Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "saalim"

Nazm MATCHES FOR "saalim"

Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

shishon ka masiha koi nahin

ye saaGar shiishe laal-o-gohar
saalim ho.n to qiimat paate hai.n
yuu.n Tuk.De Tuk.De ho.n to faqat
chubhte hai.n lahuu rulvaate hai.n

Faiz Ahmad Faiz
Nazm

zauq o shauq

qalb o nazar kii zindagii dasht me.n sub.h kaa samaa.n
chashma-e-aaftaab se nuur kii naddiyaa.n ravaa.n!
husn-e-azal kii hai numuud chaak hai parda-e-vajuud
dil ke liye hazaar suud ek nigaah kaa ziyaa.n!
surKH o kabuud badliyaa.n chho.D gayaa sahaab-e-shab!
koh-e-izam ko de gayaa ra.ng-ba-ra.ng tailisaa.n!
gard se paak hai havaa barg-e-naKHiil dhul ga.e
reg-e-navaah-e-kaazima narm hai misl-e-parniyaa.n
aag bujhii hu.ii idhar, TuuTii hu.ii tanaab udhar
kyaa KHabar is maqaam se guzre hai.n kitne kaarvaa.n
aa.ii sadaa-e-jibra.iil teraa maqaam hai yahii
ahl-e-firaaq ke liye aish-e-davaam hai yahii
kis se kahuu.n ki zahr hai mere liye mai-e-hayaat
kohna hai baz-e-kaa.inaat taaza hai.n mere vaardaat!
kyaa nahii.n aur Gaznavii kaargah-e-hayaat me.n
baiThe hai.n kab se muntazir ahl-e-haram ke somnaat!
zikr-e-arab ke soz me.n, fikr-e-ajam ke saaz me.n
ne arabii mushaahidaat, ne ajamii taKHaiyyulaat
qaafilaa-e-hijaaz me.n ek husain bhii nahii.n
garche hai taab-daar abhii gesuu-e-dajla-o-furaat!
aql o dil o nigaah kaa murshid-e-avvalii.n hai ishq
ishq na ho to shar-o-dii.n butkada-e-tasavvuraat!
sidq-e-KHaliil bhii hai ishq sabr-e-husain bhii hai ishq!
ma.arka-e-vajuud me.n badr o hunain bhii hai ishq!
aaya-e-kaa.enaat kaa ma.anii-e-der-yaab tuu!
nikle tirii talaash me.n qaafila-haa-e-ra.ng-o-buu!
jalvatiyaan-e-madrasa kor-nigaah o murda-zauq
jalvatyaan-e-maikada kam-talab o tahii-kaduu!
mai.n ki mirii Gazal me.n hai aatish-e-rafta kaa suraaG
merii tamaam sarguzisht kho.e hu.o.n kii justujuu!
baad-e-sabaa kii mauj se nash-o-numaa-e-KHaar-o-KHas!
mere nafas kii mauj se nashv-o-numaa-e-aarzuu!
KHuun-e-dil o jigar se hai merii navaa kii parvarish
hai rag-e-saaz me.n ravaa.n saahib-e-saaz kaa lahuu!
fursat-e-kashmukash me.n ii.n dil be-qaraar raa
yak do shikan zyaada kun gesuu-e-taabdaar raa
lauh bhii tuu, qalam bhii tuu, teraa vajuud al-kitaab!
gumbad-e-aabgiina-ra.ng tere muhiit me.n habaab!
aalam-e-aab-o-KHaak me.n tere zuhuur se faroG
zarra-e-reg ko diyaa tuu ne tuluu-e-aaftaab!
shaukat-e-sanjar-o-saliim tere jalaal kii numuud!
faqr-e-'juned'-o-'baayaziid' teraa jamaal be-naqaab!
shauq tiraa agar na ho merii namaaz kaa imaam
meraa qayaam bhii hijaab! meraa sujuud bhii hijaab!
terii nigaah-e-naaz se dono.n muraad paa ga.e
aql, Gayaab o justujuu ishq, huzuur o iztiraab!
tiira-o-taar hai jahaa.n gardish-e-aaftaab se!
tab-e-zamaana taaza kar jalva-e-be-hijaab se!
terii nazar me.n hai.n tamaam mere guzishta roz o shab
mujh ko KHabar na thii ki hai ilm-e-naKHiil be-rutab!
taaza mire zamiir me.n ma.arka-e-kuhan hu.aa!
ishq tamaam mustafaa! aql tamaam buu-lahab!
gaah ba-hiila mii-barad, gaah ba-zor mii-kashad
ishq kii ibtidaa ajab ishq kii intihaa ajab!
aalam-e-soz-o-saaz me.n vasl se ba.Dh ke hai firaaq
vasl me.n marg-e-aarzuu! hijr me.n lazzat-e-talab!
ain-e-visaal me.n mujhe hausla-e-nazar na thaa
garche bahaana-juu rahii merii nigaah-e-be-adab!
garmii-e-aarzuu firaaq! shorish-e-haa-o-huu firaaq!
mauj kii justujuu firaaq! qatre kii aabruu firaaq!

Allama Iqbal
Nazm

mohabbat Diary hargiz nahin hai

mohabbat Diary hargiz nahii.n hai
jis me.n tum likkho
ki kal kis rang ke kap.De pahan.ne kaun sii KHushbuu lagaanii hai
kise kyaa baat kahnii kaun sii kis se chhupaanii hai
kahaa.n kis pe.D ke saa.e tale milnaa hai
mil kar puuchhnaa hai
kyaa tumhe.n mujh se mohabbat hai
ye farsuuda saa jumla hai
magar phir bhii yahii jumla
dariicho.n aa.ngano.n sa.Dko.n galii kuucho.n me.n chaubaaro.n me.n
chaubaaro.n kii TuuTii sii.Dhiyo.n me.n
har jagah ko.ii kisii se kah rahaa hai
kyaa tumhe.n mujh se mohabbat hai
mohabbat Diary hargiz nahii.n hai
jis me.n tum likkho
tumhe.n kis vaqt kis se kis jagah milnaa hai kis ko chho.D jaanaa hai
kahaa.n par kis tarah kii guftuguu karnii hai yaa KHaamosh rahnaa hai
kisii ke saath kitnii duur tak jaanaa hai aur kab lauT aanaa hai
kahaa.n aa.nkhe.n milaanaa hai kahaa.n palke.n jhukaanaa hai
yaa ye likkho ki ab kii baar jab vo milne aa.egaa
to us kaa haath apne haath me.n le kar
dhanak chehre pe raushan jagmagaatii raqs kartii us kii aa.nkho.n me.n utar jaa.e.nge
aur phir gulshan-o-sahraa ke biicho.n-biich dil kii saltanat me.n KHaak u.Daa.e.nge
bahut mumkin hai vo ujlat me.n aa.e
aur tum us kaa haath haatho.n me.n na le paa.o
na aa.nkho.n hii me.n jhaa.nko aur na dil kii saltanat ko fat.h kar paa.o
jahaa.n par guftuguu karnii hai tum KHaamosh ho jaa.o
jahaa.n KHaamosh rahnaa hai vahaa.n tum bolte jaa.o
na.e kap.De pahan kar ghar se niklo maile ho jaa.o
ko.ii KHushbuu lagaane kaa iraada ho to shiishii haath se gir jaa.e
tum viiraan ho jaa.o
safar karnaa se pahle be-sar-o-saamaan ho jaa.o
mohabbat Diary hargiz nahii.n hai aab-juu hai
jo dilo.n ke darmiyaa.n bahtii hai KHushbuu hai
kabhii palko.n pe lahraa.e to aa.nkhe.n ha.nsne lagtii hai.n
jo aa.nkho.n me.n utar jaa.e to manzar aur pas-e-manzar me.n sham.e.n jalne lagtii hai.n
kisii bhii rang ko chhuu le
vahii dil ko gavaaraa hai
kisii miTTii me.n ghul jaa.e
vahii miTTii sitaara hai

Saleem Kausar
Nazm

gunah aur mohabbat

mohabbat
aur ab ki terii mohabbat-e-sarmadii kaa baada-gusaar huu.n mai.n
havas-parastii kii lazzat-e-be-sabaat se sharmsaar huu.n mai.n
mirii bahiimaana KHvaahisho.n ne faraar kii raah lii hai dil se
aur un ke badle ik aarzu-e-saliim se ham-kanaar huu.n mai.n
daliil-e-raah-e-vafaa banii hai.n ziya-e-ulfat kii paak kirne.n
phir apne firdaus-e-gum-shuda kii talaash me.n rah-sipaar huu.n mai.n
hu.aa huu.n bedaar kaa.np kar ik muhiib KHvaabo.n ke silsile se
aur ab numuud-e-sahar kii KHaatir sitam-kash-e-intizaar huu.n mai.n
bahaar-e-taqdiis-e-jaavedaa.n kii mujhe phir ik baar aarzuu hai
phir ek paakiiza zindagii ke liye bahut be-qaraar huu.n mai.n
mujhe mohabbat ne ma.asiyat ke jahannamo.n se bachaa liyaa hai
mujhe javaanii kii tiira-o-taar pastiyo.n se uThaa liyaa hai

Noon Meem Rashid
Nazm

mashriq haar gaya

'kipling' ne kahaa thaa
''mashriq mashriq hai
aur maGrib maGrib hai
aur dono.n kaa milnaa naa-mumkin hai''
lekin maGrib mashriq ke ghar-aa.ngan me.n aa pahu.nchaa hai
meraa naukar b.b.c se KHabre.n suntaa hai
mai.n 'be-dil' aur 'haafiz' ke bajaa.e
'shakespeare' aur 'rilke' kii baate.n kartaa huu.n

Saleem Ahmed
Nazm

sal ki aaKHiri shab

saal kii aaKHirii shab
mere kamre me.n kitaabo.n kaa hujuum
pichhlii raato.n ko taraashe hu.e kuchh maah o nujuum
mai.n akelaa mire atraaf uluum
ek tasviir pe bante hu.e mere KHad-o-KHaal
in pe jamtii hu.ii gard-e-mah-o-saal
ik hayuulaa saa pas-e-shahr-e-Gubaar
aur mujhe jak.De hu.e KHud mirii baaho.n ke hisaar
ko.ii rauzan hai na dar
so ga.e ahl-e-KHabar
saal kii aaKHirii shab
na kisii hijr kaa sadma na kisii vasl kaa KHvaab
KHam hone ko hai bas aaKHirii lamhe kaa shabaab
aur ufuq paar dhu.ndlako.n se kahe.n
khulne vaalaa hai na.ii sub.h kaa baab
is na.ii sub.h ko kyaa nazr karuu.n
har taraf phailaa hu.aa tez havaa.o.n kaa fusuu.n
aur mai.n sochtaa huu.n
dar-o-diivaar me.n lipTe hu.e sahme hu.e log
galii-kuucho.n me.n nikalte hu.e ghabraate hu.e
mai.n unhe.n kaise bataa.uu.n ki yahii mausam hai
jab parindo.n ke par-o-baal nikal aate hai.n

Saleem Kausar
Nazm

sandesa

use kahnaa
kabhii milne chalaa aa.e
hamaare paa.nv me.n jo raasta thaa
raaste me.n pe.D the
pe.Do.n pe jitnii taa.ero.n kii Toliyaa.n
ham se milaa kartii thii.n
ab vo u.Dte u.Dte thak ga.ii hai.n
vo ghanii shaaKHe.n jo ham par saayaa kartii thii.n
vo sab murjhaa ga.ii hai.n
tum use kahnaa
kabhii milne chalaa aa.e
labo.n par lafz hai.n
lafzo.n me.n ko.ii daastaa.n qissa kahaanii
jo use aksar sunaate the
kise jaa kar sunaa.e.nge
bataa.e.nge
ki ham mehraab-e-abruu me.n sitaare Taa.nkne vaale
dar-e-lab bosa-e-iz.haar kii dastak se aksar kholne vaale
kabhii bikhrii hu.ii zulfo.n me.n ham
mahtaab ke gajre banaa kar baa.ndhne vaale
charaaG aur aa.ine ke darmiyaa.n
kab se sar-e-saahil kha.De maujo.n ko takte hai.n
use kahnaa
use ham yaad karte hai.n
use kahnaa
ham aa kar KHud use milte
magar maqtal badalte mausamo.n ke KHuun me.n ra.ngiin hai
aur ham
qataar andar qataar aise bahut se mausamo.n ke darmiyaa.n
tanhaa kha.De hai.n
jaane kab apnaa bulaavaa ho
ki ham me.n aaj bhii
ik umr kii vaaraftagii aur vahshato.n kaa raqs jaarii hai
vo baazii jo bisaat-e-jaa.n pe khelii thii
abhii ham ne na jiitii hai na haarii hai
use kahnaa kabhii milne chalaa aa.e
ki ab kii baar shaayad
apnii baarii hai

Saleem Kausar
Nazm

purane sahilon par naya git

samundar chaa.ndnii me.n raqs kartaa hai
parinde baadalo.n me.n chhup ke kaise gungunaate hai.n
zamii.n ke bhed jaise chaa.nd taaro.n ko bataate hai.n
havaa sargoshiyo.n ke jaal buntii hai
tumhe.n fursat mile to dekhnaa
lahro.n me.n ik kashtii hai
aur kashtii me.n ik tanhaa musaafir hai
musaafir ke labo.n par vaapsii ke giit
lahro.n kii subuk-gaamii me.n Dhalte
daastaa.n kahte
jaziiro.n me.n kahii.n bahte
puraane saahilo.n par guu.njte rahte
kisii maa.njhii ke naGmo.n se gale mil kar palaTte hai.n
tumhaarii yaad kaa safha ulaTre hai.n
abhii kuchh raat baaqii hai
tumhaaraa aur meraa saath baaqii hai
a.ndhero.n me.n chhupaa ik raushnii kaa haath baaqii hai
chale aanaa
ki ham us aane vaalii sub.h ko ik saath dekhe.nge

Saleem Kausar
Nazm

ek bhuli hui yaad

tum bhii mujh se saare rishte to.D chukii thii.n
mai.n ne bhii ik duusraa rasta dekh liyaa thaa
tum ne mujh se ahd liyaa thaa
mai.n ne bhii ik baat kahii thii
tum ne merii sab tasviire.n vaapas de kar
apne KHat mujh se maa.nge the
lekin aaj risaale me.n apnaa ik sher tumhaare naam se dekhaa hai
to soch rahaa huu.n
chehro.n kii pahchaan adhuurii rah jaa.e
to yaade.n aa.ina ban jaatii hai.n

Saleem Kausar
Nazm

man

aziim maa.n
tuu ne apne beTo.n ko
bevgii kii siyaah chaadar me.n raushnii kaa sabaq pa.Dhaayaa
aziim maa.n
tuu ne dukh uThaa.e ki tere beTe javaan ho.nge
to umr bhar kii masaafato.n kaa KHiraaj luu.ngii
tamaam hisse viraasato.n ke
tamaam lamhe mohabbato.n ke
tamaam aa.nsuu masarrato.n ke
javaan ho.nge to apne beTo.n me.n baa.nT duu.ngii
aziim maa.n tere saare beTe javaa.n hu.e hai.n
to ab ye palko.n pe aa.nso.o.n kii sabiil kaisii
ufuq ke us paar KHaalii aa.nkho.n ke jaal phailaa.e
ab tuu kis shai kii muntazir hai

Saleem Kausar
Nazm

mohabbat

aisii quvvat jo sarf nahii.n hotii hai
aziyyat ban jaatii hai
mere dil me.n kitnii mohabbat thii
jis ko zamaane kii be-mehrii aur sard tabii.at ne
iz.haar me.n aane na diyaa
aaKHir mai.n ne saaraa dard sameTaa
aur terii aa.nkho.n par vaar diyaa
duniyaa mere liye terii suurat me.n
paimaana husn-o-KHair banii
yuu.n to mohabbat fard se fard ko hotii hai
lekin tujh se merii mohabbat
vo nuqta hai jis ke chaaro.n taraf
aafaaq kii gardish hotii hai

Saleem Ahmed
Nazm

zarurat-e-ittihad

yaa KHudaa hind par karam farmaa
is kii takliif kal-adam farmaa
hai.n pareshaa.n bahut havaas is ke
nahii.n hamdard ko.ii paas is ke
faqr-o-faaqa se paa.emaal hai ab
qarz me.n is kaa baal baal hai ab
na hii san.at na ab tijaarat hai
saarii aasuudgii vo Gaarat hai
ilm-o-fan se hai is kaa ghar KHaalii
aql o idraak se hai sar KHaalii
achchhe atvaar miT ga.e is ke
nek kirdaar miT ga.e is ke
KHulq hai ab na mehr-o-ulfat hai
aatishii hai na ab uKHuvvat hai
ra.ng bilkul hai mulk kaa badlaa
saaraa paanii hai chaah kaa gadlaa
har taraf jahl hai la.Daa.ii hai
dushman aapas me.n bhaa.ii bhaa.ii hai
na mohabbat hai ab na hamdardii
na dilerii na ab javaa.n-mardii
na ravaa-daarii o sharaafat hai
na ab amn-o-amaan o raahat hai
har taraf hai fasaad ha.ngaama
ko.ii rustam hai aur ko.ii gaamaa
ab kahaa.n sulh-o-KHair kii baate.n
jab hai.n kaano.n me.n Gair kii baate.n
john-bill kii hai.n saazishe.n jaarii
mulk par hai.n navaazishe.n jaarii
ek se hai kabhii shanaasaa.ii
duusre ke liye kabhii saa.ii
kabhii in ko la.Daa diyaa sab se
kabhii un ko bhi.Daa diyaa sab se
kabhii in ko police o thaana hai
aur kabhii un ko jail-KHaana hai
yahii manzar yahaa.n hai shaam-o-sahar
bas yahii ho rahaa hai aaTh pahar
jaantaa hai har ik ye sab baate.n
phir bhii KHaalii nahii.n havaalaate.n
vahii ja.ng-o-jadal vahii jhag.De
vahii buGz-o-enaad ke rag.De
yaa KHudaa de hame.n vo aql-e-saliim
ki samajh ham sake.n har ik scheme
pa.D sake phir na ko.ii zad ham par
khul sake.n saare nek-o-bad ham par
KHatm kar de.n ye tafraqa-saazii
aag me.n jho.nk de.n tabar-yaazii
sab kare.n mil ke mulk kii KHidmat
duur ho is kii usrat-o-nakbat
hikmat o fan vatan me.n phailaa.e.n
shaahraahe.n masal kii khul jaa.e.n
ilm o science mulk me.n bhar de.n
is zamii.n ko ham aasmaa.n kar de.n
ham pe khul jaa.e.n sab vo aql ke raaz
ho is kaa europe ke turra-e-e.azaaz
san.ato.n kii ho garm-baazaarii
gaa.nv gaa.nv me.n ho.n mile.n jaarii
rail, motor, jahaaz, tayyaare
KHud ye tayaar ham kare.n saare
kabhii sahraa ho mustaqar apnaa
ho kabhii Taapuu.o.n me.n ghar apnaa
manchester pe KHaak Daale.nge
ghar se jaapaan ko nikaale.n ham
na rahe.n ham kisii ke bhii muhtaaj
mulk apnaa ho aur apnaa raaj
ham me.n gar ittihaad ho jaa.e
mulk aabaad shaad ho jaa.e

Ahmaq Phaphoondvi
Nazm

saDak

sa.Dak masaafat kii ujlato.n me.n
ghire hu.e sab musaafiro.n ko
ba-Gaur fursat se dekhtii hai
kisii ke chehre pe surKH vahshat chamak rahii hai
kisii ke chehre se zard hairat chhalak rahii hai
kisii kii aa.nkhe.n harii-bharii hai.n
kabiir had se ubhar rahaa hai
saGiir qad se guzar rahaa hai
kisii kaa tyre kisii ke pahiye ko khaa rahaa hai
kisii kaa juutaa kisii kii chappal chabaa rahaa hai
kisii ke pairo.n me.n aa rahaa hai kisii kaa bachcha
kisii kaa bachcha kisii ke shaane pe jaa rahaa hai
ko.ii Thikaane pe ko.ii khaane pe jaa rahaa hai
habiib dast-e-raqiib thaame
Gariib-KHaane pe jaa rahaa hai
amiir pi.njra banaa rahaa hai
Gulaam kartab dikhaa rahaa hai
aur apne beTe ke saath chhat par
amiin kunDaa lagaa rahaa hai
nizaam Taa.nga chalaa rahaa hai
kisii kalaa.ii pe jagmagaatii hu.ii gha.Dii hai
magar abhii vo rukii hu.ii hai
kisii ke chehre pe baara bajne me.n paa.nch second rah ga.e hai.n
kisii kii haathii-numaa prado
sa.Dak se aise guzar rahii hai
sivaa.e is ke kahii.n bhii jaise ko.ii nahii.n ho
kisii kii mo.nchhe.n jhukii hu.ii hai.n
kisii kii baa.nchhe.n khilii hu.ii hai.n
kisii kii taxi kisii kii foksii milii hu.ii hai.n
kisii ke lab aur kisii kii aa.nkhe.n silii hu.ii hai.n
kisii ke kap.De phaTe hu.e hai.n
kisii kii pag.Dii chamak rahii hai
kisii kii ra.ngat kisii kii Topii u.Dii hu.ii hai
shariif nazre.n uThaa uThaa kar
kamaan jismo.n pe apnii vahshat ke tiir kab se chalaa rahaa hai
naziir nazre.n churaa rahaa hai
nafiis apne cluff kii shikno.n ko ro rahaa hai
hakiim apne matab ke shiisho.n ko dho rahaa hai
kisii kii aa.nkho.n ke dhu.ndle shiisho.n me.n us ke maazii kii jhalkiyaa.n hai.n
kisii kii aa.nkho.n me.n aane vaale hasiin lamho.n kii mastiyaa.n hai.n
kisii kii aa.nkho.n me.n rat-jago.n kii kuchh arGavaanii sii Doriyaa.n hai.n
kisii ke kaa.ndhe pe us ke KHvaabo.n kii boriyaa.n hai.n
kabaa.D-KHaane pe baasii Tuk.Do.n kii or kitaabo.n kii boriyaa.n hai.n
buzurg bargad ke niiche buu.Dhaa kha.Daa hu.aa hai
aur us ke haatho.n me.n tape lipTii hu.ii chha.Dii hai
police kii gaa.Dii pikiT lagaa kar
sa.Dak pe tirchhii kha.Dii hu.ii hai
aur ek mazduur apnaa daaman uThaa.e be-bas kha.Daa hu.aa hai
aur ik sipaahii ki us ke nefe me.n u.ngliyo.n ko ghumaa rahaa hai
vahii.n pe shaahid siyaah chashma lagaa ke KHud ko chhupaa rahaa hai
news channel kii chhoTii gaa.Dii ba.Dii KHabar kii talaash me.n hai
do sabzii vaale bhii apnii pherii lagaa rahe hai.n
to phuul vaale ke sar pe phuulo.n kii Tokarii hai
kisii kii aa.nkho.n me.n naukrii hai
kisii kii aa.nkho.n me.n chhokrii hai
vaqaar sar ko jhukaa rahaa hai
faraaz khaa.ii me.n jaa rahaa hai
to giilii cigarette ke kash lagaa kar
navaab rickshaw chalaa rahaa hai
saliim kannii ghumaa rahaa hai
vakiil vardii me.n jaa rahaa hai
zamiir baGle.n bajaa rahaa hai
aur ek vaa.iz bataa rahaa hai
KHudaa ko naaraaz karne vaale jahannamii hai.n
KHudaa ko raazii karo KHudaaraa
KHudaa ko raazii karo KHudaaraa
aur us ke aage nasiir akmal kamaal shaadaab Gulaam saare
nazar jhukaa.e kha.De hu.e hai.n
ki chashm-e-biinaa agar kahii.n hai
to samjho paataal tak ga.Dhii hai
kisii ko a-c KHariidnaa hai
kisii ko pii sii KHariidnaa hai
kisii kii bas aur kisii kii bii-sii nikal rahii hai
aqiila KHaala ke dono.n haatho.n me.n aaTh thaile laTak rahe hai.n
aur aate jaate sabhii musaafir
unhe.n musalsal khaTak rahe hai.n
ziyaa a.ndhere me.n jaa rahaa hai
gulaab kachraa jalaa rahaa hai
aziim makkhii a.Daa rahaa hai
kaliim guTkaa chabaa rahaa hai
to ghanTa-package pe jaane kab se
fahiim gappe.n la.Daa rahaa hai
sabaq musaavaat kaa sikhaane
vaziir gaa.Dii me.n jaa rahaa hai
sanaa nidaa ko na.e latiife sunaa rahii hai
hinaa hathelii ko takte takte puraane raste se aa rahii hai
aur apnii bhaavaj kaa haath thaame
zubaida check-up ko jaa rahii hai
vo apnii nazre.n kabhii idhar ko kabhii adhar ko gumaa rahii hai
magar ko.ii shai use musalsal bulaa rahii rahii hai
ajiib ujlat ajiib vahshat ajiib Gaflat kaa maajraa hai
kahuu.n mai.n kis se mire KHudaayaa ye kaisii KHilqat kaa maajraa hai
ki apnii mastii me.n mast ho kar
ye sab musaafir guzar rahe
na.e musaafir ubhar rahe hai.n
sa.Dak jahaa.n thii vahii.n kha.Dii hai
magar haqiiqat bahut ba.Dii hai
sa.Dak pe billii marii pa.Dii hai

Imran Shamshad Narmi
Nazm

waqt munsif hai

tumhe.n KHabar hai kahaa thaa tum ne
mai.n lafz sochuu.n mai.n lafz boluu.n mai.n lafz likkhuu.n
mai.n lafz likhne pe zindagii ke aziiz lamho.n ko nazr kar duu.n
mai.n lafz likkhuu.n
aur un kii aa.nkho.n me.n munjamid ratjago.n ko apne lahuu kii taaza haraarate.n de ke
jagmagaa duu.n
to mai.n ba.Daa huu.n
tumhe.n KHabar hai
mirii rago.n me.n ba.De qabiile ke shaahzaade kaa KHuun zinda ravaa.n-davaa.n hai
jise mohabbat ke dushmano.n be-zamiir logo.n ne
pyaar karne ke jurm me.n qatl kar diyaa thaa
yahii nahii.n balki KHud ko munsif banaa liyaa thaa
kisii ne bhii KHuu.n-bahaa na maa.ngaa
ki shahr-e-mehnat ke sab buzurgo.n ne darguzar kaa sabaq diyaa thaa
magar vo mai.n thaa ki lafz likkhe
tumhe.n KHabar hai
ki merii buu.Dhii aziim maa.n ne javaan beTo.n ko haadso.n ke
supurd kar ke du.aa.e.n maa.ngii.n
KHudaa-e-bartar mire lahuu ko amar banaa de
du.aa.e.n maa.nge.n to un ke chehre pe guzre mausam ke saare dukh
silvaTo.n kii suurat ubhar ga.e hai.n
magar vo mafluuj ho ga.ii hai
yaqiin jaano ki mai.n ne aise azaab lamho.n me.n lafz likkhe
tumhe.n KHabar hai
ba.Dii havelii ke rahne vaale tamaam logo.n ko chho.D kar mai.n ne lafz likkhe
tumhe.n KHabar hai
mai.n lahlahaate hasiin kheto.n ko chho.D shahr kii be-amaa.n
fasiilo.n me.n aagyaa huu.n
aur apne saa.e kii khoj me.n huu.n
kahii.n mile to mai.n lafz likkhuu.n
nahii.n mile to mai.n lafz likkhuu.n
tumhe.n KHabar hai kahaa thaa tum ne
ki vaqt munsif hai
aur vo faisla karegaa

Saleem Kausar
Nazm

farar

TuuTe phuuTe va.ado.n se
KHush-fahmiyo.n kaa kashkol sajaa.e
mujh me.n rahne kii KHaatir tum aa.e

Saleem Kausar
Nazm

hum bure log hain

tum hii achchhe the kisii se kabhii takraar na kii
tum ki takraar ke KHuugar bhii na the
tum hii achchhe the
jo min-jumla-e-arbaab-e-nazar rahte the
shahar-e-pur-hausla me.n
sheva-e-ahal-e-hunar par kabhii tanqiid na kii
itne bebas the ki jab vaqt pa.Daa
apnii bhii taa.iid na kii
ham bure log hai.n sach kahte hai.n
ham bure log hai.n KHush-nuudii-e-arbaab-e-asar ke baaGii
kabhii qatre ko samundar na likhaa
kisii zarre ko bhii sahraa na kahaa
qarz-e-aa.iina chukaane ke liye aks se mahruum hu.e
aur insaa.n se mohabbat kaa sila
ik sazaa yaafta mujrim kii tarah zinda hai.n

Saleem Kausar
Nazm

aankhen

jiine ke ma.anii aa.nkhe.n hai.n
terii aa.nkhe.n jiinaa bhii hai.n jiine kaa usluub bhii hai.n
aa.ankho.n se aa.ankho.n ke milne me.n jo lazzat hai
vo jiine kii lazzat hai
mai.n ne terii aa.ankho.n se dukh sah kar bhii jiinaa siikhaa
jab se in aa.ankho.n se duur hu.aa huu.n
mai.n jiinaa bhuul gayaa huu.n
apnaa rasta bhuul gayaa huu.n

Saleem Ahmed
Nazm

dawat-e-inqilab

kyaa legaa KHaak-e-murda-o-uftaada ban ke tuu
tuufaan ban ki hai tirii fitrat me.n inqalaab
kyuu.n TimTimaa.e kirmak-e-shab-taab kii tarah
ban saktaa hai tuu auj-e-falak par agar shahaab
vo KHaak ho ki jis me.n mile.n reza-haa-e-zar
vo sang ban ki jis se nikalte hai.n la.al-e-naab
chi.Diyo.n kii tarah daane pe girtaa hai kis liye
parvaaz rakh buland ki tuu ban sake uqaab
vo chashma ban ki jis se ho.n sarsabz khetiyaa.n
rah-rau ko tuu fareb na de suurat-e-saraab

Syed Wahidudeen Salim
Nazm

safar

ka.ii sar-zamiine.n sadaa de rahii hai.n ki aa.o
ka.ii shahr mere ta.aaqub me.n hai.n chiiKHte hai.n na jaa.o
ka.ii ghar lab-e-haal se kah rahe hai.n
ki jab se ga.e ho
hame.n ek viiraan tanhaa.ii ne Das liyaa hai
palaT aa.o phir ham ko aabaad kar do
vo sab ghar
vo sab shahr.... sab sar-zamiine.n
mohabbat kii chho.Dii hu.ii rahguzar ban ga.ii hai.n
kabhii manzile.n thii.n magar aaj gard-e-safar ban ga.ii hai.n
mohabbat safar hai
musalsal safar hai
so mai.n tujh se terii hii jaanib safar kar rahaa huu.n

Saleem Ahmed
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now