai jaama-e-harf-e-ta.ng
haqiiqat hai aa.iina-e-guftaar-e-za.ng
farozaa.n hai siine me.n sham-e-nafas
magar taab-e-guftaar rakhtii hai bas
agar yak-sar-e-muu-e-bartar param
faroG-e-tajallii ba-sozad param

Allama Iqbal
Nazm

taswir-e-dard

nahii.n minnat-kash-e-taab-e-shuniidan daastaa.n merii
KHamoshii guftuguu hai be-zabaanii hai zabaa.n merii
ye dastuur-e-zabaa.n-bandii hai kaisaa terii mahfil me.n
yahaa.n to baat karne ko tarastii hai zabaa.n merii
uThaa.e kuchh varaq laale ne kuchh nargis ne kuchh gul ne
chaman me.n har taraf bikhrii hu.ii hai daastaa.n merii
u.Daa lii qumriyo.n ne tuutiyo.n ne andaliibo.n ne
chaman vaalo.n ne mil kar luuT lii tarz-e-fuGaa.n merii
Tapak ai sham.a aa.nsuu ban ke parvaane kii aa.nkho.n se
saraapaa dard huu.n hasrat bharii hai daastaa.n merii
ilaahii phir maza kyaa hai yahaa.n duniyaa me.n rahne kaa
hayaat-e-jaavedaa.n merii na marg-e-naa-gahaa.n merii
miraa ronaa nahii.n ronaa hai ye saare gulistaa.n kaa
vo gul huu.n mai.n KHizaa.n har gul kii hai goyaa KHizaa.n merii
darii.n hasrat saraa umriist afsuun-e-jaras daaram
z faiz-e-dil tapiidan-haa KHarosh-e-be-nafas daaram
riyaaz-e-dahr me.n naa-aashnaa-e-bazm-e-ishrat huu.n
KHushii rotii hai jis ko mai.n vo mahruum-e-masarrat huu.n
mirii big.Dii hu.ii taqdiir ko rotii hai goyaa.ii
mai.n harf-e-zer-e-lab sharminda-e-gosh-e-samaa.at huu.n
pareshaa.n huu.n mai.n musht-e-KHaak lekin kuchh nahii.n khultaa
sikandar huu.n ki aa.iina huu.n yaa gard-e-kuduurat huu.n
ye sab kuchh hai magar hastii mirii maqsad hai qudrat kaa
saraapaa nuur ho jis kii haqiiqat mai.n vo zulmat huu.n
KHaziina huu.n chhupaayaa mujh ko musht-e-KHaak-e-sahraa ne
kisii ko kyaa KHabar hai mai.n kahaa.n huu.n kis kii daulat huu.n
nazar merii nahii.n mamnuun-e-sair-e-arsa-e-hastii
mai.n vo chhoTii sii duniyaa huu.n ki aap apnii vilaayat huu.n
na sahbaa huu.n na saaqii huu.n na mastii huu.n na paimaana
mai.n is mai-KHaana-e-hastii me.n har shai kii haqiiqat huu.n
mujhe raaz-e-do-aalam dil kaa aa.iina dikhaataa hai
vahii kahtaa huu.n jo kuchh saamne aa.nkho.n ke aataa hai
ataa aisaa bayaa.n mujh ko hu.aa ra.ngii.n-bayaano.n me.n
ki baam-e-arsh ke taa.ir hai.n mere ham-zabaano.n me.n
asar ye bhii hai ik mere junuun-e-fitna-saamaa.n kaa
miraa aa.iina-e-dil hai qazaa ke raaz-daano.n me.n
rulaataa hai tiraa nazzaara ai hindostaa.n mujh ko
ki ibrat-KHez hai teraa fasaana sab fasaano.n me.n
diyaa ronaa mujhe aisaa ki sab kuchh de diyaa goyaa
likhaa kalk-e-azal ne mujh ko tere nauha-KHvaano.n me.n
nishaan-e-barg-e-gul tak bhii na chho.D us baaG me.n gulchii.n
tirii qismat se razm-aaraa.iyaa.n hai.n baaGbaano.n me.n
chhupaa kar aastii.n me.n bijliyaa.n rakkhii hai.n garduu.n ne
anaadil baaG ke Gaafil na baiThe.n aashiyaano.n me.n
sun ai Gaafil sadaa merii ye aisii chiiz hai jis ko
vaziifa jaan kar pa.Dhte hai.n taa.ir bostaano.n me.n
vatan kii fikr kar naadaa.n musiibat aane vaalii hai
tirii barbaadiyo.n ke mashvare hai.n aasmaano.n me.n
zaraa dekh us ko jo kuchh ho rahaa hai hone vaalaa hai
dharaa kyaa hai bhalaa ahd-e-kuhan kii daastaano.n me.n
ye KHaamoshii kahaa.n tak lazzat-e-fariyaad paidaa kar
zamii.n par tuu ho aur terii sadaa ho aasmaano.n me.n
na samjhoge to miT jaa.oge ai hindostaa.n vaalo
tumhaarii daastaa.n tak bhii na hogii daastaano.n me.n
yahii aa.iin-e-qudrat hai yahii usluub-e-fitrat hai
jo hai raah-e-amal me.n gaam-zan mahbuub-e-fitrat hai
huvaidaa aaj apne zaKHm-e-pinhaa.n kar ke chho.Duu.ngaa
lahuu ro ro ke mahfil ko gulistaa.n kar ke chho.Duu.ngaa
jalaanaa hai mujhe har sham-e-dil ko soz-e-pinhaa.n se
tirii taariik raato.n me.n charaaGaa.n kar ke chho.Duu.ngaa
magar Guncho.n kii suurat huu.n dil-e-dard-aashnaa paidaa
chaman me.n musht-e-KHaak apnii pareshaa.n kar ke chho.Duu.ngaa
pironaa ek hii tasbiih me.n in bikhre daano.n ko
jo mushkil hai to is mushkil ko aasaa.n kar ke chho.Duu.ngaa
mujhe ai ham-nashii.n rahne de shaGl-e-siina-kaavii me.n
ki mai.n daaG-e-mohabbat ko numaayaa.n kar ke chho.Duu.ngaa
dikhaa duu.ngaa jahaa.n ko jo mirii aa.nkho.n ne dekhaa hai
tujhe bhii suurat-e-aa.iina hairaa.n kar ke chho.Duu.ngaa
jo hai pardo.n me.n pinhaa.n chashm-e-biinaa dekh letii hai
zamaane kii tabii.at kaa taqaazaa dekh letii hai
kiyaa rif.at kii lazzat se na dil ko aashnaa tuu ne
gizaarii umr pastii me.n misaal-e-naqsh-e-paa tuu ne
rahaa dil-basta-e-mahfil magar apnii nigaaho.n ko
kiyaa bairuun-e-mahfil se na hairat-aashnaa tuu ne
fidaa kartaa rahaa dil ko hasiino.n kii adaa.o.n par
magar dekhii na us aa.iine me.n apnii adaa tuu ne
ta.assub chho.D naadaa.n dahr ke aa.iina-KHaane me.n
ye tasviire.n hai.n terii jin ko samjhaa hai buraa tuu ne
saraapaa naala-e-bedaad-e-soz-e-zindagii ho jaa
sapand-aasaa girah me.n baa.ndh rakkhii hai sadaa tuu ne
safaa-e-dil ko kyaa aaraa.ish-e-ra.ng-e-ta.alluq se
kaf-e-aa.iina par baa.ndhii hai o naadaa.n hinaa tuu ne
zamii.n kyaa aasmaa.n bhii terii kaj-biinii pe rotaa hai
Gazab hai satr-e-qur.aa.n ko chaliipaa kar diyaa tuu ne
zabaa.n se gar kiyaa tauhiid kaa daavaa to kyaa haasil
banaayaa hai but-e-pindaar ko apnaa KHudaa tuu ne
ku.e.n me.n tuu ne yuusuf ko jo dekhaa bhii to kyaa dekhaa
are Gaafil jo mutlaq thaa muqayyad kar diyaa tuu ne
havas baalaa-e-mimbar hai tujhe ra.ngii.n-bayaanii kii
nasiihat bhii tirii suurat hai ik afsaana-KHvaanii kii
dikhaa vo husn-e-aalam-soz apnii chashm-e-pur-nam ko
jo ta.Dpaataa hai parvaane ko rulvaataa hai shabnam ko
zaraa nazzaara hii ai bul-havas maqsad nahii.n us kaa
banaayaa hai kisii ne kuchh samajh kar chashm-e-aadam ko
agar dekhaa bhii us ne saare aalam ko to kyaa dekhaa
nazar aa.ii na kuchh apnii haqiiqat jaam se jam ko
shajar hai firqa-aaraa.ii ta.assub hai samar us kaa
ye vo phal hai ki jannat se nikalvaataa hai aadam ko
na uTThaa jazba-e-KHurshiid se ik barg-e-gul tak bhii
ye rif.at kii tamannaa hai ki le u.Dtii hai shabnam ko
phiraa karte nahii.n majruuh-e-ulfat fikr-e-darmaa.n me.n
ye zaKHmii aap kar lete hai.n paidaa apne marham ko
mohabbat ke sharar se dil saraapaa nuur hotaa hai
zaraa se biij se paidaa riyaaz-e-tuur hotaa hai
davaa har dukh kii hai majruuh-e-teG-e-aarzuu rahnaa
ilaaj-e-zaKHm hai aazaad-e-ehsaan-e-rafuu rahnaa
sharaab-e-be-KHudii se taa-falak parvaaz hai merii
shikast-e-ra.ng se siikhaa hai mai.n ne ban ke buu rahnaa
thame kyaa diida-e-giryaa.n vatan kii nauha-KHvaanii me.n
ibaadat chashm-e-shaa.ir kii hai har dam baa-vazuu rahnaa
banaa.e.n kyaa samajh kar shaaKH-e-gul par aashiyaa.n apnaa
chaman me.n aah kyaa rahnaa jo ho be-aabruu rahnaa
jo tuu samjhe to aazaadii hai poshiida mohabbat me.n
Gulaamii hai asiir-e-imtiyaaz-e-maa-o-tuu rahnaa
ye istiGnaa hai paanii me.n niguu.n rakhtaa hai saaGar ko
tujhe bhii chaahiye misl-e-habaab-e-aabjuu rahnaa
na rah apno.n se be-parvaa isii me.n KHair hai terii
agar manzuur hai duniyaa me.n o begaana-KHuu rahnaa
sharaab-e-ruuh-parvar hai mohabbat nau-e-insaa.n kii
sikhaayaa is ne mujh ko mast be-jaam-o-subuu rahnaa
mohabbat hii se paa.ii hai shifaa biimaar qaumo.n ne
kiyaa hai apne baKHt-e-KHufta ko bedaar qaumo.n ne
bayaabaan-e-mohabbat dasht-e-Gurbat bhii vatan bhii hai
ye viiraana qafas bhii aashiyaana bhii chaman bhii hai
mohabbat hii vo manzil hai ki manzil bhii hai sahraa bhii
jaras bhii kaarvaa.n bhii raahbar bhii raahzan bhii hai
maraz kahte hai.n sab is ko ye hai lekin maraz aisaa
chhupaa jis me.n ilaaj-e-gardish-e-charKH-e-kuhan bhii hai
jalaanaa dil kaa hai goyaa saraapaa nuur ho jaanaa
ye parvaana jo sozaa.n ho to sham-e-anjuman bhii hai
vahii ik husn hai lekin nazar aataa hai har shai me.n
ye shiirii.n bhii hai goyaa be-sutuu.n bhii kohkan bhii hai
ujaa.Daa hai tamiiz-e-millat-o-aa.ii.n ne qaumo.n ko
mire ahl-e-vatan ke dil me.n kuchh fikr-e-vatan bhii hai
sukuut-aamoz tuul-e-daastaan-e-dard hai varna
zabaa.n bhii hai hamaare mu.nh me.n aur taab-e-suKHan bhii hai
namii-gardiid ko tah rishta-e-ma.anii rihaa kardam
hikaayat buud be-paayaa.n ba-KHaamoshii adaa kardam

Allama Iqbal
Nazm

kis se mohabbat hai

bataa.uu.n kyaa tujhe ai ham-nashii.n kis se mohabbat hai
mai.n jis duniyaa me.n rahtaa huu.n vo is duniyaa kii aurat hai
saraapaa ra.ng-o-buu hai paikar-e-husn-o-lataafat hai
bahisht-e-gosh hotii hai.n guhar-afshaaniyaa.n us kii

Asrarul Haq Majaz
Nazm

march 1907

zamaana aayaa hai be-hijaabii kaa aam diidaar-e-yaar hogaa
sukuut thaa parda-daar jis kaa vo raaz ab aashkaar hogaa
guzar gayaa ab vo daur-e-saaqii ki chhup ke piite the piine vaale
banegaa saaraa jahaan mai-KHaana har ko.ii baada-KHvaar hogaa
kabhii jo aavaara-e-junuu.n the vo bastiyo.n me.n phir aa base.nge
barahna-paa.ii vahii rahegii magar nayaa KHaarzaar hogaa
sunaa diyaa gosh-e-muntazir ko hijaaz kii KHaamushii ne aaKHir
jo ahd sahraa.iyo.n se baa.ndhaa gayaa thaa phir ustuvaar hogaa
nikal ke sahraa se jis ne ruumaa kii saltanat ko ulaT diyaa thaa
sunaa hai ye qudsiyo.n se mai.n ne vo sher phir hoshiyaar hogaa
kiyaa miraa tazkira jo saaqii ne baada-KHvaaro.n kii anjuman me.n
to piir-e-mai-KHaana sun ke kahne lagaa ki mu.nh-phaT hai KHvaar hogaa
dayaar-e-maGrib ke rahne vaalo KHudaa kii bastii dukaa.n nahii.n hai
kharaa jise tum samajh rahe ho vo ab zar-e-kam-ayaar hogaa
tumhaarii tahziib apne KHanjar se aap hii KHud-kushii karegii
jo shaaKH-e-naazuk pe aashiyaana banegaa naa-paa.edaar hogaa
safiina-e-barg-e-gul banaa legaa qaafila mor-e-naa-tavaa.n kaa
hazaar maujo.n kii ho kashaakash magar ye dariyaa se paar hogaa
chaman me.n laala dikhaataa phirtaa hai daaG apnaa kalii kalii ko
ye jaantaa hai ki is dikhaave se dil-jalo.n me.n shumaar hogaa
jo ek thaa ai nigaah tuu ne hazaar kar ke hame.n dikhaayaa
yahii agar kaifiyat hai terii to phir kise e'tibaar hogaa
kahaa jo qumrii se mai.n ne ik din yahaa.n ke aazaad paa-ba-gil hai.n
tuu Gunche kahne lage hamaare chaman kaa ye raazdaar hogaa
KHudaa ke aashiq to hai.n hazaaro.n bano.n me.n phirte hai.n maare maare
mai.n us kaa banda banuu.ngaa jis ko KHudaa ke bando.n se pyaar hogaa
ye rasm-e-bazm-e-fanaa hai ai dil gunaah hai jumbish-e-nazar bhii
rahegii kyaa aabruu hamaarii jo tuu yahaa.n be-qaraar hogaa
mai.n zulmat-e-shab me.n le ke nikluu.ngaa apne dar-maa.nda kaarvaa.n ko
sharar-fishaa.n hogii aah merii nafas miraa shola-baar hogaa
nahii.n hai Gair-az-numuud kuchh bhii jo mudda.aa terii zindagii kaa
tuu ik nafas me.n jahaa.n se miTnaa tujhe misaal-e-sharaar hogaa
na puuchh 'iqbaal' kaa Thikaanaa abhii vahii kaifiyat hai us kii
kahii.n sar-e-raah-guzaar baiThaa sitam-kash-e-intizaar hogaa

Allama Iqbal
Nazm

hubb-e-watan

baiThe be-fikr kyaa ho ham-vatano
uTho ahl-e-vatan ke dost bano
mard ho tum kisii ke kaam aa.o
varna khaa.o piyo chale jaa.o
jab ko.ii zindagii kaa lutf uThaa.o
dil ko dukh bhaa.iyo.n ke yaad dilaa.o
pahno jab ko.ii umda tum poshaak
karo daaman se taa garebaa.n chaak
khaanaa khaa.o to jii me.n tum sharmaa.o
ThanDaa paanii piyo to ashk bahaa.o
kitne bhaa.ii tumhaare hai.n naadaar
zindagii se hai jin kaa dil bezaar
naukaro.n kii tumhaare jo hai Gizaa
un ko vo KHvaab me.n nahii.n miltaa
jis pe tum juutiyo.n se phirte ho
vaa.n mayassar nahii.n vo o.Dhne ko
khaa.o to pahle lo KHabar un kii
jin pe biptaa hai niistii kii pa.Dii
pahno to pahle bhaa.iyo.n ko pahnaa.o
ki hai utran tumhaarii jin kaa banaav
ek Daalii ke sab hai.n barg-o-samar
hai ko.ii un me.n KHushk aur ko.ii tar
sab ko hai ek asl se paivand
ko.ii aazurda hai ko.ii KHursand
muqbilo mudabbiro.n ko yaad karo
KHush-dilo Gam-zado.n ko shaad karo
jaagne vaale Gaafilo.n ko jagaa.o
tairne vaalo Duubto.n ko tiraa.o
hai.n mile tum ko chashm o gosh agar
lo jo lii jaa.e kor-o-kar kii KHabar
tum agar haath paa.nv rakhte ho
la.ng.De luulo.n ko kuchh sahaaraa do
tandurustii kaa shukr kiyaa hai bataa.o
ra.nj biimaar bhaa.iyo.n kaa haTaa.o
tum agar chaahte ho mulk kii KHair
na kisii ham-vatan ko samjho Gair
ho musalmaan us me.n yaa hinduu
bodh maz.hab ho yaa ki ho brahamuu
ja.afrii hove yaa ki ho hanafii
jiin-mat hove yaa ho vaishnavii
sab ko miiThii nigaah se dekho
samjho aa.nkho.n kii putliyaa.n sab ko
mulk hai.n ittifaaq se aazaad
shahr hai.n ittifaaq se aabaad
hind me.n ittifaaq hotaa agar
khaate Gairo.n kii Thokare.n kyuu.nkar
qaum jab ittifaaq kho baiThii
apnii puu.njii se haat dho baiThii
ek kaa ek ho gayaa bad-KHvaah
lagii Gairo.n kii pa.Dne tum pe nigaah
phir ga.e bhaa.iyo.n se jab bhaa.ii
jo na aanii thii vo balaa aa.ii
paa.nv iqbaal ke ukha.Dne lage
mulk par sab ke haath pa.Dne lage
kabhii tuuraaniyo.n ne ghar luuTaa
kabhii durraaniyo.n ne zar luuTaa
kabhii naadir ne qatl-e-aam kiyaa
kabhii mahmuud ne Gulaam kiyaa
sab se aaKHir ko le ga.ii baazii
ek shaa.ista qaum maGrib kii
ye bhii tum par KHudaa kaa thaa in.aam
ki pa.Daa tum ko aisii qaum se kaam
varna dum maarne na paate tum
pa.Dtii jo sar pe vo uThaate tum
mulk rau.nde ga.e hai.n pairo.n se
chain kis ko milaa hai Gairo.n se

Altaf Hussain Hali
Nazm

KHak-e-hind

diivaar-o-dar se ab tak un kaa asar ayaa.n hai
apnii rago.n me.n ab tak un kaa lahuu ravaa.n hai
ab tak asar me.n Duubii naaquus kii fuGaa.n hai
firdaus-e-gosh ab tak kaifiyyat-e-azaa.n hai

Chakbast Braj Narayan
Nazm

kaun si uljhan ko suljhate hain ham?

lab bayaabaa.n, bose be-jaa.n
kaun sii uljhan ko suljhaate hai.n ham?
jism kii ye kaar-gaahe.n
jin kaa haizam aap ban jaate hai.n ham!
niim-shab aur shahr-e-KHvaab-aaluudaa, ham-saa.e
ki jaise duzd-e-shab-gardaa.n ko.ii!
shaam se the hasrato.n ke banda-e-be-daam ham
pii rahe the jaam par har jaam ham
ye samajh kar jur.a-e-pinhaa.n ko.ii
shaayad aaKHir ibtidaa-e-raaz kaa iimaa bane!
matlab aasaa.n harf be-ma.anii
tabassum ke hisaabii zaaviye
matn ke sab haashiye
jin se aish-KHaam ke naqsh-e-riyaa bante rahe!
aur aaKHir bu.ad jismo.n me.n sar-e-muu bhii na thaa
jab dilo.n ke darmiyaa.n haa.il the sa.ngii.n faasle
qurb-e-chashm-o-gosh se ham kaun sii uljhan ko suljhaate rahe!
kaun sii uljhan ko suljhaate hai.n ham?
shaam ko jab apnii Gam-gaaho.n se duzdaanaa nikal aate hai.n ham?
yaa zavaal-e-umr kaa dev-e-subuk-paa ruu-ba-ruu
yaa anaa ke dast o paa ko vus.ato.n kii aarzuu
kaun sii uljhan ko suljhaate hai.n ham?

Noon Meem Rashid
Nazm

parchhaiyan

1
ye shaam ik aa.iina-e-niil-guu.n ye nam ye mahak
ye manzaro.n kii jhalak khet baaG dariyaa gaa.nv
vo kuchh sulagte hu.e kuchh sulagne vaale alaav
siyaahiyo.n kaa dabe-paa.nv aasmaa.n se nuzuul
laTo.n ko khol de jis tarah shaam kii devii
puraane vaqt ke bargad kii ye udaas jaTaa.e.n
qariib o duur ye go dhuul kii ubhartii ghaTaa.e.n
ye kaa.enaat kaa Thahraa.o ye athaah sukuut
ye niim-tiirah fazaa roz-e-garm kaa taabuut
dhu.aa.n dhu.aa.n sii zamii.n hai ghulaa ghulaa saa falak
2
ye chaa.ndnii ye havaa.e.n ye shaaKH-e-gul kii lachak
ye daur-e-baada ye saaz-e-KHamosh fitrat ke
sunaa.ii dene lagii jagmagaate siino.n me.n
dilo.n ke naazuk o shaffaaf aabgiino.n me.n
tire KHayaal kii pa.Dtii hu.ii kiran kii khanak
3
ye raat chhantii havaa.o.n kii so.ndhii so.ndhii mahak
ye khet kartii hu.ii chaa.ndnii kii narm damak
sugandh raat kii raanii kii jab machaltii hai
fazaa me.n ruuh-e-tarab karvaTe.n badaltii hai
ye ruup sar se qadam tak hasiin jaise gunaah
ye aarizo.n kii damak ye fusuun-e-chashm-e-siyaah
ye dhaj na de jo ajantaa kii san.ato.n ko panaah
ye siina pa.D hii ga.ii dev lok kii bhii nigaah
ye sar-zamiin se aakaash kii parastish-gaah
utaarte hai.n tirii aartii sitaara o maah
sajal badan kii bayaa.n kis tarah ho kaifiyyat
sarasvatii ke bajaate hu.e sitaar kii gat
jamaal-e-yaar tire gulsitaa.n kii rah rah ke
jabiin-e-naaz tirii kahkashaa.n kii rah rah ke
dilo.n me.n aa.iina-dar-aa.iina suhaanii jhalak
4
ye chhab ye ruup ye joban ye saj ye dhaj ye lahak
chamakte taaro.n kii kirno.n kii narm narm phuvaar
ye rasmasaate badan kaa uThaan aur ye ubhaar
fazaa ke aa.iina me.n jaise lahlahaa.e bahaar
ye be-qaraar ye be-iKHtiyaar josh-e-numuud
ki jaise nuur kaa favvaara ho shafaq-aaluud
ye jalve paikar-e-shab-taab ke ye bazm-e-shohuud
ye mastiyaa.n ki mai-e-saaf-o-durd sab be-buud
KHajil ho laal-e-yaman uzv uzv kii vo Dalak
5
bas ik sitaara-e-shi.ngaraf kii jabii.n pe jhamak
vo chaal jis se labaalab gulaabiyaa.n chhalke.n
sakuu.n-numaa KHam-e-abru ye adh-khulii.n palke.n
har ik nigaah se aiman kii bijliyaa.n lapke.n
ye aa.nkh jis me.n ka.ii aasmaa.n dikhaa.ii pa.De.n
u.Daa de.n hosh vo kaano.n kii saada saada lave.n
ghaTaa.e.n vajd me.n aa.e.n ye gesu.o.n kii laTak
6
ye kaif-o-ra.ng-e-nazaara ye bijliyo.n kii lapak
ki jaise krishn se raadhaa kii aa.nkh ishaare kare
vo shoKH ishaare ki rabbaaniyat bhii jaa.e jhapak
jamaal sar se qadam tak tamaam sho.ala hai
sukuun jumbish o ram tak tamaam sho.ala hai
magar vo sho.ala ki aa.nkho.n me.n Daal de ThanDak
7
ye raat nii.nd me.n Duube hu.e se hai.n diipak
fazaa me.n bujh ga.e u.D u.D ke jugnu.o.n ke sharaar
kuchh aur taaro.n kii aa.nkho.n kaa ba.Dh chalaa hai KHumaar
fasurda chhiTkii hu.ii chaa.ndnii kaa dhundlaa Gubaar
ye bhiigii bhiigii uudaahaT ye bhiigaa bhiigaa nuur
ki jaise chashma-e-zulmaat me.n jale kaafuur
ye Dhaltii raat sitaaro.n ke qalb kaa ye gudaaz
KHunuk fazaa me.n tiraa shabnamii tabassum-e-naaz
jhalak jamaal kii ta.abiir KHvaab aa.iina-saaz
jahaa.n se jism ko dekhe.n tamaam naaz-o-niyaaz
jahaa.n nigaah Thahar jaa.e raaz-andar-raaz
sukuut-e-niim-shabii lahlahe badan kaa nikhaar
ki jaise nii.nd kii vaadii me.n jaagtaa sansaar
hai bazm-e-maah ki parchhaa.iyo.n kii bastii hai
fazaa kii oT se vo KHaamushii barastii hai
ki buu.nd buu.nd se paidaa ho gosh o dil me.n khanak
8
kisii KHayaal me.n hai Garq chaa.ndnii kii chamak
havaa.e.n nii.nd ke kheto.n se jaise aatii ho.n
hayaat o maut me.n sargoshiyaa.n sii hotii hai.n
karo.Do.n saal ke jaage sitaare nam-diida
siyaah gesu.o.n ke saa.np niim-KHvaabiida
ye pichhlii raat ye rag rag me.n narm narm kasak

Firaq Gorakhpuri
Nazm

sham-e-ayaadat

(3)
na.e zamaane me.n agar udaas KHud ko paa.uu.ngaa
ye shaam yaad kar ke apne Gam ko bhuul jaa.uu.ngaa
ayaadat-e-habiib se vo aaj zindagii milii
KHushii bhii chau.nk chauk uThii Gam kii aa.nkh khul ga.ii
agarche doctor ne mujh ko maut se bachaa liyaa
par is ke baa'd us nigaah ne mujhe jilaa liyaa
nigaah-e-yaar tujh se apnii manzile.n mai.n paa.uu.ngaa
tujhe jo bhuul jaa.uu.ngaa to raah bhuul jaa.uu.ngaa
(4)
qariib-tar mai.n ho chalaa huu.n dukh kii kaa.enaat se
mai.n ajnabii nahii.n rahaa hayaat se mamaat se
vo dukh sahe ki mujh pe khul gayaa hai dard-e-kaa.enaat
hai apne aa.nsu.o.n se mujh pe aa.iina Gam-e-hayaat
ye be-qusuur jaan-daar dard jhelte hu.e
ye KHaak-o-KHuu.n ke putle apnii jaa.n pe khelte hu.e
vo ziist kii karaah jis se be-qaraar hai fazaa
vo zindagii kii aah jis se kaa.np uThtii hai fazaa
kafan hai aa.nsu.o.n kaa dukh kii maarii kaa.enaat par
hayaat kyaa inhe.n haqiiqato.n se honaa be-KHabar
jo aa.nkh jaagtii rahii hai aadmii kii maut par
vo abr-e-ra.ng-ra.ng ko bhii dekhtii hai saada-tar
sikhaa gayaa dukh miraa puraanii piir jaan.naa
nigaah-e-yaar thii jahaa.n bhii aaj merii rahnumaa
yahii nahii.n ki mujh ko aaj zindagii na.ii milii
haqiiqat-e-hayaat mujh pe sau tarah se khul ga.ii
gavaah hai ye shaam aur nigaah-e-yaar hai gavaah
KHayaal-e-maut ko mai.n apne dil me.n ab na duu.ngaa raah
jiyuu.ngaa haa.n jiyuu.ngaa ai nigaah-e-aashnaa-e-yaar
sadaa suhaag zindagii hai aur jahaa.n sadaa-bahaar
(5)
abhii to kitne naa-shuniida naGma-e-hayaat hai.n
abhii nihaa.n dilo.n se kitne raaz-e-kaa.enaat hai.n
abhii to zindagii ke naa-chashiida ras hai.n saik.Do.n
abhii to haath me.n ham ahl-e-Gam ke jas hai.n saik.Do.n
abhii vo le rahii hai.n merii shaa.erii me.n karvaTe.n
abhii chamakne vaalii hai chhupii hu.ii haqiiqate.n
abhii to bahr-o-bar pe so rahii hai.n merii vo sadaa.e.n
sameT luu.n unhe.n to phir vo kaa.enaat ko jagaa.e.n
abhii to ruuh ban ke zarre zarre me.n samaa.uu.ngaa
abhii to sub.h ban ke mai.n ufuq pe thartharaa.uu.ngaa
abhii to merii shaa.erii haqiiqate.n luuTaa.egii
abhii mirii sadaa-e-dard ik jahaa.n pe chhaa.egii
abhii to aadmii asiir-e-daam hai Gulaam hai
abhii to zindagii sad-inqalaab kaa payaam hai
abhii tamaam zaKHm o daaG hai tamaddun-e-jahaa.n
abhii ruKH-e-bashar pe hai.n bahmiyat kii jhaa.iyaa.n
abhii mashiyyato.n pe fat.h paa nahii.n sakaa bashar
abhii muqaddaro.n ko bas me.n laa nahii.n sakaa bashar
abhii to is dukhii jahaa.n me.n maut hii kaa daur hai
abhii to jis ko zindagii kahe.n vo chiiz aur hai
abhii to KHuun thoktii hai zindagii bahaar me.n
abhii to rone kii sadaa hai naGma-e-sitaar me.n
abhii to u.Dtii hai.n ruKH-e-bahaar par havaa.iyaa.n
abhii to diidanii hai.n har chaman kii be-fazaa.iyaa.n
abhii fazaa-e-dahr legii karvaTo.n pe karvaTe.n
abhii to sotii hai.n havaa.o.n kii vo sansanaahaTe.n
ki jis ko sunte hii hukuumato.n ke ra.ng-e-ruKH u.De.n
chapeTe.n jin kii sarkasho.n kii gardane.n maro.D de.n
abhii to siina-e-bashar me.n sote hai.n vo zalzale
ki jin ke jaagte hii maut kaa bhii dil dahal uThe
abhii to batn-e-Gaib me.n hai is savaal kaa javaab
KHudaa-e-KHair-o-shar bhii laa nahii.n sakaa thaa jis kii taab
abhii to god me.n hai.n devtaa.o.n kii vo maah-o-saal
jo de.nge ba.Dh ke barq-e-tuur se hayaat ko jalaal
abhii rag-e-jahaa.n me.n zindagii machalne vaalii hai
abhii hayaat kii na.ii sharaab Dhalne vaalii hai
abhii chhurii sitam kii Duub kar uchhalne vaalii hai
abhii to hasrat ik jahaan kii nikalne vaalii hai
abhii ghan-garaj sunaa.ii degii inqalaab kii
abhii to gosh-bar-sadaa hai bazm aaftaab kii
abhii to puu.njii-vaad ko jahaan se miTaanaa hai
abhii to saamraajo.n ko sazaa-e-maut paanaa hai
abhii to daa.nt piistii hai maut shahryaaro.n kii
abhii to KHuu.n utar rahaa hai aa.ankho.n me.n sitaaro.n kii
abhii to ishtiraakiyat ke jhanDe ga.Dne vaale hai.n
abhii to ja.D se kisht-o-KHuu.n ke nazm ukha.Dne vaale hai.n
abhii kisaan-o-kaamgaar raaj hone vaalaa hai
abhii bahut jahaa.n me.n kaam-kaaj hone vaalaa hai
magar abhii to zindagii musiibato.n kaa naam hai
abhii to nii.nd maut kii mire liye haraam hai
ye sab payaam ik nigaah me.n vo aa.nkh de ga.ii
ba-yak-nazar kahaa.n kahaa.n mujhe vo aa.nkh le ga.ii

Firaq Gorakhpuri
Nazm

israfil ki maut

marg-e-israafiil par aa.nsuu bahaa.o
vo KHudaa.o.n kaa muqarrab vo KHudaavand-e-kalaam
saut-e-insaanii kii ruuh-e-jaavedaa.n
aasmaano.n kii nidaa-e-be-karaa.n
aaj saakit misl-e-harf-e-naa-tamaam
marg-e-israafiil par aa.nsuu bahaa.o
aa.o israafiil ke is KHvaab-e-be-ha.ngaam par aa.nsuu bahaa.e.n
aaramiida hai vo yuu.n qarnaa ke paas
jaise tuufaa.n ne kinaare par ugal Daalaa use
reg-e-saahil par chamaktii dhuup me.n chup chaap
apne suur ke pahluu me.n vo KHvaabiida hai
us kii dastaar us ke gesuu us kii riish
kaise KHaak-aaluuda hai.n
the kabhii jin kii tahe.n buud-o-nabuud
kaise is kaa suur is ke lab se duur
apnii chiiKHo.n apnii fariyaado.n me.n gum
jhilmilaa uThte the jis se dair-o-zuud
marg-e-israafiil par aa.nsuu bahaa.o
vo mujassam hamhama thaa vo mujassam zamzama
vo azal se taa abad phailii hu.ii Gaibii sadaa.o.n kaa nishaa.n
marg-e-israafiil se
halqa dar halqa farishte nauha gar
ibn-e-aadam zulf-dar-KHaak-o-nazaar
hazrat-e-yazdaa.n kii aa.nkhe.n Gam se taar
aasmaano.n kii safiir aatii nahii.n
aalam-e-laahuut se ko.ii nafiir aatii nahii.n
marg-e-israafiil se
is jahaa.n par band aavaazo.n kaa rizq
mutribo.n kaa rizq aur saazo.n kaa rizq
ab muGannii kis tarah gaa.egaa aur gaa.egaa kyaa
sun.ne vaalo.n ke dilo.n ke taar chup
ab ko.ii raqqaas kyaa thirkegaa lahraa.egaa kyaa
bazm ke farsh-o-dar-o-diivaar chup
ab KHatiib-e-shahr farmaa.egaa kyaa
masjido.n ke aastaan-o-gumbad-o-miinaar chup
fikr kaa sayyaad apnaa daam phailaa.egaa kyaa
taa.iraan-e-manzil-o-kohsaar chup
marg-e-israafiil hai
gosh-e-shanvaa kii lab-e-goyaa kii maut
chashm-e-biinaa kii dil-e-daanaa kii maut
thii isii ke dam se durvesho.n kii saarii haav-huu
ahl-e-dil kii ahl-e-dil se guftuguu
ahl-e-dil jo aaj gosha-giir-o-surma-dar-guluu
ab tanaa taa-huu bhii Gaa.eb aur yaa-rab haa bhii gum
ab galii kuucho.n kii har aavaa bhii gum
ye hamaaraa aaKHirii maljaa bhii gum
marg-e-israafiil se
is jahaa.n kaa vaqt jaise so gayaa pathraa gayaa
jaise ko.ii saarii aavaazo.n ko yaksar khaa gayaa
aisii tanhaa.ii ki husn-e-taam yaad aataa nahii.n
aisaa sannaaTaa ki apnaa naam yaad aataa nahii.n
marg-e-israafiil se
dekhte rah jaa.e.nge duniyaa ke aamir bhii
zabaa.n-bandii ke KHvaab
jis me.n majbuuro.n kii sargoshii to ho
us KHudaavandii ke KHvaab

Noon Meem Rashid
Nazm

bunda

kaash mai.n tere bun-e-gosh me.n bundaa hotaa
raat ko be-KHabarii me.n jo machal jaataa mai.n
to tire kaan se chup-chaap nikal jaataa mai.n
sub.h ko girte tirii zulfo.n se jab baasii phuul
mere kho jaane pe hotaa tiraa dil kitnaa maluul
tuu mujhe Dhuu.nDhtii kis shauq se ghabraahaT me.n
apne mahke hu.e bistar kii har ik silvaT me.n
juu.nhii kartii.n tirii narm u.ngliyaa.n mahsuus mujhe
miltaa is gosh kaa phir gosha-e-maanuus mujhe
kaan se tuu mujhe hargiz na utaaraa kartii
tuu kabhii merii judaa.ii na gavaaraa kartii
yuu.n tirii qurbat-e-ra.ngii.n ke nashe me.n mad.hosh
umr bhar rahtaa mirii jaa.n mai.n tiraa halqa-ba-gosh
kaash mai.n tere bun-e-gosh me.n bundaa hotaa

Majeed Amjad
Nazm

krishn-kanhaiya

jo sun letaa hai gosh-e-dil se afsaana kanhaiyaa kaa
vo ho jaataa hai sachche dil se diivaana kanhaiyaa kaa
nazar aatii hai jis ko KHvaab me.n vo suurat-e-dilkash
vo apnaa dil banaa letaa hai kaashaana kanhaiyaa kaa
suruur-o-kaif kii miltii hai us ko lazzat-e-daa.im
lagaa letaa hai ho.nTo.n se jo paimaana kanhaiyaa kaa
tum apnaa haath phailaa.o zaraa saaqii kii mahfil me.n
ki baa.nTaa jaa rahaa hai aaj paimaana kanhaiyaa kaa
kisii par band hone kaa nahii.n mai-KHana-e-ulfat
chale aa.o khulaa rahtaa hai mai-KHaana kanhaiyaa kaa
kanhaiyaa kii mohabbat me.n jo jaa.n par khel jaataa hai
use sab log kah dete hai.n diivaana kanhaiyaa kaa
'nahiif' apne paraa.e sab isii ke dil me.n rahte hai.n
sab apne hai.n nahii.n ko.ii bhii begaana kanhaiyaa kaa

Julius Naheef Dehlvi
Nazm

iqbaal ke mazar par

lahad me.n so rahii hai aaj be-shak musht-e-KHaak us kii
magar garm-e-amal hai jaagtii hai jaan-e-paak us kii
vo ik faanii bashar thaa mai.n ye baavar kar nahii.n saktaa
bashar iqbaal ho jaa.e to hargiz mar nahii.n saktaa
ba-zer-e-saaya-e-diivaar-e-masjid hai jo aasuuda
ye KHaakii jism hai sattar baras kaa raah paimuuda
ye KHaakii jism bhii us kaa bahut hii besh-qiimat thaa
jise ham-jalva samjhe the vo parda bhii Ganiimat thaa
use ham naapte the le ke aa.nkho.n hii kaa paimaanaa
Gazal-KHvaa.n us ko jaanaa ham ne shaa.ir us ko gardaanaa
faqat suurat hii dekhii us ke ma.anii ham nahii.n samjhe
na dekhaa ra.ng-e-tasviir aa.ine ko dil-nashii.n samjhe
hame.n zof-e-basaarat se kahaa.n thii taab-e-nazzaaraa
sikhaa.e us ke parde ne hame.n aadaab-e-nazzaaraa
ye naGma kyaa hai zer-e-parda-haa-e-saaz kam samjhe
rahe sab gosh-bar-aavaaz lekin raaz kam samjhe
shikast-e-paikar-e-mahsuus ne to.Daa hijaab aaKHir
tuluu-e-sub.h-e-mahshar ban ke chamkaa aaftaab aaKHir
muqayyad ab nahii.n 'iqbaal' apne jism-e-faanii me.n
nahii.n vo band haa.il aaj dariyaa kii ravaanii me.n
vajuud-e-marg kii qaa.el nahii.n thii zindagii us kii
ta.aalaa allaah ab dekhe ko.ii paa.indagii us kii
jise ham murda samjhe zinda tar paa.inda tar niklaa
mah o KHurshiid se zarre kaa dil taabinda tar niklaa
abhii andaaza ho saktaa nahii.n us kii bulandii kaa
abhii duniyaa kii aa.nkho.n par hai parda firqa-bandii kaa
magar merii nigaaho.n me.n hai.n chehre un javaano.n ke
jinhe.n 'iqbaal' ne baKHshe hai.n baazuu qahar-maano.n ke

Hafeez Jalandhari
Nazm

dar-e-umid ke daryuza-gar

phir phurere ban ke mere tan-badan kii dhajjiyaa.n
shahr ke diivaar-o-dar ko rang pahnaane lagii.n
phir kaf-aaluuda zabaane.n mad.h o zam kii qumchiyaa.n
mere zehn o gosh ke zaKHmo.n pe barsaane lagii.n

Faiz Ahmad Faiz
Nazm

baghi

merii fariyaad pe ahl-e-duval a.ngusht-ba-gosh
laa, tabar KHuun ke dariyaa me.n nahaane de mujhe

Makhdoom Mohiuddin
Nazm

log kahte hain

ko.ii paiGaam nahii.n jis kii tavaqqo.a ho mujhe
kis liye gosh-bar-aavaaz huu.n ma.aluum nahii.n
jo kabhii dil me.n tamannaa thii vo aaGosh me.n hai
ab kidhar maa.il-e-parvaaz huu.n ma.aluum nahii.n
nahii.n ma.aluum ki us Gam kii haqiiqat kyaa hai
ashk ban kar mirii aa.nkho.n se bahaa jaataa hai
lab pe aataa nahii.n vo jazb-e-betaab magar
giit ban.ne ke liye dil me.n rahaa jaataa hai

Saifuddin Saif
Nazm

iqbaal se ham-kalami

kal azaan-e-sub.h se pahle fazaa-e-quds me.n
mai.n ne dekhaa kuchh shanaasaa suurate.n hai.n ham-nashii.n
the hakiim-e-sharq se shaiKH-e-mujaddid ham-kalaam
gosh-bar-aavaaz sab daanish-varaan-e-ilm-o-dii.n
bul-kalaam-'aazaad' se 'Gaalib' the masruuf-e-suKHan
'miir' o 'momin' daur-e-haazir kii Gazal pe nukta-chii.n
is se kuchh haT kar gulaabii shaaKH-cho.n kii chhaa.nv me.n
the valiiullaah ke farzand nukta-aafrii.n
iistaada sarv ke saa.e me.n the maulaa-e-ruum
jin ke farmuudaat me.n muzmar hai.n aayaat-e-mubii.n
soch me.n Duube hu.e the 'haalii'-e-darvesh-KHuu
baa.ndh kar baiThe halqa shiblii-e-ahd-aafrii.n
mai.n ne ba.Dh kar murshid-e-iqbaal se ye arz kii
aap ko ham tiira-baKHto.n kii KHabar hai yaa nahii.n
dil-shikasta ho ke farmaayaa mujhe ma.aluum hai
be-yad-e-baizaa hai piiraan-e-haram kii aastii.n
saltanat le kar KHudaa o mustafaa ke naam par
ab KHudaa o mustafaa kii raah par ko.ii nahii.n
hai abhii shahbaaz kii Gairat par kargas KHanda-zan
''hai vahii sarmaaya-daarii banda-e-momin kaa dii.n''
is se ba.Dh kar aur kyaa fikr o amal kaa inqalaab
''paadshaaho.n kii nahii.n allaah kii hai ye zamii.n''
kaun samjhaa.e a.ndherii raat ko aa.iin-e-mahr
vaa.e bad-baKHtii ki KHud momin hai mahruum-e-yaqii.n
KHuun de kar KHaana-e-sayyaad ko raushan karo
jaa.o mashriq ke KHaraab-aabaad ko raushan karo

Shorish kashmiri
Nazm

dil mere sahra-naward-e-pir dil

naGma-dar-jaa.n raqs barpaa KHanda-bar-lab
dil tamannaa.o.n ke be-paayaa.n alaav ke qariib
dil mire sahraa-navard-e-piir dil
reg ke dil-shaad shahrii reg tuu
aur reg hii terii talab
reg kii nik.hat tire paikar me.n terii jaa.n me.n hai
reg sub.h-e-iid ke maanind zartaab-o-jaliil
reg sadiyo.n kaa jamaal
jashn-e-aadam par bichha.D kar milne vaalo.n kaa visaal
shauq ke lamhaat ke maanind aazaad-o-aziim
reg naGma-zan
ki zarre reg-zaaro.n kii vo paazeb-e-qadiim
jis pe pa.D saktaa nahii.n dast-e-la.iim
reg-e-sahraa zar-garii kii ek kii lahro.n se duur
chashma-e-makr-o-riyaa shahro.n se duur
reg shab-bedaar hai suntii hai har jaabir kii chaap
reg shab-bedaar hai nigaraa.n hai maanind-e-naqiib
dekhtii hai saaya-e-aamir kii chaap
reg har ayyaar Gaarat-gar kii maut
reg istibdaad ke tuGyaa.n ke shor-o-shar kii maut
reg jab uThtii hai u.D jaatii hai har faateh kii nii.nd
reg ke nezo.n se zaKHmii sab shahanshaaho.n ke KHvaab
reg ai sahraa kii reg
mujh ko apne jaagte zarro.n ke KHvaabo.n kii
na.ii ta.abiir de
reg ke zarro.n ubhartii sub.h tum
aa.o sahraa kii hado.n tak aa gayaa roz-e-tarab
dil mire sahraa-navard-e-piir dil
aa chuum reg
hai KHayaalo.n ke parii-zaado.n se bhii ma.asuum reg
reg-e-raqsaa.n maah-o-saal nuur tak raqsaa.n rahe
us kaa abresham mulaa.em narm-KHuu KHandaa.n rahe
dil mire sahraa-navard-e-piir dil
ye tamannaa.o.n kaa be-paayaa.n alaav
raah gum kar duu.n kii mash.al is ke lab par aa.o aa.o
tere maazii ke KHazaf rezo.n se jaagii hai ye aag
aag kii qurmuz zabaa.n par imbisaat-e-nau ke raag
dil mire sahraa-navard-e-piir dil
sargiraanii kii shab-e-rafta se jaag
kuchh sharar aaGosh sarsar me.n hai.n gum
aur kuchh ziina ba ziina sho.alo.n ke miinaar par cha.Dhte hu.e
aur kuchh tah me.n alaav kii abhii
muztarib lekin muzabzab tifl-e-kam-sin kii tarah
aag ziina aag ra.ngo.n kaa KHaziina
aag un lazzaat kaa sar-chashma hai
jis se letaa hai Gizaa ushshaaq ke dil kaa tapaak
chob-e-KHushk anguur us kii mai hai aag
sarsaraatii hai rago.n me.n iid ke din kii tarah
aag kaahin yaad se utrii hu.ii sadiyo.n kii ye afsaana-KHvaa.n
aane vaale qarnahaa kii daastaane.n lab pe hai.n
dil miraa sahraa-navard-e-piir dil sun kar javaa.n
aag aazaadii kaa dil-shaadii kaa naam
aag paidaa.ish kaa afzaa.ish kaa naam
aag ke phuulo.n me.n nasrii.n yaasman sumbul shafiiq-o-nastaran
aag aaraa.ish kaa zebaa.ish kaa naam
aag vo taqdiis dhul jaate hai.n jis se sab gunaah
aag insaano.n kii pahlii saa.ns ke maanind ik aisaa karam
umr kaa ik tuul bhii jis kaa nahii.n kaafii javaab
ye tamannaa.o.n kaa be-paayaa.n alaav gar na ho
is laq-o-daq me.n nikal aa.e.n kahii.n se bhe.Diye
is alaav ko sadaa raushan rakho
reg-e-sahraa ko bashaarat ho ki zinda hai alaav
bhe.Diyo.n kii chaap tak aatii nahii.n
aag se sahraa kaa rishta hai qadiim
aag se sahraa ke Te.Dhe re.ngne vaale
girah-aaluud zholiida daraKHt
jaagte hai.n naGma-dar-jaa.n raqs barpaa KHanda-bar-lab
aur manaa lete hai.n tanhaa.ii me.n jashn-e-maahtaab
un kii shaaKHe.n Gair-mara.ii tabl kii aavaaz par detii hai.n taal
biikH-o-bun se aane lagtii hai KHudaavandii jalaajil kii sadaa
aag se sahraa kaa rishta hai qadiim
rahravo.n sahraa-navardo.n ke liye hai rahnumaa
kaarvaano.n kaa sahaaraa bhii hai aag
aur sahraa.o.n kii tanhaa.ii ko kam kartii hai aag
aag ke chaaro.n taraf pashmiina-o-dastaar me.n lipTe hu.e
afsaana-go
jaise gird-e-chashm mizhgaa.n kaa hujuum
un ke hairat-naak dilkash tajrabo.n se
jab damak uThtii hai ret
zarra zarra bajne lagtaa hai misaal-e-saaz-e-jaa.n
gosh-bar-aavaaz rahte hai.n daraKHt
aur ha.ns dete hai.n apnii aarifaana be-niyaazii se kabhii
ye tamannaa.o.n kaa be-paayaa.n alaav gar na ho
reg apnii KHalvat-e-be-nuur-o-KHud-bii.n me.n rahe
apnii yaktaa.ii kii tahsii.n me.n rahe
is alaav ko sadaa raushan rakho
ye tamannaa.o.n kaa be-paayaa.n alaav gar na ho
asia africa pahnaa.ii kaa naam
be-kaar pahnaa.ii kaa naam
europe aur america daaraa.ii kaa naam
takraar-e-daaraa.ii kaa naam
meraa dil sahraa-navard-e-piir dil
jaag uThaa hai mashriq-o-maGrib kii aisii yak-dilii
ke kaarvaano.n kaa nayaa ruuyaa liye
yak-dilii aisii ki hogii fahm-e-insaa.n se varaa
yak-dilii aisii ki ham sab kah uThe.n
is qadar ujlat na kar
izhdihaam-e-gul na ban
kah uThe.n ham
tuu Gam-e-kul to na thii
ab lazzat-e-kul bhii na ban
roz-e-aasaa.ish kii bedardii na ban
yak-dilii ban aisaa sannaaTaa na ban
jis me.n taabistaa.n kii dopahro.n kii
be-haasil kasaalat ke sivaa kuchh bhii na ho
is jafaa-gar yak-dilii ke kaarvaa.n yuu.n aa.e.nge
dast-e-jaaduu-gar se jaise phuuT nikle ho.n tilism
ishq-e-haasil-KHez se yaa zor-e-paidaa.ii se jaise naa-gahaa.n
khul ga.e ho.n mashriq-o-maGrib ke jism
jism sadiyo.n ke aqiim
kaarvaa.n farKHanda-pai aur un kaa baar
kiisa kiisa taKHt-e-jam aur taaj-e-kai
kuuza kuuza fard kii satvat kii mai
jaama jaama roz-o-shab mehnat kaa KHai
naGma naGma hurriyat kii garm lai
saaliko firoz-baKHto aane vaale qaaflo
shahr se lauToge tum to paa.oge
ret ke sarhad pe jo ruuh-e-abad KHvaabiida thii
jaag uThii hai shikva-haa-e-nai se vo
ret kii tah me.n jo sharmiilii sahar ro.iida thii
jaag uThii hai hurriyat kii lai se vo
itnii doshiiza thii itnii mard-e-naa-diida thii sub.h
puuchh sakte the na us kii umr ham
dard se ha.nstii na thii
zarro.n kii ra.anaa.ii pe bhii ha.nstii na thii
ek mahjuubaana be-KHabarii me.n ha.ns detii thii sub.h
ab manaatii hai vo sahraa kaa jalaal
jaise izz-o-jal ke paa.nv kii yahii mehraab ho
zer-e-mehraab aa ga.ii ho us ko bedaarii kii raat
KHud janaab-e-izz-o-jal se jaise umiid-e-zafaaf
saare naa-karda gunaah is ke mu.aaf
sub.h-e-sahraa shaad-baad
ai uruus-e-izz-o-jal farKHanda ro taabinda kho
tuu ik aise hujra-e-shab se nikal kar aa.ii hai
dast-e-qaatil ne bahaayaa thaa jahaa.n har sej par
sai.nka.Do.n taaro.n kaa raKHshanda lahuu phuulo.n ke paas
sub.h-e-sahraa sar mire zaanuu pe rakh kar daastaa.n
un tamannaa ke shahiido.n kii na kah
un kii niima-ras uma.ngo.n aarzuu.o.n kii na kah
jin se milne kaa ko.ii imkaa.n nahii.n
shahd teraa jin ko nashsh-e-jaa.n nahii.n
aaj bhii kuchh duur is sahraa ke paar
dev kii diivaar ke niiche nasiim
roz-o-shab chaltii hai mub.ham KHauf se sahmii hu.ii
jis tarah shahro.n kii raaho.n par yatiim
naGma-bar-lab taaki un kii jaa.n kaa sannaaTaa ho duur
aaj bhii is reg ke zarro.n me.n hai.n
aise zarre aap hii apne Ganiim
aaj bhii is aag ke sho.alo.n me.n hai.n
vo sharar jo us kii tah me.n par-buriida rah ga.e
misl-e-harf naa-shuniida rah ga.e
sub.h-e-sahraa ai uruus-e-izz-o-jal
aa ki un kii daastaa.n dohraa.e.n ham
un kii izzat un kii azmat gaa.e.n ham
sub.h ret aur aag ham sab kaa jalaal
yak-dilii ke kaarvaa.n un kaa jamaal
aa.o
is tahliil ke halqe me.n ham mil jaa.e.n
aa.o
shaad-baaG apnii tamannaa.o.n kaa be-paayaa.n alaav

Noon Meem Rashid
Nazm

farsi urdu sabaq

aa.o bachcho sabaq pa.Dhaa.e.n faarsii aur urdu
gaay ko bolo gaav hamesha hirnii ko aahuu
ghaas gayaah aur aab hai paanii aur nadii hai juu
munshii jii ne sabaq pa.Dhaayaa faarsii aur urdu
huu haa huu haa huu
huu huu huu huu huu huu
aa.o bachcho sabaq pa.Dhaa.e.n faarsii aur urdu
aa.nkh ko diida kaan ko gosh aur aa.nkh kii bhau.n abruu
KHaal hai til aur gaal hai aariz choTii hai gesuu
munshii jii ne sabaq pa.Dhaayaa faarsii aur urdu
huu haa huu haa huu
huu huu huu huu huu
aa.o bachcho sabaq pa.Dhaa.e.n faarsii aur urdu
bachcho piir ke ma.anii buu.Dhaa baalaa bachcha tifl
rang hai ruup aur Diil hai qaamat shaana hai baazuu
munshii jii ne sabaq pa.Dhaayaa faarsii aur urdu
huu haa huu haa huu
huu huu huu huu huu
aa.o bachcho sabaq pa.Dhaa.e.n faarsii aur urdu
shab kii urdu raat hai bachcho din kii faarsii roz
raah hai rasta jangal sahraa samt ke ma.anii suu
munshii jii ne sabaq pa.Dhaayaa faarsii aur urdu
huu haa huu haa huu
huu huu huu huu huu
aa.o bachcho sabaq pa.Dhaa.e.n faarsii aur urdu
tuu tuu mai.n mai.n chho.D ke bachcho yaad karo ye lafz
man ke ma.anii mai.n hote hai.n tuu ke ma.anii tuu
munshii jii ne sabaq pa.Dhaayaa faarsii aur urdu
huu haa huu haa huu
huu huu huu huu huu

Rais Amrohvi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now