Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "karaamaat"

Nazm MATCHES FOR "karaamaat"

Nazm

iblis ki majlis-e-shura

ibliis
ye anaasir kaa puraanaa khel ye duniyaa-e-duu.n
saakinaan-e-arsh-e-aazam kii tamannaa.o.n kaa KHuu.n
is kii barbaadii pe aaj aamaada hai vo kaarsaaz
jis ne is kaa naam rakhaa thaa jahaan-e-kaaf-o-nuu.n
mai.n ne dikhlaayaa fara.ngii ko muluukiyat kaa KHvaab
mai.n ne to.Daa masjid-o-dair-o-kaliisaa kaa fusuu.n
mai.n ne naadaaro.n ko sikhlaayaa sabaq taqdiir kaa
mai.n ne mun.im ko diyaa sarmaaya daarii kaa junuu.n
kaun kar saktaa hai is kii aatish-e-sozaa.n ko sard
jis ke ha.ngaamo.n me.n ho ibliis kaa soz-e-daruu.n
jis kii shaaKHe.n ho.n hamaarii aabiyaarii se buland
kaun kar saktaa hai is naKHl-e-kuhan ko sar-niguu.n
pahlaa mushiir
is me.n kyaa shak hai ki mohkam hai ye ibliisii nizaam
puKHta-tar is se hu.e KHuu-e-Gulaamii me.n avaam
hai azal se in Gariibo.n ke muqaddar me.n sujuud
in kii fitrat kaa taqaazaa hai namaaz-e-be-qayaam
aarzuu avval to paidaa ho nahii.n saktii kahii.n
ho kahii.n paidaa to mar jaatii hai yaa rahtii hai KHaam
ye hamaarii sa.ii-e-paiham kii karaamat hai ki aaj
suufii-o-mullaa muluukiyyat ke bande hai.n tamaam
tab-e-mashriq ke liye mauzuu.n yahii afyuun thii
varna qavvaalii se kuchh kam-tar nahii.n ilm-e-kalaam
hai tavaaf-o-haj kaa ha.ngaama agar baaqii to kyaa
kund ho kar rah ga.ii momin kii teG-e-be-niyaam
kis kii nau-miidii pe hujjat hai ye farmaan-e-jadiid
hai jihaad is daur me.n mard-e-musalmaa.n par haraam
duusraa mushiir
KHair hai sulataanii-e-jamhuur kaa GauGaa ki shar
tuu jahaa.n ke taaza fitno.n se nahii.n hai baa-KHabar
pahlaa mushiir
huu.n magar merii jahaa.n-biinii bataatii hai mujhe
jo muluukiyat kaa ik parda ho kyaa is se KHatar
ham ne KHud shaahii ko pahnaayaa hai jamhuurii libaas
jab zaraa aadam hu.aa hai KHud-shanaas-o-KHud-nigar
kaarobaar-e-shahryaarii kii haqiiqat aur hai
ye vajuud-e-miir-o-sultaa.n par nahii.n hai munhasir
majlis-e-millat ho yaa parvez kaa darbaar ho
hai vo sultaa.n Gair kii khetii pe ho jis kii nazar
tuu ne kyaa dekhaa nahii.n maGrib kaa jamhuurii nizaam
chehra raushan andaruu.n cha.ngez se taariik-tar
tiisraa mushiir
ruuh-e-sultaanii rahe baaqii to phir kyaa iztiraab
hai magar kyaa is yahuudii kii sharaarat kaa javaab
vo kaliim-e-be-tajallii vo masiih-e-be-saliib
niist paiGambar va-lekin dar baGal daarad kitaab
kyaa bataa.uu.n kyaa hai kaafir kii nigaah-e-parda-soz
mashriq-o-maGrib kii qaumo.n ke liye roz-e-hisaab
is se ba.Dh kar aur kyaa hogaa tabii.at kaa fasaad
to.D dii bando.n ne aaqaa.o.n ke KHemo.n kii tanaab
chauthaa mushiir
to.D is kaa ruumat-ul-kubraa ke aivaano.n me.n dekh
aal-e-ceaser ko dikhaayaa ham ne phir ceaser kaa KHvaab
kaun bahr-e-ruum kii maujo.n se hai lipTaa hu.aa
gaah baalad-chuu.n-sanobar gaah naalad-chuu.n-rubaab
tiisraa mushiir
mai.n to is kii aaqibat-biinii kaa kuchh qaa.il nahii.n
jis ne afra.ngii siyaasat ko kyaa yuu.n be-hijaab
paa.nchvaa.n mushiir ibliis ko muKHaatab kar ke
ai tire soz-e-nafas se kaar-e-aalam ustuvaar
tuu ne jab chaahaa kiyaa har pardagii ko aashkaar
aab-o-gil terii haraarat se jahaan-e-soz-o-saaz
ablah-e-jannat tirii ta.aliim se daanaa-e-kaar
tujh se ba.Dh kar fitrat-e-aadam kaa vo mahram nahii.n
saada-dil bando.n me.n jo mash.huur hai parvardigaar
kaam thaa jin kaa faqat taqdiis-o-tasbiih-o-tavaaf
terii Gairat se abad tak sar-niguu.n-o-sharmsaar
garche hai.n tere muriid afra.ng ke saahir tamaam
ab mujhe un kii faraasat par nahii.n hai e'tibaar
vo yahuudii fitna-gar vo ruuh-e-mazdak kaa buruuz
har qabaa hone ko hai is ke junuu.n se taar taar
zaaG dashtii ho rahaa hai ham-sar-e-shaahiin-o-charG
kitnii sur.at se badaltaa hai mizaaj-e-rozgaar
chhaa ga.ii aashufta ho kar vus.at-e-aflaak par
jis ko naadaanii se ham samjhe the ik musht-e-Gubaar
fitna-e-fardaa kii haibat kaa ye aalam hai ki aaj
kaa.npte hai.n kohsaar-o-murG-zaar-o-juu.ebaar
mere aaqaa vo jahaa.n zer-o-zabar hone ko hai
jis jahaa.n kaa hai faqat terii siyaadat par madaar

Allama Iqbal
Nazm

aadmi-nama

duniyaa me.n paadshah hai so hai vo bhii aadmii
aur muflis-o-gadaa hai so hai vo bhii aadmii
zardaar-e-be-navaa hai so hai vo bhii aadmii
nemat jo khaa rahaa hai so hai vo bhii aadmii
Tuk.De chabaa rahaa hai so hai vo bhii aadmii
abdaal, qutub o Gaus valii-aadmii hu.e
munkir bhii aadmii hu.e aur kufr ke bhare
kyaa kyaa karishme kashf-o-karaamaat ke liye
hattaa ki apne zohd-o-riyaazat ke zor se
KHaaliq se jaa milaa hai so hai vo bhii aadmii
fir.aun ne kiyaa thaa jo da.avaa KHudaa.ii kaa
shaddaad bhii bahisht banaa kar hu.aa KHudaa
namruud bhii KHudaa hii kahaataa thaa barmalaa
ye baat hai samajhne kii aage kahuu.n mai.n kyaa
yaa.n tak jo ho chukaa hai so hai vo bhii aadmii
kul aadmii kaa husn o qubah me.n hai yaa.n zuhuur
shaitaa.n bhii aadmii hai jo kartaa hai makr-o-zor
aur haadii rahnumaa hai so hai vo bhii aadmii
masjid bhii aadmii ne banaa.ii hai yaa.n miyaa.n
bante hai.n aadmii hii imaam aur KHutba-KHvaa.n
pa.Dhte hai.n aadmii hii qur.aan aur namaaziyaa.n
aur aadmii hii un kii churaate hai.n juutiyaa.n
jo un ko taa.Dtaa hai so hai vo bhii aadmii
yaa.n aadmii pe jaan ko vaare hai aadmii
aur aadmii pe teG ko maare hai aadmii
pag.Dii bhii aadmii kii utaare hai aadmii
chillaa ke aadmii ko pukaare hai aadmii
aur sun ke dau.Dtaa hai so hai vo bhii aadmii
chaltaa hai aadmii hii musaafir ho le ke maal
aur aadmii hii maare hai phaa.nsii gale me.n Daal
yaa.n aadmii hii said hai aur aadmii hii jaal
sachchaa bhii aadmii hii nikaltaa hai mere laal
aur jhuuT kaa bharaa hai so hai vo bhii aadmii
yaa.n aadmii hii shaadii hai aur aadmii biyaah
qaazii vakiil aadmii aur aadmii gavaah
taashe bajaate aadmii chalte hai.n KHvaah-maKHvaah
dau.De hai.n aadmii hii to mash.al jalaa ke raah
aur byaahane cha.Dhaa hai so hai vo bhii aadmii
yaa.n aadmii naqiib ho bole hai baar baar
aur aadmii hii pyaade hai.n aur aadmii savaar
huqqa suraahii juutiyaa.n dau.De.n baGal me.n maar
kaa.ndhe pe rakh ke paalkii hai.n dau.Dte kahaar
aur us me.n jo pa.Daa hai so hai vo bhii aadmii
baiThe hai.n aadmii hii dukaane.n lagaa lagaa
aur aadmii hii phirte hai.n rakh sar pe khuunchaa
kahtaa hai ko.ii lo ko.ii kahtaa hai laa re laa
kis kis tarah kii beche.n hai.n chiize.n banaa banaa
aur mol le rahaa hai so hai vo aadmii
table majiire daa.ere saara.ngiyaa.n bajaa
gaate hai.n aadmii hii har ik tarah jaa-ba-jaa
ranDii bhii aadmii hii nachaate hai.n gat lagaa
aur aadmii hii naache hai.n aur dekh phir mazaa
jo naach dekhtaa hai so hai vo bhii aadmii
yaa.n aadmii hii la.al-o-javaahar me.n be-bahaa
aur aadmii hii KHaak se bad-tar hai ho gayaa
kaalaa bhii aadmii hai ki ulTaa hai juu.n tavaa
goraa bhii aadmii hai ki Tuk.Daa hai chaa.nd-saa
bad-shakl bad-numaa hai so hai vo bhii aadmii
ik aadmii hai.n jin ke ye kuchh zarq-barq hai.n
ruupe ke jin ke paa.nv hai.n sone ke farq hai.n
jhamke tamaam Garb se le taa-ba-sharq hai.n
kam-KHvaab taash shaal do-shaalo.n me.n Garq hai.n
aur chiitha.Do.n lagaa hai so hai vo bhii aadmii
hairaa.n huu.n yaaro dekho to kyaa ye svaa.ng hai
aur aadmii hii chor hai aur aapii thaang hai
hai chhiinaa jhapTii aur baa.ng taa.ng hai
dekhaa to aadmii hii yahaa.n misl-e-raa.ng hai
faulaad se ga.Dhaa hai so hai vo bhii aadmii
marne me.n aadmii hii kafan karte hai.n tayaar
nahlaa-dhulaa uThaate hai.n kaa.ndhe pe kar savaar
kalma bhii pa.Dhte jaate hai.n rote hai.n zaar-zaar
sab aadmii hii karte hai.n murde ke kaarobaar
aur vo jo mar gayaa hai so hai vo bhii aadmii
ashraaf aur kamiine se le shaah-taa-vaziir
ye aadmii hii karte hai.n sab kaar-e-dil-paziir
yaa.n aadmii muriid hai aur aadmii hii piir
achchhaa bhii aadmii hii kahaataa hai ai 'naziir'
aur sab me.n jo buraa hai so hai vo bhii aadmii

Nazeer Akbarabadi
Nazm

lenin

ai anfus o aafaaq me.n paidaa tirii aayaat
haq ye hai ki hai zinda o paa.inda tirii zaat
mai.n kaise samajhtaa ki tuu hai yaa ki nahii.n hai
har dam mutaGayyar the KHirad ke nazriyaat
mahram nahii.n fitrat ke suruud-e-azlii se
biinaa-e-kavaakib ho ki daanaa-e-nabaataat
aaj aa.nkh ne dekhaa to vo 'aalam hu.aa saabit
mai.n jis ko samajhtaa thaa kaliisaa ke KHuraafaat
ham band-e-shab-o-roz me.n jak.De hu.e bande
tuu KHaaliq-e-aasaar-o-nigaaranda-e-aanaat
ik baat agar mujh ko ijaazat ho to puuchhuu.n
hal kar na sake jis ko hakiimo.n ke maqaalaat
jab tak mai.n jiyaa KHema-e-aflaak ke niiche
kaa.nTe kii tarah dil me.n khaTaktii rahii ye baat
guftaar ke usluub pe qaabuu nahii.n rahtaa
jab ruuh ke andar mutalaatum ho.n KHayaalaat
vo kaun saa aadam hai ki tuu jis kaa hai maa'buud
vo aadam-e-KHaakii ki jo hai zer-e-samaavaat
mashriq ke KHudaavand safedaan-e-ra.ngii
maGrib ke KHudaavand daraKHshanda filizzaat
europe me.n bahut raushni-e-ilm-o-hunar hai
haq ye hai ki be-chashma-e-haivaa.n hai ye zulmaat
raa.naa.i-e-taamiir me.n raunaq me.n safaa me.n
girjo.n se kahii.n ba.Dh ke hai.n banko.n kii imaaraat
zaahir me.n tijaarat hai haqiiqat me.n ju.aa hai
suud ek kaa laakho.n ke liye marg-e-mufaajaat
ye 'ilm ye hikmat ye tadabbur ye hukuumat
piite hai.n lahuu dete hai.n taaliim-e-musaavaat
bekaarii o 'uryaanii o mai-KHvaarii o iflaas
kyaa kam hai.n fara.ngii madniyat kii futuuhaat
vo qaum ki faizaan-e-samaavii se ho mahruum
had us ke kamaalaat kii hai barq o buKHaaraat
hai dil ke liye maut mashiino.n kii hukuumat
ehsaas-e-muravvat ko kuchal dete hai.n aalaat
aasaar to kuchh kuchh nazar aate hai.n ki aaKHir
tadbiir ko taqdiir ke shaatir ne kiyaa maat
mai-KHaana kii buniyaad me.n aayaa hai tazalzul
baiThe hai.n isii fikr me.n piiraan-e-KHaraabaat
chehro.n pe jo surKHii nazar aatii hai sar-e-shaam
yaa Gaaza hai yaa saaGar o miinaa kii karaamaat
tuu qaadir o 'aadil hai magar tere jahaa.n me.n
hai.n talKH bahut banda-e-mazduur ke auqaat
kab Duubegaa sarmaaya-parastii kaa safiina
duniyaa hai tirii muntazir-e-roz-e-mukaafaat

Allama Iqbal
Nazm

zohd aur rindi

ik maulvii saahab kii sunaataa huu.n kahaanii
tezii nahii.n manzuur tabii.at kii dikhaanii
shohra thaa bahut aap kii suufii-manushii kaa
karte the adab un kaa a.aalii o adaanii
kahte the ki pinhaa.n hai tasavvuf me.n sharii.at
jis tarah ki alfaaz me.n muzmar ho.n ma.aanii
labrez mai-e-zohd se thii dil kii suraahii
thii tah me.n kahii.n durd-e-KHayaal-e-hama-daanii
karte the bayaa.n aap karaamaat kaa apnii
manzuur thii taadaad muriido.n kii ba.Dhaanii
muddat se rahaa karte the ham-saa.e me.n mere
thii rind se zaahid kii mulaaqaat puraanii
hazrat ne mire ek shanaasaa se ye puuchhaa
'iqbaal' ki hai qumri-e-shamshaad-e-ma.aanii
paabandi-e-ahkaam-e-sharii.at me.n hai kaisaa
go sher me.n hai rashk-e-kaliim-e-hamdaanii
suntaa huu.n ki kaafir nahii.n hinduu ko samajhtaa
hai aisaa aqiida asar-e-falsafa-daanii
hai us kii tabii.at me.n tashayyo bhii zaraa saa
tafziil-e-alii ham ne sunii us kii zabaanii
samjhaa hai ki hai raag ibaadaat me.n daaKHil
maqsuud hai maz.hab kii magar KHaak u.Daanii
kuchh aar use husn-faraamosho.n se nahii.n hai
aadat ye hamaare shoraa kii hai puraanii
gaanaa jo hai shab ko to sahar ko hai tilaavat
is ramz ke ab tak na khule ham pe ma.aanii
lekin ye sunaa apne muriido.n se hai mai.n ne
be-daaG hai maanind-e-sahar us kii javaanii
majmu.a-e-azdaad hai 'iqbaal' nahii.n hai
dil daftar-e-hikmat hai tabii.at KHafaqaanii
rindii se bhii aagaah sharii.at se bhii vaaqif
puuchho jo tasavvuf kii to mansuur kaa saanii
us shaKHs kii ham par to haqiiqat nahii.n khultii
hogaa ye kisii aur hii islaam kaa baanii
al-qissa bahut tuul diyaa vaaz ko apne
taa-der rahii aap kii ye naGz-bayaanii
is shahr me.n jo baat ho u.D jaatii hai sab me.n
mai.n ne bhii sunii apne ahibbaa kii zabaanii
ik din jo sar-e-raah mile hazrat-e-zaahid
phir chhi.D ga.ii baato.n me.n vahii baat puraanii
farmaayaa shikaayat vo mohabbat ke sabab thii
thaa farz miraa raah sharii.at kii dikhaanii
mai.n ne ye kahaa ko.ii gila mujh ko nahii.n hai
ye aap kaa haq thaa ze-rah-e-qurb-e-makaanii
KHam hai sar-e-tasliim miraa aap ke aage
piirii hai tavaazo ke sabab merii javaanii
gar aap ko maaluum nahii.n merii haqiiqat
paidaa nahii.n kuchh is se qusuur-e-hamaadaanii
mai.n KHud bhii nahii.n apnii haqiiqat kaa shanaasaa
gahraa hai mire bahr-e-KHayaalaat kaa paanii
mujh ko bhii tamannaa hai ki 'iqbaal' ko dekhuu.n
kii us kii judaa.ii me.n bahut ashk-fishaanii
'iqbaal' bhii 'iqbaal' se aagaah nahii.n hai
kuchh is me.n tamasKHur nahii.n vallaah nahii.n hai

Allama Iqbal
Nazm

apahij gaDi ka aadmi

me.n kab se zamii.n par zamii.n kii tarah chal rahaa huu.n
ye diivaana andhaa safar kab kahaa.n jaa ke chho.Degaa mujh ko?
mai.n is zindagii kii bahut sii bahaare.n Gizaa kii tarah khaa chukaa huu.n
pahan o.Dh kar pairahan kii tarah phaa.D dii hai.n
me.n resham kaa kii.Daa huu.n ko.e me.n chhap jaataa huu.n Dar ke maare
isii ko.e ko khaataa rahtaa huu.n aur kaaT kar is se aataa huu.n baahar
aur apne jiine kaa maqsad sabab jaan.naa chaahtaa huu.n
miraa dil KHudaa kii razaa Dhuu.nDhtaa phir rahaa hai
miraa jism lazzaat kii justujuu me.n lagaa hai
guzargaah-e-shaam-o-sahar par kahii.n ek din mai.n ugaa thaa
nabaataat kii tarah jiitaa huu.n is kaargaah-e-jahaa.n me.n
na ehsaas iimaan iiqaan ko.ii
na duniyaa me.n shaamil na KHud apnii pahchaan ko.ii
gunah aur jahannam savaab aur jannat?
ye kyuu.n hai ki be-muzad kuchh bhii nahii.n mil sakaa hai
na kal mil sakegaa
asaatiir farmaa.n-ravaa.on ke ahkaam aur suufiyaa kii karaamat ke qisse
payambar kii dil-soziyo.n ke mazaahir
qalam-band hai.n sab!
unhe.n ham ne ta.aviiz kii tarah apne galo.n me.n hamaa.il kiyaa hai
inhe.n ham ne tah-KHaano.n kii koTharii me.n muqaffal kiyaa hai
jahaa.n la.Dkha.Daate hai.n in kii madad le ke chalte hai.n aage
magar raasto.n kaa ta.ayyun nahii.n hai!

Akhtarul Iman
Nazm

alfaz

ye lafz suqraat lafz iisaa
mai.n in kaa KHaaliq ye mere KHaaliq
yahii azal hai.n yahii abad hai.n yahii zamaa.n hai.n yahii makaa.n hai.n
ye zehn-taa-zehn rah-guzar hai.n ye ruuh-taa-ruuh ik safar hai.n
sadaaqat-e-asr bhii yahii hai.n karaahat-e-jabr bhii yahii hai.n
alaamat-e-dard bhii yahii hai.n karaamat-e-sabr bhii yahii hai.n
baGair tafriiq-e-ra.ng-o-maz.hab zamii.n zamii.n in kii baadshaahii
khi.nche hu.e hai.n lahuu lahuu me.n bichhe hu.e hai.n zabaa.n zabaa.n par
ye jhuuT bhii hai.n ye luuT bhii hai.n ye ja.ng bhii hai.n ye KHuun bhii hai.n
magar ye majbuuriyaa.n hai.n in kii
baGair in ke hayaat saarii tavahhumaatii
har ek harakat sukuut Thahre
na kah sake.n kuchh na sun sake.n kuchh
har ek aa.iina apnii akkaasiyo.n pe hairaa.n ho aur chup ho
nigaah-e-nazzaara-bii.n tamaashaa ho vahshato.n kaa
ijaazat-e-jalva de ke jaise zabaa.n se goyaa.ii chhiin lii jaa.e
na husn kuchh ho na ishq kuchh ho
tamaam ehsaas kii havaa.e.n tamaam irfaan ke jaziire tamaam ye ilm ke samundar
saraab ho.n vahm ho.n gumaa.n ho.n
ye lafz tesha hai.n jin se afkaar apnii suurat taraashte hai.n
masiih-e-dast-o-qalam se nikle.n to phir ye alfaaz bolte hai.n
yahii musavvir yahii hai.n but-gar yahii hai.n shaa.er
yahii muGannii yahii navaa hai.n
yahii payambar yahii KHudaa hai.n
mai.n kiimiyaa huu.n ye kiimiyaa-gar
ye meraa kalyaan chaahte hai.n
mai.n in kii tasKHiir kar rahaa huu.n
ye merii ta.amiir kar rahe hai.n

Obaidullah Aleem
Nazm

inglistan ki aazadi aur hindostan ki ghulami

kahte hai.n aazaad ho jaataa hai jab letaa hai saa.ns
yaa.n Gulaam aa kar karaamat hai hii inglistaan kii

Altaf Hussain Hali
Nazm

agar tum bechna chaho

agar tum bechnaa chaaho
adaa.e.n bhii vafaa.e.n bhii
hasii.n KHvaabo.n ke ra.ngo.n kii ridaa.e.n bhii
ye duniyaa hai
yahaa.n aavaaz biktii hai
yahaa.n tasviir biktii hai
yahaa.n par harf kii hurmat
yahaa.n tahriir biktii hai
ye baazaar-e-jahaa.n ik be-karaa.n gahraa samundar hai
yahaa.n par kashtiyaa.n saahil pe aa kar Duub jaatii hai.n
musaafir mar bhii jaate hai.n
magar raunaq nahii.n jaatii
ye insaano.n kaa jangal hai
aur is jangal kaa samaa.n har vaqt rahtaa hai
agar tum bechnaa chaaho
adaa.e.n bhii vafaa.e.n bhii
hasii.n KHvaabo.n ke ra.ngo.n kii ridaa.e.n bhii
mire dil me.n bhii ik baazaar sajtaa hai
jahaa.n par shaam hote hii hujuum-e-yaas hotaa hai Gamo.n kii bhii.D lagtii hai
ka.ii yuusuf sar-e-baazaar bikte hai.n agar tum bechnaa chaaho

Karamat Bukhari
Nazm

tajdid-e-amal

uTh az-sar-e-nau dahr ke haalaat badal Daal
tadbiir se taqdiir ke din-raat badal Daal
phir dars-e-musaavaat kii haajat hai jahaa.n ko
aaqaa.ii-o-KHidmat ke KHitaabaat badal Daal
kaalaa ho ki goraa ho KHudaa ek hai sab kaa
qaumiyyat-e-bejaa kii rivaayaat badal Daal
chiinii ho ki hindii ho baraabar ke hai.n bhaa.ii
vataniyyat-e-mahduud ke vahmaat badal Daal
kul chhoTe-ba.De aadam-e-KHaakii ke hai.n farzand
har nasl se bezaar ho har zaat badal Daal
aKHlaaq me.n taaqat hai fuzuu.n teG-o-sinaa.n se
paikaar ke ye aahanii aalaat badal Daal
kyaa zulm hai insaan ho insaan kaa dushman
mardaan-e-havas-kaar kii aadaat badal Daal
mehnat se bhii mazduur ko roTii nahii.n miltii
is banda-e-majbuur ke auqaat badal Daal
aapas me.n ye har roz kii KHuu.n-reziyaa.n kab tak
KHud-saaKHta maz.hab kii rusuumaat badal Daal
hurriyat-e-kaamil kaa vo e.ajaaz dikhaa tuu
duniyaa-e-Gulaamii ke tilismaat badal Daal
KHilqat ko bulaa shirk se tauhiid kii jaanib
piiro.n kii faqiiro.n kii karaamaat badal Daal
ta.aliim pe mauquuf hai raanaa.i-e-afkaar
behuuda kitaabo.n kii KHuraafaat badal Daal
kar fikr-e-amal zikr-e-KHat-o-KHaal abas hai
ai 'faiz' zaraa apne KHayaalaat badal Daal

Faiz Ludhianvi
Nazm

shafaq

shafaq phuulne kii bhii dekho bahaar
havaa me.n khilaa hai ajab laala-zaar
hu.ii shaam baadal badalte hai.n ra.ng
jinhe.n dekh kar aql hotii hai da.ng
nayaa rang hai aur nayaa ruup hai
har ik ruup me.n ye vahii dhuup hai
tabii.at hai baadal kii ra.ngat pe loT
sunahrii lagaa.ii hai qudrat ne goT
zaraa dair me.n rang badle ka.ii
banafshii o naaranjii o champa.ii
ye kyaa bhed hai kyaa karaamaat hai
har ik rang me.n ik na.ii baat hai
ye maGrib me.n jo baadalo.n kii hai baa.D
bane sone chaa.ndnii ke goyaa pahaa.D
falak niil-guu.n is me.n surKHii kii laag
hare ban me.n goyaa lagaa dii hai aag
ab aasaar zaahir hu.e raat ke
ki parde chhaTe laal baanaat ke

Ismail Merathi
Nazm

shair-e-KHush-nawa

vahii kaar-e-duniyaa
vahii kaar-e-duniyaa ke apne jhamele
vahii dil kii haalat
vahii KHvaahisho.n aarzuu.o.n ke mele
vahii zindagii se bharii bhii.D me.n chalne vaale sabhii log
apnii jagah par akele
ka.ii gard-aaluud manzar nigaaho.n kii dahliiz par jam ga.e hai.n
mujhe yuu.n lagaa jaise chalte hu.e vaqt ke qaafile tham ga.e hai.n
zaraa sii.Dhiyo.n se udhar mai.n ne dekhaa
vahii shahr hai aur vahii shahr kii be-karaamat fazaa hai
vahii KHalq hai aur vahii KHalq ke bhuul jaane kii apnii adaa hai
vahii raaste hai.n vahii be-suhuulat safar kii sazaa hai
vahii saa.ns lene ko jiine ko be-mehr aab-o-havaa hai
vahii zindagii hai vahii us ke chaaro.n taraf be-tahaffuz ridaa hai
vahii sii.Dhiyo.n se udhar raahdaarii ke baa.e.n taraf KHaalii kamra
tirii guftuguu se bharaa KHaalii kamra
tire qahqaho.n ke samundar me.n Duubaa hu.aa aa.nsu.o.n kaa jaziira
jaziire me.n u.Dtaa hu.aa ik parinda
mu.nDero.n dariicho.n daraKHto.n kii tanhaa.iyo.n kaa mudaavaa parinda
tirii chaahato.n aur vafaa-daariyo.n ke ufuq par sitaara-numaa ik parinda
tire giit gaataa
tamannaa.o.n kii baarisho.n me.n nahaataa
kisii taaza imkaan ko jagmagaataa
kahii.n duur phailii hu.ii kahkashaa.o.n me.n gum ho gayaa hai
zaraa sii.Dhiyo.n se udhar mai.n ne dekhaa
ka.ii likhne vaale
KHushaamad kaa kaasa liye apne Giibat-kade me.n kha.De hai.n
siyaasii vaDere
musaavaat kaa naam le kar hamesha Gariib aadmii kii anaa se la.De hai.n
ka.ii ahl-e-daanish
jo mazluum kii aah-o-zaarii pe dikhte the
zaalim ke dar par pa.De hai.n
yahaa.n ko.ii chhoTaa nahii.n hai
sab ik duusre se ba.De hai.n
tirii shaa.irii kaa KHamiir apne jazbo.n kii sachchaa.iyo.n se uThaa thaa
tuu apne usuulo.n ke aatish-fishaa.n par kha.Daa
zindagii kii riyaa-kaariyo.n se nabard-aazmaa thaa
tuu apne ravayyo.n kii sab haalato.n me.n
mohabbat se likkhii hu.ii ik du.aa thaa
tuu ahl-e-vafaa kaa zamiir aashnaa thaa
abhii sii.Dhiyaa.n cha.Dhte cha.Dhte mai.n ruk saa gayaa huu.n
vahaa.n kaun hai
kaun hai ab jo dastak kii pahlii kiran kii hikaayat sunegaa
na.e ratjago.n kii masaafat me.n uljhe hu.e aane vaale dino.n kii
rivaayat sunegaa
charaaGo.n kii aavaaz me.n
aa.ino.n kii tilaavat sunegaa
mire shaa.ir-e-KHush-navaa
tuu ki dushman bhii achchhaa thaa
aur dostii me.n bhii teraa yahaa.n ko.ii saanii nahii.n hai
jise ahl-e-dil bhuul jaa.e.nge
tuu vo kahaanii nahii.n hai

Saleem Kausar
Nazm

ashab-e-girya

husain-aabaad saaraa
ta.aziya-daaro.n kii bastii thii
moharram ke dino.n me.n shaam hote hii
husain-aabaad ke mard-o-zan kaale libaaso.n me.n
azaa-KHaano.n ke daalaano.n me.n
shab bhar marsiya pa.Dhte
saf-e-maatam bichhaate aur apnii chhaatiyo.n ko laal kar lete
nauvii.n kii shab vo sab apne gharo.n se aag laate
aur dahaktii aag kii chaaro.n taraf ii.nTe.n bichhaa dete
hazaaro.n aa.nkhe.n mushtaaqaana ik jaanib ko uTh jaatii.n
fazaa me.n guu.nj sii hotii
ko.ii na.ara lagaataa aur husain-ibn-e-alii kaa naam le kar
aag kii ii.nTo.n pe yuu.n chaltaa hu.aa aataa
ki jaise farsh-e-gul ho yaa ko.ii sabze kii chaadar ho
vo phir na.ara lagaataa dau.Dtaa bijlii kii tezii se
muqaddas aayato.n vaalaa alam haatho.n me.n le letaa
kamar se apnii kas letaa
hazaaro.n log us ke gard halqa baa.ndh lete
aur use kashf-o-karaamat kaa KHaziina jaan kar
apne dilo.n kaa mudda.aa kahte
vo paiham aag kii ii.nTo.n pe yuu.nhii naachtaa rahtaa
muraado.n minnato.n kaa maajraa suntaa
magar jab aag kii ii.nTo.n kii surKHii maa.nd ho jaatii
to saare log halqa to.D dete aur muqaddas aayato.n vaalaa alam
is shaKHs ke haatho.n se le lete
azaa-KHaano.n ke daalaano.n me.n vaapas lauT kar aate
saf-e-maatam bichhaate
aur apnii chhaatiyo.n ko laal kar lete

Zubair Rizvi
Nazm

ki KHwab tha bas tumhaara aana

tumhaarii aa.nkhe.n KHushii kii KHvaahish liye hu.ii thii.n
tumhaarii socho.n me.n ahd-e-maazii kii silvaTe.n thii.n
tumhaare gesuu ghumartii ghirtii ghaTaa.o.n ke kuchh ghanere baadal bane hu.e the
qadam ba.Dhaa.e nazar jhukaa.e badan badan churaa.e aa rahii thii
havaa.e.n bhii gungunaa rahii thii.n
kalii kalii muskuraa rahii thii
KHizaa.n-rasiida chaman me.n jaise bahaar chupke se aa rahii thii
magar achaanak
ye KHvaab TuuTaa to mai.n ne dekhaa
ridaa-e-shab pe ko.ii sitaaraa nahii.n thaa baaqii
jahaa.n judaa.ii ke saare lamhe gale mile the vahaa.n mohabbat kii maa.ng bharne ko shabnam utrii
KHizaa.n-rasiida badan-dariida vo shab-gaziida udaas lamhe!
ajiib vahshat jagaa rahe the
vajuud se vo adam kii duniyaa me.n jaa rahe the
ki KHvaab thaa bas tumhaaraa aanaa

Karamat Bukhari
Nazm

zindagi siTiyan bajati hai

ye saa.nso.n ke chalne ko kyo.n zindagii kii alaamat kahaa hai
ye saa.nse.n to muflis kii bhii chal rahii hai.n
Gariibii ke sho.ale nigalnaa
aur is saa.ns kii KHasta rassii pe chalnaa
agar merii ko.ii karaamat nahii.n hai
to mai.n saal-haa-saal se ek kartab kiye jaa rahaa huu.n
ye sab ek circus hai aur kuchh nahii.n hai
ki jis me.n faqat mai.n Gariibii ke sho.ale nigaltaa hu.aa saa.ns kii KHasta rassii pe chaltaa hu.aa ik tamaashaa banaa huu.n
jise dekh kar zindagii siiTiyaa.n ab bajaane lagii hai
azal se ye dastuur qaa.em hu.aa hai
ki muflis kii aulaad bhii muflisii kaaTtii hai
chalo ab ye dastuur hii to.D Daale.n
vo yuu.n ba.Dba.Daayaa
to phir us ne KHanjar se apne Gariibii ke iklaute vaaris kii saa.nso.n kii rassii ko hii kaaT Daalaa
vo KHush thaa
ki ab us kaa laKHt-e-jigar
muflisii kii aziyyat se aazaad yuu.n ho gayaa hai
ki jaise kisii qaid se ko.ii panchhii
to faaqe ke dhaago.n me.n uljhe badan kii achaanak se aa.nkho.n ke parde haTe
aur vo aalam-e-KHvaab se jaag uTThaa
to us kii nigaaho.n ne apne Gariibii ke iklaute vaaris ko dekhaa
to rone lagaa vo
ki us kii tarah us kii Gurbat kaa vaaris Gariibii ke sho.ale nigaltaa hu.aa saa.ns kii KHasta rassii pe chalne lagaa hai
vo bhii ek circus kaa joker banaa hai
jise dekh kar zindagii siiTiyaa.n phir bajaane lagii hai

Zain Abbas
Nazm

yaran-e-najd

ai baad-e-sub.h-gaahii dil keii kalii khilaa de
viiraana mere dil kaa rashk-e-chaman banaa de
us bazm-e-jaa.n-fazaa kaa nazzaara phir dikhaa de
gulzaar-e-aarzuu me.n phir taaza gul khilaa de
ye kaar-zaar-e-hastii hai ranj-o-Gam keii bastii
phir yaad-e-bazm-e-jam me.n ik jaam-e-jam pilaa de
ab shaam-e-zindagii keii zulmat hai chhaane vaalii
vo sub.h-e-dil-kushaa kaa nazzaara phir dikhaa de
pastii me.n paa-ba-gil hai umr-e-ravaa.n kaa dariyaa
phir uu.nchii vaadiyo.n ke manzar use dikhaa de
vo ahd-e-shaadmaanii vo itr-e-zindagaanii
ai daur-e-aasmaanii vaapas kahii.n se laade
ai baaGbaa.n ho tujh ko taKHt-e-chaman mubaarak
mujh ko vo ham-navaa de vo meraa gho.nsla de
kin hasrato.n se 'naazir' us anjuman se nikle
melaa saa lag rahaa hai jab ham chaman se nikle
ahvaal-e-bazm-e-gulshan ai naama-bar sunaanaa
vo daastaa.n hai dilkash ra.ngii.n hai vo fasaana
us bazm-e-dil-kushaa me.n ulfat keii us fazaa me.n
taaro.n keii raushnii me.n yaaro.n kaa mil ke gaanaa
kaano.n me.n rach rahii hai koyal keii kuuk ab tak
'naazir' kaa hai vaziifa us dhun me.n gungunaanaa
collage keii sarzamii.n thii yaa naqsh-e-dil-nashii.n thii
dil se KHayaal us kaa mumkin nahii.n bhulaanaa
dariyaa me.n mil ke jaise ho.n naddiyaa.n ham-aaGosh
begaana kal jo aayaa vo aaj thaa yagaana
bahr-e-tavaaf jaanaa piir-e-muGaa.n ke dar par
aur us keii ik nigah se sarmast ho ke aanaa
us chashm-e-mast me.n thii ye turfa ik karaamat
phirtii vo jis taraf ko phirtaa udhar zamaanaa
ai vaqt-e-rafta aa jaa phir vo samaa.n dikhaa jaa
aisaa bhii kyaa thaa jaanaa phir lauT kar na aanaa
ai naaKHudaa bha.nvar se kashtii merii bachaa kar
yaaraan-e-aashnaa se bahr-e-KHudaa milaanaa
dar fasl-e-gul ki gulshan naqsh-o-nigaar bando
'naazir' KHayaal-e-KHud-raa aur bazm-e-yaar bando

Khushi Mohammad Naazir
Nazm

dasht-e-ajnabiyat mein

dasht-e-ajnabiyat me.n
aashnaa.ii kii chhaa.nv
saath chho.D jaa.e to
har taraf baguulo.n kaa
raqs gher letaa hai

Karamat Bukhari
Nazm

rakhi

us ke dhaago.n me.n dil ke KHazaane nihaa.n
us ke phuulo.n me.n dariyaa-e-ulfat ravaa.n
ye bahan bhaa.ii kii chaahato.n kaa nishaa.n
ye hai raakhii kaa bandhan mire bhaa.iyo
is kii tasviir me.n hai ajab baa.nkpan
is kii taariiKH me.n ektaa kaa chalan
is kii azmat kaa qaa.il hai saaraa chaman
ye hai raakhii kaa bandhan mire bhaa.iyo
sirf bandhan nahii.n ek paimaan hai
bhaa.iyo.n ke dilo.n kaa ye iimaan hai
apnii bahno.n pe har bhaa.ii qurbaan hai
ye hai raakhii kaa bandhan mire bhaa.iyo
kii humaa.uu.n ne rakshaa jo me.vaa.D kii
dushmano.n ko har ik mo.D par maat dii
rakshaa bandhan hii kii ye karaamaat thii
ye hai raakhii kaa bandhan mire bhaa.iyo

Masooda Hayat
Nazm

la-intiha abhi

na jaane vo log gum kahaa.n hai.n
chhalak rahii thii
falak ke saaGar se rahmat-e-haq kii tund sahbaa
fazaa-e-ayyaam me.n mohabbat kii faaKHtaa.e.n bhii
pa.nkh phailaa.e u.D rahii thii.n
dayaar-e-jarmaa.n me.n jhaa.nktii thii.n
ummiid-e-fardaa kii narm kirne.n
magar ye aashob-e-vaqt kaa hai asar ki jis se
jhulas ga.e hai.n tasavvuro.n ke hasiin chehre
fazaa bhii KHaamosh ruuh betaab
duur mandir ke devtaa chup
dha.Dakte dil kii ye sansanaahaT
khisakte patto.n kii sarsaraahaT
pa.De hai.n KHaamosh khokhle mandiro.n ke naaquus
bujhe pa.De hai.n tamadduno.n ke hasiin faanuus
yahaa.n ajantaa kaa aur konark kaa
fann-e-taKHliiq hichkiyaa.n le rahaa hai paiham
yahaa.n to ab saumo.n me.n aur masjido.n me.n
ghar kar chuke hai.n taKHriib ke abaabiil
nafas nafas me.n ghuTan kaa jazba
rago.n me.n talKHii hai zahr-e-Gam kii
bhaTakte rahne ko ab KHalaa ke sivaa nahii.n kuchh
ga.e the jo log us taraf se
unhii.n kaa hai intizaar ham ko
vo aa.e.nge kab vo aa.e.nge kab
yahaa.n ahinsaa ko ghun lagaa hai
yahaa.n mohabbat kii vaadiyo.n me.n ugii hai kaa.ii
payaam-e-insaaniyat ko goyaa lagii hai diimak
vo dard-e-dil kii lave.n
jo misl-e-charaaG jaltii rahii thii.n sadiyo.n
na jaane kyuu.n aaj bujh chukii hai.n
nazar ko dhu.ndlaa rahii hai kyuu.n duur kii siyaahii
ga.e the kuchh log jo udhar se
unhii.n kaa hai intizaar ham ko
falak ke laa-intihaa abhii mai.n
na jaane vo log gum kahaa.n hai.n

Karamat Ali Karamat
Nazm

mehman-e-KHosusi

ek din hazrat-e-haafiz ne ye dekhaa manzar
tauq-e-zarrii.n se muzayyan hai hama gardan-e-KHar
aur chhak.De me.n jutaa re.ng rahaa hai taazii
zaKHm hii zaKHm hai ko.De kaa zi-sar taa-ba-kamar
the jau marhuum ba.De saada-dil o nek-mizaaj
''ii.n-che shoriist'' kahaa aur gire chakraa kar
vo to is Gam ko liye KHuld-e-barii.n me.n pahu.nche
ka.ii sadiyo.n kaa zamaane ne lagaayaa chakkar
aaj ham par bhii magar jabr-e-nazaara hai vahii
vahii naira.ng-e-tamaashaa vahii naira.ng-e-nazar
vo charaa-gaah-e-siyaasat ho ki maidaan-e-adab
tauq-e-zarrii.n hai vahii aur vahii gardan-e-KHar
iKHtiyaaraat kii kursii pe KHraan-e-farba
mutamakkin nazar aate hai.n ba-sad karr-o-farr
ek kursii pe kisii tarah uchak kar pahu.nche
aur phir dha.D se khule kashf-o-karaamaat ke dar
phir to 'buqraat' aur 'arastuu'-e-zamaana hai.n vo
ilm o hikmat me.n nahii.n phir ko.ii un kaa ham-sar
phir to sahraa-e-jahaalat bhii hai dariyaa-e-uluum
phir to is be-hunarii me.n bhii hai.n sau sau jauhar
KHvaah do harf bhii ta.aliim na haasil kii ho
tauq-e-zarrii.n ke karishme se bane daanish-var
ko.ii jalsa ho vo ''mehmaan-e-KHosuusii'' ho.nge
ko.ii mauqa.a ho dha.Dalle se vo de.nge lecture
vo zamii.n ke ho.n masaa.il ke KHalaa kii baate.n
misl-e-miqraaz zabaa.n chaltii rahegii far-far
aalim o faazil o daanish-var o ahl-e-hikmat
sab nazar aa.e.nge qadmo.n pe jhukaa.e hu.e sar
tauq-e-zarrii.n kaa jo is ko na karishma kahiye
naatiqa sar-ba-girebaa.n ki ise kyaa kahiye

Raza Naqvi Vahi
Nazm

qissa-KHwani bazar ki ek sham

tasaahul kii chaadar lapeTe hu.e qissa-KHvaanii ik shaam thii
ham vahaa.n apnii din bhar kii is jaan-levaa thakan se
nabard-aazmaa
KHuub qahvo.n pe qahve ke piyaale lu.nDhaate rahe
aur apne buland-baa.ng daavo.n se aur qahqaho.n se
kahii.n gho.nslo.n me.n chhupe thak ke so.e hu.e
niim-jaa.n taa.ero.n ko jagaate rahe
aur guzre zamaane ke piiro.n faqiiro.n kii ko.ii na ka.ii karaamat sunaate rahe
(kis tarah saahibaan-e-karaamaat barzaKH to barzaKH
shar-a.ngez zindo.n kii ruuhe.n bulaane pe qaadir
sabhii ko bad-aamaaliyo.n se bachaate rahe)
par jo ye sab nahii maante the
vo nisvaar kii tez buu me.n base
ii.nT gaare ke ik niim-puKHta tha.De par
bar-afroKHta ho ke inkaar me.n sar hilaate rahe
haa.n magar vo ki jin ke labo.n par
charas aur gaa.nje kii uudii sii tah
mustaqil jam ga.ii thii
faqat muskuraate rahe
aur sa.ngat me.n maujuud jo ''bachcha-KHush'' the
vo har aate jaate trahdaar kam-umr la.Dke ko
aa.ankho.n hii aa.ankho.n me.n paate rahe
phir sab aapas me.n mil kar
karachi se kunduuz tak pesha kartii hu.ii kasbiyo.n
hij.Do.n aur lou.nDo.n ke
pur-kaif qisse sunaate rahe
gudgudaate rahe
dil lubhaate rahe

Harris Khalique
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now