Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "koThaa"

Nazm MATCHES FOR "koThaa"

Nazm

roTiyan

jab aadmii ke peT me.n aatii hai.n roTiyaa.n
phuulii nahii.n badan me.n samaatii hai.n roTiyaa.n
aa.nkhe.n parii-ruKHo.n se la.Daatii hai.n roTiyaa.n
siine upar bhii haath chalaatii hai.n roTiyaa.n
jitne maze hai.n sab ye dikhaatii hai.n roTiyaa.n
roTii se jis kaa naak talak peT hai bharaa
kartaa pare hai kyaa vo uchhal kuud jaa-ba-jaa
diivaar phaa.nd kar ko.ii koThaa uchhal gayaa
ThaTThaa ha.nsii sharaab sanam saaqii is sivaa
sau sau tarah kii dhuum machaatii hai.n roTiyaa.n
jis jaa pe haa.nDii chuulhaa tavaa aur tanuur hai
KHaaliq kii qudrato.n kaa usii jaa zuhuur hai
chuulhe ke aage aa.nch jo chaltii huzuur hai
jitne hai.n nuur sab me.n yahii KHaas nuur hai
is nuur ke sabab nazar aatii hai.n roTiyaa.n
aave tave tanuur kaa jis jaa zabaa.n pe naam
yaa chakkii chuulhe ke jahaa.n gulzaar ho.n tamaam
vaa.n sar jhukaa ke kiije Da.nDvat aur salaam
is vaaste ki KHaas ye roTii ke hai.n maqaam
pahle inhii.n makaano.n me.n aatii hai.n roTiyaa.n
in roTiyo.n ke nuur se sab dil hai.n bor bor
aaTaa nahii.n hai chhalnii se chhan-chhan gire hai nuur
pe.Daa har ek us kaa hai barfii o motii chuur
hargiz kisii tarah na bujhe peT kaa tanuur
is aag ko magar ye bujhaatii hai.n roTiyaa.n
puuchhaa kasii ne ye kisii kaamil faqiir se
ye mehr-o-maah haq ne banaa.e hai.n kaahe ke
vo sun ke bolaa baabaa KHudaa tujh ko KHair de
ham to na chaa.nd samjhe.n na suuraj hai.n jaante
baabaa hame.n to ye nazar aatii hai.n roTiyaa.n
phir puuchhaa us ne kahiye ye hai dil kaa tuur kyaa
is ke mushaahide me.n hai khultaa zuhuur kyaa
vo bolaa sun ke teraa gayaa hai shu.uur kyaa
kashf-ul-quluub aur ye kashf-ul-qubuur kyaa
jitne hai.n kashf sab ye dikhaatii hai.n roTiyaa.n
roTii jab aa.ii peT me.n sau qand ghul ga.e
gulzaar phuule aa.nkho.n me.n aur aish tul ga.e
do tar nivaale peT me.n jab aa ke Dhul ga.e
chaudah tabaq ke jitne the sab bhed khul ga.e
ye kashf ye kamaal dikhaatii hai.n roTiyaa.n
roTii na peT me.n ho to phir kuchh jatan na ho
mele kii sair KHvaahish-e-baaG-o-chaman na ho
bhuuke Gariib dil kii KHudaa se lagan na ho
sach hai kahaa kasii ne ki bhuuke bhajan na ho
allaah kii bhii yaad dilaatii hai.n roTiyaa.n
ab aage jis ke maal-puu.e bhar ke thaal hai.n
puure bhagat unhe.n kaho saahab ke laal hai.n
aur jin ke aage roGnii aur shiir-maal hai.n
aarif vahii hai.n aur vahii saahab-kamaal hai.n
pakkii-pakaa.ii ab jinhe.n aatii hai.n roTiyaa.n
kap.De kisii ke laal hai.n roTii ke vaaste
lambe kisii ke baal hai.n roTii ke vaaste
baa.ndhe ko.ii rumaal hai.n roTii ke vaaste
sab kashf aur kamaal hai.n roTii ke vaaste
jitne hai.n ruup sab ye dikhaatii hai.n roTiyaa.n
roTii se naache pyaada qavaa.ed dikhaa dikhaa
asvaar naache gho.De ko kaava lagaa lagaa
ghu.nghruu ko baa.ndhe paik bhii phirtaa hai naachtaa
aur is sivaa jo Gaur se dekhaa to jaa-ba-jaa
sau sau tarah ke naach dikhaatii hai.n roTiyaa.n
roTii ke naach to hai.n sabhii KHalq me.n pa.De
kuchh bhaa.nD bhiigte ye nahii.n phirte naachte
ye ranDiyaa.n jo naache hai.n ghuu.nghaT ko mu.nh pe le
ghuu.nghaT na jaano dosto tum ziinhaar use
is parde me.n ye apne kamaatii hai.n roTiyaa.n
ashraafo.n ne jo apnii ye zaate.n chhupaa.ii hai.n
sach puuchhiye to apnii ye shaane.n ba.Dhaa.ii hai.n
kahiye unho.n kii roTiyaa.n kis kis ne khaa.ii hai.n
ashraaf sab me.n kahiye to ab naan-baa.ii hai.n
jin kii dukaa.n se har kahii.n jaatii hai.n roTiyaa.n
duniyaa me.n ab badii na kahii.n aur niko.ii hai
yaa dushmanii o dostii yaa tund-KHuu.ii hai
ko.ii kisii kaa aur kisii kaa na ko.ii hai
sab ko.ii hai usii kaa ki jis haath Do.ii hai
naukar nafar Gulaam banaatii hai.n roTiyaa.n
roTii kaa ab azal se hamaaraa to hai KHamiir
ruukhii hii roTii haq me.n hamaare hai shahd-o-shiir
yaa patlii hove moTii KHamiirii ho yaa fatiir
gehuu.n javaar baajre kii jaisii ho 'naziir'
ham ko to sab tarah kii KHush aatii hai.n roTiyaa.n

Nazeer Akbarabadi
Nazm

barsat ki bahaaren

kitno.n ko mahlo.n andar hai aish kaa nazaaraa
yaa saa.ebaan suthraa yaa baa.ns kaa usaaraa
kartaa hai sair ko.ii koThe kaa le sahaaraa
muflis bhii kar rahaa hai pole tale guzaaraa
kyaa kyaa machii hai.n yaaro barsaat kii bahaare.n

Nazeer Akbarabadi
Nazm

umr poshi

mai.n ne puuchhaa
munne! tum kyuu.n apnii ammii jaan ko baajii kahte ho
munnaa bolaa
baajii bhii to naanii-jii ko aapaa aapaa kahtii hai.n
is baazaar kaa jo koThaa hai us kii riit niraalii hai
yahaa.n to maa.n ko maa.n kah denaa sab se gandii gaalii hai

Qateel Shifai
Nazm

is basti ke ek kuche mein

har baat kii khoj to Thiik nahii.n tum ham ko kahaanii kahne do
us naar kaa naam maqaam hai kyaa is baat pe pardaa rahne do
ham se bhii to saudaa mumkin hai tum se bhii jafaa ho saktii hai
ye apnaa bayaa.n ho saktaa hai ye apnii kathaa ho ho saktii hai
vo naar bhii aaKHir pachhtaa.ii kis kaam kaa aisaa pachhtaanaa?
is bastii ke ik kuuche me.n ik 'inshaa' naam kaa diivaanaa

Ibn۔e۔Insha
Nazm

hinDola

dayaar-e-hind thaa gahvaara yaad hai hamdam
bahut zamaana hu.aa kis ke kis ke bachpan kaa
isii zamiin pe khelaa hai 'raam' kaa bachpan
isii zamiin pe un nanhe nanhe haatho.n ne
kisii samay me.n dhanush-baan ko sambhaalaa thaa
isii dayaar ne dekhii hai 'krishn' kii liilaa
yahii.n gharo.ndo.n me.n siitaa sulochanaa raadhaa
kisii zamaane me.n gu.Diyo.n se kheltii ho.ngii
yahii zamii.n yahii dariyaa pahaa.D jangal baaG
yahii havaa.e.n yahii sub.h-o-shaam suuraj chaa.nd
yahii ghaTaa.e.n yahii barq-o-ra.ad o qaus-e-quzah
yahii.n ke giit rivaayaat mausamo.n ke juluus
hu.aa zamaana ki 'siddhaarth' ke the gahvaare
inhii nazaaro.n me.n bachpan kaTaa thaa 'vikram' kaa
sunaa hai 'bhartarharii' bhii inhii.n se khelaa thaa
'bharat' agastya' 'kapil' 'vyaas' 'pashii' 'kautilya'
'janak' vashishth' 'manu' 'vaalmik' vishvaamitr
'kanaad' 'gautam' o ramanuj 'kumaaril-bhatt'
mohanjoDaaro ha.Dappaa ke aur ajantaa ke
banaane vaale yahii.n ballamo.n se khele the
isii hi.nDole me.n 'bhavabhut' o 'kaaliidaas' kabhii
humak humak ke jo tutlaa ke gungunaa.e the
sarasvatii ne zabaano.n ko un kii chuumaa thaa
yahii.n ke chaa.nd va suuraj khilaune the un ke
inhii.n fazaa.o.n me.n bachpan palaa thaa 'KHusrav' kaa
isii zamii.n se uThe 'tansen' aur 'akbar'
'rahiim' 'nanak' o 'chaitanya' aur 'chishti' ne
inhii.n fazaa.o.n me.n bachpan ke din guzaare the
isii zamii.n pe kabhii shazaada-e-'KHurram'
zaraa sii dil-shikanii par jo ro diyaa hogaa
bhar aayaa thaa dil-e-naazuk to kyaa ajab is me.n
in aa.nsu.o.n me.n jhalak taaj kii bhii dekhii ho
'ahalyabaa.i' 'daman' 'padmini' o 'raziya' ne
yahii.n ke pe.Do.n kii shaaKHo.n me.n Daale the jhuule
isii fazaa me.n ba.Dhaa.ii thii pe.ng bachpan kii
inhii nazaaro.n me.n saavan ke giit gaa.e the
isii zamiin pe ghuTno.n ke bal chale ho.nge
'malik-mohammad' o 'raskhan' aur 'tulsi-das'
inhii.n fazaa.o.n me.n guu.njii thii totlii bolii
'kabir-das' 'Tukaaraam' 'suur' o 'miiraa' kii
isii hi.nDole me.n 'viddypati' kaa ka.nTh khulaa
isii zamiin ke the laal 'miir' o 'Gaalib' bhii
Thumak Thumak ke chale the gharo.n ke aa.ngan me.n
'aniis' o 'haalii' o 'iqbaal' aur 'vaaris-shaah'
yahii.n kii KHaak se ubhre the 'premchand' o 'tagore'
yahii.n se uTThe the tahziib-e-hind ke me.amaar
isii zamiin ne dekhaa thaa baal-pan in kaa
yahii.n dikhaa.ii thii.n in sab ne baal-liilaa.e.n
yahii.n har ek ke bachpan ne tarbiyat paa.ii
yahii.n har ek ke jiivan kaa baalkaa.nD khulaa
yahii.n se uThte baguulo.n ke saath dau.De hai.n
yahii.n kii mast ghaTaa.o.n ke saath jhuume hai.n
yahii.n kii madh-bharii barsaat me.n nahaa.e hai.n
lipaT ke kiicha.D o paanii se bachpane un ke
isii zamiin se uTThe vo desh ke saava.nt
u.Daa diyaa thaa jinhe.n company ne topo.n se
isii zamiin se uThii hai.n an-ginat nasle.n
pale hai.n hind hi.nDole me.n an-ginat bachche
mujh aise kitne hii gumnaam bachche khele hai.n
isii zamii.n se isii me.n supurd-e-KHaak hu.e
zamiin-e-hind ab aaraam-gaah hai un kii
is arz-e-paak se uTThii.n bahut sii tahziibe.n
yahii.n tuluu hu.ii.n aur yahii.n Guruub hu.ii.n
isii zamiin se ubhre ka.ii uluum-o-funuun
faraaz-e-koh-e-himaala ye daur-e-ga.ng-o-jaman
aur in kii god me.n parvarda kaarvaano.n ne
yahii.n rumuuz-e-KHiraam-e-sukuu.n-numaa siikhe
nasiim-e-sub.h-e-tamaddun ne bhairvii.n chhe.Dii
yahii.n vatan ke taraano.n kii vo pave.n phuuTe.n
vo be-qaraar sukuu.n-zaa tarannum-e-saharii
vo kapkapaate hu.e soz-o-saaz ke sho.ale
inhii fazaa.o.n me.n a.ng.Daa.iyaa.n jo le ke uThe
lavo.n se jin ke charaaGaa.n hu.ii thii bazm-e-hayaat
jinho.n ne hind kii tahziib ko zamaana hu.aa
bahut se zaaviyo.n se aa.iina dikhaayaa thaa
isii zamii.n pe Dhalii hai mirii hayaat kii shaam
isii zamiin pe vo sub.h muskuraa.ii hai
tamaam sho.ala o shabnam mirii hayaat kii sub.h
sunaa.uu.n aaj kahaanii mai.n apne bachpan kii
dil-o-dimaaG kii kaliyaa.n abhii na chaTkii thii.n
hamesha kheltaa rahtaa thaa bhaa.ii bahno.n me.n
hamaare saath mohalle kii la.Dkiyaa.n la.Dke
machaa.e rakhte the baalak udham har ek gha.Dii
lahuu tara.ng uchhal-phaa.nd kaa ye aalam thaa
mohalla sar pe uThaa.e phire jidhar guzre
hamaare chahchahe aur shor guu.njte rahte
chahaar-samt mohalle ke goshe goshe me.n
fazaa me.n aaj bhii laa-raib guu.njte ho.nge
agarche duusre bachcho.n kii tarah thaa mai.n bhii
ba-zaahir auro.n ke bachpan saa thaa miraa bachpan
ye sab sahii mire bachpan kii shaKHsiyat bhii thii ek
vo shaKHsiyat ki bahut shoKH jis ke the KHad-o-KHaal
adaa adaa me.n ko.ii shaan-e-infiraadii thii
Garaz kuchh aur hii lachchhan the mere bachpan ke
mujhe thaa chhoTe ba.Do.n se bahut shadiid lagaav
har ek par mai.n chhi.Daktaa thaa apnii nannhii sii jaa.n
dil umDaa aataa thaa aisaa ki jii ye chaahtaa thaa
uThaa ke rakh luu.n kaleje me.n apnii duniyaa ko
mujhe hai yaad abhii tak ki khel-kuud me.n bhii
kuchh aise vaqfe pur-asraar aa hii jaate the
ki jin me.n sochne lagtaa thaa kuchh miraa bachpan
ka.ii ma.aanii-e-be-lafz chhuune lagte the
butuun-e-Gaib se mere shu.uur-e-asGar ko
har ek manzar-e-maanuus ghar kaa har gosha
kisii tarah kii ho ghar me.n sajii hu.ii har chiiz
mire mohalle kii galiyaa.n makaa.n dar-o-diivaar
chabuutre ku.e.n kuchh pe.D jhaa.Diyaa.n bele.n
vo pherii vaale ka.ii un ke bhaa.nt bhaa.nt ke bol
vo jaane buujhe manaazir vo aasmaa.n o zamii.n
badalte vaqt kaa aa.iina garmii-o-KHunkii
Guruub-e-mahr me.n ra.ngo.n kaa jaagtaa jaaduu
shafaq ke shiish-mahal me.n gudaaz-e-pinhaa.n se
javaahro.n kii chaTaane.n sii kuchh pighaltii hu.ii.n
shajar hajar kii vo kuchh sochtii hu.ii duniyaa
suhaanii raat kii maanuus ramaziyat kaa fusuu.n
alassabaah ufuq kii vo thartharaatii bhave.n
kisii kaa jhaa.nknaa aahista phuuTtii pau se
vo dopahar kaa samay darja-e-tapish kaa cha.Dhaav
thakii thakii sii fazaa me.n vo zindagii kaa utaar
hu.aa kii bansiyaa.n ba.nsvaa.Diyo.n me.n bajtii hu.ii.n
vo din ke ba.Dhte hu.e saa.e sah-pahar kaa sukuu.n
sukuut shaam kaa jab dono.n vaqt milte hai.n
Garaz jhalakte hu.e sarsarii manaazir par
mujhe gumaan paristaaniyat kaa hotaa thaa
har ek chiiz kii vo KHvaab-naak asliyyat
mire shu.uur kii chilman se jhaa.nktaa thaa ko.ii
liye rubuubiyat-e-kaa.enaat kaa ehsaas
har ek jalve me.n Gaib o shuhuud kaa vo milaap
har ik nazaara ik aa.iina-KHaana-e-hairat
har ek manzar-e-maanuus ek hairat-zaar
kahii.n rahuu.n kahii.n khelo.n kahii.n pa.Dhuu.n likhuu.n
mire shu.uur pe ma.nDlaate the manaazir-e-dahr
mai.n akasr un ke tasavvur me.n Duub jaataa thaa
vafuur-e-jazba se ho jaatii thii mizha pur-nam
mujhe yaqiin hai in unsurii manaazir se
ki aam bachcho.n se letaa thaa mai.n ziyaada asar
kisii samay mirii tiflii rahii na be-parvaa
na chhuu sakii mirii tiflii ko Gaflat-e-tiflii
ye khel-kuud ke lamho.n me.n hotaa thaa ehsaas
du.aa.e.n detaa ho jaise mujhe sukuut-e-davaam
ki jaise haath abad rakh de dosh-e-tiflii par
har ek lamha ke raKHno.n se jhaa.nktii sadiyaa.n
kahaaniyaa.n jo sunuu.n un me.n Duub jaataa thaa
ki aadmii ke liye aadmii kii jag-biitii
se ba.Dh ke kaun sii shai aur ho hii saktii hai
inhii fasaano.n me.n pinhaa.n the zindagii ke rumuuz
inhii fasaano.n me.n khulte the raaz-haa-e-hayaat
unhe.n fasaano.n me.n miltii thii.n ziist kii qadre.n
rumuuz-e-besh-bahaa TheTh aadmiyat ke
kahaaniyaa.n thii.n ki sad-dars-gaah-e-riqqat-e-qalb
har ik kahaanii me.n shaa.istagi-e-Gam kaa sabaq
vo unsur aa.nsu.o.n kaa daastaan-e-insaa.n me.n
vo nal-daman kii kathaa sarguzasht-e-savitrii
'shakuntlaa' kii kahaanii 'bharat' kii qurbaanii
vo marg-e-bhishm-pitaamah vo sej tiiro.n kii
vo paan.cho paa.nDav kii sovarg-yaatraa kii kathaa
vatan se ruKHsat-e-'siddhaarth' 'raam' kaa ban-baas
vafaa ke baa'd bhii 'siitaa' kii vo jalaa-vatanii
vo raato.n-raat 'sirii-krishn' ko uThaa.e hu.e
balaa kii qaid se 'basdev' kaa nikal jaanaa
vo a.ndhkaar vo baarish, ba.Dhii hu.ii jamunaa
Gam-e-aafriin kahaanii vo 'hiir' 'raa.njhaa' kii
shu.uur-e-hind ke bachpan kii yaadgaar-e-aziim
ki aise vaise taKHayyul kii saa.ns ukha.D jaa.e
ka.ii muhayyur-e-idraak dev-maalaaye.n
hitopdesh ke qisse kathaa sarat-saagar
karo.Do.n siino.n me.n vo guu.njtaa hu.aa aalhaa
mai.n puuchhtaa huu.n kisii aur malak vaalo.n se
kahaaniyo.n kii ye daulat ye be-bahaa daulat
fasaane dekh lo in ke nazar bhii aatii hai
mai.n puuchhtaa huu.n ki gahvaare aur qaumo.n ke
base hu.e hai.n kahii.n aisii daastaano.n se
kahaaniyaa.n jo mai.n suntaa thaa apne bachpan me.n
mire liye vo na thii.n mahz baa.is-e-tafriih
fasaano.n se mire bachpan ne sochnaa siikhaa
fasaano.n se mujhe sanjiidgii ke dars mile
fasaano.n me.n nazar aatii thii mujh ko ye duniyaa
Gam o KHushii me.n rachii pyaar me.n basaa.ii hu.ii
fasaano.n se mire dil ne ghulaavaTe.n paa.ii.n
yahii nahii.n ki mashaahiir hii ke afsaane
zaraa sii umr me.n karte ho.n mujh ko muta.assir
mohalle Tole ke gumnaam aadamiyyo.n ke
kuchh aise sun.ne me.n aate the vaaqi.aat-e-hayaat
jo.n yuu.n to hote the farsuuda aur ma.amuulii
magar the aa.iine iKHlaas aur sharaafat ke
ye chand aa.ii ga.ii baate.n aisii baate.n thii.n
ki jin kii oT chamaktaa thaa dard-e-insaanii
ye vaardaat nahii.n razmiyye hayaat ke the
Garaz ki ye hai.n mire bachpane kii tasviire.n
nadiim aur bhii kuchh KHatt-o-KHaal hai.n un ke
ye merii maa.n kaa hai kahnaa ki jab mai.n bachcha thaa
mai.n aise aadmii kii god me.n na jaataa thaa
jo bad-qimaar ho aibii ho yaa ho bad-suurat
mujhe bhii yaad hai nau das baras hii kaa mai.n thaa
to mujh pe kartaa thaa jaaduu saa husn-e-insaanii
kuchh aisaa hotaa thaa mahsuus jab mai.n dekhtaa thaa
shagufta rang tar-o-taaza ruup vaalo.n kaa
ki un kii aa.nch mirii haDDiyaa.n galaa degii
ik aazmaa.ish-e-jaa.n thii ki thaa shu.uur-e-jamaal
aur us kii nashtariyyat us kii ustuKHaa.n-sozii
Gam o nashaat lagaavaT mohabbat o nafrat
ik intishaar-e-sakuu.n iztiraab pyaar itaab
vo be-panaah zakii-ul-hisii vo hilm o Guruur
kabhii kabhii vo bhare ghar me.n hiss-e-tanhaa.ii
vo vahshate.n mirii maahaul-e-KHush-gavaar me.n bhii
mirii sarisht me.n ziddain ke ka.ii jo.De
shuruu.a hii se the maujuud aab-o-taab ke saath
mire mizaaj me.n pinhaa.n thii ek jadaliyyat
rago.n me.n chhuuTte rahte the be-shumaar anaar
nadiim ye hai.n mire baal-pan ke kuchh aasaar
vafuur o shiddat-e-jazbaat kaa ye aalam thaa
ki kau.nde jast kare.n dil ke aabgiine me.n
vo bachpanaa jise bardaasht apnii mushkil ho
vo bachpanaa jo KHud apnii hii tevriyaa.n sii cha.Dhaa.e
nadiim zikr-e-javaanii se kaa.np jaataa huu.n
javaanii aa.ii dabe paa.nv aur yuu.n aa.ii
ki us ke aate hii big.Daa banaa-banaayaa khel
vo KHvaahishaat ke jazbaat ke umaDte hu.e
vo ho.nkte hu.e be-naam aag ke tuufaa.n
vo phuuTtaa hu.aa jvaalaa-mukhii javaanii kaa
rago.n me.n uThtii hu.ii aa.ndhiyo.n ke vo jhaTke
ki jo tavaazun-e-hastii jhi.njho.D ke rakh de.n
vo zalzale ki pahaa.Do.n ke pair ukha.D jaa.e.n
buluuGiyat kii vo Tiise.n vo karb-e-nashv-o-numaa
aur aise me.n mujhe byaahaa gayaa bhalaa kis se
jo ho na saktii thii hargiz mirii shariik-e-hayaat
ham ek duusre ke vaaste bane hii na the
siyaah ho ga.ii duniyaa mirii nigaaho.n me.n
vo jis ko kahte hai.n shaadii-e-KHaanaa-aabaadii
mire liye vo banii bevgii javaanii kii
luTaa suhaag mirii zindagii kaa maa.nDo me.n
nadiim khaa ga.ii mujh ko nazar javaanii kii
balaa-e-jaan mujhe ho gayaa shu.uur-e-jamaal
talaash-e-shola-e-ulfat se ye hu.aa haasil
ki nafrato.n kaa agan-ku.nD ban ga.ii hastii
vo halq o siina o rag rag me.n be-panaah chubhaa
nadiim jaise nigal lii ho mai.n ne naag-phanii
z ishq-zaadam o ishqam kamusht zaar-o-dareG
KHabar na burd ba-rustam kase ki sohraabam
na puuchh aalam-e-kaam-o-dahan nadiim mire
samar hayaat kaa jab raakh bin gayaa mu.nh me.n
mai.n chaltii-phirtii chitaa ban gayaa javaanii kii
mai.n kaa.ndhaa detaa rahaa apne jiite murde ko
ye sochtaa thaa ki ab kyaa karuu.n kahaa.n jaa.uu.n
bahut se aur masaa.ib bhii mujh pe TuuT pa.De
mai.n Dhuu.nDhne lagaa har samt sachchii jhuuTii panaah
talaash-e-husn me.n sher-o-adab me.n dostii me.n
ru.ndhii sadaa se mohabbat kii bhiik maa.ngii hai
na.e sire se samajhnaa pa.Daa hai duniyaa ko
ba.De jatan se sambhaalaa hai KHud ko mai.n ne nadiim
mujhe sambhalne me.n to chaaliis saal guzre hai.n
merii hayaat to vish-paan kii kathaa hai nadiim
mai.n zahr pii ke zamaane ko de sakaa amrit
na puuchh mai.n ne jo zahraaba-e-hayaat piyaa
magar huu.n dil se mai.n is ke liye sipaas-guzaar
larazte haatho.n se daaman KHuluus kaa na chhaTaa
bachaa ke rakkhii thii mai.n ne amaanat-e-tiflii
ise na chhiin sakii mujh se dast-burd-e-shabaab
ba-qaul shaa.er-e-mulk-e-fara.ng har bachcha
KHud apne ahd-e-javaanii kaa baap hotaa hai
ye kam nahii.n hai ki tiflii-e-rafta chho.D ga.ii
dil-e-hazii.n me.n ka.ii chhoTe chhoTe naqsh-e-qadam
mirii anaa kii rago.n me.n pa.De hu.e hai.n abhii
na jaane kitne bahut narm u.ngliyo.n ke nishaa.n
hanuuz vaqt ke be-dard haath kar na sake
hayaat-e-rafta kii zinda nishaaniyo.n ko fanaa
zamaana chhiin sakegaa na merii fitrat se
mirii safaa mire tahtush-shu.uur kii ismat
taKHaiyyulaat kii doshiizgii kaa radd-e-amal
javaan ho ke bhii be-laus tifl-vash jazbaat
syaanaa hone pe bhii ye jibillate.n merii
ye sarKHushii o Gam be-riyaa ye qalb-gudaaz
baGair bair ke an-ban Garaz se paak tapaak
Garaz se paak ye aa.nsuu Garaz se paak ha.nsii
ye dasht-e-dahr me.n hamdardiyo.n kaa sar-chashma
qubuuliyat kaa ye jazba ye kaa.enaat o hayaat
is arz-e-paak par iimaan ye ham-aaha.ngii
har aadmii se har ik KHvaab o ziist se ye lagaav
ye maa.n kii god kaa ehsaas sab manaazir me.n
qariib o duur zamii.n me.n ye buu-e-vataniyyat
nizaam-e-shams-o-qamar me.n payaam-e-hifz-e-hayaat
ba-chashm-e-shaam-o-sahar maamtaa kii shabnam sii
ye saaz o dil me.n mire naGma-e-analkaunain
har iztiraab me.n ruuh-e-sukuun-e-be-paayaa.n
zamaana-e-guzaraa.n me.n davaam kaa sargam
ye bazm-e-jashn-e-hayaat-o-mamaat sajtii hu.ii
kisii kii yaad kii shahnaa.iyaa.n sii bajtii hu.ii
ye ramaziiyat ke anaasir shu.uur-e-puKHta me.n
falak pe vajd me.n laatii hai jo farishto.n ko
vo shaa.erii bhii buluuG-e-mizaaj-e-tiflii hai
ye nashtariyyat-e-hastii ye is kii sheriyat
ye pattii pattii pe gulzaar-e-zindagii ke kisii
latiif nuur kii parchhaa.iyaa.n sii pa.Dtii hu.ii
baham ye hairat o maanuusiyat kii sargoshii
bashar kii zaat ki mahr-e-uluuhiyat ba-jabii.n
abad ke dil me.n ja.De.n maartaa hu.aa sabza
Gam-e-jahaa.n mujhe aa.nkhe.n dikhaa nahii.n saktaa
ki aa.nkhe.n dekhe hu.e huu.n mai.n ne apne bachpan kii
mire lahuu me.n abhii tak sunaa.ii detii hai.n
sukuut-e-huzn me.n bhii ghu.nghru.o.n kii jhankaare.n
ye aur baat ki mai.n is pe kaan de na sakuu.n
isii vadii.at-e-tiflii kaa ab sahaaraa hai
yahii hai.n marham-e-kaafuur dil ke zaKHmo.n par
unhii ko rakhnaa hai mahfuuz taa-dam-e-aaKHir
zamiin-e-hind hai gahvaara aaj bhii hamdam
agar hisaab kare.n das karo.D bachcho.n kaa
ye bachche hind kii sab se ba.Dii amaanat hai.n
har ek bachche me.n hai.n sad-jahaan-e-imkaanaat
magar vatan kaa hal-o-aqd jin ke haath me.n hai
nizaam-e-zindagii-e-hind jin ke bas me.n hai
ravayya dekh ke un kaa ye kahnaa pa.Dtaa hai
kise pa.Dii hai ki samjhe vo is amaanat ko
kise pa.Dii hai ki bachcho.n kii zindagii ko bachaa.e
KHaraab hone se Talne se suukh jaane se
bachaa.e kaun in aazurda honhaaro.n ko
vo zindagii jise ye de rahe hai.n bhaarat ko
karo.Do.n bachcho.n ke miTne kaa ik alamiyya hai
churaa.e jaate hai.n bachche abhii gharo.n se yahaa.n
ki jism to.D diye jaa.e.n un ke taaki mile
churaane vaalo.n ko KHairaat maagh-mele kii
jo is azaab se bach jaa.e.n to gale pa.D jaa.e.n
vo la.ante.n ki hamaare karo.Do.n bachcho.n kii
nadiim KHair se miTTii KHaraab ho jaa.e
vo muflisii ki KHushii chhiin le vo be-bargii
udaasiyo.n se bharii zindagii kii be-ra.ngii
vo yaasiyaat na jis ko chhu.e shu.aa-e-umiid
vo aa.nkhe.n dekhtii hai.n har taraf jo be-nuurii
vo TukTukii ki jo pathraa ke rah ga.ii ho nadiim
vo be-dilii kii ha.nsii chhiin le jo ho.nTo.n se
vo dukh ki jis se sitaaro.n kii aa.nkh bhar aa.e
vo gandagii vo kasaafat maraz-zada paikar
vo bachche chhin ga.e ho.n jin se bachpane un ke
hamii.n ne gho.nT diyaa jis ke bachpane kaa galaa
jo khaate-piite gharo.n ke hai.n bachche un ko bhii kyaa
samaaj phuulne-phalne ke de sakaa saadhan
vo saa.ns lete hai.n tahziib-kush fazaa.o.n me.n
ham un ko dete hai.n be-jaan aur Galat ta.aliim
milegaa ilm-e-jihaalat-numaa se kyaa un ko
nikal ke madraso.n aur universitiyyo.n se
ye bad-nasiib na ghar ke na ghaaT ke ho.nge
mai.n puuchhtaa huu.n ye ta.aliim hai ki makkaarii
karo.Do.n zindagiyo.n se ye be-panaah daGaa
nisaab aisaa ki mehnat kare.n agar is par
bajaa.e ilm jahaalat kaa iktisaab kare.n
ye ulTaa dars-e-adab ye sa.Dii hu.ii ta.aliim
dimaaG kii ho Gizaa yaa Gizaa-e-jismaanii
har ik tarah kii Gizaa me.n yahaa.n milaavaT hai
vo jis ko bachcho.n kii ta.aliim kah ke dete hai.n
vo dars ulTii chhurii hai gale pe bachpan ke
zamiin-e-hind hi.nDolaa nahii.n hai bachcho.n kaa
karo.Do.n bachcho.n kaa ye des ab janaaza hai
ham inqalaab ke KHatro.n se KHuub vaaqif hai.n
kuchh aur roz yahii rah ga.e jo lail-o-nahaar
to mol lenaa pa.Degaa hame.n ye KHatra bhii
ki bachche qaum kii sab se ba.Dii amaanat hai.n

Firaq Gorakhpuri
Nazm

hubb-e-watan

ham bhii hubb-e-vatan me.n hai.n go Garq
ham me.n aur un me.n hai magar ye farq
ham hai.n naam-e-vatan ke diivaane
vo the ahl-e-vatan ke parvaane
jis ne yuusuf kii daastaa.n hai sunii
jaantaa hogaa ruu.edaad us kii
misr me.n qaht jab pa.Daa aa kar
aur hu.ii qaum bhuuk se muztar
kar diyaa vaqf un pe baitulmaal
lab tak aane diyaa na harf-e-savaal
khatiyaa.n aur koThe khol diye
muft saare zaKHiire tol diye
qaafile KHaalii haath aate the
aur bharpuur yaa.n se jaate the
yuu.n ga.e qaht ke vo saal guzar
jaise bachcho.n kii bhuuk vaqt-e-sahar

Altaf Hussain Hali
Nazm

be-haya

hamii.n to hai.n vo
jo tai kare.nge
ki in ke jismo.n pe kis kaa haq hai
hamii.n to hai.n vo
jo tai kare.nge
ki kis se in ke nikaah ho.nge
ye kis ke bistar kii ziinate.n hai.n
vo kaun hogaa jo apne ho.nTo.n ko
in ke jismo.n kii aab degaa
bhale mohabbat kisii ke kahne pe
aaj tak ho sakii na hogii
magar ye ham tai kare.nge
in ko kise basaanaa hai apne dil me.n
ham in ke maalik hai.n
jab bhii chaahe.n
inhe.n lihaafo.n me.n khii.nch laa.e.n
aur in kii ruuho.n me.n daa.nt gaa.De.n
ye maa.n bane.ngii
to ham bataa.e.nge
in ke jismo.n ne kitne bachcho.n ko Dhaalnaa hai
hamaare bachcho.n ke peT bharne
agar ye koThe pe jaa ke apnaa badan bhii beche.n
to ham bataa.e.nge
kis ko kitne me.n kitnaa beche.n
hamii.n ko haq hai
ki in ke gaahak jo KHud hamii.n hai.n se
saarii qiimat vasuul kar le.n
hamii.n ko haq hai ki in kii aa.nkhe.n
hasiin chehre shaffaaf paa.nv
safed raane.n daraaz zulfe.n
aur aatishii.n-lab dikhaa dikhaa kar
cream saabun safed kap.De aur aam beche.n
dukaa.n chalaa.e.n naf' kamaa.e.n
hamii.n to hai.n jo ye tai kare.nge
ye kis sahiife kii kaun sii aayate.n pa.Dhe.ngii
ye kaun hotii hai.n
apnii marzii kaa rang pahne.n
school jaa.e.n hame.n pa.Dhaa.e.n
hame.n bataa.e.n
ki in kaa rab bhii vahii hai jis ne hame.n banaayaa
baraabarii ke sabaq sikhaa.e.n
ye lau.nDiyaa.n hai.n ye juutiyaa.n hai.n
ye kaun hotii hai.n apnii marzii se jiine vaalii
bataane vaale hame.n yahii to bataa ga.e hai.n
jo hukmraano.n kii baat Taale.n
jo apne bhaa.ii se hissa maa.nge.n
jo shauharo.n ko KHudaa na samjhe.n
jo qadre mushkil savaal puuchhe.n
jo apnii mehnat kaa badla maa.nge.n
jo aajiro.n se zabaa.n la.Daa.e.n
jo apne jismo.n pe haq jataa.e.n
vo be-hayaa hai.n

Shoaib Kiani
Nazm

mahadev-ji ka byah

pahle naa.nv ganesh kaa, liijiye siis navaa.e
jaa se kaaraj sidh ho.n, sadaa mahuurat laa.e
bol bachan aanand ke, prem, piit aur chaah
sun lo yaaro, dhyaan dhar, mahaadev kaa byaah
jogii ja.ngam se sunaa, vo bhii kiyaa bayaan
aur kathaa me.n jo sunaa, us kaa bhii parmaan
sun.ne vaale bhii rahe.n ha.nsii KHushii din rain
aur pa.Dhe.n jo yaad kar, un ko bhii sukh chain
aur jis ne is byaah kii, mahimaa kahii banaa.e
us ke bhii har haal me.n, shiv-jii rahe.n suhaa.e
KHushii rahe din raat vo, kabhii na ho dil-giir
mahimaa us kii bhii rahe jis kaa naam 'naziir'

Nazeer Akbarabadi
Nazm

jaDe ki bahaaren

jab maah aghan kaa Dhaltaa ho tab dekh bahaare.n jaa.De kii
aur ha.ns ha.ns puus sambhaltaa ho tab dekh bahaare.n jaa.De kii
din jaldii jaldii chaltaa ho tab dekh bahaare.n jaa.De kii
aur paalaa barf pighaltaa ho tab dekh bahaare.n jaa.De kii
chillaa Gam Tho.nk uchhaltaa ho tab dekh bahaare.n jaa.De kii
tan Thokar maar pichhaa.Daa ho aur dil se hotii ho kushtii sii
thar-thar kaa zor ukhaa.Daa ho bajtii ho sab kii battiisii
ho shor phaphuu huu-huu kaa aur dhuum ho sii-sii sii-sii kii
kalle pe kallaa lag lag kar chaltii ho mu.nh me.n chakkii sii
har daa.nt chane se daltaa ho tab dekh bahaare.n jaa.De kii
har ek makaa.n me.n sardii ne aa baa.ndh diyaa ho ye chakkar
jo har dam kap-kap hotii ho har aan ka.Daaka.D aur thar-thar
paiThii ho sardii rag rag me.n aur barf pighaltaa ho patthar
jha.D-baa.ndh mahaavaT pa.Dtii ho aur tis par lahre.n le le kar
sannaaTaa baav kaa chaltaa ho tab dekh bahaare.n jaa.De kii
har chaar taraf se sardii ho aur sehn khulaa ho koThe kaa
aur tan me.n niimaa shabnam kaa ho jis me.n KHas kaa itr lagaa
chhi.Dkaav hu.aa ho paanii kaa aur KHuub pala.ng bhii ho bhiigaa
haatho.n me.n piyaala sharbat kaa ho aage ik farraash kha.Daa
farraash bhii pa.nkhaa jhaltaa ho tab dekh bahaare.n jaa.De kii
jab aisii sardii ho ai dil tab roz maze kii ghaate.n ho.n
kuchh narm bichhaune maKHmal ke kuchh aish kii lambii raate.n ho.n
mahbuub gale se lipTaa ho aur kuhnii, chuTkii, laate.n ho.n
kuchh bose milte jaate ho.n kuchh miiThii miiThii baate.n ho.n
dil aish-o-tarab me.n paltaa ho tab dekh bahaare.n jaa.De kii
ho farsh bichhaa Gaaliicho.n kaa aur parde chhoTe ho.n aa kar
ik garm a.ngiiThii jaltii ho aur sham.a ho raushan aur tis par
vo dilbar, shoKH, parii, chanchal, hai dhuum machii jis kii ghar ghar
resham kii narm nihaalii par sau naaz-o-adaa se ha.ns ha.ns kar
pahluu ke biich machaltaa ho tab dekh bahaare.n jaa.De kii
tarkiib banii ho majlis kii aur kaafir naachne vaale ho.n
mu.nh un ke chaa.nd ke Tuk.De ho.n tan un ke ruu.ii ke gaale ho.n
poshaake.n naazuk ra.ngo.n kii aur o.Dhe shaal do-shaale ho.n
kuchh naach aur rang kii dhuume.n ho.n aish me.n ham matvaale ho.n
piyaale par pyaala chaltaa ho tab dekh bahaare.n jaa.De kii
har ek makaa.n ho KHalvat kaa aur aish kii sab tayyaarii ho
vo jaan ki jis se jii Gash ho sau naaz se aa jhankaarii ho
dil dekh 'naziir' us kii chhab ko har aan adaa par vaarii ho
sab aish muhayyaa ho aa kar jis jis armaan kii baaii ho
jab sab armaan nikaltaa ho tab dekh bahaare.n jaa.De kii

Nazeer Akbarabadi
Nazm

panwaDi

buu.Dhaa panvaa.Dii us ke baalo.n me.n maa.ng hai nyaarii
aa.nkho.n me.n jiivan kii bujhtii agnii kii chi.ngaarii
naam kii ik haTTii ke andar bosiida almaarii
aage piital ke taKHte par us kii duniyaa saarii
paan katthaa cigarette tambaakuu chuunaa lau.ng supaarii

Majeed Amjad
Nazm

roe bhagat kabir

puuchh na kyaa lahore me.n dekhaa ham ne miyaa.n-'naziir'
pahne.n suiT a.ngrezii bole.n aur kahlaa.e.n 'miir'
chaudhariyo.n kii muTThii me.n hai shaa.ir kii taqdiir
ro.e bhagat kabiir
ik-duuje ko jaahil samjhe.n naT-khaT buddhiivaan
metro me.n jo chaa.e pilaa.e bas vo baap samaan
sab se achchhaa shaa.ir vo hai jis kaa yaar mudiir
ro.e bhagat kabiir
sa.Dko.n par bhuuke phirte hai.n shaa.ir mausiiqaar
actorso.n ke baap liye phirte hai.n motor-kaar
film-nagar tak aa pahu.nche hai.n sayyad piir faqiir
ro.e bhagat kabiir
laal-diin kii koThii dekhii rang bhii jis kaa laal
shahr me.n rah kar KHuub u.Daa.e dahqaano.n kaa maal
aur kahe ajdaad ne baKHshii mujh ko ye jaagiir
ro.e bhagat kabiir
jis ko dekho leader hai aur se milo vakiil
kisii tarah bhartaa hii nahii.n hai peT hai un kaa jhiil
majbuuran sun.naa pa.Dtii hai un sab kii taqdiir
ro.e bhagat kabiir
mahfil se jo uTh kar jaa.e kahlaa.e vo bor
apnii masjid kii taariife.n baaqii juute-chor
apnaa jhang bhalaa hai pyaare jahaa.n hamaarii hiir
ro.e bhagat kabiir

Habib Jalib
Nazm

aligarh

kahii.n hai ijtimaa tabliiGiyo.n kaa ek koThii me.n
to hai shii.o.n kii majlis aur raqaa.im duusre ghar me.n

Syeda Farhat
Nazm

sex workers

sa.Dak kinaare sTeshno.n par
puraane koThe kii balcony me.n
hoTalo.n kii bahisht-timsaal lobbiyo.n me.n
ba.De buzurgo.n ke maqbaro.n
aur haspataalo.n ke gate ke paas
shab ga.e jo kha.De hu.e hai.n
ye log kyaa hai.n

Shoaib Kiani
Nazm

main hun kya waishya

jaante ho mai.n huu.n kyaa mai.n huu.n vaishyaa
pataa hai mai.n ne hai kyaa kyaa kiyaa
mai.n naachtii huu.n koTho.n par KHush hotii huu.n bus noTo.n par
har raat har raat mai.n apnaa jism bechtii huu.n
itnaa dard mai.n bus paiso.n ke liye to sahtii huu.n
mai.n logo.n kii raate.n ra.ngiin kartii huu.n
har raat ye apraadh sa.ngiin kartii huu.n
meraa naam aam me.n lene nahii.n
note ke alaava merii zindagii kaa ko.ii naayak nahii.n
zindagii me.n meraa na hai asitiv na ko.ii iimaan
samaaj ke liye to mai.n huu.n hii nahii.n insaan
agar hai to bas hai ek pahchaan
huu.n ek koThe vaalii kartii huu.n apnaa hii jism niilaam
har raat merii ek na.e geraahak ke saath hotii hai
har raat merii aatmaa apnii pahchaan khotii hai
merii maa.n kaa bhii to yahii kaam thaa nahii.n jaantii mere pitaa kaa kyaa naam thaa
jaan kar bhii kyaa kar letii vo bhii ek vaishyaa thii
kaam un kaa logo.n ko sukh denaa thaa chintaa nahii.n
viraasat me.n un se bas yahii ek kaam milaa
jis ke kaaran hii shaayad mujhe jiivan me.n kuchh na milaa
nahii.n nahii.n galtii un kii nahii.n unho.nne to pa.Dhaanaa chaahaa thaa
par kyaa kare.n maalkin ko ye bilkul naagavaar thaa
na jaa.e diyaa mujhe is narak se baahar na ban.ne dii ko.ii pahchaan
un ke dabaav me.n hii to mujhe khonaa pa.Daa meraa iimaan
ab logo.n ko bhii kyaa dosh duu.n jo mujh par thuuk kar jaate hai.n
nahii.n jaante vo meraa sach bas kuchh bhii kah jaate hai.n
dukh to KHuub hotaa hai par ab aadat sii ho ga.ii hai
sochtii huu.n kabhii kyaa merii ye aadat vaaqa.ii sahii hai
kyaa mujhe jiine kaa ko.ii maukaa milegaa
kyaa mere jiivan me.n bhii pyaar kaa phuul khilegaa
ham-safar nahii.n bas ek hamdard hii chaahiye
pahchaan nahii.n tho.Daa saa bas pyaar hii chaahiye
iimaan nahii.n tho.Dii sii bas izzat hii chaahiye
armaan hai bas ek ko.ii vaishyaa nahii.n nahii.n vaishnavii kar bulaa.e
paise dekh kar nahii.n pyaar de kar gale se lagaa.e
kisii ke ghar TuuTne kaa nahii.n ju.Dne kaa kaaran ban.naa chaahtii huu.n
bas ek baar kisii ke dikh kaa nivaaran ban.naa chaahtii huu.n
kisii kii biivii na sahii bahan ban.naa chaahtii huu.n
har baar kii tarah vaishyaa nahii.n ek insaan ban.naa chaahtii huu.n

Ankita Garg
Nazm

death certificate par likhi ek nazm

us maa.n ko sangsaar karnaa chaahtii huu.n
jis ne beTii ke KHvaab phaa.D kar
beTe kii kitaabo.n par kavar cha.Dhaa.e
aur beTii ko badbuu-daar shauhar dete hu.e
beTe se aatii koThe kii KHushbuu
nazar-andaaz kar dii

Sidra Sahar Imran
Nazm

jap

aa mere andar aa
pavitra mahraan ke paanii
ThanDe miiThe maTyaale paanii
maTiyaale jiivan rang jal
dho de saaraa krodh kapaT
shahro.n kii dishaa.o.n kaa sab chhal
yuu.n sii.nch mujhe kar de merii miTTii jal-thal
tire tal kii kaalii chiknii miTTii se
maathe par tilak lagaa.uu.n
haath jo.D Da.nDvat karuu.n
o man ke bhed se gahre
haule haule saa.ns khii.nchte
om samaan amar
o mahaan saagar
mai.n utrii tere ThanDe jal me.n kamar kamar
tere ThanDe miiThe mehrbaan paanii se mu.nh dho luu.n
aur dho luu.n aa.nsuu
khaare aa.nsuu
tere miiThe paanii se dho luu.n
o mahaan maTiyaale saagar aa
sun mirii kathaa
mai.n ba.Dii abhaagan bhaag meraa
bedard haath me.n rahaa sadaa
TuuTaa meraa miTTii se naata
kaise TuuTaa
ik aa.ndhii ba.Dii bhayaanak laal chu.Dail
mujhe le u.Dii
uThaa kar paTkaa us ne kahaa.n se kahaa.n
tere charno.n me.n siis jhukaatii ek akelii jaan
mere saath meraa ko.ii miit nahii.n
ko.ii rang ruup ko.ii priit nahii.n
mirii an-ga.Dh phiikii murjhaatii bolii me.n ko.ii sa.ngiit nahii.n
mirii pii.Dhiyo.n ke biite yug mere saath nahii.n
bas ik nirda.ii dharam hai
jis kaa bharam nahii.n
vo dharam jo kahtaa hai miTTii mirii bairan hai
jo mujhe sikhaataa hai saagar meraa dushman hai
haa.n duur kahii.n
aakaash kii uu.nchaa.ii se pare
rahtaa hai KHudaa
itnaa ruukhaa
miTTii se jo.D nahii.n jis kaa
sab naate priit aur bair ke us kii kaaran mai.n kaise jo.Duu.n
mai.n miTTii meraa janam miTTii
mai.n miTTii ko kaise chho.Duu.n
o maTiyaale balvaan mahaa-saagar
mai.n ukh.Dii dhartii se
bhagvaan miraa ras suukh gayaa
phir bhii suntii huu.n apne lahuu me.n biite samay kii narm dhamak
vo samay jo mere janam se pahle biit gayaa
mere kaano.n me.n
ik shor hai jhar-jhar bahte naddii naalo.n kaa
aur ko.ii mahak ba.Dii be-kal hai
jo guu.nj banii mirii chhaatii se Takraatii hai
o mahaan saagar
jiivan-ras de
apne tal me.n jal-paudaa ban kar ja.D lene de
sadaa jiye
o mahaan saagar sindhuu
tuu sadaa jiye
aur ji.e.n tire paanii me.n phisaltii machhliyaa.n
shaant sukhii yuu.nhii
tire paanii me.n naav khete
tire baalak sadaa ji.e.n
o paalan-haar hamaare
dhartii ke rakhvaale
ann-daataa
tirii dhartii
narm retiilii mehrbaan sindh kii dhartii
sadaa jiye

Fahmida Riaz
Nazm

aazadi ke diwane

ham aazaadii ke diivaane ye duniyaa farzaano.n kii
is paapii sansaar me.n baabaa kaun sune diivaano.n kii
masjid mandir sab ke andar raaj Gulaamii kartii hai
daulat le kar naam KHudaa kaa ghar ghar dharnaa dhartii hai
koThii ba.ngle gore saa.npo.n kii ik aisii bastii hai
jo bhaarat ke bhole-bhaale insaano.n ko Dastii hai
un se bach kar chalnaa baabaa ye qaatil zahriile hai.n
suurat ke mohan hai.n bhiitar se sab niile piile hai.n
shaidaa huu.n aazaadii kaa aazaad-nagar me.n Deraa hai
kyaa batlaa.uu.n mere bhayyaa kaun jahaa.n me.n meraa hai
vo meraa jo aazaadii kii zulfo.n kaa diivaana hai
vo meraa jo sham-e-vatan kaa shaidaa.ii parvaana hai
vo meraa jo maut ke aage be-jigarii se tantaa hai
vo meraa jo aap na ho kuchh jis kii sab kuchh jantaa hai
vo meraa jo ha.nste ha.nste phaa.nsii par cha.Dh jaataa hai
vo meraa jo maut se bhii do chaar qadam ba.Dh jaataa hai
aazaadii ke taalib sun le maut hii merii manzil hai
tuu duniyaa kaa ban saktaa hai meraa ban.naa mushkil hai

Anwar Sabri
Nazm

wazir ka KHwab

mai.n ne ik din KHvaab me.n dekhaa ki ik mujh saa faqiir
gardish-e-paimaana-e-imroz-o-fardaa kaa asiir
garche bilkul be-gunah thaa ho gayaa lekin vaziir
ya.anii ik jho.nkaa jo aayaa bujh ga.ii sham-e-zamiir
muft me.n koThii milii motor milii p.a milaa
jab gayaa picnic pe baahar tour kaa T.a milaa

Syed Mohammad Jafri
Nazm

tawaif

kabhii dil sochtaa hai in tavaa.if-zaadiyo.n kii zindagii likkhuu.n
ki jin ke roz-o-shab koThe kii chhoTii koTharii me.n malgajii sii raushnii me.n zindagii kii talKHiyaa.n chun kar guzartii hai.n
ki jin ke phuul se komal badan ne thuuk se luTh.De badan kaa faasla saa tai kiyaa ho chand lamho.n me.n
ki jin ke tan se laakho.n vahshiyo.n ne raat-o-din ke har pahar me.n jaa.n-fishaanii se havas kii fasl kaaTii ho

Asim Badr
Nazm

jawahar-lal uniwersity ke talaba ke liye

hame.n ek din KHatm karnaa pa.Degaa
hamaare dilo.n me.n jo kuchh faasla hai
hame.n dhuup me.n KHuub chalnaa pa.Degaa
mohabbat kaa bas ek hii raasta hai
ham insaan hai.n aur insaa.n rahe.nge
jo haivaan hai.n ek din ta.ng aa kar
chale jaa.e.nge apne jangal me.n vaapas
jahaa.n vo rahe.nge vahii.n la.D mare.nge
jo baaqii bache.nge vo shahro.n me.n aa kar
gharo.n ko jalaane kii koshish kare.nge
javaano.n ko khaane kii koshish kare.nge
vo college se jaatii hu.ii la.Dkiyo.n ko
a.ndhere me.n laane kii koshish kare.nge
ham insaan hai.n aur insaa.n kii izzat
hamesha bachaane kii koshish kare.nge
hame.n ko.ii ashlok aataa nahii.n hai
suvaamii kaa tirshuul bhaataa nahii.n hai
hamaarii kaviitaa, hamaarii kathaa hai
hamaarii kitaabe.n hamaaraa jathaa hai
agar ko.ii diimak hamaaraa asaasa
miTaane kii aashaa liye aa rahii hai
vo ye jaan le ki hamaare dilo.n me.n
mohabbat kii lau jagmagaane lagii hai
hame.n apne siino.n kii sii.Dhii banaa ke
kisii raat ambar pe jaanaa pa.Degaa
diye kii jagah phuul rakhne pa.De.nge
parindo.n ke hamraah gaanaa pa.Degaa

Zeeshan Sahil
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now