Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "musaavaat"

Nazm MATCHES FOR "musaavaat"

Nazm

lenin

ai anfus o aafaaq me.n paidaa tirii aayaat
haq ye hai ki hai zinda o paa.inda tirii zaat
mai.n kaise samajhtaa ki tuu hai yaa ki nahii.n hai
har dam mutaGayyar the KHirad ke nazriyaat
mahram nahii.n fitrat ke suruud-e-azlii se
biinaa-e-kavaakib ho ki daanaa-e-nabaataat
aaj aa.nkh ne dekhaa to vo 'aalam hu.aa saabit
mai.n jis ko samajhtaa thaa kaliisaa ke KHuraafaat
ham band-e-shab-o-roz me.n jak.De hu.e bande
tuu KHaaliq-e-aasaar-o-nigaaranda-e-aanaat
ik baat agar mujh ko ijaazat ho to puuchhuu.n
hal kar na sake jis ko hakiimo.n ke maqaalaat
jab tak mai.n jiyaa KHema-e-aflaak ke niiche
kaa.nTe kii tarah dil me.n khaTaktii rahii ye baat
guftaar ke usluub pe qaabuu nahii.n rahtaa
jab ruuh ke andar mutalaatum ho.n KHayaalaat
vo kaun saa aadam hai ki tuu jis kaa hai maa'buud
vo aadam-e-KHaakii ki jo hai zer-e-samaavaat
mashriq ke KHudaavand safedaan-e-ra.ngii
maGrib ke KHudaavand daraKHshanda filizzaat
europe me.n bahut raushni-e-ilm-o-hunar hai
haq ye hai ki be-chashma-e-haivaa.n hai ye zulmaat
raa.naa.i-e-taamiir me.n raunaq me.n safaa me.n
girjo.n se kahii.n ba.Dh ke hai.n banko.n kii imaaraat
zaahir me.n tijaarat hai haqiiqat me.n ju.aa hai
suud ek kaa laakho.n ke liye marg-e-mufaajaat
ye 'ilm ye hikmat ye tadabbur ye hukuumat
piite hai.n lahuu dete hai.n taaliim-e-musaavaat
bekaarii o 'uryaanii o mai-KHvaarii o iflaas
kyaa kam hai.n fara.ngii madniyat kii futuuhaat
vo qaum ki faizaan-e-samaavii se ho mahruum
had us ke kamaalaat kii hai barq o buKHaaraat
hai dil ke liye maut mashiino.n kii hukuumat
ehsaas-e-muravvat ko kuchal dete hai.n aalaat
aasaar to kuchh kuchh nazar aate hai.n ki aaKHir
tadbiir ko taqdiir ke shaatir ne kiyaa maat
mai-KHaana kii buniyaad me.n aayaa hai tazalzul
baiThe hai.n isii fikr me.n piiraan-e-KHaraabaat
chehro.n pe jo surKHii nazar aatii hai sar-e-shaam
yaa Gaaza hai yaa saaGar o miinaa kii karaamaat
tuu qaadir o 'aadil hai magar tere jahaa.n me.n
hai.n talKH bahut banda-e-mazduur ke auqaat
kab Duubegaa sarmaaya-parastii kaa safiina
duniyaa hai tirii muntazir-e-roz-e-mukaafaat

Allama Iqbal
Nazm

jawahar-lal nehru

jis ne zardaar-e-ma.iishat ko gavaaraa na kiyaa
jis ko aa.iin-e-musaavaat pe israar rahaa

Sahir Ludhianvi
Nazm

mere bhi hain kuchh KHwab

kuchh KHvaab hai.n jo gardish-e-aalaat se juuyanda-e-tamkiin
hai jin ke liye bandagii-e-qaazii-e-haajaat se is dahr kii taz.iin
kuchh jin ke liye Gam kii musaavaat se insaan kii taamiin
kuchh KHvaab ki jin kaa havas-e-jaur hai aa.iin
duniyaa hai na diin!

Noon Meem Rashid
Nazm

yaum-e-mai

sadaa aa rahii hai mare dil se paiham
ki hogaa har ik dushman-e-jaa.n kaa sar KHam
nahii.n hai nizaam-e-halaakat me.n kuchh dam
zaruurat hai insaan kii amn-e-aalam
fazaa.o.n me.n lahraa.egaa surKH parcham
sadaa aa rahii hai mire dil se paiham
na zillat ke saa.e me.n bachche pale.nge
na haath apne qismat ke haatho.n male.nge
musaavaat ke diip ghar ghar jale.nge
sab ahl-e-vatan sar uThaa ke chale.nge
na hogii kabhii zindagii vaqf-e-maatam
fazaa.o.n me.n lahraa.egaa surKH parcham

Habib Jalib
Nazm

saDak

sa.Dak masaafat kii ujlato.n me.n
ghire hu.e sab musaafiro.n ko
ba-Gaur fursat se dekhtii hai
kisii ke chehre pe surKH vahshat chamak rahii hai
kisii ke chehre se zard hairat chhalak rahii hai
kisii kii aa.nkhe.n harii-bharii hai.n
kabiir had se ubhar rahaa hai
saGiir qad se guzar rahaa hai
kisii kaa tyre kisii ke pahiye ko khaa rahaa hai
kisii kaa juutaa kisii kii chappal chabaa rahaa hai
kisii ke pairo.n me.n aa rahaa hai kisii kaa bachcha
kisii kaa bachcha kisii ke shaane pe jaa rahaa hai
ko.ii Thikaane pe ko.ii khaane pe jaa rahaa hai
habiib dast-e-raqiib thaame
Gariib-KHaane pe jaa rahaa hai
amiir pi.njra banaa rahaa hai
Gulaam kartab dikhaa rahaa hai
aur apne beTe ke saath chhat par
amiin kunDaa lagaa rahaa hai
nizaam Taa.nga chalaa rahaa hai
kisii kalaa.ii pe jagmagaatii hu.ii gha.Dii hai
magar abhii vo rukii hu.ii hai
kisii ke chehre pe baara bajne me.n paa.nch second rah ga.e hai.n
kisii kii haathii-numaa prado
sa.Dak se aise guzar rahii hai
sivaa.e is ke kahii.n bhii jaise ko.ii nahii.n ho
kisii kii mo.nchhe.n jhukii hu.ii hai.n
kisii kii baa.nchhe.n khilii hu.ii hai.n
kisii kii taxi kisii kii foksii milii hu.ii hai.n
kisii ke lab aur kisii kii aa.nkhe.n silii hu.ii hai.n
kisii ke kap.De phaTe hu.e hai.n
kisii kii pag.Dii chamak rahii hai
kisii kii ra.ngat kisii kii Topii u.Dii hu.ii hai
shariif nazre.n uThaa uThaa kar
kamaan jismo.n pe apnii vahshat ke tiir kab se chalaa rahaa hai
naziir nazre.n churaa rahaa hai
nafiis apne cluff kii shikno.n ko ro rahaa hai
hakiim apne matab ke shiisho.n ko dho rahaa hai
kisii kii aa.nkho.n ke dhu.ndle shiisho.n me.n us ke maazii kii jhalkiyaa.n hai.n
kisii kii aa.nkho.n me.n aane vaale hasiin lamho.n kii mastiyaa.n hai.n
kisii kii aa.nkho.n me.n rat-jago.n kii kuchh arGavaanii sii Doriyaa.n hai.n
kisii ke kaa.ndhe pe us ke KHvaabo.n kii boriyaa.n hai.n
kabaa.D-KHaane pe baasii Tuk.Do.n kii or kitaabo.n kii boriyaa.n hai.n
buzurg bargad ke niiche buu.Dhaa kha.Daa hu.aa hai
aur us ke haatho.n me.n tape lipTii hu.ii chha.Dii hai
police kii gaa.Dii pikiT lagaa kar
sa.Dak pe tirchhii kha.Dii hu.ii hai
aur ek mazduur apnaa daaman uThaa.e be-bas kha.Daa hu.aa hai
aur ik sipaahii ki us ke nefe me.n u.ngliyo.n ko ghumaa rahaa hai
vahii.n pe shaahid siyaah chashma lagaa ke KHud ko chhupaa rahaa hai
news channel kii chhoTii gaa.Dii ba.Dii KHabar kii talaash me.n hai
do sabzii vaale bhii apnii pherii lagaa rahe hai.n
to phuul vaale ke sar pe phuulo.n kii Tokarii hai
kisii kii aa.nkho.n me.n naukrii hai
kisii kii aa.nkho.n me.n chhokrii hai
vaqaar sar ko jhukaa rahaa hai
faraaz khaa.ii me.n jaa rahaa hai
to giilii cigarette ke kash lagaa kar
navaab rickshaw chalaa rahaa hai
saliim kannii ghumaa rahaa hai
vakiil vardii me.n jaa rahaa hai
zamiir baGle.n bajaa rahaa hai
aur ek vaa.iz bataa rahaa hai
KHudaa ko naaraaz karne vaale jahannamii hai.n
KHudaa ko raazii karo KHudaaraa
KHudaa ko raazii karo KHudaaraa
aur us ke aage nasiir akmal kamaal shaadaab Gulaam saare
nazar jhukaa.e kha.De hu.e hai.n
ki chashm-e-biinaa agar kahii.n hai
to samjho paataal tak ga.Dhii hai
kisii ko a-c KHariidnaa hai
kisii ko pii sii KHariidnaa hai
kisii kii bas aur kisii kii bii-sii nikal rahii hai
aqiila KHaala ke dono.n haatho.n me.n aaTh thaile laTak rahe hai.n
aur aate jaate sabhii musaafir
unhe.n musalsal khaTak rahe hai.n
ziyaa a.ndhere me.n jaa rahaa hai
gulaab kachraa jalaa rahaa hai
aziim makkhii a.Daa rahaa hai
kaliim guTkaa chabaa rahaa hai
to ghanTa-package pe jaane kab se
fahiim gappe.n la.Daa rahaa hai
sabaq musaavaat kaa sikhaane
vaziir gaa.Dii me.n jaa rahaa hai
sanaa nidaa ko na.e latiife sunaa rahii hai
hinaa hathelii ko takte takte puraane raste se aa rahii hai
aur apnii bhaavaj kaa haath thaame
zubaida check-up ko jaa rahii hai
vo apnii nazre.n kabhii idhar ko kabhii adhar ko gumaa rahii hai
magar ko.ii shai use musalsal bulaa rahii rahii hai
ajiib ujlat ajiib vahshat ajiib Gaflat kaa maajraa hai
kahuu.n mai.n kis se mire KHudaayaa ye kaisii KHilqat kaa maajraa hai
ki apnii mastii me.n mast ho kar
ye sab musaafir guzar rahe
na.e musaafir ubhar rahe hai.n
sa.Dak jahaa.n thii vahii.n kha.Dii hai
magar haqiiqat bahut ba.Dii hai
sa.Dak pe billii marii pa.Dii hai

Imran Shamshad Narmi
Nazm

election

saaqii sharaab de ki election hai aaj-kal
barse.nge vote jis me.n vo saavan hai aaj-kal
jamhuuriyat ke paa.nv me.n jhaa.njan hai aaj-kal
ye mulk us ke naach kaa aa.ngan hai aaj-kal
saudaa hai leaderii kaa jo dil ko sataa.e hai
''dil phir tavaaf-e-kuu-e-malaamat ko jaa.e hai''
lo ho gayaa hai uu.nT election kaa be-nakel
ab laTh chale.nge jalso.n me.n aabaad ho.nge jail
phir leadero.n kii hogii akhaa.Do.n me.n rel-pel
voto.n kii har dukaan pe hogii grand sale
voto.n se ba.Dh ke ab ko.ii hathiyaar bhii nahii.n
''la.Dte hai.n aur haath me.n talvaar bhii nahii.n''
zinda hai vo ki jis kaa register me.n naam hai
aur zindagii shariifo.n ke uupar haraam hai
hai.n jis ke paas vote madaar-ul-mahaam hai
lailaa-e-leaderii kii vo thaame lagaam hai
leader ke mu.nh pe shahar ke kuucho.n kii gard hai
''ishq-e-nabard-pesha talabgaar-e-mard hai''
vaqt aa gayaa zamiir kii bai-o-KHariid kaa
import ke licence ke va.ade-va.iid kaa
din hai biraadrii o qabaa.il kii iid kaa
aapas me.n gallabaano.n kii guft-o-shuniid kaa
muslim ko be-shak aisii musaavaat chaahiye
''aarif hamesha mast-e-mai-e-zaat chaahiye''
da.nggal kii kashtiyo.n me.n har ik chiiz hai ravaa
ya.anii milegii millat-e-aasii ko har davaa
naGme kaa daur, daur-e-mai-o-raqs kaa mazaa
jis ko zabaan kah na sake us se bhii sivaa
likkhaa hu.aa hai qismat-e-ummiid-vaar me.n
''u.Dtii phiregii KHaak tirii kuu-e-yaar me.n''
ahl-e-basiirat ab nahii.n dekhe.nge khoT ko
haasil kare.nge laakh tariiqo.n se vote ko
paanii hii kii tarah se bahaa.enge note ko
roke.ngi zar kii Dhaal pe dushman kii choT ko
voter ko baKHshaa jaa.egaa bhaarii mushaahra
phir jiit kii KHushii me.n kare.nge mushaa.era
aa.e.nge vote dene ko jab jaahilaan-e-qaum
un ko dikhaa.e jaa.e.nge pahle nishaan-e-qaum
gai.nDaa nishaan rakkhegaa ik pahlavaan-e-qaum
hai uu.nT ko.ii ko.ii yake-az-KHaraan-e-qaum
insaaniyat kii qaid se sab ho ga.e barii
un kaa mua.aalijaa ho to hogaa veterinary

Syed Mohammad Jafri
Nazm

wo harf-e-tanha

hame.n mu.arraa ke KHvaab de do
(ki sab ko baKHshe.n ba-qadr-e-zauq-e-nigah tabassum)
hame.n mu.arraa kii ruuh kaa iztiraab de do
(jahaa.n gunaaho.n ke hausle se mile taqaddus ke dukh kaa marham)
ki us kii be-nuur-o-taar aa.nhke.n
daruun-e-aadam kii tiira raato.n
ko chhedtii thii.n
usii jahaa.n me.n firaaq-e-jaa.n-kaah-e-harf-o-ma.anii
ko dekhtii thii.n
bahisht us ke liye vo ma.asuum saada-lauho.n kii aafiyat thaa
jahaa.n vo na.nge badan pe jaabir ke taaziyaano.n se bach ke
raah-e-faraar paa.e.n
vo kafsh-e-paa thaa ki jis se Gurbat kii reg-e-baryaa.n
se roz-e-fursat qaraar paa.e.n
ki sulb-e-aadam kii rahm-e-havvaa kii uzlato.n me.n
nihaayat-e-intizaar paa.e.n!
(bahisht sifr-e-aaziim lekin hame.n vo gum-gashta hindse hai.n
baGair jin ke ko.ii musaavaat kyaa banegii
visaal-e-ma.anii se harf kii baat kyaa banegii?)
ham is zamii.n par azal se piiraana-sar hai.n maanaa
magar abhii tak hai.n dil tavaanaa
aur apnii zuulida-kaariyo.n ke tufail daanaa
hame.n mu.arraa ke KHvaab de do
(bahisht me.n bhii nashaat yak-ra.ng ho to Gam hai
ho ek saa jaam-e-shahd sab ke liye to sam hai)
ki ham abhii tak hai.n is jahaa.n me.n vo harf-e-tanhaa
(bahisht rakh lo hame.n KHud apnaa javaab de do!)
jise tamannaa-e-vasl-e-m.anaa

Noon Meem Rashid
Nazm

tajdid-e-amal

uTh az-sar-e-nau dahr ke haalaat badal Daal
tadbiir se taqdiir ke din-raat badal Daal
phir dars-e-musaavaat kii haajat hai jahaa.n ko
aaqaa.ii-o-KHidmat ke KHitaabaat badal Daal
kaalaa ho ki goraa ho KHudaa ek hai sab kaa
qaumiyyat-e-bejaa kii rivaayaat badal Daal
chiinii ho ki hindii ho baraabar ke hai.n bhaa.ii
vataniyyat-e-mahduud ke vahmaat badal Daal
kul chhoTe-ba.De aadam-e-KHaakii ke hai.n farzand
har nasl se bezaar ho har zaat badal Daal
aKHlaaq me.n taaqat hai fuzuu.n teG-o-sinaa.n se
paikaar ke ye aahanii aalaat badal Daal
kyaa zulm hai insaan ho insaan kaa dushman
mardaan-e-havas-kaar kii aadaat badal Daal
mehnat se bhii mazduur ko roTii nahii.n miltii
is banda-e-majbuur ke auqaat badal Daal
aapas me.n ye har roz kii KHuu.n-reziyaa.n kab tak
KHud-saaKHta maz.hab kii rusuumaat badal Daal
hurriyat-e-kaamil kaa vo e.ajaaz dikhaa tuu
duniyaa-e-Gulaamii ke tilismaat badal Daal
KHilqat ko bulaa shirk se tauhiid kii jaanib
piiro.n kii faqiiro.n kii karaamaat badal Daal
ta.aliim pe mauquuf hai raanaa.i-e-afkaar
behuuda kitaabo.n kii KHuraafaat badal Daal
kar fikr-e-amal zikr-e-KHat-o-KHaal abas hai
ai 'faiz' zaraa apne KHayaalaat badal Daal

Faiz Ludhianvi
Nazm

shair-e-KHush-nawa

vahii kaar-e-duniyaa
vahii kaar-e-duniyaa ke apne jhamele
vahii dil kii haalat
vahii KHvaahisho.n aarzuu.o.n ke mele
vahii zindagii se bharii bhii.D me.n chalne vaale sabhii log
apnii jagah par akele
ka.ii gard-aaluud manzar nigaaho.n kii dahliiz par jam ga.e hai.n
mujhe yuu.n lagaa jaise chalte hu.e vaqt ke qaafile tham ga.e hai.n
zaraa sii.Dhiyo.n se udhar mai.n ne dekhaa
vahii shahr hai aur vahii shahr kii be-karaamat fazaa hai
vahii KHalq hai aur vahii KHalq ke bhuul jaane kii apnii adaa hai
vahii raaste hai.n vahii be-suhuulat safar kii sazaa hai
vahii saa.ns lene ko jiine ko be-mehr aab-o-havaa hai
vahii zindagii hai vahii us ke chaaro.n taraf be-tahaffuz ridaa hai
vahii sii.Dhiyo.n se udhar raahdaarii ke baa.e.n taraf KHaalii kamra
tirii guftuguu se bharaa KHaalii kamra
tire qahqaho.n ke samundar me.n Duubaa hu.aa aa.nsu.o.n kaa jaziira
jaziire me.n u.Dtaa hu.aa ik parinda
mu.nDero.n dariicho.n daraKHto.n kii tanhaa.iyo.n kaa mudaavaa parinda
tirii chaahato.n aur vafaa-daariyo.n ke ufuq par sitaara-numaa ik parinda
tire giit gaataa
tamannaa.o.n kii baarisho.n me.n nahaataa
kisii taaza imkaan ko jagmagaataa
kahii.n duur phailii hu.ii kahkashaa.o.n me.n gum ho gayaa hai
zaraa sii.Dhiyo.n se udhar mai.n ne dekhaa
ka.ii likhne vaale
KHushaamad kaa kaasa liye apne Giibat-kade me.n kha.De hai.n
siyaasii vaDere
musaavaat kaa naam le kar hamesha Gariib aadmii kii anaa se la.De hai.n
ka.ii ahl-e-daanish
jo mazluum kii aah-o-zaarii pe dikhte the
zaalim ke dar par pa.De hai.n
yahaa.n ko.ii chhoTaa nahii.n hai
sab ik duusre se ba.De hai.n
tirii shaa.irii kaa KHamiir apne jazbo.n kii sachchaa.iyo.n se uThaa thaa
tuu apne usuulo.n ke aatish-fishaa.n par kha.Daa
zindagii kii riyaa-kaariyo.n se nabard-aazmaa thaa
tuu apne ravayyo.n kii sab haalato.n me.n
mohabbat se likkhii hu.ii ik du.aa thaa
tuu ahl-e-vafaa kaa zamiir aashnaa thaa
abhii sii.Dhiyaa.n cha.Dhte cha.Dhte mai.n ruk saa gayaa huu.n
vahaa.n kaun hai
kaun hai ab jo dastak kii pahlii kiran kii hikaayat sunegaa
na.e ratjago.n kii masaafat me.n uljhe hu.e aane vaale dino.n kii
rivaayat sunegaa
charaaGo.n kii aavaaz me.n
aa.ino.n kii tilaavat sunegaa
mire shaa.ir-e-KHush-navaa
tuu ki dushman bhii achchhaa thaa
aur dostii me.n bhii teraa yahaa.n ko.ii saanii nahii.n hai
jise ahl-e-dil bhuul jaa.e.nge
tuu vo kahaanii nahii.n hai

Saleem Kausar
Nazm

la bhi hai ek guman

ek hai bas yahaa.n ''aalamgiir''
aur maqtal me.n akelaa 'sarmad'
ruKH-e-taariiKH badalne ko hai
us ke ash.aar hii se taKHt laraz jaataa hai
aaise advaar ka.ii baar zamii.n par guzre
kaise talvaar ne maftuuh qalam karne ko
haath kaaTe hai.n zabaa.n kaaTii hai sar kaaTe hai.n
ham ne dekhaa hai khulii aa.nkho.n se
aaj kii kaun kare ab ta.aziim
kal kii takziib nahii.n ho saktii
raakh se ghar to nahii.n ban sakte
koh me.n dar to nahii.n ban sakte
KHvaab fariyaad nahii.n kar sakte
KHvaab dekhaa hai khulii aa.nkho.n se
chaa.nd ko KHuu.n me.n nahaate ham ne
sar khule dasht ko maatam karte
aur mahallaat ko kha.nDaro.n me.n badalte dekhaa
kizb ko adl kaa har faisla karte dekhaa
taKHt ko vaqt kaa fir.aun bhii bante dekhaa
zer-e-shamshiir ye 'sarmad' ne kahaa ha.nste hu.e
''masnad-e-adl-o-musaavaat yahaa.n kuchh bhii nahii.n
''laa'' bhii hai ek gumaa.n
aur gumaa.n kuchh bhii nahii.n''

Faheem Shanas Kazmi
Nazm

naya sal

sahar ne masarrat kaa naGma sunaayaa
fazaa ne gulistaa.n kaa daaman sajaayaa
havaa.o.n ne aKHlaaq kaa giit gaaea
nigaaho.n se maazii kaa parda uThaayaa
nayaa saal aaya nayaa saal aaya

Laiq Siddiqi
Nazm

blind followers

ko.ii bhii zulm kare us pe e'tiraaz karo
ki e'tiraaz baGaavat nahii.n hifaazat hai
ki e'tiraaz gavaahii hai zinda hone kii
ki e'tiraaz musaavaat kii 'alaamat hai

Balmohan panday
Nazm

hikmat ka but-KHana

sharaab-e-shor se labrez hai duniyaa kaa paimaana
hariif-e-diin-o-daanish hai mazaaq-e-piir-e-mai-KHaana
bashar ibliis ko tazviir-e-nau kaa dars detaa hai
muzayyan hai gunaah-e-guunaaguu.n se har parii-KHaana
uluum-e-nau se raushan bazm hai tahziib-e-haazir kii
yad-e-tajdiid ne Dhaalaa hai dil-aavez but-KHaana
ye maanaa maGribii ta.aliim ne parvaaz baKHshii hai
ye maah-o-KHur bhii ban jaa.e.nge ab qindiil kaa shaana
KHudaa ke chaahne vaale abhii tak bhole-bhaale hai.n
banaa rakhaa hai harz-e-jaa.n sadaa maazii kaa afsaana
gunaah-e-taaza kii taKHliiq se ibliis qaasir hai
dimaaG-e-fitna-juu par hai musallat zo.f-e-piiraana
bahut majbuur be-chaara hai KHud piiraana-saalii se
use ma.aluum kyaa hai ma.asiyat kaa taaza paimaana
KHudaa vaale ta.ajjub hai ki ma.asuum-o-muqaddas hai.n
azaab-e-nau-ba-nau se hai murassaa aa.ina-KHaana
rah-e-tashkiik par raKHsh-e-hunar paiham KHiraamaa.n hai
bahut mushkil hai fitrat kaa abhii tasKHiir farmaanaa
musaavaat-e-nazar kaa muddato.n se shor suntaa huu.n
fazaa duniyaa kii hai lekin abhii tak firqaa-vaaraana
havas kaa dars to yaaro bahut hii KHuub hai lekin
abhii qur.aan kii tafhiim se aajiz hai farzaana
buto.n kaa to.Dnaa thaa kaar-e-aasaa.n ahd-e-maazii me.n
vale mushkil hai Dhaanaa aaj kii hikmat kaa but-KHaana
quluub-e-asr-e-haazir me.n abhii iimaan Dhal jaa.e
faqiiro.n kaa nahii.n dekhaa hai ejaaz-e-kaliimaana
tafaaKHur ke mariizo.n ke liye iksiir hotii hai
saraasar banda-e-'bebaak' kii tarz-e-faqiiraana

Bebak Bhojpuri
Nazm

mazhabi peshwa

KHudaa aur us ke insaaf se Darne vaale
KHataa-posh kamzor dil
vajuud aur naa-vajuud kaa
munaazra karne vaale
shikaariyo.n se behtar hai.n
ki un ke paas
KHauf-zada hone ke liye
ko.ii KHudaa
maujuud nahii.n hotaa
vo maz.hab kii musaavaat
tohfo.n se zarb de kar
maslahato.n me.n taqsiim karte hai.n
aur farz kiye ga.e KHudaa ko
bhuuk kaa kulliya lagaa kar
sikke ke baraabar le aate hai.n

Bushra Saeed
Nazm

26 january

aaj chhabbiis hai
january kii magar
dil me.n tasviir
maazii kii mub.ham sii hai
aaj ke vaaste
apne aslaaf ne
kitnii qurbaaniyaa.n
dii thii.n magar
jin ko ham ne
faraamosh saa kar diyaa
un ke KHvaabo.n ko
mismaar saa kar diyaa hai
ab zaruurat hai
is baat kii
KHvaab bikhre jo hai.n
un kii yak-jaa.ii ho
ik na.e hind kii
phir se ta.amiir ho
musaavaat sab kaa muqaddar bane
sab se insaaf ho
sub.h kaa ujaalaa numuudaar ho

Moin Fayyazi
Nazm

sochiye

hai.n abhii ahd-e-Gulaamii kii vo farsuuda rusuum
had-e-tahziib-o-tamaddun se har ek out hai
dekhiye jashn-e-masarrat kaa niraalaa andaaz
ghar munavvar hai.n dimaaGo.n me.n black out hai

Ustad Rampuri
Nazm

jashn-e-azadi

jashn-e-aazaadii-e-jamhuur manaa.e.n logo
goshe goshe me.n musaavaat kaa charchaa kar de.n
ko.ii bhuukaa na rahe ko.ii bhii nangaa na rahe
aaj har fard kii in.aam se jholii bhar de.n
apne kirdaar ko is tarah nikhaare.n ham log
dushman-e-jaa.n bhii nigaahe.n na uThaane paa.e
amn ke phuul se raaho.n ko sajaa de.n itnaa
zaKHm kaa.nTo.n kaa ko.ii paa.nv na khaane paa.e
buGz-o-nafrat kaa a.ndheraa na rahe dhartii par
ham mohabbat ke charaaGo.n se charaaGaa.n kar de.n
adl-o-insaaf kii kirno.n ko farozaa.n kar ke
haq-parastii ko zamaane pe numaayaa.n kar de.n
ham agar apne masaa.il kaa ko.ii hal Dhuu.nDe.n
kitne uljhe hu.e zehno.n ko sukuu.n mil jaa.e
azm-o-himmat se agar kaam le zehn-e-jamhuur
dahr ke sho.ala-mizaajo.n kaa jahaa.n hil jaa.e

Masooda Hayat
Nazm

bas ye bala-e-ishq

yaa to KHudaa hasiino.n ko kuchh KHatt-o-KHaal de
varna unhe.n KHudaa.ii se baahar nikaal de
yaa-rab mujhe na jaah hukuumat na maal de
bas ye balaa-e-ishq mire sar se Taal de
piipe me.n Dhaal de ki suraahii me.n Dhaal de
saaqii sharaab piine kii hasrat nikaal de
samjhaa.e kaun hazrat-e-naaseh ko raaz-e-ishq
kis tarah un ke dil me.n ko.ii dil ko Daal de
jamhuur-e-ishq hai to musaavaat chaahiye
us ko majaal de to hame.n bhii majaal de
saaqii ye daam dene me.n gar radd-o-kad kare.n
ba.Dh kar janaab-e-shaiKH kii pag.Dii uchhaal de
soz-e-firaaq de to chukaa ab jhalak dikhaa
ye kyaa kahaa raqiib se mai.n dostii karuu.n
ye saa.np aastiin me.n merii bhii paal de
aise to ban sakoge na tum markaz-e-nigaah
allaah saath husn ke kuchh chaal-Dhaal de
be-izn us galii me.n jo pahu.nchaa vo piT gayaa
allaah kuchh raqiib ko fikr-e-ma.aal de
mujh ko tumhaare ishq ne kundan banaa diyaa
aisaa na ho ki ab ye khaTaa.ii me.n Daal de
iz.haar-e-ishq us se mai.n kartaa nahii.n 'zariif'
Dar hai chapat lagaa ke na ghar se nikaal de

Zareef Jabalpuri
Nazm

mahatma gandhi

maqaam-e-azmat-e-insaa.n ko tuu ne faash kiyaa
jumuud-basta Gulaamii ko paash-paash kiyaa
hayaat-e-sub.h-e-mohabbat ke nuur me.n gum hai
ajiib chiiz tiraa dil-kushaa tabassum hai
ye jabr-o-qahr ke bande ye shor-o-shar ke Gulaam
na paa sake.nge tirii zindagii kii ramz-e-davaam
diyaa hai sulh-o-musaavaat kaa sabaq tuu ne
ataa kiyaa hai junuu.n ko nayaa ufuq tuu ne
fanaa-kade ko banaayaa hai jannat-e-gul-posh
ravaa.n-davaa.n hai.n jahaa.n niil-o-gang dosh-ba-dosh
ye mo.ajiza hai tire zauq-e-taaza-kaarii kaa
ki sar-niguu.n hai far-o-faal shahryaarii kaa
nahii.n hai tere sivaa ko.ii raazdaan-e-vatan
tujhii se faa.ez-e-manzil hai kaarvaan-e-vatan
vafaa ke raag mohabbat kii aag le ke gayaa
tuu apne saath vatan kaa suhaag le ke gayaa
sitam se ruuh-e-sadaaqat kabhii na haaregii
nigaah-e-ishq tujhe taa-abad pukaaregii

Afsar Seemabi Ahmad Nagari
Nazm

jahil faisla

mai.n haar gayaa
tum jiit ga.e
kitnii saada sii musaavaat hai
bas yahii tai karne ko
ham sadiyo.n jhag.De
badalte vaqt ke saath chalne kii KHaatir
apne hii banaa.e
farsuuda qaanuun
ham se aa.De na ga.e
haazir sach ko
sach maan.ne me.n
kitne sach
Galat Thaharte hai.n
aur pahle ye maan lete
mil baiThte
tai karte
jo aaj hu.aa
guzre kal me.n hotaa
KHair ab aa.o
baahar munjamid hujuum ko
taariiKHii faisla sunaa.e.n
ye achchhe log
sadiyo.n se so.e nahii.n
surKHiyaa.n badalne ke intizaar me.n
jii mar rahe hai.n
logo
suno
ham me.n faisla ho gayaa hai
aaKHir-e-kaar
is sach ko
sach maanaa gayaa hai
taaliyaa.n piiTte piiTte
thak jaa.o
to gharo.n ko lauTo
din ke ujaale me.n
miiThaa baa.nTo
ki KHatra Tal gayaa hai
sadiyo.n se
jo KHatre me.n thaa
ab KHatre se baahar hai
faisla ho gayaa hai
ki taraazuu pal.Do.n me.n
ham
ham-palla
ham-vazn
jaahil hai.n

Eruj Mubarak
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now