Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "kanda"

Nazm MATCHES FOR "kanda"

Nazm

kali diwar

kal washington shahr kii ham ne sair bahut kii yaar
guu.nj rahii thii sab duniyaa me.n jis kii jai-jai-kaar
mulko.n mulko.n ham ghuume the banjaaro.n kii misl
lekin is kii saj-dhaj sach-much dil-daaro.n kii misl
raushniyo.n ke rang bahe.n yuu.n rasta nazar na aa.e
man kii aa.nkho.n vaalaa bhii yaa.n andhaa ho ho jaa.e
uu.nche baam charaaGaa.n raste ruup-bhare baazaar
jaagtii aa.nkho.n se dekhaa hai KHvaabo.n kaa sansaar
ek safed imaarat jis kii nagar nagar me.n dhuum
andar duniyaa bhar kii kaalak baahar se ma.asuum
yahii safed imaarat jis me.n bahut ba.Dii sarkaar
yahii.n kare.n saudaagar chhoTii qaumo.n kaa bevpaar
yahii.n pe jaaduu-gar baiThaa jab kahii.n kii Dor hilaa.e
har bastii nagasaki hiroshima ban jaa.e
isii imaarat se kuchh duur hii ik kaalii diivaar
logo.n kaa mela aisaa lagaa thaa jaise ko.ii tyauhaar
is kaalii diivaar pe kanda dekhe hazaaro.n naam
un naamo.n ke biich likhaa thaa shohdaa-e-vietnam
aas-paas to jam.a hu.aa thaa KHilqat kaa amboh
sab kii aa.nkho.n me.n sannaaTaa chehro.n par andoh
bekal bahne.n ghaayal maa.e.n aur dukhii bevaaye.n
saajan tum kis des sidhaare soche.n mahbuubaa.e.n
apne pyaaro.n dil-daaro.n kaa ojhal mukh.Daa Dhuu.nDe.n
is kaalii diivaar pe un ke naam kaa Tuk.Daa Dhuu.nDe.n
dilo.n me.n dukh aa.nkho.n me.n shabnam haatho.n me.n phuul uThaa.e
is naamo.n ke qabristaan kaa bhed ko.ii kyaa paa.e
naa turbat naa katba ko.ii naa haDDii naa maas
phir bhii paagal nainaa.n ko thii piyaa milan kii aas
kahii.n kahii.n is kaalii sil par ko.ii safed gulaab
yuu.n be-taab pa.Daa thaa jaise andhii aa.nkh kaa KHvaab
kaa.nTaa ban kar sabhii ke dil me.n khaTke ek savaal
kis kaaran miTTii me.n milaa.e hiiro.n jaise laal
Ho-chi-minh ke des me.n ham ne kyaa kyaa sitam na Dhaa.e
us ke jiyaale to aazaadii kaa suuraj le aa.e
lekin itne chaa.nd ga.nvaa kar ham ne bhalaa kyaa paayaa
ham bad-qismat aise jin ko dhuup milii naa saayaa
mukh motii de kar haasil kii ye kaalii diivaar
ye kaalii diivaar jo hai bas ik KHaalii diivaar
ye kaalii diivaar jo hai naamo.n kaa qabristaan
washington ke shahr me.n dafn hai.n kis kis ke armaan

Ahmad Faraz
Nazm

main urdu zaban hun

mai.n urdu zabaa.n huu.n
mujhe aaryaa.o.n ne paalaa
mirii asl hindostaa.n hai
ki mere lahuu se hii vedo.n kii aayaat likkhii ga.ii hai.n
ye raam aur siitaa kii azmat ke qisse ramaayan-kathaa.e.n
krishan aur raadhaa ke rangii.n fasaane
har ik lafz kii ruuh naGma-saraa hai
mai.n urdu zabaa.n huu.n
vo gautam ki jis ne mohabbat kii paiGambarii se jahannam ko jannat banaayaa
magar kis zabaa.n me.n
zaraa sochiye kis zabaa.n me.n
vo paalii jo mere gharaane kii paalii hu.ii thii
mai.n urdu zabaa.n huu.n
mujhe dekhnaa chaahte ho to aa.o
ajantaa elora ke Gaaro.n me.n dekho
ye mai.n huu.n
miraa husn merii kashish hai abad tak
mujhe dekhnaa chaahte ho to aa.o
ashokaa kii laaTo.n me.n kanda huruuf-e-muqaddas me.n dekho
ye mai.n huu.n
sadaaqat adaalat kii tahriir-e-mohkam
mai.n urdu zabaa.n huu.n
mohabbat kii man-mohnii daastaa.n huu.n
mirii vus.ate.n be-karaa.n hai.n
ye uttar ye dakhkhin ye puurab ye pachchhim
har ik samt mere nishaa.n hai.n
deccan jo kabhii rang-o-harf-o-adaa aur cha.ng-o-sadaa se banaa ek qaus-e-quzah thaa
tumhe.n kuchh KHabar hai vo kyaa silsila thaa
muu.arriKH se puuchho vo meraa hii jaaduu miraa mo.ajiza thaa
mai.n 'KHusrav' kii pyaarii 'valii' kii niyaarii 'qulii' kii dulaarii
KHudaa-e-suKHan 'miir' ke soz-e-pinhaa.n kii mai.n raazdaa.n huu.n
vo diivaan-e-Gaalib vo shahkaar-e-taKHliiq-e-aadam
magar us kaa har sher kahtaa hai paiham
mai.n urdu zabaa.n huu.n
vo 'iqbaal' jo azmat-e-aadamiyyat kaa paiGaambar hai
lahuu ke jumuud aur dil ke taGaaful kaa jo nauhagar hai
vo jis kii nazar baal-e-jibriil kii ham-safar hai
vo jis kii sadaa KHvaab-e-Gaflat me.n bad-mast insaaniyat ke liye ek baa.ng-e-daraa hai
vo jis kii KHudii daur-e-haazir kii fir.auniyat ke liye bahr-e-qulzum ke saahil pe zarb-e-kaliimii kii nemul-badal hai
vo jis ne dayaar-e-Gazal se lab-o-aariz-o-zulf jaise anaasir ko baahar nikaalaa
vo 'iqbaal' bhii merii zulfo.n kaa qaidii rahaa hai
mai.n urdu zabaa.n huu.n
vo 'aazaad' aazaadi-e-hind kaa ek aashiq
vo 'aazaad' jis kii fuGaa.n soz-o-mastii
vo 'aazaad' jis kii sadaa saaz-e-hastii
vo 'aazaad' jis kaa suKHan qaul-e-faisal
magar qaul-e-faisal kaa ye faisla hai
mai.n urdu zabaa.n huu.n
mai.n taariiKH-o-tahziib-e-hindostaa.n huu.n
mai.n hindostaanii huu.n rashk-e-jahaa.n huu.n
jahaan-e-mohabbat kii mai.n paasbaa.n huu.n
magar paasbaan-e-vatan mujh ko Gaddaar kahne lage hai.n
to Gaddaar kahne kaa matlab musalmaa.n huu.n mai.n bhii
musalmaan ya.anii ki dahshat jihaalat Galaazat kii pahchaan huu.n mai.n
ye pahchaan merii ajab saaneha hai
magar saaneha maadar-e-hind kaa hai ye meraa nahii.n hai
mai.n kuchh bhii nahii.n huu.n
mujhe aaryaa.o.n ne paalaa
mirii asl hindostaa.n hai
mai.n hindostaanii huu.n hindostaa.n huu.n
magar mere ahl-e-vatan mujh ko Gaddaar kahne lage hai.n
ba-zaahir to hai garche ye merii zillat
magar asl me.n maadar-e-hind kii hii ye ismat-darii hai
mai.n urdu zabaa.n huu.n
mujhe aaryaa.o.n ne paalaa
mirii asl hindostaa.n hai

Khalid Mubashshir
Nazm

rad

baGaavato.n ke alam pe kanda
itaa.ato.n kaa nishaan-e-vaaqif
usuul gaaho.n ke mimbaro.n par
sharaa.it-e-hukm-o-shaiKH-o-munsif

Atif tauqeer
Nazm

tazad ki kasht

mai.n ne ka.ii rang ke saa.e suu.nghe hai.n
magar diivaaro.n par kanda kiye phuulo.n me.n
kabhii KHushbuu nahii.n mahkii
mohabbat ruuh me.n tab utartii hai
jab Gamo.n kii ret aur aa.nsu.o.n se
ham apne andar shikastagii taamiir karte hai.n

Zahid Imroz
Nazm

aaKHiri tambih

mujhe maaluum thaa tum rasta badloge
tabhii aa.nkho.n me.n KHvaabo.n ko zaraa sii bhii jagah na dii
magar ye dil
magar ye dil bahut kambaKHt hai suntaa nahii.n merii
so ab jo tum ne apnii raah badlii hai
to ab ma.asuum ban ke rotaa-dhotaa hai
mujhe kahtaa hai phir aaGosh me.n le lo
mujhe siine me.n phir rakh lo
mai.n ab ho baat maanuu.ngaa
magar vo kyaa hai naa.n us par tumhaaraa naam kanda hai
tumhaaraa naam ab vahshat se ba.Dh kar kuchh nahii.n detaa
usii kii chiiz hotii hai ki jis kaa naam likkhaa ho
tumhaarii saarii chiize.n to tumhe.n lauTaa chukii huu.n mai.n
suno ye dil bhii le jaa.o
aur apnii chiize.n ab sambhaal kar rakhnaa
dobaara se tumhaare naam kaa kuchh bhii
kabhii bhii aur kahii.n se bhii
kisii tarah bhii mere paas na aa.e
mai.n sayyad huu.n
mai.n jo ik baar de duu.n phir use vaapas nahii.n letii

Urooj Zehra Zaidi
Nazm

ek surma ke nam

baguule aisii havaa aur ek ra.ngaa hu.aa gho.Daa
lahuu-luhaan dil hamesha gha.D letaa hai ek duniyaa apne liye
mohabbat kahii.n ziyaada saffaak hai nafrat se
kyuu.n-ki ye achhuutii aur ujlii hai
us sitaare kii tarah
jo kanda hai ek muqaddas qurbaa.n-gaah kii chhat par

Ahmad Javaid
Nazm

adhure mausamon ka na-tamam qissa

ye kaun maane
ki lauh-e-ehsaas par ga.e mausamo.n ke jitne bhii
naqsh kanda hai.n
sab ke sab
aane vaalii saa.at ko aa.iina hai.n
jo aa.nkh pa.Dh le
to marsiya hai.n
ye kaun dekhe ye, kaun samjhe
ki sub.h-e-kaazib kii baargaaho.n me.n sar-ba-sajda amiin chehre
ka.Dii masaafat pe paa.nv dharne se peshtar hii
giraa.n naqaabe.n ulaT rahe hai.n
rah-e-riyaa ko palaT rahe hai.n
ye kaun samjhe ye kaun jaane!!

Hasan Abbas Raza
Nazm

clerk

KHuld-e-barii.n ko naaz thaa apne makiin par
aur ye bhii the miTe hu.e ik huur-e-iin par
laalach kii mohr kanda thii dil ke nagiin par
T-A vasuul karne ko utraa zamiin par
ibliis raaste me.n milaa kuchh sikhaa diyaa
utraa falak se third me.n inter likhaa diyaa

Syed Mohammad Jafri
Nazm

apotheosis

hame.n bataayaa gayaa hai
sard qahqaho.n ke aahanii jumuud se
shumaalii mirriiKH par na.e saahil banaa.e jaa.e.nge
nsibatan kam sanjiida la.Dkiyaa.n
hamaarii mahbuubaa.e.n nahii.n ban saktii.n
alberta ke landscape me.n
windmills ke chakraate saa.e
tulips kii aa.nkho.n se barf haTaa.e.nge
ibaadat-gaah kii diivaaro.n par kanda
KHudaa ke farmaan par phuul rakhne ke evaz
vo ham se bad-zan nahii.n hogaa
daffodils ke haath accordion bajaa.e.nge
jin se phuuTtii thakii haarii mausiiqiyat
street light kii buu.Dhii raushnii taan kar so jaa.egii
washington d-c me.n cherii ke daraKHto.n par
na.e saal ke KHvaab ugaa.e jaa.e.nge
saagaano ke sabz baa.nso.n se
vailen ke taar banaa.e jaa.e.nge jin par
red indian maa.o.n ke siino.n se pighaltii
niilii bad-du.aa.e.n bajaa.ii jaa.e.ngii
javaa.n-marg hasiinaa.o.n kii gol siskiyaa.n
shikasta piano kii daraa.Do.n se
murda giito.n ke fingerprints udhe.D le.ngii
za.ng-aaluud khi.Dkii ke maile shiisho.n se
kaa.nptii u.ngliyo.n kii nuqra.ii uljhane.n
adhuurii nazmo.n ke laashe khurach le.ngii
is se pahle ki ham KHauf-zada ho.n
ham se pahle taKHliiq kii jaane vaalii
hamaarii mahbuubaa.o.n ke jismaanii irtiqaa se
jism ho.nTo.n par taqsiim kiye jaa.e.nge
barf-zada parinde hame.n dekh paa.e.nge
hamaare gunaah muqaddas hai.n
anjaan doshiiza kii farmaa.ish par likhe ga.e novel kii tarah

Hasan Alvi
Nazm

manzar aur pas-manzar tum ho

saahil par ik naam likhaa thaa
lekin mai.n ye bhuul gayaa thaa
dariyaa se ik lahr uThii to naqsh ko dhu.ndlaa kar jaa.egii
ret aa.nkho.n me.n bhar jaa.egii
ik patthar pe kanda karke naam tumhaaraa soch rahaa thaa
jo patthar pe likh jaate hai.n kyaa vo chho.D diye jaate hai.n
patthar to.D diye jaate hai.n
aur phir mai.n ne pe.D pe likh ke naam tumhaaraa ye sochaa thaa
ab ye naam aabaad rahegaa sar-sabz-o-shaadaab rahegaa
lekin mai.n ye bhuul gayaa thaa
pe.D giraayaa jaa saktaa hai harf miTaayaa jaa saktaa hai
dekhe.n duniyaa vaale kab tak jazbo.n ko tasKHiir kare.nge
ham bhii ab ke naam tumhaaraa is dil par tahriir kare.nge
manzar manzar hairaanii hai pas-manzar aabaad hai tum se
jo kal tak viiraan pa.Daa thaa
vo ghar ab aabaad hai tum se

Tariq Qamar
Nazm

katba(2)

ye us shaKHs kii qabr hai
jis ke ab jism kaa ko.ii zarra yahaa.n par nahii.n hai
na us ko ko.ii kaam is qabr se
na us ko KHabar hai
ki ye kis kaa ghar hai
to us shaKHs ke ek be-naam ghar ko
ko.ii kyuu.n kisii naam se aaj mansuub kar de
aur us naam kaa ek katba banaa.e
ye duniyaa hai jis me.n na aisaa ko.ii ghar banaa hai na aage banegaa
ki us kaa makii.n apne ghar me.n hamesha rahegaa
to ab kyaa ko.ii ghar?
aur us ghar pe ik naam kanda
ki jis marhale par kisii ko kisii ghar kii ko.ii zaruurat nahii.n hai

Khalilur Rahman Azmi
Nazm

mohabbat

mohabbat kore kaaGaz par kabhii likkhii nahii.n jaatii
ki miT jaane kaa KHatra hai
mohabbat saaf patthar par kabhii kanda nahii.n karte
ki patthar TuuT saktaa hai
mohabbat dil ke aa.iine me.n hii tahriir hotii hai
agar dil TuuT bhii jaa.e
mohabbat kirchiyaa.n ban kar sadaa siine me.n rahtii hai
hamesha zinda rahtii hai

Raziya Subhan
Nazm

katba(5)

ye katba fulaa.n san kaa hai
ye san is liye is par kanda kiyaa
ki sab vaariso.n par ye vaazeh rahe
ki is roz barsii hai marhuum kii
aziiz-o-aqaarib yataamaa masaakiin ko
ziyaafat se apnii navaaze.n sabhii ko bulaa.e.n
ki sab mil ke marhuum ke haq me.n dast-e-du.aa ko uThaa.e.n
zabaa.n se kahe.n apnii ''marhuum kii maGfirat ho''
buzurg-e-muqaddas ke naam-e-muqaddas pe bheje.n daruud-o-salaam
sabhii KHaas o aam
magar ye bhii malhuuz-e-KHaatir rahe
aziiz-o-aqaarib kaa shurb o ta.aam
aur us kaa nizaam
alag ho vahaa.n se
jahaa.n ho.n yataamaa masaakiin andhe bhikaarii
phaTe aur maile libaaso.n me.n sab aurte.n aur bachche
ka.ii luule la.ng.De mariiz aur gande
vahii jin ko kahte hai.n ham sab avaam
vahaa.n hogaa ik shor-o-Gul izhdihaam
ye kar de.nge ham sab kaa jiinaa haraam

Khalilur Rahman Azmi
Nazm

katba

ik din yuu.nhii chalte chalte dil kii dha.Dkan ruk jaa.egii
nabz kii jumbish tham jaa.egii
saaraa tamaashaa jin aa.nkho.n se is duniyaa kaa dekhaa hai
vo aa.nkhe.n pathraa jaa.e.ngii
chashme jharne phuul ka.nval ke koh-o-bayaabaa.n dasht-o-daman
husn qad anaa kaa aalam sar chamelii ra.ng-e-chaman
saaGar-e-miinaa aa.nkh kii mastii aariz kaakul zulf ghaTaa
naGma KHushbuu pyaar mohabbat raqs tabassum harf-e-vafaa
sab se rishta TuuTegaa
barf kii suurat jam jaa.egaa har jazba har ik ehsaas
taariikii me.n kho jaa.egii apnii hastii apnii zaat
ik patthar par kanda hogii dhu.ndlii sii taariiKH-e-vafaat
saare shor-sharaabe kaa anjaam faqat KHaamoshii hai
in raushan lamho.n se aage aaKHirii lamha taariikii hai
vo lamha sab kii taak me.n hai bas itnaa hii yaad rakho
logo apnii qabr kaa katba apne apne saath rakho

Naseem Ansari
Nazm

lauh-e-mahfuz

mohalle kaa jo rakhvaalaa thaa
us ne aadatan laaThii bajaa kar
balGamii aavaaz se na.ara lagaayaa
jaagte rahnaa
mire aKHbaar vaale ne idhar
ma.amuul se haT kar
mujhe aavaaz de kar roz kaa aKHbaar Daalaa
yahii kuchh duudh vaale ne kiyaa
aur pherii vaale ne mai.n sau kar sub.h jab uThaa to un ma.asuum logo.n ne
ishaaro.n aur kinaayo.n se mujhe chaahaa bataanaa aur samjhaanaa jo shaayad ik zamaane ko pataa thaa maa-sivaa mere
ki mere naam kii taKHtii se
meraa naam Gaa.eb hai
ba-zaahir faisla saa.ib hai
in taaza KHudaa.o.n kaa hamaare naa-KHudaa.o.n kaa
magar ye bhii unhe.n ma.aluum to hogaa
jo KHaaliq hai zamiin-o-aasmaa.n kaa
vo jo maalik hai
raqam taqdiir kartaa hai
vahii tahriir kartaa hai
nahii.n mumkin miTaanaa
merii jaisii aajiz-o-majbuur hastii ke liye jo kuchh bhii vo tahriir kartaa hai
jo vo taqdiir kartaa hai
yaqii.n meraa
miraa iimaan hai us par
ki merii lauh par sab kuchh
usii tarah se kanda hai
mire KHaaliq ne mere naam ko
kal kii tarah se
aaj bhii mahfuuz rakkhaa hai
vo mere naam ko
kal bhii yuu.nhii mahfuuz rakkhegaa

Firoz Natiq Khusro
Nazm

nana ki banduq

aslii jaapaanii do naalii
naanaa kii banduuq niraalii
kanda is kaa maT-mailaa saa
ruup Daraavnaa suurat kaalii
naanaa jii is ke rasiyaa the
naanii thii is kii matvaalii
lete the is se jo nishaana
jaataa thaa vo aksar KHaalii
chi.Diyo.n kaa jiinaa duubhar thaa
chhuptii thii.n vo Daalii Daalii
naanaa jii ik roz ga.e the
dekhne jab mela vaishaalii
naanii ko samjhaa ke ga.e the
karnii thii is kii rakhvaalii
saarii raat guzaarii baahar
mele kii thii shaan niraalii
ghar par raat ko Daaku aa.e
to.D ke raushan-daan kii jaalii
naanii ko pistaul dikhaa kar
le bhaage banduuq kamaalii
shor machaatii piichhe dau.Dii.n
vo thii.n diler ba.Dii dil vaalii
hallaa sun kar log bhii dau.De
le kar ballam aur bhujaalii
chor hu.e tab nau do gyaarah
chho.D ga.e banduuq misaalii
naanaa ke ghar isii KHushii me.n
agle roz manii diivaalii
naanii jii ne isii KHushii me.n
ghar ghar bhejii khiir kii thaalii

Zaki Ahmad
Nazm

qissa-KHwani

us ne sochaa
yaad-gaarii chauk me.n chaaro.n taraf
ye bolte baazaar hai.n
is liye afsurdagii me.n gum kha.De
us bed-e-majnuu.n par
nazar pa.Dtii nahii.n
jo akelaa rah gayaa hai qissaa-KHvaano.n me.n yahaa.n
be-ra.ng ukha.Dtii chhaal par
chaaquu se kanda naam phiikaa pa.D gayaa hai
kandaa-kaarii jaa milii hai KHaak se
vaqt kii Gaflat ne kyaa saabit kiyaa
zaKHm khaane aur lagaane vaalo.n me.n
kaun fata.h-yaab hai.n

Yameen
Nazm

hawa ki pusht par

hu.aa kii pusht pe kitne nuquush kanda hai.n
kahii.n nafas kii lakiire.n
kahii.n bisaat-e-hunar
hayaat o maut ke partav
alam kii parchhaa.ii.n
lahuu ke rang me.n Duubaa hu.aa falak kaa dhu.aa.n
kabhii zamiin kaa daaman Gubaar-aaluuda
kabhii garajtaa hu.aa sail-e-be-karaa.n larzaa.n
misaal-e-harf-e-tamannaa ye naqsh miT na sake
havaa kii pusht pe kab se nuquush kanda hai.n

Hameed Almas
Nazm

to phir mar jao

show shuruu.a hone se bahut pahle
hall bhar chukaa thaa
shiishe ke ba.De chamber me.n
paanii bhar kar
baaziigar ne aaKHirii Dubkii lagaa.ii
aur logo.n ne dekhaa
us ke haatho.n kii zanjiire.n
muqaffal thii.n
jinhe.n vo jaan-buujh kar
muqarrara vaqt ke andar
kholnaa bhuul gayaa thaa
us kii be-jaan khulii aa.nkho.n me.n
guzashta raat us kii mahbuuba ke kahe hu.e
alfaaz kanda the

Suhail Ahmad
Nazm

hawa-e-bahaar

vahii havaa hai ye jaan-e-jaanaa.n
basant-rut kii sunahrii paa.el
bajaatii kangan
vo pighle sone pe lahre.n letii
badaltii rut kaa payaam letii
javaaniyo.n kaa salaam letii
mirii nigaaho.n ko terii palko.n se jazb kar ke
vo tere ho.nTo.n ke jaam-e-mai-guu.n se
mere ho.nTo.n kii tishnagii ko magas kii maanind apne sapne me.n jaa samotii
vahii havaa hai ye jaan-e-jaanaa.n
kabhii daraKHto.n
kabhii chaTaano.n
kabhii kitaabo.n me.n naam likhtii
hamaare dono.n ke naam kanda
vafaa-e-iifaa-e-‘ahd ke hai.n
chamakte raushan nishaa.n hamaare
abhii vahii.n hai.n
vahii.n rahe.nge
malaal kaisaa

Abu Saeed Qureshi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now