Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "kushaada-ravii"

Nazm MATCHES FOR "kushaada-ravii"

Nazm

tawazun

barso.n baiTh ke soche.n phir bhii
haath ke aage pa.Daa nivaala
aap halq ke paar na jaa.e
ye adnaa naaKHun tak shaayad ba.Dhte ba.Dhte
jaal bichhaa.e.n
gyaan nagar behad dilkash hai
lekin us ke raste me.n jo KHaar pa.De hai.n
kaun haTaa.e
sadiyo.n kii socho.n kaa muraqqa.a
TuuTe hu.e us but ko dekho
hare-bhare KHud-rav sabze ne gher rakhaa hai
farq kushaada se chi.Diyo.n kii yaad-dahaanii
chaah-e-zaqan pe kaa.ii jamii hai
ho saktaa hai shaayad us ko gyaan milaa ho
ho saktaa hai

Abrarul Hasan
Nazm

zamin apne beTon ko pahchanti hai

zamiin ek muddat se
haft-aasmaa.n kii taraf sar uThaa.e hu.e
ro rahii hai
zamiin apne aa.nsuu
bahut apnii hii kokh me.n bo rahii hai
zamii.n dil-kushaada hai kitnii
falak ke utaare hu.e bojh bhii Dho rahii hai
fazaa par bahut dhund chhaa.ii hu.ii hai
javaa.n gul-badan shaahazaade
zamii.n ke dulaare
uja.Dtii hu.ii bazm ke chaa.nd taare
kaTii gardano.n goliyo.n se chhide jism kii
rut sajaa.e lahuu me.n nahaa.e
zamii.n kii taraf aa rahe hai.n
zamii.n ek muddat se
is kaar-o-baar-e-sitam me.n ghirii hai
zamiin ro rahii hai
magar us ke aa.nsuu kii tahriir
raushan hai itnii
ki aa.inda mausam isii zinda tahriir se
jagmagaate rahe.nge
agar is ke shahzaade
yuu.nhii lahuu me.n nahaate rahe.nge
to ik roz taariiKH
un ke liye hashr barpaa karegii

Ain Tabish
Nazm

tariq ki dua

(undulus ke maidaan-e-ja.ng me.n)
ye Gaazii ye tere pur-asraar bande
jinhe.n tuu ne baKHshaa hai zauq-e-KHudaa.ii
do-niim un kii Thokar se sahraa o dariyaa
simaT kar pahaa.D un kii haibat se raa.ii
do-aalam se kartii hai begaana dil ko
ajab chiiz hai lazzat-e-aashnaa.ii
shahaadat hai matluub-o-maqsuud-e-momin
na maal-e-Ganiimat na kishvar-kushaa.ii
KHayaabaa.n me.n hai muntazir laala kab se
qabaa chaahiye us ko KHuun-e-arab se
kiyaa tuu ne sahraa-nashiino.n ko yaktaa
KHabar me.n nazar me.n azaan-e-sahar me.n
talab jis kii sadiyo.n se thii zindagii ko
vo soz us ne paayaa unhii.n ke jigar me.n
kushaad-e-dar-e-dil samajhte hai.n us ko
halaakat nahii.n maut un kii nazar me.n
dil-e-mard-e-momin me.n phir zinda kar de
vo bijlii ki thii naara-e-laa-tazar me.n
azaa.em ko siino.n me.n bedaar kar de
nigaah-e-musalmaa.n ko talvaar kar de

Allama Iqbal
Nazm

shartiya laDka

kaise kaise vahm palte hai.n bashar ke zehn me.n bhii
chand jur.e sher kaa KHuu.n-nosh karnaa raat ko maithan se pahle
yaa kushaada chaa.ndnii me.n kaif-e-andoz-e-visaal-e-shauq honaa
vaj.h-e-aulaad-e-nariina
aur phir buqraat ne bhii ye kahaa thaa
mard apne daa.e.n KHusiye par jo rassii baa.ndh le milne se pahle
us kii aurat shartya la.Dkaa janegii
lekin is andaaz kii harza-saraa.ii
kab kisii ke kaam aa.ii
kaise kaise vahm palte hai.n bashar ke zehn me.n bhii

Krishna Mohan
Nazm

sailani ruh

mai.n thiraktii huu.n saarangiyo.n kii na.ii jaavedaanii dhuno.n par
mire baablaa
terii dhartii tiraa ye mohalla kushaada rahe
tere sayyaar kii saarii galiyo.n me.n raunaq rahe
tere khaliyaan me.n sabz KHushbuu rahe
tere ashjaar par nau-shagufta gulo.n kii baje baa.nsurii
tuu parindo.n kii chahkaar se giit buntaa rahe
baarisho.n ke tarannum jo mansuuKH ho.n to
tire dasht zarro.n se dariyaa bane.n
mai.n to sad-guftanii husn ko dekh kar hii thiraktii rahii
terii bainassutuurii dhuno.n par
zamii.n aasmaa.n ke jo maabain hai.n
jo KHalaa.o.n ke uqde zamiinii bashar kholte hai.n
usii fahm kii phailtii vaadiyaa.n dekh kar

Irfan Shahood
Nazm

tasawwur

gulaabii lab, muskuraate aariz, jabii.n kushaada, buland qaamat
nigaah me.n bijliyo.n kii jhil-mil, adaa.o.n me.n shabnamii lataafat
dha.Daktaa siina, mahaktii saa.nse.n, navaa me.n ras, a.nkh.Diyo.n me.n amrit
hama halaavat, hama malaahat, hama tarannum, hama nazaakat
lachak lachak gungunaa rahii ho
ye KHvaab kaisaa dikhaa rahii ho

Kaifi Azmi
Nazm

anghraata

mai.n bhe.Do.n ko duuh luu.n
ka.ii maa.o.n kii chhaatiyaa.n
chhipkilii kii tarah
suukhe siine kii chhat se
ik arse se laTkii hu.ii hai.n
unhe.n jaa ke moh luu.n
ka.ii faaKHtaa.e.n
jo niklii thii.n kah kar
ki aa.e.ngii vaapas
chamaktii dopahro.n se pahle
vo marg-aasaa andhe KHalaa.o.n me.n
bhaTkii hu.ii hai.n
gad.he vaalaa
be-vazan ruu.ii ko laade hu.e
shahr se lauT aayaa hai
halkii thii ruu.ii
bahut bhaarii din thaa
talaa-doz taajir ne motii bhii
laane kaa us se kahaa thaa
jo ra.ngii.n uruusaana jo.De me.n ja.Dne hai.n
naadaa.n
dulhan ko bhii ma.aluum hai
tez baarish to honii hai
ole to pa.Dne hai.n
naazuk sii Tahnii pe jhuulaa hai
jhuule kii rassii hai naazuk
so rassii me.n bal aaKHir-kaar pa.De hai.n
a.ndhraataa ba.Dhne lagaa hai
machhere ko dariyaa se vaapas bhii aanaa hai
tannuur me.n giilii shaaKHe.n jalaanii hai.n
tannuur kii tarah
KHvaabo.n-bharii jal rahii hai
use bhii kushaada bhare baazu.o.n me.n to aanaa hai!!

Iqtidar Javed
Nazm

shahr ke ek kushada ghar mein

shahr ke ek kushaada ghar me.n
apne apne kaam sambhaale
mai.n aur ek mirii tanhaa.ii
ham dono.n mil kar rahte hai.n
baate.n karte rote ha.nste
har dukh-sukh sahte rahte hai.n

Zehra Nigaah
Nazm

sar-e-rah-guzar

ik mauhuum saa kaashaana nazar aataa hai
ek maGmuum saa Gam-KHaana nazar aataa hai
apnii manzil hii mujhe khii.nch rahii hai shaayad
ham-safar par mujhe begaana nazar aataa hai
dekh ai josh-e-junuu.n baadiya-paimaa.ii ko
naqsh-e-paa bhii mujhe diivaana nazar aataa hai
daastaa.n phailii hu.ii hai mirii sahraa.o.n me.n
ham-zabaan aaj ye viiraana nazar aataa hai
KHaak u.Daatii hu.ii phirtii hai havaa-e-sarsar
muntashir meraa hii afsaana nazar aataa hai
apnii mahruumii-e-qismat kaa gila hai varna
sham.a ke gird bhii parvaana nazar aataa hai

Razia Rana
Nazm

wo sarab jo meri jaan mein hai

ai Gazaal-e-shab
tirii pyaas kaise bujhaa.uu.n mai.n
ki dikhaa.uu.n mai.n vo saraab jo mirii jaa.n me.n hai
vo saraab saahir-e-KHauf hai
jo sahar se shaam ke rah-guzar
me.n fareb-e-rah-rav-e-saada hai
vo saraab-zaada saraab-gar ki hazaar suurat-e-nau-ba-nau
me.n qadam qadam pe sitaada hai
vo jo Gaalib-o-hama-giir dasht-e-gumaa.n me.n hai
mire dil me.n jaise yaqiin ban ke samaa gayaa
mire hast-o-buud pe chhaa gayaa

Noon Meem Rashid
Nazm

mujhe sharmindagi mahsus nahin hoti

jo sadiyaa.n bichha.D chukii hai.n
mai.n un me.n zinda rahtii huu.n
aur mujhe ko.ii sharmindagii mahsuus nahii.n hotii
sa.Dko.n par taa.nge kii Taapo.n kii sadaa ab bhii suntii huu.n
jaise mahv-e-safar huu.n
aur havaa mere kaano.n me.n kuchh raaz kahtii hai
phir kisii gaa.Dii ke horn kii sadaa par
chau.nk jaatii huu.n
mai.n ja.ngalo.n ko taaraaj kar ke sa.Dke.n bante dekhtii huu.n
aur be-jaan badan liye
ja.ngalo.n ke nishaan Dhuu.nDhtii chalii jaatii huu.n
ye raato.n-raat concrete se bante hu.e dev-haikal pul
sa.Dko.n ko kushaada karne kii KHvaahish me.n
ta.ng hotaa hu.aa arsa-e-hayaat
taraqqii kii aa.D me.n
ruuh ko ghaayal karne vaale saude
qatra qatra zindagii piine vaale
bebasii se duhaa.ii dete hu.e anginat log
jin kii chhoTii chhoTii KHushiyo.n ko rau.ndte hu.e
ba.De ba.De bulldozer
aur ab to gutter kii tarah
uble pa.De traffic ke is ta.affun-zada hujuum me.n
kahii.n paTrii kii saa.nse.n bhii ukha.D rahii hai.n
rail-gaa.Dii kaa engine jaane kahaa.n rah gayaa hai
chup-chaap bichh.Dii sadiyo.n me.n panaah lete hu.e
mujhe sharmindagii mahsuus nahii.n hotii

Aliya Mirza
Nazm

pyara watan

kahte hai.n jis ko bhaarat-maataa miraa vatan hai
mai.n kyaa bataa.uu.n kaisaa achchhaa miraa vatan hai
saaraa jahaa.n dulhan hai gahnaa miraa vatan hai
goyaa bahisht kaa ik Tuk.Daa miraa vatan hai
mai.n huu.n vatan kaa pyaaraa pyaaraa miraa vatan hai
hindostaa.n ke baaGo.n kii dil-kushaa fazaa.e.n
raahat-bhare nazaare KHushbuu bharii havaa.e.n
KHush-rang panchhiyo.n kii man-mohnii sadaa.e.n
saavan kii kaalii kaalii vo jhuumtii ghaTaa.e.n
mai.n huu.n vatan kaa pyaaraa pyaaraa miraa vatan hai
gangaa kii paak lahro.n kaa KHushnumaa nazaara
jamunaa kaa vo kinaara vo dil-rubaa nazaara
jis se ho ruuh taaza vo byaas kaa nazaara
raavii me.n kashtiyo.n kaa vo ghuumtaa nazaara
mai.n huu.n vatan kaa pyaaraa pyaaraa miraa vatan hai
apne vatan kaa zarra-zarra hame.n hai pyaaraa
dil kaa hai ye sahaaraa aur aa.nkh kaa hai taaraa
duniyaa se hai niraalaa bhaarat kaa har nazaaraa
ba.Dh kar bahisht se hai hindostaan hamaaraa
mai.n huu.n vatan kaa pyaaraa pyaaraa miraa vatan hai

Nishtar Jalandhari
Nazm

tum hanste kyun ho

kyaa ab raat aise hii
guzar jaa.egii
ye raat hii to hai
jo tahliil ho jaatii hai ek nuqte me.n
aur ghuumtii hai
mere gird kaale bhinbhinaate hu.e
bha.nvre kii tarah
vo mere kaano.n mirii aa.nkho.n
merii gardan aur mere ro.e.n ro.e.n me.n
bhinbhinaatii hai
merii baGlo.n ke baalo.n se ulajhtii hu.ii
mere jism ke kone khudro.n me.n
gudgudaatii hu.ii
ye raat mere uupar phail jaatii hai
achaanak
o.Dh letii hai mujhe
mere jism kii por por me.n
ek jal-tara.ng chhe.D detii hai
mai.n nii.nd me.n uThtii huu.n
miraa halq KHushk ho rahaa hai
paanii kaa ek gilaas ThanDaa yaKH
mere ho.nTo.n mere halq mere siine
ko tar kartaa hu.aa
mere jism kii jal-tara.ng me.n mil jaataa hai
mai.n darvaaze par dastak detii huu.n
tum sun rahe ho
raat kii jal-tara.ng mere jism se
phuuT rahii hai
darvaaza khultaa hai
mai.n tumhaare aadhe na.nge badan ko
daboch letii huu.n
tumhaarii naaf ke ga.Dhe me.n
naak kii nok ghuse.Dtii huu.n
tum muskuraa rahe ho
raat kii sharaarat mere jism par
phaile hu.e dekh kar
tum ha.nste
raat kono.n khudro.n me.n phail rahii hai
mai.n tumhaare kap.De utaar detii huu.n
aur vo khel kheltii huu.n
jo raat mere saath khel rahii thii
mai.n tumhaare jism ke gird
apnii zabaan apne daa.nto.n aur naaKHuno.n ke saath
bhinbhinaane lagtii huu.n
tum muskuraa rahe ho
tumhaarii muskuraahaT
mere jism kii poro.n ko aur khol rahii hai
mai.n zaKHmii kar detii huu.n tumhe.n
tum ha.ns rahe ho
raat ke paro.n pe savaar bha.nvre kii tarah
mujhe bhinbhinaate dekh kar
tumhaarii kushaada aa.nkho.n ke kone
phailne lagte hai.n
tumhaaraa jism aka.D jaataa hai
nahii.n aaj tum
tum khilkhilaate ho
mai.n tumhaare ak.De hu.e jism par
apnii khulii hu.ii poro.n ko rakh detii huu.n
tumhaaraa jism raat ke jhaag se bhar jaataa hai
tum ha.nste ho
ha.nste hii rahte ho

Azra Abbas
Nazm

dilli

dillii ki is jahaa.n me.n aziim-o-qadiim hai
ilm-o-fan-o-hunar kii sadaa se na.iim hai

Gulzar Dehlvi
Nazm

bachpane ki yaad

ai bachpane kii duniyaa to yaad aa rahii hai
dil se mirii sadaa-e-fariyaad aa rahii hai
raahat sunaa rahii thii afsaana saltanat kaa
thii maa.n kii god mujh ko kaashaana saltanat kaa
vo ghar ki duur jis se thii gardish-e-zamaana
aazaadiyo.n kaa merii aabaad aashiyaana
phirtii hai ab nazar me.n tasviir us makaa.n kii
arsh-e-barii.n se behtar thii sarzamii.n jahaa.n kii
naazuk-mizaaj ban kar vo ruuThnaa machalnaa
sehn-e-makaa.n me.n din bhar vo kuudnaa-uchhalnaa
allaah-re vo taKHayyul allaah-re saaz-o-saamaa.n
duniyaa kii saltanat thii is zindagii pe qurbaa.n
us ahd-e-aafyat me.n ik baar phir sulaa de
ai mere ahd-e-maazii phir ik jhalak dikhaa de
baaG-e-jahaa.n me.n rakkhaa un shaadiyo.n ne mujh ko
raahat kii loriyaa.n dii.n aazaadiyo.n ne mujh ko
be-fikr zindagii thii KHud hosh mujh ko kab thaa
ik kaif-e-be-KHudii thaa mast-e-mai-e-tarab thaa
ai umr-e-rafta tuu ne kii mujh se be-valfaaii
aa jaa palaT ke dam bhar mai.n huu.n tiraa fidaa.ii
dil me.n sharaarte.n thii.n kaise Gazab kii pinhaa.n
rag rag me.n bijliyaa.n thii.n josh-e-tarab kii pinhaa.n
huu.n apnii zindagii kaa andaaza karne vaalaa
jannat se laa ke tuu ne dozaKH me.n mujh ko Daalaa

Mirza Mohammad Hadi Aziz Lakhnavi
Nazm

subh ki aamad ke sath

qariib-e-sub.h sadaa-e-shikast-e-jaa.n ubhrii
labo.n kaa zahr achaanak pighal gayaa aaKHir

Chandrabhan Khayal
Nazm

nisar main teri galiyon ke

nisaar mai.n tirii galiyo.n ke ai vatan ki jahaa.n
chalii hai rasm ki ko.ii na sar uThaa ke chale
jo ko.ii chaahne vaalaa tavaaf ko nikle
nazar churaa ke chale jism o jaa.n bachaa ke chale
hai ahl-e-dil ke liye ab ye nazm-e-bast-o-kushaad
ki sa.ng-o-KHisht muqayyad hai.n aur sag aazaad

Faiz Ahmad Faiz
Nazm

intizar hi intizar

ek chaa.ndnii raat thii
husn kii baaraat thii
thaa dhartii par bhii ek chaa.nd chamaktaa hu.aa
saamne us ke ek hasiin dilrubaa
KHuubsuurat naqsh-o-nigaar
aa.nkho.n me.n KHumaar hii KHumaar
palke.n jhuktii.n kabhii uThtii.n
lab-kushaa hote
phir KHamoshii
raat kii dilkashii sameT kar
is chaa.nd kii aaGosh me.n
zam honaa chaahtii thii vo
vo chaa.nd bhii us husn ke sahar me.n Duubaa hu.aa
dekhtaa rahaa dekhtaa rahaa
kaise dil se dil milaa.e
ki aaGosh me.n vo simaT jaa.e
dha.Dkane.n tez hotii ga.ii.n
qaraar ik duuje kaa khotii ga.ii.n
us chaa.nd ne parii-paikar kii jaanib
haath ba.Dhaa diye
apnii aaGosh ko vaa kiyaa aur kahaa
aa.o simaT jaa.o merii baa.nho.n me.n
binaa tumhaare mai.n rah nahii.n saktaa jii nahii.n saktaa
tum ki meraa jiivan ho
vo parii-paikar husn-e-mujassam aage ba.Dhii
us chaa.nd kii dha.Dkano.n me.n mil jaane ke liye
zindagii ke giit gaane ke liye muskuraane ke liye
achaanak Gaiz-o-Gazab kii aa.ii aavaaz
kahaa.n hai chaa.ndnii kahaa.n hai chaa.ndnii
vo husn-e-mujassam
ghar vaalo.n kii Gaiz-o-Gazab kii sun kar aavaaz
tharraa ga.ii kaa.np ga.ii KHauf se
barq-raftaar se sahn se hotii hu.ii
jaa kar apnii KHvaab-gaah me.n
maKHmalii.n bistar par daraaz ho ga.ii
phir raato.n pahro.n vo jaagtii rahii jaagtii rahii
nii.nd chain aaraam kho gayaa sab
rah gayaa to bas ek intizaar
intizaar hii intizaar

Firoza Yasmeen
Nazm

Nietzsche ne kaha

vo sab parinde jo u.D ke jaate hai.n faaslo.n me.n
kahii.n bahut duur faaslo.n me.n
so un ke baare me.n ye to sab jaante hai.n, aaKHir kahii.n ko.ii ek yaa
duusrii jagah aisii aa hii jaatii hai, vo jahaa.n thak ke baiTh jaa.e.n
vo ko.ii mastuul yaa ko.ii banjar chaTTaan hotii hai jis ko paa kar vo sochte hai.n
ki ye bhii kuchh kam nahii.n bahut hai,
magar bhalaa kaun is haqiiqat ko jaan kar ye gumaa.n karegaa ki un se aage
vahaa.n kushaada fazaa nahii.n, yaa vo ek aisaa maqaam hai, jis se aage
parvaaz kaa kisii tarah ko.ii imkaan hii nahii.n hai
hamaare saare aziim ustaad aur sab pesh-rau bhii aaKHir kahii.n pahu.nch kar
Thahar ga.e the

Rais Farogh
Nazm

hallucination

mai.n apne band kamre me.n pa.Daa huu.n
aur ik diivaar par nazre.n jamaa.e
manaazir ke ajuube dekhtaa huu.n
usii diivaar me.n ko.ii KHalaa hai
mujhe jo Gaar jaisaa lag rahaa hai
vahaa.n mak.Dii ne jaal bun liyaa hai
aur ab apne hii jaal me.n pha.nsii hai
vahii.n par ek murda chhipkilii hai
ka.ii sadiyo.n se jo saakit pa.Dii hai
ab us par kaa.ii jamtii jaa rahii hai
aur us me.n ek jangal dikh rahaa hai
daraKHto.n se parinde gir rahe hai.n
kulhaa.Dii shaaKH par laTkii hu.ii hai
laka.Dhaare pe giida.D ha.ns rahe
musalsal tez baarish ho rahii hai
kisii patte se gir kar ek qatra
achaanak ek samundar ban gayaa hai
samundar naav se la.Dne lagaa hai
machheraa machhliyo.n me.n ghir gayaa hai
aur ab patvaar siine se lagaa kar
vo niile aasmaa.n ko dekhtaa hai
jo yak-dam zard pa.Dtaa jaa rahaa hai
vo kaise ret bantaa jaa rahaa hai
mujhe ab sirf sahraa dikh rahaa hai
aur us me.n dhuum kii chaadar bichhii hai
magar vo ek jagah se phaT rahii hai
vahaa.n par ek saaya naachtaa hai
jahaa.n bhii pair dhartaa hai vahaa.n par
sunahre phuul khilte jaa rahe hai
ye sahraa baaG bantaa jaa rahaa hai
aur us me.n titliyaa.n dikhtii hai.n
paro.n me.n jin ke niilii raushnii hai
vo har pal tez hotii jaa rahii hai
so merii aa.nkh me.n chubhne lagii hai
so mai.n ne haath aa.nkho.n par rakhe hai.n
aur ab u.nglii haTaa kar dekhtaa huu.n
ki apne band kamre me.n pa.Daa huu.n
aur ik diivaar ke aage kha.Daa huu.n

Ammar Iqbal
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now