Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "ikhtilaal"

Nazm MATCHES FOR "ikhtilaal"

Nazm

holi

kahaa kisii ne ki ai baadshaah-e-mah-ruu yaa.n
safed-o-zard ye aapas me.n la.D rahe hai.n yahaa.n
ye sun ke aap vo dono.n ke aa gayaa darmiyaa.n
idhar se thaa.nbaa use aur udhar us ko ki haa.n
tum is qadar na karo iKHtilaal holii me.n

Nazeer Akbarabadi
Nazm

mariz-e-mohabbat

apne pindaar-e-KHudii se munfa.il huu.n 'maz.harii'
mai.n zuhuur-e-iKHtilaal-e-aab-o-gil huu.n 'maz.harii'
ki mohabbat kaa mariiz-e-mustaqil huu.n 'maz.harii'
dostii kyaa dushmanii se bhii mohabbat mai.n ne kii
raushnii kyaa tiirgii se bhii mohabbat mai.n ne kii
muskuraa.ii tiirgii mujh ko mohabbat ho ga.ii
ha.ns ke bolii dushmanii mujh ko mohabbat ho ga.ii
muflisii o be-navaa.ii se mohabbat mai.n ne kii
har suruur-e-KHud-numaa.ii se mohabbat mai.n ne kii
har Guruur-e-kibriyaa.ii se mohabbat mai.n ne kii
be-ruKHii o kaj-adaa.ii se mohabbat mai.n ne kii
tar-zabaa.n ho kar rukhaa.ii se mohabbat mai.n ne kii
thaa rajaa.ii kis qadar merii mohabbat kaa dimaaG
ahrman ke siina-e-taariik me.n dekhaa charaaG
ik sitaaristaa.n nazar aayaa a.ndheraa daaG daaG
mai.n ne makkaarii o ayyaarii me.n bhii dekhaa KHuluus
mai.n sayyaadii o jallaadii se bhii bartaa KHuluus
mai.n ne qahhaarii o jabbaarii me.n bhii Dhuu.nDaa KHuluus
apne is jazbe ko ik tashdiid-e-iimaanii bhii dii
dosto.n ke vaaste iimaa.n kii qurbaanii bhii dii
taaki puurii ho mohabbat kii ik ummiid-e-fuzuul
baar-haa jho.nkaa kiyaa insaaf kii aa.nkho.n me.n dhuul
phir bhii sab kuchh kho ke sab kuchh de ke kuchh paayaa nahii.n
aql kaam aa.ii nahii.n aur ishq raas aayaa nahii.n
jis ko kahte hai.n vafaa ik saKHt biimaarii hai ye
KHud-kushii ho yaa na ho lekin KHud-aazaarii hai ye
naaz-bardaarii me.n bhii ik baar-bardaarii hai ye
mai.n mohabbat kii havas me.n itnaa be-KHud ho gayaa
mere andar maadda nafrat kaa bilkul so gayaa
ai aziizo! is mariiz-e-zindagii kaa kyaa ilaaj
is KHudii kaa kyaa ilaaj is be-KHudii kaa kyaa ilaaj
jis ko ho naaz-e-vafaa us aadmii kaa kyaa ilaaj
'ijtibaa' se puuchhte ho 'maz.harii' kaa kyaa ilaaj
sau KHuluus-e-be-riyaa kaa ik KHabaasat se ilaaj
ye maraz hai, ye maraz hai is kaa nafrat hai ilaaj
bas yahii raaz-e-shifaa hai, bas yahii raaz-e-shifaa
bas yahii merii davaa hai bas yahii merii davaa
ko.ii merii ruuh par aisaa kare zulm-e-shadiid
mujh me.n nafrat jii uThe salavaat bar-ruuh-e-yaziid

Jameel Mazhari
Nazm

ek nazm

mai.n
hayaat-e-muhmal kii justujuu me.n
safar zamaane kaa kar chukaa huu.n
mai.n ik ju.aarii kii tarah saarii bisaat apnii luTaa chukaa huu.n
mai.n aadmii ke aziim KHvaabo.n kii saltanat bhii ga.nvaa chukaa huu.n
na jeb raKHt-e-safar kaa tohfa liye hu.e hai
na zehn meraa kisii tasavvur kaa dukh uThaane
kisii mohabbat kaa bojh sahne ke vaaste iKHtilaal me.n hai
mai.n faateh kii tarah chalaa thaa
jo raaste me.n mile mujhe
vo teG merii se kaT ga.e the
mai.n zaa.iro.n ke libaas me.n
qarz KHuu.n-bahaa kaa utaarne, sar mu.nDaa ke yuu.nhii nikal gayaa thaa
ki lauT aa.uu.ngaa
ek din
phir bataa.uu.ngaa mai.n hayaat-e-muhmal kaa raaz kyaa hai?
ye KHvaab hai yaa KHayaal hai?
mai.n hayaat-e-muhmal kii justujuu me.n
safar zamaane kaa kar chukaa huu.n
mai.n be-navaa be-giyaah aur be-samar shajar huu.n
jo sau zamaano.n kii dhuul me.n be-basar bhikaarii kii tarah
apnii hii aastii.n me.n laraz rahaa hai!

Anees Nagi
Nazm

ek nazm

zindagii ne kyaa diyaa mujhe
tarah tarah ke aarize dimaaG kaa buKHaar
iKHtilaal aur havaas ke shu.uur kaa malaal
raat ko mai.n jaagtaa rahuu.n
tamaam din baqaa kii aarzuu me.n afsaro.n ke KHauf se
nashist-gaah-e-intizaar me.n bahut hii phiikii muskuraahaTo.n ke saath
faisle ke intizaar me.n lahuu kii gardisho.n ke saath
zaat kii aziim saltanat ko aag me.n lipTaa dekhtaa rahuu.n
ye cigareto.n kaa niil-guu.n dhu.aa.n Gubaar hii Gubaar
bhaagtaa savaar asp kaa sunahrii na.al raaste me.n chho.D kar kidhar gayaa
ye shor ab kidhar se aa rahaa hai
Gaur se suno
nahii.n ye kuchh nahii.n
mai.n intizaar kii taviil saa.ato.n me.n naaKHuno.n se mez ko bajaa rahaa huu.n
par vo kaaGazo.n me.n Garq hai
bahut qadiim raat ibtidaa se intihaa ke laa-zavaal bahr me.n utar gayaa huu.n
saare din ke Gam ko mai.n
nashe kii ik ridaa me.n Dhaa.np duu.n
magar nasha haraam jurm hai
to phir palaT ke mai.n KHayaal me.n muqiim ishrato.n ko aa.ino.n me.n dekh luu.n
laziiz thartharaate jism
Dhol kii dhamak pe lahar lahar khil rahe hai.n
al-amaa.n muharramaat
mai.n sard-mehr zindagii se kyaa talab karuu.n
ki vo bhii KHud asiir hai

Anees Nagi
Nazm

bhali si ek shakl thi

na iKHtilaat me.n vo ram
ki bad-maza ho.n KHvaahishe.n
na is qadar supurdagii
ki zach kare.n navaazishe.n

Ahmad Faraz
Nazm

daraKHt-e-zard

vo hai.at-daa.n vo aalim naaf-e-shab me.n chhat pe jaataa thaa
rasad kaa rishta sayyaaro.n se rakhtaa thaa nibhaataa thaa
use KHvaahish thii shohrat kii na ko.ii hirs-e-daulat thii
ba.De se qutr kii ik duurbiin us kii zaruurat thii
mirii maa.n kii tamannaa.o.n kaa qaatil thaa vo qallaama
mirii maa.n merii mahbuuba qayaamat kii hasiina thii
sitam ye hai ye kahne se jhijaktaa thaa vo fahhaama
thaa behad ishti.aal-a.ngez bad-qismat o allaama
KHalaf us ke KHazaf aur be-nihaayat naa-KHalaf nikle
ham us ke saare beTe intihaa.ii be-sharaf nikle
mai.n us aalim-tariin-e-dahr kii fikrat kaa munkir thaa
mai.n fastaa.ii thaa jaahil thaa aur mantiq kaa maahir thaa
par ab merii ye shohrat hai ki mai.n bas ik sharaabii huu.n
mai.n apne duudmaan-e-ilm kii KHaana-KHaraabii huu.n
sagaan-e-KHuuk zaad-e-barzan o baazaar-e-be-maGzii
mirii jaanib ab apne thoba.De shaahaana karte hai.n
zinaa-zaade mirii izzat bhii gustaaKHaana karte hai.n
kamiine sharm bhii ab mujh se be-sharmaana karte the

Jaun Eliya
Nazm

masjid-e-qurtuba

silsila-e-roz-o-shab naqsh-gar-e-haadsaat
silsila-e-roz-o-shab asl-e-hayaat-o-mamaat
silsila-e-roz-o-shab taar-e-hariir-e-do-ra.ng
jis se banaatii hai zaat apnii qabaa-e-sifaat
silsila-e-roz-o-shab saaz-e-azal kii fuGaa.n
jis se dikhaatii hai zaat zer-o-bam-e-mumkinaat
tujh ko parakhtaa hai ye mujh ko parakhtaa hai ye
silsila-e-roz-o-shab sairafi-e-kaa.enaat
tuu ho agar kam ayaar mai.n huu.n agar kam ayaar
maut hai terii baraat maut hai merii baraat
tere shab-o-roz kii aur haqiiqat hai kyaa
ek zamaane kii rau jis me.n na din hai na raat
aani-o-faanii tamaam mojaza-haa-e-hunar
kaar-e-jahaa.n be-sabaat kaar-e-jahaa.n be-sabaat
avval o aaKHir fanaa baatin o zaahir fanaa
naqsh-e-kuhan ho ki nau manzil-e-aaKHir fanaa
hai magar is naqsh me.n ra.ng-e-sabaat-e-davaam
jis ko kiyaa ho kisii mard-e-KHudaa ne tamaam
mard-e-KHudaa kaa amal ishq se saahab faroG
ishq hai asl-e-hayaat maut hai us par haraam
tund o subuk-sair hai garche zamaane kii rau
ishq KHud ik sail hai sail ko letaa hai thaam
ishq kii taqviim me.n asr-e-ravaa.n ke sivaa
aur zamaane bhii hai.n jin kaa nahii.n ko.ii naam
ishq dam-e-jibra.iil ishq dil-e-mustafaa
ishq KHudaa kaa rasuul ishq KHudaa kaa kalaam
ishq kii mastii se hai paikar-e-gil taabnaak
ishq hai sahbaa-e-KHaam ishq hai kaas-ul-karaam
ishq faqiih-e-haram ishq amiir-e-junuuud
ishq hai ibnus-sabiil is ke hazaaro.n maqaam
ishq ke mizraab se naGma-e-taar-e-hayaat
ishq se nuur-e-hayaat ishq se naar-e-hayaat
ai haram-e-qurtuba ishq se teraa vajuud
ishq saraapaa davaam jis me.n nahii.n raft o buud
ra.ng ho yaa KHisht o sang cha.ng ho yaa harf o saut
mojaza-e-fan kii hai KHuun-e-jigar se numuud
qatra-e-KHuun-e-jigar sil ko banaataa hai dil
KHuun-e-jigar se sadaa soz o suruur o suruud
terii fazaa dil-faroz merii navaa siina-soz
tujh se dilo.n kaa huzuur mujh se dilo.n kii kushuud
arsh-e-mo.allaa se kam siina-e-aadam nahii.n
garche kaf-e-KHaak kii had hai sip.har-e-kabuud
paikar-e-nuurii ko hai sajda mayassar to kyaa
us ko mayassar nahii.n soz-o-gudaaz-e-sajuud
kaafir-e-hindi huu.n mai.n dekh miraa zauq o shauq
dil me.n salaat o duruud lab pe salaat o duruud
shauq mirii lai me.n hai shauq mirii nai me.n hai
naGma-e-allaah-huu mere rag-o-pai me.n hai
teraa jalaal o jamaal mard-e-KHudaa kii daliil
vo bhii jaliil o jamiil tuu bhii jaliil o jamiil
terii binaa paa.edaar tere sutuu.n be-shumaar
shaam ke sahraa me.n ho jaise hujuum-e-nuKHiil
tere dar-o-baam par vaadii-e-aiman kaa nuur
teraa minaar-e-buland jalva-gah-e-jibra.iil
miT nahii.n saktaa kabhii mard-e-musalmaa.n ki hai
us kii azaano.n se faash sirr-e-kaliim-o-KHaliil
us kii zamii.n be-huduud us kaa ufuq be-saGuur
us ke samundar kii mauj dajla o danyuub o niil
us ke zamaane ajiib us ke fasaane Gariib
ahd-e-kuhan ko diyaa us ne payaam-e-rahiil
saaqi-e-rabaab-e-zauq faaras-e-maidaan-e-shauq
baada hai us kaa rahiiq teG hai us kii asiil
mard-e-sipaahii hai vo us kii zirah laa-ilaah
saaya-e-shamshiir me.n us kii panah laa-ilaah
tujh se hu.aa aashkaar banda-e-momin kaa raaz
us ke dino.n kii tapish us kii shabo.n kaa gudaaz
us kaa maqaam-e-buland us kaa KHayaal-e-aziim
us kaa suruur us kaa shauq us kaa niyaaz us kaa naaz
haath hai allaah kaa banda-e-momin kaa haath
Gaalib o kaar-aafrii.n kaar-kushaa kaarsaaz
KHaakii o nuurii-nihaad banda-e-maulaa-sifaat
har do-jahaa.n se Ganii us kaa dil-e-be-niyaaz
us kii umiide.n qaliil us ke maqaasid jaliil
us kii adaa dil-fareb us kii nigah dil-navaaz
aaj bhii is des me.n aam hai chashm-e-Gazaal
aur nigaaho.n ke tiir aaj bhii hai.n dil-nashii.n
buu-e-yaman aaj bhii us kii havaa.o.n me.n hai
ra.ng-e-hijaaz aaj bhii us kii navaa.o.n me.n hai
diida-e-anjum me.n hai terii zamii.n aasmaa.n
aah ki sadiyo.n se hai terii fazaa be-azaa.n
kaun sii vaadii me.n hai kaun sii manzil me.n hai
ishq-e-balaa-KHez kaa qaafla-e-saKHt-jaa.n
dekh chukaa almanii shorish-e-islaah-e-dii.n
jis ne na chho.De kahii.n naqsh-e-kuhan ke nishaa.n
harf-e-Galat ban ga.ii ismat-e-piir-e-kunisht
aur hu.ii fikr kii kashti-e-naazuk ravaa.n
chashm-e-faraansiis bhii dekh chukii inqalaab
jis se digar-guu.n hu.aa maGrabiyo.n kaa jahaa.n
millat-e-ruumii-nizhaad kohna-parastii se piir
lazzat-e-tajdiida se vo bhii hu.ii phir javaa.n
ruuh-e-musalmaa.n me.n hai aaj vahii iztiraab
raaz-e-KHudaa.ii hai ye kah nahii.n saktii zabaa.n
narm dam-e-guftuguu garm dam-e-justujuu
razm ho yaa bazm ho paak-dil o paak-baaz
nuqta-e-parkaar-e-haq mard-e-KHudaa kaa yaqii.n
aur ye aalam tamaam vahm o tilism o majaaz
aql kii manzil hai vo ishq kaa haasil hai vo
halqa-e-aafaaq me.n garmi-e-mahfil hai vo
kaaba-e-arbaab-e-fan satvat-e-diin-e-mubii.n
tujh se haram martabat undulusiyo.n kii zamii.n
hai tah-e-garduu.n agar husn me.n terii naziir
qalb-e-musalmaa.n me.n hai aur nahii.n hai kahii.n
aah vo mardaan-e-haq vo arabii shahsavaar
haamil-e-KHalq-e-aziim saahab-e-sidq-o-yaqii.n
jin kii hukuumat se hai faash ye ramz-e-Gariib
saltanat-e-ahl-e-dil faqr hai shaahii nahii.n
jin kii nigaaho.n ne kii tarbiyat-e-sharq-o-Garb
zulmat-e-europe me.n thii jin kii KHirad-raah-bii.n
jin ke lahuu ke tufail aaj bhii hai.n undulusii
KHush-dil o garam-iKHtilaat saada o raushan-jabii.n
dekhiye is bahr kii tah se uchhaltaa hai kyaa
gumbad-e-niilofarii rang badaltaa hai kyaa
vaadi-e-koh-saar me.n Garq-e-shafaq hai sahaab
laal-e-badaKHshaa.n ke Dher chho.D gayaa aaftaab
saada o pur-soz hai duKHtar-e-dahqaa.n kaa giit
kashtii-e-dil ke liye sail hai ahd-e-shabaab
aab-e-ravaan-e-kabiir tere kinaare ko.ii
dekh rahaa hai kisii aur zamaane kaa KHvaab
aalam-e-nau hai abhii parda-e-taqdiir me.n
merii nigaaho.n me.n hai us kii sahar be-hijaab
parda uThaa duu.n agar chehra-e-afkaar se
laa na sakegaa fara.ng merii navaa.o.n kii taab
jis me.n na ho inqalaab maut hai vo zindagii
ruuh-e-umam kii hayaat kashmakash-e-inqilaab
suurat-e-shamshiir hai dast-e-qazaa me.n vo qaum
kartii hai jo har zamaa.n apne amal kaa hisaab
naqsh hai.n sab naa-tamaam KHuun-e-jigar ke baGair
naGma hai saudaa-e-KHaam KHuun-e-jigar ke baGair

Allama Iqbal
Nazm

aaKHiri mulaqat

sochaa na thaa ki aa.egaa ye din bhii phir kabhii
ik baar phir mile hai.n, zaraa muskuraa to le.n!
kyaa jaane ab na ulfat-e-deriina yaad aa.e
is husn-e-iKHtiyaar pe aa.nkhe.n jhukaa to le.n
barsaa labo.n se phuul tirii umar ho daraaz
sambhle hu.e to hai.n pa zaraa Dagmagaa to le.n

Akhtarul Iman
Nazm

sarkari aur ghair-sarkari do iden

iKHtilaaf is baat par bhii qaum me.n paayaa gayaa
chaa.nd KHud niklaa thaa yaa jabran nikalvaayaa gayaa

Dilawar Figar
Nazm

parchhaiyan

1
ye shaam ik aa.iina-e-niil-guu.n ye nam ye mahak
ye manzaro.n kii jhalak khet baaG dariyaa gaa.nv
vo kuchh sulagte hu.e kuchh sulagne vaale alaav
siyaahiyo.n kaa dabe-paa.nv aasmaa.n se nuzuul
laTo.n ko khol de jis tarah shaam kii devii
puraane vaqt ke bargad kii ye udaas jaTaa.e.n
qariib o duur ye go dhuul kii ubhartii ghaTaa.e.n
ye kaa.enaat kaa Thahraa.o ye athaah sukuut
ye niim-tiirah fazaa roz-e-garm kaa taabuut
dhu.aa.n dhu.aa.n sii zamii.n hai ghulaa ghulaa saa falak
2
ye chaa.ndnii ye havaa.e.n ye shaaKH-e-gul kii lachak
ye daur-e-baada ye saaz-e-KHamosh fitrat ke
sunaa.ii dene lagii jagmagaate siino.n me.n
dilo.n ke naazuk o shaffaaf aabgiino.n me.n
tire KHayaal kii pa.Dtii hu.ii kiran kii khanak
3
ye raat chhantii havaa.o.n kii so.ndhii so.ndhii mahak
ye khet kartii hu.ii chaa.ndnii kii narm damak
sugandh raat kii raanii kii jab machaltii hai
fazaa me.n ruuh-e-tarab karvaTe.n badaltii hai
ye ruup sar se qadam tak hasiin jaise gunaah
ye aarizo.n kii damak ye fusuun-e-chashm-e-siyaah
ye dhaj na de jo ajantaa kii san.ato.n ko panaah
ye siina pa.D hii ga.ii dev lok kii bhii nigaah
ye sar-zamiin se aakaash kii parastish-gaah
utaarte hai.n tirii aartii sitaara o maah
sajal badan kii bayaa.n kis tarah ho kaifiyyat
sarasvatii ke bajaate hu.e sitaar kii gat
jamaal-e-yaar tire gulsitaa.n kii rah rah ke
jabiin-e-naaz tirii kahkashaa.n kii rah rah ke
dilo.n me.n aa.iina-dar-aa.iina suhaanii jhalak
4
ye chhab ye ruup ye joban ye saj ye dhaj ye lahak
chamakte taaro.n kii kirno.n kii narm narm phuvaar
ye rasmasaate badan kaa uThaan aur ye ubhaar
fazaa ke aa.iina me.n jaise lahlahaa.e bahaar
ye be-qaraar ye be-iKHtiyaar josh-e-numuud
ki jaise nuur kaa favvaara ho shafaq-aaluud
ye jalve paikar-e-shab-taab ke ye bazm-e-shohuud
ye mastiyaa.n ki mai-e-saaf-o-durd sab be-buud
KHajil ho laal-e-yaman uzv uzv kii vo Dalak
5
bas ik sitaara-e-shi.ngaraf kii jabii.n pe jhamak
vo chaal jis se labaalab gulaabiyaa.n chhalke.n
sakuu.n-numaa KHam-e-abru ye adh-khulii.n palke.n
har ik nigaah se aiman kii bijliyaa.n lapke.n
ye aa.nkh jis me.n ka.ii aasmaa.n dikhaa.ii pa.De.n
u.Daa de.n hosh vo kaano.n kii saada saada lave.n
ghaTaa.e.n vajd me.n aa.e.n ye gesu.o.n kii laTak
6
ye kaif-o-ra.ng-e-nazaara ye bijliyo.n kii lapak
ki jaise krishn se raadhaa kii aa.nkh ishaare kare
vo shoKH ishaare ki rabbaaniyat bhii jaa.e jhapak
jamaal sar se qadam tak tamaam sho.ala hai
sukuun jumbish o ram tak tamaam sho.ala hai
magar vo sho.ala ki aa.nkho.n me.n Daal de ThanDak
7
ye raat nii.nd me.n Duube hu.e se hai.n diipak
fazaa me.n bujh ga.e u.D u.D ke jugnu.o.n ke sharaar
kuchh aur taaro.n kii aa.nkho.n kaa ba.Dh chalaa hai KHumaar
fasurda chhiTkii hu.ii chaa.ndnii kaa dhundlaa Gubaar
ye bhiigii bhiigii uudaahaT ye bhiigaa bhiigaa nuur
ki jaise chashma-e-zulmaat me.n jale kaafuur
ye Dhaltii raat sitaaro.n ke qalb kaa ye gudaaz
KHunuk fazaa me.n tiraa shabnamii tabassum-e-naaz
jhalak jamaal kii ta.abiir KHvaab aa.iina-saaz
jahaa.n se jism ko dekhe.n tamaam naaz-o-niyaaz
jahaa.n nigaah Thahar jaa.e raaz-andar-raaz
sukuut-e-niim-shabii lahlahe badan kaa nikhaar
ki jaise nii.nd kii vaadii me.n jaagtaa sansaar
hai bazm-e-maah ki parchhaa.iyo.n kii bastii hai
fazaa kii oT se vo KHaamushii barastii hai
ki buu.nd buu.nd se paidaa ho gosh o dil me.n khanak
8
kisii KHayaal me.n hai Garq chaa.ndnii kii chamak
havaa.e.n nii.nd ke kheto.n se jaise aatii ho.n
hayaat o maut me.n sargoshiyaa.n sii hotii hai.n
karo.Do.n saal ke jaage sitaare nam-diida
siyaah gesu.o.n ke saa.np niim-KHvaabiida
ye pichhlii raat ye rag rag me.n narm narm kasak

Firaq Gorakhpuri
Nazm

raat aur rail

phir chalii hai rail station se lahraatii hu.ii
niim-shab kii KHaamushii me.n zer-e-lab gaatii hu.ii
Dagmagaatii jhuumtii siiTii bajaatii kheltii
vaadii o kohsaar kii ThanDii havaa khaatii hu.ii
tez jho.nko.n me.n vo chham chham kaa suruud-e-dil-nashii.n
aa.ndhiyo.n me.n me.nh barasne kii sadaa aatii hu.ii
jaise maujo.n kaa tarannum jaise jal-pariyo.n ke giit
ek ik lai me.n hazaaro.n zamzame gaatii hu.ii
naunihaalo.n ko sunaatii miiThii miiThii loriyaa.n
naazniino.n ko sunahre KHvaab dikhlaatii hu.ii
Thokare.n khaa kar lachaktii gungunaatii jhuumtii
sarKHushii me.n ghu.ngru.o.n kii taal par gaatii hu.ii
naaz se har mo.D par khaatii hu.ii sau pech-o-KHam
ik dulhan apnii adaa se aap sharmaatii hu.ii
raat kii taariikiyo.n me.n jhilmilaatii kaa.nptii
pTriyo.n par duur tak siimaab jhalkaatii hu.ii
jaise aadhii raat ko niklii ho ik shaahii baraat
shaadyaano.n kii sadaa se vajd me.n aatii hu.ii
muntashir kar ke fazaa me.n jaa-ba-jaa chi.ngaariyaa.n
daaman-e-mauj-e-havaa me.n phuul barsaatii hu.ii
tez-tar hotii hu.ii manzil-ba-manzil dam-ba-dam
rafta rafta apnaa aslii ruup dikhlaatii hu.ii
siina-e-kohsaar par cha.Dhtii hu.ii be-iKHtiyaar
ek naagan jis tarah mastii me.n lahraatii hu.ii
ik sitaara TuuT kar jaise ravaa.n ho arsh se
rif.at-e-kohsaar se maidaan me.n aatii hu.ii
ik baguule kii tarah ba.Dhtii hu.ii maidaan me.n
ja.ngalo.n me.n aa.ndhiyo.n kaa zor dikhlaatii hu.ii
raasa-bar-andaam kartii anjum-e-shab-taab ko
aashiyaa.n me.n taa.ir-e-vahshii ko chau.nkaatii hu.ii
yaad aa jaa.e puraane devtaa.o.n kaa jalaal
un qayaamat-KHeziyo.n ke saath bal khaatii hu.ii
ek raKHsh-e-be-inaa.n kii barq-raftaarii ke saath
KHandaqo.n ko phaa.ndtii Tiilo.n se katraatii hu.ii
murG-zaaro.n me.n dikhaatii juu-e-shiirii.n kaa KHiraam
vaadiyo.n me.n abr ke maanind ma.nDlaatii hu.ii
ik pahaa.Dii par dikhaatii aabshaaro.n kii jhalak
ik bayaabaa.n me.n charaaG-e-tuur dikhlaatii hu.ii
justujuu me.n manzil-e-maqsuud kii diivaana-vaar
apnaa sar dhuntii fazaa me.n baal bikhraatii hu.ii
chhe.Dtii ik vajd ke aalam me.n saaz-e-sarmadii
Gaiz ke aalam me.n mu.nh se aag barsaatii hu.ii
re.ngtii mu.Dtii machaltii tilmilaatii haa.nptii
apne dil kii aatish pinhaa.n ko bha.Dkaatii hu.ii
KHud-ba-KHud ruuThii hu.ii biphrii hu.ii bikhrii hu.ii
shor-e-paiham se dil-e-giitii ko dha.Dkaatii hu.ii
pul pe dariyaa ke damaa-dam kau.ndtii lalkaartii
apnii is tuufan-a.ngezii pe itraatii hu.ii
pesh kartii biich naddii me.n charaaGaa.n kaa samaa.n
saahilo.n par ret ke zarro.n ko chamkaatii hu.ii
mu.nh me.n ghustii hai sura.ngo.n ke yakaayak dau.D kar
dandanaatii chiiKHtii chi.nghaa.Dtii gaatii hu.ii
aage aage justujuu-aamez nazre.n Daaltii
shab ke haibatnaak nazzaaro.n se ghabraatii hu.ii
ek mujrim kii tarah sahmii hu.ii simTii hu.ii
ek muflis kii tarah sardii me.n tharraatii hu.ii
Tez-e-raftaar ke sikke jamaatii jaa-ba-jaa
dasht o dar me.n zindagii kii lahar dau.Daatii hu.ii
Daal kar guzre manaazir par andhere kaa naqaab
ik nayaa manzar nazar ke saamne laatii hu.ii
safha-e-dil se miTaatii ahd-e-maazii ke nuquush
haal o mustaqbil ke dilkash KHvaab dikhlaatii hu.ii
Daaltii be-his chaTaano.n par haqaarat kii nazar
koh par ha.nstii falak ko aa.nkh dikhlaatii hu.ii
daaman-e-taariki-e-shab kii u.Daatii dhajjiyaa.n
qasr-e-zulmat par musalsal tiir barsaatii hu.ii
zad me.n ko.ii chiiz aa jaa.e to us ko piis kar
irtiqaa-e-zindagii ke raaz batlaatii hu.ii
zo.am me.n peshaani-e-sahraa pe Thokar maartii
phir subuk-raftaariyo.n ke naaz dikhlaatii hu.ii
ek sarkash fauj kii suurat alam khole hu.e
ek tuufaanii garaj ke saath Daraatii hu.ii
ek ik harkat se andaaz-e-baGaavat aashkaar
azmat-e-insaaiyat ke zamzame gaatii hu.ii
har qadam par top kii sii ghan-garaj ke saath saath
goliyo.n kii sansanaahaT kii sadaa aatii hu.ii
vo havaa me.n saika.Do.n ja.ngii duhal bajte hu.e
vo bigul kii jaa.n-fazaa.n aavaaz lahraatii hu.ii
al-Garaz u.Dtii chalii jaatii hai be-KHauf-o-KHatar
shaa.ir-e-aatish-nafas kaa KHuun khaulaatii hu.ii

Asrarul Haq Majaz
Nazm

tauq-o-dar ka mausam

yahii junuu.n kaa yahii tauq-o-daar kaa mausam
yahii hai jabr yahii iKHtiyaar kaa mausam

Faiz Ahmad Faiz
Nazm

imtihan mein kaamyabi

natiija sun ke ka.ii log bad-havaas hu.e
KHudaa kaa shukr hai ham imtihaa.n me.n paas hu.e
sila milaa hai hame.n saal bhar kii mehnat kaa
chamak rahaa hai sitaara hamaarii qismat kaa
yahii to vaqt milaa hai hame.n masarrat kaa
jo fail ho ga.e vo kis qadar udaas hu.e
KHudaa kaa shukr hai ham imtihaa.n me.n paas hu.e
vo imtihaan me.n raato.n ko jaag kar pa.Dhnaa
vo nii.nd aa.nkho.n me.n chhaa.ii hu.ii magar pa.Dhnaa
vo aadhii raat se bistar pe taa-sahar pa.Dhnaa
zahe-nasiib vo lamhaat ham ko raas hu.e
KHudaa kaa shukr hai ham imtihaa.n me.n paas hu.e
jo khel-kuud me.n din-raat chuur rahte the
har ek khel me.n shaamil zaruur rahte the
jo sub.h-o-shaam kitaabo.n se duur rahte the
jahaa.n me.n aaj vahii mubtalaa-e-yaas hu.e
KHudaa kaa shukr hai ham imtihaa.n me.n paas hu.e
jinhe.n thaa apnii liyaaqat pe e'tibaar bahut
jinhe.n KHud apne qalam par thaa iKHtiyaar bahut
jo apne aap ko samjhe the hoshiyaar bahut
unhii.n ke hosh u.De aur gum havaas hu.e
KHudaa kaa shukr hai ham imtihaa.n me.n paas hu.e

Kaif Ahmed Siddiqui
Nazm

mukafat

rahii hai hazrat-e-yazdaa.n se dostii merii
rahaa hai zohd se yaaraana ustuvaar meraa
guzar ga.ii hai taqaddus me.n zindagii merii
dil ahrman se rahaa hai satiiza-kaar meraa
kisii pe ruuh numaayaa.n na ho sakii merii
rahaa hai apnii uma.ngo.n pe iKHtiyaar meraa

Noon Meem Rashid
Nazm

sarod-e-shabana

gum hai ik kaif me.n fazaa-e-hayaat
KHaamushii sajda-e-niyaaz me.n hai
husn-e-ma.asuum KHvaab-e-naaz me.n hai
ai ki tuu rang-o-buu kaa tuufaa.n hai
ai ki tuu jalva-gar bahaar me.n hai
zindagii tere iKHtiyaar me.n hai
phuul laakho.n baras nahii.n rahte
do gha.Dii aur hai bahaar-e-shabaab
aa ki kuchh dil kii sun sunaa le.n ham
aa mohabbat ke giit gaa le.n ham
merii tanhaa.iyo.n pe shaam rahe?
hasrat-e-diid naa-tamaam rahe?
dil me.n betaab hai sadaa-e-hayaat
aa.nkh gauhar nisaar kartii hai
aasmaa.n par udaas hai.n taare
chaa.ndnii intizaar kartii hai
aa ki tho.Daa saa pyaar kar le.n ham
zindagii zar-nigaar kar le.n ham

Faiz Ahmad Faiz
Nazm

tez chalo

ye kah rahaa hai dil-e-be-qaraar tez chalo
bahut udaas hai.n zanjiir o daar tez chalo
jo thak ga.e hai.n unhe.n gard-e-raah rahne do
kisii kaa ab na karo intizaar tez chalo
KHizaa.n kii shaam kahaa.n tak rahegii saaya-fagan
bahut qariib hai sub.h-e-bahaar tez chalo
tumhii se KHauf-zada hai.n zamiin o zar vaale
tumhii ho chashm-e-sitam-gar pe baar tez chalo
karo KHuluus o mohabbat ko rahnumaa apnaa
nahii.n durust dilo.n me.n Gubaar tez chalo
bahut hai.n ham me.n yahaa.n log guftuguu-pesha
hai un kaa sirf yahii kaarobaar tez chalo
KHirad kii sust-ravii se kise milii manzil
junuu.n hii ab to karo iKHtiyaar tez chalo

Habib Jalib
Nazm

hum

jo hai jo ab tak hu.aa hai jo ho rahaa hai
us se kise mafar hai
ko.ii jo chaahe
ki ahd-e-rafta se ek pal phir se lauT aa.e
kahaa hu.aa lafz an-kahaa ho sake
to is aarzuu kaa haasil vo jaantaa hai
bahut sahii iKHtiyaar-o-imkaa.n
barg-o-KHas kii taab-o-majaal kyaa hai
numu-e-Guncha me.n us kaa apnaa kamaal kyaa hai
tirii nigaaho.n me.n teraa Gam koh se giraa.n-tar hai
tuu samajhtaa hai
tere siine ke surKH laave se
shahr-o-qarya pighal rahe hai.n
KHizaa.n zamistaa.n tirii udaasii ke aa.ine hai.n
tuu mushta.il ho to zalzalo.n se zamiin kaa.npe
tujhe gumaa.n hai
ki gul khile hai.n tire tabassum kii pairvii me.n
ye phuul ko iKHtiyaar kab thaa
ki kaun sii shaaKH par khile
kaun kunj me.n muskuraa.e
aur kin fazaa.o.n me.n KHushbu.e.n bikhere

Zia Jalandhari
Nazm

mere pas kya kuchh nahin

mere paas raato.n kii taariikii me.n
khilne vaale phuul hai.n
aur be-KHvaabii
dino.n kii murjhaa.ii hu.ii raushnii hai
aur biinaa.ii
mere paas lauT jaane ko ek maazii hai
aur yaad...
mere paas masruufiyat kii tamaam tar ra.ngaa-ra.ngii hai
aur be-ma.anaviyat
aur in sab se pare khulne vaalii aa.nkh
mai.n aasmaa.n ko o.Dh kar chaltaa
aur zamiin ko bichhaunaa kartaa huu.n
jahaa.n mai.n huu.n
vahaa.n abdiyat apnii girhe.n kholtii hai
ja.ngal jhuumte hai.n
baadal baraste hai.n
mor naachte hai.n
mere siine me.n ek samundar ne panaah le rakkhii hai
mai.n apnii aag me.n jaltaa
apnii baarisho.n me.n nahaataa huu.n
merii aavaaz me.n
bahut sii aavaazo.n ne ghar kar rakkhaa hai
aur meraa libaas
bahut sii dhajjiyo.n ko jo.D kar tayyaar kiyaa gayaa hai
merii aa.nkho.n me.n
ek girte hu.e shahr kaa saaraa malba hai
aur ek mustaqil intizaar
aur aa.nsuu
aur in aa.nsu.o.n se phuul khilte hai.n
taalaab bante hai.n
jin me.n parinde nahaate hai.n
ha.nste aur KHvaab dekhte hai.n
mere paas
duniyaa ko sunaane ke liye kuchh giit hai.n
aur bataane ke liye kuchh baate.n
mai.n rad kiye jaane kii lazzat se aashnaa huu.n
aur paziiraa.ii kii dil-nashii.n muskuraahaT se
bharaa rahtaa huu.n
mere paas
ek aashiq kii vaaraftagii
dar-guzar aur be-niyaazii hai
tumhaarii is duniyaa me.n
mere paas kyaa kuchh nahii.n hai
vaqt aur tum par iKHtiyaar ke sivaa?

Abrar Ahmad
Nazm

naqqad

dil me.n jab ash.aar kii hotii hai baarish be-shumaar
nutq par buu.nde.n Tapak pa.Dtii hai.n kuchh be-iKHtiyaar

Josh Malihabadi
Nazm

holi

ye sair holii kii ham ne to biruj me.n dekhii
kahii.n na hovegii is lutf kii miyaa.n holii
ko.ii to Duubaa hai daaman se le ke taa cholii
ko.ii to murlii bajaataa hai kah kanhaiyaa jii
hai dhuum-dhaam pe be-iKHtiyaar holii me.n

Nazeer Akbarabadi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now