Search result for "pakaa.e" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "pakaa.e"

Nazm MATCHES FOR "pakaa.e"

Nazm

dastak

subah subah ik KHvaab kii dastak par darvaaza khulaa' dekhaa
sarhad ke us paar se kuchh mehmaan aa.e hai.n
aa.nkho.n se maanuus the saare
chehre saare sune sunaa.e
paa.nv dhu.e, haath dhulaa.e
aa.ngan me.n aasan lagvaa.e
aur tannuur pe makkii ke kuchh moTe moTe roT pakaa.e
poTlii me.n mehmaan mire
pichhle saalo.n kii faslo.n kaa gu.D laa.e the

Gulzar

Nazm

badan se puri aankh hai meri

badan se puurii aa.nkh hai merii
jaa.o jaa-namaaz se apnii pasand kii du.aa uThaa lo
har rang kii du.aa mai.n maa.ng chukii
baaGbaa.n dil kaa biij tere paas bhii na hogaa
dekho dhu.e.n me.n aag kaise lagtii hai
mere pairahan kii tapish miTTii kaise jalaatii hai
badan se puurii aa.nkh hai merii
nigaah jo tane kii zaruurat hii kyaa pa.Dii hai
merii baarisho.n ke tiin rang hai.n
TuuTii kamaan pe ek nishaan KHataa kaa pa.Daa hai
ham chaahe.n to suuraj hamaarii roTii pakaa.e
aur ham suuraj ko tanduur kare.n
faisla chukaa diyaa KHataa apnii bhuul ga.e
nazar karne aa.e the chuTkii bhar aa.nkh
aa.nkh terii galiyo.n me.n to baazaar hai.n
zamiin aa.nkh chho.D kar samundar me.n so rahii
ja.ngal to sirf talaash hai
ghar to kaa.enaat ke pichhvaa.De hii rah gayaa
shikaar kamaan me.n pha.ns pha.ns kar maraa
tum kaise shikaarii
aa.nkhe.n tevaro.n se jal rahii hai.n
jism zindagii kii mulaazmat me.n hai
tanhaa.ii kashkol hai
ham ne aa.ankho.n se shamshiir khii.nchii
aur ruKHsat kii tasviir banaa.ii
raat god me.n sulaa.ii
aur chaa.nd kaa juutaa banvaayaa
ham ne raah me.n apne pairo.n ko janaa

Sara Shagufta

Nazm

insha

kabhii khul ke jab khilkhilaatii hai inshaa
fazaa.o.n me.n sargam bajaatii hai inshaa
har ik lab pe titlii biThaatii hai inshaa
jha.Dii qahqaho.n kii lagaatii hai inshaa
masarrat kii duniyaa basaatii hai inshaa
mire ghar ko jannat banaatii hai inshaa
kabhii maaysha ko ha.nsaatii hai inshaa
kabhii maaysha ko rulaatii hai inshaa
kabhii paas us ko bulaatii hai inshaa
kabhii duur us ko bhagaatii hai inshaa
bahan se to kasrat karaatii hai inshaa
mire ghar ko jannat banaatii hai inshaa
kahaanii sunaatii hai naanii ko inshaa
adaa.e.n dikhaatii hai naanii ko inshaa
masarrat dilaatii hai naanii ko inshaa
divaana banaatii hai naanii ko inshaa
javaanii bu.Dhaape me.n laatii hai inshaa
mire ghar ko jannat banaatii hai inshaa
kabhii Dhuu.nD laatii hai naanuu kaa chashma
kabhii phe.nk aatii hai naanuu kaa chashma
kabhii KHud lagaatii hai naanuu kaa chashma
kahii.n se bhii paatii hai naanuu kaa chashma
to aavaaz fauran lagaatii hai inshaa
mire ghar ko jannat banaatii hai inshaa
mobile par is tarah u.nglii ghumaa.e
ki jaise ko.ii shaKHs jaaduu chalaa.e
mobile ke parde pe hairat ugaa.e
hazaaro.n tarah ke karishme dikhaa.e
dikhaa kar karishme rijhaatii hai inshaa
mire ghar ko jannat banaatii hai inshaa
kabhii ko.ii khaane kaa manzar dikhaa.e
kabhii apnii u.nglii se pizza banaa.e
kabhii to mazedaar murGaa pakaa.e
salaado.n se khaane kii thaalii sajaa.e
kabhii chaa.e kaafii pilaatii hai inshaa
mire ghar ko jannat banaatii hai inshaa
falak paas jaa kar kabhii muskuraatii
kabhii chhe.Dtii to kabhii gudgudaatii
mahak ko kabhii apnaa kartab dikhaatii
kabhii baby nannaa ko poem sunaatii
har ik aadmii ko lubhaatii hai inshaa
mire ghar ko jannat banaatii hai inshaa
malaahat me.n is kii chamak hai Gazab kii
saraape me.n is ke lachak hai Gazab kii
sadaa.o.n me.n is kii khanak hai Gazab kii
adaa.o.n me.n is kii chahak hai Gazab kii
Gazab kaa nazaaraa dikhaatii hai inshaa
mire ghar ko jannat banaatii hai inshaa
chahetii kisii kii kisii kii dulaarii
kisii ko lage saare duniyaa se nyaarii
kisii ko ho mahsuus phuulo.n se bhaarii
sunny ko to hai jaan-o-dil se bhii pyaarii
bahut aamna ko bhii bhaatii hai inshaa
mire ghar ko jannat banaatii hai inshaa
mobile pe abbaa ko dekhe to Dole
chahak kar lapak kar zabaa.n apnii khole
masarrat se labrez alfaaz bole
shahd kaan me.n apne abbaa ke ghole
qatar tak mohabbat luTaatii hai inshaa
mire ghar ko jannat banaatii hai inshaa
mobile pe farhaan KHaa.n kii zabaanii
har ik raat suntii hai vo ik kahaanii
kahaanii me.n aatii hai jab ko.ii raanii
to bachchii se ban jaatii hai vo siyaanii
bahut daad abbaa se paatii hai inshaa
mire ghar ko jannat banaatii hai inshaa
kabhii apne gho.De se bhau.n bhau.n karaa.e
kabhii sher chiite ko bakrii banaa.e
kabhii sar pe billii ke haathii biThaa.e
kabhii doremon ko bhii paTTii pa.Dhaaye
anokhe tamaashe dikhaatii hai inshaa
mire ghar ko jannat banaatii hai inshaa
magar khaane piine se jii hai churaatii
zaraa der me.n mu.nh me.n luqma giraatii
bahut apnii ammaa.n se kasrat karaatii
kabhii naach tig.Dii kaa bhii vo nachaatii
khilaane me.n paagal banaatii hai inshaa
mire ghar ko jannat banaatii hai inshaa

Ghazanfar

Nazm

mausam

saal me.n aate mausam chaar
patjha.D garmii sardii bahaar
garmii kaa hai apnaa rang
kar detii hai sab ko tang
garmii joban par jab aa.e
aa kar ye faslo.n ko pakaa.e
garmii aa.e aam bhii laa.e
ye ham sab ke dil ko bhaa.e
KHarbuuze tarbuuz bhii aa.e.n
sab mil baiThe.n kaaTe.n khaa.e.n

Shahnaz Muzammil

Nazm

suraj se do do baaten

kheto.n me.n hai.n biij ugaa.e
kachche phal baaGo.n me.n pakaa.e

Naseem Amrohvi

Nazm

barish aai

aa.ndhii aa.ii
badlii chhaa.ii
bijlii chamkii baarish aa.ii
baaGo.n me.n bahaare.n laa.ii
dariyaa me.n tuGyaanii laa.ii
rim-jhim rim-jhim baarish aa.ii
koyal kuukii chi.Diyaa gaa.ii
chii.n-chii.n chuu.n-chuu.n kartii aa.ii
kaliyaa.n chaTkii.n phuul khile
har shai hai aaj nahaa.ii
rim-jhim rim-jhim baarish aa.ii
logo.n ne pakvaan pakaa.e
ghar ghar se phir KHushbuu aa.ii
rim-jhim rim-jhim baarish aa.ii

Seemin Barlas

Nazm

KHub-surat moD

tumhe.n bhii ko.ii uljhan roktii hai pesh-qadmii se
mujhe bhii log kahte hai.n ki ye jalve paraa.e hai.n
mire hamraah bhii rusvaa.iyaa.n hai.n mere maazii kii
tumhaare saath bhii guzrii hu.ii raato.n ke saa.e hai.n

Sahir Ludhianvi

Nazm

koi ye kaise batae

ko.ii ye kaise bataa.e ki vo tanhaa kyuu.n hai
vo jo apnaa thaa vahii aur kisii kaa kyuu.n hai
yahii duniyaa hai to phir aisii ye duniyaa kyuu.n hai
yahii hotaa hai to aaKHir yahii hotaa kyuu.n hai
ik zaraa haath ba.Dhaa de.n to paka.D le.n daaman
un ke siine me.n samaa jaa.e hamaarii dha.Dkan
itnii qurbat hai to phir faasla itnaa kyuu.n hai
dil-e-barbaad se niklaa nahii.n ab tak ko.ii
is luTe ghar pe diyaa kartaa hai dastak ko.ii
aas jo TuuT ga.ii phir se ba.ndhaataa kyuu.n hai
tum masarrat kaa kaho yaa ise Gam kaa rishta
kahte hai.n pyaar kaa rishta hai janam kaa rishta
hai janam kaa jo ye rishta to badaltaa kyuu.n hai

Kaifi Azmi

Nazm

ai ishq hamein barbaad na kar

us jaan-e-hayaa kaa bas nahii.n kuchh be-bas hai paraa.e bas me.n hai
be-dard dilo.n ko kyaa hai KHabar jo pyaar yahaa.n aapas me.n hai
hai bebasii zahr aur pyaar hai ras ye zahr chhupaa is ras me.n hai

Akhtar Shirani

Nazm

tasawwur

to kyaa mujhe tum jalaa hii logii gale se apne lagaa hii logii
jo phuul juu.De se gir pa.Daa hai ta.Dap ke us ko uThaa hii logii
bha.Dakte sho.alo.n, ka.Daktii bijlii se meraa KHirman bachaa hii logii
ghanerii zulfo.n kii chhaa.nv me.n muskuraa ke mujh ko chhupaa hii logii
ki aaj tak aazmaa rahii ho
ye KHvaab kaisaa dikhaa rahii ho
nahii.n mohabbat kii ko.ii qiimat jo ko.ii qiimat adaa karogii
vafaa kii fursat na degii duniyaa hazaar azm-e-vafaa karogii
mujhe bahalne do ranj-o-Gam se sahaare kab tak diyaa karogii
junuu.n ko itnaa na gudgudaa.o, paka.D luu.n daaman to kyaa karogii
qariib ba.Dhtii hii aa rahii ho
ye KHvaab kaisaa dikhaa rahii ho

Kaifi Azmi

Nazm

parchhaiyan

mujhe yaqii.n hai ki ham ab kabhii na bichh.De.nge
tumhe.n gumaan ki ham mil ke bhii paraa.e hai.n

Sahir Ludhianvi

Nazm

thak jaogi

paagal aa.nkho.n vaalii la.Dkii
itne mah.nge KHvaab na dekho
thak jaa.ogii
kaa.nch se naazuk KHvaab tumhaare
TuuT ga.e to
pachhtaa.ogii
soch kaa saaraa ujlaa kundan
zabt kii raakh me.n ghul jaa.egaa
kachche-pakke rishto.n kii KHushbuu kaa resham
khul jaa.egaa
tum kyaa jaano
KHvaab safar kii dhuup ke teshe
KHvaab adhuurii raat kaa dozaKH
KHvaab KHayaalo.n kaa pachhtaavaa
KHvaabo.n kii manzil rusvaa.ii
KHvaabo.n kaa haasil tanhaa.ii
tum kyaa jaano
mah.nge KHvaab KHariidnaa ho.n to
aa.nkhe.n bechnaa pa.Dtii hai.n yaa
rishte bhuulnaa pa.Dte hai.n

Mohsin Naqvi

Nazm

aansu

ye aa.nsuu kyaa ik gavaah hai
merii dard-mandii kaa merii insaan-dostii kaa
ye aa.nsuu kyaa ik subuut hai
merii zindagii me.n KHuluus kii ek raushnii kaa
ye aa.nsuu kyaa ye bataa rahaa hai
ki mere siine me.n ek hassaas dil hai
jis ne kisii kii dil-doz daastaa.n jo sunii
to sun ke ta.Dap uThaa hai
paraa.e sho.alo.n me.n jal rahaa hai
pighal rahaa hai
magar me.n phir KHud se puuchhtaa huu.n
ye daastaa.n to abhii sunii hai
ye aa.nsuu bhii kyaa abhii Dhalaa hai
ye aa.nsuu
kyaa mai.n ye samjhuu.n
pahle kahii.n nahii.n thaa
mujhe to shak hai ki ye kahii.n thaa
ye mere dil aur merii palko.n ke darmiyaa.n
ik jo faasla hai
jahaa.n KHayaalo.n ke shahr zinda hai.n
aur KHvaabo.n kii turbate.n hai.n
jahaa.n mohabbat ke uj.De baaGo.n me.n
talKHiyo.n ke babuul hai.n
aur kuchh nahii.n hai
jahaa.n se aage hai.n
uljhano.n ke ghanere ja.ngal

Javed Akhtar

Nazm

bahut dinon ki baat hai

mai.n kuchh isii KHushii me.n thaa
kisii ne jhaa.nk kar kahaa
paraa.e ghar se jaa.iye
mirii qism na aa.iye
na aa.iye na aa.iye
vahii hasiin shaam hai
bahaar jis kaa naam hai
chalaa huu.n ghar ko chho.D kar
na jaane jaa.uu.ngaa kidhar
ko.ii nahii.n jo Tok kar
ko.ii nahii.n jo rok kar
kahe ki lauT aa.iye
mirii qism na jaa.iye

Salam Machhli shahri

Nazm

ek KHwab

ek hii KHvaab ka.ii baar yuu.nhii dekhaa mai.n ne
tuu ne saa.Dii me.n u.Das lii hai.n mirii chaabiyaa.n ghar kii
aur chalii aa.ii hai bas yuu.nhii miraa haath paka.D kar
ghar kii har chiiz sambhaale hu.e apnaa.e hu.e tuu

Gulzar

Nazm

pashemani

mai.n ye soch kar us ke dar se uThaa thaa
ki vo rok legii manaa legii mujh ko
havaa.o.n me.n lahraataa aataa thaa daaman
ki daaman paka.D kar biThaa legii mujh ko
qadam aise andaaz se uTh rahe the
ki aavaaz de kar bulaa legii mujh ko

Kaifi Azmi

Nazm

wo jo shaer tha

vo jo shaa.er thaa, chup saa rahtaa thaa
bahkii bahkii sii baate.n kartaa thaa
aa.nkhe.n kaano.n pe rakh ke suntaa thaa
guu.ngii KHaamoshiyo.n kii aavaaze.n!
jam.a kartaa thaa chaa.nd ke saa.e
giilii giilii sii nuur kii buu.nde.n
ok me.n bhar ke kha.Dkha.Daataa thaa
ruukhe ruukhe se raat ke patte
vaqt ke is ghanere jangal me.n
kachche pakke se lamhe chuntaa thaa

Gulzar

Nazm

falastini bachche ke liye lori

(2)
mat ro bachche
ro ro ke abhii
terii ammii kii aa.nkh lagii hai
mat ro bachche
kuchh hii pahle
tere abbaa ne
apne Gam se ruKHsat lii hai
mat ro bachche
teraa bhaa.ii
apne KHvaab kii titlii piichhe
duur kahii.n pardes gayaa hai
mat ro bachche
terii baajii kaa
Dolaa paraa.e des gayaa hai
mat ro bachche
tere aa.ngan me.n
murda suuraj nahlaa ke ga.e hai.n
chandarmaa dafnaa ke ga.e hai.n
mat ro bachche
ammii, abbaa, baajii, bhaa.ii
chaa.nd aur suuraj
tuu gar ro.egaa to ye sab
aur bhii tujh ko rulvaa.e.nge
tuu muskaa.egaa to shaayad
saare ik din bhes badal kar
tujh se khelne lauT aa.e.nge

Faiz Ahmad Faiz

Nazm

jugnu

kabhii na khii.nchaa sharaarat se jis kaa aa.nchal bhii
rachaa sakii mirii aa.ankho.n me.n jo na kaajal bhii
vo maa.n jo mere liye titliyaa.n paka.D na sakii
jo bhaagte hu.e baazuu mire jaka.D na sakii
ba.Dhaayaa pyaar kabhii kar ke pyaar me.n na kamii
jo mu.nh banaa ke kisii din na mujh se ruuTh sakii
jo ye bhii kah na sakii jaa na boluu.ngii tujh se
jo ek baar KHafaa bhii na ho sakii mujh se
vo jis ko juuThaa lagaa mu.nh kabhii dikhaa na sakaa
kasaafato.n pe mirii jis ko pyaar aa na sakaa
jo miTTii khaane pe mujh ko kabhii na piiT sakii
na haath thaam ke mujh ko kabhii ghasiiT sakii
vo maa.n jo guftuguu kii rau me.n sun ke merii ba.D
kabhii jo pyaar se mujh ko na kah sakii ghaama.D
sharaarato.n se mirii jo kabhii ulajh na sakii
himaaqato.n kaa mirii falsafa samajh na sakii
vo maa.n kabhii jise chau.nkaane ko mai.n luk na sakaa
mai.n raah chhe.nkne ko jis ke aage ruk na sakaa
jo apne haath se bahruup mere bhar na sakii
jo apnii aa.ankho.n ko aa.iina meraa kar na sakii
gale me.n Daalii na baaho.n kii phuul-maalaa bhii
na dil me.n lauh-e-jabii.n se kiyaa ujaalaa bhii
vo maa.n kabhii jo mujhe baddhiyaa.n pahnaa na sakii
kabhii mujhe na.e kap.Do.n se jo sajaa na sakii
vo maa.n na jis se la.Dakpan ke jhuuT bol sakaa
na jis ke dil ke daraa.n kunjiyo.n se khol sakaa
vo maa.n mai.n paise bhii jis ke kabhii churaa na sakaa
sazaa se bachne ko jhuuTii qasam bhii khaa na sakaa

Firaq Gorakhpuri

Nazm

roTiyan

jab aadmii ke peT me.n aatii hai.n roTiyaa.n
phuulii nahii.n badan me.n samaatii hai.n roTiyaa.n
aa.nkhe.n parii-ruKHo.n se la.Daatii hai.n roTiyaa.n
siine upar bhii haath chalaatii hai.n roTiyaa.n
jitne maze hai.n sab ye dikhaatii hai.n roTiyaa.n
roTii se jis kaa naak talak peT hai bharaa
kartaa pare hai kyaa vo uchhal kuud jaa-ba-jaa
diivaar phaa.nd kar ko.ii koThaa uchhal gayaa
ThaTThaa ha.nsii sharaab sanam saaqii is sivaa
sau sau tarah kii dhuum machaatii hai.n roTiyaa.n
jis jaa pe haa.nDii chuulhaa tavaa aur tanuur hai
KHaaliq kii qudrato.n kaa usii jaa zuhuur hai
chuulhe ke aage aa.nch jo chaltii huzuur hai
jitne hai.n nuur sab me.n yahii KHaas nuur hai
is nuur ke sabab nazar aatii hai.n roTiyaa.n
aave tave tanuur kaa jis jaa zabaa.n pe naam
yaa chakkii chuulhe ke jahaa.n gulzaar ho.n tamaam
vaa.n sar jhukaa ke kiije Da.nDvat aur salaam
is vaaste ki KHaas ye roTii ke hai.n maqaam
pahle inhii.n makaano.n me.n aatii hai.n roTiyaa.n
in roTiyo.n ke nuur se sab dil hai.n bor bor
aaTaa nahii.n hai chhalnii se chhan-chhan gire hai nuur
pe.Daa har ek us kaa hai barfii o motii chuur
hargiz kisii tarah na bujhe peT kaa tanuur
is aag ko magar ye bujhaatii hai.n roTiyaa.n
puuchhaa kasii ne ye kisii kaamil faqiir se
ye mehr-o-maah haq ne banaa.e hai.n kaahe ke
vo sun ke bolaa baabaa KHudaa tujh ko KHair de
ham to na chaa.nd samjhe.n na suuraj hai.n jaante
baabaa hame.n to ye nazar aatii hai.n roTiyaa.n
phir puuchhaa us ne kahiye ye hai dil kaa tuur kyaa
is ke mushaahide me.n hai khultaa zuhuur kyaa
vo bolaa sun ke teraa gayaa hai shu.uur kyaa
kashf-ul-quluub aur ye kashf-ul-qubuur kyaa
jitne hai.n kashf sab ye dikhaatii hai.n roTiyaa.n
roTii jab aa.ii peT me.n sau qand ghul ga.e
gulzaar phuule aa.nkho.n me.n aur aish tul ga.e
do tar nivaale peT me.n jab aa ke Dhul ga.e
chaudah tabaq ke jitne the sab bhed khul ga.e
ye kashf ye kamaal dikhaatii hai.n roTiyaa.n
roTii na peT me.n ho to phir kuchh jatan na ho
mele kii sair KHvaahish-e-baaG-o-chaman na ho
bhuuke Gariib dil kii KHudaa se lagan na ho
sach hai kahaa kasii ne ki bhuuke bhajan na ho
allaah kii bhii yaad dilaatii hai.n roTiyaa.n
ab aage jis ke maal-puu.e bhar ke thaal hai.n
puure bhagat unhe.n kaho saahab ke laal hai.n
aur jin ke aage roGnii aur shiir-maal hai.n
aarif vahii hai.n aur vahii saahab-kamaal hai.n
pakkii-pakaa.ii ab jinhe.n aatii hai.n roTiyaa.n
kap.De kisii ke laal hai.n roTii ke vaaste
lambe kisii ke baal hai.n roTii ke vaaste
baa.ndhe ko.ii rumaal hai.n roTii ke vaaste
sab kashf aur kamaal hai.n roTii ke vaaste
jitne hai.n ruup sab ye dikhaatii hai.n roTiyaa.n
roTii se naache pyaada qavaa.ed dikhaa dikhaa
asvaar naache gho.De ko kaava lagaa lagaa
ghu.nghruu ko baa.ndhe paik bhii phirtaa hai naachtaa
aur is sivaa jo Gaur se dekhaa to jaa-ba-jaa
sau sau tarah ke naach dikhaatii hai.n roTiyaa.n
roTii ke naach to hai.n sabhii KHalq me.n pa.De
kuchh bhaa.nD bhiigte ye nahii.n phirte naachte
ye ranDiyaa.n jo naache hai.n ghuu.nghaT ko mu.nh pe le
ghuu.nghaT na jaano dosto tum ziinhaar use
is parde me.n ye apne kamaatii hai.n roTiyaa.n
ashraafo.n ne jo apnii ye zaate.n chhupaa.ii hai.n
sach puuchhiye to apnii ye shaane.n ba.Dhaa.ii hai.n
kahiye unho.n kii roTiyaa.n kis kis ne khaa.ii hai.n
ashraaf sab me.n kahiye to ab naan-baa.ii hai.n
jin kii dukaa.n se har kahii.n jaatii hai.n roTiyaa.n
duniyaa me.n ab badii na kahii.n aur niko.ii hai
yaa dushmanii o dostii yaa tund-KHuu.ii hai
ko.ii kisii kaa aur kisii kaa na ko.ii hai
sab ko.ii hai usii kaa ki jis haath Do.ii hai
naukar nafar Gulaam banaatii hai.n roTiyaa.n
roTii kaa ab azal se hamaaraa to hai KHamiir
ruukhii hii roTii haq me.n hamaare hai shahd-o-shiir
yaa patlii hove moTii KHamiirii ho yaa fatiir
gehuu.n javaar baajre kii jaisii ho 'naziir'
ham ko to sab tarah kii KHush aatii hai.n roTiyaa.n

Nazeer Akbarabadi

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now