Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "motarif"

Nazm MATCHES FOR "motarif"

Nazm

ek laDka

KHudaa-e-izz-o-jal kii nemato.n kaa mo'tarif huu.n mai.n
mujhe iqraar hai us ne zamii.n ko aise phailaayaa
ki jaise bistar-e-kam-KHvaab ho diibaa-o-maKHmal ho
mujhe iqraar hai ye KHema-e-aflaak kaa saaya
usii kii baKHshishe.n hai.n us ne suuraj chaa.nd taaro.n ko
fazaa.o.n me.n sa.nvaaraa ik had-e-faasil muqarrar kii
chaTaane.n chiir kar dariyaa nikaale KHaak-e-asfal se
mirii taKHliiq kii mujh ko jahaa.n kii paasbaanii dii
samundar motiyo.n muu.ngo.n se kaane.n la.al-o-gauhar se
havaa.e.n mast-kun KHushbu.o.n se ma.amuur kar dii hai.n
vo haakim qaadir-e-mutlaq hai yaktaa aur daanaa hai
a.ndhere ko ujaale se judaa kartaa hai KHud ko mai.n
agar pahchaantaa huu.n us kii rahmat aur saKHaavat hai
usii ne khusravii dii hai la.iimo.n ko mujhe nakbat
usii ne yaava-goyo.n ko miraa KHaazin banaayaa hai
tava.ngar hirzah-kaaro.n ko kiyaa daryuuza-gar mujh ko
magar jab jab kisii ke saamne daaman pasaaraa hai
ye la.Dkaa puuchhtaa hai aKHtar-ul-iimaan tum hii ho

Akhtarul Iman
Nazm

amrita-piritam

shiddat-e-dard-o-alam se jab bhii ghabraataa huu.n mai.n
tere naGmo.n kii ghanii chhaa.nv me.n aa jaataa huu.n mai.n
zindagii kaa aa.ina ye hai tire fan kaa kamaal
hai udhar hadd-e-falak tak terii parvaaz-e-KHayaal
chal gayaa saare dilo.n par teraa sehr-e-saamrii
jaavedaa.n ai amritaa-piriitam hai terii shaa.irii
shiddat-e-ehsaas ho to KHud sa.nvar jaataa hai fan
raushnii hotii hai kul duniyaa me.n jab jaltaa hai man
sar-phire kuchh ahl-e-fan maare hu.e taqdiir ke
yuu.nhii be-samjhii me.n hai.n dushman tirii tahriir ke
dushmano.n ke vaar se Dartii na ghabraatii hai tuu
log patthar phe.nkte hai.n phuul barsaatii hai tuu
tere fan ke mo'tarif ho.nge vo vaqt aane ko hai
phuul tere fan kaa har gulshan ko mahkaane ko hai

Om Parkash Bajaj
Nazm

urdu zaban

logo kahii.n bhii is me.n pas-o-pesh kuchh nahii.n
ik mo'tarif jahaan hai urduu zabaan kaa

Shayar Ali Shayar
Nazm

kachhwa aur KHargosh

ek kachhve ke aa ga.ii jii me.n
kiijiye sair o gasht KHushkii kii
jaa rahaa thaa chalaa hu.aa KHaamosh
us se naahaq ulajh pa.Daa KHargosh
miyaa.n kachhve! tumhaarii chaal hai ye
yaa ko.ii shaamat aur vabaal hai ye
yuu.n qadam phuu.nk phuu.nk dharte ho
goyaa uttuu zamii.n pe dharte ho
kyuu.n hu.e chal ke muft me.n bad-naam
be-chale kyaa aTak rahaa thaa kaam
tum ko ye hausla na karnaa thaa
chulluu paanii me.n Duub marnaa thaa
ye tan-o-tosh aur ye raftaar
aisii raftaar par KHudaa kii maar
bolaa kachhvaa ki ho.n KHafaa na huzuur
mai.n to huu.n aap mo'tarif ba-qusuur
agar aahistagii hai jurm-o-gunaah
to mai.n KHud apne jurm kaa huu.n gavaah
mujh ko jo saKHt sust farmaayaa
aap ne sab durust farmaayaa
mujh ko Gaafil magar na jaaniyegaa
banda-parvar buraa na maaniyegaa
yuu.n zabaanii javaab to kyaa duu.n
shart bad kar chalo to dikhlaa duu.n
tum to ho aaftaab me.n zarra
par miTaa duu.ngaa aap kaa Gurra
sun ke KHargosh ne ye talKH javaab
kahaa kachhve se yuu.n zi-ruu-e-itaab
tuu kare merii ham-sarii kaa KHayaal
terii ye taab ye sakat ye majaal
chyuu.nTii ke jo par nikal aa.e
to yaqii.n hai ki ab ajal aa.e
are bebaak! bad-zabaa.n mu.nh-phaT
tuu ne dekhii kahaa.n hai dau.D jhapaT
jab mai.n tezii se jast kartaa huu.n
shahsavaaro.n ko past kartaa huu.n
gard ko merii baad-e-paa na lage
laakh dau.De miraa pata na lage
rail huu.n barq huu.n chhalaavaa huu.n
mai.n chhalaave kaa balki baavaa huu.n
terii merii nibhegii sohbat kyaa
aasmaa.n ko zamii.n se nisbat kyaa
jis ne bhugte ho.n turkii o taazii
aaise mariyal se kyaa bade baazii
baat ko ab ziyaada kyaa duu.n tuul
KHair kartaa huu.n terii shart qubuul
hai munaasib ki imtihaa.n ho jaa.e
taaki aib o hunar ayaa.n ho jaa.e
al-Garaz ik maqaam Thahraa kar
hu.e dono.n hariif garm-e-safar
bas-ki zoro.n pe thaa cha.Dhaa KHargosh
tezii phurtii se yuu.n ba.Dhaa KHargosh
jis tarah jaa.e top kaa golaa
yaa gire aasamaan se olaa
ek do khet chauk.Dii bhar ke
apnii chustii pe aafrii.n kar ke
kisii goshe me.n so gayaa jaa kar
fikr ''kyaa hai chale.nge sustaa kar''
aur kachhvaa Gariib aahista
chalaa siine ko KHaak par ghistaa
suu.ii ghanTe kii jaise chaltii hai
yaa ba-tadriij chhaa.nv Dhaltii hai
yuu.nhii chaltaa rahaa ba-istiqlaal
na kiyaa kuchh idhar udhar kaa KHayaal
kaam kartaa rahaa jo pai-dar-pai
kar gayaa rafta rafta manzil tai
haif KHargosh rah gayaa sotaa
samra Gaflat kaa aur kyaa hotaa
jab khulii aa.nkh to saveraa thaa
saKHt sharmindagii ne gheraa thaa
sabr o mohabbat me.n hai sar-afraazii
sust kachhve ne jiit lii baazii
nahii.n qissa ye dil-lagii ke liye
balki ibrat hai aadmii ke liye
hai suKHan is hijaab me.n ruu-posh
varna kachhvaa kahaa.n kahaa.n KHargosh

Ismail Merathi
Nazm

meinopause

ajab KHabar thii
jise miraa dil qubuul karne se munharif thaa
magar haqiiqat kaa mo'tarif thaa
ki shaaKH-e-jaa.n par gulaab khilne ke mausamo.n ko
vidaa.a kahne kii saa.ate.n ab qariib-tar hai.n

Ishrat Afreen
Nazm

uzr-e-gunah

jaan-e-man mujh se bajaa hai ye shikaayat terii
ki mire sher me.n maazii kaa vo andaaz nahii.n
jo mirii nazm ko ilhaam banaa detaa thaa
aaj kyo.n mere taKHayyul me.n vo e.ajaaz nahii.n
jis ne baKHshii thii mirii fikr-e-rasaa ko me.araaj
aaj kyo.n merii tabii.at me.n vo parvaaz nahii.n
ab kahaa.n ahd-e-javaanii ke vo afkaar-e-jamiil
aaj kyo.n apne tafakkur pe mujhe naaz nahii.n
dekh kar tuu mujhe KHaamosh isii soch me.n hai
vaqt-o-maahaul hai naa-saaz ki vo saaz nahii.n
ai mujhe 'haafiz'-o-'KHayyaam' banaane vaalii
mere shero.n me.n vo sar-mastii-e-shiiraaz nahii.n
jo tirii ruuh ko naGmo.n ko jagaa detii thii
ab mire bas me.n vo mausiiqii-e-aavaaz nahii.n
jo tujhe loriyaa.n de de ke sulaataa thaa kabhii
ab mire paas vo aahang-e-fusuu.n-saaz nahii.n
apnii aashuftagii-e-fikr-o-nazar kaa baa.is
aaj mai.n tere liye maaya-e-e.azaaz nahii.n
tuu magar vahm ke baa.is ye samajh baiThii hai
tuu bhii merii nigah-e-shauq me.n mumtaaz nahii.n
ai mirii nazm ko ilhaam bataane vaalii
ab taKHayyul kaa ye ilhaam fusuu.n-saaz nahii.n
hai ko.ii aur hii quvvat jo badaltii hai hame.n
inqilaab-e-falak-e-sho.abada-pardaaz nahii.n
kaash tuu merii KHamoshii kii sadaa sun saktii
naGma-KHvaanii ke liye haajat-e-aavaaz nahii.n
mai.n tujhe loriyaa.n de de ke sulaa.uu.n kyuu.n-kar
merii duniyaa me.n kahii.n KHvaab-gah-e-naaz nahii.n
vo bahaare.n vo umange.n vo tamanna vo shabaab
ahd-e-haazir kii fazaa un ke liye saaz nahii.n
mo'tarif huu.n mai.n ba-dastuur mohabbat kaa tirii
lekin ab apnii mohabbat pe mujhe naaz nahii.n
Dhuu.nDhtaa huu.n Gam-e-hastii kaa vo anjaam 'ra.iis'
aql kahtii hai ki jis kaa ko.ii aaGaaz nahii.n

Rais Amrohvi
Nazm

tujhe mujhse mohabbat hai

mire saathii mire dilbar
ye maanaa har gha.Dii tujh ko sataatii hai.n mirii yaade.n
mujhe hii Dhuu.nDhtii rahtii hai.n terii sharbatii aa.nkhe.n
mujhe ehsaas hai dilbar tirii chashm-e-tavajjoh kaa
mirii maanuus aahaT se
tirii so.ii hu.ii dha.Dkan achaanak jaag uThtii hai
ye maanaa sard raato.n kaa har ik lamha
mirii yaado.n me.n Dhaltaa hai
charaaG-e-jism jaltaa hai
ye maanaa har 'ibaadat me.n du'aa ko haath jab uTThe.n
gulaabii ho.nT tere bas miraa hii naam japte hai.n
tirii maa'suum chaahat kaa ba.Daa hii mo'tarif huu.n mai.n
magar dilbar mujhe lafzo.n kii haajat hai
ye dil iqraar maa.nge hai
puraane sard lahjo.n par na.ii jhankaar maa.nge hai
ko.ii harf-e-tamannaa ho
kabhii to 'ahd-o-paimaa.n ho.n
falak ke chaa.nd taare bhii hamaare raaz-daa.n Thahre.n
ko.ii mausam to aisaa ho ki lab aazaad ho jaa.e.n
kuchh aise lafz hii chun de
jo ik 'ahd-e-mohabbat kii na.ii buniyaad ho jaa.e.n
ko.ii tahriir aisii ho shanaasaa in havaa.o.n par
ki mausam bhii gavaahii de.n
tujhe mujh se mohabbat hai
mire saathii mire dilbar
mujhe lafzo.n kii haajat hai
tuu apne lab kii laalii se samay kii lauh par likh de
tujhe mujh se mohabbat hai

Sheeraz Sagar
Nazm

meinopause

ajab KHabar thii
jise miraa dil qubuul karne se munharif thaa
magar haqiiqat kaa mo'tarif thaa
ki shaaKH-e-jaa.n par gulaab khilne ke mausamo.n ko
vidaa.a kahne kii saa.ate.n ab qariib-tar hai.n
qariib-tar hai ki KHushk ho jaa.e.nge vo sote
ki jin kii tah me.n
hazaar taKHliiq ke KHazaane chhupe hu.e the
vo aab-e-haivaa.n
vo imbisaat-o-hayaat kaa be-kanaar dariyaa
ki dafn ho jaa.egaa KHas-o-KHaak roz-o-shab me.n
yahaa.n se umr-e-gurez-paa jo nikal pa.Dii aur raaste par
to sochtii huu.n ki jaate jaate
mai.n apne KHaaliq se ye to puuchhuu.n

Ishrat Afreen
Nazm

pasban-e-urdu

kahe.n na kyuu.n ai qavii tujhe ham ba-sidq-e-dil paasbaan-e-urdu
banaa hai terii hii sa.ii-o-kaavish se saifiya gulsitaan-e-urdu
nafas nafas me.n tire yaqiinan basii hai buu-e-zabaan-e-urdu
tirii navaa hai navaa-e-urdu tiraa bayaa.n hai bayaan-e-urdu
dikhaa.ii.n bhopal ko tire hii junuu.n ne jahd-o-amal kii raahe.n
vagarna maayuus ho chuke the yahaa.n ke chaara-garaan-e-urdu
vajuud teraa sabhii ke haq me.n hai chashma-o-aabshaar-o-dariyaa
bujhaate hai.n pyaas apnii apnii tujhii se sab tishnigaan-e-urdu
ise zamaana-shanaasii terii na ham kahe.nge to kyaa kahe.nge
banaa diyaa 'saifiya' ko tuu ne jo ek daarul-amaan-e-urdu
tujhii se shahr-e-Gazal ko iqbaaliyaat kii manzile.n milii hai.n
tire hii azm-o-amal se hai gaamzan yahaa.n kaarvaan-e-urdu
tiraa ujaalaa miTaa rahaa hai shab-e-jahaalat kii tiirgii ko
chamak rahaa hai tuu ban ke bhopal me.n mah-e-aasmaan-e-urdu
khilaa.e hai.n shaaKH shaaKH tuu ne yahaa.n pe nutq-o-navaa ke Gunche
Galat nahii.n hai jo kah rahe hai.n sabhii tujhe KHush-bayaan-e-urdu
tire azaa.em kii istaqaamat pe sar-ba-kaf hai.n hariif tere
KHushaa ki tere javaan haatho.n me.n aaj bhii hai kamaan-e-urdu
sad-aafrii.n terii himmato.n par sad-aafrii.n terii jur.ato.n par
sunaa.ii hai bazm-e-Gair me.n tuu ne baarhaa daastaan-e-urdu
ye kam nahii.n hai ki mo'tarif hai tirii basiirat kaa ye zamaana
rahaa hai sad.haa KHuluus-e-dil se tuu shaamil-e-aashiqaan-e-urdu
ravaa.n hai.n taqriir aur tahriir se tirii aagahii ke chashme
tiraa qalam hai vaqaar-e-urdu tirii zabaa.n tarjumaan-e-urdu
mujalla 'Gaalib' pe kar ke shaa.e kiyaa hai be-shak kamaal tuu ne
jahaan-e-ilm-o-adab ke haq me.n hai KHuub ye armuGaan-e-urdu
na.e na.e gul khilaa rahaa hai adab me.n tere qalam kaa jaaduu
tirii faraasat ke mo'tarif hai.n tamaam-tar nukta-daan-e-urdu
agarche raaho.n me.n terii haa.il hu.e hai.n diivaar ban ke aksar
magar tire azm-o-hausla se KHajil hai.n sab haasidaan-e-urdu
ye terii koshish hifaazato.n kii ye teraa jazba salaamtii kaa
na ho to urdu ko bech khaa.e.n zaraa me.n ye taajiraan-e-urdu
misaal-e-KHurshiid tuu ne baKHshii hai raushnii jin ko ilm-o-fan kii
chamak rahe hai.n adab ke garduu.n pe ban ke vo aKHtaraan-e-urdu
jo tere fan ke amiin ban kar fazaa-e-aalam pa chhaa ga.e hai.n
ba.Dii aqiidat se dekhte hai.n tujhe vo shaa.istagaan-e-urdu
ujaalaa karte rahe.nge yuu.nhii charaaG ban kar rah-e-talab me.n
har ik qadam par jo tuu ne chho.De hai.n jagmagaate nishaan-e-urdu
kahaa hai tuu ne bhii baarhaa KHud yahii.n palii hai yahii.n ba.Dhii hai
kisii zabaa.n kii hariif hargiz yahaa.n nahii.n hai zabaan-e-urdu
tire jihaad-o-amal ke sadqe yaqiin hai ai qavii ye ham ko
isii tarah tuu banaa rahegaa yahaa.n sadaa paasbaan-e-urdu

Rahbar Jaunpuri
Nazm

book fair

lafz-o-ma.anii kaa ik silsila
taa-ba-hadd-e-nazar
niile piile hare kaasnii arGavaanii libaado.n me.n malbuus auraaq
chaaro.n taraf
daavat-e-diid detii hu.ii daa.e.n baa.e.n kitaabe.n
ki ehsaas ko gudgudaatii hu.ii
lafz-dar-lafz e.ajaaz-e-nok-e-qalam
husn-e-tahriir jaaduu jagaataa hu.aa
husn-e-taKHliiq be-jaa.n me.n jaa.n Daaltaa
fikr kii saf.he saf.he me.n KHushbuu basii
KHuubsuurat KHayaalaat kii taazgii
husn-e-alfaaz-o-husn-e-ma.aanii ke sab mo'tarif

Nasr Ghazali
Nazm

muflison ka qaumi tarana

yahii mirii KHvaab-gaah-e-ishrat yahii hai meraa nigaar-KHaana
dhu.e.n kii rangiin badliyo.n me.n pakaa rahii hai jahaa.n vo khaanaa
yahii.n a.ndhero.n se mil ke ham chaa.ndnii ke chhakke chhu.Daa rahe hai.n
yahii.n hamaaraa sila muqarrar hu.aa hai adbaar-e-jaavedaana
yahii.n use giilii lak.Diyo.n ne KHushii ke aa.nsuu bahaate dekhaa
yahii.n use raakh kii taho.n ne banaa diyaa Gair shaa.iraana
yahii.n mirii saKHt-jaan Gairat ye baarhaa sun chukii hai ab tak
abe tirii muflisii ke charche sune the mai.n ne to Gaa.ebaana
yahii.n vo jaan-e-vafaa mirii aarzuu kii rangiiniyo.n kii KHaatir
chhi.Dak ke baalo.n me.n itr-e-andesha kartii rahtii hai in me.n shaana
agar nahuusat kii jaan hai vo to banda iimaan-e-muflisii hai
isii liye ek duusre se hame.n mohabbat hai vaalihaana
ilaahii terii inaayato.n kaa ye ek adnaa saa hai karishma
hamaare iflaas-e-be-karaa.n kaa jo aaj hai mo'tarif zamaana
vo us kaa jaa.De kii sard raato.n me.n mujh se ii.ndhan kii baat karnaa
ki jaise ye chiiz maavaraa.ii ho yaa alif-lailvii fasaana
taviil faaqo.n ke baa'd dono.n kaa piich pii kar vo jhuum uThnaa
vo us kii sharmiilii sii nigaahe.n vo mere jazbaat-e-aashiqaana
KHushii me.n saarii KHudaa.ii me.n half-day manaayaa gayaa thaa us din
vajuud me.n aa gayaa thaa jis din hamaarii ulfat kaa shaaKHsaana

Qazi Ghulam Mohammad
Nazm

sin-e-yas

'ajiib sii ittilaa' thii vo
jise mai.n KHud se na jaane kab se chhupaa rahii thii
'ajab KHabar thii ki jis kii baabat
mai.n KHud se sach bolte hu.e hichkichaa rahii thii
'ajiib dukh thaa ki jiskaa ehsaas jaagte hii
mai.n apne mahram se
apne hamdam se aise nazre.n churaa rahii thii
ki jaise mujh me.n kahii.n ko.ii jurm ho gayaa ho
'ajab KHabar thii
jise miraa dil qubuul karne se munharif thaa
magar haqiiqat kaa mo'tarif thaa
ki shaaKH-e-jaa.n par gulaab khilne ke mausamo.n ko
vidaa' kahne kii saa'ate.n ab qariib-tar hai.n
qariib-tar hai ki KHushk ho jaa.e.nge vo sote
ki jin kii tah me.n
hazaar taKHliiq ke KHazaane chhupe hu.e the
vo aab-e-haivaa.n
vo imbisaat-o-hayaat kaa be-kanaar dariyaa
ki dafn ho jaa.egaa KHas-o-KHaak-e-roz-o-shab me.n
yahaa.n se ‘umr-e-gurez-paa jo nikal pa.Dii aur raaste par
to sochtii huu.n ki jaate jaate
mai.n apne KHaaliq se ye to puuchhuu.n
KHudaa-e-sattaar
‘ismato.n ko hazaar pardo.n me.n rakhne vaale
sifaat me.n terii 'adl bhii hai

Ishrat Afreen
Nazm

bhaarat

zikr har ek aan bhaarat kaa
mo'tarif hai jahaan bhaarat kaa

Faisal Qadri Gunnauri
Nazm

sardar jafri ke nam

aa.ii hai kaisii KHabar ye naa-gahaa.n
duur tak mutlaq na thaa is kaa gumaa.n
ho gayaa KHaamosh vo ahl-e-zabaa.n
thaa jo gulzaar-e-adab kaa paasbaa.n
mo'tarif us ke hai.n sab ahl-e-suKHan
us ke dam se kaarvaa.n thaa gaam-zan

Bismil Aazmi
Nazm

adl-e-jahangiri

qasr-e-shaahii me.n ki mumkin nahii.n Gairo.n kaa guzar
ek din nuur-jahaa.n baam pe thii jalva-figan
ko.ii shaamat-zada rahgiir udhar aa niklaa
garche thii qasr me.n har chaar taraf se qadGan
Gairat-e-husn se begam ne tamancha maaraa
KHaak par Dher thaa ik kushta-e-be-gor-o-kafan
saath hii shah-e-jahaa.ngiir ko pahu.nchii jo KHabar
Gaiz se aa ga.ii abruu-e-adaalat pe shikan
hukm bhejaa ki kaniizaan-e-shabistaan-e-shahii
jaa ke puuchh aa.e.n ki sach yaa ki Galat hai ye suKHan
naKHvat-e-husn se begam ne ba-sad-naaz kahaa
merii jaanib se karo arz ba-aa.iin-e-hasan
haa.n mujhe vaaq.ea-e-qatl se inkaar nahii.n
mujh se naamuus-e-hayaa ne ye kahaa thaa ki bazan
us kii gustaaKH-nigaahii ne kiyaa us ko halaak
kishvar-e-husn me.n jaarii hai yahii shara-e-kuhan
mufti-e-dii.n se jahaa.ngiir ne fatvaa puuchhaa
ki sharii.at me.n kisii ko nahii.n kuchh jaa-e-suKHan
mufti-e-diin ne be-KHauf-o-KHatar saaf kahaa
shar.a kahtii hai ki qaatil kii u.Daa do gardan
log darbaar me.n is hukm se tharraa uTThe
par jahaa.ngiir ke abruu pe na bal thaa na shikan
tarkasho.n ko ye diyaa hukm ki andar jaa kar
pahle begam ko kare.n basta-e-zanjiir-o-rasan
phir usii tarah use khii.nch ke baahar laa.e.n
aur jallaad ko de.n hukm ki haa.n teG bazan
ye vahii nuur-jahaa.n hai ki haqiiqat me.n yahii
thii jahaa.ngiir ke parde me.n shahanshaah-e-zaman
us kii peshaani-e-naazuk pe jo pa.Dtii thii girah
jaa ke ban jaatii thii auraaq-e-hukuumat pe shikan
ab na vo nuur-jahaa.n hai na vo andaaz-e-Guruur
na vo Gamze hai.n na vo arbada-e-sabr-shikan
ab vahii paa.nv har ik gaam pe tharraate hai.n
jin kii raftaar se paamaal the murGaan-e-chaman
ek mujrim hai ki jis kaa ko.ii haamii na shafii
ek bekas hai ki jis kaa na ko.ii ghar na vatan
KHidmat-e-shaah me.n begam ne ye bhejaa paiGaam
KHuu.n-bahaa bhii to sharii.at me.n ik amr-e-ahsan
mufti-e-sharaa se phir shaah ne fatvaa puuchhaa
bole jaa.ez hai razaa-mand huu.n gar bachcha o zan
vaariso.n ko jo diye laakh diram begam ne
sab ne darbaar me.n kii arz ki ai shaah-e-zaman
ham ko maqtuul kaa lenaa nahii.n manzuur qisaas
qatl kaa hukm jo ruk jaa.e to hai mustahsan
ho chukaa jab ki shahanshaah ko puuraa ye yaqiin
ki nahii.n is me.n ko.ii shaa.eba-e-hiila-o-fan
uTh ke darbaar se aahista chalaa suu-e-haram
thii jahaa.n nuur-jahaa.n mo'takif-e-bait-e-KHazan
daf.atan paa.nv pe begam ke giraa aur ye kahaa
tuu agar kushta shudii aah che mii kardam man

Shibli Nomani
Nazm

salgirah

kaun gustaaKH hai kyaa naam hai kyuu.n aayaa hai
pahre vaalo use KHanjar kii anii se roko
apnii banduuqo.n kii naalii se Daraa.o us ko
aur us par jo na maane use topo.n kii salaamii de do
jashn kaa din hai mirii saalgirah kaa din hai
aaj mahlo.n me.n jale.nge mah-o-anjum ke charaaG
aaj bujhte hu.e chehro.n kii zaruurat kyaa hai
aaj maayuus nigaaho.n kii zaruurat kyaa hai
kaun bebaak hai ba.Dhtaa hii chalaa aataa hai
pahre vaalo use KHanjar kii anii se roko
aadmii hai ki miraa vahm hai aaseb hai ye
us ke chehre pe to zaKHmo.n ke nishaa.n tak bhii nahii.n
goliyaa.n us ke siyah siine se Takraa ke chalii aatii hai.n
us ke ho.nTo.n pe tabassum hai ki mu.nh khole hu.e
azhdahaa taKHt nigalne ko chalaa aataa hai
maut kis bhes me.n aa.ii hai mujhe lene ko
aaj kyuu.n aa.ii hai kyuu.n aa.ii hai kyuu.n aa.ii hai
mai.n tujhe gauhar-o-almaas diye detaa huu.n
tere ThiThure hu.e haatho.n ko haraarat duu.ngaa
jashn kaa din hai mirii saalgirah kaa din hai
kaun ho kaun ho tum
ai Gariibo.n ke KHudaavand amiiro.n ke rafiiq
mai.n samajhtaa thaa mujhe aap na pahchaane.nge
mai.n ne a.ngrez kii jailo.n me.n javaanii kaaTii
mai.n ne ThiThure hu.e haatho.n se jalaa.e hai.n diye
jin kii lau aaj bhii tuufaano.n se Takraatii hai
jin ko a.ngrez kii phuu.nko.n ne bujhaanaa chaahaa
aur KHud un kii zabaa.n jal ke siyah-faam hu.ii
vo diye aaj bhii bar-lauu.n kii chiiKHo.n se la.De jaate hai.n
aap ko yaad na hogaa shaayad
kaun ho kaun ho tum
mai.n ne taariiKH kii lahro.n me.n ravaanii de dii
mai.n ne buu.Dho.n kii rag-o-pai me.n javaanii de dii
mai.n ne jhukte hu.e shaano.n ko tavaanaa.ii dii
kaar-KHaane mirii aavaaz se bedaar hu.e
aur ik merii hii aavaaz nahii.n guu.njii thii
saik.Do.n vaqt se haare hu.e insaan uThe
kuhra-e-vaqt pe chhaane ke liye
kaun ho kaun ho tum
auraaq me.n hii nahii.n aayaa huu.n
saik.Do.n vaqt ke maare hu.e insaan bhii hai.n
saik.Do.n vaqt pe chhaa.e hu.e insaan bhii hai.n
kaun ho kaun ho tum
aaj bhii ketiyo.n me.n bhuuk ugaa kartii hai
kaar-KHaano.n me.n dhu.e.n ke baadal
tauq aur aahanii zanjiiro.n me.n Dhal jaate hai.n
kaun ho kaun ho tum
aap insaan kii azmat pe yaqii.n rakhte hai.n
aap ke hukm ne kitno.n kii zabaane.n sii dii.n
aap kii mumlikat adl me.n kitne biimaar
qaid-e-tanhaa.ii me.n dam to.D chuke
kaun ho kaun ho tum
aap kii be.Diyaa.n afraad ko paaband banaa saktii hai.n
aap kii be.Diyaa.n insaan ko paaband nahii.n kar saktii.n
kal yahii sham.a jo siine me.n farozaa.n hai aaj
aap ke saare tilismaat jalaa Daalegii
kal unhii.n kheto.n me.n uj.De hu.e khaliyaano.n me.n
saal-haa-saal kii paamaal zamii.n
apne siine ke KHazaano.n ko luTaatii hogii
kaar-KHaane bhii siyahkaar KHudaa.o.n se rihaa.ii paa kar
laakho.n insaano.n kii taskiin kaa saamaa.n ho.nge
ik na.e ahd na.ii ziist kaa unvaa.n ho.nge
aur phir vaqt kaa bebaak mo.arriKH aa kar
surKH parcham ko salaamii degaa
kaun ho kaun ho tum
bhaardvaaj

Akhtar Payami
Nazm

mohabbat

farishte aadam pe mo'tariz the
use farishta bhii kah na paa.nv

Saeed Warsi
Nazm

insan ki fariyaad

haa.n ai masaaf-e-hastii! mat puuchh mujh se kyaa huu.n
ik arsa-e-balaa huu.n ik luqma-e-fanaa huu.n
majbuuriyo.n ne Daalaa gardan me.n merii phandaa
KHud-karda-e-vafaa huu.n jaa.n-daada-e-razaa huu.n
sayyaad haadse kaa kartaa hai meraa piichhaa
murG-e-buriida-par huu.n said-e-shikasta-paa huu.n
hai zaat merii majma.a saarii buraa.iyo.n kaa
kahne ko mai.n ba.Daa huu.n lekin bahut buraa huu.n
aazaadiyo.n kii mujh par tohmat hii hai saraasar
mai.n qaidii-e-havas huu.n mai.n banda-e-havaa huu.n
ik baat ho bataa.uu.n ik dard ho sunaa.uu.n
ro.uu.n bhalaa kahaa.n tak kab tak pa.Daa karaahuu.n
kam-baKHt dil kuchh aisaa mai.n saath le ke aayaa
ik lamha jis ke haatho.n duniyaa me.n sukh na paayaa
jo josh is me.n uTThaa haalaat ne dabaayaa
jo sho.ala is me.n bha.Dkaa taqdiir ne bujhaayaa
ummiid kaa ye Guncha khilte kabhii na dekhaa
ye aarzuu kaa paudaa phaltaa nazar na aayaa
go is me.n maujzan thii qaum o vatan kii ulfat
lekin Garaz ne is ko kuchh aur hii sikhaayaa
hotii nahii.n rasaa.ii ummiid ke ufuq tak
tuul-e-amal ne is ko ik jaal me.n pha.nsaayaa
kii rahbarii KHirad ne har-chand rahnumaa.ii
is juhd par bhii lekin khultii nahii.n sachchaa.ii
paayaa na mai.n ne ab tak maqsad kaa apne saahil
kii bahr-e-ma.arfat me.n din raat aashnaa.ii
is justujuu me.n mai.n ne kii sair-e-tuur-o-aiman
parbat ko ghar banaayaa jangal se lau lagaa.ii
mandir ko jaa ke dekhaa girjaa me.n jaa ke Dhuu.nDaa
masjid ko chhaan maaraa us kii na diid paa.ii
jogii kaa ruup dhaaraa ban me.n kiyaa guzaaraa
tan par bhabhuut mal kar dhuunii bahut ramaa.ii
jap tap me.n umr apnii mai.n ne basar kii aksar
ban ban ke piir-e-raahib jaa KHaanqaah basaa.ii
suufii bhii ban ke dekhaa aur rind-e-be-riyaa bhii
kar naara-e-anaa-al-haq ik khalbalii machaa.ii
phirtii hai.n maarii maarii mushtaaq-e-jalva aa.nkhe.n
par ik jhalak se ba.Dh kar detaa nahii.n dikhaa.ii
uTh jaa nazar se merii haa.n ai hijaab-e-hastii
husn-e-azal nihaa.n hai zer-e-naqaab-e-hastii
ye zindagii-e-insaa.n ik KHvaab hai pareshaa.n
bedaarii-e-adam hai ta.abiir-e-KHvaab-e-hastii
dekhe.n agar to kyuu.n-kar ham jalva-e-ma.aarif
tuu zulmat-e-nazar hai ai aaftaab-e-hastii
taskii.n ko zahr-e-qaatil aab-o-havaa-e-aalam
raahat kaa dushman-e-jaa.n har inqalaab-e-hastii
ai tishna-e-haqiiqat dhoke me.n tuu na aanaa
ik daam-e-pur-KHatar hai mauj-e-saraab-e-hastii
chaahe agar rihaa.ii pesh-az-fanaa fanaa ho
paadaash-e-jurm-e-hastii hai ye azaab-e-hastii

Ghulam Bhik Nairang
Nazm

qila-e-akbarabad

har-chand ki be-kaar ye ta.amiir pa.Dii hai
qadr us kii mo.arriKH kii nigaaho.n me.n ba.Dii hai

Ismail Merathi
Nazm

jaane kya sach hai yahan

jaane kyaa sach hai yahaa.n
kahkashaa.o.n kaa ye jaaduu ki guzar-gaah-e-KHayaal
ko.ii taaraa
ki dariiche me.n chamaktaa hu.aa chaa.nd
yaa mire surKH papoTo.n pe rakhe KHvaab kii vahshat kaa Gubaar
yaa kisii jism ko chhuu lene kii KHvaahish me.n bhaTaktii hu.ii aa.nkh
yaa rag-o-pai me.n sulagtii hu.ii lazzat kaa KHumaar
ko.ii inkaar ki iqraar
jaane kyaa sach hai yahaa.n
shaam-e-afsos kaa Duubaa hu.aa suuraj yaa ko.ii sub.h-e-visaal
kahkashaa.o.n kaa ye jaaduu ki guzar-gaah-e-KHayaal
ko.ii paiGaam-e-mohabbat ye siyaasat yaa kisii halqa-e-zanjiir me.n jism
raah me.n jhukte hu.e sar yaa kisii shaah ke maGruur qadam
yaa kisii mauj me.n aa.e hu.e majzuub kaa rau.ndaa hu.aa taaj
la.Dkha.Daate hu.e pal.Do.n me.n ye insaaf kii bhiik
ye mo.arriKH kii lahuu chaaTtii miTTii kaa bayaa.n
jaane kyaa sach hai yahaa.n
apne hone kii haqiiqat yaa kisii qabr me.n gaa.De hu.e katbe kii daraa.D
ye KHudaa yaa kisii dargaah pe rakkhe hu.e aa.nsuu kii tapish
meraa iimaa.n ki sanam-KHaana-e-tanhaa.ii me.n
us but-e-kaafir kii kashish
apne marne kii tamanna hai ki jiine kii KHalish

Maqsood Wafa
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now