Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "nikaalo"

Nazm MATCHES FOR "nikaalo"

Nazm

kya dhoka dene aaogi

sab maal nikaalo, le aa.o
ai bastii vaalo le aa.o
ye tan kaa jhuuTaa jaaduu bhii
ye man kii jhuuTii KHushbuu bhii
ye taal banaate aa.nsuu bhii
ye jaal bichhaate gesuu bhii
ye larzish Dolte siine kii
par sach nahii.n bolte siine kii
ye ho.nT bhii, ham se kyaa chorii
kyaa sach-much jhuuTe hai.n gorii?
in ramzo.n me.n in ghaato.n me.n
in va.ado.n me.n in baato.n me.n
kuchh khoT haqiiqat kaa to nahii.n?
kuchh mail sadaaqat kaa to nahii.n?
ye saare dhoke le aa.o
ye pyaare dhoke le aa.o
kyuu.n rakkho KHud se duur hame.n
jo daam kaho manzuur hame.n

Ibn۔e۔Insha
Nazm

hubb-e-watan

ahl-e-daulat kaa sun chuke tum haal
ab suno ruu.edaad-e-ahl-e-kamaal
faazilo.n ko hai faazilo.n se inaad
pandito.n me.n pa.De hu.e hai.n fasaad
hai tabiibo.n me.n nok-jhok sadaa
ek se ek kaa hai thuuk judaa
rahne do ahl-e-ilm hai.n is tarah
pahalvaano.n me.n laag ho jis tarah
iiduu vaalo.n kaa hai agar paTThaa
sheKHuu vaalo.n me.n jaa nahii.n saktaa
shaa.iro.n me.n bhii hai yahii takraar
KHushnaveso.n ko hai yahii aazaar
laakh neko.n kaa kyuu.n na ho ik nek
dekh saktaa nahii.n hai ek ko ek
is pe turra ye hai ki ahl-e-hunar
duur samjhe hu.e hai.n apnaa ghar
milii ik gaa.nTh jis ko haldii kii
us ne samjhaa ki mai.n huu.n pansaarii
nusKHa ik tib kaa jis ko aataa hai
sage-bhaa.ii se vo chhupaataa hai
jis ko aataa hai phuu.nknaa kushta
hai hamaarii taraf se vo guu.ngaa
jis ko hai kuchh ramal me.n maaluumaat
vo nahii.n kartaa siidhe mu.nh se baat
baap bhaa.ii ho yaa ki ho beTaa
bhed paataa nahii.n munajjam kaa
kaam ka.ndle kaa jis ko hai ma.aluum
hai zamaane me.n us kii buKHl kii dhuum
al-Garaz jis ke paas hai kuchh chiiz
jaan se bhii sivaa hai us ko aziiz
qaum par un kaa kuchh nahii.n ehsaa.n
un kaa honaa na honaa hai yaksaa.n
sab kamaalaat aur hunar un ke
qabr me.n un ke saath jaa.e.nge
qaum kyaa kah ke un ko ro.egii
naam par kyuu.n ki jaan kho.egii
tarbiyat-yaafta hai.n jo yaa.n ke
KHvaah b-a ho.n is me.n yaa m.a
bharte hubb-e-vatan kaa go dam hai.n
par muhibb-e-vatan bahut kam hai.n
qaum ko un se jo umiide.n thii.n
ab jo dekhaa to sab Galat niklii.n
history un kii aur geography
saat parde me.n mu.nh diye hai pa.Dii
band us qufl me.n hai ilm un kaa
jis kii kunjii kaa kuchh nahii.n hai pataa
lete hai.n apne dil hii dil me.n maze
goyaa guu.nge kaa gu.D hai.n khaa.e hu.e
karte phirte hai.n sair-e-gul tanhaa
ko.ii paas un ke jaa nahii.n saktaa
ahl-e-insaaf sharm kii jaa hai
gar nahii.n buKHl ye to phir kyaa hai
tum ne dekhaa hai jo vo sab ko dikhaa.o
tum ne chakhaa hai jo vo sab ko chakhaa.o
ye jo daulat tumhaare paas hai aaj
ham-vatan is ke hai.n bahut mohtaaj
mu.nh ko ek ik tumhaare hai taktaa
ki nikaltaa hai mu.nh se aap ke kyaa
aap shaa.ista hai.n to apne liye
kuchh suluuk apnii qaum se bhii kiye
mez kursii agar lagaate hai.n aap
qaum se puuchhiye to pun hai na paap
mu.nDaa juutaa gar aap ko hai pasand
qaum ko is se faa.eda na gazand
qaum par karte ho agar ehsaa.n
to dikhaa.o kuchh apnaa josh-e-nihaa.n
kuchh dino.n aish me.n KHalal Daalo
peT me.n jo hai sab ugal Daalo
ilm ko kar do kuu-ba-kuu arzaa.n
hind ko kar dikhaa.o englistaa.n

Altaf Hussain Hali
Nazm

billu ka basta

chhoTii sii billuu
chhoTaa saa basta
Thuu.nsaa hai jis me.n
kaaGaz kaa dasta
lak.Dii kaa gho.Daa
ru.ii kaa bhaaluu
chuuran kii shiishii
aaluu kachaaluu
billuu kaa basta
jin kii piTaarii
jab is ko dekho
pahle se bhaarii
laTTuu bhii is me.n
rassii bhii is me.n
Da.nDaa bhii is me.n
gillii bhii is me.n
ai pyaarii billuu
ye to bataa.o
kyaa kaam karne
school jaa.o
urdu na jaano
english na jaano
kahtii ho KHud ko
bilqiis baano
umr kii itnii
kachchii nahii.n ho
chhe saal kii ho
bachchii nahii.n ho
baahar nikaalo
lak.Dii kaa gho.Daa
ye laTTuu rassii
ye gillii Da.nDaa
gu.Diyaa ke juute
jampar juraabe.n
baste me.n rakkho
apnii kitaabe.n
mu.nh na banaa.o
school jaa.o
ai pyaarii billuu
ai pyaarii billuu

Ibn۔e۔Insha
Nazm

naya janm

abhii ik saal guzraa hai yahii mausam yahii din the
magar mai.n apne kamre me.n bahut afsurda baiThaa thaa
na ko.ii saa.nvle mahbuub kii yaado.n kaa afsaana
na aivaan-e-zamistaa.n kii taraf jaane kii kuchh KHvaahish
kisii ne haal puuchhaa to bahut hii be-niyaazii se
kahaa jii haa.n KHudaa kaa shukr hai mai.n KHairiyat se huu.n
ko.ii ye puuchhtaa kyuu.n aaj kal ko.ii Gazal likkhii
na jaane baat kyaa hai in dino.n kuchh aisaa lagtaa hai
tumhaarii har Gazal me.n miir kaa andaaz miltaa hai
har ik misre se jaise dhiimii dhiimii aa.nch uThtii hai
tumhaare sher pa.Dh kar jaane kyuu.n mahsuus hotaa hai
ki ko.ii saaz par maddham suro.n me.n gungunaataa hai
magar ik baat puuchhuu.n tum KHafaa to ho na jaa.oge
ye aaKHir kyaa sabab hai aaj kal nazme.n nahii.n likhte
tumhaarii aap-biitii bhii abhii tak naa-mukammal hai
ise to naaqidaan-e-fan ne sunte hii saraahaa hai
mai.n sab suntaa magar ye dil hii dil me.n sochtaa rahtaa
mire ahbaab kyaa jaane.n ki mujh par kyaa guzartii hai
mire afkaar pe ye kaisii viiraanii sii chhaa.ii hai
bahut kuchh sochtaa huu.n phir bhii ab sochaa nahii.n jaataa
bahut kuchh chaahtaa huu.n phir bhii ko.ii bas nahii.n chaltaa
magar is bebasii me.n bhii mire dil kii ye haalat thii
kabhii jab ko.ii achchhii chiiz pa.Dhne ke liye miltii
to pahro.n ruuh par ik vajd kii sii kaifiyat hotii
rago.n me.n merii jaise KHuu.n kii gardish tez ho jaatii
lahuu kaa ek ik qatra ye kahtaa mai.n to zinda huu.n
mirii paamaaliyo.n me.n pal rahii hai ik tavaanaa.ii
yahii aalam rahaa to jaane mai.n kis roz uTh baiThuu.n
basant aayaa to yuu.n aayaa ki mai.n bhii jaise uTh baiThaa
saveraa hote hii har samt se jho.nke havaa.o.n ke
na.ii KHushbuu liye mujh ko jagaane ke liye aa.e
jidhar bhii aa.nkh uThaataa huu.n shafaq kii muskuraahaT hai
vahii suuraj hai lekin aur hii kuchh jagmagaahaT hai
na jaane kaise kaise phuul ab mujh ko bulaate hai.n
na jaane kitne kitne rang se dil ko lubhaate hai.n
fazaa me.n duur tak phaile hu.e vo khet sarso.n ke
ye kahte hai.n ki ab armaa.n nikaalo apne barso.n ke
tumhaare saamne phailaa hu.aa maidaan saaraa hai
ko.ii aavaaz detaa hai ki aa.o tum hamaare ho
mirii dhartii ke beTe merii duniyaa ke dulaare ho
tumhaarii aa.nkh me.n jo KHvaab so.e hai.n vo mere hai.n
tumhaare ashk ne jo biij bo.e hai.n vo mere hai.n
isii vaadii me.n phir se lauT kar ab tum ko aanaa hai
tumhaarii hii ye bastii hai tumhii.n ko phir basaanaa hai
ab is bastii me.n rakhte hii qadam kuchh aisaa lagtaa hai
ki is kaa zarra zarra patta patta kuchh nayaa saa hai
har ik raste pe jaise kuchh na.e chehre se milte hai.n
yahii jii chaahtaa hai jo mile ab us se ye puuchhe.n
tumhaaraa naam kyaa hai? tum kahaa.n ke rahne vaale ho
kuchh aisaa jaan pa.Dtaa hai ki pahle bhii mile hai.n ham
rahe hai.n saath yaa ik duusre ko jaante hai.n ham
agar tum saath the to tum bhii shaayad dost the mere
mujhe yaad aayaa dono.n saath hii college me.n pa.Dhte the
vo saare dosto.n kaa jam.a honaa mere kamre me.n
vo gap shap qahqahe vo apne apne ishq ke qisse
vo miiras road kii baate.n vo charche KHuub-ruuyo.n ke
kabhii aavaaragardii apnii un viiraan sa.Dko.n kii
kabhii baato.n me.n raate.n kaaTnaa sunsaan jaa.Do.n kii
kabhii vo chaandnii me.n apnaa yuu.n hii ghuumte rahnaa
kabhii vo chaa.e kii mezo.n pe ghanTo.n baiThnaa sab kaa
vo baate.n ilm-o-hikmat kii kabhii shikve-shikaayat kii
tumhe.n to yaad hogaa un me.n hii ik dost shaa.ir thaa
zaraa dekho to mujh ko Gaur se shaayad vo mai.n hii thaa
bahut din me.n mile hai.n ham to aa.o aaj jii bhar kar
ha.nse.n bole.n kahii.n aavaaragardii ke liye nikle.n
chale.n aur chal ke saare dosto.n ko phir bulaa laa.e.n
sajaa.e.n aaj phir mahfil kahii.n piine pilaane kii
mai.n tum ko aaj apnii kuchh na.ii baate.n bataa.uu.ngaa
mai.n tum ko aaj apnii kuchh na.ii nazme.n sunaa.uu.ngaa

Khalilur Rahman Azmi
Nazm

baz-amad --- ek muntaj

dhuup me.n tezii nahii.n
aise aataa hai har ik jho.nkaa havaa kaa jaise
dast-e-shafqat hai ba.Dii umr kii mahbuuba kaa
aur mire shaano.n ko is tarah hilaa jaataa hai
jaise mai.n nii.nd me.n huu.n
aurte.n charKHe liye baiThii hai.n
kuchh kapaas oTtii hai.n
kuchh silaa.ii ke kisii kaam me.n masruuf hai.n yuu.n
jaise ye kaam hai dar-asl har ik shai kii asaas
ek se ek chuhul kartii hai
ko.ii kahtii hai mirii chuu.Diyaa.n khankii.n to khankhaarii mirii saas
ko.ii kahtii hai bharii chaa.ndnii aatii nahii.n raas
raat kii baat sunaatii hai ko.ii ha.ns ha.ns kar
baat kii baat sunaatii hai ko.ii ha.ns ha.ns kar
lazzat-e-vasl hai aazaar, ko.ii kahtii hai
mai.n to ban jaatii huu.n biimaar, ko.ii kahtii hai
mai.n bhii ghus aataa huu.n is shiish-mahal me.n dekho
sab ha.nsii rok ke kahtii hai.n nikaalo is ko

Akhtarul Iman
Nazm

hubb-e-watan

chho.Do afsurdagii ko josh me.n aa.o
bas bahut so.e uTTho hosh me.n aa.o
qaafile tum se ba.Dh ga.e koso.n
rahe jaate ho sab se piichhe kyuu.n
qaafilo.n se agar milaa chaaho
mulk aur qaum kaa bhalaa chaaho
gar rahaa chaahte ho izzat se
bhaa.iyo.n ko nikaalo zillat se
qaum kaa mubtazil hai jo insaa.n
be-haqiiqat hai garche hai sultaa.n
qaum duniyaa me.n jis kii hai mumtaaz
ho faqiirii me.n bhii vo baa-e.azaaz
izzat-e-qaum chaahte ho agar
jaa ke phailaa.o in me.n ilm-o-hunar
zaat kaa faKHr aur nasab kaa Guruur
uTh ga.e ab jahaa.n se ye dastuur
ab na sayyad kaa iftiKHaar sahiih
na barahman ko shudr par tarjiih
qaum kii izzat ab hunar se hai
ilm se yaa ki siim-o-zar se hai
ko.ii din me.n vo daur aa.egaa
be-hunar bhiik tak na paa.egaa
na rahe.nge sadaa yahii din-raat
yaad rakhnaa hamaarii aaj kii baat
gar nahii.n sunte qaul 'haalii' kaa
phir na kahnaa ki ko.ii kahtaa thaa

Altaf Hussain Hali
Nazm

imtihan

vaqt raTne ke liye kam rah gayaa zyaada hai kaam
saal bhar jin ko na dekhaa vo KHulaase nek-naam
saamne rakkhe hai.n un ko jhuk ke karte hai.n salaam
un kii puujaa hii me.n saaraa vaqt hotaa hai tamaam
television bhii nahii.n Gaa.eb hu.e hai.n saare khel
Daal kar kolhuu me.n bachcho.n ko nikaalo un kaa tel

Syed Mohammad Jafri
Nazm

azal-abad

ruuho.n ko davaam dene vaalo
jismo.n kii sabiil kuchh nikaalo
shola ko.ii musta.aar de do
yaa laash ko ab mazaar de do

Aziz Qaisi
Nazm

rah-e-farar

idhar se na jaa.o
idhar raah me.n ek buu.Dhaa kha.Daa hai
jo peshaaniyo.n aur chehro.n
pe aisii bhabhuut ek mal degaa sab jhurriyaa.n phaT pa.De.ngii
siyah, maar jaise, chamakte hu.e kaale baalo.n
pe aisii sapiidii uma.nD aa.egii kuchh tadaaruk nahii.n jis kaa ko.ii
ko.ii raasta aur Dhuu.nDo
ki is piir-e-fartuut kii tez nazro.n se bach kar
nikal jaa.e.n aur is kii zad me.n na aa.e.n kabhii ham

Akhtarul Iman
Nazm

alamiya-e-naqd

chamakdaar dhan kaale dhan se nikaalo
Gariibo.n ko ra.nj-o-mehan se nikaalo
hame.n tum hamaare kafan se nikaalo
ye ruupya agar mil bhii jaa.e to kyaa hai

Fay Seen Ejaz
Nazm

rihai

sunaa hai ki buu.Dhii havelii me.n har shab
bhaTaktii hai ik ruuh jis ke badan par
puraanii rivaayaat ke
khokhle-pan kaa malbuus hai
jis kii peshaanii ke zaKHm se
KHuun bahtaa hai maazii kii tahziib kaa
aur vo chiiKHtii hai
ki buu.Dhii havelii se us ko nikaalo
puraanii rivaayaat ke khokhle-pan ke malbuus ko phaa.D Daalo
suno shahr vaalo

Kafeel Aazar Amrohvi
Nazm

sabza-e-begana

hasab-nasab hai na taariiKH o jaa-e-paidaa.ish
kahaa.n se aayaa thaa maz.hab na valdiyat ma.aluum
maqaamii chhoTe se KHairaatii aspataal me.n vo
kahii.n se laayaa gayaa thaa vahaa.n ye hai marquum
mariiz raato.n ko chillaataa hai ''mire andar
asiir zaKHmii parinda hai ik, nikaalo ise
guluu-girafta hai ye habs-e-dam hai KHaa.if hai
sitam-rasiida hai mazluum hai bachaa lo ise''
mariiz chiiKHtaa hai dard se karaahtaa hai
ye vietnam, kabhii dominican, kabhii kashmiir
zar-e-kasiir, siyah qaume.n, KHaam madniyaat
kasiif tel ke chashme, avaam, istehsaal
zamii.n kii maut bahaa.im, fizaa.ii ja.ng, sitam
ijaara-daarii, subuk gaam, dilrubaa, atfaal
sarod-o-naGma, adab, sher, amn, barbaadii
janaaza ishq kaa, daf kii sadaa.e.n, murda KHayaal
taraqqii, ilm ke gahvaare, ruuh kaa madfan
KHudaa kaa qatl, ayaa.n zer-e-naaf zohra jamaal
tamaam raat ye be-rabt baate.n kartaa hai
mariiz saKHt pareshaanii kaa sabab hai yahaa.n
Garaz ki jo thaa shikaayat kaa ek daftar thaa
natiija ye hai usii roz muntaqil karke
use ik aur shifaa-KHaane ko ravaana kiyaa
sunaa gayaa hai vahaa.n nafsiyaat ke maahir
tabiib haaziq o nabbaaz doctor kitne
talab kiye ga.e aur sab ne ittifaaq kiyaa
ye ko.ii zehnii maraz hai, mariiz ne shaayad
kabhii parinda ko.ii paalaa hogaa lekin vo
adam-e-tavajjohii yaa ittifaaq se yuu.nhii
bichaara mar gayaa us maut kaa asar hai ye
ajiib chiiz hai taht-e-shu.uur insaa.n kaa
ye aur kuchh nahii.n ehsaas-e-jurm hai jis ne
dil o dimaaG pe qabza kiyaa hai is darja
mariiz qaatil o mujrim samajhtaa hai KHud ko!
kisii kii raa.e thii pasmaa.nda qaum kaa ik fard
mariiz hogaa isii vaaste siyah qaume.n
Gariib ke liye ik taboo ban ga.ii.n afsos
ko.ii ye kahtaa thaa ye asal me.n hai hubb-e-vatan
mariiz chaahtaa thaa ham kafiil ho.n apne
kisii bhii qaum ke aage na haath phailaa.e.n
yahii.n pe tel ke chashme hai.n, vo kare.n daryaaft!
gumaan kuchh ko thaa ye shaKHs ko.ii shaa.er hai
jo chaahtaa thaa jahaa.n-gardii me.n guzaare vaqt
hasiin aurte.n maa.il ho.n lutf-o-aish rahe
qalam ke zor se shohrat mile zamaane me.n
zar-e-kasiir bhii haath aa.e is bahaane se
magar Gariib kii sab koshishe.n ga.ii.n naakaam
shikast-e-paiham o ehsaas-e-naa-rasaa.ii ne
ye haal kar diyaa majruuh hoga.e a.asaab
Garaz ki nukta-rassii me.n guzar gayaa sab vaqt
vo chiiKHtaa hii rahaa dard kii davaa na milii
nashist baa'd nashist aur mu.aa.ene shab o roz
inhii.n me.n vaqt guzartaa gayaa shifaa na milii
phir ek shaam vahaa.n surma-dar-guluu aa.ii
jo us ke vaaste goyaa tabiib-e-haaziq thii
kisii ne phir na sunii dard se bharii aavaaz
karaahtaa thaa jo KHaamosh ho gayaa vo saaz

Akhtarul Iman
Nazm

infisal

dosto
tum to kandho.n se uupar nazar hii nahii.n aa rahe ho
chalo
apne chehre nidaamat kii almaariyo.n se nikaalo
inhe.n jhaa.D kar gardano.n par rakho
tum adhuure nahii.n ho to puure dikhaa.ii to do

Ahmad Nadeem Qasmi
Nazm

nazm ittihad

fasl-e-bahaar aa.ii magar ham hai.n aur Gam
har samt se hai.n ghere hu.e sadma-o-alam
aa.ii na uf zabaa.n pe sitam par hu.e sitam
kyaa imtihaa.n ke vaaste Thahre hai.n sirf ham
jab apnii quvvato.n pe bharosaa nahii.n rahaa
behtar hai phir jahaa.n se uThaa le hame.n KHudaa
is umr-e-chand-roza me.n kii laakh justujuu
chhaanii hai ham ne KHaak zamaane me.n kuu-ba-kuu
shikva aduu kaa kyaa hai jab ahbaab hai.n aduu
jiine kii ik second nahii.n ab to aarzuu
ham ne samajh liyaa ki jahaa.n se guzar ga.e
jab dil hii mar gayaa to sab armaan mar ga.e
ham par giraa.e.n charKH ne is had pe bijliyaa.n
dam-bhar me.n jal ke KHaak hu.ii.n saarii ustuKHaa.n
chaltii rahii.n havaa-e-muKHaalif kii aa.ndhiyaa.n
aataa nahii.n samajh me.n ki jaa kar chhupe.n kahaa.n
zer-e-zamii.n bhii chain kii ummiid ab nahii.n
phir kyaa hai ye bataa de ko.ii gar Gazab nahii.n
makr-o-fareb se jo kare.n zindagii basar
sau jaa.n hazaar dil se ho qurbaan har bashar
din raat ham ho.n aur ho.n ahbaab-e-KHiira-sar
iimaan-daariyo.n me.n kaTii zindagii agar
har ek kii nigaah me.n bas KHaar ho ga.e
be-so.nche-samjhe mustahiq-e-daar ho ga.e
da.avaa to ye hai ham bhii musalmaan hai.n zaruur
kalma jo pochhiye to nahii.n yaad hai huzuur
kyaa Gam agar shikasta aziizo.n ke hai.n qubuur
teraa ye is pe had se ziyaada hai kuchh Guruur
melo.n ke vaaste jo talab ho to KHuub de.n
qaumii jo ko.ii kaam ho to naam bhii na le.n
puuchhaa agar ibaadat-e-KHaaliq hai ko.ii chiiz
farmaayaa dil me.n ye to nihaayat hai bad-tamiiz
aiyyaashiyaa.n jo kiijiye to aap hai.n aziiz
ai qaum kaahilii hai tirii ghar kii ab kaniiz
achchhii burii kaa jab to nahii.n imtiyaaz hai
be-maa.egii par apnii faqat tujh ko naaz hai
hushyaar ko.ii laakh kare to hai be-KHabar
is darja be-hayaa ki nahii.n dil pe kuchh asar
naazaa.n hai.n sirf baap ke daadaa ke naam par
qarze me.n ho rahii hai magar zindagii basar
dekho to Gair ha.nste hai.n hoshyaar ho zaraa
lillaah ab to KHvaab se bedaar ho zaraa
phuulo-phalo ilaahii raho shaad sar-ba-sar
ho naKHl-e-ittihaad hamesha ye baarvar
vo din KHudaa dikhaa.e ki le aa.e ye samar
aanaa hai tum ko manzil-e-maqsuud tak agar
Daalii hai ittihaad kii tum ne jo daaG-bel
himmat na haaro jaan ke bachcho.n kaa ek khel
dekho to aur qaumo.n me.n kyaa ittihaad hai
daulat se aur ilm se har ek shaad hai
tum me.n bhii aaj aisaa ko.ii KHush-nihaad hai
mahmuud kaa ye qaul hame.n ab to yaad hai
do din rahe jo aa ke jahaa.n me.n to khal ga.e
aaKHir ko misl-e-KHaar-e-chaman se nikal ga.e
ai sakinaan mauza-e-jugvuur assalaam
duniyaa hai aaj tum ko har ik baat kaa payaam
ab to nikaalo apnii dilo.n se KHayaal-e-KHaam
achchhaa nahii.n jo Gair ke ban jaa.o tum Gulaam
achchhii nasiihato.n pe amal phir zaruur hai
ko.ii na ye kahe ki saraasar qusuur hai
apne umuur me.n na karo Gair ko shariik
shar ko na Dhuu.nDho aur karo KHair ko shariik
achchhe nahii.n safar jo kare.n sair ko shariik
ka.abe ke zikr me.n na karo dair ko shariik
tum KHud rahe ho saahib-e-iqbaal dahr me.n
kyuu.n Dhuu.nDte ho zaa.iqa-e-shahd zahar me.n
aKHlaaq kaa charaaG bujhaanaa na chaahiye
zulmat-kada me.n Gair ke jaanaa na chaahiye
sachchii nasiihato.n ko bhulaanaa na chaahiye
tum ko kisii fareb me.n aanaa na chaahiye
allaah ke bharosa pe har kaam tum karo
dushman bhii jis ko maan le.n vo naam tum karo

Mirza Altaf Husain Alim Lucknowi
Nazm

railway line par mor

railway line par
mor so rahaa hai
tez raftaar train
yahaa.n se mat guzro
line-man se kaho
kaa.nTaa badal de
tumhaaraa raasta tabdiil ho jaa.egaa
yaa phir ek surKH laalTain
railway line ke saath rakh de
kisii na kisii tarah
tumhe.n rok le
railway line par mor so rahaa hai
use is ke KHvaab se baahar mat nikaalo
vo apne KHvaab me.n
kisii na.e baadshaah kii tarah
pahlii baar gardan uThaa ke chal chal rahaa hai
us kii saltanat
us ke paro.n kii tarah ra.ngo.n se bharii
aur khulii hu.ii hai
use be-ra.ng mat karo
use mat ujaa.Do
us kii baadshaahat kaa KHaatma
itnii jaldii mat karo
agar hamaare aa.nsu.o.n kii
ko.ii qiimat nahii.n hai
tab bhii hamaare saare aa.nsuu
hamesha ke liye apne paas rakh lo
hamaare mor kii nii.nd
us kii besh-qiimat nii.nd
us ke paro.n kii yakjaa.ii
hamaare kitnii aham hai
tumhe.n nahii.n ma.aluum
tez raftaar train
ye sab kuchh ham se mat chhiino
railway line par mor ko sone do
vo hamesha soyaa nahii.n rahegaa
raat bhar ke liye use sone do
agar tum ne us ke paro.n ko
bikher diyaa
to hamaarii zindagii me.n logo.n
aur chiizo.n kii tartiib
KHatm ho jaa.egii
hamaarii aa.nkho.n me.n maujuud
mohabbat kii aaKHirii chamak KHatm ho jaa.egii
hamaare dilo.n se rang u.D jaa.e.nge
railway line par
us ke paro.n ko mat bikhero
varna jo bhii unhe.n uThaa.egaa
is kii u.ngliyo.n me.n umr bhar
kaa.nTe chubhte rahe.nge
is kii aa.nkho.n me.n hamesha
suu.iyaa.n bharii rahe.ngii
ye par Diary me.n rakhne ke
yaa la.Dkiyo.n ke liye
pa.nkhe banaane ke kaam nahii.n aate
agar ek baar mor ke par
yaa us kii nii.nd bikhar jaa.e
to hame.n aur tumhe.n tez raftaar train
ko.ii nahii.n chalne degaa
zinda bhii nahii.n rahne degaa
railway line par nahii.n sone degaa

Zeeshan Sahil
Nazm

kaTas

kamaal karte hai.n ishq vaale
ye daastaa.n hai quruun-e-uula se peshtar kii
jab ek la.Dkii se devtaa ne birog paayaa
to aa.nsuu.o.n kaa mahal banaayaa
ye ishq thaa so
zamii.n kii buniyaad hil ga.ii thii
sa.Dak ke taaro.n se mil ga.ii thii
ye ishq thaa so
na us ne lamho.n se maat khaa.ii
na us ko sadiyaa.n bigaa.D paa.ii.n
kaTaas ab bhii vahii.n kha.Daa hai
har ek patthar gavaah ban kar vahii.n pa.Daa hai
ye KHaak pahle hii muztarib thii
ab aur hairaan ho ga.ii hai
pujaariyo.n ke nafas kii utran
havaa musalmaan ho ga.ii hai
mohabbato.n se bhare sahiife to taaqcho.n me.n sajaa diye hai.n
aqiidato.n ne shivaa ke aa.nsuu vuzuu ke qaabil banaa diye hai.n
nasiib vaale hii aa.nsuu.o.n se vuzuu kare.nge
qabaa-e-girya rafuu kare.nge
kaTaas apne hii aap me.n gum
adam se ilhaaq kar rahaa hai
ka.ii mazaahib kii lau jalaa.e
sadaa-e-ilhaad kar rahaa hai
aur is jhamele ke paas baiThaa
ko.ii tumhe.n yaad kar rahaa hai
ajab masaafat se chuur hai ye
ajiib fariyaad kar rahaa hai
ise nikaalo ye is jagah kaa
sukuun barbaad kar rahaa hai
kamaal karte hai.n ishq vaale
ye daastaa.n hai quruun-e-uula se peshtar kii jab ek la.Dkii
se devtaa ne birog paayaa
to aa.nsuu.o.n kaa mahal banaayaa

Ikram Basra
Nazm

mohabbat apna zaicha nikalwana chahti hai

sub.h uThte hii zid kartii hai
aur mujhe dho.ns detii rahtii hai
agar aisaa nahii.n kiyaa
to mai.n nafrat se dostii kar luu.ngii
aur ye dil jo ek kone me.n suk.Daa pa.Daa hai
fariyaad kartaa rah jaa.egaa
mujhe is par taras aataa hai
tum jaldii se meraa zaa.icha nikaalo
aur dekho
mujhe kab tak tumhaare saath rahnaa hai
tum kab tak mujhe ghasiiTogii
kab tak mai.n tumhaarii qaid jheluu.ngii
har chiiz kii intihaa hotii hai
mujhe ab is KHol me.n nahii.n rahnaa
mujhe jaane do

Azra Abbas
Nazm

nida-e-taKHliq

sukuut-e-niim-shabii me.n kisii ne dii aavaaz
'na.iim' dil se nikaalo na KHaar-haa-e-KHalish
sukuun hai to isii iztiraab me.n kuchh hai
Guzaar-e-shauq me.n, soz-e-talaash me.n kuchh hai
junuu.n ke jumla maraahil se tum guzar dekho
jamaal-e-fikr se aabaad hai dil-e-viiraa.n
sharaar-e-dil se munavvar jahaan-e-fardaa hai
ye kaun mujh se muKHaatib hai itnii qurbat se
ye kis ne zaKHm ko dast-e-shifaa se chhe.Daa hai,
isii KHayaal me.n gum thaa ki phir sadaa aa.ii
kamaal-e-arz-e-suKHan jis ko tum samajh baiThe
vo ijz-e-fikr hai iqraar-e-be-zabaanii hai
nikal ke aa.o zaraa kuucha-e-KHabar dekho
har ek chaak-girebaa.n har ek gard-aaluud
na qatl-gah se hiraasaa.n na sa.ngsaaro.n se
ki ek umr guzartii hai justujuu karte
nazar ko tez haqiiqat ko ruu-ba-ruu karte
bas ek tum ki tumhaare qadam nahii.n uThte
quyuud-e-asr kii zanjiir kaaTne vaale
faraaz-e-koh se aavaaz de rahe hai.n tumhe.n
payambaro.n ke maqaamaat de rahe hai.n tumhe.n
ruKH-e-sahar se haTaa.o ridaa-e-shab lillaah
azaab-e-naar se guzro ki tauf-e-nuur karo
jigar ke daaG se rakkho hariim-e-jaa.n raushan
shu.aa-e-dard ko chuumo gale lagaa.o 'na.iim'
sar-e-vajuud jhukaa.e sunaa kiyaa sab kuchh
tamaam jism thaa goyaa nishaana-e-aavaaz
tamaam ruuh thii saame tamaam Gam bedaar
sukuut-e-shab me.n
sadaa guu.njtii rahii pahro.n

Hasan Naim
Nazm

an-jaana dukh

hare-bhare lahraate patto.n vaalaa pe.D
indar se kis darja bodaa kitnaa khokhlaa ho saktaa hai
mujh se puuchho
mai.n ik aise hii chhitnaar ke niiche baiThaa
us kii chhaa.nv se apne safar kii
dhuup kaa dukh.Daa phuul rahaa thaa
aane vaale vaqt kii ThanDii giilii miTTii rol rahaa thaa
apne aap se bol rahaa thaa
mai.n bhii kitnaa KHush-qismat huu.n
jiivan kii sunsaan Dagar par
mere kitne yaar kha.De hai.n pe.D kii suurat
itne me.n ik jho.nkaa aayaa
ye jho.nkaa chaa.ndii kii kaan ke andar se ho kar aayaa thaa
ek hii pal me.n
pe.D kii chhaal ne ra.ngat badlii
ek hii pal me.n
har patte kii shakl hu.ii maTyaalii gadlii
shaa.n shaa.n kartii shaaKHo.n me.n ik zahriilii sargoshii jaagii
chhaa.nv chhaT kar pe.D ke tan kii jaanib bhaagii
dil ye manzar dekh ke sahmaa kaa.npaa royaa
chaaro.n aur se uThtii ik anjaane dukh kii dhuul me.n khoyaa
zahar saa ik rag rag me.n samaayaa
itne me.n ik aur jhuumtaa jho.nkaa aayaa
ye jho.nkaa KHud-Garzii ke kohsaar pe ma.nDlaa kar aayaa thaa
bas itnaa hii yaad hai mujh ko
kaise aur kab pe.D giraa ye pe.D se puuchho
mujhe nikaalo
us buude aur khokhle pe.D ke niiche dab kar
mere saath miraa ehsaas bhii mar jaa.egaa
jo bhii ye manzar dekhegaa Dar jaa.egaa
dekhne vaalo.n ko is KHauf se is sadme is Gam se bachaa lo
mujhe nikaalo
aa.inda mai.n chhitnaar ko apnaa yaar nahii.n samjhuu.ngaa
kabhii kabhii mil jaane vaalii chhaa.nv ko pyaar nahii.n samjhuu.ngaa

Zuhoor Nazar
Nazm

sunao mujhe bhi ek latifa

merii sinf ke baare me.n
tumhaarii latiifo.n kii zambiil
umr o ayyaar kii zambiil jaisii hai
nikaalo ko.ii nayaa yaa sadiyo.n puraanaa latiifa
mahfuuz karo mujhe
jaise tum karte ho ek duusre ko
medical college me.n murda jismo.n kii chiir phaa.D karte hu.e
stock exchange me.n kaarobaar karte hu.e
yaa KHaatuun siyaasatdaano.n ke baalo.n ke andaaz kaa tajziya karte hu.e

Tanveer Anjum
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now