Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "ishtihar"

Nazm MATCHES FOR "ishtihar"

Nazm

intishaar

kabhii jumuud kabhii sirf intishaar saa hai
jahaa.n ko apnii tabaahii kaa intizaar saa hai
manuu kii machhlii na kashti-e-nuuh aur ye fazaa
ki qatre qatre me.n tuufaan be-qaraar saa hai
mai.n kis ko apne garebaa.n kaa chaak dikhlaa.uu.n
ki aaj daaman-e-yazdaa.n bhii taar taar saa hai
sajaa-sa.nvaar ke jis ko hazaar naaz kiye
usii pe KHaaliq-e-kaunain sharmsaar saa hai
tamaam jism hai bedaar fikr KHvaabiida
dimaaG pichhle zamaane kii yaadgaar saa hai
sab apne paa.nv pe rakh rakh ke paa.nv chalte hai.n
KHud apne dosh pe har aadmii savaar saa hai
jise pukaariye miltaa hai ik kha.nDar se javaab
jise bhii dekhiye maazii kaa ishtihaar saa hai
hu.ii to kaise bayaabaa.n me.n aa ke shaam hu.ii
ki jo mazaar yahaa.n hai miraa mazaar saa hai
ko.ii to suud chukaa.e ko.ii to zimma le
us inqalaab kaa jo aaj tak udhaar saa hai

Kaifi Azmi
Nazm

ek KHwahish

varna ye ban jaa.egaa aKHbaar
kaarobaar-e-iin-o-aa.n kaa ishtihaar
vaqt ke talvo.n se qatra qatra KHuu.n
tere chehre par Tapaktaa jaa.egaa jam jaa.egaa
naa-shuniida aur naa-gufta huruuf
gaD.maDaa jaa.e.nge ho jaa.e.nge 'jumble-up' baham

Ameeq Hanafi
Nazm

telewision

television ahd-e-haazir kaa ik aflaatuun hai
lag gayaa hai jo hamaare mu.nh ko ye vo KHuun hai
is tarah television kaa har drama ho gayaa
jaise laazim shervaanii par pajaama ho gayaa
ishtihaar is tarah laazim hai KHabar-naame ke ba.ad
jaise ful-stop kii maujuudgii comme ke ba.ad
ik Daraama nashr hotaa hai jo aadhii raat me.n
vo bahut maqbuul hai is ahd ke jinnaat me.n
jis jagah Time bachaa tho.Daa saa gaanaa de diyaa
raat ke baara-baje qaumii taraana de diyaa
mahfil-e-she.arii ko aadhii raat me.n bhugtaa diyaa
bhairvii.n kaa raag paune-nau-baje chipkaa diyaa
aaj phir fannii KHaraabii ho ga.ii do-chaar baar
intizaar o intizaar o intizaar o intizaar
television ho gayaa sa.ngiin biivii kii tarah
aur biivii ho ga.ii ra.ngiin T.V kii tarah

Khalid Irfan
Nazm

KHauf nama

naaf kaTtii hai zaKHm jaltaa hai
KHauf dha.Dkan ke saath chaltaa hai
har rag-e-jaa.n me.n sarsaraataa hai
saa.ns ke saath aataa jaataa hai
khaal ko chhaal se milaatii hai
sansanii rau.ngTe banaatii hai
taaq-e-jaa.n me.n charaaG rakhtaa hai
KHauf-e-vahshat kaa tel chakhtaa hai
sajda-e-Gam me.n gir gayaa zaahid
sarsaraatii jabii.n me.n KHauf liye
ho gayaa a.ngbiin se namkiin
zaa.iqa aastii.n me.n KHauf liye
saa.np lashkar ke saath chaltaa hai
memana maysara me.n KHauf liye
husn Gamze ke dam se qaa.em hai
apnii har har adaa me.n KHauf liye
zindagii ek farsh hai jis par
Dar uThaa.e.n to haul bichhtaa hai
shaahraah-e-hayat ke uupar
KHauf kaa taarkol bichhtaa hai
maz.hab iijaad kartaa rahtaa hai
maabad aabaad kartaa rahtaa hai
ye to andar kii sang saarii hai
KHauf barbaad kartaa rahtaa hai
fahm o daanish ke zard saudaagar
vasvaso.n kii kapaas bechte hai.n
ruuh kii market un kii hai
jo aqiide hiraas bechte hai.n
zindagii ham-safar hai lekin KHauf
raaste me.n utaar detaa hai
parcha-e-jaa.n ke har shumaare me.n
vaahima ishtihaar detaa hai
maut KHud maartii nahii.n jitnaa
maut kaa KHauf maar detaa hai

Waheed Ahmad
Nazm

aape ranjha hoi

maGribii sahraa ke kinaare kundan ke phuul khilnaa shuruu.a ho ga.e hai.n
mashriqii sahraa ke biicho.n-biich kha.Dii sundarii kii naak kaa lau.ng murjhaa gayaa hai
ye kis taariiKH ke aKHbaar kii KHabar hai
ko.ii ishtihaar hai kyaa
diivaaro.n pe lakiire.n na Daalo miTaa.oge to tumhaare hii haath kaale ho.nge
haa.n khel khel me.n hii dallaalii siikh jaa.oge ko.elo.n kaa to bahaana hai
ko.ele chaar-din aur dahak rahe hai.n
pa.nkhe mere dil me.n lage hai.n mujhe ab bhii sardii lagtii hai
barf kii vo Dalii pighaltii kyuu.n nahii.n jis kii aa.iine jaisii sat.h par
meraa chehra bhii mujhe dikhaa.ii kyuu.n nahii.n detaa darmiyaan kaun haa.il hai
garm larazte hu.e aa.nsuu aur milne kii taa-ha.ng
aa.nsu.o.n ke jhakole me.n hamaare chehre Dislocate ho ga.e hai.n
aur phir saa.ns se saa.ns na milii
dam me.n dam na aayaa
raa.njhaa raa.njhaa kuukdii mai.n aape raa.njhan ho.ii

Nasreen Anjum Bhatti
Nazm

sawali

guzar rahe hai.n baraabar tabaahiyo.n ke juluus
ye zindagii ke musaafir kahaa.n chale jaa.e.n
ye ishtihaar Gamo.n ke alam kii tasviire.n
ye zindagii hai nahii.n gard-e-zindagii bhii nahii.n
javaa.n umiide.n fazaa.e-hayaat se maayuus
tanuur siine kaa ii.ndhan hai.n vo tamannaa.e.n
jalii huruuf me.n ye haadso.n kii tahriire.n
ki jin se dil ke a.ndhere me.n kuchh kamii bhii nahii.n
ye aadmii hai.n nahii.n bebasii kii taqriire.n
bapaa hai hashr magar aa.nkh dekhtii bhii nahii.n

Yusuf Zafar
Nazm

nim hakim KHatra-e-jaan

kal hu.aa shab ko jo minTo road par meraa guzar
ik dukaa.n par ittifaaqan ik tabiib aaya nazar
us dukaa.n ke saamne ek board thaa laTkaa hu.aa
jis pe thaa rangiin pairaa.e me.n ye likkhaa hu.aa
shaiKH budhdhan sar-zamiin-e-hind kii ruuh-e-ravaa.n
rahnumaa-e-tibb-e-yuunaanii masiihaa-e-zamaa.n
ek bosiida sanad thii dar pe laTkaa.ii hu.ii
jo kisii attaar-e-kaamil se thii likhvaa.ii hu.ii
saamne the chand Dabbe jin me.n thii.n kuchh goliyaa.n
muddato.n kii ek botal me.n thii ruuh-e-baadbaa.n
paas aaya gar ko.ii un ko masiihaa jaan kar
so gayaa aaraam se do din me.n chaadar taan kar
sai.nka.Do.n biimaar nazr-e-maut yuu.nhii ho ga.e
un ke haatho.n zindagii se haath kitne dho ga.e
aaj-kal ye hind me.n hai tibb-e-yuunaanii kaa haal
maut ke har ek goshe me.n bichhaa rakkhe hai.n jaal
har galii me.n hai.n hakiimo.n kii dukaane.n be-shumaar
ek sau biimaar agar hai.n to atibbaa ik hazaar
har dar-o-diivaar pe chaspaa.n hai.n un ke ishtihaar
fan ke jo maahir the vo bhii ho ga.e be-e'tibaar
thii kabhii ye tib haqiiqat me.n masiihaa-e-zamaa.n
ek din ye hai ki KHud hii le rahii hai hichkiyaa.n
kyaa kare vo har tarah majbuur hai naa-chaar hai
kyaa masiihaa.ii kare jab aap hii biimaar hai
in hakiimo.n kaa jahaa.n me.n gar yahii aalam rahaa
dekh lenaa garm baazaar-e-ajal ho jaa.egaa

Syed Husain Ali Jafri
Nazm

magar main kya karun

phal aane par shaaKHe.n jhuktii hai.n
phuul apnaa ishtihaar nahii.n diyaa karte
un kaa rang aur KHushbuu KHud-ba-KHud
logo.n ko apnii samt khii.nchtii hai
ye aur aisii tamaam duusrii kahaavate.n mujhe hamesha appeal kartii hai.n
magar mai.n kyaa karuu.n
mire aas paas ziyaada-tar log
baat baat par
apnii taariif karte nahii.n thakte

Ahsan Rizwi
Nazm

kaj-rawi ka ishtihaar

mai.n to huu.n shaa.er kii ruuh
shaa.er kii KHaasiyyat
ek KHushbuu ik tilism
aur miraa beTaa ki hai shaa.er kaa jism
shaa.iro.n kii KHaslato.n kaa aa.ina
kaj-ravii kaa ishtihaar
hai sameTe apne andar aib kii har ek qism
naa-samajh aavaara-o-bekaar shaidaa-e-qimaar
aashnaa.o.n kaa musaahib kam-ayaar
harza-go baada-gusaar

Krishna Mohan
Nazm

KHidmat-e-adab

jab tak adab-baraa-e-adab kaa rahaa KHayaal
adbaar-o-muflisii se rahe ham shikasta-haal
saa.e kii tarah saath nahuusat lagii rahii
ik rog ban ke jaan se usrat lagii rahii
go shaa.erii kaa rang nikhartaa chalaa gayaa
shiiraaza-e-ma.aash bikhartaa chalaa gayaa
lekin KHudaa bhalaa kare ik mehrbaan kaa
jin ko adab-baraa-e-shikam kaa hai tajraba
mausuuf ne bataa.ii hame.n vo pate kii baat
ab din hai roz-e-iid to shab hai shab-e-baraat
all india mushaa.era majlis ke naam se
kholaa hai ik idaara-e-nau dhuum-dhaam se
karte hai.n shaa.erii ke evaz ab mushaa.era
is rozgaar se hai hame.n KHuub faa.eda
har tiin chaar maah ke vaqfe pe be-KHalal
apne programme pe karte hai.n ham amal
ya.anii mushaa.ere kaa chalaate hai.n kaarobaar
chhapvaa ke roz-naamo.n me.n jhuuTaa ye ishtihaar
'josh'-o-'firaaq'-o-'saahir' o 'parvez' shaahidii
'faiz'-o-'KHaliil'-o-'jazbii' o 'maKHduum'-o-'ja.afarii'
kursii-o-arsh-o-lauh-o-qalam sab hii aa.e.nge
taaza kalaam apnii zabaa.n se sunaa.e.nge
is ishtihaar me.n vo kashish hai ki ahl-e-zauq
lete hai.n daaKHle kaa ticket dau.D kar ba-shauq
circus me.n jis tarah se ho KHilqat kaa izhdihaam
yuu.nhii mushaa.ere me.n pahu.nchte hai.n KHaas-o-aam
sab log baiTh jaate hai.n farsh-e-zamii.n pe jab
mic pe jaa ke karte hai.n elaan ham ye tab
afsos hai ki aa na sake 'josh' aur 'firaaq'
ye moscow ravaana hu.e vo ga.e iraq
'jazbii' ko iKHtilaaj hai 'parvez' hai.n aliil
gaa.Dii zaraa sii chuuk se miss kar ga.e 'KHaliil'
bhejii hai 'faiz'-o-'saahir'-o-'maKHduum' ne KHabar
seat un ko mil sakii na havaa.ii jahaaz par
go ye KHabar dilo.n ko guzartii hai naagavaar
honaa hai jalsa-gaah me.n tho.Daa saa intishaar
le kar magar zehaanat-e-fitrii se kaam ham
dam-bhar me.n saama.iin ko karte hai.n raam ham
Dais pe tuk-farosho.n kaa rahtaa hai ik hujuum
filmii dhuno.n me.n gaane kii jin ke ba.Dii hai dhuum
jo KHud ticket KHariid ke aate hai.n bazm me.n
ham un se apnaa kaam chalaate hai.n bazm me.n
le le ke gaTkarii jo sunaate hai.n vo kalaam
u.Dte hai.n vaah vaah ke na.aro.n se saqf-o-baam
bazm-e-nashaat bantaa hai saaraa mushaa.era
hotaa hai kaamyaab hamaaraa mushaa.era
KHush-KHush gharo.n ko jaate hai.n huzzaar ik taraf
noTo.n kaa ham lagaate hai.n ambaar ik taraf
ye KHidmat-e-adab kaa tariiqa hai laa-javaab
pesha ye vo hai jis me.n munaafa hai be-hisaab

Raza Naqvi Vahi
Nazm

ye dil mange mor

pichhle do tiin saal se akasr
ghar me.n ik ishtihaar dekhtaa huu.n
jis me.n likhaa hai
ye jo hai.n tiin lafz a.ngrezii
aaj tak ye samajh me.n aa na sakaa
hai.n KHudaa ke liye ki mere liye
mai.n to mafhuum un kaa paa na sakaa
kyaa KHudaa dekhtaa hai zii T v
roz jab raat ghar pahu.nchtaa huu.n
suunii jebo.n ko mai.n TaToltaa huu.n
merii biivii kii aa.nkhe.n puuchhtii hai.n
aaj bhii zindagii ne kam hii diyaa
lo tumhaarii ye nii.nd kii golii
ik na.ii nazm kah ke so jaa.o

Fay Seen Ejaz
Nazm

saDak-chhap

polio ke qatre piine se
bhikaariyo.n kii bandar-baa.nT me.n kaise kamii aa saktii hai?
jabki
gadaagaro.n ke ruuhaanii peshvaa
ishtihaar dete hai.n
ki unhe.n
baGair haath paa.nv vaale logo.n kii
ashad zaruurat hai
aur mujhe
ha.nsii aatii hai
un mar jaane vaalo.n par
jo vaccino.n me.n bhar diye ga.e

Sidra Sahar Imran
Nazm

tasalli

raaste ke pech-o-KHam dushman sahii
faasle hai.n munhasir raftaar par
kaan mat dharnaa dil-e-aazurda kii siskaar par
kyaa hu.aa chulluu jo chhalnii hai.n abhii
ho.nT kyo.n ho.n tishnagii ke ishtihaar
kyaa hu.aa soche hu.e manzar jo haath aa.e nahii.n
aa.nkh saa dariyaa bane kyo.n reg-zaar
naaz ho tahsiil kaa yaa naa-rasaa.ii kaa malaal
har tag-o-dau hai qavii kaa ishti.aal
soch saktaa hai khule dil se to bas itnaa hii soch
sheva-e-hirmaan-o-yaas achchhaa nahii.n
zindagii kaa yuu.n libaas achchhaa nahii.n
TuuT kar saalim bane rahnaa agarche hai fareb
mo'tariz hotaa nahii.n ko.ii magar ilhaaq par
ba.az taKHliiqii amal ke maa-sivaa
kaun saa ilzaam aataa hai kisii tiryaaq par

Rasheed Ejaz
Nazm

apni pahchan

daanishvarii saarii aqlo.n kaa ishtihaar ek taraf aur
jazbo.n kaa baazaar ek taraf
logo.n ko pahchaan.ne un ko jaan.ne ke liye kyaa ab
academy qaa.em hogii
ham
sab ko achchhaa kahne vaale log
hamaarii apnii pahchaan jaane kis ke havaale se hogii
hamaarii zard chehro.n se
aur hairaan aa.nkho.n se ki tamaashaa hamaarii aa.nkho.n ke saamne sadme kii
tarah ho rahaa hai
aur ham kuchh kah nahii.n sakte
suno ye man-made society hai
jo tumhaare mardo.n ke ahkaam hai.n un par chalo
ek mard tumhe.n zinda dafn karnaa chaahtaa hai
ek tumhe.n aasmaan kii bulandiyo.n tak le jaanaa chaahtaa hai
ek tumhe.n aazaad dekhnaa chaahtaa hai
ek tumhe.n siidhaa raasta dikhaanaa chaahtaa hai
ek tumhe.n apnii mohabbat se maGluub karnaa chaahtaa hai
vaise bhii Gulaam aaqaa kii baat ko Taal nahii.n saktaa
vo tum se mohabbat kartaa hai tumhaarii izzat nahii.n kar saktaa
izzat sa.nbhaalnaa hai to ghar me.n baiTho
mard ke saamne aurato.n kii aazaadii kii taqriire.n karne ke ba.ad
jab tum us ke jazbe me.n ba.ndhogii
to tum ek aur Gulaamii ek aur zillat me.n jaka.D dii jaa.ogii
tumhaarii pahchaan kis havaale hogii
Gulaam aur aaqaa ke havaale se
bas pha.D.pha.Daate raho bebas panchhii kii tarah
ki jis ko parvaaz kii raah dikhaa kar
par kaaT diye ga.e ho.n

Shaista Habeeb
Nazm

tahzib ka tasadum

mai.n kisii shahr me.n
traffic hoarding ke ek taraf
kisii ba.De ishtihaar me.n uupar
ha.nstaa muskuraataa chehra dekhtaa huu.n
mai.n dekhtaa huu.n
us ke haath me.n
kisii dum-kaTe chitkabre kutte kii
dono.n aglii Taa.nge.n
us kaa chehra aur kutte kii naak
mutavaazii
kutte kii aa.nkho.n me.n chamak
us ke ho.nTo.n kii KHushii
ek sii
sabz battii jal ga.ii hai
traffic flue jaarii hu.ii

Aquil Ziyad
Nazm

kuDe-dan

khule niile aakaash kii katran
pairaahan-e-KHvaab kii dhajjiyaa.n
shiisha-e-dil dil kii kirchiyaa.n
reshmii jismo.n kii utran
daastaan-e-ishq ke pareshaa.n auraaq
visaal-e-yaar ke kaTe-phaTe aur baasii aKHbaar
rusvaa.ii kii diivaaro.n ke gande ishtihaar
mailaa kuchailaa dard
phaTaa puraanaa firaaq
husn-o-ra.anaa.ii ke shikasta jaam
bhuule-bisre naam
gahrii kaalii aa.nkho.n ke bujhe charaaG
daaman-e-yaad ke bad-numaa daaG
saarii chiize.n behis duniyaa ne
mujh ko kuu.De-daan samajh kar
mere andar
Daal dii hai.n

Ehtisham Akhtar
Nazm

daraKHt-e-zard

vo hai.at-daa.n vo aalim naaf-e-shab me.n chhat pe jaataa thaa
rasad kaa rishta sayyaaro.n se rakhtaa thaa nibhaataa thaa
use KHvaahish thii shohrat kii na ko.ii hirs-e-daulat thii
ba.De se qutr kii ik duurbiin us kii zaruurat thii
mirii maa.n kii tamannaa.o.n kaa qaatil thaa vo qallaama
mirii maa.n merii mahbuuba qayaamat kii hasiina thii
sitam ye hai ye kahne se jhijaktaa thaa vo fahhaama
thaa behad ishti.aal-a.ngez bad-qismat o allaama
KHalaf us ke KHazaf aur be-nihaayat naa-KHalaf nikle
ham us ke saare beTe intihaa.ii be-sharaf nikle
mai.n us aalim-tariin-e-dahr kii fikrat kaa munkir thaa
mai.n fastaa.ii thaa jaahil thaa aur mantiq kaa maahir thaa
par ab merii ye shohrat hai ki mai.n bas ik sharaabii huu.n
mai.n apne duudmaan-e-ilm kii KHaana-KHaraabii huu.n
sagaan-e-KHuuk zaad-e-barzan o baazaar-e-be-maGzii
mirii jaanib ab apne thoba.De shaahaana karte hai.n
zinaa-zaade mirii izzat bhii gustaaKHaana karte hai.n
kamiine sharm bhii ab mujh se be-sharmaana karte the

Jaun Eliya
Nazm

barahwan khilaDi

umr-bhar kaa ye rishta
chhuuT bhii to saktaa hai
aaKHirii whistle ke saath
Duub jaane vaalaa dil
TuuT bhii to saktaa hai
tum bhii iftiKHaar-aarif
baarahve.n khilaa.Dii ho
intizaar karte ho
ek aise lamhe kaa
ek aisii saa.at kaa
jis me.n haadisa ho jaa.e
jis me.n saaneha ho jaa.e
tum bhii iftiKHaar-aarif
tum bhii Duub jaa.oge
tum bhii TuuT jaa.oge

Iftikhar Arif
Nazm

aaKHiri mulaqat

sochaa na thaa ki aa.egaa ye din bhii phir kabhii
ik baar phir mile hai.n, zaraa muskuraa to le.n!
kyaa jaane ab na ulfat-e-deriina yaad aa.e
is husn-e-iKHtiyaar pe aa.nkhe.n jhukaa to le.n
barsaa labo.n se phuul tirii umar ho daraaz
sambhle hu.e to hai.n pa zaraa Dagmagaa to le.n

Akhtarul Iman
Nazm

abhi kuchh din lagenge

abhii kuchh din lage.nge

Iftikhar Arif
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now