Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "kund"

Nazm MATCHES FOR "kund"

Nazm

iblis ki majlis-e-shura

ibliis
ye anaasir kaa puraanaa khel ye duniyaa-e-duu.n
saakinaan-e-arsh-e-aazam kii tamannaa.o.n kaa KHuu.n
is kii barbaadii pe aaj aamaada hai vo kaarsaaz
jis ne is kaa naam rakhaa thaa jahaan-e-kaaf-o-nuu.n
mai.n ne dikhlaayaa fara.ngii ko muluukiyat kaa KHvaab
mai.n ne to.Daa masjid-o-dair-o-kaliisaa kaa fusuu.n
mai.n ne naadaaro.n ko sikhlaayaa sabaq taqdiir kaa
mai.n ne mun.im ko diyaa sarmaaya daarii kaa junuu.n
kaun kar saktaa hai is kii aatish-e-sozaa.n ko sard
jis ke ha.ngaamo.n me.n ho ibliis kaa soz-e-daruu.n
jis kii shaaKHe.n ho.n hamaarii aabiyaarii se buland
kaun kar saktaa hai is naKHl-e-kuhan ko sar-niguu.n
pahlaa mushiir
is me.n kyaa shak hai ki mohkam hai ye ibliisii nizaam
puKHta-tar is se hu.e KHuu-e-Gulaamii me.n avaam
hai azal se in Gariibo.n ke muqaddar me.n sujuud
in kii fitrat kaa taqaazaa hai namaaz-e-be-qayaam
aarzuu avval to paidaa ho nahii.n saktii kahii.n
ho kahii.n paidaa to mar jaatii hai yaa rahtii hai KHaam
ye hamaarii sa.ii-e-paiham kii karaamat hai ki aaj
suufii-o-mullaa muluukiyyat ke bande hai.n tamaam
tab-e-mashriq ke liye mauzuu.n yahii afyuun thii
varna qavvaalii se kuchh kam-tar nahii.n ilm-e-kalaam
hai tavaaf-o-haj kaa ha.ngaama agar baaqii to kyaa
kund ho kar rah ga.ii momin kii teG-e-be-niyaam
kis kii nau-miidii pe hujjat hai ye farmaan-e-jadiid
hai jihaad is daur me.n mard-e-musalmaa.n par haraam
duusraa mushiir
KHair hai sulataanii-e-jamhuur kaa GauGaa ki shar
tuu jahaa.n ke taaza fitno.n se nahii.n hai baa-KHabar
pahlaa mushiir
huu.n magar merii jahaa.n-biinii bataatii hai mujhe
jo muluukiyat kaa ik parda ho kyaa is se KHatar
ham ne KHud shaahii ko pahnaayaa hai jamhuurii libaas
jab zaraa aadam hu.aa hai KHud-shanaas-o-KHud-nigar
kaarobaar-e-shahryaarii kii haqiiqat aur hai
ye vajuud-e-miir-o-sultaa.n par nahii.n hai munhasir
majlis-e-millat ho yaa parvez kaa darbaar ho
hai vo sultaa.n Gair kii khetii pe ho jis kii nazar
tuu ne kyaa dekhaa nahii.n maGrib kaa jamhuurii nizaam
chehra raushan andaruu.n cha.ngez se taariik-tar
tiisraa mushiir
ruuh-e-sultaanii rahe baaqii to phir kyaa iztiraab
hai magar kyaa is yahuudii kii sharaarat kaa javaab
vo kaliim-e-be-tajallii vo masiih-e-be-saliib
niist paiGambar va-lekin dar baGal daarad kitaab
kyaa bataa.uu.n kyaa hai kaafir kii nigaah-e-parda-soz
mashriq-o-maGrib kii qaumo.n ke liye roz-e-hisaab
is se ba.Dh kar aur kyaa hogaa tabii.at kaa fasaad
to.D dii bando.n ne aaqaa.o.n ke KHemo.n kii tanaab
chauthaa mushiir
to.D is kaa ruumat-ul-kubraa ke aivaano.n me.n dekh
aal-e-ceaser ko dikhaayaa ham ne phir ceaser kaa KHvaab
kaun bahr-e-ruum kii maujo.n se hai lipTaa hu.aa
gaah baalad-chuu.n-sanobar gaah naalad-chuu.n-rubaab
tiisraa mushiir
mai.n to is kii aaqibat-biinii kaa kuchh qaa.il nahii.n
jis ne afra.ngii siyaasat ko kyaa yuu.n be-hijaab
paa.nchvaa.n mushiir ibliis ko muKHaatab kar ke
ai tire soz-e-nafas se kaar-e-aalam ustuvaar
tuu ne jab chaahaa kiyaa har pardagii ko aashkaar
aab-o-gil terii haraarat se jahaan-e-soz-o-saaz
ablah-e-jannat tirii ta.aliim se daanaa-e-kaar
tujh se ba.Dh kar fitrat-e-aadam kaa vo mahram nahii.n
saada-dil bando.n me.n jo mash.huur hai parvardigaar
kaam thaa jin kaa faqat taqdiis-o-tasbiih-o-tavaaf
terii Gairat se abad tak sar-niguu.n-o-sharmsaar
garche hai.n tere muriid afra.ng ke saahir tamaam
ab mujhe un kii faraasat par nahii.n hai e'tibaar
vo yahuudii fitna-gar vo ruuh-e-mazdak kaa buruuz
har qabaa hone ko hai is ke junuu.n se taar taar
zaaG dashtii ho rahaa hai ham-sar-e-shaahiin-o-charG
kitnii sur.at se badaltaa hai mizaaj-e-rozgaar
chhaa ga.ii aashufta ho kar vus.at-e-aflaak par
jis ko naadaanii se ham samjhe the ik musht-e-Gubaar
fitna-e-fardaa kii haibat kaa ye aalam hai ki aaj
kaa.npte hai.n kohsaar-o-murG-zaar-o-juu.ebaar
mere aaqaa vo jahaa.n zer-o-zabar hone ko hai
jis jahaa.n kaa hai faqat terii siyaadat par madaar

Allama Iqbal
Nazm

mujhe mat batana

mujhe mat bataanaa
ki tum ne mujhe chho.Dne kaa iraada kiyaa thaa
to kyuu.n
aur kis vaj.h se
abhii to tumhaare bichha.Dne kaa dukh bhii nahii.n kam hu.aa
abhii to mai.n
baato.n ke va.ado.n ke shahr-e-tilismaat me.n
aa.nkh par KHush-gumaanii kii paTTii liye
tum ko pe.Do.n ke piichhe daraKHto.n ke jhunD
aur diivaar kii pusht par Dhuu.nDne me.n magan huu.n
kahii.n par tumhaarii sadaa aur kahii.n par tumhaarii mahak
mujh pe ha.nsne me.n masruuf hai
abhii tak tumhaarii ha.nsii se nabard-aazmaa huu.n
aur is ja.ng me.n
meraa hathiyaar
apnii vafaa par bharosa hai aur kuchh nahii.n
use kund karne kii koshish na karnaa
mujhe mat bataanaa.....

Parveen Shakir
Nazm

hinDola

dayaar-e-hind thaa gahvaara yaad hai hamdam
bahut zamaana hu.aa kis ke kis ke bachpan kaa
isii zamiin pe khelaa hai 'raam' kaa bachpan
isii zamiin pe un nanhe nanhe haatho.n ne
kisii samay me.n dhanush-baan ko sambhaalaa thaa
isii dayaar ne dekhii hai 'krishn' kii liilaa
yahii.n gharo.ndo.n me.n siitaa sulochanaa raadhaa
kisii zamaane me.n gu.Diyo.n se kheltii ho.ngii
yahii zamii.n yahii dariyaa pahaa.D jangal baaG
yahii havaa.e.n yahii sub.h-o-shaam suuraj chaa.nd
yahii ghaTaa.e.n yahii barq-o-ra.ad o qaus-e-quzah
yahii.n ke giit rivaayaat mausamo.n ke juluus
hu.aa zamaana ki 'siddhaarth' ke the gahvaare
inhii nazaaro.n me.n bachpan kaTaa thaa 'vikram' kaa
sunaa hai 'bhartarharii' bhii inhii.n se khelaa thaa
'bharat' agastya' 'kapil' 'vyaas' 'pashii' 'kautilya'
'janak' vashishth' 'manu' 'vaalmik' vishvaamitr
'kanaad' 'gautam' o ramanuj 'kumaaril-bhatt'
mohanjoDaaro ha.Dappaa ke aur ajantaa ke
banaane vaale yahii.n ballamo.n se khele the
isii hi.nDole me.n 'bhavabhut' o 'kaaliidaas' kabhii
humak humak ke jo tutlaa ke gungunaa.e the
sarasvatii ne zabaano.n ko un kii chuumaa thaa
yahii.n ke chaa.nd va suuraj khilaune the un ke
inhii.n fazaa.o.n me.n bachpan palaa thaa 'KHusrav' kaa
isii zamii.n se uThe 'tansen' aur 'akbar'
'rahiim' 'nanak' o 'chaitanya' aur 'chishti' ne
inhii.n fazaa.o.n me.n bachpan ke din guzaare the
isii zamii.n pe kabhii shazaada-e-'KHurram'
zaraa sii dil-shikanii par jo ro diyaa hogaa
bhar aayaa thaa dil-e-naazuk to kyaa ajab is me.n
in aa.nsu.o.n me.n jhalak taaj kii bhii dekhii ho
'ahalyabaa.i' 'daman' 'padmini' o 'raziya' ne
yahii.n ke pe.Do.n kii shaaKHo.n me.n Daale the jhuule
isii fazaa me.n ba.Dhaa.ii thii pe.ng bachpan kii
inhii nazaaro.n me.n saavan ke giit gaa.e the
isii zamiin pe ghuTno.n ke bal chale ho.nge
'malik-mohammad' o 'raskhan' aur 'tulsi-das'
inhii.n fazaa.o.n me.n guu.njii thii totlii bolii
'kabir-das' 'Tukaaraam' 'suur' o 'miiraa' kii
isii hi.nDole me.n 'viddypati' kaa ka.nTh khulaa
isii zamiin ke the laal 'miir' o 'Gaalib' bhii
Thumak Thumak ke chale the gharo.n ke aa.ngan me.n
'aniis' o 'haalii' o 'iqbaal' aur 'vaaris-shaah'
yahii.n kii KHaak se ubhre the 'premchand' o 'tagore'
yahii.n se uTThe the tahziib-e-hind ke me.amaar
isii zamiin ne dekhaa thaa baal-pan in kaa
yahii.n dikhaa.ii thii.n in sab ne baal-liilaa.e.n
yahii.n har ek ke bachpan ne tarbiyat paa.ii
yahii.n har ek ke jiivan kaa baalkaa.nD khulaa
yahii.n se uThte baguulo.n ke saath dau.De hai.n
yahii.n kii mast ghaTaa.o.n ke saath jhuume hai.n
yahii.n kii madh-bharii barsaat me.n nahaa.e hai.n
lipaT ke kiicha.D o paanii se bachpane un ke
isii zamiin se uTThe vo desh ke saava.nt
u.Daa diyaa thaa jinhe.n company ne topo.n se
isii zamiin se uThii hai.n an-ginat nasle.n
pale hai.n hind hi.nDole me.n an-ginat bachche
mujh aise kitne hii gumnaam bachche khele hai.n
isii zamii.n se isii me.n supurd-e-KHaak hu.e
zamiin-e-hind ab aaraam-gaah hai un kii
is arz-e-paak se uTThii.n bahut sii tahziibe.n
yahii.n tuluu hu.ii.n aur yahii.n Guruub hu.ii.n
isii zamiin se ubhre ka.ii uluum-o-funuun
faraaz-e-koh-e-himaala ye daur-e-ga.ng-o-jaman
aur in kii god me.n parvarda kaarvaano.n ne
yahii.n rumuuz-e-KHiraam-e-sukuu.n-numaa siikhe
nasiim-e-sub.h-e-tamaddun ne bhairvii.n chhe.Dii
yahii.n vatan ke taraano.n kii vo pave.n phuuTe.n
vo be-qaraar sukuu.n-zaa tarannum-e-saharii
vo kapkapaate hu.e soz-o-saaz ke sho.ale
inhii fazaa.o.n me.n a.ng.Daa.iyaa.n jo le ke uThe
lavo.n se jin ke charaaGaa.n hu.ii thii bazm-e-hayaat
jinho.n ne hind kii tahziib ko zamaana hu.aa
bahut se zaaviyo.n se aa.iina dikhaayaa thaa
isii zamii.n pe Dhalii hai mirii hayaat kii shaam
isii zamiin pe vo sub.h muskuraa.ii hai
tamaam sho.ala o shabnam mirii hayaat kii sub.h
sunaa.uu.n aaj kahaanii mai.n apne bachpan kii
dil-o-dimaaG kii kaliyaa.n abhii na chaTkii thii.n
hamesha kheltaa rahtaa thaa bhaa.ii bahno.n me.n
hamaare saath mohalle kii la.Dkiyaa.n la.Dke
machaa.e rakhte the baalak udham har ek gha.Dii
lahuu tara.ng uchhal-phaa.nd kaa ye aalam thaa
mohalla sar pe uThaa.e phire jidhar guzre
hamaare chahchahe aur shor guu.njte rahte
chahaar-samt mohalle ke goshe goshe me.n
fazaa me.n aaj bhii laa-raib guu.njte ho.nge
agarche duusre bachcho.n kii tarah thaa mai.n bhii
ba-zaahir auro.n ke bachpan saa thaa miraa bachpan
ye sab sahii mire bachpan kii shaKHsiyat bhii thii ek
vo shaKHsiyat ki bahut shoKH jis ke the KHad-o-KHaal
adaa adaa me.n ko.ii shaan-e-infiraadii thii
Garaz kuchh aur hii lachchhan the mere bachpan ke
mujhe thaa chhoTe ba.Do.n se bahut shadiid lagaav
har ek par mai.n chhi.Daktaa thaa apnii nannhii sii jaa.n
dil umDaa aataa thaa aisaa ki jii ye chaahtaa thaa
uThaa ke rakh luu.n kaleje me.n apnii duniyaa ko
mujhe hai yaad abhii tak ki khel-kuud me.n bhii
kuchh aise vaqfe pur-asraar aa hii jaate the
ki jin me.n sochne lagtaa thaa kuchh miraa bachpan
ka.ii ma.aanii-e-be-lafz chhuune lagte the
butuun-e-Gaib se mere shu.uur-e-asGar ko
har ek manzar-e-maanuus ghar kaa har gosha
kisii tarah kii ho ghar me.n sajii hu.ii har chiiz
mire mohalle kii galiyaa.n makaa.n dar-o-diivaar
chabuutre ku.e.n kuchh pe.D jhaa.Diyaa.n bele.n
vo pherii vaale ka.ii un ke bhaa.nt bhaa.nt ke bol
vo jaane buujhe manaazir vo aasmaa.n o zamii.n
badalte vaqt kaa aa.iina garmii-o-KHunkii
Guruub-e-mahr me.n ra.ngo.n kaa jaagtaa jaaduu
shafaq ke shiish-mahal me.n gudaaz-e-pinhaa.n se
javaahro.n kii chaTaane.n sii kuchh pighaltii hu.ii.n
shajar hajar kii vo kuchh sochtii hu.ii duniyaa
suhaanii raat kii maanuus ramaziyat kaa fusuu.n
alassabaah ufuq kii vo thartharaatii bhave.n
kisii kaa jhaa.nknaa aahista phuuTtii pau se
vo dopahar kaa samay darja-e-tapish kaa cha.Dhaav
thakii thakii sii fazaa me.n vo zindagii kaa utaar
hu.aa kii bansiyaa.n ba.nsvaa.Diyo.n me.n bajtii hu.ii.n
vo din ke ba.Dhte hu.e saa.e sah-pahar kaa sukuu.n
sukuut shaam kaa jab dono.n vaqt milte hai.n
Garaz jhalakte hu.e sarsarii manaazir par
mujhe gumaan paristaaniyat kaa hotaa thaa
har ek chiiz kii vo KHvaab-naak asliyyat
mire shu.uur kii chilman se jhaa.nktaa thaa ko.ii
liye rubuubiyat-e-kaa.enaat kaa ehsaas
har ek jalve me.n Gaib o shuhuud kaa vo milaap
har ik nazaara ik aa.iina-KHaana-e-hairat
har ek manzar-e-maanuus ek hairat-zaar
kahii.n rahuu.n kahii.n khelo.n kahii.n pa.Dhuu.n likhuu.n
mire shu.uur pe ma.nDlaate the manaazir-e-dahr
mai.n akasr un ke tasavvur me.n Duub jaataa thaa
vafuur-e-jazba se ho jaatii thii mizha pur-nam
mujhe yaqiin hai in unsurii manaazir se
ki aam bachcho.n se letaa thaa mai.n ziyaada asar
kisii samay mirii tiflii rahii na be-parvaa
na chhuu sakii mirii tiflii ko Gaflat-e-tiflii
ye khel-kuud ke lamho.n me.n hotaa thaa ehsaas
du.aa.e.n detaa ho jaise mujhe sukuut-e-davaam
ki jaise haath abad rakh de dosh-e-tiflii par
har ek lamha ke raKHno.n se jhaa.nktii sadiyaa.n
kahaaniyaa.n jo sunuu.n un me.n Duub jaataa thaa
ki aadmii ke liye aadmii kii jag-biitii
se ba.Dh ke kaun sii shai aur ho hii saktii hai
inhii fasaano.n me.n pinhaa.n the zindagii ke rumuuz
inhii fasaano.n me.n khulte the raaz-haa-e-hayaat
unhe.n fasaano.n me.n miltii thii.n ziist kii qadre.n
rumuuz-e-besh-bahaa TheTh aadmiyat ke
kahaaniyaa.n thii.n ki sad-dars-gaah-e-riqqat-e-qalb
har ik kahaanii me.n shaa.istagi-e-Gam kaa sabaq
vo unsur aa.nsu.o.n kaa daastaan-e-insaa.n me.n
vo nal-daman kii kathaa sarguzasht-e-savitrii
'shakuntlaa' kii kahaanii 'bharat' kii qurbaanii
vo marg-e-bhishm-pitaamah vo sej tiiro.n kii
vo paan.cho paa.nDav kii sovarg-yaatraa kii kathaa
vatan se ruKHsat-e-'siddhaarth' 'raam' kaa ban-baas
vafaa ke baa'd bhii 'siitaa' kii vo jalaa-vatanii
vo raato.n-raat 'sirii-krishn' ko uThaa.e hu.e
balaa kii qaid se 'basdev' kaa nikal jaanaa
vo a.ndhkaar vo baarish, ba.Dhii hu.ii jamunaa
Gam-e-aafriin kahaanii vo 'hiir' 'raa.njhaa' kii
shu.uur-e-hind ke bachpan kii yaadgaar-e-aziim
ki aise vaise taKHayyul kii saa.ns ukha.D jaa.e
ka.ii muhayyur-e-idraak dev-maalaaye.n
hitopdesh ke qisse kathaa sarat-saagar
karo.Do.n siino.n me.n vo guu.njtaa hu.aa aalhaa
mai.n puuchhtaa huu.n kisii aur malak vaalo.n se
kahaaniyo.n kii ye daulat ye be-bahaa daulat
fasaane dekh lo in ke nazar bhii aatii hai
mai.n puuchhtaa huu.n ki gahvaare aur qaumo.n ke
base hu.e hai.n kahii.n aisii daastaano.n se
kahaaniyaa.n jo mai.n suntaa thaa apne bachpan me.n
mire liye vo na thii.n mahz baa.is-e-tafriih
fasaano.n se mire bachpan ne sochnaa siikhaa
fasaano.n se mujhe sanjiidgii ke dars mile
fasaano.n me.n nazar aatii thii mujh ko ye duniyaa
Gam o KHushii me.n rachii pyaar me.n basaa.ii hu.ii
fasaano.n se mire dil ne ghulaavaTe.n paa.ii.n
yahii nahii.n ki mashaahiir hii ke afsaane
zaraa sii umr me.n karte ho.n mujh ko muta.assir
mohalle Tole ke gumnaam aadamiyyo.n ke
kuchh aise sun.ne me.n aate the vaaqi.aat-e-hayaat
jo.n yuu.n to hote the farsuuda aur ma.amuulii
magar the aa.iine iKHlaas aur sharaafat ke
ye chand aa.ii ga.ii baate.n aisii baate.n thii.n
ki jin kii oT chamaktaa thaa dard-e-insaanii
ye vaardaat nahii.n razmiyye hayaat ke the
Garaz ki ye hai.n mire bachpane kii tasviire.n
nadiim aur bhii kuchh KHatt-o-KHaal hai.n un ke
ye merii maa.n kaa hai kahnaa ki jab mai.n bachcha thaa
mai.n aise aadmii kii god me.n na jaataa thaa
jo bad-qimaar ho aibii ho yaa ho bad-suurat
mujhe bhii yaad hai nau das baras hii kaa mai.n thaa
to mujh pe kartaa thaa jaaduu saa husn-e-insaanii
kuchh aisaa hotaa thaa mahsuus jab mai.n dekhtaa thaa
shagufta rang tar-o-taaza ruup vaalo.n kaa
ki un kii aa.nch mirii haDDiyaa.n galaa degii
ik aazmaa.ish-e-jaa.n thii ki thaa shu.uur-e-jamaal
aur us kii nashtariyyat us kii ustuKHaa.n-sozii
Gam o nashaat lagaavaT mohabbat o nafrat
ik intishaar-e-sakuu.n iztiraab pyaar itaab
vo be-panaah zakii-ul-hisii vo hilm o Guruur
kabhii kabhii vo bhare ghar me.n hiss-e-tanhaa.ii
vo vahshate.n mirii maahaul-e-KHush-gavaar me.n bhii
mirii sarisht me.n ziddain ke ka.ii jo.De
shuruu.a hii se the maujuud aab-o-taab ke saath
mire mizaaj me.n pinhaa.n thii ek jadaliyyat
rago.n me.n chhuuTte rahte the be-shumaar anaar
nadiim ye hai.n mire baal-pan ke kuchh aasaar
vafuur o shiddat-e-jazbaat kaa ye aalam thaa
ki kau.nde jast kare.n dil ke aabgiine me.n
vo bachpanaa jise bardaasht apnii mushkil ho
vo bachpanaa jo KHud apnii hii tevriyaa.n sii cha.Dhaa.e
nadiim zikr-e-javaanii se kaa.np jaataa huu.n
javaanii aa.ii dabe paa.nv aur yuu.n aa.ii
ki us ke aate hii big.Daa banaa-banaayaa khel
vo KHvaahishaat ke jazbaat ke umaDte hu.e
vo ho.nkte hu.e be-naam aag ke tuufaa.n
vo phuuTtaa hu.aa jvaalaa-mukhii javaanii kaa
rago.n me.n uThtii hu.ii aa.ndhiyo.n ke vo jhaTke
ki jo tavaazun-e-hastii jhi.njho.D ke rakh de.n
vo zalzale ki pahaa.Do.n ke pair ukha.D jaa.e.n
buluuGiyat kii vo Tiise.n vo karb-e-nashv-o-numaa
aur aise me.n mujhe byaahaa gayaa bhalaa kis se
jo ho na saktii thii hargiz mirii shariik-e-hayaat
ham ek duusre ke vaaste bane hii na the
siyaah ho ga.ii duniyaa mirii nigaaho.n me.n
vo jis ko kahte hai.n shaadii-e-KHaanaa-aabaadii
mire liye vo banii bevgii javaanii kii
luTaa suhaag mirii zindagii kaa maa.nDo me.n
nadiim khaa ga.ii mujh ko nazar javaanii kii
balaa-e-jaan mujhe ho gayaa shu.uur-e-jamaal
talaash-e-shola-e-ulfat se ye hu.aa haasil
ki nafrato.n kaa agan-ku.nD ban ga.ii hastii
vo halq o siina o rag rag me.n be-panaah chubhaa
nadiim jaise nigal lii ho mai.n ne naag-phanii
z ishq-zaadam o ishqam kamusht zaar-o-dareG
KHabar na burd ba-rustam kase ki sohraabam
na puuchh aalam-e-kaam-o-dahan nadiim mire
samar hayaat kaa jab raakh bin gayaa mu.nh me.n
mai.n chaltii-phirtii chitaa ban gayaa javaanii kii
mai.n kaa.ndhaa detaa rahaa apne jiite murde ko
ye sochtaa thaa ki ab kyaa karuu.n kahaa.n jaa.uu.n
bahut se aur masaa.ib bhii mujh pe TuuT pa.De
mai.n Dhuu.nDhne lagaa har samt sachchii jhuuTii panaah
talaash-e-husn me.n sher-o-adab me.n dostii me.n
ru.ndhii sadaa se mohabbat kii bhiik maa.ngii hai
na.e sire se samajhnaa pa.Daa hai duniyaa ko
ba.De jatan se sambhaalaa hai KHud ko mai.n ne nadiim
mujhe sambhalne me.n to chaaliis saal guzre hai.n
merii hayaat to vish-paan kii kathaa hai nadiim
mai.n zahr pii ke zamaane ko de sakaa amrit
na puuchh mai.n ne jo zahraaba-e-hayaat piyaa
magar huu.n dil se mai.n is ke liye sipaas-guzaar
larazte haatho.n se daaman KHuluus kaa na chhaTaa
bachaa ke rakkhii thii mai.n ne amaanat-e-tiflii
ise na chhiin sakii mujh se dast-burd-e-shabaab
ba-qaul shaa.er-e-mulk-e-fara.ng har bachcha
KHud apne ahd-e-javaanii kaa baap hotaa hai
ye kam nahii.n hai ki tiflii-e-rafta chho.D ga.ii
dil-e-hazii.n me.n ka.ii chhoTe chhoTe naqsh-e-qadam
mirii anaa kii rago.n me.n pa.De hu.e hai.n abhii
na jaane kitne bahut narm u.ngliyo.n ke nishaa.n
hanuuz vaqt ke be-dard haath kar na sake
hayaat-e-rafta kii zinda nishaaniyo.n ko fanaa
zamaana chhiin sakegaa na merii fitrat se
mirii safaa mire tahtush-shu.uur kii ismat
taKHaiyyulaat kii doshiizgii kaa radd-e-amal
javaan ho ke bhii be-laus tifl-vash jazbaat
syaanaa hone pe bhii ye jibillate.n merii
ye sarKHushii o Gam be-riyaa ye qalb-gudaaz
baGair bair ke an-ban Garaz se paak tapaak
Garaz se paak ye aa.nsuu Garaz se paak ha.nsii
ye dasht-e-dahr me.n hamdardiyo.n kaa sar-chashma
qubuuliyat kaa ye jazba ye kaa.enaat o hayaat
is arz-e-paak par iimaan ye ham-aaha.ngii
har aadmii se har ik KHvaab o ziist se ye lagaav
ye maa.n kii god kaa ehsaas sab manaazir me.n
qariib o duur zamii.n me.n ye buu-e-vataniyyat
nizaam-e-shams-o-qamar me.n payaam-e-hifz-e-hayaat
ba-chashm-e-shaam-o-sahar maamtaa kii shabnam sii
ye saaz o dil me.n mire naGma-e-analkaunain
har iztiraab me.n ruuh-e-sukuun-e-be-paayaa.n
zamaana-e-guzaraa.n me.n davaam kaa sargam
ye bazm-e-jashn-e-hayaat-o-mamaat sajtii hu.ii
kisii kii yaad kii shahnaa.iyaa.n sii bajtii hu.ii
ye ramaziiyat ke anaasir shu.uur-e-puKHta me.n
falak pe vajd me.n laatii hai jo farishto.n ko
vo shaa.erii bhii buluuG-e-mizaaj-e-tiflii hai
ye nashtariyyat-e-hastii ye is kii sheriyat
ye pattii pattii pe gulzaar-e-zindagii ke kisii
latiif nuur kii parchhaa.iyaa.n sii pa.Dtii hu.ii
baham ye hairat o maanuusiyat kii sargoshii
bashar kii zaat ki mahr-e-uluuhiyat ba-jabii.n
abad ke dil me.n ja.De.n maartaa hu.aa sabza
Gam-e-jahaa.n mujhe aa.nkhe.n dikhaa nahii.n saktaa
ki aa.nkhe.n dekhe hu.e huu.n mai.n ne apne bachpan kii
mire lahuu me.n abhii tak sunaa.ii detii hai.n
sukuut-e-huzn me.n bhii ghu.nghru.o.n kii jhankaare.n
ye aur baat ki mai.n is pe kaan de na sakuu.n
isii vadii.at-e-tiflii kaa ab sahaaraa hai
yahii hai.n marham-e-kaafuur dil ke zaKHmo.n par
unhii ko rakhnaa hai mahfuuz taa-dam-e-aaKHir
zamiin-e-hind hai gahvaara aaj bhii hamdam
agar hisaab kare.n das karo.D bachcho.n kaa
ye bachche hind kii sab se ba.Dii amaanat hai.n
har ek bachche me.n hai.n sad-jahaan-e-imkaanaat
magar vatan kaa hal-o-aqd jin ke haath me.n hai
nizaam-e-zindagii-e-hind jin ke bas me.n hai
ravayya dekh ke un kaa ye kahnaa pa.Dtaa hai
kise pa.Dii hai ki samjhe vo is amaanat ko
kise pa.Dii hai ki bachcho.n kii zindagii ko bachaa.e
KHaraab hone se Talne se suukh jaane se
bachaa.e kaun in aazurda honhaaro.n ko
vo zindagii jise ye de rahe hai.n bhaarat ko
karo.Do.n bachcho.n ke miTne kaa ik alamiyya hai
churaa.e jaate hai.n bachche abhii gharo.n se yahaa.n
ki jism to.D diye jaa.e.n un ke taaki mile
churaane vaalo.n ko KHairaat maagh-mele kii
jo is azaab se bach jaa.e.n to gale pa.D jaa.e.n
vo la.ante.n ki hamaare karo.Do.n bachcho.n kii
nadiim KHair se miTTii KHaraab ho jaa.e
vo muflisii ki KHushii chhiin le vo be-bargii
udaasiyo.n se bharii zindagii kii be-ra.ngii
vo yaasiyaat na jis ko chhu.e shu.aa-e-umiid
vo aa.nkhe.n dekhtii hai.n har taraf jo be-nuurii
vo TukTukii ki jo pathraa ke rah ga.ii ho nadiim
vo be-dilii kii ha.nsii chhiin le jo ho.nTo.n se
vo dukh ki jis se sitaaro.n kii aa.nkh bhar aa.e
vo gandagii vo kasaafat maraz-zada paikar
vo bachche chhin ga.e ho.n jin se bachpane un ke
hamii.n ne gho.nT diyaa jis ke bachpane kaa galaa
jo khaate-piite gharo.n ke hai.n bachche un ko bhii kyaa
samaaj phuulne-phalne ke de sakaa saadhan
vo saa.ns lete hai.n tahziib-kush fazaa.o.n me.n
ham un ko dete hai.n be-jaan aur Galat ta.aliim
milegaa ilm-e-jihaalat-numaa se kyaa un ko
nikal ke madraso.n aur universitiyyo.n se
ye bad-nasiib na ghar ke na ghaaT ke ho.nge
mai.n puuchhtaa huu.n ye ta.aliim hai ki makkaarii
karo.Do.n zindagiyo.n se ye be-panaah daGaa
nisaab aisaa ki mehnat kare.n agar is par
bajaa.e ilm jahaalat kaa iktisaab kare.n
ye ulTaa dars-e-adab ye sa.Dii hu.ii ta.aliim
dimaaG kii ho Gizaa yaa Gizaa-e-jismaanii
har ik tarah kii Gizaa me.n yahaa.n milaavaT hai
vo jis ko bachcho.n kii ta.aliim kah ke dete hai.n
vo dars ulTii chhurii hai gale pe bachpan ke
zamiin-e-hind hi.nDolaa nahii.n hai bachcho.n kaa
karo.Do.n bachcho.n kaa ye des ab janaaza hai
ham inqalaab ke KHatro.n se KHuub vaaqif hai.n
kuchh aur roz yahii rah ga.e jo lail-o-nahaar
to mol lenaa pa.Degaa hame.n ye KHatra bhii
ki bachche qaum kii sab se ba.Dii amaanat hai.n

Firaq Gorakhpuri
Nazm

coffee-house

din-bhar coffee-house me.n baiThe kuchh duble-patle naqqaad
bahs yahii karte rahte hai.n sust adab kii hai raftaar
sirf adab ke Gam me.n Galtaa.n chalne phirne se laachaar
chehro.n se zaahir hotaa hai jaise barso.n ke biimaar
urdu-adab me.n Dhaa.ii hai.n shaa.er 'miir' o 'Gaalib' aadhaa 'josh'
yaa ik-aadh kisii kaa misra yaa 'iqbaal' ke chand ash.aar
yaa phir nazm hai ik chuuhe par haamid-'madnii' kaa shahkaar
ko.ii nahii.n hai achchhaa shaa.er ko.ii nahii.n afsaana-nigaar
'manTo' 'kirshn' 'nadiim' aur 'bedii' in me.n jaan to hai lekin
aib ye hai in ke haatho.n me.n kund zabaa.n kii hai talvaar
'aalii' afsar 'inshaa' baabuu 'naasir' 'miir' ke bar-KHurdaar
'faiz' ne jo ab tak likkhaa hai kyaa likkhaa hai sab be-kaar
un ko adab kii sehhat kaa Gam mujh ko un kii sehhat kaa
ye bechaare dukh ke maare jiine se hai.n kyuu.n be-zaar
husn se vahshat ishq se nafrat apnii hii suurat se pyaar
KHanda-e-gul par ek tabassum girya-e-shabnam se inkaar

Habib Jalib
Nazm

infiradiyat parast

ek insaa.n kii haqiiqat kyaa hai
zindagii se use nisbat kyaa hai
aa.ndhii uTThe to u.Daa le jaa.e
mauj biphre to bahaa le jaa.e
ek insaa.n kii haqiiqat kyaa hai
Dagmagaa.e to sahaaraa na mile
saamne ho pa kinaaraa na mile
ek insaa.n kii haqiiqat kyaa hai
kund talvaar qalam kar Daale
sard-sho.ala hii bhasam kar Daale
zindagii se use nisbat kyaa hai
ek insaa.n kii haqiiqat kyaa hai

Shakeb Jalali
Nazm

chyunTi-bhar aaTa

ham kis dukh se apne makaan faroKHt karte hai.n
aur bhuuk ke liye chyuu.nTii-bhar aaTaa KHariidte hai.n
hame.n band kamro.n me.n kyuu.n piro diyaa gayaa hai
ek din kii umr vaale to abhii darvaaza taak rahe hai.n
chaal lahuu kii buu.nd buu.nd maa.ng rahii hai
kisii ko churaanaa ho to sab se pahle us ke qadam churaa.o
tum chiith.De par baiThe zabaan pe phuul ho
aur aavaaz kor sii kor
insaan kaa piyaala samundar ke pyaale se miTTii nikaaltaa hai
miTTii ke saa.np banaataa hai aur bhuuk paaltaa hai
tinke jab shu.aa.o.n kii pyaas na bujhaa sake to aag lagii
mai.n ne aag ko dhoyaa aur dhuup ko sukhaayaa
suuraj jo din kaa siina jalaa rahaa thaa
aasmaanii rang se bhar diyaa
ab aasmaan kii jagah koraa kaaGaz bichhaa diyaa gayaa
log mausam se dhokaa khaane lage
phir ek aadmii ko to.D kar mai.n ne suuraj banaayaa
logo.n kii pore.n ku.e.n me.n bhar dii.n
aur aasmaan ko dhaaga kiyaa
kaa.enaat ko na.ii karvaT nasiib hu.ii
logo.n ne ii.nTo.n ke makaan banaanaa chho.D diye
aa.nkho.n kii zabaan-daraazii rang laa.ii
ab ek qadam pe din aur ek qadam pe raat hotii
haal jur.at-e-guzishta hai
aa tere baalo.n se shu.aa.o.n ke ilzaam uThaa luu.n
tum apnii suurat pahaa.D kii khoh me.n ishaara kar aa.e
kund havaa.o.n kaa e'tiraaf hai
safar e.Dii pe kha.Daa hu.aa
samundar aur miTTii ne ronaa shuruu.a kar diyaa hai
belche aur baazuu ko do baazuu tasavvur karnaa
suuraj aasmaan ke kone ke saath laTkaa hu.aa thaa
aur apnii shu.aa.e.n apne jism ke gird lapeT rakhii thii.n
mai.n ne KHaalii kamre me.n mu.aafii rakhii
aur meraa siina duusro.n ke darvaaze par dha.Daktaa rahaa

Sara Shagufta
Nazm

shair-e-mashriq ki arz-dasht

par manzar-e-Guruub bahut dil-nashii.n hai kyuu.n
maGrib kii shaam apnii sahar se hasii.n hai kyuu.n
is kashmakash me.n daulat-e-uqbaa bhii chhin ga.ii
zauq-e-junuu.n se vus.at-e-sahraa bhii chhin ga.ii
sahraa-e-aarzuu me.n tag-o-dau nahii.n rahii
paa-e-talab se vaadii-e-siinaa bhii chhin ga.ii
tuu ne to qartaba me.n namaaze.n bhii kii.n adaa
apnii jabii.n se masjid-e-aqsaa bhii chhin ga.ii
kohsaar rau.nd Daale ga.e khet ho ga.e
chaTTaan ham zaruur the ab ret ho ga.e
manzil pe aa ke luT ga.e ham rahbaro.n ke saath
biimaar bhii pa.De hai.n to chaaragaro.n ke saath
Gurbat-kade me.n kaash utar aa.e kahkashaa.n
aa.nkhe.n falak kii samt hai.n bojhal saro.n ke saath
u.Dnaa muhaal lauT ke aanaa bhii hai vabaal
zaKHmii du.aa KHalaa me.n hai TuuTe paro.n ke saath
is razm-e-KHair-o-shar me.n hu.aa kaun suraKH-ruu
zarb-e-kaliim kund hai fir.aun surKH-ruu

Zaheer Siddiqui
Nazm

sawal

sa.Dko.n pe sannaaTaa hai aur
jin umro.n me.n
maa.e.n beTo.n ke cigarette se sulge kap.Do.n kii jebo.n me.n
ko.ii mahaktaa KHat dekhe.n to
ha.ns kar vaapas rakh detii thii.n
in umro.n me.n
ab maa.o.n ko
jismo.n me.n baaruud kii buu aur laasho.n me.n sikke ke chhed rulaa dete hai.n
dil par zaKHm uThaane vaalii umr me.n la.Dke
kamre kii diivaar ke ghaav
banduuqo.n kii tasviiro.n se Dhak dene par
aamaada kaise hote hai.n
fatvo.n kii dhaare.n zehno.n ko
aaKHir kaise kund kartii hai.n
jannat me.n jo kuchh bhii hogaa
is duniyaa ko kaun jahannum kar detaa hai
maa.o.n kii godo.n se uTh kar
maut kii god me.n sone vaalo
kuchh to bolo

Salman Haider
Nazm

wasl-e-shirin ke liye

duur takziib kaa farhaad huu.n merii KHaatir
haq kii aavaaz sadaaqat kii aur shiirii.n hai
meraa mansab hai husuul-e-shiirii.n
vasl-e-shiirii.n ke liye tesha uThaataa huu.n mai.n
tesha-e-azm-o-yaqii.n jo abhii kund nahii.n
siina-e-sa.ng abhii KHushk nahii.n
har rag sang me.n ik juu.e ravaa.n pinhaa.n hai
mai.n ki farhaad huu.n rag rag me.n mirii
sho.ala-e-qatra-e-KHuu.n jaulaa.n hai
merii gardan pe hai sarbaar amaanat kii tarah
mere hii teshe se kaT saktaa hai lekin ye kabhii
jhuk to saktaa hii nahii.n
juT ga.e haath uThe aur bane ek kamaa.n
TuuT saktii nahii.n haatho.n kii kamaa.n
chhuuT saktaa nahii.n tesha meraa
is kii har zarb-e-javaa.n se jab tak
reza reza nahii.n ho
zulm-o-takziib kaa ye koh-e-giraa.n

Zaheer Siddiqui
Nazm

apne aap se

mai.n ne logo.n se bhalaa kyaa siikhaa
yahii alfaaz me.n jhuuTii sachchii
baat se baat milaanaa dil kii
be-yaqiinii ko chhupaanaa sar ko
har Gabii kund-zehn shaKHs kii KHidmat me.n jhukaanaa ha.nsnaa
muskuraate hu.e kahnaa saahab
zindagii karne kaa fan aap se behtar to yahaa.n ko.ii nahii.n jaantaa hai

Zahid Dar
Nazm

aashna wirson ke nam KHat

ga.e zamaane ke raaste par
pahaa.D suuraj zamiin dariyaa
nuquush-e-paa naam-e-zaat
chehra
mai.n apne chehre se munharif huu.n
ga.e zamaane ke raaste par
sazaa kii rut ke taviil din kaa KHatiir virsa miraa badan hai miraa lahuu hai
mai.n apne virse se dast-kash huu.n
ye aashnaa sub.h kaa sitaaraa ki jis kii aagaahiyo.n kaa naasuur mere siine me.n jal rahaa hai
mai.n us sitaare kii samt ruu-dar-qazaa kha.Daa huu.n
mai.n apne baatin kii oT me.n huu.n
ye KHisht saa.at ki jis kii baalii.n se jism aadhaa nikal ke mujh ko bulaa rahaa hai
use ye kahnaa lahuu kaa hathiyaar kund niklaa muraaja.at kii du.aa na maa.nge
use ye kahnaa ki teraa beTaa najaat kii aarzuu me.n us manzil-e-du.aa se guzar gayaa hai
jahaa.n tire ashk be-jazaa the
jahaa.n tirii qabr be-nishaa.n hai
use ye kahnaa sazaa kii rut ke taviil din me.n muraaja.at kii du.aa na maa.nge

Akhtar Husain Jafri
Nazm

ek nazm likhna mushkil hai

ise vahii jaantaa hai
jis ne ek bachcha janaa ho
yaa use janm dene se
pahle bahaa diyaa ho
dono.n dukh ek hii hai.n
jaise tumhe.n
garm garm jalte hu.e lohe se
daaGaa jaa rahaa ho
yaa tumhaare jism ko
guudaa jaa rahaa ho
ek sire se duusre sire tak
andhere aur sannaaTe me.n
darvaaza ho na ko.ii shigaaf
ki aavaaz baahar jaa sake
bas jaise
ek kund chhurii jo tumhaare hii haatho.n
tumhaarii gardan kaaT rahii ho
aur is lazzat-aamez KHud-aziyyatii me.n
tum KHud ko halkaan hote hu.e
dekh rahe ho
lamha-ba-lamha
ek vajuud ko
duusre se baahar dhakelnaa
baahar aaluudgiyo.n ke Dher par
dhiire dhiire
ko.ii naam dene ke liye

Azra Abbas
Nazm

ek nazm

mai.n ajnabii huu.n jis ke sar pe dhuup kaa ka.Daa siraa
giraa huu.n raah bhuul kar
ga.e zamaane ke muhiib kunD me.n

Nazeer Ahmad Naji
Nazm

KHud ruswa

mere dil me.n ugtii pyaar kii fasl ko
jab logo.n kii nafrat ke fuzle kii khaad milii
to siTe chamak kar sonaa ho ga.e
phir vahii fasl kaaTne kaa vaqt aayaa to mere KHuluus kii daraa.ntii kund ho ga.ii
aur dil shikam ke aa.nsuu.o.n se bhar aayaa

Tabassum Zia
Nazm

ek nazm

aa.nkhe.n andhe ku.e.n kii maanind duur a.ndhere rasto.n par paanii ko khurach rahe.n hai.n
gahrii dhu.nd kii chaadar o.Dhe kaun abhaagan
phuuT phuuT ke ro bhii na paa.ii
sabr kii roTii chup kaa saalan sab zaa.iqo.n se ka.Dvaa zahr gale ke andar
kund chhurii kii maanind aTke
kyaa bole saare lafz apne lahuu kii gardish se be-parvaah
lab par utre.n
mu.aafii ke chhilko.n ko utaaruu.ngii ruuhe.n kuchh na kahe.ngii
denaa sab kuchh is ko
vaapas kuchh bhii na lenaa
haath tumhaare sadaa hii bhar rahe.nge jazbo.n ke
phuulo.n se
mat kuchh kahnaa varna saaraa malba tumhaare uupar aan giregaa
kachchii diivaaro.n ke naate tasviiro.n ke ra.ngo.n se bhii kachche
haatho.n vaar zabaano.n par guzrii baato.n ke saare sukh ik ik kar ke miTte jaate hai.n
man kii saarii shaktii biich samundar Duub ga.ii hai
havaa me.n aa.nsuu gas ke gole chhuuTe.n to sab ronaa ek hii vaqt me.n role.n
tyaag kaa lambaa rasta baa nahii.n phailaa.e apnii or bulaataa hai
aage jaa.o sab kuchh suno
aa.o is aavaaz ke raste par chalte jaa.e.n
diivaar duur se duur

Shaista Habeeb
Nazm

khichDi

zamaana tez dhaar hai
jo chal gayaa so paar hai
usii se ko.ii siikh le
aur apnaa kund tiikh le
nahii.n to kaT
vo ishq kyaa hai dostaa
jo Gam nahii.n parostaa
ye zaa.iqa to chakh zaraa
zabaa.n pe is ko rakh zaraa
maza to le
badan pe jo libaas hai
dhunii hu.ii kapaas hai
to ye fanaa me.n hai baqaa
ki is kaa naam hai qazaa

Neelam Malik
Nazm

us basti ke rahne wale

ai jannat kii bholii chi.Diyo gaa.o na yahaa.n kii Daalo.n par
yaa.n qaid zabaa.n par hai sab kii pahra hai sab ke KHayaalo.n par
qaanuun kii bandish aa.ed hai viiro.n ke jangii aalo.n par
talvaare.n kund javaano.n kii muddat se zang hai bhaalo.n par

Salam Sandelvi
Nazm

ek shauhar ka taaruf

vo sitam-iijaad hai vo baanii-e-be-daad hai
hasrato.n kaa KHuun kartaa hai ba.Daa jallaad hai
be-muravvat naavak-afgan kaa ko.ii kyaa de nishaan
naam us be-dard kaa mash.huur ab sayyaad hai
daam be-daana kaa phailaataa hai aise jaa'l se
taa.ir-e-dil aa ke KHud pha.nstaa hai vo sayyaad hai
zab.h kar Daalaa kisii ko niim-bismil kar diyaa
ko.ii tanhaa hai qafas me.n band KHud aazaad hai
kund ho kitnii chhurii ruk ruk ke gardan par chale
hukm hai lekin na sun.ne paa.e.n ham fariyaad hai
barg-e-gul ko rau.nd Daalaa jab KHiraam-e-naaz se
bulbule.n chillaa uThii.n fariyaad hai fariyaad hai
zulm be-andaaz kartaa hai na.e andaaz se
phir maza ye hai asiiro.n ko usii kii yaad hai
chaal us kii ko.ii shaatir tak samajh saktaa nahii.n
kahte hai.n sab apne fan kaa ek hii ustaad hai
dil me.n kuchh isyaa.n kaa khaTkaa hai na KHauf-e-baaGbaa.n
aur turra hai ki hathkando.n pe apne shaad hai
hukmraa.n fazl-e-KHudaa se ik vasii.a gulshan kaa hai
rahmat-e-baarii hai naazil har tarah aabaad hai
naGma-sanjii hotii hai aksar to is hasrat ke saath
vo mubaarak hai.n ki jin par mehrbaa.n sayyaad hai
ham-safiiro.n se hayaa maane hai arz-e-haal se
sab kahe.nge qaid me.n kitnii zabaa.n aazaad hai
ko.ii kyo.n ham-jins ke zulm-o-tashaddud par ku.Dhe
varna ruudaad-e-qafas ham ko sire se yaad hai
ek dil aur mushkile.n itnii ki mushkil hai bayaa.n
yaa-alii aasaan kyuu.nkar ho.n dam-e-imdaad hai
qaid-e-Gam se murG-e-dil ko kiijiye jaldii rihaa
be-tarah ab 'miim' kaa muztar dil-e-naashaad hai

Manjhoo Begam Lucknowi
Nazm

aazad-hind fauj

ai jaish-e-sarfarosh-javaanaan-e-KHush-nihaad
siine pe tere kund hu.ii teG-e-ishtidaad

Tilok Chand Mahroom
Nazm

ye kaisi ghaDi hai

ye kund aur yaKH be-numuu nii.nd jis me.n
shab-e-irtiqaa aur sub.h-e-hariiraa kaa taaza amal raa.egaa.n ho rahaa hai
shikasta kinaaro.n ke andar machaltii hu.ii soKHta-jaan lahro.n kaa raqs-e-ziyaa.n ho rahaa hai
charaaG-e-taharruk kaf-e-sust par be-nishaa.n ho rahaa hai
mire dahr kaa taaq-e-tahziib jis par
muqaddas sahiifa nahii.n ik riyaa-kaar mash.al dharii hai
har ik shiisha-e-paak-baaz-o-safaa kii samaavii rago.n me.n
kisii aks-e-faajir kii miTTii bharii hai
munazzah daraKHto.n ke paak aur shiirii.n phalo.n me.n
ko.ii nok-e-teG-e-najaasat ga.Dii hai
KHudaayaa tire nek bando.n par uftaad kaisii pa.Dii hai
ye kaisii gha.Dii hai

Rafiq Sandelvi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now