Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "over"

Nazm MATCHES FOR "over"

Nazm

cricket match

khelne aa.e dono.n cricket bandar haathii
un ke piichhe the jangal ke saare saathii
captain thaa ik team kaa haathii mast qalandar
duusrii team kaa captain ban baiThaa thaa bandar
bandar ye the qismat vaale jiite toss
fauran chiite ko bulvaayaa apne paas
open karne ik jaanib se aayaa sher
josh me.n aa kar lagaayaa us ne rano.n kaa Dher
ik over me.n banaa gayaa vo sola ran
satrah ge.ndo.n me.n ran us ke sattaavan
is paarii me.n dhuum dha.Dkaa machaa gayaa vo
chaa.e se pahle double century banaa gayaa vo
dekh ke apnii team kii durgat haathii chau.nkaa
KHud karne bolling kavar se aayaa dau.Daa
pahlii ball hii chiite ke stump ko maaraa
duusrii ball me.n sher dressing room sidhaaraa
tiisrii ball pe saa.nbhar jii ne catch diyaa
chauthii ball pe riichh bechaaraa bold hu.aa
ik over me.n chaar wicket the zero ran
haathii ne record banaa Daalaa a-one
ek inning me.n aaTh wicket keeper ke catch
nanhaa saa KHargosh hu.aa man of dii match
do sau biis pe bandar jii kii team all out
pahle roz machhandar jii kii team all out
duusre din haathii ke utre balle-baaz
balle-baazii me.n lekin na the mumtaaz
bandar jii ne follow-aan kii sheKHii maarii
sochaa KHatm kare.nge un kii jaldii paarii
haathii aayaa do saathii out hone par
vo chakraayaa apnii do wickete.n khone par
haathii ke aane se paarii sambhal ga.ii thii
vaise bhii ab pitch kii haalat badal ga.ii thii
haathii aayaa chauke chhakke maaraa KHuub
bandar dau.Daa idhar udhar bechaara KHuub
tiin sau terah banaa ke haathii not out thaa
apne kartab dikhaa ke haathii not out thaa
do wicketo.n pe lagaa thaa chhe sau rano.n kaa Dher
phir paarii declare karne me.n kyaa der
duusrii paarii me.n bandar kii u.Dii ha.nsii
assii hii ran banaa ke puurii team ga.ii
tiin sau ran aur das wicketo.n se maat hu.ii
jiit hu.ii haathii kii uu.nchii baat hu.ii

Haidar Bayabani
Nazm

jangal mein cricket

jangal me.n one day cricket kaa hu.aa anokhaa match
bandar ne kii KHuub fielding pak.De chhe chhe catch
zero par languur gayaa to hiran tiin par out
l b w gai.nDaa bhaagaa nahii.n thaa ko.ii doubt
giida.D ne aate hii jaise lii apnii position
kangaroo kii ge.nd thii spin badal ga.ii situation
wicket bachaa na paayaa giida.D ballaa ajab ghumaayaa
bandar ke haatho.n me.n siidhe apnaa catch thamaayaa
sii.ng hilaate baara-singhaa ne ab baT sa.nbhaalaa
kangaroo kii second baal thii chuuk gayaa bechaara
ge.nd ghusii stump bikheraa gillii chhiTkii duur
ek ba.Daa score kaa sapnaa ho gayaa aaKHir chuur
lauT chalaa jab baara-singhaa bhaaluu chaachaa aa.e
ge.nd tiisrii kangaroo kii vo bhii jhel na paa.e
lagaataar tiino.n ge.ndo.n par wicket gire the tiin
kangaroo ke is over ne badal diyaa thaa scene
jaldii jaldii wicket ga.nvaa.e biga.D ga.ii thii haalat
jame jamaa.e haathii daadaa bhej rahe the la.anat
bhaaluu gayaa zebra aaya ab ke ballaa thaame
navve par haathii pahu.nchaa thaa lagaa use samjhaane
ballaa chamkaa ge.nd u.Dii empire bolaa six
haathii ne phir fauran Tokaa pahle holo fix
chauke aur chhakke kii baarish tho.Daa ruk kar karnaa
match agar hai hame.n jiitnaa wicket bachaa.e rakhnaa
over nayaa liye chiitaa ab bowling karne aaya
do ge.ndo.n par lagaataar haathii ne six jamaayaa
binaa century haathii ne armaan na.e kuchh baa.ndhe
chiite kii ik tez ge.nd ne to.De sabhii iraade
haathii ke out hote hii jo aaya vo bebas
not out kaa tamGa le kar hu.aa zebra vaapas
kaptaanii thii sher ke zimme jiit liyaa thaa match
bandar ne kii KHuub fielding pak.De chhe chhe catch

Tariq Manzoor
Nazm

ye kaun sa shahr hai

hairaan huu.n
ye kaun saa shahr hai
'miir'-o-'Gaalib' kii dillii kabhii aisii to na thii
har galii har nukka.D par saa.np kunDlii maare baiThe hai.n yahaa.n
paidaa hote hii ko.ii bhii sa.npola
Dasne ke liye par tolne lagtaa hai
jidhar dekhiye
har jagah saa.np hii saa.np hai.n
kahii.n KHuunii darvaaze ke aqab se
to kahii.n dhaula-ku.aa.n ke fly over par
har jagah kunDlii maare hu.e yahaa.n
hazaar-haa saa.np aise hai.n
jo har dam tayyaar baiThe hai.n
mauqa.a milte hii
vo kisii bhii narm-o-gudaaz badan ko
nishaana apnaa banaa lete hai.n
apne zahriile daa.nt gaa.D ne ke liye
jab vo phanphanaa kar baahar aate hai.n
kisii bhii raahgiir kaa rasta roke
ek dam
tan ke kha.De ho jaate hai.n
hattaa ki
buu.Dhaa naag bhii ab yahaa.n
apne kha.nDar me.n tan ke kha.Daa hai
use bhii intizaar hai
barsaat kii us kaalii a.ndherii raat kaa hai
jab vo bul-havas
apne kohna-mashq daa.nto.n ko
kisii narm-o-naazuk Gazaala par
tez kar sake hamla-e-KHuu.n-rez kar sake
apnii umr ke is aaKHirii pa.Daav me.n vo bul-havas
ko.ii vaardaat-e-junuu.n-a.ngez qayaamat-KHez kar sake
yaa KHudaa
ye kaun saa maqaam hai
kyaa ye teraa qahr nahii.n hai
kyaa ye vahii puraanaa shahr nahii.n hai
sochtaa huu.n
'miir'-o-'Gaalib' kii dillii kabhii aisii to na thii

Perwaiz Shaharyar
Nazm

daraKHt-e-zard

tumhaarii jo hamaasa hai bhalaa us kaa to kyaa kahnaa
hai shaayad mujh ko saarii umr us ke sehr me.n rahnaa
magar mere Gariib ajdaad ne bhii kuchh kiyaa hogaa
bahut tuchchaa sahii un kaa bhii ko.ii maajraa hogaa
ye ham jo hai.n hamaarii bhii to hogii ko.ii nauTa.nkii
hamaaraa KHuun bhii sach-much kaa sehne par bahaa hogaa
hai aaKHir zindagii KHuun az-bun-e-naaKHun bar-aavar-tar
qayaamat saaneha matlab qayaamat faaje.a parvar

Jaun Eliya
Nazm

tulu-e-islam

daliil-e-sub.h-e-raushan hai sitaaro.n kii tunuk-taabii
ufuq se aaftaab ubhraa gayaa daur-e-giraa.n-KHvaabii
uruuq-murda-e-mashriq me.n KHuun-e-zindagii dau.Daa
samajh sakte nahii.n is raaz ko siinaa o faaraabii
musalmaa.n ko musalmaa.n kar diyaa tuufaan-e-maGrib ne
talaatum-haa-e-dariyaa hii se hai gauhar kii sairaabii
ataa momin ko phir dargaah-e-haq se hone vaalaa hai
shikoh-e-turkamaanii zehn hindii nutq aaraabii
asar kuchh KHvaab kaa Guncho.n me.n baaqii hai tuu ai bulbul
navaa-raa talKH-tarmii zan chuu zauq-e-naGma kam-yaabii
ta.Dap sehn-e-chaman me.n aashiyaa.n me.n shaaKH-saaro.n me.n
judaa paare se ho saktii nahii.n taqdiir-e-siimaabii
vo chashm-e-paak hai.n kyuu.n ziinat-e-bar-gustavaa.n dekhe
nazar aatii hai jis ko mard-e-Gaazii kii jigar-taabii
zamiir-e-laala me.n raushan charaaG-e-aarzuu kar de
chaman ke zarre zarre ko shahiid-e-justujuu kar de
sarishk-e-chashm-e-muslim me.n hai naisaa.n kaa asar paidaa
KHaliilullaah ke dariyaa me.n ho.nge phir guhar paidaa
kitaab-e-millat-e-baizaa kii phir shiiraaza-bandii hai
ye shaaKH-e-haashmii karne ko hai phir barg-o-bar paidaa
rabuud aa.n turk shiiraazii dil-e-tabrez-o-kaabul raa
sabaa kartii hai buu-e-gul se apnaa ham-safar paidaa
agar usmaaniyo.n par koh-e-Gam TuuTaa to kyaa Gam hai
ki KHuun-e-sad-hazaar-anjum se hotii hai sahar paidaa
jahaa.nbaanii se hai dushvaar-tar kaar-e-jahaa.n-biinii
jigar KHuu.n ho to chashm-e-dil me.n hotii hai nazar paidaa
hazaaro.n saal nargis apnii be-nuurii pe rotii hai
ba.Dii mushkil se hotaa hai chaman me.n diida-var paidaa
navaa-pairaa ho ai bulbul ki ho tere tarannum se
kabuutar ke tan-e-naazuk me.n shaahii.n kaa jigar paidaa
tire siine me.n hai poshiida raaz-e-zindagii kah de
musalmaa.n se hadiis-e-soz-o-saaz-e-zindagii kah de
KHudaa-e-lam-yazal kaa dast-e-qudrat tuu zabaa.n tuu hai
yaqii.n paidaa kar ai Gaafil ki maGluub-e-gumaa.n tuu hai
pare hai charKH-e-niilii-faam se manzil musalmaa.n kii
sitaare jis kii gard-e-raah ho.n vo kaarvaa.n to hai
makaa.n faanii makii.n faanii azal teraa abad teraa
KHudaa kaa aaKHirii paiGaam hai tuu jaavedaa.n tuu hai
Hinaa-band-e-uruus-e-laala hai KHuun-e-jigar teraa
tirii nisbat baraahiimii hai memaar-e-jahaa.n tuu hai
tirii fitrat amii.n hai mumkinaat-e-zindagaanii kii
jahaa.n ke jauhar-e-muzmar kaa goyaa imtihaa.n to hai
jahaan-e-aab-o-gil se aalam-e-jaaved kii KHaatir
nubuvvat saath jis ko le ga.ii vo armuGaa.n tuu hai
ye nukta sarguzisht-e-millat-e-baizaa se hai paidaa
ki aqvaam-e-zamiin-e-asia kaa paasbaa.n tuu hai
sabaq phir pa.Dh sadaaqat kaa adaalat kaa shujaa.at kaa
liyaa jaa.egaa tujh se kaam duniyaa kii imaamat kaa
yahii maqsuud-e-fitrat hai yahii ramz-e-musalmaanii
uKHuvvat kii jahaa.ngiirii mohabbat kii faraavaanii
butaan-e-ra.ng-o-KHuu.n ko to.D kar millat me.n gum ho jaa
na tuuraanii rahe baaqii na iiraanii na afGaanii
miyaan-e-shaaKH-saaraa.n sohbat-e-murG-e-chaman kab tak
tire baazuu me.n hai parvaaz-e-shaahiin-e-qahastaanii
gumaa.n-aabaad hastii me.n yaqii.n mard-e-musalmaa.n kaa
bayaabaa.n kii shab-e-taariik me.n qindiil-e-rohbaanii
miTaayaa qaisar o kisraa ke istibdaad ko jis ne
vo kyaa thaa zor-e-haidar faqr-e-buu-zar sidq-e-salmaanii
hu.e ahraar-e-millat jaada-paimaa kis tajammul se
tamaashaa.ii shigaaf-e-dar se hai.n sadiyo.n ke zindaanii
sabaat-e-zindagii iimaan-e-mohkam se hai duniyaa me.n
ki almaanii se bhii paa.enda-tar niklaa hai tuuraanii
jab is a.ngaara-e-KHaakii me.n hotaa hai yaqii.n paidaa
to kar letaa hai ye baal-o-par-e-ruuh-ul-amii.n paidaa
Gulaamii me.n na kaam aatii hai.n shamshiire.n na tadbiire.n
jo ho zauq-e-yaqii.n paidaa to kaT jaatii hai.n zanjiire.n
ko.ii andaaza kar saktaa hai us ke zor-e-baazuu kaa
nigaah-e-mard-e-momin se badal jaatii hai.n taqdiire.n
vilaayat paadshaahii ilm-e-ashiyaa kii jahaa.ngiirii
ye sab kyaa hai.n faqat ik nukta-e-iimaa.n kii tafsiire.n
baraahiimii nazar paidaa magar mushkil se hotii hai
havas chhup chhup ke siino.n me.n banaa letii hai tasviire.n
tamiiz-e-bandaa-o-aaqaa fasaad-e-aadmiyat hai
hazar ai chiira-dastaa.n saKHt hai.n fitrat kii ta.aziire.n
haqiiqat ek hai har shai kii KHaakii ho ki nuurii ho
lahuu KHurshiid kaa Tapke agar zarre kaa dil chiire.n
yaqii.n mohkam amal paiham mohabbat faatah-e-aalam
jihaad-e-zindagaanii me.n hai.n ye mardo.n kii shamshiire.n
che baayad mard raa tab-e-buland mashrab-e-naabe
dil-e-garme nigaah-e-paak-biine jaan-e-betaabe
uqaabii shaan se jhapTe the jo be-baal-o-par nikle
sitaare shaam ke KHuun-e-shafaq me.n Duub kar nikle
hu.e madfuun-e-dariyaa zer-e-dariyaa tairne vaale
tamaa.nche mauj ke khaate the jo ban kar guhar nikle
Gubaar-e-rahguzar hai.n kiimiyaa par naaz thaa jin ko
jabiine.n KHaak par rakhte the jo iksiir-gar nikle
hamaaraa narm-rau qaasid payaam-e-zindagii laayaa
KHabar detii thii.n jin ko bijliyaa.n vo be-KHabar nikle
haram rusvaa hu.aa piir-e-haram kii kam-nigaahii se
javaanaan-e-tataarii kis qadar saahab-nazar nikle
zamii.n se nuuryaan-e-aasmaa.n-parvaaz kahte the
ye KHaakii zinda-tar paa.enda-tar taabinda-tar nikle
jahaa.n me.n ahl-e-iimaa.n suurat-e-KHurshiid jiite hai.n
idhar Duube udhar nikle udhar Duube idhar nikle
yaqii.n afraad kaa sarmaaya-e-taamiir-e-millat hai
yahii quvvat hai jo suurat-gar-e-taqdiir-e-millat hai
tuu raaz-e-kun-fakaa.n hai apnii aa.nkho.n par ayaa.n ho jaa
KHudii kaa raaz-daa.n ho jaa KHudaa kaa tarjumaa.n ho jaa
havas ne kar diyaa hai Tuk.De Tuk.De nau-e-insaa.n ko
uKHuvvat kaa bayaa.n ho jaa mohabbat kii zabaa.n ho jaa
ye hindii vo KHuraasaanii ye afGaanii vo tuuraanii
tuu ai sharminda-e-saahil uchhal kar be-karaa.n ho jaa
Gubaar-aaluuda-e-ra.ng-o-nasab hai.n baal-o-par tere
tuu ai murG-e-haram u.Dne se pahle par-fishaa.n ho jaa
KHudii me.n Duub jaa Gaafil ye sirr-e-zindagaanii hai
nikal kar halqa-e-shaam-o-sahar se jaavedaa.n ho jaa
masaaf-e-zindagii me.n siirat-e-faulaad paidaa kar
shabistaan-e-mohabbat me.n hariir o parniyaa.n ho jaa
guzar jaa ban ke sail-e-tund-rau koh o bayaabaa.n se
gulistaa.n raah me.n aa.e to juu-e-naGma-KHvaa.n ho jaa
tire ilm o mohabbat kii nahii.n hai intihaa ko.ii
nahii.n hai tujh se ba.Dh kar saaz-e-fitrat me.n navaa ko.ii
abhii tak aadmii said-e-zabuun-e-shahryaarii hai
qayaamat hai ki insaa.n nau-e-insaa.n kaa shikaarii hai
nazar ko KHiira kartii hai chamak tahziib-e-haazir kii
ye sannaa.ii magar jhuuTe niguu.n kii reza-kaarii hai
vo hikmat naaz thaa jis par KHirad-mandaan-e-maGrib ko
havas ke panja-e-KHuunii.n me.n teG-e-kaar-zaarii hai
tadabbur kii fusuu.n-kaarii se mohkam ho nahii.n saktaa
jahaa.n me.n jis tamaddun kii binaa sarmaaya-daarii hai
amal se zindagii bantii hai jannat bhii jahannam bhii
ye KHaakii apnii fitrat me.n na nuurii hai na naarii hai
KHarosh-aamoz bulbul ho girah Gunche kii vaa kar de
ki tuu is gulsitaa.n ke vaaste baad-e-bahaarii hai
phir uTThii asia ke dil se chi.ngaarii mohabbat kii
zamii.n jaulaa.n-gah-e-atlas qabaayaan-e-tataarii hai
bayaa paidaa KHariidaa raast jaan-e-naa-tavaan-e-raa
pas az muddat guzaar uftaad barmaa kaarvaane raa
bayaa saaqii navaa-e-murG-zaar az shaaKH-saar aamad
bahaar aamad nigaar aamad nigaar aamad qaraar aamad
kashiid abr-e-bahaarii KHema andar vaadii o sahraa
sadaa-e-aabshaaraa.n az faraaz-e-koh-saar aamad
sarat gardam toham qaanuun peshii.n saaz dah saaqii
ki KHail-e-naGma-pardaazaa.n qataar andar qataar aamad
kanaar az zaahidaa.n bar-giir o bebaakaana saaGar-kash
pas az muddat azii.n shaaKH-e-kuhan baa.ng-e-hazaar aamad
ba-mushtaaqaa.n hadiis-e-KHvaajaa-e-badro hunain aavar
tasarruf-haa-e-pinhaanash ba-chashm-e-aashkaar aamad
digar shaaKH-e-KHaliil az KHuun-e-maa namnaak mii gardad
ba-baazaar-e-mohabbat naqd-e-maa kaamil ayyaar aamad
sar-e-KHaak-e-shahiire barg-haa-e-laala mii paasham
ki KHuunash baa-nihaal-e-millat-e-maa saazgaar aamad
bayaa taa-gul baa-afmaishaaniim o mai dar saaGar andaazem
falak raa saqf ba-shagaafem o tarh-e-diigar andaazem

Allama Iqbal
Nazm

KHizr-e-rah

banda-e-mazduur ko jaa kar miraa paiGaam de
KHizr kaa paiGaam kyaa hai ye payaam-e-kaa.enaat
ai ki tujh ko khaa gayaa sarmaaya-daar-e-hiila-gar
shaaKH-e-aahuu par rahii sadiyo.n talak terii baraat
dast-e-daulat-aafrii.n ko muzd yuu.n miltii rahii
ahl-e-sarvat jaise dete hai.n Gariibo.n ko zakaat
saahir-al-muut ne tujh ko diyaa barg-e-hashiish
aur tuu ai be-KHabar samjhaa use shaaKH-e-nabaat
nasl qaumiyat kaliisaa saltanat tahziib rang
KHvaajgii ne KHuub chun chun ke banaa.e muskiraat
kaT maraa naadaa.n KHayaalii devtaa.o.n ke liye
sukr kii lazzat me.n tuu luTvaa gayaa naqd-e-hayaat
makr kii chaalo.n se baazii le gayaa sarmaaya-daar
intihaa-e-saadgii se khaa gayaa mazduur maat
uTh ki ab bazm-e-jahaa.n kaa aur hii andaaz hai
mashriq-o-maGrib me.n tere daur kaa aaGaaz hai
himmat-e-aalii to dariyaa bhii nahii.n kartii qubuul
Guncha saa.n Gaafil tire daaman me.n shabnam kab talak
naGma-e-bedaarii-e-jamhuur hai saamaan-e-'aish
qissa-e-KHvaab-aavar askandar-o-jam kab talak
aaftaab-e-taaza paidaa batn-e-giitii se hu.aa
aasmaan Duube hu.e taaro.n kaa maatam kab talak
to.D Daalii.n fitrat-e-insaa.n ne zanjiire.n tamaam
duurii-e-jannat se rotii chashm-e-aadam kab talak
baaGbaan-e-chaara-farmaa se ye kahtii hai bahaar
zaKHm-e-gul ke vaaste tadbiir-e-marham kab talak
kirmak-e-naadaa.n tavaaf-e-sham.a se aazaad ho
apnii fitrat ke tajallii-zaar me.n aabaad ho
duniyaa-e-islaam

Allama Iqbal
Nazm

mauzu-e-suKHan

gul hu.ii jaatii hai afsurda sulagtii hu.ii shaam
Dhul ke niklegii abhii chashma-e-mahtaab se raat
aur mushtaaq nigaaho.n kii sunii jaa.egii
aur un haatho.n se mas ho.nge ye tarse hu.e haat
un kaa aa.nchal hai ki ruKHsaar ki pairaahan hai
kuchh to hai jis se hu.ii jaatii hai chilman ra.ngii.n
jaane us zulf kii mauhuum ghanii chhaa.nv me.n
TimTimaataa hai vo aaveza abhii tak ki nahii.n
aaj phir husn-e-dil-aaraa kii vahii dhaj hogii
vahii KHvaabiida sii aa.nkhe.n vahii kaajal kii lakiir
ra.ng-e-rukHsaar pe halkaa saa vo Gaaze kaa Gubaar
sandalii haath pe dhu.ndlii sii hinaa kii tahriir
apne afkaar kii ash.aar kii duniyaa hai yahii
jaan-e-mazmuu.n hai yahii shaahid-e-ma.anii hai yahii
aaj tak surKH o siyah sadiyo.n ke saa.e ke tale
aadam o havvaa kii aulaad pe kyaa guzrii hai?
maut aur ziist kii rozaana saf-aaraa.ii me.n
ham pe kyaa guzregii ajdaad pe kyaa guzrii hai?
in damakte hu.e shahro.n kii faraavaa.n maKHluuq
kyuu.n faqat marne kii hasrat me.n jiyaa kartii hai
ye hasii.n khet phaTaa pa.Dtaa hai jauban jin kaa!
kis liye in me.n faqat bhuuk ugaa kartii hai
ye har ik samt pur-asraar ka.Dii diivaare.n
jal-bujhe jin me.n hazaaro.n kii javaanii ke charaaG
ye har ik gaam pe un KHvaabo.n kii maqtal-gaahe.n
jin ke partav se charaaGaa.n hai.n hazaaro.n ke dimaaG
ye bhii hai.n aise ka.ii aur bhii mazmuu.n ho.nge
lekin us shoKH ke aahista se khulte hu.e ho.nT
haa.e us jism ke kambaKHt dil-aavez KHutuut
aap hii kahiye kahii.n aise bhii afsuu.n ho.nge

Faiz Ahmad Faiz
Nazm

muflisi

jab aadmii ke haal pe aatii hai muflisii
kis kis tarah se us ko sataatii hai muflisii
pyaasaa tamaam roz biThaatii hai muflisii
bhuukaa tamaam raat sulaatii hai muflisii
ye dukh vo jaane jis pe ki aatii hai muflisii
kahiye to ab hakiim kii sab se ba.Dii hai shaa.n
ta.aziim jis kii karte hai.n to ab aur KHaa.n
muflis hu.e to hazrat-e-luqmaa.n kiyaa hai yaa.n
iisaa bhii ho to ko.ii nahii.n puuchhtaa miyaa.n
hikmat hakiim kii bhii Dubaatii hai muflisii
jo ahl-e-fazl aalim o faazil kahaate hai.n
muflis hu.e to kalma talak bhuul jaate hai.n
vo jo Gariib-Gurabaa ke la.Dke pa.Dhaate hai.n
un kii to umr bhar nahii.n jaatii hai muflisii
muflis kare jo aan ke mahfil ke biich haal
sab jaane.n roTiyo.n kaa ye Daalaa hai is ne jaal
gir gir pa.De to ko.ii na liye use sambhaal
muflis me.n hove.n laakh agar ilm aur kamaal
sab KHaak bech aa ke milaatii hai muflisii
jab roTiyo.n ke baTne kaa aa kar pa.De shumaar
muflis ko deve.n ek tava.ngar ko chaar chaar
gar aur maa.nge vo to use jhi.Dke.n baar baar
muflis kaa haal aah bayaa.n kyaa karuu.n mai.n yaar
muflis ko is jagah bhii chabaatii hai muflisii
muflis kii kuchh nazar nahii.n rahtii hai aan par
detaa hai apnii jaan vo ek ek naan par
har aan TuuT pa.Dtaa hai roTii ke KHvaan par
jis tarah kutte la.Dte hai.n ik ustuKHvaan par
vaisaa hii mufliso.n ko la.Daatii hai muflisii
kartaa nahii.n hayaa se jo ko.ii vo kaam aah
muflis kare hai us ke ta.ii.n insiraam aah
samjhe na kuchh halaal na jaane haraam aah
kahte hai.n jis ko sharm-o-hayaa na.ng-o-naam aah
vo sab hayaa-o-sharm u.Daatii hai muflisii
ye muflisii vo shai hai ki jis ghar me.n bhar ga.ii
phir jitne ghar the sab me.n usii ghar ke dar ga.ii
zan bachche rote hai.n goyaa naanii guzar ga.ii
ham-saaya puuchhte hai.n ki kyaa daadii mar ga.ii
bin murde ghar me.n shor machaatii hai muflisii
laazim hai gar Gamii me.n ko.ii shor-Gul machaa.e
muflis baGair Gam ke hii kartaa hai haa.e haa.e
mar jaave gar ko.ii to kahaa.n se use uThaa.e
is muflisii kii KHvaariyaa.n kyaa kyaa kahuu.n mai.n haa.e
murde ko be kafan ke ga.Daatii hai muflisii
kyaa kyaa muflisii kii kahuu.n KHvaarii phaka.Diyaa.n
jhaa.Duu baGair ghar me.n bikhartii hai.n jhaka.Diyaa.n
kone me.n jaale lapTe hai.n chhappar me.n maka.Diyaa.n
paisaa na hove jin ke jalaane ko lak.Diyaa.n
dariyaa me.n un ke murde bahaatii hai muflisii
biibii kii nath na la.Dko.n ke haatho.n ka.De rahe
kap.De miyaa.n ke baniye ke ghar me.n pa.De rahe
jab ka.Diyaa.n bik ga.ii.n to kha.nDar me.n pa.De rahe
zanjiir ne kivaa.D na patthar ga.De rahe
aaKHir ko ii.nT ii.nT khudaatii hai muflisii
naqqaash par bhii zor jab aa muflisii kare
sab rang dam me.n kar de musavvir ke kirkire
suurat bhii us kii dekh ke mu.nh khi.nch rahe pare
tasviir aur naqsh me.n kyaa rang vo bhare
us ke to mu.nh kaa rang u.Daatii hai muflisii
jab KHuub-ruu pe aan ke pa.Dtaa hai din siyaah
phirtaa hai bose detaa hai har ik ko KHvaah-maKHvaah
hargiz kisii ke dil ko nahii.n hotii us kii chaah
gar husn ho hazaar ruupe kaa to us ko aah
kyaa kau.Diyo.n ke mol bikaatii hai muflisii
us KHuub-ruu ko kaun de ab daam aur diram
jo kau.Dii kau.Dii bose ko raazii ho dam-ba-dam
Topii puraanii do to vo jaane kulaah-e-jism
kyuu.nkar na jii ko us chaman-e-husn ke ho Gam
jis kii bahaar muft luTaatii hai muflisii
aashiq ke haal par bhii jab aa muflisii pa.De
ma.ashuuq apne paas na de us ko baiThne
aave jo raat ko to nikaale vahii.n use
is Dar se ya.anii raat o dhannaa kahii.n na de
tohmat ye aashiqo.n ko lagaatii hai muflisii
kaise hii dhuum-dhaam kii ranDii ho KHush-jamaal
jab muflisii ho kaan pa.De sar pe us ke jaal
dete hai.n us ke naach ko ThaTThe ke biich Daal
naache hai vo to farsh ke uupar qadam sambhaal
aur us ko u.ngliyo.n pe nachaatii hai muflisii
us kaa to dil Thikaane nahii.n bhaav kyaa bataa.e
jab ho phaTaa dupaTTa to kaahe se mu.nh chhupaa.e
le shaam se vo sub.h talak go ki naache gaa.e
auro.n ko aaTh saat to vo do Take hii paa.e
is laaj se ise bhii lajaatii hai muflisii
jis kasbii ranDii kaa ho halaakat se dil hazii.n
rakhtaa hai us ko jab ko.ii aa kar tamaash-bii.n
ik paun paise tak bhii vo kartii nahii.n nahii.n
ye dukh usii se puuchhiye ab aah jis ke ta.ii.n
sohbat me.n saarii raat jagaatii hai muflisii
vo to ye samjhe dil me.n ki Dhelaa jo paa.uu.ngii
dam.Dii ke paan dam.Dii ke missii ma.ngaa.uu.ngii
baaqii rahii chhadaam so paanii bharaa.uu.ngii
phir dil me.n sochtii hai ki kyaa KHaak khaa.uu.ngii
aaKHir chabiinaa us kaa bhunaatii hai muflisii
jab muflisii se hove kalaavant kaa dil udaas
phirtaa hai le tambuure ko har ghar ke aas-paas
ik paav ser aane kii dil me.n lagaa ke aas
gorii kaa vaqt hove to gaataa hai vo babhaas
yaa.n tak havaas us ke u.Daatii hai muflisii
muflis biyaah beTii kaa kartaa hai bol bol
paisaa kahaa.n jo jaa ke vo laave jahez mol
joruu kaa vo galaa ki phuuTaa ho jaise Dhol
ghar kii halaal-KHorii talak kartii hai ThiThol
haibat tamaam us kii uThaatii hai muflisii
beTe kaa biyaah ho to na byaahii na saathii hai
ne raushnii na baaje kii aavaaz aatii hai
maa.n piichhe ek mailii chadar o.Dhe jaatii hai
beTaa banaa hai duulhaa to baavaa baraatii hai
muflis kii ye baraat cha.Dhaatii hai muflisii
gar byaah kar chalaa hai sahar ko to ye balaa
shahdaar naanaa hiij.Daa aur bhaaT mu.nDcha.Daa
khii.nche hu.e use chale jaate hai.n jaa-ba-jaa
vo aage aage la.Dtaa hu.aa jaataa hai chalaa
aur piichhe Tap.Diyo.n ko bajaatii hai muflisii
darvaaze par zanaane bajaate hai.n taaliyaa.n
aur ghar me.n baiThii Domnii detii hai.n gaaliyaa.n
maalan gale kii haar ho dau.Dii le Daaliyaa.n
saqqaa kha.Daa sunaataa hai baate.n razaaliyaa.n
ye KHvaarii ye KHaraabii dikhaatii hai muflisii
ko.ii shuum be-hayaa ko.ii bolaa nikhaTTuu hai
beTii ne jaanaa baap to meraa nikhaTTuu hai
beTe pukaarte hai.n ki baabaa nikhaTTuu hai
biibii ye dil mai.n kahtii hai achchhaa nikhaTTuu hai
aaKHir nikhaTTuu naam dharaatii hai muflisii
muflis kaa dard dil me.n ko.ii Thaantaa nahii.n
muflis kii baat ko bhii ko.ii maantaa nahii.n
zaat aur hasab-nasab ko ko.ii jaantaa nahii.n
suurat bhii us kii phir ko.ii pahchaantaa nahii.n
yaa.n tak nazar se us ko giraatii hai muflisii
jis vaqt muflisii se ye aa kar hu.aa tabaah
phir ko.ii is ke haal pa kartaa nahii.n nigaah
daaliidarii kahe ko.ii Thahraa de ruu-siyaah
jo baate.n umr bhar na sunii hove.n us ne aah
vo baate.n us ko aa ke sunaatii hai.n muflisii
chuulhaa tavaanaa paanii ke maTke me.n aabii hai
piine ko kuchh na khaane ko aur ne rakaabii hai
muflis ke saath sab ke ta.ii.n be-hijaabii hai
muflis kii joruu sach hai ki yaa.n sab kii bhaabii hai
izzat sab us ke dil kii ga.nvaatii hai muflisii
kaisaa hii aadmii ho par iflaas ke tufail
ko.ii gadhaa kahe use Thahraa de ko.ii bail
kap.De phaTe tamaam ba.Dhe baal phail phail
mu.nh KHushk daa.nt zard badan par jamaa hai mail
sab shakl qaidiyo.n kii banaatii hai muflisii
har aan dosto.n kii mohabbat ghaTaatii hai
jo aashnaa hai.n un kii to ulfat ghaTaatii hai
apne kii mehr Gair kii chaahat ghaTaatii hai
sharm-o-hayaa o izzat-o-hurmat ghaTaatii hai
haa.n naaKHun aur baal ba.Dhaatii hai muflisii
jab muflisii hu.ii to sharaafat kahaa.n rahii
vo qadr zaat kii vo najaabat kahaa.n rahii
kap.De phaTe to logo.n me.n izzat kahaa.n rahii
ta.aziim aur tavaazo.a kii baabat kahaa.n rahii
majlis kii juutiyo.n pe biThaatii hai muflisii
muflis kisii kaa la.Dkaa jo le pyaar se uThaa
baap us kaa dekhe haath kaa aur paa.nv kaa ka.Daa
kahtaa hai ko.ii juutii na leve kahii.n churaa
naT-khaT uchakkaa chor daGaabaaz gaTh-kaTaa
sau sau tarah ke aib lagaatii hai muflisii
rakhtii nahii.n kisii kii ye Gairat kii aan ko
sab KHaak me.n milaatii hai hurmat kii shaan ko
sau mehnato.n me.n us kii khapaatii hai jaan ko
chorii pe aa ke Daale hii muflis ke dhyaan ko
aaKHir nadaan bhiik ma.ngaatii hai muflisii
duniyaa me.n le ke shaah se ai yaar taa-faqiir
KHaaliq na muflisii me.n kisii ko kare asiir
ashraaf ko banaatii hai ik aan me.n faqiir
kyaa kyaa mai.n muflisii kii KHaraabii kahuu.n 'naziir'
vo jaane jis ke dil ko jalaatii hai muflisii

Nazeer Akbarabadi
Nazm

roTiyan

jab aadmii ke peT me.n aatii hai.n roTiyaa.n
phuulii nahii.n badan me.n samaatii hai.n roTiyaa.n
aa.nkhe.n parii-ruKHo.n se la.Daatii hai.n roTiyaa.n
siine upar bhii haath chalaatii hai.n roTiyaa.n
jitne maze hai.n sab ye dikhaatii hai.n roTiyaa.n
roTii se jis kaa naak talak peT hai bharaa
kartaa pare hai kyaa vo uchhal kuud jaa-ba-jaa
diivaar phaa.nd kar ko.ii koThaa uchhal gayaa
ThaTThaa ha.nsii sharaab sanam saaqii is sivaa
sau sau tarah kii dhuum machaatii hai.n roTiyaa.n
jis jaa pe haa.nDii chuulhaa tavaa aur tanuur hai
KHaaliq kii qudrato.n kaa usii jaa zuhuur hai
chuulhe ke aage aa.nch jo chaltii huzuur hai
jitne hai.n nuur sab me.n yahii KHaas nuur hai
is nuur ke sabab nazar aatii hai.n roTiyaa.n
aave tave tanuur kaa jis jaa zabaa.n pe naam
yaa chakkii chuulhe ke jahaa.n gulzaar ho.n tamaam
vaa.n sar jhukaa ke kiije Da.nDvat aur salaam
is vaaste ki KHaas ye roTii ke hai.n maqaam
pahle inhii.n makaano.n me.n aatii hai.n roTiyaa.n
in roTiyo.n ke nuur se sab dil hai.n bor bor
aaTaa nahii.n hai chhalnii se chhan-chhan gire hai nuur
pe.Daa har ek us kaa hai barfii o motii chuur
hargiz kisii tarah na bujhe peT kaa tanuur
is aag ko magar ye bujhaatii hai.n roTiyaa.n
puuchhaa kasii ne ye kisii kaamil faqiir se
ye mehr-o-maah haq ne banaa.e hai.n kaahe ke
vo sun ke bolaa baabaa KHudaa tujh ko KHair de
ham to na chaa.nd samjhe.n na suuraj hai.n jaante
baabaa hame.n to ye nazar aatii hai.n roTiyaa.n
phir puuchhaa us ne kahiye ye hai dil kaa tuur kyaa
is ke mushaahide me.n hai khultaa zuhuur kyaa
vo bolaa sun ke teraa gayaa hai shu.uur kyaa
kashf-ul-quluub aur ye kashf-ul-qubuur kyaa
jitne hai.n kashf sab ye dikhaatii hai.n roTiyaa.n
roTii jab aa.ii peT me.n sau qand ghul ga.e
gulzaar phuule aa.nkho.n me.n aur aish tul ga.e
do tar nivaale peT me.n jab aa ke Dhul ga.e
chaudah tabaq ke jitne the sab bhed khul ga.e
ye kashf ye kamaal dikhaatii hai.n roTiyaa.n
roTii na peT me.n ho to phir kuchh jatan na ho
mele kii sair KHvaahish-e-baaG-o-chaman na ho
bhuuke Gariib dil kii KHudaa se lagan na ho
sach hai kahaa kasii ne ki bhuuke bhajan na ho
allaah kii bhii yaad dilaatii hai.n roTiyaa.n
ab aage jis ke maal-puu.e bhar ke thaal hai.n
puure bhagat unhe.n kaho saahab ke laal hai.n
aur jin ke aage roGnii aur shiir-maal hai.n
aarif vahii hai.n aur vahii saahab-kamaal hai.n
pakkii-pakaa.ii ab jinhe.n aatii hai.n roTiyaa.n
kap.De kisii ke laal hai.n roTii ke vaaste
lambe kisii ke baal hai.n roTii ke vaaste
baa.ndhe ko.ii rumaal hai.n roTii ke vaaste
sab kashf aur kamaal hai.n roTii ke vaaste
jitne hai.n ruup sab ye dikhaatii hai.n roTiyaa.n
roTii se naache pyaada qavaa.ed dikhaa dikhaa
asvaar naache gho.De ko kaava lagaa lagaa
ghu.nghruu ko baa.ndhe paik bhii phirtaa hai naachtaa
aur is sivaa jo Gaur se dekhaa to jaa-ba-jaa
sau sau tarah ke naach dikhaatii hai.n roTiyaa.n
roTii ke naach to hai.n sabhii KHalq me.n pa.De
kuchh bhaa.nD bhiigte ye nahii.n phirte naachte
ye ranDiyaa.n jo naache hai.n ghuu.nghaT ko mu.nh pe le
ghuu.nghaT na jaano dosto tum ziinhaar use
is parde me.n ye apne kamaatii hai.n roTiyaa.n
ashraafo.n ne jo apnii ye zaate.n chhupaa.ii hai.n
sach puuchhiye to apnii ye shaane.n ba.Dhaa.ii hai.n
kahiye unho.n kii roTiyaa.n kis kis ne khaa.ii hai.n
ashraaf sab me.n kahiye to ab naan-baa.ii hai.n
jin kii dukaa.n se har kahii.n jaatii hai.n roTiyaa.n
duniyaa me.n ab badii na kahii.n aur niko.ii hai
yaa dushmanii o dostii yaa tund-KHuu.ii hai
ko.ii kisii kaa aur kisii kaa na ko.ii hai
sab ko.ii hai usii kaa ki jis haath Do.ii hai
naukar nafar Gulaam banaatii hai.n roTiyaa.n
roTii kaa ab azal se hamaaraa to hai KHamiir
ruukhii hii roTii haq me.n hamaare hai shahd-o-shiir
yaa patlii hove moTii KHamiirii ho yaa fatiir
gehuu.n javaar baajre kii jaisii ho 'naziir'
ham ko to sab tarah kii KHush aatii hai.n roTiyaa.n

Nazeer Akbarabadi
Nazm

mere git

mire sarkash taraane sun ke duniyaa ye samajhtii hai
ki shaayad mere dil ko ishq ke naGmo.n se nafrat hai
mujhe ha.ngaama-e-ja.ng-o-jadal me.n kaif miltaa hai
mirii fitrat ko KHuu.n-rezii ke afsaane se raGbat hai
mirii duniyaa me.n kuchh vaq.at nahii.n hai raqs o naGma kii
miraa mahbuub naGma shor-e-aaha.ng-e-baGaavat hai
magar ai kaash dekhe.n vo mirii pur-soz raato.n ko
mai.n jab taaro.n pe nazre.n gaa.D kar aa.nsuu bahaataa huu.n
tasavvur ban ke bhuulii vaardaate.n yaad aatii hai.n
to soz-o-dard kii shiddat se pahro.n tilmilaataa huu.n
ko.ii KHvaabo.n me.n KHvaabiida uma.ngo.n ko jagaatii hai
to apnii zindagii ko maut ke pahluu me.n paataa huu.n
mai.n shaa.er huu.n mujhe fitrat ke nazzaaro.n se ulfat hai
miraa dil dushman-e-naGma-saraa.ii ho nahii.n saktaa
mujhe insaaniyat kaa dard bhii baKHshaa hai qudarat ne
miraa maqsad faqat sho.ala-navaa.ii ho nahii.n saktaa
javaa.n huu.n mai.n javaanii laGzisho.n kaa ek tuufaa.n hai
mirii baato.n me.n ra.ng-e-paarsaa.ii ho nahii.n saktaa
mirii sarkash taraano.n kii haqiiqat hai to itnii hai
ki jab mai.n dekhtaa huu.n bhuuk ke maare kisaano.n ko
Gariibo.n mufliso.n ko be-kaso.n ko be-sahaaro.n ko
sisaktii naazniino.n ko ta.Dapte nau-javaano.n ko
hukuumat ke tashaddud ko imaarat ke takabbur ko
kisii ke chiitha.Do.n ko aur shahanshaahii KHazaano.n ko
to dil taab-e-nashaat-e-bazm-e-ishrat laa nahii.n saktaa
mai.n chaahuu.n bhii to KHvaab-aavar taraane gaa nahii.n saktaa

Sahir Ludhianvi
Nazm

nashat-e-umid

ai mirii ummiid merii jaa.n-navaaz
ai mirii dil-soz merii kaarsaaz
merii sipar aur mire dil kii panaah
dard-o-musiibat me.n mirii takiya-gaah
aish me.n aur ranj mai.n merii shafiiq
koh me.n aur dasht me.n merii rafiiq
kaaTne vaalii Gam-e-ayyaam kii
thaamne vaalii dil-e-naakaam kii
dil pa pa.Daa aan ke jab ko.ii dukh
tere dilaase se milaa ham ko sukh
tuu ne na chho.Daa kabhii Gurbat me.n saath
tuu ne uThaayaa na kabhii sar se haath
jii ko ho kabhii agar usrat kaa ra.nj
khol diye tuu nai qanaa.at ke ganj
tujh se hai mohtaaj kaa dil be-hiraas
tujh se hai biimaar ko jiine kii aas
KHaatir-e-ranjuur kaa darmaa.n hai tuu
aashiq-e-mahjuur kaa iimaa.n hai tuu
nuuh kii kashtii kaa sahaaraa thii tuu
chaah me.n yuusuf kii dil-aaraa thii tuu
raam ke ham-raah cha.Dhii ran me.n tuu
paa.nDav ke bhii saath phirii ban me.n tuu
tuu ne sadaa qais kaa bahlaayaa dil
thaam liyaa jab kabhii ghabraayaa dil
ho gayaa farhaad kaa qissa tamaam
par tire fiqro.n pe rahaa KHush mudaam
tuu ne hii raa.njhe kii ye ba.ndhvaaii aas
hiir thii furqat me.n bhii goyaa ki paas
hotii hai tuu pusht pe himmat kii jab
mushkile.n aasaa.n nazar aatii hai.n sab
haath me.n jab aa ke liyaa tuu ne haat
saat samundar se guzarnaa hai baat
saath milaa jis ko tiraa do qadam
kahtaa hai vo ye hai arab aur ajam
gho.De kii lii apne jahaa.n tuu ne baag
saamne hai tere gayaa aur praag
azm ko jab detii hai tuu mel jast
gumbad-e-garduu.n nazar aataa hai past
tuu ne diyaa aa ke ubhaaraa jahaa.n
samjhe ki muTThii me.n hai saaraa jahaa.n
zarre ko KHurshiid me.n de khapaa
bande ko allaah se de tuu milaa
dono.n jahaa.n kii hai ba.ndhii tujh se la.D
diin kii tuu asl hai duniyaa kii ja.D
nekiyo.n kii tujh se hai qaa.em asaas
tuu na ho to jaa.e.n na nekii ke paas
diin kii tujh bin kahii.n pursish na ho
tuu na ho to haq kii parastish na ho
KHushk thaa bin tere daraKHt-e-amal
tuu ne lagaa.e hai.n ye sab phuul phal
dil ko lubhaatii hai kabhii ban ke huur
gaah dikhaatii hai sharaab-e-tahuur
naam hai sidra kabhii tuubaa tiraa
roz niraalaa hai tamaashaa tiraa
kausar o tasniim hai yaa salsabiil
jalve hai.n sab tere ye be-qaal-o-qiil
ruup hai.n har panth me.n tere alag
hai kahii.n firdaus kahii.n hai sovarg
chhuuT ga.e saare qariib aur ba.iid
ek na chhuuTii to na chhuuTii umiid
tere hii dam se kaTe jo din the saKHt
tere hii sadqe se milaa taaj-o-taKHt
KHaakiyo.n kii tujh se hai himmat buland
tuu na ho to kaam ho.n duniyaa ke band
tujh se hii aabaad hai kaun-o-makaa.n
tuu na ho to hai bhii barham jahaa.n
ko.ii pa.Dtaa phirtaa hai bahr-e-ma.aash
hai ko.ii iksiir ko kartaa talaash
ik tamannaa me.n hai aulaad kii
ek ko dil-daar kii hai lau lagii
ek ko hai dhan jo kuchh haath aa.e
dhuum se aulaad kii shaadii rachaa.e
ek ko kuchh aaj agar mil gayaa
kal kii hai ye fikr ki khaa.e.nge kyaa
qaum kii bahbuud kaa bhuukaa hai ek
jin me.n ho un ke liye anjaam-e-nek
ek ko hai tishnagii-e-qurb-e-haq
jis ne kiyaa dil se jigar tak hai shaq
jo hai Garaz us kii na.ii justujuu
laakh agar dil hai.n to laakh aarzuu
tujh se hai.n dil sab ke magar baaG baaG
gul ko.ii hone nahii.n paataa charaaG
sab ye samajhte hai.n ki paa.ii muraad
kahtii hai jab tuu ki ab aa.ii muraad
va.ada tiraa raast ho yaa ho daroG
tuu ne diye hai.n use kyaa kyaa faroG
va.ade vafaa kartii hai go chand tuu
rakhtii hai har ek ko KHursand tuu
bhaatii hai sab ko tirii lait-o-la.al
tuu ne kahaa.n siikhii hai ye aaj kal
talKH ko tuu chaahe to shiirii.n kare
bazm-e-azaa ko tarab-aagii.n kare
aane na de ranj ko muflis ke paas
rakhe Ganii us ko rahe jis ke paas
yaas kaa paatii hai jo tuu kuchh lagaav
saik.Do.n kartii hai utaar aur cha.Dhaa.o
aane nahii.n detii dilo.n par hiraas
TuuTne detii nahii.n taalib kii aas
jin ko mayassar na ho kamlii phaTii
KHush hai.n tavaqqo.a pe vo zar-baft kii
chaTnii se roTii kaa hai jin kii banaav
baiThe pakaate hai.n KHayaalii polaav
paa.nv me.n juutii nahii.n par hai ye zauq
gho.Daa jo sabza ho to niilaa ho tauq
faiz ke khole hai.n jahaa.n tuu ne baab
dekhte hai.n jho.npa.De mahlo.n ke KHvaab
tere karishme hai.n Gazab dil-fareb
dil me.n nahii.n chho.Dte sabr-o-shakeb
tujh se muhavvis ne jo shuuraa liyaa
phuu.nk diyaa kaan me.n kyaa jaane kyaa
dil se bhulaayaa zan o farzand ko
lag gayaa ghun naKHl-e-baroma.nd ko
khaane se piine se hu.aa sard jii
aisii kuchh iksiir kii hai lau lagii
diin kii hai fikr na duniyaa se kaam
dhun hai yahii raat din aur sub.h shaam
dho.nknii hai baiTh ke jab dho.nknaa
shah ko samajhtaa hai ik adnaa gadaa
paise ko jab taav pe detaa hai taav
puuchhtaa yaaro.n se hai sone kaa bhaav
kahtaa hai jab ha.nste hai.n sab dekh kar
rah ga.ii ik aa.nch kii baaqii kasar
hai isii dhu.nd me.n vo aasuuda-haal
tuu ne diyaa aql pe parda saa Daal
tol kar gar dekhiye us kii KHushii
ko.ii KHushii is ko na pahu.nche kabhii
phirte hai.n mohtaaj ka.ii tiira-baKHt
jan ke pairo.n me.n thaa kabhii taaj-o-taKHt
aaj jo bartan hai.n to kal ghar karo
maltii hai mushkil se inhe.n naan-e-jau
taire sivaa KHaak nahii.n in ke paas
saarii KHudaa.ii me.n hai le de ke aas
phuule samaate nahii.n is aas par
saahib-e-aalam unhe.n kahiye agar
khaate hai.n is aas pa qasme.n ajiib
jhuuTe ko ho taKHt na yaa-rab nasiib
hotaa hai naumiidiyo.n kaa jab hujuum
aatii hai hasrat kii ghaTaa jhuum jhuum
lagtii hai himmat kii kamar TuuTne
hausla kaa lagtaa hai jii chhuuTne
hotii hai be-sabrii o taaqat me.n ja.ng
arsa-e-aalam nazar aataa hai ta.ng
jii me.n ye aataa hai ki sam khaa.iye
phaa.D ke yaa kap.De nikal jaa.iye
baiThne lagtaa hai dil aave kii tarah
yaas Daraatii hai chhalaave kii tarah
hotaa hai shikva kabhii taqdiir kaa
u.Dtaa hai KHaaka kabhii tadbiir kaa
Thantii hai garduu.n se la.Daa.ii kabhii
hotii hai qismat kii ha.nsaa.ii kabhii
jaataa hai qaabuu se aaKHir dil nikal
kartii hai in mushkilo.n ko tuu hii hal
kaan me.n pahu.nchii tirii aahaT jo hai.n
raKHt-e-safar yaas nai baa.ndhaa vahii.n
saath ga.ii yaas ke pazhmurdagii
ho ga.ii kaafuur sab afsurdagii
tujh me.n chhupaa raahat-e-jaa.n kaa hai bhed
chho.Diyo 'haalii' kaa na saath ai umiid

Altaf Hussain Hali
Nazm

ek shahr-ashob ka aaghaz

ab bazm-e-suKHan sohbat-e-lab-soKHtagaa.n hai
ab halqa-e-mai taa.efaa-e-be-talabaa.n hai
ghar rahiye to viiraani-e-dil khaane ko aave
rah chaliye to har gaam pe GauGaa-e-sagaa.n hai
paivand-e-rah-e-kuucha-e-zar chashm-e-Gazaalaa.n
paabos-e-havas afsar-e-shamshaad-qadaa.n hai
yaa.n ahl-e-junuu.n yak-ba-digar dast-o-girebaa.n
vaa.n jaish-e-havas teG-ba-kaf darpa-e-jaa.n hai
ab saahab-e-insaaf hai KHud taalib-e-insaaf
mohr us kii hai miizaan ba-dast-e-digraa.n hai
ham sahal-talab kaun se farhaad the lekin
ab shahr me.n tere ko.ii ham saa bhii kahaa.n hai

Faiz Ahmad Faiz
Nazm

tumne likkha hai

tum ne likkhaa hai mire KHat mujhe vaapas kar do
Dar ga.ii.n husn-e-dil-aavez kii rusvaa.ii se
mai.n na kahtaa thaa ki tum mujh se mohabbat na karo
yuu.n na khelo mire jazbaat kii ra.anaa.ii se
sab samajhte the hamesha mujhe jaan-e-mahfil
ab miraa haal to puuchho mirii tanhaa.ii se
tum na.ii bazm sajaa logii tumhaaraa kyaa hai
tumhe.n Dhuu.nDe.ngii kahaa.n merii sulagtii raate.n
bhuul hii jaa.ogii do chaar dino.n me.n tum to
do dha.Dakte hu.e be-taab dilo.n kii baate.n
mai.n kahaa.n jaa.uu.ngaa mahruumii-e-dil ko le kar
phuuT kar ro.e.ngii jis vaqt bharii barsaate.n
kaash kuchh pyaar kaa anjaam to sochaa hotaa
chhiin lii merii javaanii se javaanii tum ne
mai.n na kahtaa thaa ki tum mujh se mohabbat na karo
laakh samjhaayaa magar ek na maanii tum ne
tum na maano to bhalaa kaun kahe kaun sune
pyaar puujaa hai parastish hai tijaarat to nahii.n
sone chaa.ndii ke liye ishq ko Thukraa denaa
khel ho saktaa hai me.ayaar-e-mohabbat to nahii.n
tum zar-o-siim kii miizaan me.n tul saktii ho
pyaar biktaa nahii.n chaahat kaa ko.ii mol nahii.n
is se pahle ki mire ishq par ilzaam dharo
dekh lo husn kii fitrat me.n to kuchh jhol nahii.n

Prem Warbartani
Nazm

saman diwali ka

kisii kii joruu kahe hai pukaar ai pha.Dve
bahuu kii naughre beTe ke haath ke kha.Dve
jo ghar me.n aave to sab mil kiye hai.n sau gha.Dve
nikal tuu yaa.n se tiraa kaam yaa.n nahii.n bha.Dve
KHudaa ne tujh ko to shohdaa kiyaa divaalii kaa

Nazeer Akbarabadi
Nazm

jagir

haa.e vo garm o dil-aavez ubalte siine
jin se ham satvat-e-aabaa kaa sila lete hai.n
jaane un marmarii.n jismo.n ko ye mariyal dahqaa.n
kaise in tiira gharo.ndo.n me.n janam dete hai.n

Sahir Ludhianvi
Nazm

tel ke saudagar

buKHaaraa samarqand ik KHaal-e-hinduu ke badle!
bajaa hai buKHaaraa samarqand baaqii kahaa.n hai.n?
buKHaaraa samarqand niindo.n me.n mad.hosh
ik niil-guu.n KHaamushii ke hijaabo.n me.n mastuur
aur rahravo.n ke liye un ke dar band
so.ii hu.ii mah-jabiino.n kii palko.n ke maanind
ruusii ''hama-uust'' ke taaziyaano.n se ma.azuur
do mah-jabiine.n!
buKHaaraa samarqand ko bhuul jaa.o
ab apne daraKHshanda shahro.n kii
tahraan o mash.had ke saqf o dar-o-baam kii fikr kar lo
tum apne na.e daur-e-hosh-o-amal ke dil-aavez chashmo.n ko
apnii na.ii aarzuu.o.n ke in KHuub-suurat kinaayo.n ko
mahfuuz kar lo!
in uu.nche daraKHshanda shahro.n kii
kotah fasiilo.n ko mazbuut kar lo
har ik burj-o-baaro par apne nigahbaa.n cha.Dhaa do
gharo.n me.n havaa ke sivaa
sab sadaa.o.n kii sham.e.n bujhaa do!
ki baahar fasiilo.n ke niiche
ka.ii din se rahzan hai.n KHema-fagan
tel ke buu.Dhe sauda-garo.n ke libaade pahan kar
vo kal raat yaa aaj kii raat kii tiirgii me.n
chale aa.e.nge ban ke mehmaa.n
tumhaare gharo.n me.n
vo daavat kii shab jaam-o-miinaa lu.Dhaa.e.nge
naache.nge gaa.e.nge
be-saaKHta qahqaho.n hamhamo.n se
vo garmaa.e.ngee KHuun-e-mahfil!

Noon Meem Rashid
Nazm

zanjir

har jagah phir siina-e-naKHchiir me.n
ik nayaa armaa.n na.ii ummiid paidaa ho chalii
hajla-e-siimii.n se tuu bhii piila-e-resham nikal
vo hasii.n aur duur-uftaada fara.ngii aurte.n
tuu ne jin ke husn-e-roz-afzuu.n kii ziinat ke liye
saalahaa be-dast-o-paa ho kar bune hai.n taar-haa-e-siim-o-zar
un ke mardo.n ke liye bhii aaj ik sa.ngiin jaal
ho sake to apne paikar se nikaal
shukr hai dumbaala-e-zanjiir me.n
ik na.ii jumbish na.ii larzish huvaidaa ho chalii
kohsaaro.n reg-zaaro.n se sadaa aane lagii
zulm-parvarda Gulaamo bhaag jaa.o
parda-e-shab-giir me.n apne salaasil to.D kar
chaar-suu chhaa.e hu.e zulmaat ko ab chiir jaa.o
aur is ha.ngaam-baad-aavar ko
hiila-e-shab-KHuu.n banaa.o

Noon Meem Rashid
Nazm

qissa gul-baadshah ka

log kahte hai.n ye amn kii ja.ng hai
amn kii ja.ng me.n hamla-aavar
sirf bachcho.n ko be-dast-o-paa chho.Dte hai.n
un ko bhuukaa nahii.n chho.Dte
aaKHir insaaniyat bhii ko.ii chiiz hai

Zehra Nigaah
Nazm

nae sur ki tamsil

kaamanii KHvaab kii lau me.n ha.nstii hu.ii kaamanii
sola baras kii taqviim me.n fasl-e-gul kaa ko.ii tazkira
tak na thaa
mai.n ne battiis battiis jha.D rute.n kaaT dii.n
ab jo tamsiil ke ek vaqfe me.n tum se milaa huu.n
to saa.nso.n me.n nam chaal me.n un zamaano.n kaa rum
jii uThaa hai
jo ahd-e-zamistaa.n me.n yaKH the
saqar saa saqar
kaamanii KHanda-e-gul kii kul zindagii
ek gulchii.n kii vahshat bharii aa.nkh hai
ye chaTaknaa ye khulnaa
bahut sehar-aavar sahii jaagne aur sone me.n ik
KHvaab-e-mauhuum se kuchh ziyaada nahii.n
KHvaab-o-KHvaahish ajab silsila hai
bahut duur bahtii hu.ii aabshaaro.n kaa ik silsila
jis me.n koh-e-tazabzub kii KHushbuu bhii hai
ahd-o-paimaa.n kaa jaaduu bhii
KHuu.n se suro.n tak
suro.n se us ik lafz tak
jis me.n raago.n kaa jauhar ba.ndhaa hai
kahii.n aimanii ras kahii.n maarvaa ThaaTh bhageshirii
bhairvii.n aur pahaa.Dii
vo sab kuchh jo apne lahuu me.n dahaktaa chahaktaa hai
jis ke tanaazur me.n ham biist-o-shash-saal
pahle ba.ndhe the
unhii aabshaaro.n se mujh ko sadaa aa rahii hai
so mai.n jaa rahaa huu.n
na.e sur uThaane
ki sargam kii farsuudgii diida-o-dil bujhaane lagii hai
nayaa sur jise lafz tartiib dete hai.n
pahu.nche to jaano ki saan.e.a ke lafzo.n se uThtii namii tum
tak aa.ii

Akhtar Usman
Nazm

aab o gil

mujhe yaad pa.Dtaa hai ik umr guzrii
lagaavaT kii shabnam me.n lahja Dubo kar
ko.ii mujh ko aavaaz detaa thaa aksar
bulaave kii maasuumiyat ke sahaare
mai.n aahista aahista pahu.nchaa yahaa.n tak
ba-har samt amboh-e-aavaar-gaa.n thaa
ba.De chaa.o se mai.n ne ik ik se puuchhaa
''kaho kyaa tum hii ne pukaaraa thaa mujh ko
kaho kyaa tum hii ne pukaaraa thaa mujh ko"
magar mujh se amboh-e-aavaar-gaa.n ne
hiraasaa.n hiraasaa.n pareshaa.n pareshaa.n
kahaa sirf itnaa nahii.n'' vo nahii.n ham
hame.n bhii bulaa kar ko.ii chhup gayaa hai''

Shaz Tamkanat
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now