Search result for "sa.dak" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "sa.dak"

Nazm MATCHES FOR "sa.dak"

Nazm

nazm

jis kaa Dar thaa mujhe maa'luum pa.Daa logo.n se
phir vo KHush-baKHt palaT aaya tirii duniyaa me.n
jis ke jaane pe mujhe tuu ne jagah dii dil me.n
merii qismat me.n hii jab KHaalii jagah likkhii thii
tujh se shikva bhii agar kartaa to kaise kartaa
mai.n vo sabza thaa jise rau.nd diyaa jaataa hai
mai.n vo jangal thaa jise kaaT diyaa jaataa hai
mai.n vo dar thaa jise dastak kii kamii khaatii hai
mai.n vo manzil thaa jahaa.n TuuTii sa.Dak jaatii hai
mai.n vo ghar thaa jise aabaad nahii.n kartaa ko.ii
mai.n to vo thaa ki jise yaad nahii.n kartaa ko.ii

Tahzeeb Hafi

Nazm

bhuk

dopahar kii garmii me.n
be-iraada qadmo.n se
ik sa.Dak pe chaltaa huu.n
ta.ng sii sa.Dak par hai.n
dono.n samt dokaane.n
KHaalii KHaalii aa.nkho.n se
har dukaan kaa taKHta
sirf dekh saktaa huu.n
ab pa.Dhaa nahii.n jaataa
log aate jaate hai.n
paas se guzarte hai.n
phir bhii kitne dhu.ndle hai.n
sab hai.n jaise be-chehra
shor in dukaano.n kaa
raah chaltii ik gaalii
radio kii aavaaze.n
duur kii sadaa.e.n hai.n
aa rahii miilo.n se
jo bhii sun rahaa huu.n mai.n
jo bhii dekhtaa huu.n mai.n
KHvaab jaisaa lagtaa hai
hai bhii aur nahii.n bhii hai
dopahar kii garmii me.n
be-iraada qadmo.n se
ik sa.Dak pe chaltaa huu.n
saamne ke nukka.D par
nal dikhaa.ii detaa hai
saKHt kyuu.n hai ye paanii
kyuu.n gale me.n pha.nstaa hai
mere peT me.n jaise
ghuu.nsa ek lagtaa hai
aa rahaa hai chakkar saa
jism par pasiina hai
ab sakat nahii.n baaqii
aaj tiisraa din hai
aaj tiisraa din hai

Javed Akhtar

Nazm

mohabbat ke raste mein

mohabbat ke raaste me.n
ek sa.Dak hai
jo mohabbat kii taraf nahii.n jaatii
aur ek pul hai
jo kisii sa.Dak yaa dariyaa ko
paar karne me.n istima.al nahii.n hotaa

Zeeshan Sahil

Nazm

jalwa-e-darbar-e-dehli

surKHii sa.Dak par kuTtii dekhii
saa.ns bhii bhii.D me.n ghuTtii dekhii
aatish-baazii chhuTtii dekhii
lutf kii daulat luTtii dekhii

Akbar Allahabadi

Nazm

KHuda KHamosh hai

bahut se kaam hai.n
lipTii hu.ii dhartii ko phailaa de.n
daraKHto.n ko ugaa.e.n
Daaliyo.n pe phuul mahkaa de.n
pahaa.Do.n ko qariine se lagaa.e.n
chaa.nd laTkaa.e.n
KHalaa.o.n ke saro.n pe niil-guu.n aakaash
phailaa.e.n
sitaaro.n ko kare.n raushan
havaa.o.n ko gatii de de.n
phudakte pattharo.n ko pa.nkh de kar naGmagii de de.n
labo.n ko muskuraahaT
a.nkh.Diyo.n ko raushnii de de.n
sa.Dak par Doltii parchhaa.iyo.n ko
zindagii de de.n

Nida Fazli

Nazm

ek sham

lambii chau.Dii sa.Dak ke daaman par
qumqume sahme sahme jalte hai.n
jaise aksar ba.De gharaano.n me.n
faaqa-kash rishta-daar palte hai.n

Mustafa Zaidi

Nazm

na mera makan hi badal gaya na tera pata koi aur hai

jo sajaa.ii jaatii hai raat ko vo hamaarii bazm-e-KHayaal hai
jo sa.Dak pe hotaa hai raat din vo mushaa.era ko.ii aur hai

Dilawar Figar

Nazm

ibn-e-maryam

takte rahte ho us sa.Dak kii taraf
dafn jin me.n ka.ii kahaaniyaa.n hai.n
dafn jin me.n ka.ii javaaniyaa.n hai.n
jis pe ik saath bhaagii phirtii hai.n
KHaalii jebe.n bhii aur tijoriyaa.n bhii
jaane kis kaa hai intizaar tumhe.n

Kaifi Azmi

Nazm

chiDiyon ka shor

safed kaaGaz par
pencil ke chalne kii aavaaz
bahut kam hai
sa.Dak par tank guzarne kii aavaaz
is se kuchh ziyaada hai
aur shaayad merii aavaaz
in dono.n aavaazo.n se ziyaada hai

Zeeshan Sahil

Nazm

husn aur mazduri

ek doshiiza sa.Dak par dhuup me.n hai be-qaraar
chuu.Diyaa.n bajtii hai.n ka.nkar kuuTne me.n baar baar

Josh Malihabadi

Nazm

us ka dil to achchha dil tha

ek hai aisii la.Dkii jis se tum ne ha.ns kar baat na kii
kabhii na dekhaa us kii aa.nkho.n me.n chamke kaise motii
kabhii na sochaa tum se aisii baate.n vo kyuu.n kahtii hai
kabhii na samjhaa milte ho to ghabraa.ii kyuu.n rahtii hai
kaise us ruKHsaar kii ra.ngat sarso.n jaisii zard hu.ii
jab tak milii nahii.n thii tum se vo aisii tanhaa to na thii
mil kar aa.nkh bahaane se vo kab tak aa.nsuu rokegii
us ke ho.nTo.n kii larzish bhii tum ne kabhii nahii.n dekhii
kyuu.n aisii sunsaan sa.Dak par use akelaa chho.D diyaa
us kaa dil to achchhaa dil thaa jis ko tum ne yuu.n to.D diyaa
vo kuchh naadim vo kuchh hairaa.n rasta Dhuu.nDaa kartii thii
Dhaltii dhuup me.n apnaa be kal saaya dekh ke ha.nstii thii
aaKHir suuraj Duub gayaa aur raah me.n us ko shaam hu.ii

Fahmida Riaz

Nazm

ek laDki

kaisaa saKHt tuufaa.n thaa
kitnii tez baarish thii
aur mai.n aise mausam me.n
jaane kyuu.n bhaTaktii thii
vo sa.Dak ke us jaanib
raushnii ke khambe se!
sar lagaa.e istaada
aane vaale gaahak ke
intizaar me.n gum thii!
KHaal-o-KHad kii aaraa.ish
bah rahii thii baarish me.n
tiir nok-e-mizhgaa.n ke
mil ga.e the miTTii me.n
gesu.o.n kii KHush-ra.ngii
u.D rahii thii jho.nko.n me.n
mai.n ne dil me.n ye sochaa
aab o baad kaa relaa!
us ko raakh kar degaa
ye sajaa banaa chehra!
kyaa Daraavnaa hogaa
phir bhii us ko le jaanaa
aane vaale gaahak kaa
apnaa hausla hogaa

Zehra Nigaah

Nazm

rikshe wala

dekho Gariib kitnii zahmat uThaa rahaa hai
galiyo.n me.n bhii.D vaalii rickshaw chalaa rahaa hai
mahruum hai agarche duniyaa kii ne.amato.n se
har bojh zindagii kaa ha.ns kar uThaa rahaa hai
barsaat me.n bhii dekho phirtaa hu.aa sa.Dak par
rickshaw bhii bhiigtaa hai KHud bhii nahaa rahaa hai
garmii kii dhuup me.n bhii ruktaa nahii.n hai ghar me.n
pur-pech raasto.n ke phere lagaa rahaa hai
sardii se kaa.nptaa hai kap.De phaTe hu.e hai.n
ThanDii havaa se KHud ko kaise bachaa rahaa hai
mastii me.n dau.Dtaa hai rickshaw liye sa.Dak par
naGma ko.ii suriilaa ab gungunaa rahaa hai
rikshe ke pedalo.n par rakhe hai.n paa.nv dono.n
aa.nkhe.n hai.n raaste par ghanTii bajaa rahaa hai
maa.n baap muntazir hai.n ghar par sabhii ke 'aadil'
bachcho.n ko ab vo lene school jaa rahaa hai

Aadil Aseer Dehlvi

Nazm

ganw ki saDak

ye des muflis-o-naadaar kaj-kulaaho.n kaa
ye des be-zar-o-diinaar baadshaaho.n kaa
ki jis kii KHaak me.n qudrat hai kiimiyaa.ii kii
ye naaibaan-e-KHudaavand-e-arz kaa maskan
ye nek paak buzurgo.n kii ruuh kaa madfan
jahaa.n pe chaa.nd sitaaro.n ne jubba-saa.ii kii
na jaane kitne zamaano.n se is kaa har rasta
misaal-e-KHaana-e-be-KHaanumaa.n thaa darbasta

Faiz Ahmad Faiz

Nazm

kal raat

kal raat
vo thakaa hu.aa
chup chup
udaas udaas
suntaa rahaa sa.Dak se guzartii baso.n kaa shor

Nida Fazli

Nazm

bas

ga.e leTne raat Dhalte hu.e
uThe sub.h ko aa.nkh malte hu.e
nahaa dho ke kap.De badalte hu.e
uThaa.ii kitaab aur chalte hu.e
savere kaa jab tak ki school hai
yahii apnaa har roz ma.amuul hai
kha.De hai.n sa.Dak par ki ab aa.ii bas
guzartaa hai ik ik minute ik baras
bas aa.ii to rush is qadar pesh-o-pas
ki allaah bas aur baaqii havas
ba.Dhe ham bhii cha.Dhne ko jab sab ke saath
to handle pe thaa paa.nv pedal pe haath
passenger kii vo bhii.D vo bas kaa gate
guzarte hai.n machchhar jahaa.n par sameT
ko.ii ho gayaa choT khaa kar flat
kisii kii hai kohnii kisii kaa hai peT
kha.De ho.n kahaa.n paa.nv rakkhe.n kidhar
a.ndheraa idhar hai a.ndheraa udhar
magar hukm checker kaa hai aa.iye
kha.De kyo.n hai.n aage ba.Dhe jaa.iye
jahaa.n me.n jahaa.n tak jagah paa.iye
khisakte khisakte chale jaa.iye
sitaaro.n se aage jahaa.n aur hai.n
zamii.n aur hai.n aasmaa.n aur hai.n

Kaleem Aajiz

Nazm

diwali

ghuT gayaa a.ndhere kaa aaj dam akele me.n
har nazar Tahaltii hai raushnii ke mele me.n
aaj Dhuu.nDhne par bhii mil sakii na taariikii
maut kho ga.ii shaayad zindagii ke rele me.n
is tarah se ha.nstii hai.n aaj diip-maalaa.e.n
shoKHiyaa.n kare.n jaise saath mil ke baalaa.e.n
har galii na.ii dulhan har sa.Dak hasiina hai
har dehaat a.nguuThii hai har nagar nagiina hai
pa.D ga.ii hai KHatre me.n aaj yam kii yamraajii
maut ke bhii maathe par maut kaa pasiina hai
raat ke karuu.n mai.n hai aaj raat kaa ka.ngan
ik suhaaganii ban kar chhaa.ii jaatii hai jogan
qumqume jale ghar ghar raushnii hai paT paT par
le ke ko.ii ma.ngal-ghaT chhaa gayaa hai ghaT ghaT par
raushnii karo lekin farz par na aa.nch aa.e
ho nigaah siimaa par aur kaan aahaT par
hoshiyaar un se bhii jo nigaah phere hai.n
paak hii nahii.n tanhaa aur bhii luTere hai.n
chho.D apnii naapaakii yaa badal de apnii dhun
maut legaa yaa jiivan do me.n jis ko chaahe chun
ham hai.n krishn kii liilaa ham hai.n viir bhaarat ke
ham nakul hai.n ham sahdev ham hai.n bhiim ham arjun
daropdii se durghaTnaa duur kar ke chho.De.nge
ai samay ke duryodhan chuur kar ke chho.De.nge
qabr ho samaadhii ho sab ko jagmagaa.e.nge
dhuum se shahiido.n kaa sog ham manaae.nge
tum se kaam lenaa hai ham ko diip-maalaa.o
saare diip kii lau se dil kii lau ba.Dhaa.e.nge
sab se garmiyaa.n le kar siine me.n chhupaanaa hai
dil ko is divaalii se agnii bam banaanaa hai

Nazeer Banarasi

Nazm

hum

vo shaam ke vaqt KHuu.n me.n lat-pat
sa.Dak ke kinaare pa.Daa hu.aa thaa
guzarne vaalo.n se kah rahaa thaa
hame.n hamaare muhaafizo.n se
najaat kaa raasta bataa.o
vo KHvaahish-e-iqtidar-o-daulat me.n
ham ko niilaam kar rahe hai.n
uKHuvvat-o-ittihaad kaa dard dene vaale
KHud apne bachcho.n ke KHuu.n se
hirs-o-havas kii sham.e.n jalaa rahe hai.n
hamaarii aqdaar
aaj matruuk fashiono.n ke libaas kii tarah
un kii nazro.n se gir chukii hai.n
ab un kii aulaad un kii resha-davaaniyo.n se panaah
taaza b-taaza nasho.n me.n Dhuu.nDtii hai
inhii kii shah paa ke nasl-e-nau
apnii pyaas ik duusre ke KHuu.n se bujhaa rahii hai
ye sa.ng-dil jashn-e-marg-e-amboh-e-be-gunaahaa.n manaa rahe hai.n
ko.ii hame.n in najiib suurat
hariis be-mehr kargo.n se
najaat kaa raasta bataa.o

Zia Jalandhari

Nazm

itne bahut se rang

salaaKHo.n se udhar
kuchh daraKHt, ek sa.Dak, kutte kii zanjiir thaame ek aadmii
aur ek Dor jis par ra.ng-bira.nge kap.De suukh rahe hai.n
jismo.n ke baGair ye kap.De, bachcho.n ke baGair ye maidaan
mohabbat ke baGair ye raaste
duniyaa kitnii chhoTii nazar aatii hai
ra.ng-bira.nge kap.De suukh jaane par
ek aurat aa.egii
tab ek ek kar ke ye qamiize.n, patluune.n aur faraake.n
apne apne jism haasil kar le.nge
tab maidaan bachcho.n se
aur bachche KHushii se bhar jaa.e.nge
ye chhoTii sii kaa.enaat ra.ngo.n se bhar jaa.egii
itne bahut se ra.ng
ai aurat, itne bahut se ra.ng!

Sarvat Husain

Nazm

guzargah par tamasha

khulii sa.Dak viiraan pa.Dii thii
bahut ajab thii shaam
uu.nchaa qad aur chaal niraalii
nazre.n KHuu.n-aashaam

Muneer Niyazi

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now