Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "istiqbaal"

Nazm MATCHES FOR "istiqbaal"

Nazm

ruh-e-arzi aadam ka istiqbaal karti hai

khol aa.nkh zamii.n dekh falak dekh fazaa dekh!
mashriq se ubharte hu.e suuraj ko zaraa dekh!
is jalva-e-be-parda ko parda me.n chhupaa dekh!
ayyaam-e-judaa.ii ke sitam dekh jafaa dekh!
betaab na ho maarka-e-biim-o-rajaa dekh!
hai.n tere tasarruf me.n ye baadal ye ghaTaa.e.n
ye gumbad-e-aflaak ye KHaamosh fazaa.e.n
ye koh ye sahraa ye samundar ye havaa.e.n
thii.n pesh-e-nazar kal to farishto.n kii adaa.e.n
aa.iina-e-ayyaam me.n aaj apnii adaa dekh!
samjhegaa zamaana tirii aa.nkho.n ke ishaare!
dekhe.nge tujhe duur se garduu.n ke sitaare!
naapaid tire bahr-e-taKHayyul ke kinaare
pahu.nche.nge falak tak tirii aaho.n ke sharaare
taamiir-e-KHudii kar asar-e-aah-e-rasaa dekh
KHurshiid-e-jahaa.n-taab kii zau tere sharar me.n
aabaad hai ik taaza jahaa.n tere hunar me.n
jachte nahii.n baKHshe hu.e firdaus nazar me.n
jannat tirii pinhaa.n hai tire KHuun-e-jigar me.n
ai paikar-e-gul koshish-e-paiham kii jazaa dekh!
naala.nda tire uud kaa har taar azal se
tuu jins-e-mohabbat kaa KHariidaar azal se
tuu piir-e-sanam-KHaana-e-asraar azal se
mehnat-kash o KHuu.n-rez o kam-aazaar azal se
hai raakib-e-taqdiir-e-jahaa.n terii razaa dekh!

Allama Iqbal
Nazm

kisan

chiir ke saal me.n do baar zamii.n kaa siina
dafn ho jaataa huu.n
gudgudaate hai.n jo suuraj ke sunahre naaKHun
phir nikal aataa huu.n
ab nikaltaa huu.n to itnaa ki baTore jo ko.ii daaman me.n
daaman phaT jaa.e
ghar ke jis kone me.n le jaa ke ko.ii rakh de mujhe
bhuuk vahaa.n se haT jaa.e
phir mujhe piiste hai.n, guu.ndhte hai.n, se.nkte hai.n
guu.ndhne se.nkne me.n shakl badal jaatii hai
aur ho jaatii hai mushkil pahchaan
phir bhii rahtaa huu.n kisaan
vahii KHasta, bad-haal
qarz ke panja-e-KHuunii.n me.n niDhaal
is daraa.ntii ke tufail
kuchh hai maazii se Ganiimat miraa haal
haal se hogaa hasii.n istiqbaal
uThte suuraj ko zaraa dekho to
ho gayaa saaraa ufuq laal.n-laal

Kaifi Azmi
Nazm

naya sal

phir chaman me.n diidanii hogii na.e phuulo.n kii 'iid
phir na.e patto.n kaa istiqbaal aur KHush-aamdiid

Shahroz Khawar
Nazm

bulawa

chalo us koh par ab ham bhii cha.Dh jaa.e.n
jahaa.n par jaa ke phir ko.ii bhii vaapas nahii.n aataa
sunaa hai ik nidaa-e-ajnabii baaho.n ko phailaa.e
jo aa.e us kaa istiqbaal kartii hai
use taariikiyo.n me.n le ke aaKHir Duub jaatii hai
yahii vo raasta hai jis jagah saaya nahii.n jaataa
jahaa.n par jaa ke phir ko.ii kabhii vaapas nahii.n aataa

Zehra Nigaah
Nazm

lapata

mai.n laapataa ho gayaa huu.n
ka.ii hafte hu.e
police ko report likhvaa.e
tab se roz thaane jaataa huu.n
havaldaar se puuchhtaa huu.n
meraa kuchh pataa chalaa
hamdard police afsar maayuusii se sar hilaataa hai
pha.nsii pha.nsii aavaaz me.n kahtaa hai
abhii tak tumhaaraa kuchh suraaG nahii.n milaa
phir vo tasallii detaa hai
kisii na kisii din
tum mil hii jaa.oge
behosh
kisii sa.Dak ke kinaare
yaa burii tarah zaKHmii
kisii aspataal me.n
yaa laash kii suurat
kisii nadii me.n
merii aa.nkho.n me.n aa.nsuu aa jaate hai.n
mai.n baazaar chalaa jaataa huu.n
apnaa istiqbaal karne ke liye
gul-farosh se phuul KHariidtaa huu.n
apne zaKHmo.n ke liye
chemist se
marham-paTTii kaa saamaan
tho.Dii ruu.ii
aur dard-kushaa goliyaa.n
apnii aaKHirii rusuumaat ke liye
masjid kii dukaan se ek kafan
aur apnii yaad manaane ke liye
ka.ii mom-battiyaa.n
kuchh log kahte hai.n
kisii ke marne par
mom-battii nahii.n jalaanii chaahiye
lekin vo ye nahii.n bataate
ki aa.nkh kaa taara laapataa ho jaa.e
to raushnii kahaa.n se laa.e.n
ghar kaa charaaG bujh jaa.e
to phir kyaa jalaa.e.n

Mubashshir Ali Zaidi
Nazm

message

us ne javaaban likhaa
chaa.e chho.Diye aap hamaare ghar tashriif laa.iye
hamaarii family se miliye
apnii family se milvaa.iye
ham saada-mizaaj sadiyo.n puraanii mehmaan-navaazii se
aap kaa istiqbaal kare.nge

Zehra Alvi
Nazm

mazafat

chaa.nd aur gulaab un ke
madrase jo jaate hai.n
qamchiyo.n se hotaa hai
bachpane kaa istiqbaal

Ishrat Afreen
Nazm

pesh lafz ek mohabbat name ka

aur mai.n
mai.n to istiqbaal bhii nahii.n kar saktaa
kisii na.ii aahaT kaa
kyuu.nki Dar gayaa huu.n mai.n
aate hu.e qadmo.n kii
lauTtii hu.ii baazgasht se

Nomaan Shauque
Nazm

main ek aansu ikaTTha kar raha hun

tum hamaarii taraf ruKH kar ke kitaab dekhte
aur taKHta-e-siyaah kii taraf ruKH kar ke
likhte
mai.n bhii ek hisaabii uljhan suljhaa rahaa thaa
tumhaare zaanuu
tumhaare kuulho.n se ziyaada farba kyuu.n hai.n
tumhe.n milii hu.ii nemato.n ke tashakkur me.n
jhukii rahne vaalii brasier
mire istiqbaal ke liye kha.Dii ho ga.ii thii

Syed Kashif Raza
Nazm

ho raha hai zikr paiham aam ka

ho rahaa hai zikr paiham aam kaa
aa rahaa hai phir se mausam aam kaa
nazm likh kar us ke istiqbaal me.n
kar rahaa huu.n KHair-maqdam aam kaa
un se ham rakkhe.n ziyaada rabt kyuu.n
shauq jo rakhte hai.n kam kam aam kaa
tab kahii.n aataa hai mere dam me.n dam
naam jab letaa huu.n hamdam aam kaa
shauq se pa.Dhte hai.n us ko KHaas-o-aam
jab qasiida likhte hai.n ham aam kaa
kyaa kahuu.n asmaar kii fihrist me.n
naam hai sab se muqaddam aam kaa
ik faqat mai.n hii nahii.n shaidaa 'asar'
shaidaa hai aalam kaa aalam aam kaa

Shaheen Iqbal Asar
Nazm

KHud-saKHta dukh

suuraj har roz
merii aa.nkho.n me.n bharii hu.ii
aur shaayad marii hu.ii nii.nd ko dekh kar
apne din kaa aaGaaz kartaa hai
mai.n
ghar se daftar jaatii hu.ii sa.Dak par
re.ngtaa hu.aa
aane vaalii naslo.n par ehsaan kartaa huu.n
mai.n daftar apnii marzii se jaataa huu.n
lekin daftar me.n merii marzii kaa kaam nahii.n hotaa
mai.n kaaGaz par KHvaab aur dukh ek saath likh kar
ghar lauTtaa huu.n
ghar kii be-tartiibii aur uu.nghtii hu.ii diivaare.n
meraa istiqbaal kartii hai.n
mai.n bistar par sone ke liye lauTtaa huu.n
aur jaagtaa rahtaa huu.n
vo
Diary me.n KHud-saaKHta dukh likhtii hai
aur sukuun se so jaatii hai

Ali Sahil
Nazm

suno tum waqt jaise ho

suno tum shaam jaise ho
jo din ke sard hone par
hamesha ghar kii nichlii sii.Dhiyo.n par
meraa istiqbaal kartii hai
mirii tanhaa.iyo.n ke canvas me.n rang bhartii hai

Arshad Malik
Nazm

tanhai ki ek nazm

bahut chhoTii sii ik taqriib rakhii hai
ye duniyaa hai
lihaazaa hasb-e-KHvaahish kuchh yahaa.n ho kar nahii.n detaa
so ye taqriib jaane ho na ho
par tum zaruur aanaa
tum aanaa
aarzuu kii baat hogii
zindagii par tabsire ho.nge
vahaa.n ruknaa
jahaa.n phuulo.n kii sa.ngat me.n ravish par dil dhare ho.nge
qabaa-e-chaak pahne kuchh kushaada-zarf istiqbaal ko baahar kha.De ho.nge
tumhe.n jo rang bhii bhaa.e pahan aanaa
tumhe.n jo bhes KHush aa.e
dabe paa.nv
havaa ke dosh par
yaa chaa.nd kii kirno.n pe chal kar
paa-piyaada harf haatho.n me.n uThaa.e yaa tahii-daamaa.n
kisii suurat bhii aanaa
bas chale aanaa
bahut chhoTii sii ik taqriib rakhii hai
na ab shab-zaadgii se ko.ii shikva
na zamaane ke taGaaful se shikaayat hai
zaruur aanaa mire Gam kii nihaayat hai

Abeera Ahmad
Nazm

kashmakash

duusraa raasta dhuul me.n sanaa
jahaa.n kare.nge istiqbaal
chand kiile.n kuchh KHaar
raah kuchh dushvaar hai zaruur
magar yahaa.n kii fazaa
pur-kaif aur pur-sukuun

Aditya Pant Naaqid
Nazm

shaKHsiyat

biThaa ke kaa.ndhe pe laa.ii thii raat use
shafaq ne ha.ns ke kiyaa thaa istiqbaal
havaa ne raagnii chhe.Dii fazaa me.n giit ghule
sajaa ke patto.n kii thaalii me.n os ke jugnuu
utaarii thii pe.Do.n ne aartii us kii

Tabassum Azmi
Nazm

maut ki nasihat

maut ne us kii aa.nkho.n me.n aa.nkhe.n Daalii.n
to use badan kaa bosiida libaas haath me.n thaame
be-KHauf-o-KHatar
apne istiqbaal ke liye kha.Daa paayaa
vo sahm ga.ii
us kii haibat maa.nd pa.D ga.ii
vo us ke qaatilo.n ke paas ga.ii
aur jo kuchh dekhaa thaa unhe.n bataa diyaa
vo samjhe ki maut un ke saath kisii saazish me.n shariik ho ga.ii thii
un kii tasallii ke liye
vo us kaa bosiida libaas le aa.ii
magar jaate vaqt nasiihat kar ga.ii
ki ise sambhaal kar rakhe.n
us din ke liye
jab mulk me.n kap.De kaa qaht pa.Degaa
aur un ke na.nge badan Dhaa.npne ke liye
kisii ke paas ko.ii kap.Daa na hogaa
us ek libaas ke sivaa

Javed Shaheen
Nazm

istiqbaal

ubal rahaa hai tarannum chhalak rahii hai sharaab
piyo piyo ki na.e saal kii kiran phuuTii
magar ye kaun hai har baar mujh se kahtaa hai
tiraa KHumaar bhii jhuuTaa sharaab bhii jhuuTii
vo dekho bint-e-kaliisaa kii niilguu.n aa.nkhe.n
jhukii jhukii sii hai.n palke.n magar subuu degii
ye chiiKH haa.n ye tamaddun kii ek hichkii thii
isii dayaar me.n insaaniyat lahuu degii
magar lahuu to Tapaktaa hai surKH Doro.n se
usii lahuu me.n sharaabor hai.n lab-o-ruKHsaar
magar ye kis kaa lahuu hai jo mujh se kahtaa hai
mire ubaal se ba.Dhtaa hai zindagii kaa vaqaar
sukuun sabr qanaa.at najaat taqdiire.n
ye borzaa.ii tamaddun kii istelaahe.n hai.n
qadam uThe hai.n to manzil pe jaa ke dam le.nge
mirii nigaah me.n duniyaa kii shaahraahe.n hai.n
mai.n jaantaa huu.n ye tahziib jii nahii.n saktii
yahii.n hayaat kaa zaKHmii sukuut TuuTegaa
kaho kaho mire jaa.n-baaz saathiyo.n se kaho
isii ufuq pe nayaa aaftaab ubhregaa

Akhtar Payami
Nazm

april bahaar ka istiqbaal karta hai

faroG-e-shaadaabii-e-chaman ko mahaktii miTTii se phuuT niklaa hai narm sabza
hariis-e-taKHliiq nam zamii.n ne gulo.n se daaman udaas belo.n ke bhar diye hai.n
ajiib rut hai! ki buu.Dhii shaaKHo.n me.n saa.ns letaa hai sabz jauban
KHayaalo.n, KHvaabo.n kii rahguzar par chaTak rahii hai.n hazaar kaliyaa.n
nigaah-e-dil ke gaziida goshe rahiin-e-nik.hat
fazaa kii poro.n me.n jaag uTThii hai bhiinii KHushbuu, havaa ke haatho.n me.n raushnii ke ja.Daav ka.ngan
havaa ke pairo.n me.n raqs karne lage hai.n ghu.ngruu
parinde ra.ngiin shaam o.Dhe shafaq kii surKHii se khelte hai.n
damakte paanii me.n Gusl karte hai.n chaa.nd taare
nahaatii kaliyo.n kii be-libaasii ko kitnii hairat se dekhtaa hai
nafiis patto.n kii shaal o.Dhe ghaneraa ja.ngal
gulaab ke surKH pairahan par, safed phuulo.n kii pattiyo.n par!
samaa.at-e-shab me.n sabt kartii hai os yuu.n jal-tara.ng naGme
ki giit vo jo azal se be-kal fazaa me.n gum the
utarne lagte hai.n dha.Dkano.n kii hasiin lai par, mohabbato.n ke amiin ban kar
milan kii aisii sabiih rut me.n husn detaa aap dastak
tumhaare dar par...

Naina Adil
Nazm

naya prometheus

mai.n KHushbuu jism samundar aa.nkho.n kaa
ik KHvaab churaa kar laayaa thaa
mai.n aag churaa kar laayaa thaa
sahraa-e-vajuud kii tanhaa.ii us KHvaab se kitnii shaadaa.n thii
us aatish-e-larzaa.n kii taabish taKHliiq kii zau me.n numaayaa.n thii
miraa KHvaab vo meraa phuul badan
marii aag mire fardaa kaa chaman
mai.n KHvaabo.n se masruur rahaa
mai.n aatish par maGruur rahaa
phir lahr uThii phir qahr hu.aa miraa KHvaab hii mujh ko zahr hu.aa
patthar kii chaTTaano.n par mujh ko
zanjiiro.n se vaabasta kiyaa
KHud aag bhii ik zanjiir banii
zanjiir banii shamshiir banii
har qais ne mujh ko ye paiGaam diyaa
ye haal hamesha qaa.em hai is haal kaa istiqbaal nahii.n
is haal kii chakkii me.n tum ko har lamhe piste rahnaa hai
tum kaise rihaa.ii paa.oge
aisaa to ko.ii paidaa na hu.aa jo tum ko rihaa.ii de aa kar
tum KHvaabo.n se masruur hu.e jo boyaa thaa vo kaaTo.ge
sab apne kiye kii KHuubii hai a.amaal ko apne bhugtoge
ko.ii nii.nd nahii.n ko.ii KHvaab nahii.n ko.ii nuur nahii.n ko.ii naar nahii.n
fariyaad tumhaarii bolii hai alfaaz tumhaare aahe.n hai.n
ik qahr-e-Gazab kargas ke liye
hai jism tumhaaraa dastarKHavaa.n
vo dastarKHavaa.n pe bikhrii ne.amat se
mafluuj-o-siyaah jigar kii lazzat se
har lamhe lutf uThaa.egaa
har lamhe shor machaa.egaa
mai.n KHushbuu jism samundar aa.nkho.n kaa
ik KHvaab churaa kar laayaa thaa
mai.n aag churaa kar laayaa thaa
patthar kii chaTaano.n ne mujh ko
ik mufaffa gosht kaa ruup diyaa
zanjiire.n girdaa-gird rahii.n
ik qahr-e-Gazab kargas ab tak
kabhii merii aa.nkhe.n nochte hai.n
kabhii un kii lahar-e-minqaar se mere dil kii rage.n
ik ne kii hikaayat chhe.Dtii hai.n
jo mujh ko rihaa.ii de aa kar
jo dard ko KHud mahsuus kare
vo aisii jagah KHvaabiida hai
jahaa.n suuraj bhii taariik hu.aa
kyaa jaaniye vo kab aa.egaa
kab aa.egaa kyaa vaaqa.ii aa.egaa

Aslam Farrukhi
Nazm

zard aur sabz ka milap

bahaar ho yaa KHizaa.n mausam dono.n hii
naGmagii se bharpuur hai.n
vasl se judaa.ii tak
ek saaz bajtaa hai
jis kii dhun pe dha.Dkane.n
maah-o-saal kaa qasiida pa.Dhtii hai.n
shaaKH ne chaahaa
patto.n ko jo.De rakhe magar
rang kii tabdiilii ne
mulaaqaat ke zaa.iqo.n kaa lutf KHatm kar diyaa
havaa ne ek sabz daraKHt ko bikheraa
miTTii kii KHushbuu ne baa.nhe.n phailaa kar
zard rang kaa istiqbaal kiyaa
october ke Dhalte shab-o-roz
thakan kaa ehsaas paidaa karte hu.e apnaa paiGaam
sabt kar rahe hai.n
ruuh udaasii ke ghere me.n
sabz rang kii mutalaashii hai
KHvaab ko ta.abiir pahnaate hu.e
mai.n ne havaa kaa zaa.iqa chakhaa
aur ye bhed paa liyaa
ki zard aur sabz kaa milaap

Omainuz Zahra Sayyad
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now