Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "kumlaa"

Nazm MATCHES FOR "kumlaa"

Nazm

banjara-nama

tuu badhiyaa laade bail bhare jo puurab pachchham jaavegaa
yaa suud ba.Dhaa kar laavegaa yaa TuuTaa ghaaTaa paavegaa
qazzaaq ajal kaa raste me.n jab bhaalaa maar giraavegaa
dhan daulat naatii potaa kyaa ik kumba kaam na aavegaa
sab ThaaTh pa.Daa rah jaavegaa jab laad chalegaa banjaaraa

Nazeer Akbarabadi
Nazm

ek aur ghar bhi tha mera

ik aur ghar bhii thaa miraa
jis me.n mai.n rahtaa thaa kabhii
ik aur kumba thaa miraa
bachcho.n ba.Do.n ke darmiyaa.n
ik aur hastii thii mirii
kuchh ranj the kuchh KHvaab the
maujuud hai.n jo aaj bhii
vo ghar jo thii bastii mirii
ye ghar jo hai bastii mirii
us me.n bhii thii hastii mirii
is me.n bhii hai hastii mirii
aur mai.n huu.n jaise ko.ii shai
do bastiyo.n me.n ajnabii

Muneer Niyazi
Nazm

munajat-e-bewa

(1)
ai sab se avval aur aaKHir
jahaa.n-tahaa.n, haazir aur naazir
ai sab daanaa.o.n se daanaa
saare tavaanaa.o.n se tavaanaa
ai baalaa, har baalaa-tar se
chaa.nd se suuraj se ambar se
ai samjhe buujhe bin suujhe
jaane-pahchaane bin buujhe
sab se anokhe sab se niraale
aa.nkh se ojhal dil ke ujaale
ai andho.n kii aa.nkh ke taare
ai la.ng.De luulo.n ke sahaare
naatiyo.n se chhoTo.n ke naatii
saathiyo.n se bichh.Do.n ke saathii
naav jahaa.n kii khene vaale
dukh me.n tasallii dene vaale
jab ab tab tujh saa nahii.n ko.ii
tujh se hai.n sab tujh saa nahii.n ko.ii
jot hai terii jal aur thal me.n
baas hai terii phuul aur phal me.n
har dil me.n hai teraa baseraa
tuu paas aur ghar duur hai teraa
raah tirii dushvaar aur suk.Dii
naam tiraa rah-giir kii lak.Dii
tuu hai Thikaanaa miskiino.n kaa
tuu hai sahaaraa Gamgiino.n kaa
tuu hai akelo.n kaa rakhvaalaa
tuu hai a.ndhere ghar kaa ujaalaa
laaguu achchhe aur bure kaa
KHvaahaa.n khoTe aur khare kaa
bed niraase biimaaro.n kaa
gaahak mande baazaaro.n kaa
soch me.n dil bahlaane vaale
biptaa me.n yaad aane vaale
(2)
ai be-vaaris gharo.n ke vaaris
be-baazuu be-paro.n ke vaaris
be-aaso.n kii aas hai tuu hii
jaagte sote paas hai tuu hii
bas vaale hai.n yaa be-bas hai.n
tuu nahii.n jin kaa vo be-kas hai.n
saathii jin kaa dhyaan hai teraa
dusraayat kii vahaa.n nahii.n parvaa
dil me.n hai jin ke terii ba.Daa.ii
ginte hai.n vo parbat ko raa.ii
bekas kaa Gam-KHvaar hai tuu hii
burii banii kaa yaar hai tuu hii
dukhiyaa dukhii yatiim aur beva
tere hii haath un sab kaa hai khevaa
tuu hii maraz de tuu hii davaa de
tuu hii davaa-daaruu me.n shifaa de
tuu hii pilaa.e zahr ke pyaale
tuu hii phir amrit zahr me.n Daale
tuu hii dilo.n me.n aag lagaa.e
tuu hii dilo.n kii lagii bujhaa.e
chumkaare chumkaar ke maare
maare maar ke phir chumkaare
pyaar kaa tere puuchhnaa kyaa hai
maar me.n bhii ik terii mazaa hai
(3)
ai rahmat aur haibat vaale
shafqat aur dabaaGat vaale
ai aTkal aur dhyaan se baahar
jaan se aur pahchaan se baahar
aql se ko.ii paa nahii.n saktaa
bhed tire hukmo.n me.n hai.n kyaa kyaa
ek ko tuu ne shaad kiyaa hai
ek ke dil ko daaG diyaa hai
us se na teraa pyaar kuchh aisaa
us se na tuu bezaar kuchh aisaa
har dam terii aan na.ii hai
jab dekho tab shaan na.ii hai
yahaa.n pachhu.aa hai vahaa.n purvaa hai
ghar ghar teraa hukm nayaa hai
phuul kahii.n kumlaa.e hu.e hai.n
aur kahii.n phal aa.e hu.e hai.n
khetii ek kii hai lahraatii
ek kaa har dam KHuun sukhaatii
ek pa.De hai.n dhan ko Dubo.e
ek hai.n gho.De bech ke so.e
ek ne jab se hosh sambhaalaa
ra.nj se us ko pa.Daa na paalaa
ek ne is janjaal me.n aa kar
chain na dekhaa aa.nkh uThaa kar
me.nh kahii.n daulat kaa hai barastaa
hai ko.ii paanii tak ko tarastaa
ek ko marne tak nahii.n dete
ek uktaa gayaa lete lete
haal Garaz duniyaa kaa yahii hai
Gam pahle aur baa'd KHushii hai
ra.nj kaa hai duniyaa ke gilaa kyaa
tohfa yahii le de ke hai yaa.n kaa
yahaa.n nahii.n bantii ranj sahe bin
ra.nj nahii.n sab ek se lekin
ek se yahaa.n ranj ek hai baalaa
ek se hai dard ek niraalaa
ghaav hai go naasuur kii suurat
par use kyaa naasuur se nisbat
tap vahii diq kii shakl hai lekin
diq nahii.n rahtii jaan liye bin
diq ho vo yaa naasuur ho kuchh ho
de na jo ab ummiid kisii ko
roz kaa Gam kyuu.n-kar sahe ko.ii
aas na jab baaqii rahe ko.ii
tuu hii kar insaaf ai mire maulaa
kaun hai jo be-aas hai jiitaa
go ki bahut bande hai.n pur-armaa.n
kam hai.n magar maayuus hai.n jo yaa.n
KHvaah dukhii hai KHvaah sukhii hai
jo hai ik ummiid us ko ba.ndhii hai
khetiyaa.n jin kii kha.Dii hai.n suukhii
aas vo baa.ndhe baiThe hai.n me.nh kii
ghaTaa jin kii asaa.Dii me.n hai
saavanii kii ummiid nahii.n hai
Duub chukii hai un kii agetii
detii hai Dhaaras un ko pachhetii
ek hai is ummiid pe jiitaa
ab hu.ii beTii ab hu.aa beTaa
ek ko jo aulaad milii hai
us ko uma.ng shaadiyo.n kii hai
ra.nj hai yaa qismat me.n KHushii hai
kuchh hai magar ik aas ba.ndhii hai
Gam nahii.n un ko Gamgii.n hai.n
jo dil naa-umiid nahii.n hai.n
kaal me.n kuchh saKHtii nahii.n aisii
kaal me.n hai jab aas samay.n kii
sahal hai maujo.n se chhuTkaaraa
jab ki nazar aataa hai kinaaraa
par nahii.n uTh saktii vo musiibat
aa.egii jis ke baa'd na raahat
shaad ho us rah-giir kaa kyaa dil?
mar ke kaTegii jis kii manzil
un uj.Do.n ko kal pa.De kyuu.n-kar
ghar na basegaa jin kaa janam bhar
un bichh.Do.n kaa kyaa hai Thikaanaa?
jin ko na milne degaa zamaana
ab ye balaa Taltii nahii.n Taalii
mujh pe hai jo taqdiir ne Daalii
aa.ii.n bahut duniyaa me.n bahaare.n
aish kii ghar ghar pa.Dii.n pukaare.n
pa.De bahut baaGo.n me.n jhuule
Dhaak bahut jangal me.n phuule
ga.ii.n aur aa.e.n chaa.ndnii raate.n
barsii.n khulii.n bahut barsaate.n
par na khilii hargiz na khilegii
vo jo kalii murjhaa.ii thii dil kii
aas hii kaa bas naam hai duniyaa
jab na rahii yahii to rahaa kyaa?
aise bidesii kaa nahii.n Gam kuchh
jis ko na ho milne kii qasam kuchh
ronaa un ban-baasiyo.n kaa hai
des nikaalaa jin ko milaa hai
hukm se tere par nahii.n chaara
ka.Dvii miiThii sab hai gavaaraa
zor hai kyaa patte kaa havaa par
chaahe jidhar le jaa.e u.Daa kar
tinkaa ik aur saat samundar
jaa.e kahaa.n maujo.n se nikal kar
qismat hii me.n jab thii judaa.ii
phir Taltii kis tarah ye aa.ii?
aaj kii big.Dii ho to bane bhii
azal kii big.Dii KHaak banegii
tuu jo chaahe vo nahii.n Taltaa
bande kaa yaa.n bas nahii.n chaltaa
maare aur na de tuu rone
thapke aur na de tuu sone
Thahre ban aatii hai na bhaage
terii zabardastii ke aage
tujh se kahii.n gar bhaagnaa chaahe.n
band hai.n chaaro.n khuu.nT kii raahe.n
tuu maare aur KHvaah navaaze
pa.Dii hu.ii huu.n mai.n tere darvaaze
tujh ko apnaa jaantii huu.n mai.n
tujh se nahii.n to kis se kahuu.n mai.n
maa.n hii sadaa bachche ko maare
aur bachcha maa.n maa.n hii pukaare
(4)
ai mire zor aur qudrat vaale
hikmat aur hukuumat vaale
mai.n lau.nDii terii dukhyaare
darvaaze kii terii bhikaarii
maut kii KHvaahaa.n jaan kii dushman
jaan apnii hai aap ajiiran
apne paraa.e kii dhutkaarii
maike aur sasuraal pe bhaarii
sah ke bahut aazaar chalii huu.n
duniyaa se bezaar chalii huu.n
dil par mere daaG hai.n jitne
mu.nh me.n bol nahii.n hai.n utne
dukh dil kaa kuchh kah nahii.n saktii
is ke sivaa kuchh kah nahii.n saktii
tujh pe hai raushan sab dukh dil kaa
tujh se haqiiqat apnii kahuu.n kyaa
byaah ke dam paa.ii thii na lene
lene ke yaa.n pa.D ga.e dene
KHushii me.n bhii dukh saath na aayaa
Gam ke sivaa kuchh haat na aayaa
ek KHushii ne Gam ye dikhaa.e
ek ha.nsii ne gul hii khilaa.e
kaisaa thaa ye byaah ninaavaa.n
juu.nhii pa.Daa is kaa parchaavaa.n
chain se rahne diyaa na jii ko
kar diyaa maliyaameT KHushii ko
ro nahii.n saktii ta.ng huu.n yaa.n tak
aur ro.uu.n to ro.uu.n kahaa.n tak
ha.ns ha.ns dil bahlaa.uu.n kyuu.n-kar
oso.n pyaas bujhaa.uu.n kyuu.n-kar
ek kaa kuchh jiinaa nahii.n hotaa
ek na ha.nstaa bhalaa na rotaa
leTe gar sone ke bahaane
paa.entii kal hai aur na sirhaane
jaagiye to bhii ban nahii.n pa.Dtii
jaagne kii aaKHir ko.ii had bhii
ab kal ham ko pa.Degii mar kar
gor hai suunii sej se behtar
baat se nafrat kaam se vahshat
TuuTii aas aur bujhii tabii.at
aabaadii jangal kaa namuuna
duniyaa suunii aur ghar suunaa
din hai bhayaanak aur raat Daraanii
yuu.n guzrii saarii ye javaanii
bahne.n aur bahneliyaa.n merii
saath kii jo thii.n kheliyaa.n merii
mil na sakii.n jii khol ke mujh se
KHush na hu.ii.n ha.ns bol ke mujh se
jab aa.ii.n ro-dho ke ga.ii.n vo
jab ga.ii.n be-kal ho ke ga.ii.n vo
ko.ii nahii.n dil kaa bahlaavaa
aa nahii.n chuktaa meraa bulaavaa
aaTh pahar kaa hai ye julaapaa
kaaTuu.ngii kis tarah ra.nDaapaa
thak ga.ii dukh sahte sahte
tham ga.e aa.nsuu bahte bahte
aag khulii dil kii na kisii par
ghul ga.ii jaan andar hii andar
dekh ke chup jaanaa na kisii ne
jaan ko phuu.nkaa dil kii lagii ne
dabii thii bhobhal me.n chi.ngaarii
lii na kisii ne KHabar hamaarii
qaum me.n vo KHushiyaa.n biyaaho.n kii
shahr me.n vo dho.e.n saaho.n kii
tyauhaaro.n kaa aa.e din aanaa
aur sab kaa tyauhaar manaanaa
vo chait aur phaagun kii havaa.e.n
vo saavan bhaado.n kii ghaTaa.e.n
vo garmii kii chaa.ndnii raate.n
vo armaan bharii barsaate.n
kis se kahuu.n kis taur se kaaTe.n
KHair kaTe.n jis taur se kaaTe.n
chaav ke aur KHushiyo.n ke samay sab
aate hai.n KHush kal jaan ko ho jab
ra.nj me.n hai.n saamaan KHushii ke
aur jalaane vaale hii ke
ghar barkhaa aur piyaa bidesii
aa.iyo barkhaa kahii.n na aisii
din ye javaanii ke kaTe aise
baaG me.n panchhii qaid ho jaise
rut ga.ii saarii sar Takraate
u.D na sake par hote saare
kisii ne hogii kuchh kal paa.ii
mujhe to shaadii raas na aa.ii
aas ba.ndhii lekin na milaa kuchh
phuul aayaa aur phal na lagaa kuchh
rah gayaa de kar chaa.nd dikhaa.ii
chaa.nd hu.aa par iid na aa.ii
phal kii KHaatir barchhii khaa.ii
phal na milaa aur jaan ga.nvaa.ii
ret me.n zarre dekh chamakte
dau.D pa.Dii me.n jhiil samajh ke
chaaro.n khuu.nT nazar dau.Daa.ii
par paanii kii buu.nd na paa.ii

Altaf Hussain Hali
Nazm

ehtiyat

ab tum aaGosh-e-tasavvur me.n bhii aayaa na karo
merii aaho.n se ye ruKHsaar na kumhlaa jaa.e.n
Dhuu.nDtii hogii tumhe.n ras me.n nahaa.ii hu.ii raat
jaa.o kaliyaa.n na kahii.n sej kii murjhaa jaa.e.n

Kaifi Azmi
Nazm

nazr-e-collage

kumlaa.e hai.n yahaa.n pe mirii zindagii ke phuul
in raasto.n me.n dafn hai.n merii KHushii ke phuul

Sahir Ludhianvi
Nazm

badnam ho raha hun

faryaadii-e-jafaa-e-ayyaam ho rahaa huu.n
paamaal-e-jaur-e-baKHt-e-naakaam ho rahaa huu.n
sargashta-e-KHayaal-e-anjaam ho rahaa huu.n
bastii kii la.Dkiyo.n me.n badnaam ho rahaa huu.n
bad-naam ho rahaa huu.n
salmaa se dil lagaa kar
bastii kii la.Dkiyo.n me.n badnaam ho rahaa huu.n
salmaa se dil lagaa kar salmaa se dil lagaa kar
us huur-vash ke Gam me.n duniyaa-o-dii.n ga.nvaa kar
hosh-o-havaas kho kar sabr-o-sukuu.n luTaa kar
baiThe biThaa.e dil me.n Gam kii KHalish basaa kar
har chiiz ko bhulaa kar
salmaa se dil lagaa kar
bastii kii la.Dkiyo.n me.n badnaam ho rahaa huu.n
kahtii hai.n sab ye kis kii ta.Dpaa ga.ii hai suurat
salmaa kii shaayad is ke man bhaa ga.ii hai suurat
aur us ke Gam me.n itnii murjhaa ga.ii hai suurat
murjhaa ga.ii hai suurat kumhlaa ga.ii hai suurat
sa.nvlaa ga.ii hai suurat
salmaa se dil lagaa kar
bastii kii la.Dkiyo.n me.n badnaam ho rahaa huu.n
panghaT pe jab ki saarii hotii hai.n jam.a aa kar
gaagar ko apnii rakh kar, ghu.nghaT uThaa uThaa kar
ye qissa chhe.Dtii hai.n mujh ko bataa bataa kar
salmaa se baate.n karte dekhaa hai is ko jaa kar
ham ne nazar bachaa kar
salmaa se dil lagaa kar
bastii kii la.Dkiyo.n me.n badnaam ho rahaa huu.n
raato.n ko giit gaane jab mil kar aatii hai.n sab
taalaab ke kinaare dhuume.n machaatii hai.n sab
ja.ngal kii chaa.ndnii me.n ma.ngal manaatii hai.n sab
to mere aur salmaa ke giit gaatii hai.n sab
aur ha.nstii jaatii hai.n sab
salmaa se dil lagaa kar
bastii kii la.Dkiyo.n me.n badnaam ho rahaa huu.n
kheto.n se lauTtii hai.n jab din chhupe makaa.n ko
tab raaste me.n baaham vo merii daastaa.n ko
dohraa ke chhe.Dtii hai.n salmaa ko merii jaa.n ko
aur vo hayaa kii maarii sii letii hai zabaa.n ko
ki chhe.De is bayaa.n ko
salmaa se dil lagaa kar
bastii kii la.Dkiyo.n me.n badnaam ho rahaa huu.n
kahtii hai rahm khaa kar yuu.n ek maah-e-tal.at
ye shahrii naujavaa.n thaa kis darja KHuub-suurat
aa.nkho.n me.n bas rahii hai ab bhii vo pahlii ra.ngat
do din me.n aah kyaa hai kyaa ho ga.ii hai haalat
allaah terii qudarat
salmaa se dil lagaa kar
bastii kii la.Dkiyo.n me.n badnaam ho rahaa huu.n
us sham.a-ruu kaa jab se parvaana ban gayaa huu.n
bastii kii la.Dkiyo.n me.n afsaana bin gayaa huu.n
har maah-vash ke lab kaa paimaana ban gayaa huu.n
diivaana ho rahaa huu.n diivaana ban gayaa huu.n
diivaana ban gayaa huu.n
salmaa se dil lagaa kar
bastii kii la.Dkiyo.n me.n badnaam ho rahaa huu.n
un kii zabaa.n pe merii jitnii kahaaniyaa.n hai.n
kyaa jaane.n ye ki dil kii sab mehrbaaniyaa.n hai.n
kam-sin hai.n be-KHabar hai.n uThtii javaaniyaa.n hai.n
kyaa samjhe.n Gam ke haatho.n kyuu.n sar-giraaniyaa.n hai.n
kyuu.n KHuu.n-fishaaniyaa.n hai.n
salmaa se dil lagaa kar
bastii kii la.Dkiyo.n me.n badnaam ho rahaa huu.n
har ik ke rahm kaa yuu.n iz.haar ho rahaa hai
bechaare ko ye kaisaa aazaar ho rahaa hai
dekhe to ko.ii jaane biimaar ho rahaa hai
kis darja zindagii se bezaar ho rahaa hai
naa-chaar ho rahaa hai
salmaa se dil lagaa kar
bastii kii la.Dkiyo.n me.n badnaam ho rahaa huu.n
ik puuchhtii hai aa kar tum be-qaraar kyuu.n ho
kuchh to hame.n bataa.o yuu.n dil-figaar kyuu.n ho
kyaa rog hai kaho to tum ashk-baar kyuu.n ho
diivaane kyuu.n hu.e ho diivaana vaar kyuu.n ho
baa-haal-e-zaar kyuu.n ho
salmaa se dil lagaa kar
bastii kii la.Dkiyo.n me.n badnaam ho rahaa huu.n
jaa.uu.n shikaar ko gar baa-hamrahaan-e-sahraa
kheto.n se ghuurtii hai.n yuu.n duKHtaraan-e-sahraa
bijlii kii raushnii ko jaise miyaan-e-sahraa
taariik shab me.n dekhe.n kuchh aahuvaan-e-sahraa
hairat kushaan-e-sahraa
salmaa se dil lagaa kar
bastii kii la.Dkiyo.n me.n badnaam ho rahaa huu.n
ik shoKH chhe.Dtii hai is tarah paas aa kar
dekho vo jaa rahii hai salmaa nazar bachaa kar
sharmaa ke muskuraa kar aa.nchal se mu.nh chhupaa kar
jaa.o naa piichhe piichhe do baate.n kar lo jaa kar
kheto.n me.n chhup chhupaa kar
salmaa se dil lagaa kar
bastii kii la.Dkiyo.n me.n badnaam ho rahaa huu.n
goyaa hame.n hasad se kuchh naazniin nigaahe.n
salmaa kii bhaa ga.ii hai.n kyuu.n dil-nashii.n nigaahe.n
un se zyaada dilkash hai.n ye hasii.n nigaahe.n
al-qissa ek dil hai sau KHashmagii.n nigaahe.n
shauq aafrii.n nigaahe.n
salmaa se dil lagaa kar
bastii kii la.Dkiyo.n me.n badnaam ho rahaa huu.n
ik shoKH taaza daarad sasuraal se ghar aa kar
sakhiyo.n se puuchhtii hai jis dam mujhe bataa kar
ye kaun hai to zaalim kahtii hai.n muskuraa kar
tum is kaa haal puuchho salmaa ke dil se jaa kar
ye giit use sunaa kar
salmaa se dil lagaa kar
bastii kii la.Dkiyo.n me.n badnaam ho rahaa huu.n

Akhtar Shirani
Nazm

mardana kamzori

mere kaa.ndhe pe 'aurat ko rakkhaa gayaa
pusht par baap kaa kumba laadaa gayaa
sar pe kavve bhii bhuuke biThaa.e ga.e
mere haatho.n me.n talvaar de dii ga.ii
mujh ko mere KHudaa se Daraayaa gayaa
jab kamar jhuk ga.ii
mai.n ghisaT kar chalaa
kuhniyaa.n chhil ga.ii.n
ghuTne zaKHmii hu.e
KHuun ristaa rahaa
mai.n nahii.n ro sakaa

Shoaib Kiani
Nazm

baghawat kaun kare

is kumba-parvar duniyaa me.n bekas kii himaayat kaun kare
jab Gaasib munsif ban jaa.e.n insaaf kii zahmat kaun kare

Abul Fitrat Meer Zaidi
Nazm

targhib

ye ek lamha jo apne haatho.n me.n chaa.nd suuraj liye kha.Daa hai
mujhe ishaaro.n se kah rahaa hai
vo mere ham-zaad mere bhaa.ii
jo pattiyo.n kii tarah se kumhlaa ke zard ho ke
tumhaare qadmo.n me.n aa gire hai.n
duriida yaado.n ke qaafile hai.n
vo mere hamnaam mere saathii
jo ko.npalo.n kii tarah se phuuTe.nge
KHushbu.o.n kii tarah chale.nge
na.e saraabo.n ke silsile hai.n
jo biit jaataa hai vo fanaa hai
jo hone vaalaa hai vo fanaa hai
ye kyaa ki tum aa.nsu.o.n me.n Duube hu.e kha.De ho
hazaar bedaar lazzato.n ko KHiraaj dene se Dar rahe ho
ye merii aa.nkho.n hai.n merii aa.nkho.n me.n
apnii aa.nkho.n ke rang bhar do
chalo mujhe laa-zavaal kar do
ye ek qatra jo zindagii ke samundaro.n se chhalak rahaa hai
mirii shikasto.n kii ibtidaa hai

Saqi Faruqi
Nazm

jamuna

aah ai nahr-e-lataafat aah ai bahr-e-jamaal
dil me.n hai pahluu-nashii.n ab tak tiraa naqsh-e-KHayaal
garche tujh me.n ab nahii.n vo jalvaa-e-shaan-e-kuhan
vo hasii.n to hai ki ai sham-e-shabistaan-e-kuhan
husn-e-rafta me.n hai tere ab bhii ik dilkash adaa
tere kumlaa.e hu.e phuulo.n me.n hai buu-e-vafaa

Suroor Jahanabadi
Nazm

patthar

mai.n ik ma.asuum shahrii thaa
sharaafat se sabhii ke saath rahtaa thaa
mohazzab taur se jiitaa thaa
sab ke kaam aataa thaa
kabhii mai.n ne kisii kaa dil nahii.n to.Daa
kisii kaa sar nahii.n pho.Daa
kisii tarkash se ko.ii tiir kyaa tinkaa nahii.n chho.Daa
kisii kii piiTh me.n KHanjar nahii.n bho.nkaa
kisii ke jism par baaruud kaa golaa nahii.n phe.nkaa
kisii ko aag me.n mai.n ne nahii.n jho.nkaa
kisii kaa haq nahii.n maaraa
kisii kaa zar nahii.n luuTaa
ko.ii KHirman nahii.n phuu.nkaa
kisii building kisii gaa.Dii kisii mahfil me.n ko.ii bam nahii.n rakkhaa
mire haatho.n kisii kaa ghar nahii.n uj.Daa
kisii kaa dar nahii.n ukh.Daa
ko.ii kumba nahii.n bikhraa
ko.ii maathaa nahii.n siku.Daa
kisii kii raah me.n ro.Daa nahii.n aTkaa
kisii ke kaam me.n mai.n ne kabhii raKHna nahii.n Daalaa
kisii ke vaaste dil me.n kabhii kiina nahii.n paalaa
ko.ii farmaan haakim kaa kabhii mai.n ne nahii.n Taalaa
ko.ii gheraa nahii.n laa.nghaa
ko.ii aa.ngan nahii.n phaa.ndaa
magar phir bhii qayaamat mujh pe TuuTii hai
ajab Gaarat-garii kaa qahr barsaa hai
ajab saffaak KHanjar dil me.n utraa hai
ki merii ruuh ab tak tilmilaatii hai
ki meraa zehn ab bhii jhunjhunaataa hai
ki merii saa.ns ab bhii la.Dkha.Daatii hai
samajh me.n kuchh nahii.n aataa
ki mai.n ne kyaa bigaa.Daa hai
mire kis jurm kii mujh ko milii hai
ye sazaa aaKHir
ye gutthii kis tarah kholuu.n
sabab kis se yahaa.n puuchhuu.n
kidhar jaa.uu.n
kise rokuu.n
sabhii chehre yahaa.n patthar
sabhii aa.nkhe.n yahaa.n patthar
basaarat me.n bharaa patthar
samaa.at me.n basaa patthar
zabaano.n me.n ga.Daa patthar
adaalat me.n kha.Daa patthar
har ik qaanuun me.n patthar
har ik aa.iin me.n patthar
har ik insaaf me.n patthar
har ik aavaaz me.n patthar
har ik ehsaas me.n patthar
ye patthar yug ke patthar se bhii bhaarii hai
nagiine kii tarah tarshaa hu.aa hai
aur hiire kii anii kii tarah us kii tez noke.n hai.n
bahut shaffaaf hai ye aur is me.n ik tamaddun hai
mai.n is patthar se sar pho.Duu.n
ki apnii zindagii chho.Duu.n
ki apnaa raasta mo.Duu.n
ki ban jaa.uu.n mai.n KHud patthar
samajh me.n kuchh nahii.n aataa

Ghazanfar
Nazm

muhasara

jism ke chaaro.n taraf
dard kii taariik fasiil
zaat ke habs me.n kumhlaa ga.ii aavaaz mirii
Gam ke yalGaar se dil band hu.aa

Saqi Faruqi
Nazm

calendar

dhyaan kii diivaaro.n se
ga.e dino.n kii yaade.n kaise utaaruu.n
is calendar me.n jitnii tasviire.n hai.n
sab mujh ko jaan se pyaarii hai.n
is me.n pahlii tasviir jo hai
ye meraa sahmaa sahmaa KHauf-zada bachpan
jis ke pas-manzar me.n jiivan
sautelii maa.o.n jaisii saffaakii se mujh ko taktaa hai
mahruumii mere gaal masal kar
roTii kaa Tuk.Daa detii hai
aur bhuuk Tahokaa detii hai
is me.n duujii tasviir jo hai
ye sabz la.Dakpan kii dahliiz pe
na.nge paa.nv
phaTe libaade
KHvaabo.n kii ujlii pariyo.n kii sa.ngat me.n
ik bachchii dau.Dii jaatii hai
ik KHvaahish u.Dtii jaatii hai
ra.ngiin Gubaaro.n kii suurat
jo haatho.n se chhuT jaate hai.n
us me.n aglii tasviir jo hai
ye bhor samay kii duurii par
ik bastii kii
jis bastii me.n
ik aa.ngan hai
jis aa.ngan me.n
ik phuul sadaa se khilaa hu.aa
ik aag musalsal raushan hai
vo aag
ki jis ko hijr kii andhii raate.n bhii kajlaa na sakii.n
vo phuul
ki jis ko dukh kii garm havaa.e.n bhii kumhlaa na sakii.n
in tasviiro.n me.n zinda hai
in tasviiro.n me.n raushan hai

Ishrat Afreen
Nazm

marta lamha

is lamhe kii ham-raahii mahsuus karo
is se tumhaaraa bas itnaa hii rishta hai
is kii raah kaa ik be-masraf patthar ho
is kaa dil ko.npal kii tarah mulaa.em hai
is duniyaa aur is ke dukho.n ke baare me.n
jab ko.ii baat sunegaa kumhlaa jaa.egaa
KHaamoshii se is ke saa.e saa.e chalo
aur agar ko.ii baat hii is se karnii hai
aane vaale achchhe dino.n kii baat karo

Saqi Faruqi
Nazm

nazm

tum kis KHvaahish kii mastii me.n
mere dukho.n ko
apne dilaaso.n kii jholii me.n Daal sakoge
jhuuTe dilaaso.n kii ye jholii
mere tund dukho.n se chhalnii ho jaa.egii
aur tere ye lave lave haatho.n kii Dhaaras
nafrat se kumhlaa jaa.egii

Sarmad Sahbai
Nazm

logon ka kumba

puure kumbe se nafrat yaa pyaar karo
ek se nafrat ek se pyaar ye kyaa hai
log sabhii ik jaise hai.n
jaahil hai.n to sab jaahil hai.n aalim hai.n to sab ke sab
zulm kisii ik shaKHs se to maKHsuus nahii.n hai
jis ko tum zaalim kahte ho vo bhii
bachpan me.n ma.asuum thaa KHushbuu kii maanind zarar se KHaalii
aur jis ko vidvaan ho kahte us kaa zehn
kal tak chaTTe kaaGaz jaisaa nirmal aur be-daaG thaa
zaalim ne us kumbe hii me.n zulm kii shikshaa paa.ii
aur vidvaan ne bhii ye ulTii siidhii baate.n
logo.n hii se sun kar zehn me.n bhar rakhii hai.n
ye logo.n kaa kumba
ek mahaan daraKHt hai ham sab patte hai.n
hare yaa suukhe miiThe hai.n yaa ka.Dve
apnaa kyaa hai
pe.D kaa ras ham sab me.n yaksaa.n jaarii-o-saarii hai

Zahid Dar
Nazm

circus

shahr me.n circus aayaa hai
khel tamaashe laayaa hai
haathii uu.nT aur gho.De hai.n
sab hii yuu.n to bhago.De hai.n
sab ko paka.D kar laayaa hai
shahr me.n circus aayaa hai
u.Dtii uchhaltii kaar bhii hai
khelo.n kii bhar-maar bhii hai
saare khilaa.Dii aur joker
taar pe chalte hai.n sarsar
shahr umaD kar aayaa hai
shahr me.n circus aayaa hai
sher bhii hai aur bakrii bhii
kutto.n kii ik Tolii bhii
ek ba.Daa saa bhaaluu hai
kuchh us ke ham-jolii bhii
bhaan-matii kaa kumba hai
jo circus ne jo.Daa hai
haathii puujaa-paaTh kare
bandar bandar-baa.nT kare
bhaaluu naach dikhaataa hai
totaa top chillaataa hai
sabhii dikhaate hai.n kartab
joker ab giraa yaa tab
sab ke man ko bhaayaa hai
shahr me.n circus aayaa hai

Mohammad Asadullah
Nazm

das bachche KHush-haal gharana

kabuutar bolaa GuTarGuu.n
yaa allaah mai.n kyaa karuu.n
do afraad ke kumbe ko
aaKHir mai.n kaise paaluu.n
kyaa laa.uu.n KHud khaane ko
kyaa in ke mu.nh me.n Daaluu.n
kis kis se fariyaad karuu.n
kis kis se daana maa.nguu.n
rotaa ku.Dhtaa rahtaa huu.n
Guu.n Guu.n Guu.n Guu.n GuTarGuu.n
murGii bolii uu.n huu.n huu.n
dekh mai.n kitnii moTii huu.n
das afraad kaa kumba hai
kaisii KHush KHush rahtii huu.n
sub.h savere uThtii huu.n
daana sab ko chugaatii huu.n
rab kaa shukr adaa karke
KHud izzat se khaatii huu.n
tuu bhii uTh aur mehnat kar
kyo.n rotaa hai Guu.n Guu.n Guu.n

Ahmad Hatib Siddiqi
Nazm

jang ka matlab

dekho to is mo.D ke aage
chhoTaa saa school hamaaraa
lambii sii diivaar ke andar
rang ra.ngiilaa pyaaraa pyaaraa
kitne hii to phuul khile hai.n
paude bhii kyaa KHuub lage hai.n
ghanTii ke bajne kii sadaa.e.n
hamd-e-KHudaa phir rab se du.aa.e.n
haa.e yakaayak ek dhamaakaa
ham sab kaa dil dahlaa jaataa
kaale kaale bam ke gole
maut tabaahii jang ke sho.ale
zan zan niiche aa jaate hai.n
kaisii tabaahii phailaate hai.n
chhat school kii gir jaatii hai
mez pe miTTii bhar jaatii hai
aur paude bhii kumhlaa jaate
phuul sisakte aahe.n bharte
shahr me.n har suu maut tabaahii
jang ke sho.ale hitler-shaahii
galiyaa.n sa.Dke.n viiraa.n viiraa.n
jaise har shai hairaa.n hairaa.n
ammii aur abbaa bhii pareshaa.n
har-jaa maut kaa shaitaa.n raqsaa.n
jang kaa matlab aahe.n aa.nsuu
jang kaa matlab KHuun lahuu

Vaqar Khaleel
Nazm

phulon ki bahaar

shaaKH par Gunche khile.nge aur kumhlaa jaa.e.nge
ha.ns ha.nsaa kar ik gha.Dii ke baad murjhaa jaa.e.nge
zindagii me.n maut kaa kyo.n Gam kare.n kyo.n dukh yahii.n
is riyaaz-e-dahr me.n jab tak rahe.n ha.nste rahe.n
un se siikhuu.ngaa mai.n ha.nsnaa aur luuTuu.ngaa bahaar

Ameer Aurangabadi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now