Search result for "hunuud" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "hunuud"

Nazm MATCHES FOR "hunuud"

Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal

Nazm

masjid-e-qurtuba

silsila-e-roz-o-shab naqsh-gar-e-haadsaat
silsila-e-roz-o-shab asl-e-hayaat-o-mamaat
silsila-e-roz-o-shab taar-e-hariir-e-do-ra.ng
jis se banaatii hai zaat apnii qabaa-e-sifaat
silsila-e-roz-o-shab saaz-e-azal kii fuGaa.n
jis se dikhaatii hai zaat zer-o-bam-e-mumkinaat
tujh ko parakhtaa hai ye mujh ko parakhtaa hai ye
silsila-e-roz-o-shab sairafi-e-kaa.enaat
tuu ho agar kam ayaar mai.n huu.n agar kam ayaar
maut hai terii baraat maut hai merii baraat
tere shab-o-roz kii aur haqiiqat hai kyaa
ek zamaane kii rau jis me.n na din hai na raat
aani-o-faanii tamaam mojaza-haa-e-hunar
kaar-e-jahaa.n be-sabaat kaar-e-jahaa.n be-sabaat
avval o aaKHir fanaa baatin o zaahir fanaa
naqsh-e-kuhan ho ki nau manzil-e-aaKHir fanaa
hai magar is naqsh me.n ra.ng-e-sabaat-e-davaam
jis ko kiyaa ho kisii mard-e-KHudaa ne tamaam
mard-e-KHudaa kaa amal ishq se saahab faroG
ishq hai asl-e-hayaat maut hai us par haraam
tund o subuk-sair hai garche zamaane kii rau
ishq KHud ik sail hai sail ko letaa hai thaam
ishq kii taqviim me.n asr-e-ravaa.n ke sivaa
aur zamaane bhii hai.n jin kaa nahii.n ko.ii naam
ishq dam-e-jibra.iil ishq dil-e-mustafaa
ishq KHudaa kaa rasuul ishq KHudaa kaa kalaam
ishq kii mastii se hai paikar-e-gil taabnaak
ishq hai sahbaa-e-KHaam ishq hai kaas-ul-karaam
ishq faqiih-e-haram ishq amiir-e-junuuud
ishq hai ibnus-sabiil is ke hazaaro.n maqaam
ishq ke mizraab se naGma-e-taar-e-hayaat
ishq se nuur-e-hayaat ishq se naar-e-hayaat
ai haram-e-qurtuba ishq se teraa vajuud
ishq saraapaa davaam jis me.n nahii.n raft o buud
ra.ng ho yaa KHisht o sang cha.ng ho yaa harf o saut
mojaza-e-fan kii hai KHuun-e-jigar se numuud
qatra-e-KHuun-e-jigar sil ko banaataa hai dil
KHuun-e-jigar se sadaa soz o suruur o suruud
terii fazaa dil-faroz merii navaa siina-soz
tujh se dilo.n kaa huzuur mujh se dilo.n kii kushuud
arsh-e-mo.allaa se kam siina-e-aadam nahii.n
garche kaf-e-KHaak kii had hai sip.har-e-kabuud
paikar-e-nuurii ko hai sajda mayassar to kyaa
us ko mayassar nahii.n soz-o-gudaaz-e-sajuud
kaafir-e-hindi huu.n mai.n dekh miraa zauq o shauq
dil me.n salaat o duruud lab pe salaat o duruud
shauq mirii lai me.n hai shauq mirii nai me.n hai
naGma-e-allaah-huu mere rag-o-pai me.n hai
teraa jalaal o jamaal mard-e-KHudaa kii daliil
vo bhii jaliil o jamiil tuu bhii jaliil o jamiil
terii binaa paa.edaar tere sutuu.n be-shumaar
shaam ke sahraa me.n ho jaise hujuum-e-nuKHiil
tere dar-o-baam par vaadii-e-aiman kaa nuur
teraa minaar-e-buland jalva-gah-e-jibra.iil
miT nahii.n saktaa kabhii mard-e-musalmaa.n ki hai
us kii azaano.n se faash sirr-e-kaliim-o-KHaliil
us kii zamii.n be-huduud us kaa ufuq be-saGuur
us ke samundar kii mauj dajla o danyuub o niil
us ke zamaane ajiib us ke fasaane Gariib
ahd-e-kuhan ko diyaa us ne payaam-e-rahiil
saaqi-e-rabaab-e-zauq faaras-e-maidaan-e-shauq
baada hai us kaa rahiiq teG hai us kii asiil
mard-e-sipaahii hai vo us kii zirah laa-ilaah
saaya-e-shamshiir me.n us kii panah laa-ilaah
tujh se hu.aa aashkaar banda-e-momin kaa raaz
us ke dino.n kii tapish us kii shabo.n kaa gudaaz
us kaa maqaam-e-buland us kaa KHayaal-e-aziim
us kaa suruur us kaa shauq us kaa niyaaz us kaa naaz
haath hai allaah kaa banda-e-momin kaa haath
Gaalib o kaar-aafrii.n kaar-kushaa kaarsaaz
KHaakii o nuurii-nihaad banda-e-maulaa-sifaat
har do-jahaa.n se Ganii us kaa dil-e-be-niyaaz
us kii umiide.n qaliil us ke maqaasid jaliil
us kii adaa dil-fareb us kii nigah dil-navaaz
aaj bhii is des me.n aam hai chashm-e-Gazaal
aur nigaaho.n ke tiir aaj bhii hai.n dil-nashii.n
buu-e-yaman aaj bhii us kii havaa.o.n me.n hai
ra.ng-e-hijaaz aaj bhii us kii navaa.o.n me.n hai
diida-e-anjum me.n hai terii zamii.n aasmaa.n
aah ki sadiyo.n se hai terii fazaa be-azaa.n
kaun sii vaadii me.n hai kaun sii manzil me.n hai
ishq-e-balaa-KHez kaa qaafla-e-saKHt-jaa.n
dekh chukaa almanii shorish-e-islaah-e-dii.n
jis ne na chho.De kahii.n naqsh-e-kuhan ke nishaa.n
harf-e-Galat ban ga.ii ismat-e-piir-e-kunisht
aur hu.ii fikr kii kashti-e-naazuk ravaa.n
chashm-e-faraansiis bhii dekh chukii inqalaab
jis se digar-guu.n hu.aa maGrabiyo.n kaa jahaa.n
millat-e-ruumii-nizhaad kohna-parastii se piir
lazzat-e-tajdiida se vo bhii hu.ii phir javaa.n
ruuh-e-musalmaa.n me.n hai aaj vahii iztiraab
raaz-e-KHudaa.ii hai ye kah nahii.n saktii zabaa.n
narm dam-e-guftuguu garm dam-e-justujuu
razm ho yaa bazm ho paak-dil o paak-baaz
nuqta-e-parkaar-e-haq mard-e-KHudaa kaa yaqii.n
aur ye aalam tamaam vahm o tilism o majaaz
aql kii manzil hai vo ishq kaa haasil hai vo
halqa-e-aafaaq me.n garmi-e-mahfil hai vo
kaaba-e-arbaab-e-fan satvat-e-diin-e-mubii.n
tujh se haram martabat undulusiyo.n kii zamii.n
hai tah-e-garduu.n agar husn me.n terii naziir
qalb-e-musalmaa.n me.n hai aur nahii.n hai kahii.n
aah vo mardaan-e-haq vo arabii shahsavaar
haamil-e-KHalq-e-aziim saahab-e-sidq-o-yaqii.n
jin kii hukuumat se hai faash ye ramz-e-Gariib
saltanat-e-ahl-e-dil faqr hai shaahii nahii.n
jin kii nigaaho.n ne kii tarbiyat-e-sharq-o-Garb
zulmat-e-europe me.n thii jin kii KHirad-raah-bii.n
jin ke lahuu ke tufail aaj bhii hai.n undulusii
KHush-dil o garam-iKHtilaat saada o raushan-jabii.n
dekhiye is bahr kii tah se uchhaltaa hai kyaa
gumbad-e-niilofarii rang badaltaa hai kyaa
vaadi-e-koh-saar me.n Garq-e-shafaq hai sahaab
laal-e-badaKHshaa.n ke Dher chho.D gayaa aaftaab
saada o pur-soz hai duKHtar-e-dahqaa.n kaa giit
kashtii-e-dil ke liye sail hai ahd-e-shabaab
aab-e-ravaan-e-kabiir tere kinaare ko.ii
dekh rahaa hai kisii aur zamaane kaa KHvaab
aalam-e-nau hai abhii parda-e-taqdiir me.n
merii nigaaho.n me.n hai us kii sahar be-hijaab
parda uThaa duu.n agar chehra-e-afkaar se
laa na sakegaa fara.ng merii navaa.o.n kii taab
jis me.n na ho inqalaab maut hai vo zindagii
ruuh-e-umam kii hayaat kashmakash-e-inqilaab
suurat-e-shamshiir hai dast-e-qazaa me.n vo qaum
kartii hai jo har zamaa.n apne amal kaa hisaab
naqsh hai.n sab naa-tamaam KHuun-e-jigar ke baGair
naGma hai saudaa-e-KHaam KHuun-e-jigar ke baGair

Allama Iqbal

Nazm

aaj ki raat

aaj kii raat saaz-e-dard na chhe.D
dukh se bharpuur din tamaam hu.e
aur kal kii KHabar kise ma.aluum
dosh-o-fardaa kii miT chukii hai.n huduud
ho na ho ab sahar kise ma.aluum
zindagii hech! lekin aaj kii raat
ezdiyyat hai mumkin aaj kii raat
aaj kii raat saaz-e-dard na chhe.D
ab na dohraa fasaana-haa-e-alam
apnii qismat pe sogvaar na ho
fikr-e-fardaa utaar de dil se
umr-e-rafta pe ashk-baar na ho
ahd-e-Gam kii hikaayate.n mat puuchh
ho chukii.n sab shikaayate.n mat puuchh
aaj kii raat saaz-e-dard na chhe.D

Faiz Ahmad Faiz

Nazm

ilm ki zarurat

jahaa.n me.n har taraf hai ilm hii kii garm-baazaarii
zamii.n se aasmaa.n tak bas isii kaa faiz hai jaarii
yahii sar-chashma-e-aslii hai tahziib-o-tamaddun kaa
baGair is ke bashar honaa bhii hai ik saKHt biimaarii
banaataa hai yahii insaan ko kaamil-tariin insaa.n
sikhaataa hai yahii aKHlaaq o iisaar o ravaa-daarii
yahii qaumo.n ko pahu.nchaataa hai baam-e-auj-o-rif.at par
yahii mulko.n ke andar phuu.nktaa hai ruuh-e-bedaarii
isii ke naam kaa chaltaa hai sikka saare aalam me.n
isii ke sar pe rahtaa hai hamesha taaj-e-sardaarii
isii ke sab karishme ye nazar aate hai.n duniyaa me.n
isii ke dam se raunaq aalam-e-imkaa.n kii hai saarii
ye laa-silkii, ye telephone ye raile.n, ye tayyaare
ye zer-e-aab o baalaa-e-falak insaa.n kii tarraarii
huduud-e-istavaa qutbain se yuu.n ho ga.e mudGam
ki hai ab rub.a masko.n jaise ghar kii chaar-diivaarii
samundar ho ga.e paayaab sahraa bin ga.e gulshan
kiyaa science ne bhii e.ataraaf-e-ijz-o-naachaarii
buKHaar o barq kaa jarraar lashkar hai ab aamaada
ugalvaa le zamiin o aasmaa.n kii daulate.n saarii
Garaz chaaro.n taraf ab ilm hii kii baadshaahii hai
ki us ke baazuu.o.n me.n quvvat-e-dast-e-ilaahii hai
nigaah-e-Gaur se dekho agar haalaat-e-insaanii
to ho saktaa hai hal ye uqda-e-mushkil ba-aasaanii
vahii qaume.n taraqqii ke madaarij par hai.n faa.eq-tar
ki hai jin me.n tamaddun aur siyaasat kii faraavaanii
isii ke zo.am me.n hai germany charKH-e-tafaaKHur par
isii ke zor par mirriiKH kaa ham-sar hai jaapaanii
isii kii quvvat-e-baazuu pe hai maGruur america
isii ke bil par la.Dkii ho rahii hai rustam-e-saanii
ishaare par isii ke naql-o-harakat hai sab italy kii
isii ke taaba-e-farmaan hai.n ruusii o iiraanii
isii ke jumbish-e-abruu pe hai england kaa Garra
isii ke hai.n sab aavurde francisi o albaanii
ko.ii mulk ab nahii.n jin me.n ye jauhar ho na raKHshanda
na Gaafil is se chiinii hai.n na shaamii hai.n na afGaanii
baGair is ke jo rahnaa chaahte hai.n is zamaane me.n
samajh rakkhe.n fanaa un ke liye hai hukm-e-rabbaanii
zamaana phe.nk degaa KHud unhe.n qa.ar-e-halaakat me.n
vo apne haath se ho.nge KHud apnii qabr ke baanii
zamaane me.n jise ho saahib-e-fat.h-o-zafar honaa
zaruurii hai use ilm-o-hunar se bahra-var honaa
taraqqii kii khulii hai.n shaahraahe.n dahr me.n har suu
nazar aataa hai tahziib-o-tamaddun se jahaa.n mamluu
chale jaate hai.n u.Dte shahsavaaraan-e-falak-paimaa
KHiraaj-e-tahniyat lete hu.e karte hu.e jaaduu
guzarte jaa rahe hai.n duusro.n ko chho.Dte piichhe
kabhii hotaa hai sahraa mustaqar un kaa kabhii Taapu
kamar baa.ndhe hu.e din raat chalne par hai.n aamaada
dimaaG afkaar se aur dil vufuur-e-shauq se maluul
alag rah kar KHayaal-e-zahmat o ehsaas-e-raahat se
lage hai.n apnii apnii fikr me.n baa-KHaatir-e-yaksuu
magar ham hai.n ki aslan his nahii.n ham ko ko.ii is kii
hamaare paa-e-himmat in maraahil me.n hai.n be-qaabuu
jahaa.n pahlaa qadam rakkhaa thaa roz-e-avvalii.n ham ne
nahii.n sarke is apne aslii markaz se ba-qadr-e-muu
ye haalat hai ki ham par band hai har ek darvaaza
nazar aataa nahii.n hargiz ko.ii ummiid kaa pahluu
magar vaa-hasrataa phir bhii ham apne zo.am-e-baatil me.n
samajhte hai.n zamaane bhar se aage KHud ko manzil me.n
zaruurat hai ki ham me.n raushnii ho ilm kii paidaa
nazar aa.e hame.n bhii taaki asl-e-haalat-e-duniyaa
hame.n ma.aluum ho haalaat ab kyaa hai.n zamaane ke
hamaare saath kaa jo qaafila thaa vo kahaa.n pahu.nchaa
jo pastii me.n the ab vo jalva-gar hai.n baam-e-rif.at par
jo baalak be-nishaa.n the aaj hai in kaa alam barpaa
hamaarii KHuubiyaa.n sab duusro.n ne chhiin lii.n ham se
zamaane ne hame.n itnaa jhi.njho.Daa kar diyaa na.ngaa
ravaa-daarii, uKHuvvat, dostii, iisaar, hamdardii
KHayaal-e-mulk-o-millat dard-e-qaum, andesha-e-fardaa
ye sab jauhar hamaare the kabhii ai vaa.e-mahruumii
bane hai.n KHuubii-e-qismat se jo ab Gair kaa hissaa
agar ho jaa.e.n raaGib ab bhii ham ta.aliim kii jaanib
to kar sakte hai.n ab bhii mulk me.n ham zindagii paidaa
bahut kuchh vaqt ham ne kho diyaa hai lekin is par bhii
agar chaahe.n to kar de.n pesh-rau ko apne ham paspaa
nikammaa kar diyaa hai kaahilii ne go hame.n lekin
rago.n me.n hai hamaarii KHuun abhii tak dau.Dtaa phirtaa
ko.ii maKHfii haraarat gar hamaare dil ko garmaa de
hamaare jism me.n phir zindagii kii ruuh dau.Daa de
vatan vaalo bahut Gaafil rahe ab hosh me.n aa.o
uTho be-daar ho aql-o-KHirad ko kaam me.n laa.o
tumhaare qaum ke bachcho.n me.n hai ta.aliim kaa fuqdaa.n
ye gutthii saKHt pechiida hai is ko jald suljhaa.o
yahii bachche bil-aaKHir tum sabho.n ke jaa-nashii.n ho.nge
tum apne saamne jaisaa unhe.n chaaho banaa jaa.o
bahut hii ra.nj-dah ho jaa.egii us vaqt kii Gaflat
kahii.n aisaa na ho mauqa.a nikal jaane pe pachhtaa.o
ye hai kaar-e-aham do chaar is ko kar nahii.n sakte
KHudaa-raa tum bhii apne farz kaa ehsaas farmaa.o
ye bojh aisaa nahii.n jis ko uThaa le.n chaar chhe mil kar
sahaaraa do, sahaaraa duusro.n se is me.n dilvaa.o
jo zii-ehsaas hai.n haasil karo tum KHidmate.n un kii
jo zii-parvaa hai.n un ko jis tarah ho us taraf laa.o
Garaz jaise bhii ho jis shakl se bhii ho ye laazim hai
tum apne qaum ke bachcho.n ko ab ta.aliim dilvaa.o
agar tum musta.iddii ko banaa loge shi.aar apnaa
yaqii.n jaano ki mustaqbil hai behad shaandaar apnaa
KHudaavandaa! du.aa.o.n me.n hamaarii ho asar paidaa
shab-e-Gaflat hamaarii phir kare nuur-e-sahar paidaa
hamaare saare KHvaabiida qavaa be-daar ho jaa.e.n
sar-e-nau ho phir in me.n zindagii kii karr-o-farr paidaa
hame.n ehsaas ho ham kaun the aur aaj ham kyaa hai.n
kare.n maahaul-e-mulkii ke liye gahrii nazar paidaa
milaa rakkhaa hai apne jauhar-e-kaamil ko miTTii me.n
ham ab bhii KHaak se kar sakte hai.n la.al-o-guhar paidaa
agar chaahe.n to ham mushkil vatan kii dam me.n hal kar de.n
hazaaro.n suurate.n kar sakte hai.n ham kaargar paidaa
ba-zaahir go ham ik tuuda hai.n bilkul raakh kaa lekin
agar chaahe.n to KHaakistar se kar de.n sau sharar paidaa
vatan kaa nakbat o aflaas kho de.n ham ishaare me.n
jahaa.n Thokar lagaa de.n ho vahii.n se kaan-e-zar paidaa
ham is manzil ke aaKHir par pahu.nch kar bil-yaqii.n dam le.n
agar kuchh taaza-dam ho jaa.e.n apne ham-safar paidaa
jo koshish muttahid ho kar kahii.n ik baar ho jaa.e
yaqii.n hai mulk kii qismat kaa be.Daa paar ho jaa.e

Ahmaq Phaphoondvi

Nazm

urdu-e-mualla

faarsii hindii kii aamezish se hai is kaa vajuud
yaadgaar-e-ittihaad-e-ahl-e-islaam-o-hanuud
dhuup chhaa.n ke rang kii hai vo qabaa-e-hast-o-buud
kaar-gaah-e-hind se mansuub jis ke taar-o-puud
suft-o-sa.ngii.n yaa libaas-e-aariyat baariik hai
jaama-zebii se qad-e-mauzuu.n par is ke Thiik hai

Safi Lakhnavi

Nazm

jhil kinare

ya.anii duur ke Dhol hunuuz
ik duuje se hai.n mahfuuz
ishq ki KHaatir bilkul Thiik

Om Bhutkar Maghloob

Nazm

aazadi

chaar samt kii diivaar
chaahe kitnii phailii ho
aap kaa ahaata hai
aap kaa hai gheraav
kyuu.n giraft me.n aa.uu.n
kyuu.n mujhe ko.ii ghere
sirf ek KHvaahish hai
be-huduud aazaadii!

Ehsan Akbar

Nazm

shisha-e-saat ka ghubar

mai.n zinda thaa
magar mai.n tere surKH niil-guu.n safed bulbule me.n qaid thaa
havaa vasii.a thii magar huduud se rihaa na thii
na mere par shikasta the na merii saa.ns kam
thaa bulbule kii kaa.enaat me.n miraa hii dam-qadam
magar mirii u.Daan surKH niil-guu.n safed maqbare ke
aaKHirii KHutuut se sivaa na thii
mai.n haal ke athaah paaniyo.n me.n Garq
yaa guzashta vaqt ke bha.nvar ke dast-e-aatishii.n me.n ek said-e-zard thaa

Shamsur Rahman Faruqi

Nazm

husn najat-dahinda hai

kyuu.n nahii.n buujh letii aulaad-e-aadam
ki khul jaa.egaa saaraa chhupaa.o
ek haibatnaak KHaalii Thahraa.o me.n
jo ek saffaak bedaarii se mohr-band hai
ek madfuun parvaaz kii tarah
ek hunuut-shuda ufuq kii tarah
bil-aaKHir hastii kii zaad-buum par dhund chhaa ga.ii
ab cockroach Gaarat-gar faateh hai.n
us kaa.enaat ke jahaa.n vaqt abhii ajnabii nahii.n hu.aa
un kii saltanat me.n taariiKH mamnu.a hai
zamaane par KHaraash Daaltii KHaar-daar tuGyaanii
havaadis se pare chaltii hu.ii
Takraa rahii hai qadiim chaTTaano.n se
ek bahut hii siyaah raat ke sahme hu.e sitaare
ek pur-haul fazaa me.n saa.ns letii KHaamoshii
jise ham KHvaab karnaa chaahte hai.n
KHvaab jauhar hai.n asiil nii.nd kaa
insaanii aa.nkho.n kaa

Ahmad Javaid

Nazm

fasana-e-adam

mai.n thaa zamiir-e-mashiyyat me.n ek azm-e-jaliil
hanuuz shauq kii karvaT bhii lii na thii mai.n ne
ki daf.atan mut.harrik hu.e lab-e-taKHliiq
paka.D lii suurat-e-zaahir vajuud kii mai.n ne
vo sub.h-e-aalam-e-hairat vo jalva-zaar-e-bahisht
havaa chaman kii lagii aa.nkh khol dii mai.n ne
vo tarbiyat-gah-zauq-e-nazar, vo vaadii-e-nuur
jahaa.n se paa.ii mohabbat kii raushnii mai.n ne
vo unfuvaan-e-tamannaa vo ibtidaa-e-junuun
vo ik KHalish jise samjhaa thaa zindagii mai.n ne
kiyaa suruur ne ik aalam-e-digar paidaa
churaa ke pii jo mai-e-sarkash-e-KHudiii mai.n ne
KHudii ke nashshe me.n allaah re be-KHudii merii
badan se chaadar-e-ismat bhii phe.nk dii mai.n ne
hu.aa huduud-e-nazar se nikal ke aavaara
havaa-e-shauq me.n jannat bhii chho.D dii mai.n ne
farishte rah ga.e hairat se dekhte mujh ko
na kii qubuul mashiyyat kii rahbarii mai.n ne
daliil-e-raah banii apnii garmii-e-parvaaz
ki taaqat-e-par-e-jibriil chhiin lii mai.n ne
ba.Dhii.n sitaaro.n kii duniyaa.e.n mere lene ko
utar ke arsh se niiche nazar jo kii mai.n ne
magar zamii.n kii kashish ne suu-e-zamii.n khii.nchaa
kiyaa pasand ye zindaan-e-unsurii mai.n ne
jagah milii jo ta.Dapne kii be-qaraarii ko
to phir huduud me.n vus.at kii daad dii mai.n ne
hu.aa talaatum-e-hastii ba-aalam-e-zarraat
chhi.Dak dii KHaak-e-bayaabaa.n pe zindagii mai.n ne
numuu ke josh se saudaa-e-ra.ng-o-buu niklaa
zamii.n ke dil kii tamannaa nikaal dii mai.n ne
hu.ii.n jahaan-e-amal me.n sharii.ate.n paidaa
KHudaa ke naam pe barpaa jo kii KHudii mai.n ne
kabhii jalaa.ii a.ndhere me.n sham.a-e-ilm-o-amal
kabhii bujhaa dii hidaayat kii raushnii mai.n ne
kabhii bigaa.D ke rakh dii.n savaab kii shakle.n
kabhii badal dii haqiiqat gunaah kii mai.n ne
ba.Dhaa to rah gayaa piichhe mire zamaana-e-haal
rukaa to vaqt kii rafta rok dii mai.n ne
zamii.n pe shauq ke fitne bichhaa diye har suu
fazaa me.n nii.nd kii mastii bikher dii mai.n ne
kabhii jagaa dii qayaamat nafas kii Thokar se
uThaa ke suur-e-saraafiil-e-zindagii mai.n ne
junuu.n ke josh me.n parde nazar ke chaak kiye
naqaab noch ke fitrat kii phe.nk dii mai.n ne
qabaa-e-laila-e-tahziib chaak kar Daalii
ridaa-e-maryam-e-ismat utaar lii mai.n ne
mizaaj-e-aatish-e-sozaa.n ko kar diyaa ThanDaa
machaa dii bazm-e-anaasir me.n khalbalii mai.n ne
liyaa shahanshah-e-KHaavar se raushnii kaa KHiraaj
kiyaa asiir tabii.at ko barq kii mai.n ne
ba-inqalaab-e-tabii.at mizaaj-e-aahan ko
havaa kii garmii-e-parvaaz baKHsh dii mai.n ne
bulandiyo.n kaa tasavvur bhii rah gayaa piichhe
pahu.nch ke itnii bulandii pe saa.ns lii mai.n ne
ThiThuk ga.ii.n jo nigaahe.n qariib hujla-e-quds
pas-e-hijaab-e-adab ye sadaa sunii mai.n ne
ki ai hariif-e-mashiyyat ba-va.ada-gaah-e-azal
Thahar Thahar tirii parvaaz dekh lii mai.n ne

Jameel Mazhari

Nazm

narKH baala kun ki arzani hunuz

abhii abhii ik havaa kaa jho.nkaa
jo teraa lahja
jo tere giito.n paheliyo.n kaa amiin ban kar
samaa.ato.n ko
hazaar lafzo.n kii daastaane.n sunaa gayaa hai
abhii abhii be-karaa.n saa lamha
jo kitnii sadiyo.n kaa bojh uThaa.e
guzar gayaa hai
jo merii aa.nkho.n me.n so.e manzar jagaa gayaa hai
abhii abhii teraa ik sahiifa ik ahd ban kar
dayaar-e-dil me.n utar gayaa hai
miraa badan reza reza ho kar bikhar gayaa hai
mai.n dekhtaa huu.n
ki naam teraa
zabaan terii
kalaam teraa
zamii.n kii pastii se
aasmaa.n kii bulandiyo.n tak
har aane vaale nisaab lamhe kaa
peshvaa hai
mai.n sochtaa huu.n
ki tujh pe likkhuu.n
jo tujh pe likkhaa
to harf mere
havaa me.n tahliil ho ga.e hai.n
me.n chaahtaa huu.n
ki tujh ko sochuu.n
jo tujh ko sochaa
to zaat terii
paheliyo.n me.n ulajh ga.ii hai

Saleem Kausar

Nazm

ek awami nazm

kyaa phuul nau-biyaahataa aurat ke baalo.n
aur bachcho.n ke libaas par hii jachtaa hai
kaash
vatan kii had huduud ke ta.ayyun ke liye
phuulo.n kii kiyaariyaa.n
aahinii-taaro.n kaa mutabaadil hotii.n

Zahid Imroz

Nazm

ajaib-KHana

miraa vajuud
dekhte hii dekhte
ek ajaa.ib-KHaane me.n Dhal rahaa hai
ki mere laa-shu.uur ne
aasaar-e-qadiima kii naadir inaayato.n ko
chhupaa ke mujh se
mujh hii me.n jam.a kar diyaa hai
yahaa.n kahii.n kisii rack me.n
mire hunuut-shuda harf aur lamhe
pa.De hu.e hai.n
jinhe.n na-jaane kaun saa masaala lagaa diyaa gayaa hai
ki mire jism kii haraarat se bhii vo
gal nahii.n rahe hai.n
in almaariyo.n se
mirii TuuTii hu.ii chuu.Diyo.n ke saaz kii
aavaaz aa rahii hai
ye dekho shelf me.n
merii bachpan kii gu.Diyaa kaa
TuuTaa hu.aa jism so rahaa hai
kahii.n merii si.nghaar-mez kaa aa.iina
be-ra.ng ho kar chaTaKH gayaa hai
magar ab bhii
mere azaab-lamho.n kaa
aks de rahaa hai
kahii.n kisii surme-daanii me.n
shaayad kabhii mai.n ne apnii aa.nkh chho.D dii thii
jo us me.n se mujhe ghuurtii hai
aur merii zindagii
mere za.ng-aaluud zevaro.n me.n
dab ke chiiKHtii hai
aur paayalo.n kii aavaaz se Dar rahii hai
ek TuuTii hu.ii ka.nghii se
mire baal uljhe hu.e hai.n
aur kinaare pe rakkhii hu.ii
suraahii se pyaas kii buu
ris rahii hai
kisii gha.Diyaal kii TuuTii hu.ii suu.ii
ik azaab-lamhe me.n murta.ish hai
aur qariib hii
mere jazbo.n ke taalaab se
baas uTh rahii hai
aur tamaash-biin,
jauq-dar-jauq mere ajaa.ib-KHaane ko
dekhne ko aa rahe hai.n
in me.n se ko.ii tamaash-biin
is ajaa.ib-KHaane kii
saa.ns letii hu.ii maut ko
taz.hiik se dekh kar
nazar-andaaz kartaa hu.aa jaa rahaa hai
aur ko.ii ajaa.ibaat kaa shauqiin
in tamaam ashyaa pe tahqiiq kar ke
apna-aap saabit karnaa chaahtaa hai
magar un ko dhuul me.n pa.Dii hu.ii
taariiKH kii uljhii hu.ii Dor kaa
ko.ii siraa nahii.n mil rahaa hai
aur me.n kinaare pe kha.Dii hu.ii
apne usii ek sire ke milne kii muntazir huu.n
ki miraa vajuud dekhte hii dekhte
ek ajaa.ib-KHaane me.n Dhal chukaa hai

Sarwat Zehra

Nazm

khanDar

huduud-e-hastii se ham nikal kar kha.nDar bane the
magar kha.nDar ban ke miT bhii jaate
ki ye Gam-e-zindagii ke rasiyaa
hamaarii hastii ko apnii yaado.n se mahv kar dete bhuul jaate
na ye ki ham ko tamaasha-gaah-e-jahaa.n banaate
hamaare ibrat-kado.n ko mahfuuz kar ke rakhte
na ye ki aabaadiyo.n kii KHaatir
hamaarii barbaadiyo.n ko taariiKHii yaadgaare.n banaa.e rakhte
vo yaadgaare.n
jahaa.n pe ye log zindagii ke ijaara-daar aa sake.n to aa.e.n
dino.n ko raaho.n kii KHaak u.Daa.ii.n
vo baargaahe.n jo arsh-paaya thii.n adab-o-aadaab-e-KHusravii me.n
vahaa.n ye daraaz khisakte jaa.e.n
jahaa.n bhii jii chaahe apnaa naam aur sher likkhe.n
machaa.e.n GauGaa raqiiq be-ma.anii giit gaa.e.n
magar na auqaat-e-panj-gaana me.n
ek bhii vaqt suunii masjid me.n jhaa.nk paa.e.n
kisii kii turbat pe faatiha ke liye na ye apne haath uThaa.e.n
dino.n ko yuu.nhii fasurda raaho.n kii KHaak u.Daa.ii.n
diye jale par gharo.n ko jaa.e.n
hamaarii viiraaniyo.n ko viiraan-tar banaa kar chale hii jaa.e.n
yahaa.n pe chhaa jaa.e andhii a.ndhiyaariyo.n kaa phir vo sukuut-e-jaamid
ki yaum-o-sipar hii jis ke ham-raaz-o-ham-nafas hai.n
na din kii vahshat me.n kuchh kamii thii
ki shab kii dahshat me.n kuchh kasar ho
hamaare din-raat ek se hai.n
hamaare din-raat usii vajuud-o-adam ke ik vaqfa-e-musalsal me.n
hastii-o-niistii ke barzaKH me.n paa-ba-gul hai.n
hamaare din-raat isii daraa-e-zamaan vaqfe se muttasil hai.n
magar hame.n kab milegii is daam se rihaa.ii
hame.n milegaa adam kii maaduum-o-be-nishaa.n god kaa sukuun-e-abad KHudaayaa
hame.n azal aur abad ke chakkar se kab ataa hogii rustagaarii
KHudaa-e-qayyuum-o-hayye-o-qaa.em
janaab baarii

Mukhtar Siddiqui

Nazm

ek surma ke nam

aane vaale din ke aaKHir par
suuraj TuuTii hu.ii Dhaal kii tarah
ufuq par chaspaa.n ek hunuut kiyaa hu.aa sar
kisii suurmaa kaa
jo vaqt se haar gayaa!

Ahmad Javaid

Nazm

mutazad zawiye

aur bisaat-e-KHayaal be-paayaa.n
aur mu.ayyan huduud-e-sharh-o-bayya.n
tez-raftaar gardish-e-haalaat
aur aahistagii-e-umr ravaa.n
ajnabiyyat kaa mustaqil ik bojh
aur shanaasaa.iyo.n kaa baar-e-giraa.n
aql kii KHaamii naarasii dil kii
aur tasavvur-shikan haqiiqat-e-jaa.n
muKHtalif har vajuud pesh-e-nazar
aur imkaan-e-vahdat-e-imkaa.n
fikr uqdaa-kushaa.iyo.n pe musir
aur sar-rishte hii kaa KHud fuqdaan.n
intihaa silsilo.n kii naa-maaluum
aur har lamha silsila-e-jumbaa.n
mutavaatir maraahil-e-taaliim
aur musalsal madaarij-e-nisyaa.n
shoba-haa-e-KHayaal be-tam.iiz
aur bahr-e-shanaaKHt mohr-o-nishaa.n
chaar jaanib saraahto.n kaa hujuum
aur bahr-e-rumuuz be-paayaa.n
sail-e-bairuu.n ravaa.n ba-tarz-e-digar
aur juu-e-andaruu.n alag sii ravaa.n
ek kho.ii hu.ii fazaa.e-hayaat
aur ehsaas-o-fikr sab Galtaa.n
aur saa.nso.n kii rahguzar pe hujuum
aur aa.nkho.n kii rahguzar viiraa.n

Abdul Ahad Saaz

Nazm

tariKH-dan se

qadiim duniyaa kaa pahlaa qaatil
qaabiil
hamesha yaad rakhaa jaa.egaa
sunaa hai
pahlii baar jab ko.ii nayaa kaam kartaa hai
to vo usii ke naam se hamesha ke liye
mansuub ho jaataa hai
to pyaar
pahlii baar mohabbat kis ne kii hogii
kyaa aadam aur havvaa ne
nahii.n nahii.n
vo mohabbat nahii.n
vo to KHataa thii
huduud se tajaavuz thaa
yaa shaayad tajassus
qadiim duniyaa ke taariiKH-daan
bataa ki
pahlii baar mohabbat kis ne kii thii
ko.ii naam darj nahii.n naa taariiKH me.n
taariiKH hamesha chun chun kar burii baato.n kaa hii record kyo.n rakhtii hai
taariiKH ke safho.n par itne phuul nahii.n jitnaa lahuu hai
so ab na.ii taariiKH likhii jaa.e
aur us me.n meraa naam darj kiyaa jaa.e
jis ne pahlii baar mohabbat kii

Neelam Malik

Nazm

hudud ka daera

shajar hajar huu.n ki insaa.n huu.n yaa sitaare huu.n
sabhii huduud ke ik daa.ere me.n rahte hai.n
ye kaa.enaat zamaan o makaa.n kii qaid me.n hai
har ek shai hai uruuj o zavaal kii paaband
har ek manzil-e-aaKHir hai manzil-e-avval
jahaa.n se ik na.ii manzil kii justujuu me.n sabhii
haqiiqato.n ko taKHayyul kaa rang dete hai.n
safar me.n ruk nahii.n sakte qadam musaafir ke
zamii.n bhii ghuumtii hai raaste bhii chalte hai.n
har ik ufuq pe zamii.n aasmaa.n se miltii hai
gha.Dii chale na chale vaqt to guzartaa hai

Rashid Aazar

Nazm

nazm

hame.n ek daraKHt ko
sar-buland karnaa chaahiye
vo batri se chalne vaale
aare le kar, be-shumaar mazduur le kar
use kaaTne aa.e hai.n
vo chaubiis pahiyo.n vaalaa Truck le kar
use jangal kii huduud se baahar le jaane aa.e hai.n
vo containero.n se bharaa jahaaz le kar
is kii shaaKHe.n, patte, tanaa aur ja.De.n
samundarii raaste se
apne headquarter tak le jaane aa.e hai.n
hame.n jis daraKHt ko sar-buland karnaa hai
us kii havaa, paanii aur zamiin chhiinii jaa chukii hai
us ke parinde aur dhuup chhiinii jaa chukii hai
us kaa saaya aur KHvaab chhiine jaa chuke hai.n
sirf mohabbat baaqii hai jis kii madad se
ham apne dil ko is kii zamiin
apnii aa.nkho.n ko is kii ja.De.n
aur apne baazu.o.n ko us kii shaaKHe.n banaa de.nge
use sahaaraa de.nge
aur hamesha sar-buland rakhe.nge

Zeeshan Sahil

Nazm

mukalima zaid se

mai.n KHvaab dekhtaa huu.n
aur unhii.n me.n rahtaa huu.n
fii-murabba kilometer
police vaalo.n se ziyaada
shaa.iro.n kii aabaadii vaale
zila-e-sat.hii kii huduud me.n

Zeeshan Sahil

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now