Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "gulsitaa.n"

Nazm MATCHES FOR "gulsitaa.n"

Nazm

tarana-e-hindi

saare jahaa.n se achchhaa hindostaa.n hamaaraa
ham bulbule.n hai.n is kii ye gulsitaa.n hamaaraa
Gurbat me.n ho.n agar ham rahtaa hai dil vatan me.n
samjho vahii.n hame.n bhii dil ho jahaa.n hamaaraa
parbat vo sab se uu.nchaa ham-saaya aasmaa.n kaa
vo santarii hamaaraa vo paasbaa.n hamaaraa
godii me.n kheltii hai.n is kii hazaaro.n nadiyaa.n
gulshan hai jin ke dam se rashk-e-jinaa.n hamaaraa
ai aab-ruud-e-ga.ngaa vo din hai yaad tujh ko
utraa tire kinaare jab kaarvaa.n hamaaraa
maz.hab nahii.n sikhaataa aapas me.n bair rakhnaa
hindii hai.n ham vatan hai hindostaa.n hamaaraa
yuunaan o misr o ruumaa sab miT ga.e jahaa.n se
ab tak magar hai baaqii naam-o-nishaa.n hamaaraa
kuchh baat hai ki hastii miTtii nahii.n hamaarii
sadiyo.n rahaa hai dushman daur-e-zamaa.n hamaaraa
'iqbaal' ko.ii mahram apnaa nahii.n jahaa.n me.n
maaluum kyaa kisii ko dard-e-nihaa.n hamaaraa

Allama Iqbal
Nazm

tulu-e-islam

daliil-e-sub.h-e-raushan hai sitaaro.n kii tunuk-taabii
ufuq se aaftaab ubhraa gayaa daur-e-giraa.n-KHvaabii
uruuq-murda-e-mashriq me.n KHuun-e-zindagii dau.Daa
samajh sakte nahii.n is raaz ko siinaa o faaraabii
musalmaa.n ko musalmaa.n kar diyaa tuufaan-e-maGrib ne
talaatum-haa-e-dariyaa hii se hai gauhar kii sairaabii
ataa momin ko phir dargaah-e-haq se hone vaalaa hai
shikoh-e-turkamaanii zehn hindii nutq aaraabii
asar kuchh KHvaab kaa Guncho.n me.n baaqii hai tuu ai bulbul
navaa-raa talKH-tarmii zan chuu zauq-e-naGma kam-yaabii
ta.Dap sehn-e-chaman me.n aashiyaa.n me.n shaaKH-saaro.n me.n
judaa paare se ho saktii nahii.n taqdiir-e-siimaabii
vo chashm-e-paak hai.n kyuu.n ziinat-e-bar-gustavaa.n dekhe
nazar aatii hai jis ko mard-e-Gaazii kii jigar-taabii
zamiir-e-laala me.n raushan charaaG-e-aarzuu kar de
chaman ke zarre zarre ko shahiid-e-justujuu kar de
sarishk-e-chashm-e-muslim me.n hai naisaa.n kaa asar paidaa
KHaliilullaah ke dariyaa me.n ho.nge phir guhar paidaa
kitaab-e-millat-e-baizaa kii phir shiiraaza-bandii hai
ye shaaKH-e-haashmii karne ko hai phir barg-o-bar paidaa
rabuud aa.n turk shiiraazii dil-e-tabrez-o-kaabul raa
sabaa kartii hai buu-e-gul se apnaa ham-safar paidaa
agar usmaaniyo.n par koh-e-Gam TuuTaa to kyaa Gam hai
ki KHuun-e-sad-hazaar-anjum se hotii hai sahar paidaa
jahaa.nbaanii se hai dushvaar-tar kaar-e-jahaa.n-biinii
jigar KHuu.n ho to chashm-e-dil me.n hotii hai nazar paidaa
hazaaro.n saal nargis apnii be-nuurii pe rotii hai
ba.Dii mushkil se hotaa hai chaman me.n diida-var paidaa
navaa-pairaa ho ai bulbul ki ho tere tarannum se
kabuutar ke tan-e-naazuk me.n shaahii.n kaa jigar paidaa
tire siine me.n hai poshiida raaz-e-zindagii kah de
musalmaa.n se hadiis-e-soz-o-saaz-e-zindagii kah de
KHudaa-e-lam-yazal kaa dast-e-qudrat tuu zabaa.n tuu hai
yaqii.n paidaa kar ai Gaafil ki maGluub-e-gumaa.n tuu hai
pare hai charKH-e-niilii-faam se manzil musalmaa.n kii
sitaare jis kii gard-e-raah ho.n vo kaarvaa.n to hai
makaa.n faanii makii.n faanii azal teraa abad teraa
KHudaa kaa aaKHirii paiGaam hai tuu jaavedaa.n tuu hai
Hinaa-band-e-uruus-e-laala hai KHuun-e-jigar teraa
tirii nisbat baraahiimii hai memaar-e-jahaa.n tuu hai
tirii fitrat amii.n hai mumkinaat-e-zindagaanii kii
jahaa.n ke jauhar-e-muzmar kaa goyaa imtihaa.n to hai
jahaan-e-aab-o-gil se aalam-e-jaaved kii KHaatir
nubuvvat saath jis ko le ga.ii vo armuGaa.n tuu hai
ye nukta sarguzisht-e-millat-e-baizaa se hai paidaa
ki aqvaam-e-zamiin-e-asia kaa paasbaa.n tuu hai
sabaq phir pa.Dh sadaaqat kaa adaalat kaa shujaa.at kaa
liyaa jaa.egaa tujh se kaam duniyaa kii imaamat kaa
yahii maqsuud-e-fitrat hai yahii ramz-e-musalmaanii
uKHuvvat kii jahaa.ngiirii mohabbat kii faraavaanii
butaan-e-ra.ng-o-KHuu.n ko to.D kar millat me.n gum ho jaa
na tuuraanii rahe baaqii na iiraanii na afGaanii
miyaan-e-shaaKH-saaraa.n sohbat-e-murG-e-chaman kab tak
tire baazuu me.n hai parvaaz-e-shaahiin-e-qahastaanii
gumaa.n-aabaad hastii me.n yaqii.n mard-e-musalmaa.n kaa
bayaabaa.n kii shab-e-taariik me.n qindiil-e-rohbaanii
miTaayaa qaisar o kisraa ke istibdaad ko jis ne
vo kyaa thaa zor-e-haidar faqr-e-buu-zar sidq-e-salmaanii
hu.e ahraar-e-millat jaada-paimaa kis tajammul se
tamaashaa.ii shigaaf-e-dar se hai.n sadiyo.n ke zindaanii
sabaat-e-zindagii iimaan-e-mohkam se hai duniyaa me.n
ki almaanii se bhii paa.enda-tar niklaa hai tuuraanii
jab is a.ngaara-e-KHaakii me.n hotaa hai yaqii.n paidaa
to kar letaa hai ye baal-o-par-e-ruuh-ul-amii.n paidaa
Gulaamii me.n na kaam aatii hai.n shamshiire.n na tadbiire.n
jo ho zauq-e-yaqii.n paidaa to kaT jaatii hai.n zanjiire.n
ko.ii andaaza kar saktaa hai us ke zor-e-baazuu kaa
nigaah-e-mard-e-momin se badal jaatii hai.n taqdiire.n
vilaayat paadshaahii ilm-e-ashiyaa kii jahaa.ngiirii
ye sab kyaa hai.n faqat ik nukta-e-iimaa.n kii tafsiire.n
baraahiimii nazar paidaa magar mushkil se hotii hai
havas chhup chhup ke siino.n me.n banaa letii hai tasviire.n
tamiiz-e-bandaa-o-aaqaa fasaad-e-aadmiyat hai
hazar ai chiira-dastaa.n saKHt hai.n fitrat kii ta.aziire.n
haqiiqat ek hai har shai kii KHaakii ho ki nuurii ho
lahuu KHurshiid kaa Tapke agar zarre kaa dil chiire.n
yaqii.n mohkam amal paiham mohabbat faatah-e-aalam
jihaad-e-zindagaanii me.n hai.n ye mardo.n kii shamshiire.n
che baayad mard raa tab-e-buland mashrab-e-naabe
dil-e-garme nigaah-e-paak-biine jaan-e-betaabe
uqaabii shaan se jhapTe the jo be-baal-o-par nikle
sitaare shaam ke KHuun-e-shafaq me.n Duub kar nikle
hu.e madfuun-e-dariyaa zer-e-dariyaa tairne vaale
tamaa.nche mauj ke khaate the jo ban kar guhar nikle
Gubaar-e-rahguzar hai.n kiimiyaa par naaz thaa jin ko
jabiine.n KHaak par rakhte the jo iksiir-gar nikle
hamaaraa narm-rau qaasid payaam-e-zindagii laayaa
KHabar detii thii.n jin ko bijliyaa.n vo be-KHabar nikle
haram rusvaa hu.aa piir-e-haram kii kam-nigaahii se
javaanaan-e-tataarii kis qadar saahab-nazar nikle
zamii.n se nuuryaan-e-aasmaa.n-parvaaz kahte the
ye KHaakii zinda-tar paa.enda-tar taabinda-tar nikle
jahaa.n me.n ahl-e-iimaa.n suurat-e-KHurshiid jiite hai.n
idhar Duube udhar nikle udhar Duube idhar nikle
yaqii.n afraad kaa sarmaaya-e-taamiir-e-millat hai
yahii quvvat hai jo suurat-gar-e-taqdiir-e-millat hai
tuu raaz-e-kun-fakaa.n hai apnii aa.nkho.n par ayaa.n ho jaa
KHudii kaa raaz-daa.n ho jaa KHudaa kaa tarjumaa.n ho jaa
havas ne kar diyaa hai Tuk.De Tuk.De nau-e-insaa.n ko
uKHuvvat kaa bayaa.n ho jaa mohabbat kii zabaa.n ho jaa
ye hindii vo KHuraasaanii ye afGaanii vo tuuraanii
tuu ai sharminda-e-saahil uchhal kar be-karaa.n ho jaa
Gubaar-aaluuda-e-ra.ng-o-nasab hai.n baal-o-par tere
tuu ai murG-e-haram u.Dne se pahle par-fishaa.n ho jaa
KHudii me.n Duub jaa Gaafil ye sirr-e-zindagaanii hai
nikal kar halqa-e-shaam-o-sahar se jaavedaa.n ho jaa
masaaf-e-zindagii me.n siirat-e-faulaad paidaa kar
shabistaan-e-mohabbat me.n hariir o parniyaa.n ho jaa
guzar jaa ban ke sail-e-tund-rau koh o bayaabaa.n se
gulistaa.n raah me.n aa.e to juu-e-naGma-KHvaa.n ho jaa
tire ilm o mohabbat kii nahii.n hai intihaa ko.ii
nahii.n hai tujh se ba.Dh kar saaz-e-fitrat me.n navaa ko.ii
abhii tak aadmii said-e-zabuun-e-shahryaarii hai
qayaamat hai ki insaa.n nau-e-insaa.n kaa shikaarii hai
nazar ko KHiira kartii hai chamak tahziib-e-haazir kii
ye sannaa.ii magar jhuuTe niguu.n kii reza-kaarii hai
vo hikmat naaz thaa jis par KHirad-mandaan-e-maGrib ko
havas ke panja-e-KHuunii.n me.n teG-e-kaar-zaarii hai
tadabbur kii fusuu.n-kaarii se mohkam ho nahii.n saktaa
jahaa.n me.n jis tamaddun kii binaa sarmaaya-daarii hai
amal se zindagii bantii hai jannat bhii jahannam bhii
ye KHaakii apnii fitrat me.n na nuurii hai na naarii hai
KHarosh-aamoz bulbul ho girah Gunche kii vaa kar de
ki tuu is gulsitaa.n ke vaaste baad-e-bahaarii hai
phir uTThii asia ke dil se chi.ngaarii mohabbat kii
zamii.n jaulaa.n-gah-e-atlas qabaayaan-e-tataarii hai
bayaa paidaa KHariidaa raast jaan-e-naa-tavaan-e-raa
pas az muddat guzaar uftaad barmaa kaarvaane raa
bayaa saaqii navaa-e-murG-zaar az shaaKH-saar aamad
bahaar aamad nigaar aamad nigaar aamad qaraar aamad
kashiid abr-e-bahaarii KHema andar vaadii o sahraa
sadaa-e-aabshaaraa.n az faraaz-e-koh-saar aamad
sarat gardam toham qaanuun peshii.n saaz dah saaqii
ki KHail-e-naGma-pardaazaa.n qataar andar qataar aamad
kanaar az zaahidaa.n bar-giir o bebaakaana saaGar-kash
pas az muddat azii.n shaaKH-e-kuhan baa.ng-e-hazaar aamad
ba-mushtaaqaa.n hadiis-e-KHvaajaa-e-badro hunain aavar
tasarruf-haa-e-pinhaanash ba-chashm-e-aashkaar aamad
digar shaaKH-e-KHaliil az KHuun-e-maa namnaak mii gardad
ba-baazaar-e-mohabbat naqd-e-maa kaamil ayyaar aamad
sar-e-KHaak-e-shahiire barg-haa-e-laala mii paasham
ki KHuunash baa-nihaal-e-millat-e-maa saazgaar aamad
bayaa taa-gul baa-afmaishaaniim o mai dar saaGar andaazem
falak raa saqf ba-shagaafem o tarh-e-diigar andaazem

Allama Iqbal
Nazm

intisab

aaj ke naam
aur
aaj ke Gam ke naam
aaj kaa Gam ki hai zindagii ke bhare gulsitaa.n se KHafaa
zard patto.n kaa ban
zard patto.n kaa ban jo miraa des hai
dard kii anjuman jo miraa des hai
clerko.n kii afsurda jaano.n ke naam
kirm-KHurda dilo.n aur zabaano.n ke naam
post-mano.n ke naam
taa.nge vaalo.n kaa naam
rail-baano.n ke naam
kaar-KHaano.n ke bhuuke jiyaalo.n ke naam
baadshaah-e-jahaa.n vaalii-e-maa-sivaa, naa.eb-ul-allaah fil-arz
dahqaa.n ke naam
jis ke Dhoro.n ko zaalim ha.nkaa le ga.e
jis kii beTii ko Daaku uThaa le ga.e
haath bhar khet se ek a.ngusht paTvaar ne kaaT lii hai
duusrii maaliye ke bahaane se sarkaar ne kaaT lii hai
jis kii pag zor vaalo.n ke paa.nv-tale
dhajjiyaa.n ho ga.ii hai
un dukhii maa.o.n ke naam
raat me.n jin ke bachche bilakte hai.n aur
nii.nd kii maar khaa.e hu.e baazu.o.n me.n sambhalte nahii.n
dukh bataate nahii.n
minnato.n zaariyo.n se bahalte nahii.n

Faiz Ahmad Faiz
Nazm

mulaqat

vo Gam jo is vaqt terii baa.nho.n
ke gulsitaa.n me.n sulag rahaa hai
vo Gam jo is raat kaa samar hai
kuchh aur tap jaa.e apnii aaho.n
kii aa.nch me.n to yahii sharar hai

Faiz Ahmad Faiz
Nazm

walida marhuma ki yaad mein

zarra zarra dahr kaa zindaanii-e-taqdiir hai
parda-e-majbuurii o bechaargii tadbiir hai
aasmaa.n majbuur hai shams o qamar majbuur hai.n
anjum-e-siimaab-paa raftaar par majbuur hai.n
hai shikast anjaam Gunche kaa subuu gulzaar me.n
sabza o gul bhii hai.n majbuur-e-numuu gulzaar me.n
naGma-e-bulbul ho yaa aavaaz-e-KHaamosh-e-zamiir
hai isii zanjiir-e-aalam-giir me.n har shai asiir
aa.nkh par hotaa hai jab ye sirr-e-majbuurii ayaa.n
KHushk ho jaataa hai dil me.n ashk kaa sail-e-ravaa.n
qalb-e-insaanii me.n raqs-e-aish-o-Gam rahtaa nahii.n
naGma rah jaataa hai lutf-e-zer-o-bam rahtaa nahii.n
ilm o hikmat rahzan-e-saamaan-e-ashk-o-aah hai
ya.anii ik almaas kaa Tuk.Daa dil-e-aagaah hai
garche mere baaG me.n shabnam kii shaadaabii nahii.n
aa.nkh merii maaya-daar-e-ashk-e-unnaabii nahii.n
jaantaa huu.n aah me.n aalaam-e-insaanii kaa raaz
hai navaa-e-shikva se KHaalii mirii fitrat kaa saaz
mere lab par qissa-e-naira.ngi-e-dauraa.n nahii.n
dil miraa hairaa.n nahii.n KHanda nahii.n giryaa.n nahii.n
par tirii tasviir qaasid girya-e-paiham kii hai
aah ye tardiid merii hikmat-e-mohkam kii hai
girya-e-sarshaar se buniyaad-e-jaa.n paa.inda hai
dard ke irfaa.n se aql-e-sa.ng-dil sharminda hai
mauj-e-duud-e-aah se aa.iina hai raushan miraa
ganj-e-aab-aavrd se maamuur hai daaman miraa
hairatii huu.n mai.n tirii tasviir ke e.ajaaz kaa
ruKH badal Daalaa hai jis ne vaqt kii parvaaz kaa
rafta o haazir ko goyaa paa-ba-paa is ne kiyaa
ahd-e-tiflii se mujhe phir aashnaa is ne kiyaa
jab tire daaman me.n paltii thii vo jaan-e-naa-tavaa.n
baat se achchhii tarah mahram na thii jis kii zabaa.n
aur ab charche hai.n jis kii shoKHii-e-guftaar ke
be-bahaa motii hai.n jis kii chashm-e-gauhar-baar ke
ilm kii sa.njiida-guftaarii bu.Dhaape kaa shu.uur
dunyavii e.azaaz kii shaukat javaanii kaa Guruur
zindagii kii auj-gaaho.n se utar aate hai.n ham
sohbat-e-maadar me.n tifl-e-saada rah jaate hai.n ham
be-takalluf KHanda-zan hai.n fikr se aazaad hai.n
phir usii kho.e hu.e firdaus me.n aabaad hai.n
kis ko ab hogaa vatan me.n aah meraa intizaar
kaun meraa KHat na aane se rahegaa be-qaraar
KHaak-e-marqad par tirii le kar ye fariyaad aa.uu.ngaa
ab du.aa-e-niim-shab me.n kis ko mai.n yaad aa.uu.ngaa
tarbiyat se terii me.n anjum kaa ham-qismat hu.aa
ghar mire ajdaad kaa sarmaaya-e-izzat hu.aa
daftar-e-hastii me.n thii zarrii.n varaq terii hayaat
thii saraapaa diin o duniyaa kaa sabaq terii hayaat
umr bhar terii mohabbat merii KHidmat-gar rahii
mai.n tirii KHidmat ke qaabil jab hu.aa tuu chal basii
vo javaa.n-qaamat me.n hai jo suurat-e-sarv-e-buland
terii KHidmat se hu.aa jo mujh se ba.Dh kar bahra-mand
kaarobaar-e-zindagaanii me.n vo ham-pahluu miraa
vo mohabbat me.n tirii tasviir vo baazuu miraa
tujh ko misl-e-tiflak-e-be-dast-o-paa rotaa hai vo
sabr se naa-aashnaa sub.h o masaa rotaa hai vo
tuKHm jis kaa tuu hamaarii kisht-e-jaa.n me.n bo ga.ii
shirkat-e-Gam se vo ulfat aur mohkam ho ga.ii
aah ye duniyaa ye maatam-KHaana-e-barnaa-o-piir
aadmii hai kis tilism-e-dosh-o-fardaa me.n asiir
kitnii mushkil zindagii hai kis qadar aasaa.n hai maut
gulshan-e-hastii me.n maanind-e-nasiim arzaa.n hai maut
zalzale hai.n bijliyaa.n hai.n qaht hai.n aalaam hai.n
kaisii kaisii duKHtaraan-e-maadar-e-ayyaam hai.n
kalba-e-iflaas me.n daulat ke kaashaane me.n maut
dasht o dar me.n shahr me.n gulshan me.n viiraane me.n maut
maut hai ha.ngaama-aaraa qulzum-e-KHaamosh me.n
Duub jaate hai.n safiine mauj kii aaGosh me.n
ne majaal-e-shikva hai ne taaqat-e-guftaar hai
zindagaanii kyaa hai ik tauq-e-guluu-afshaar hai
qaafile me.n Gair fariyaad-e-diraa kuchh bhii nahii.n
ik mataa-e-diida-e-tar ke sivaa kuchh bhii nahii.n
KHatm ho jaa.egaa lekin imtihaa.n kaa daur bhii
hai.n pas-e-noh parda-e-garduu.n abhii daur aur bhii
siina chaak is gulsitaa.n me.n laala-o-gul hai.n to kyaa
naala o fariyaad par majbuur bulbul hai.n to kyaa
jhaa.Diyaa.n jin ke qafas me.n qaid hai aah-e-KHizaa.n
sabz kar degii unhe.n baad-e-bahaar-e-jaavedaa.n
KHufta-KHaak-e-pai sipar me.n hai sharaar apnaa to kyaa
aarzii mahmil hai ye musht-e-Gubaar apnaa to kyaa
zindagii kii aag kaa anjaam KHaakistar nahii.n
TuuTnaa jis kaa muqaddar ho ye vo gauhar nahii.n
zindagii mahbuub aisii diida-e-qudrat me.n hai
zauq-e-hifz-e-zindagii har chiiz kii fitrat me.n hai
maut ke haatho.n se miT saktaa agar naqsh-e-hayaat
aam yuu.n us ko na kar detaa nizaam-e-kaa.enaat
hai agar arzaa.n to ye samjho ajal kuchh bhii nahii.n
jis tarah sone se jiine me.n KHalal kuchh bhii nahii.n
aah Gaafil maut kaa raaz-e-nihaa.n kuchh aur hai
naqsh kii naa-paa.edaarii se ayaa.n kuchh aur hai
jannat-e-nazaara hai naqsh-e-havaa baalaa-e-aab
mauj-e-muztar to.D kar ta.amiir kartii hai habaab
mauj ke daaman me.n phir us ko chhupaa detii hai ye
kitnii bedardii se naqsh apnaa miTaa detii hai ye
phir na kar saktii habaab apnaa agar paidaa havaa
to.Dne me.n us ke yuu.n hotii na be-parvaa havaa
is ravish kaa kyaa asar hai haiyat-e-taamiir par
ye to hujjat hai havaa kii quvvat-e-taamiir par
fitrat-e-hastii shahiid-e-aarzuu rahtii na ho
KHuub-tar paikar kii us ko justujuu rahtii na ho
aah siimaab-e-pareshaa.n anjum-e-garduu.n-faroz
shoKH ye chi.ngaariyaa.n mamnuun-e-shab hai jin kaa soz
aql jis se sar-ba-zaanuu hai vo muddat in kii hai
sarguzisht-e-nau-e-insaa.n ek saa.at un kii hai
phir ye insaa.n aa.n suu-e-aflaak hai jis kii nazar
qudsiyo.n se bhii maqaasid me.n hai jo paakiiza-tar
jo misaal-e-sham.a raushan mahfil-e-qudrat me.n hai
aasmaa.n ik nuqta jis kii vus.at-e-fitrat me.n hai
jis kii naadaanii sadaaqat ke liye betaab hai
jis kaa naaKHun saaz-e-hastii ke liye mizraab hai
sho.ala ye kam-tar hai garduu.n ke sharaaro.n se bhii kyaa
kam-bahaa hai aaftaab apnaa sitaaro.n se bhii kyaa
tuKHm-e-gul kii aa.nkh zer-e-KHaak bhii be-KHvaab hai
kis qadar nashv-o-numaa ke vaaste betaab hai
zindagii kaa sho.ala is daane me.n jo mastuur hai
KHud-numaa.ii KHud-fazaa.ii ke liye majbuur hai
sardi-e-marqad se bhii afsurda ho saktaa nahii.n
KHaak me.n dab kar bhii apnaa soz kho saktaa nahii.n
phuul ban kar apnii turbat se nikal aataa hai ye
maut se goyaa qabaa-e-zindagii paataa hai ye
hai lahad is quvvat-e-aashufta kii shiiraaza-band
Daaltii hai gardan-e-garduu.n me.n jo apnii kamand
maut tajdiid-e-mazaaq-e-zindagii kaa naam hai
KHvaab ke parde me.n bedaarii kaa ik paiGaam hai
KHuugar-e-parvaaz ko parvaaz me.n Dar kuchh nahii.n
maut is gulshan me.n juz sanjiidan-e-par kuchh nahii.n
kahte hai.n ahl-e-jahaa.n dard-e-ajal hai laa-davaa
zaKHm-e-furqat vaqt ke marham se paataa hai shifaa
dil magar Gam marne vaalo.n kaa jahaa.n aabaad hai
halqa-e-zanjiir-e-sub.h-o-shaam se aazaad hai
vaqt ke afsuu.n se thamtaa naala-e-maatam nahii.n
vaqt zaKHm-e-teG-e-furqat kaa ko.ii marham nahii.n
sar pe aa jaatii hai jab ko.ii musiibat naa-gahaa.n
ashk paiham diida-e-insaa.n se hote hai.n ravaa.n
rabt ho jaataa hai dil ko naala o fariyaad se
KHuun-e-dil bahtaa hai aa.nkho.n kii sarishk-aabaad se
aadmii taab-e-shakebaa.ii se go mahruum hai
us kii fitrat me.n ye ik ehsaas-e-naa-maaluum hai
jauhar-e-insaa.n adam se aashnaa hotaa nahii.n
aa.nkh se Gaa.eb to hotaa hai fanaa hotaa nahii.n
raKHt-e-hastii KHaak-e-Gam kii sho.ala-afshaanii se hai
sard ye aag is latiif ehsaas ke paanii se hai
aah ye zabt-e-fuGaa.n Gaflat kii KHaamoshii nahii.n
aagahii hai ye dilaasaa.ii faraamoshii nahii.n
parda-e-mashriq se jis dam jalva-gar hotii hai sub.h
daaG shab kaa daaman-e-aafaaq se dhotii hai sub.h
laala-e-afsurda ko aatish-qabaa kartii hai ye
be-zabaa.n taa.ir ko sarmast-e-navaa kartii hai ye
siina-e-bulbul ke zindaa.n se sarod aazaad hai
saik.Do.n naGmo.n se baad-e-sub.h-dam-aabaad hai
KHuftagaan-e-laala-zaar o kohsaar o ruud baar
hote hai.n aaKHir uruus-e-zindagii se ham-kanaar
ye agar aa.iin-e-hastii hai ki ho har shaam sub.h
marqad-e-insaa.n kii shab kaa kyuu.n na ho anjaam sub.h
daam-e-siimiin-e-taKHayyul hai miraa aafaaq-giir
kar liyaa hai jis se terii yaad ko mai.n ne asiir
yaad se terii dil-e-dard aashnaa maamuur hai
jaise ka.abe me.n du.aa.o.n se fazaa maamuur hai
vo faraa.ez kaa tasalsul naam hai jis kaa hayaat
jalva-gaahe.n us kii hai.n laakho.n jahaan-e-be-sabaat
muKHtalif har manzil-e-hastii ko rasm-o-raah hai
aaKHirat bhii zindagii kii ek jaulaa.n-gaah hai
hai vahaa.n be-haasilii kisht-e-ajal ke vaaste
saazgaar aab-o-havaa tuKHm-e-amal ke vaaste
nuur-e-fitrat zulmat-e-paikar kaa zindaanii nahii.n
ta.ng aisaa halqa-e-afkaar-e-insaanii nahii.n
zindagaanii thii tirii mahtaab se taabinda-tar
KHuub-tar thaa sub.h ke taare se bhii teraa safar
misl-e-aivaan-e-sahar marqad farozaa.n ho tiraa
nuur se maamuur ye KHaakii shabistaa.n ho tiraa
aasmaa.n terii lahad par shabnam-afshaanii kare
sabza-e-nau-rasta is ghar kii nigahbaanii kare

Allama Iqbal
Nazm

mere pyare watan

mere vatan, pyaare vatan
raahat ke gahvaare vatan
har dil ke ujyaare vatan
har aa.nkh ke taare vatan
gul-posh terii vaadiyaa.n
farhat-nishaa.n raahat-rasaa.n
tere chaman-zaaro.n pe hai
gulzaar-e-jannat kaa gumaa.n
har shaaKH phuulo.n kii chha.Dii
har naKHl-e-tuubaa hai yahaa.n
kausar ke chashme jaa-ba-jaa
tasniim har aab-e-ravaa.n
har barg ruuh-e-taazgii
har phuul jaan-e-gulsitaa.n
har baaG baaG-e-dil-kashii
har baaG baaG-e-be-KHizaa.n
dilkash charaagaahe.n tirii
Dhoro.n ke jin me.n kaarvaa.n
anjum-sifat gulhaa-e-nau
har taKHta-e-gul aasmaa.n
naqsh-e-surayyaa jaa-ba-jaa
har har ravish ik kahkashaa.n
terii bahaare.n daa.imii
terii bahaare.n jaavedaa.n
tujh me.n hai ruuh-e-zindagii
paiham ravaa.n paiham davaa.n
dariyaa vo tere tund-KHuu
jhiile.n vo terii be-karaa.n
shaam-e-avadh ke lab pe hai
husn-e-azal kii daastaa.n
kahtii hai raaz-e-sarmadii
sub.h-e-banaras kii zabaa.n
u.Dtaa hai haft-aflaak par
un kaar-KHaano.n kaa dhu.aa.n
jin me.n hai.n laakho.n mehnatii
san.at-garii ke paasbaa.n
terii banaras kii zarii
rashk-e-hariir-o-parniyaa.n
biidar kii fankaarii me.n hai.n
san.at kii sab baariikiyaa.n
azmat tire iqbaal kii
tere pahaa.Do.n se ayaa.n
dariyaa.o.n kaa paanii, tarii
taqdiis kaa andaaza-daa.n
kyaa 'bhaarte.ndu' ne kiyaa
ga.ngaa kii lahro.n kaa bayaa.n
'iqbaal' aur chakbast hai.n
azmat ke terii naGma-KHvaa.n
'josh' o 'firaaq' o 'pant' hai.n
tere adab ke tarjumaa.n
'tulsii' o 'KHusrav' hai.n terii
taariif me.n ratb-ul-lisaa.n
gaate hai.n naGma mil ke sab
uu.nchaa rahe teraa nishaa.n
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
tere nazaaro.n ke nagii.n
duniyaa kii KHaatam me.n nahii.n
saare jahaa.n me.n muntaKHab
kashmiir kii arz-e-hasii.n
fitrat kaa ra.ngii.n mo.ajaza
firdaus bar-ruu-e-zamii.n
firdaus bar-ruu-e-zamii.n
haa.n haa.n hamii.n ast o hamii.n
sarsabz jis ke dasht hai.n
jis ke jabal hai.n surmagii.n
meve ba-kasrat hai.n jahaa.n
shiirii.n misaal-e-a.ngbii.n
har za.afaraa.n ke phuul me.n
aks-e-jamaal-e-huura.ii.n
vo maalve kii chaa.ndnii
gum jis me.n ho.n duniyaa-o-dii.n
is KHitta-e-naira.ng me.n
har ik fazaa husn-aafrii.n
har shai me.n husn-e-zindagii
dilkash makaa.n dilkash zamii.n
har mard mard-e-KHuub-ruu
har ek aurat naaznii.n
vo taaj kii KHush-paikarii
har zaaviye se dil-nashii.n
san.at-garo.n ke daur kii
ik yaadgaar-e-marmarii.n
hotii hai jo har shaam ko
faiz-e-shafaq se ahmarii.n
dariyaa kii maujo.n se alag
yaa ik bat-e-nazzaara-bii.n
yaa taa.er-e-nuurii ko.ii
parvaaz karne ke qarii.n
yaa ahl-e-duniyaa se alag
ik aabid-e-uzlat-guzii.n
naqsh-e-ajantaa kii qasam
jachtaa nahii.n arzha.ng-e-chii۔n
shaan-e-ellora dekh kar
jhuktii hai aazar kii jabii.n
chittau.D ho yaa aagara
aise nahii.n qil.e kahii.n
but-gar ho yaa naqqaash ho
tuu sab kii azmat kaa amii.n
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
dilkash tire dasht o chaman
ra.ngii.n tire shahr o chaman
tere javaa.n raa.anaa javaa.n
tere hasii.n gul pairahan
ik anjuman duniyaa hai ye
tuu is me.n sadr-e-anjuman
tere muGannii KHush-navaa
shaa.er tire shiirii.n-suKHan
har zarra ik maah-e-mubii.n
har KHaar rashk-e-nastarii.n
Guncha tire sahraa kaa hai
ik naafa-e-mushk-e-KHutan
ka.nkar hai.n tere be-bahaa
patthar tire laal-e-yaman
bastii se jangal KHuub-tar
baaGo.n se husn afroz ban
vo mor vo kabk-e-darii
vo chauk.Dii bharte hiran
ra.ngii.n-adaa vo titliyaa.n
baa.nbnii me.n vo naago.n ke phan
vo sher jin ke naam se
larze me.n aa.e ahrman
kheto.n kii barkat se ayaa.n
faizaan-e-rabb-e-zul-minan
chashmo.n ke shiirii.n aab se
lazzat-kashaa.n kaam-o-dahan
taabinda teraa ahd-e-nau
raushan tiraa ahd-e-kuhan
kitno.n ne tujh par kar diyaa
qurbaan apnaa maal dhan
kitne shahiido.n ko mile
tere liye daar-o-rasan
kitno.n ko teraa ishq thaa
kitno.n ko thii terii lagan
tere jafaa-kash mehnatii
rakhte hai.n azm-e-kohkan
tere sipaahii suurmaa
be-misl yaktaa-e-zaman
'bhisham' saa jin me.n hausla
'arjun' saa jin me.n baa.nkpan
aalim jo faKHr-e-ilm hai.n
fankaar naazaa.n jin pe fan
'raa.e' o 'bos' o 'shergil'
'dinkar,' 'jigar' 'maithli-sharan'
'vallathol' 'maahir', bhaartii
'bachchan', 'mahaadevii' 'suman'
'krishnan', 'niraalaa', 'prem-chand'
'tagore' o 'aazaad' o 'raman'
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
khetii tirii har ik harii
dilkash tirii KHush-manzarii
terii bisaat-e-KHaak ke
zarre hai.n mahr-o-mushtarii
jhelum kaveri naag vo
ga.ngaa kii vo ga.ngotarii
vo narbadaa kii tamkanat
vo shaukat-e-godaavarii
paakiizgii sarjuu kii vo
jamunaa kii vo KHush-gauharii
dullarba aab-e-niil-guu.n
kashmiir kii niilam-parii
dilkash papiihe kii sadaa
koyal kii taane.n mad-bharii
tiitar kaa vo haq sirrahu
tuutii kaa vo vird-e-harii
suufii tire har daur me.n
karte rahe paiGambarii
'chishtii' o 'nanak' se milii
faqr-o-Ginaa ko bartarii
adl-e-jahaa.ngiirii me.n thii
muzmar re.aayaa-parvarii
vo nau-ratan jin se hu.ii
tahziib-e-daur-e-akbarii
rakhte the afGaan-o-muGal
ik saulat-e-askandarii
raanaa.on ke iqbaal kii
hotii hai kis se ham-sarii
saava.nt vo yodhdhaa tire
tere jiyaale vo jarii
niiatii vidur kii aaj tak
kartii hai terii rahbarii
ab tak hai mash.huur-e-zamaa.n
'chanakya' kii daanish-varii
vayaas aur vishvamitr se
muniyo.n kii shaan-e-qaisarii
paatanjalii o saa.nkh se
rishiyo.n kii hikmat-parvarii
baKHshe tujhe in.aam-e-nau
har daur charKH-e-chambarii
KHush-gauharii de aab ko
aur KHaak ko KHush-jauharii
zarro.n ko mahr-afshaaniyaa.n
qatro.n ko dariyaa-gustarii
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
tuu rahbar-e-nau-e-bashar
tuu amn kaa paiGaam-bar
paale hai.n tuu ne god me.n
saahib-KHirad saahib-e-nazar
afzal-tarii.n in sab me.n hai
baapuu kaa naam-e-mo'tabar
har lafz jis kaa dil-nashii.n
har baat jis kii pur-asar
jis ne lagaayaa dahr me.n
na.ara ye be-KHauf-o-KHatar
be-kaar hai.n tiir-o-sinaa.n
be-suud hai.n teG-o-tabar
hinsaa kaa rasta jhuuT hai
haq hai ahinsaa kii Dagar
darmaa.n hai ye har dard kaa
ye har maraz kaa chaara-gar
ja.ngaah-e-aalam me.n ko.ii
is se nahii.n behtar sipar
kartaa huu.n mai.n tere liye
ab ye du.aa-e-muKHtasar
raunaq pe ho.n tere chaman
sarsabz ho.n tere shajar
naKHl-e-umiid-e-behtarii
har fasl me.n ho baarvar
koshish ho duniyaa me.n ko.ii
KHitta na ho zer-o-zabar
teraa har ik baasii rahe
neko-sifat neko-siyar
har zan saliiqa-ma.nd ho
har mard ho saahib-hunar
jab tak hai.n ye arz o falak
jab tak hai.n ye shams o qamar
mere vatan, pyaare vatan
raahat ke gahvaare vatan
har dil ke ujyaare vatan
har aa.nkh ke taare vatan

Arsh Malsiyani
Nazm

parchhaiyan

1
ye shaam ik aa.iina-e-niil-guu.n ye nam ye mahak
ye manzaro.n kii jhalak khet baaG dariyaa gaa.nv
vo kuchh sulagte hu.e kuchh sulagne vaale alaav
siyaahiyo.n kaa dabe-paa.nv aasmaa.n se nuzuul
laTo.n ko khol de jis tarah shaam kii devii
puraane vaqt ke bargad kii ye udaas jaTaa.e.n
qariib o duur ye go dhuul kii ubhartii ghaTaa.e.n
ye kaa.enaat kaa Thahraa.o ye athaah sukuut
ye niim-tiirah fazaa roz-e-garm kaa taabuut
dhu.aa.n dhu.aa.n sii zamii.n hai ghulaa ghulaa saa falak
2
ye chaa.ndnii ye havaa.e.n ye shaaKH-e-gul kii lachak
ye daur-e-baada ye saaz-e-KHamosh fitrat ke
sunaa.ii dene lagii jagmagaate siino.n me.n
dilo.n ke naazuk o shaffaaf aabgiino.n me.n
tire KHayaal kii pa.Dtii hu.ii kiran kii khanak
3
ye raat chhantii havaa.o.n kii so.ndhii so.ndhii mahak
ye khet kartii hu.ii chaa.ndnii kii narm damak
sugandh raat kii raanii kii jab machaltii hai
fazaa me.n ruuh-e-tarab karvaTe.n badaltii hai
ye ruup sar se qadam tak hasiin jaise gunaah
ye aarizo.n kii damak ye fusuun-e-chashm-e-siyaah
ye dhaj na de jo ajantaa kii san.ato.n ko panaah
ye siina pa.D hii ga.ii dev lok kii bhii nigaah
ye sar-zamiin se aakaash kii parastish-gaah
utaarte hai.n tirii aartii sitaara o maah
sajal badan kii bayaa.n kis tarah ho kaifiyyat
sarasvatii ke bajaate hu.e sitaar kii gat
jamaal-e-yaar tire gulsitaa.n kii rah rah ke
jabiin-e-naaz tirii kahkashaa.n kii rah rah ke
dilo.n me.n aa.iina-dar-aa.iina suhaanii jhalak
4
ye chhab ye ruup ye joban ye saj ye dhaj ye lahak
chamakte taaro.n kii kirno.n kii narm narm phuvaar
ye rasmasaate badan kaa uThaan aur ye ubhaar
fazaa ke aa.iina me.n jaise lahlahaa.e bahaar
ye be-qaraar ye be-iKHtiyaar josh-e-numuud
ki jaise nuur kaa favvaara ho shafaq-aaluud
ye jalve paikar-e-shab-taab ke ye bazm-e-shohuud
ye mastiyaa.n ki mai-e-saaf-o-durd sab be-buud
KHajil ho laal-e-yaman uzv uzv kii vo Dalak
5
bas ik sitaara-e-shi.ngaraf kii jabii.n pe jhamak
vo chaal jis se labaalab gulaabiyaa.n chhalke.n
sakuu.n-numaa KHam-e-abru ye adh-khulii.n palke.n
har ik nigaah se aiman kii bijliyaa.n lapke.n
ye aa.nkh jis me.n ka.ii aasmaa.n dikhaa.ii pa.De.n
u.Daa de.n hosh vo kaano.n kii saada saada lave.n
ghaTaa.e.n vajd me.n aa.e.n ye gesu.o.n kii laTak
6
ye kaif-o-ra.ng-e-nazaara ye bijliyo.n kii lapak
ki jaise krishn se raadhaa kii aa.nkh ishaare kare
vo shoKH ishaare ki rabbaaniyat bhii jaa.e jhapak
jamaal sar se qadam tak tamaam sho.ala hai
sukuun jumbish o ram tak tamaam sho.ala hai
magar vo sho.ala ki aa.nkho.n me.n Daal de ThanDak
7
ye raat nii.nd me.n Duube hu.e se hai.n diipak
fazaa me.n bujh ga.e u.D u.D ke jugnu.o.n ke sharaar
kuchh aur taaro.n kii aa.nkho.n kaa ba.Dh chalaa hai KHumaar
fasurda chhiTkii hu.ii chaa.ndnii kaa dhundlaa Gubaar
ye bhiigii bhiigii uudaahaT ye bhiigaa bhiigaa nuur
ki jaise chashma-e-zulmaat me.n jale kaafuur
ye Dhaltii raat sitaaro.n ke qalb kaa ye gudaaz
KHunuk fazaa me.n tiraa shabnamii tabassum-e-naaz
jhalak jamaal kii ta.abiir KHvaab aa.iina-saaz
jahaa.n se jism ko dekhe.n tamaam naaz-o-niyaaz
jahaa.n nigaah Thahar jaa.e raaz-andar-raaz
sukuut-e-niim-shabii lahlahe badan kaa nikhaar
ki jaise nii.nd kii vaadii me.n jaagtaa sansaar
hai bazm-e-maah ki parchhaa.iyo.n kii bastii hai
fazaa kii oT se vo KHaamushii barastii hai
ki buu.nd buu.nd se paidaa ho gosh o dil me.n khanak
8
kisii KHayaal me.n hai Garq chaa.ndnii kii chamak
havaa.e.n nii.nd ke kheto.n se jaise aatii ho.n
hayaat o maut me.n sargoshiyaa.n sii hotii hai.n
karo.Do.n saal ke jaage sitaare nam-diida
siyaah gesu.o.n ke saa.np niim-KHvaabiida
ye pichhlii raat ye rag rag me.n narm narm kasak

Firaq Gorakhpuri
Nazm

goristan-e-shahi

aasmaa.n baadal kaa pahne KHirqa-e-deriina hai
kuchh mukaddar saa jabiin-e-maah kaa aa.iina hai
chaa.ndnii phiikii hai is nazzaara-e-KHaamosh me.n
sub.h-e-saadiq so rahii hai raat kii aaGosh me.n
kis qadar ashjaar kii hairat-fazaa hai KHaamushii
barbat-e-qudrat kii dhiimii sii navaa hai KHaamushii
baatin-e-har-zarra-e-aalim saraapaa dard hai
aur KHaamoshii lab-e-hastii pe aah-e-sard hai
aah jaulaa.n-gaah-e-aalam-giir yaanii vo hisaar
dosh par apne uThaa.e saik.Do.n sadiyo.n kaa baar
zindagii se thaa kabhii ma.amuur ab sunsaan hai
ye KHamoshii us ke ha.ngaamo.n kaa goristaan hai
apne sukkaan-e-kuhan kii KHaak kaa dil-daada hai
koh ke sar par misaal-e-paasbaa.n istaada hai
abr ke rauzan se vo baalaa-e-baam-e-aasmaa.n
naazir-e-aalam hai najm-e-sabz-faam-e-aasmaa.n
KHaak-baazii vus.at-e-duniyaa kaa hai manzar use
daastaa.n naakaami-e-insaa.n kii hai azbar use
hai azal se ye musaafir suu-e-manzil jaa rahaa
aasmaa.n se inqilaabo.n kaa tamaashaa dekhtaa
go sukuu.n mumkin nahii.n aalam me.n aKHtar ke liye
faatiha-KHvaanii ko ye Thahraa hai dam bhar ke liye
ra.ng-o-aab-e-zinagii se gul-ba-daaman hai zamii.n
saik.Do.n KHuu.n-gashta tahziibo.n kaa madfan hai zamii.n
KHvaab-gah shaaho.n kii hai ye manzil-e-hasrat-fazaa
diida-e-ibrat KHiraaj-e-ashk-e-gul-guu.n kar adaa
hai to goristaa.n magar ye KHaak-e-garduu.n-paaya hai
aah ik bargashta qismat qaum kaa sarmaaya hai
maqbaro.n kii shaan hairat-aafrii.n hai is qadar
jumbish-e-mizhgaa.n se hai chashm-e-tamaashaa ko hazar
kaifiyat aisii hai naakaamii kii is tasviir me.n
jo utar saktii nahii.n aa.iina-e-tahriir me.n
sote hai.n KHaamosh aabaadii ke ha.ngaamo.n se duur
muztarib rakhtii thii jin ko aarzuu-e-naa-subuur
qabr kii zulmat me.n hai in aaftaabo.n kii chamak
jin ke darvaazo.n pe rahtaa hai jabii.n-gustaar falak
kyaa yahii hai in shahanshaaho.n kii azmat kaa ma.aal
jin kii tadbiir-e-jahaa.nbaanii se Dartaa thaa zavaal
rob-e-faGfuurii ho duniyaa me.n ki shaan-e-qaisarii
Tal nahii.n saktii Ganiim-e-maut kii yuurish kabhii
baadshaaho.n kii bhii kisht-e-umr kaa haasil hai gor
jaada-e-azmat kii goyaa aaKHirii manzil hai gor
shorish-e-bazm-e-tarab kyaa uud kii taqriir kyaa
dardmandaan-e-jahaa.n kaa naala-e-shab-giir kyaa
arsa-e-paikaar me.n ha.ngaama-e-shamshiir kyaa
KHuun ko garmaane vaalaa naara-e-takbiir kyaa
ab ko.ii aavaaz soto.n ko jagaa saktii nahii.n
siina-e-viiraa.n me.n jaan-e-rafta aa saktii nahii.n
ruuh-e-musht-e-KHaak me.n zahmat-kash-e-bedaad hai
kuucha gard-e-nai hu.aa jis dam nafas fariyaad hai
zindagii insaa.n kii hai maanind-e-murG-e-KHush-navaa
shaaKH par baiThaa ko.ii dam chahchahaayaa u.D gayaa
aah kyaa aa.e riyaaz-e-dahr me.n ham kyaa ga.e
zindagii kii shaaKH se phuuTe khile murjhaa ga.e
maut har shaah o gadaa ke KHvaab kii taabiir hai
is sitamgar kaa sitam insaaf kii tasviir hai
silsila hastii kaa hai ik bahr-e-naa-paidaa-kanaar
aur is dariyaa-e-be-paayaa.n kii mauje.n hai.n mazaar
ai havas KHuu.n ro ki hai ye zindagii be-e'tibaar
ye sharaare kaa tabassum ye KHas-e-aatish-savaar
chaa.nd jo suurat-gar-e-hastii kaa ik ejaaz hai
pahne siimaabii qabaa mahv-e-KHiraam-e-naaz hai
charKH-e-be-anjum kii dahshatnaak vus.at me.n magar
bekasii is kii ko.ii dekhe zaraa vaqt-e-sahar
ik zaraa saa abr kaa Tuk.Daa hai jo mahtaab thaa
aaKHirii aa.nsuu Tapak jaane me.n ho jis kii fanaa
zindagii aqvaam kii bhii hai yuu.nhii be-e'tibaar
ra.ng-haa-e-rafta kii tasviir hai un kii bahaar
is ziyaa.n-KHaane me.n ko.ii millat-e-garduu.n-vaqaar
rah nahii.n saktii abad tak baar-e-dosh-e-rozgaar
is qadar qaumo.n kii barbaadii se hai KHuugar jahaa.n
dekhtaa be-e'tinaa.ii se hai ye manzar jahaa.n
ek suurat par nahii.n rahtaa kisii shai ko qaraar
zauq-e-jiddat se hai tarkiib-e-mizaaj-e-rozgaar
hai nagiin-e-dahr kii ziinat hamesha naam-e-nau
maadar-e-giitii rahii aabastan-e-aqvaam-e-nau
hai hazaaro.n qaafilo.n se aashnaa ye rahguzar
chashm-e-koh-e-nuur ne dekhe hai.n kitne taajvar
misr o baabul miT ga.e baaqii nishaa.n tak bhii nahii.n
daftar-e-hastii me.n un kii daastaa.n tak bhii nahii.n
aa dabaayaa mehr-e-iiraa.n ko ajal kii shaam ne
azmat-e-yuunaan-o-ruumaa luuT lii ayyaam ne
aah muslim bhii zamaane se yuu.nhii ruKHsat hu.aa
aasmaa.n se abr-e-aazaarii uThaa barsaa gayaa
hai rag-e-gul sub.h ke ashko.n se motii kii la.Dii
ko.ii suuraj kii kiran shabnam me.n hai uljhii hu.ii
siina-e-dariyaa shu.aa.o.n ke liye gahvaara hai
kis qadar pyaaraa lab-e-juu mehr kaa nazzaara hai
mahv-e-ziinat hai sanobar juu.ebaar-e-aa.iina hai
Guncha-e-gul ke liye baad-e-bahaar-e-aa.iina hai
na.ara-zan rahtii hai koyal baaG ke kaashaane me.n
chashm-e-insaa.n se nihaa.n patto.n ke uzlat-KHaane me.n
aur bulbul mutrib-e-ra.ngii.n navaa-e-gulsitaa.n
jis ke dam se zinda hai goyaa havaa-e-gulsitaa.n
ishq ke ha.ngaamo.n kii u.Dtii hu.ii tasviir hai
KHaama-e-qudrat kii kaisii shoKH ye tahriir hai
baaG me.n KHaamosh jalse gulsitaa.n-zaado.n ke hai.n
vaadi-e-kohsaar me.n na.are shabaa.n-zaado.n ke hai.n
zindagii se ye puraanaa KHaak-daa.n ma.amuur hai
maut me.n bhii zindagaanii kii ta.Dap mastuur hai
pattiyaa.n phuulo.n kii girtii hai.n KHizaa.n me.n is tarah
dast-e-tifl-e-KHufta se ra.ngii.n khilaune jis tarah
is nashaat-aabaad me.n go aish be-andaaza hai
ek Gam yaanii Gam-e-millat hamesha taaza hai
dil hamaare yaad-e-ahd-e-rafta se KHaalii nahii.n
apne shaaho.n ko ye ummat bhuulne vaalii nahii.n
ashk-baarii ke bahaane hai.n ye uj.De baam o dar
girya-e-paiham se biinaa hai hamaarii chashm-e-tar
dahr ko dete hai.n motii diida-e-giryaa.n ke ham
aaKHirii baadal hai.n ik guzre hu.e tuufaa.n ke ham
hai.n abhii sad-haa guhar is abr kii aaGosh me.n
barq abhii baaqii hai is ke siina-e-KHaamosh me.n
vaadi-e-gul KHaak-e-sahraa ko banaa saktaa hai ye
KHvaab se ummiid-e-dahqaa.n ko jagaa saktaa hai ye
ho chukaa go qaum kii shaan-e-jalaalii kaa zuhuur
hai magar baaqii abhii shaan-e-jamaalii kaa zuhuur

Allama Iqbal
Nazm

hindostan mera

duniyaa ke saare meve is gulsitaan me.n hai.n
sab nemate.n mayassar hindostaan me.n hai.n
hindostaan meraa, hindostaan meraa

Arsh Malsiyani
Nazm

urdu zaban

mashriq kaa gulsitaa.n ho ki maGrib kaa aashiyaa.n
viiraan kab makaan hai urduu zabaan kaa

Shayar Ali Shayar
Nazm

gulzar-e-watan

is kunj-e-dil-nashii.n me.n qabza na ho KHizaa.n kaa
jo ho gulo.n kaa taKHta taKHta ho ik jinaa.n kaa
bulbul ko ho chaman me.n sayyaad kaa na khaTkaa
KHush KHush ho shaaKH-e-gul par Gam ho na aashiyaa.n kaa
hubb-e-vatan kaa mil kar sab ek raag gaa.e.n
lahja judaa ho garche murGaan-e-naGma-KHvaa.n kaa
ek ek lafz me.n ho taasiir-e-buu-e-ulfat
andaaz dil-nashii.n ho ek ek daastaa.n kaa
murGaan-e-baaG kaa ho us shaaKH par nasheman
pahu.nche na haath jis tak sayyaad-e-aasmaa.n kaa
mausam ho josh-e-gul kaa aur din bahaar ke ho.n
aalam ajiib dilkash ho apne gulsitaa.n kaa
mil mil ke ham taraane hubb-e-vatan ke gaa.e.n
bulbul hai.n jis chaman ke giit us chaman ke gaa.e.n

Suroor Jahanabadi
Nazm

kaun le gaya

ai yaar-e-dil-nashii.n vo adaa kaun le gayaa
tere nagii.n se naqsh-e-vafaa kaun le gayaa
hal kar diyaa thaa jis ne mu.amma shabaab kaa
tujh se vo fikr-e-uqda-kushaa kaun le gayaa
thaa lutf pahle qahr me.n ab sirf qahr hai
zulmat se mauj-e-aab-e-baqaa kaun le gayaa
kyuu.n daf.atan labo.n pe KHamoshii sii chhaa ga.ii
is saaz-e-dil-nashii.n kii sadaa kaun le gayaa
aa.nkho.n se shaan-e-bazl-o-saKHaa kis ne chhiin lii
siine se zauq-e-lutf-o-ataa kaun le gayaa
thii.n jis kii rau se KHuun-e-tamannaa me.n surKHiyaa.n
ruKHsaar se vo ra.ng-e-vafaa kaun le gayaa
raato.n ko maa.ngnaa thaa du.aa merii diid kii
vo minnate.n vo zauq-e-du.aa kaun le gayaa
ai shaah banda-parvar-e-sultaan-e-narm-dil
dil se tire KHayaal-e-gadaa kaun le gayaa
pahlii sii vo kalaam me.n narmii nahii.n rahii
guftaar se mizaaj-e-sabaa kaun le gayaa
ab 'josh' ke liye hai.n na aa.nsuu na aah-e-sard
is gulsitaa.n kii aab-o-havaa kaun le gayaa

Josh Malihabadi
Nazm

pahli nazar

haa.e vo pahlii nazar vo us kii aa.nkho.n ke payaam
vo lajaa kar muskuraa kar dast-e-naazuk se salaam
har nazar me.n mai-kade Galtaa.n vo chanchal baa.nkpan
rang-e-gulshan bhii tasadduq yuu.n saraapaa gul-badan
sar pe jhuumar paa.nv me.n paazeb ik zohra-KHisaal
aur mujassam kahkashaa.n us ke dupaTTe kaa jamaal
barq kii tasviir-e-kul shaano.n pe larzaa.n choTiyaa.n
marmarii.n haatho.n me.n apnii dhun me.n gaatii chuu.Diyaa.n
kaan me.n bunde saraapaa aaftab-o-maahtaab
parda-daarii kyaa kahuu.n ruKH par tajallii kii naqaab
chaal me.n aahuu kii shoKHii chaal me.n badmastiyaa.n
har qadam par inqalaab-e-dahr kii rangiiniyaa.n
har takallum ik qayaamat har tabassum barq-rez
aur jis kii saadgii bhii ik fasaana hashr-KHez
baa-takalluf baa-adab sad-naaz vo jannat-badosh
ek din aa.ii mirii pursish ko vo nik.hat-farosh
aa.nkho.n aa.nkho.n me.n diyaa paiGaam-e-ishq-o-be-KHudii
zindagaanii ik sharaab-e-tund ban kar rah ga.ii
thii vo duzdiida nigaah-e-dil-sitaa.n mere liye
aa gayaa thaa mere ghar hii gulsitaa.n mere liye
jaise mil jaa.e KHudaa.ii is tarah masruur thaa
ghar kii raunaq kyaa kahuu.n us vaqt kaa ik tuur thaa
vo tahayyur-KHez vo kaafir nazaare al-amaa.n
shauq-e-mohkam al-amaa.n mub.ham ishaare al-amaa.n
merii jaanib dekh kar ha.ns ha.ns ke sharmaatii rahii
nik.hat-e-gesuu se ik ik saa.ns mahkaatii rahii
niichii nazro.n se vo kuchh kahnaa ba-unvaan-e-hayaa
aap kab tashriif laa.e.nge ye us kii iltijaa
kyaa kahuu.n kaise kahuu.n rah rah ke ye sochaa kiyaa
jab na kuchh bhii ban pa.Daa to dard me.n Duubaa kiyaa
yaas se uTThii nazar aa.nsuu bahaa kar rah ga.ii
aur zabaan-e-haal aaKHir la.Dkha.Daa kar rah ga.ii
al-Garaz hone lagii ruKHsat vo jaan-e-aarzuu
ashk barsaane lagaa aaKHir jahaan-e-aarzuu
us kaa jaanaa thaa ki viiraa.n ho ga.ii merii nazar
le ga.ii hamraah apne raunaq-e-diivaar-o-dar
kis qadar rangiin thii fitrat kii naqqaashii na puuchh
shoKHiyaa.n kartii hu.ii taaro.n kii shahzaadii na puuchh

Hasrat Jaipuri
Nazm

nae KHake

ye guftuguu guftuguu nahii.n hai biga.Dne ban.ne kaa marhala hai
dha.Dak rahaa hai fazaa kaa siina ki zindagii kaa mu.aamla hai
KHizaa.n rahe yaa bahaar aa.e tumhaare haatho.n me.n faisla hai
na chain be-taab bijliyo.n ko na mutma.in kaarvaan-e-shabnam
kabhii shaguufo.n ke garm tevar kabhii gulo.n kaa mizaaj barham
shaguufa o gul ke is tasaadum me.n gulsitaa.n ban gayaa jahannam

Kaifi Azmi
Nazm

naya sal

na.e saal kii yuu.n KHushii ham manaa.e.n
ki ruuThe hu.o.n ko gale se lagaa.e.n
ga.e saal ke saare Gam bhuul jaa.e.n
nayaa saal aayaa na.e gul khilaa.e.n
sitaaro.n se dhartii kaa daaman sajaa.e.n
nazaaro.n ko tasviir-e-jannat banaa.e.n
rahe raaj dhartii pe ab shaantii kaa
na chhaa.e.n kahii.n jang kii ab ghaTaa.e.n
miTaanaa hai ham ko kuduurat dilo.n se
har ik samt se aa.e.n bas ye sadaa.e.n
hamii.n paasbaa.n kal bane.nge vatan ke
kare.n ahd jo bhii vo kar ke dikhaa.e.n
nayaa saal yaa rab mubaarak ho sab ko
na.e roz-o-shab sab ko hii raas aa.e.n
na.e saal kii yuu.n kare.n peshvaa.ii
Gamo.n ko bhulaa kar faqat muskuraa.e.n
isii gulsitaa.n ke hai.n sab phuul 'jauhar'
khile.n muskuraa.e.n ha.nse.n aur ha.nsaa.e.n

Jauhar Rahmani
Nazm

ilm

ilm se ba.Dh ke kuchh bhii jahaa.n me.n nahii.n
phuul aisaa ko.ii gulsitaa.n me.n nahii.n

Amanullah Khalid
Nazm

mera watan

jahaa.n kaa chappa chappa gulsitaa.n hai
jahaa.n kii sar-zamii.n rashk-e-jinaa.n hai
tasadduq jis pe husn-e-aasmaa.n hai
himaala jis kii azmat kaa nishaa.n hai
jahaa.n gangaa jahaa.n jamunaa ravaa.n hai
vahii meraa vatan hindostaa.n hai
jahaa.n rangiin hotii hai.n fazaa.e.n
basii rahtii hai.n KHushbuu me.n havaa.e.n
dikhaate hai.n pahaa.D aur ban adaa.e.n
jahaa.n jharne kii mauje.n gungunaa.e.n
jahaa.n nadiyo.n kaa paanii kaif-e-jaa.n hai
vahii meraa vatan hindostaa.n hai
jahaa.n chaupaal hai.n gaa.nv kii ziinat
jahaa.n hai panghaTo.n kii qadr-o-qiimat
barastii hai jahaa.n kheto.n pe rahmat
jahaa.n fasle.n hai.n khaliyaano.n kii daulat
jahaa.n pe.Do.n ke saa.e me.n amaa.n hai
vahii meraa vatan hindostaa.n hai
jahaa.n sub.h-e-banaras hai misaalii
avadh kii shaam hai shaam-e-divaalii
jahaa.n hai 'maalva' kii shab niraalii
hai raajasthaan kii rangat gulaabii
jahaa.n dilkash dakan kaa har samaa.n hai
vahii meraa vatan hindostaa.n hai
jahaa.n maz.hab ke gahvaare hai.n raushan
kaliisaa aur gurudvaare hai.n raushan
masaajid aur miinaare hai.n raushan
jahaa.n ke but-kade saare hai.n raushan
jahaa.n sham-e-ibaadat zau-fishaa.n hai
vahii meraa vatan hindostaa.n hai
jahaa.n fan aur tahziibe.n amar hai.n
jahaa.n qilaa-o-qutub lutf-e-nazar hai.n
jahaa.n taaj-o-ajantaa jalva-gar hai.n
jahaa.n kii KHushnumaa shaam-o-sahar hai.n
jahaa.n har raah raah-e-kahkashaa.n hai
vahii meraa vatan hindostaa.n hai
jahaa.n 'raam'-o-'krishn'-o-'laxman' the
jahaa.n miiraa ke ho.nTo.n par bhajan the
jahaa.n 'suur' aur un ke kiirtan the
jahaa.n 'rai-daas' bhagTii me.n magan the
jahaa.n 'tulsii' the raamaa.en jahaa.n hai
vahii meraa vatan hindostaa.n hai
jahaa.n KHvaaja mu.iinuddiin aa.e
nizaamuddiim jis me.n jagmagaa.e
jahaa.n 'ras-KHaan'-o-'KHusrau' gungunaa.e
'kabiir'-o-'jaa.isii' ne naGme gaa.e
jahaa.n 'Gaalib' kii fikr-e-jaavedaa.n hai
vahii meraa vatan hindostaa.n hai
jahaa.n aurat ne kii hai hukmraanii
lahuu se apne likkhii hai kahaanii
jahaa.n paidaa hu.ii 'jhaa.nsii' kii raanii
hai 'raziya' jis kii azmat kii nishaanii
sunahrii jis kii har ik daastaa.n hai
vahii meraa vatan hindostaa.n hai
jahaa.n muGalo.n ne fan se raushnii kii
maraaTho.n ne jahaa.n taariiKH likkhii
jo dhartii raajputo.n kii hai dhartii
shujaa.at jis ko bundelo.n ne baKHshii
jahaa.n ba.ngaal kaa azm-e-javaa.n hai
vahii meraa vatan hindostaa.n hai

Rahbar Jaunpuri
Nazm

dilli pe qurban

bahaar-e-be-KHizaa.n dillii pe qurbaa.n
nishaat-e-jaavedaa.n dillii pe qurbaa.n
shamiim-e-gulsitaa.n dillii pe qurbaa.n
zamiin-o-aasmaa.n dillii pe qurbaa.n

Izhaar Malihabadi
Nazm

dhanak

aaj baadal KHuub barsaa aur baras kar khul gayaa
gulsitaa.n kii Daalii Daalii pattaa pattaa dhul gayaa
dekhnaa kyaa dhul gayaa saare kaa saaraa aasmaa.n
uudaa uudaa niilaa niilaa pyaaraa pyaaraa aasmaa.n
haT gayaa baadal kaa parda mil ga.ii kirno.n ko raah
saltanat par apnii phir KHurshiid ne Daalii nigaah
dhuup me.n hai ghaas par paanii ke qatro.n kii chamak
maat hai is vaqt motii aur hiire kii damak
de rahii hai lutf kyaa sarsabz pe.Do.n kii qataar
aur harii shaaKHo.n pe hai rangiin phuulo.n kii bahaar
kyaa parinde phir rahe hai.n chahchahaate har taraf
raagnii barsaat kii KHush ho ke gaate har taraf
dekhnaa vo kyaa achambhaa hai are vo dekhnaa
aasmaa.n par in daraKHto.n se pare vo dekhnaa
ye ko.ii jaaduu hai yaa sach-much hai ik rangii.n kamaa.n
vaah vaa kaisaa bhalaa lagtaa hai ye pyaaraa samaa.n
kis musavvir ne bhare hai.n rang aise KHushnumaa
is kaa har ik rang hai aa.nkho.n me.n jaise khub gayaa
ik jagah kaise ikaTThe kar diye hai.n saat rang
shoKH hai.n saato.n ke saato.n ik nahii.n hai maat rang
hai ye qudrat kaa nazaara aur kyaa kahiye ise
bas yahii jii chaahtaa hai dekhte rahiye ise
nanhe nanhe jam.a the paanii ke kuchh qatre vahaa.n
un pe Daalaa aks suuraj ne banaa dii ye kamaa.n
dekho dekho ab miTii jaatii hai vo pyaarii dhanak
dekhte hii dekhte gum ho ga.ii saarii dhanak
phir havaa me.n mil ga.ii vo sab kii sab kuchh bhii nahii.n
aa.nkhe.n mal mal kar na dekho aa.o ab kuchh bhii nahii.n

Hafeez Jalandhari
Nazm

mirza-ghaalib

raazdaan-e-zindagii ai tarjumaan-e-zindagii
hai tiraa har lafz zinda daastaan-e-zindagii
har tabassum se tire paidaa fuGaan-e-zindagii
har fuGaa.n terii nashiid-e-gulsitaan-e-zindagii
gulshan-e-husn-o-vafaa kii aabiyaarii tujh se hai
KHaak ke zarro.n ko faKHr-e-taaj-daarii tujh se hai

Mohammad Sadiq Zia
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now