Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "shagaf"

Nazm MATCHES FOR "shagaf"

Nazm

fariyaadi matam

'jaagte raho' kii sadaa.e.n
inaayato.n kaa KHiraaj vasuul karte nahii.n thaktii hai.n
circus kaa panDaal khachaa-khach bharaa hai
maimano.n ke baa.De me.n
sahamaa-dubka…..Ghaas khaataa sher
kaisaa be-zarar dikhaa.ii detaa hai
bauno.n kii uchhal-kuud
falak-shagaaf qahqahe…..musalsal qahqahe
taaliyo.n kii guu.nj!
mahal-saraa ke band phaaTak ko chhuu kar lauT aatii hai
bastii ke jahaa.n-diida buu.Dhe
fariyaadii maatam karte
panDaal se ravaana ho jaate hai.n

Aashufta Changezi
Nazm

premchand ko KHiraj-e-aqidat

vo premchand-munshii-e-be-misl-o-be-badal
thii jis ke dam se bazm-e-adab me.n chahal-pahal
afsaane jis ke sham-e-hidaayat the bar-mahal
naa-vaqt aah ho gayaa vo luqma-e-ajal
is soz-e-jaa.n-gusil se har ik dil kabaab hai
fart-e-tapish hai aatish-e-Gam be-hisaab hai
ilmii shaGaf se us ke nahii.n kaun baa-KHabar
har qalb par fasaane hu.e naqsh kal.hajar
hai bahr-e-ilm terii ravaanii se sar-basar
daamaan-o-jeb-e-urdu-o-hindii hai.n pur-guhar
tarz-e-bayaa.n har ek kaa tuu ne dikhaa diyaa
dhabba har ik kaa apne qalam se miTaa diyaa
bazm-e-adab ko KHvaab me.n bhii ye na thaa KHayaal
unniis sau chhattiis kaa nahs hogaa us ko saal
avval vafaat-e-barq kaa us ko hu.aa malaal
phir chal diyaa jahaan se ye munshii-baa-kamaal
naqsh-e-qaraar sail-e-fanaa se miTaa hai aaj
aivaan-e-nazm-o-nasr me.n maatam bapaa hai aaj
tujh ko premchand ye shaayad nahii.n KHabar
kitnaa vafaat kaa tirii duniyaa pe hai asar
'suufii' jahaa.n me.n Dhuu.nDhtii hai us ko har nazar
ai maahtaab-e-ishq bataa tuu chhupaa kidhar
kyaa shauq saama.ii.n kaa faraamosh ho gayaa
afsaana kahte kahte jo KHud haa.e so gayaa

Rangeshwar Dayal Saxena Sufi
Nazm

iqbaal-e-jurm

urdu adab se shaa'irii se kuchh shaGaf nahii.n
is fan se aur KHayaal se mai.n baa-sharaf nahii.n
mai.n shaa'ir-o-adiib KHatiibo.n kaa chor huu.n
mai.n qaafiyo.n kaa chor radiifo.n kaa chor huu.n

Faizan Jaffery Al-Khwarzami
Nazm

daraKHt-e-zard

vo hai.at-daa.n vo aalim naaf-e-shab me.n chhat pe jaataa thaa
rasad kaa rishta sayyaaro.n se rakhtaa thaa nibhaataa thaa
use KHvaahish thii shohrat kii na ko.ii hirs-e-daulat thii
ba.De se qutr kii ik duurbiin us kii zaruurat thii
mirii maa.n kii tamannaa.o.n kaa qaatil thaa vo qallaama
mirii maa.n merii mahbuuba qayaamat kii hasiina thii
sitam ye hai ye kahne se jhijaktaa thaa vo fahhaama
thaa behad ishti.aal-a.ngez bad-qismat o allaama
KHalaf us ke KHazaf aur be-nihaayat naa-KHalaf nikle
ham us ke saare beTe intihaa.ii be-sharaf nikle
mai.n us aalim-tariin-e-dahr kii fikrat kaa munkir thaa
mai.n fastaa.ii thaa jaahil thaa aur mantiq kaa maahir thaa
par ab merii ye shohrat hai ki mai.n bas ik sharaabii huu.n
mai.n apne duudmaan-e-ilm kii KHaana-KHaraabii huu.n
sagaan-e-KHuuk zaad-e-barzan o baazaar-e-be-maGzii
mirii jaanib ab apne thoba.De shaahaana karte hai.n
zinaa-zaade mirii izzat bhii gustaaKHaana karte hai.n
kamiine sharm bhii ab mujh se be-sharmaana karte the

Jaun Eliya
Nazm

muhasara

miraa qalam nahii.n auzaar us naqab-zan kaa
jo apne ghar kii hii chhat me.n shigaaf Daaltaa hai
miraa qalam nahii.n us duzd-e-niim-shab kaa rafiiq
jo be-charaaG gharo.n par kamand uchhaaltaa hai

Ahmad Faraz
Nazm

tulu-e-islam

daliil-e-sub.h-e-raushan hai sitaaro.n kii tunuk-taabii
ufuq se aaftaab ubhraa gayaa daur-e-giraa.n-KHvaabii
uruuq-murda-e-mashriq me.n KHuun-e-zindagii dau.Daa
samajh sakte nahii.n is raaz ko siinaa o faaraabii
musalmaa.n ko musalmaa.n kar diyaa tuufaan-e-maGrib ne
talaatum-haa-e-dariyaa hii se hai gauhar kii sairaabii
ataa momin ko phir dargaah-e-haq se hone vaalaa hai
shikoh-e-turkamaanii zehn hindii nutq aaraabii
asar kuchh KHvaab kaa Guncho.n me.n baaqii hai tuu ai bulbul
navaa-raa talKH-tarmii zan chuu zauq-e-naGma kam-yaabii
ta.Dap sehn-e-chaman me.n aashiyaa.n me.n shaaKH-saaro.n me.n
judaa paare se ho saktii nahii.n taqdiir-e-siimaabii
vo chashm-e-paak hai.n kyuu.n ziinat-e-bar-gustavaa.n dekhe
nazar aatii hai jis ko mard-e-Gaazii kii jigar-taabii
zamiir-e-laala me.n raushan charaaG-e-aarzuu kar de
chaman ke zarre zarre ko shahiid-e-justujuu kar de
sarishk-e-chashm-e-muslim me.n hai naisaa.n kaa asar paidaa
KHaliilullaah ke dariyaa me.n ho.nge phir guhar paidaa
kitaab-e-millat-e-baizaa kii phir shiiraaza-bandii hai
ye shaaKH-e-haashmii karne ko hai phir barg-o-bar paidaa
rabuud aa.n turk shiiraazii dil-e-tabrez-o-kaabul raa
sabaa kartii hai buu-e-gul se apnaa ham-safar paidaa
agar usmaaniyo.n par koh-e-Gam TuuTaa to kyaa Gam hai
ki KHuun-e-sad-hazaar-anjum se hotii hai sahar paidaa
jahaa.nbaanii se hai dushvaar-tar kaar-e-jahaa.n-biinii
jigar KHuu.n ho to chashm-e-dil me.n hotii hai nazar paidaa
hazaaro.n saal nargis apnii be-nuurii pe rotii hai
ba.Dii mushkil se hotaa hai chaman me.n diida-var paidaa
navaa-pairaa ho ai bulbul ki ho tere tarannum se
kabuutar ke tan-e-naazuk me.n shaahii.n kaa jigar paidaa
tire siine me.n hai poshiida raaz-e-zindagii kah de
musalmaa.n se hadiis-e-soz-o-saaz-e-zindagii kah de
KHudaa-e-lam-yazal kaa dast-e-qudrat tuu zabaa.n tuu hai
yaqii.n paidaa kar ai Gaafil ki maGluub-e-gumaa.n tuu hai
pare hai charKH-e-niilii-faam se manzil musalmaa.n kii
sitaare jis kii gard-e-raah ho.n vo kaarvaa.n to hai
makaa.n faanii makii.n faanii azal teraa abad teraa
KHudaa kaa aaKHirii paiGaam hai tuu jaavedaa.n tuu hai
Hinaa-band-e-uruus-e-laala hai KHuun-e-jigar teraa
tirii nisbat baraahiimii hai memaar-e-jahaa.n tuu hai
tirii fitrat amii.n hai mumkinaat-e-zindagaanii kii
jahaa.n ke jauhar-e-muzmar kaa goyaa imtihaa.n to hai
jahaan-e-aab-o-gil se aalam-e-jaaved kii KHaatir
nubuvvat saath jis ko le ga.ii vo armuGaa.n tuu hai
ye nukta sarguzisht-e-millat-e-baizaa se hai paidaa
ki aqvaam-e-zamiin-e-asia kaa paasbaa.n tuu hai
sabaq phir pa.Dh sadaaqat kaa adaalat kaa shujaa.at kaa
liyaa jaa.egaa tujh se kaam duniyaa kii imaamat kaa
yahii maqsuud-e-fitrat hai yahii ramz-e-musalmaanii
uKHuvvat kii jahaa.ngiirii mohabbat kii faraavaanii
butaan-e-ra.ng-o-KHuu.n ko to.D kar millat me.n gum ho jaa
na tuuraanii rahe baaqii na iiraanii na afGaanii
miyaan-e-shaaKH-saaraa.n sohbat-e-murG-e-chaman kab tak
tire baazuu me.n hai parvaaz-e-shaahiin-e-qahastaanii
gumaa.n-aabaad hastii me.n yaqii.n mard-e-musalmaa.n kaa
bayaabaa.n kii shab-e-taariik me.n qindiil-e-rohbaanii
miTaayaa qaisar o kisraa ke istibdaad ko jis ne
vo kyaa thaa zor-e-haidar faqr-e-buu-zar sidq-e-salmaanii
hu.e ahraar-e-millat jaada-paimaa kis tajammul se
tamaashaa.ii shigaaf-e-dar se hai.n sadiyo.n ke zindaanii
sabaat-e-zindagii iimaan-e-mohkam se hai duniyaa me.n
ki almaanii se bhii paa.enda-tar niklaa hai tuuraanii
jab is a.ngaara-e-KHaakii me.n hotaa hai yaqii.n paidaa
to kar letaa hai ye baal-o-par-e-ruuh-ul-amii.n paidaa
Gulaamii me.n na kaam aatii hai.n shamshiire.n na tadbiire.n
jo ho zauq-e-yaqii.n paidaa to kaT jaatii hai.n zanjiire.n
ko.ii andaaza kar saktaa hai us ke zor-e-baazuu kaa
nigaah-e-mard-e-momin se badal jaatii hai.n taqdiire.n
vilaayat paadshaahii ilm-e-ashiyaa kii jahaa.ngiirii
ye sab kyaa hai.n faqat ik nukta-e-iimaa.n kii tafsiire.n
baraahiimii nazar paidaa magar mushkil se hotii hai
havas chhup chhup ke siino.n me.n banaa letii hai tasviire.n
tamiiz-e-bandaa-o-aaqaa fasaad-e-aadmiyat hai
hazar ai chiira-dastaa.n saKHt hai.n fitrat kii ta.aziire.n
haqiiqat ek hai har shai kii KHaakii ho ki nuurii ho
lahuu KHurshiid kaa Tapke agar zarre kaa dil chiire.n
yaqii.n mohkam amal paiham mohabbat faatah-e-aalam
jihaad-e-zindagaanii me.n hai.n ye mardo.n kii shamshiire.n
che baayad mard raa tab-e-buland mashrab-e-naabe
dil-e-garme nigaah-e-paak-biine jaan-e-betaabe
uqaabii shaan se jhapTe the jo be-baal-o-par nikle
sitaare shaam ke KHuun-e-shafaq me.n Duub kar nikle
hu.e madfuun-e-dariyaa zer-e-dariyaa tairne vaale
tamaa.nche mauj ke khaate the jo ban kar guhar nikle
Gubaar-e-rahguzar hai.n kiimiyaa par naaz thaa jin ko
jabiine.n KHaak par rakhte the jo iksiir-gar nikle
hamaaraa narm-rau qaasid payaam-e-zindagii laayaa
KHabar detii thii.n jin ko bijliyaa.n vo be-KHabar nikle
haram rusvaa hu.aa piir-e-haram kii kam-nigaahii se
javaanaan-e-tataarii kis qadar saahab-nazar nikle
zamii.n se nuuryaan-e-aasmaa.n-parvaaz kahte the
ye KHaakii zinda-tar paa.enda-tar taabinda-tar nikle
jahaa.n me.n ahl-e-iimaa.n suurat-e-KHurshiid jiite hai.n
idhar Duube udhar nikle udhar Duube idhar nikle
yaqii.n afraad kaa sarmaaya-e-taamiir-e-millat hai
yahii quvvat hai jo suurat-gar-e-taqdiir-e-millat hai
tuu raaz-e-kun-fakaa.n hai apnii aa.nkho.n par ayaa.n ho jaa
KHudii kaa raaz-daa.n ho jaa KHudaa kaa tarjumaa.n ho jaa
havas ne kar diyaa hai Tuk.De Tuk.De nau-e-insaa.n ko
uKHuvvat kaa bayaa.n ho jaa mohabbat kii zabaa.n ho jaa
ye hindii vo KHuraasaanii ye afGaanii vo tuuraanii
tuu ai sharminda-e-saahil uchhal kar be-karaa.n ho jaa
Gubaar-aaluuda-e-ra.ng-o-nasab hai.n baal-o-par tere
tuu ai murG-e-haram u.Dne se pahle par-fishaa.n ho jaa
KHudii me.n Duub jaa Gaafil ye sirr-e-zindagaanii hai
nikal kar halqa-e-shaam-o-sahar se jaavedaa.n ho jaa
masaaf-e-zindagii me.n siirat-e-faulaad paidaa kar
shabistaan-e-mohabbat me.n hariir o parniyaa.n ho jaa
guzar jaa ban ke sail-e-tund-rau koh o bayaabaa.n se
gulistaa.n raah me.n aa.e to juu-e-naGma-KHvaa.n ho jaa
tire ilm o mohabbat kii nahii.n hai intihaa ko.ii
nahii.n hai tujh se ba.Dh kar saaz-e-fitrat me.n navaa ko.ii
abhii tak aadmii said-e-zabuun-e-shahryaarii hai
qayaamat hai ki insaa.n nau-e-insaa.n kaa shikaarii hai
nazar ko KHiira kartii hai chamak tahziib-e-haazir kii
ye sannaa.ii magar jhuuTe niguu.n kii reza-kaarii hai
vo hikmat naaz thaa jis par KHirad-mandaan-e-maGrib ko
havas ke panja-e-KHuunii.n me.n teG-e-kaar-zaarii hai
tadabbur kii fusuu.n-kaarii se mohkam ho nahii.n saktaa
jahaa.n me.n jis tamaddun kii binaa sarmaaya-daarii hai
amal se zindagii bantii hai jannat bhii jahannam bhii
ye KHaakii apnii fitrat me.n na nuurii hai na naarii hai
KHarosh-aamoz bulbul ho girah Gunche kii vaa kar de
ki tuu is gulsitaa.n ke vaaste baad-e-bahaarii hai
phir uTThii asia ke dil se chi.ngaarii mohabbat kii
zamii.n jaulaa.n-gah-e-atlas qabaayaan-e-tataarii hai
bayaa paidaa KHariidaa raast jaan-e-naa-tavaan-e-raa
pas az muddat guzaar uftaad barmaa kaarvaane raa
bayaa saaqii navaa-e-murG-zaar az shaaKH-saar aamad
bahaar aamad nigaar aamad nigaar aamad qaraar aamad
kashiid abr-e-bahaarii KHema andar vaadii o sahraa
sadaa-e-aabshaaraa.n az faraaz-e-koh-saar aamad
sarat gardam toham qaanuun peshii.n saaz dah saaqii
ki KHail-e-naGma-pardaazaa.n qataar andar qataar aamad
kanaar az zaahidaa.n bar-giir o bebaakaana saaGar-kash
pas az muddat azii.n shaaKH-e-kuhan baa.ng-e-hazaar aamad
ba-mushtaaqaa.n hadiis-e-KHvaajaa-e-badro hunain aavar
tasarruf-haa-e-pinhaanash ba-chashm-e-aashkaar aamad
digar shaaKH-e-KHaliil az KHuun-e-maa namnaak mii gardad
ba-baazaar-e-mohabbat naqd-e-maa kaamil ayyaar aamad
sar-e-KHaak-e-shahiire barg-haa-e-laala mii paasham
ki KHuunash baa-nihaal-e-millat-e-maa saazgaar aamad
bayaa taa-gul baa-afmaishaaniim o mai dar saaGar andaazem
falak raa saqf ba-shagaafem o tarh-e-diigar andaazem

Allama Iqbal
Nazm

aurat

sharaf me.n ba.Dh ke surayyaa se musht-e-KHaak us kii
ki har sharaf hai isii darj kaa dur-e-maknuu.n

Allama Iqbal
Nazm

bhul jao mujhe

vo to yuu.n thaa ki ham
apnii apnii zaruurat kii KHaatir
apne apne taqaazo.n ko puuraa kiyaa
apne apne iraado.n kii takmiil me.n
tiira-o-taar KHvaahish kii sa.nglaaKH raaho.n pe chalte rahe
phir bhii raaho.n me.n kitne shaguufe khile
vo to yuu.n thaa ki ba.Dhte ga.e silsile
varna yuu.n hai ki ham
ajnabii kal bhii the
ajnabii ab bhii hai.n
ab bhii yuu.n hai ki tum
har qasam to.D do
sab zide.n chho.D do
aur agar yuu.n na thaa to yuu.nhii soch lo
tum ne iqraar hii kab kiyaa thaa ki mai.n
tum se mansuub huu.n
mai.n ne israar hii kab kiyaa thaa ki tum
yaad aa.o mujhe
bhuul jaa.o mujhe

Mohsin Naqvi
Nazm

o des se aane wale bata

o des se aane vaale bataa
kyaa ab bhii shafaq ke saayo.n me.n
din raat ke daaman milte hai.n
kyaa ab bhii chaman me.n vaise hii
KHush-ra.ng shaguufe khilte hai.n
barsaatii havaa kii lahro.n se
bhiige hu.e paude hilte hai.n
o des se aane vaale bataa

Akhtar Shirani
Nazm

jaun-eliya se aaKHri mulaqat

vo ek tarz-e-suKHan kii KHushbuu
vo ek mahkaa hu.aa takallum
labo.n se jaise gulo.n kii baarish
ki jaise jharnaa saa gir rahaa ho
ki jaise KHushbuu bikhar rahii ho
ki jaise resham ulajh rahaa ho
ajab balaaGat thii guftuguu me.n
ravaa.n thaa dariyaa fasaahato.n kaa
vo ek maktab thaa aagahii kaa
vo ilm-o-daanish kaa mai-kada thaa
vo qalb aur zehn kaa tasaadum
jo guftuguu me.n ravaa.n-davaa.n thaa
vo us ke alfaaz kii ravaanii
vo us kaa ruk ruk ke baat karnaa
vo sho.ala-e-lafz aur ma.aanii
kahii.n lapaknaa kahii.n Thaharnaa
Thahar ke phir vo kalaam karnaa
bahut se jazbo.n kii parda-daarii
bahut se jazbo.n ko aam karnaa
jo mai.n ne puuchhaa
guzishta shab ke mushaa.ere me.n bahut se shaidaa.ii muntazir the
mujhe bhii ye hii pata chalaa thaa ki aap tashriif laa rahe hai.n
magar hu.aa kyaa
zaraa tavaqquf ke baa'd bole nahii.n gayaa mai.n
na jaa sakaa mai.n
suno hu.aa kyaa
mai.n KHud ko maa.il hii kar na paayaa
ye merii haalat merii tabii.at
phir us pe merii ye bad-mizaajii-o-bad-havaasii
ye vahshat-e-dil
miyaa.n haqiiqat hai ye bhii sun lo ki ab hamaare mushaa.ere bhii
nahii.n hai.n un vahshato.n ke haamil
jo merii taqdiir ban chukii hai.n
jo merii tasviir ban chukii hai.n
jo merii taqsiir ban chukii hai.n
phir ik tavaqquf
ki jis tavaqquf kii kaifiyat par garaa.n samaa.at guzar rahii thii
us ek saa.at kaa haath thaame ye ik vazaahat guzar rahii thii
adab-farosho.n ne jaahilo.n ne mushaa.ere ko bhii ik tamaasha banaa diyaa hai
Gazal kii taqdiis luuT lii hai adab ko mujraa banaa diyaa hai
suKHan-varo.n ne bhii jaane kyaa kyaa hamaare hisse me.n rakh diyaa hai
sitam to ye hai ki chiiKH ko bhii suKHan ke zumre me.n rakh diyaa hai
ilaahii tauba
samaa.ato.n me.n KHaraashe.n aane lagii hai.n ab aur shigaaf zehno.n me.n pa.D ga.e hai.n
miyaa.n hamaare qadam to kab ke zamii.n me.n KHiffat se ga.D ga.e hai.n
KHamoshiyo.n ke dabiiz kohre se chand lamho.n kaa phir guzarnaa
vo jaise KHud ko udaasiyo.n ke samundaro.n me.n talaash karnaa
vo jaise phir surma.ii ufuq par sitaare alfaaz ke ubharnaa
ye zindagii se jo be-niyaazii hai kis liye hai
ye roz-o-shab kii jo bad-havaasii hai kis liye hai
bas itnaa samjho
ki KHud ko barbaad kar chukaa huu.n
suKHan to aabaad KHair kyaa ho
magar jahaa.n dil dha.Dak rahe ho.n vo shahr aabaad kar chukaa huu.n
bachaa hii kyaa hai
thaa jis ke aane kaa KHauf mujh ko vo ek saa.at guzar chukii hai
vo ek saf.ha ki jis pe likkhaa thaa zindagii ko vo kho chukaa hai
kitaab-e-hastii bikhar chukii hai
pa.Dhaa thaa mai.n ne bhii zindagii ko
magar tasalsul nahii.n thaa us me.n
idhar-udhar se yahaa.n vahaa.n se ajab kahaanii ga.Dhii ga.ii thii
samajh me.n aa.ii na is liye bhii ke darmiyaa.n se pa.Dhii ga.ii thii
samajhtaa kaise
na falsafii mai.n na ko.ii aalim
uquubato.n ke safar pe niklaa mai.n ik sitaara huu.n aagahii kaa
ajal ke haatho.n me.n haath Daale ik isti.aara huu.n zindagii kaa
itaab naazil hu.aa hai jis par mai.n vo hii ma.atuub aadmii huu.n
sitamgaro.n ko talab hai jis kii mai.n vo hii matluub aadmii huu.n
kabhii mohabbat ne ye kahaa thaa mai.n ek mahbuub aadmii huu.n
magar vo zarb-e-jafaa pa.Dii hai ki ek mazruub aadmii huu.n
mai.n ek bekal saa aadmii huu.n bahut hii bojhal saa aadmii huu.n
samajh rahii hai ye duniyaa mujh ko mai.n ek paagal saa aadmii huu.n
magar ye paagal ye niim-vahshii KHirad ke maaro.n se muKHtalif hai
jo kahnaa chaahaa thaa kah na paayaa
kahaa gayaa jo use ye duniyaa samajh na paa.ii
na baat ab tak kahii ga.ii hai
na baat ab tak sunii ga.ii hai
sharaab-o-sh.er-o-shu.uur kaa jo ik ta'alluq hai us ke baare me.n raa.e kyaa hai
sunaa hai ham ne ki aap par bhii bahut se fatve lage hai.n lekin
sharaab-noshii haraam hai to
ye mas.ala bhii ba.Daa ajab hai
mai.n ek mai-kash huu.n ye to sach hai
magar ye mai-kash kabhii kisii ke lahuu se sairaab kab hu.aa hai
hamesha aa.nsuu piye hai.n us ne hamesha apnaa lahuu piyaa hai
ye bahs chho.Do haraam kyaa hai halaal kyaa hai azaab kyaa hai savaab kyaa hai
sharaab kyaa hai
aziyyato.n se najaat hai ye hayaat hai ye
sharaab-o-shab aur shaa.irii ne ba.Daa sahaaraa diyaa hai mujh ko
sambhaal rakkhaa sharaab ne aur rahii hai mohsin ye raat merii
isii ne mujh ko diye dilaase sunii hai is ne hii baat merii
hamesha mere hii saath jaagii hamesha mere hii saath so.ii
mai.n KHush hu.aa to ye muskuraa.ii mai.n ro diyaa to ye saath ro.ii
ye sher-go.ii hai KHud-kalaamii kaa ik zariiya
isii zariiye isii vasiile se mai.n ne KHud se vo baate.n kii hai.n
jo duusro.n se mai.n kah na paayaa
haraam kyaa hai halaal kyaa hai ye sab tamaashe hai.n muftiyo.n ke
ye saare fitne hai.n maulvii ke
haraam kar dii thii KHud-kushii bhii ki apnii marzii se mar na paa.e
ye mai-kashii bhii haraam Thahrii ki ham ko apnaa lahuu bhii piine kaa haq nahii.n hai
ki apnii marzii se ham ko jiine kaa haq nahii.n hai
kise bataa.e.n
zamiir-o-zarf-e-bashar pe mauquuf hai.n masaa.il
samundaro.n me.n u.nDel jitnii sharaab chaahe
na harf paanii pe aa.egaa aur na us kii taqdiis KHatm hogii
to mai-kashii ko haraam kahne se pahle dekho
ki piine vaale kaa zarf kyaa hai hai.n kis ke haatho.n me.n jaam-o-miinaa
ye nukta-sanjii ye nukta-daanii jo maulvii kii samajh me.n aatii to baat bantii
na diin-o-maz.hab ko jis ne samjhaa na jis ne samjhaa hai zindagii ko
tahuuraa piine kii baat kar ke haraam kahtaa hai mai-kashii ko
jo diin-o-maz.hab kaa zikr aayaa to mai.n ne puuchhaa
ki is havaale se raa.e kyaa hai
ye KHud-parastii KHudaa-parastii ke darmiyaa.n kaa jo faasla hai
jo ik KHalaa hai ye kyaa balaa hai
ye diin-o-maz.hab faqat kitaabe.n
ba-juz kitaabo.n ke aur kyaa hai
kitaabe.n aisii jinhe.n samajhne kii koshishe.n kam hai.n aur ziyaada pa.Dhaa gayaa hai
kitaabe.n aisii ki aam insaa.n ko in ke pa.Dhne kaa haq hai lekin
inhe.n samajhne kaa haq na hargiz diyaa gayaa hai
ki in kitaabo.n pe diin-o-maz.hab ke Thekedaar ijaara-daaro.n kii dastaras hai
isii liye to ye diin-o-maz.hab fasaad-o-fitna bane hu.e hai.n
ye diin-o-maz.hab
jo ilm-o-hikmat ke saath ho to sukuun hogaa
jo dastaras me.n ho jaahilo.n kii junuun hogaa
ye ishq kyaa hai ye husn kyaa hai
ye zindagii kaa javaaz kyaa hai
ye tum ho jii jii ke mar rahe ho ye mai.n huu.n mar mar ke jii rahaa huu.n
ye raaz kyaa hai
hai kyaa haqiiqat majaaz kyaa hai
sivaa.e KHvaabo.n ke kuchh nahii.n hai
ba-juz saraabo.n ke kuchh nahii.n hai
ye ik safar hai tabaahiyo.n kaa udaasiyo.n kii ye rahguzar hai
na is ko duniyaa kaa ilm ko.ii na is ko apnii ko.ii KHabar hai
kabhii kahii.n par nazar na aa.e kabhii har ik shai me.n jalva-gar hai
kabhii ziyaa.n hai kabhii zarar hai
na KHauf is ko na kuchh KHatar hai
kabhii KHudaa hai kabhii bashar hai
hu.aa haqiiqat se aashnaa to ye suu-e-daar-o-rasan gayaa hai
kabhii ha.nsaa hai ye zer-e-KHanjar kabhii ye suulii pe ha.ns diyaa hai
kabhii ye gulnaar ho gayaa hai sinaa.n pe guftaar ho gayaa hai
kabhii hu.aa hai ye Garq-e-dariyaa
kabhii ye taqdiir-e-dasht-o-sahraa
raqam hu.aa hai ye aa.nso.o.n me.n
kabhii lahuu ne hai is ko likkhaa
hikaayat-e-dil hikaayat-e-jaa.n hikaayat-e-zindagii yahii hai
agar saliiqe se likkhii jaa.e ibaarat-e-zindagii yahii hai
ye husn hai us dhanak kii suurat
ki jis ke ra.ngo.n kaa falsafa hii kabhii kisii par nahii.n khulaa hai
ye falsafa jo fareb-e-paiham kaa silsila hai
ki is ke ra.ngo.n me.n ik ishaara hai be-ruKHii kaa
ik isti.aara hai zindagii kaa
kabhii alaamat hai shoKHiyo.n kii
kabhii kinaaya hai saadgii kaa
badalte mausam kii kaifiyat ke hai.n rang pinhaa.n isii dhanak me.n
kashish sharaarat-o-jaazbiyyat ke shoKH ra.ngo.n ne is dhanak ko ajiib paikar ataa kiyaa hai ik aisaa manzar ataa kiyaa hai
ki jis ke sehr-o-asar me.n aa kar
lahuu bahut aa.nkhe.n ro chukii hai.n bahut to biinaa.ii kho chukii hai.n
basaarte.n kyaa basiirate.n bhii to aql-o-daanaa.ii kho chukii hai.n
na jaane kitne hii rang maKHfii hai.n is dhanak me.n
bas ek ra.ng-e-vafaa nahii.n hai.n
is ek ra.ngat kii aarzuu ne lahuu rulaayaa hai aadmii ko
yahii bataayaa hai aagahii ko
ye ik chhalaavaa hai zindagii kaa
hasiin dhoka hai zindagii kaa
magar muqaddar hai aadmii kaa
fareb-e-gandum samajh me.n aayaa to mai.n ne jaanaa
ye ishq kyaa hai ye husn kyaa hai
ye ek laGzish hai jis ke dam se hayaat-e-nau kaa bharam khulaa hai

Tariq Qamar
Nazm

ek lamha

jab bhii chuum letaa huu.n un hasiin aa.nkho.n ko
sau charaaG a.ndhere me.n jhilmilaane lagte hai.n
KHushk KHushk ho.nTo.n me.n jaise dil khi.nch aataa hai
dil me.n kitne aa.iine thartharaane lagte hai.n
phuul kyaa shaguufe kyaa chaa.nd kyaa sitaare kyaa
sab raqiib qadmo.n par sar jhukaane lagte hai.n
zehn jaag uThtaa hai ruuh jaag uThtii hai
naqsh aadmiyat ke jagmagaane lagte hai.n
lau nikalne lagtii hai mandiro.n ke siine se
devtaa fazaa.o.n me.n muskuraane lagte hai.n
raqs karne lagtii hai.n muurate.n ajantaa kii
muddato.n ke lab-basta Gaar gaane lagte hai.n
phuul khilne lagte hai.n uj.De uj.De gulshan me.n
tishna tishna giitii par abr chhaane lagte hai.n
lamha bhar ko ye duniyaa zulm chho.D detii hai
lamha bhar ko sab patthar muskuraane lagte hai.n

Kaifi Azmi
Nazm

tum ye kahte ho ab koi chaara nahin

apne bas kaa nahii.n baar-e-sa.ng-e-sitam
baar-e-sa.ng-e-sitam, baar-e-kohsaar-e-Gam
jis ko chhuu kar sabhii ik taraf ho ga.e
baat kii baat me.n zii-sharaf ho ga.e

Faiz Ahmad Faiz
Nazm

diwar

mai.n ik devtaa-e-anaa
nargisiyyat kaa maaraa hu.aa
aur azal se takabbur me.n Duubaa hu.aa
kaafii KHud-sar huu.n
ziddii huu.n maGruur huu.n
mere chaaro.n taraf merii andhii anaa kii vo diivaar hai
jis me.n aane kii aur mujh se milne kii ghulne kii ko.ii ijaazat kisii ko nahii.n hai
tumhe.n bhii nahii.n hai
use bhii nahii.n hai
mujhe bhii nahii.n hai
mai.n apnii anaa kii diivaaro.n me.n tum se alag ho rahuu.n
mujh pe sajtaa bhii hai ye
mai.n shaa.ir huu.n jo ki fauulun fauulun se bahr-e-ramal tak
har ik naGmagii kaa mukammal KHudaa huu.n
mai.n lafzo.n kaa aaqaa
taKHayyul kaa KHaaliq
mai.n saare zamaane se yaksar judaa huu.n
mujhe zeb detaa hai mai.n apnii diivaar me.n is tarah se muqayyad rahuu.n
yuu.nhii sayyad rahuu.n
mujh pe sajtaa hai ye
.
par jo kal shab tire shabnamii se tabassum me.n lipTii hu.ii
ik nazar be-niyaazii se mujh par pa.Dii
terii pahlii nazar se mirii jaan-e-jaa.n
merii diivaar me.n ik ga.Dhaa par pa.D gayaa
aur ye hii nahii.n mujh pe vo hii nazar
jab dobaara dobaara dobaara pa.Dii
merii diivaar me.n zalzale aa ga.e
aur raKHne shagaafo.n me.n Dhalne lage
mere andar talaatum vo aatish-fishaa.n
vo baguule vo tuufaa.n vo mahshar bapaa thaa
ki mai.n vo ki jis ke tahammul kii hikmat kii
fahm-o-lataafat kii tamsiil shaayad kahii.n bhii nahii.n thii
sulagne lagaa
apnii hiddat se KHud hii pighalne lagaa
tujh se kahnaa thaa ye ki mirii jaan-e-jaa.n
har sitaare kii apnii kashish hogii lekin
KHalaa.o.n me.n murda sitaaro.n kii qismat
vo hawking kii theory ke kaale ga.Dhe
vo vahii vo ki jin me.n hai itnii kashish ki makaa.n to makaa.n
vo zamaa.n ko bhii apne lapeTe me.n le le.n
vo hawking kii theory ke kaale ga.Dho.n kii gravity bhii
terii a.nkho.n kii gahrii kashish ke muqaabil me.n kuchh bhii nahii.n
aur ye to faqat ek diivaar thii
is ko girnaa hii thaa
terii nazro.n se haarii hai bikhrii pa.Dii hai
ki diivaar kaa reza-reza tirii ik nazar se mirii jaan
uj.Daa pa.Daa hai
mai.n jo devtaa-e-anaa nargisiyyat kaa maaraa hu.aa vo jo KHud-sar thaa
ziddii thaa maGruur thaa
jo fauulun fauulun se bahr-e-ramal tak har ik naGmagii kaa mukammal KHudaa thaa
tirii ik nazar se anaa.o.n ke arsh-e-mua.allaa se siidhaa tire paa.nv me.n aa ke
bikhraa pa.Daa hai

Sohaib Mugheera Siddiqi
Nazm

jahan rehana rahti thi

khajuuro.n ke hasii.n saa.e zamii.n par lahlahaate the
sitaare jagmagaate the shaguufe khilkhilaate the
fazaa.e.n muntashir ik nik.hat-e-mastaana rahtii thii
yahii vaadii hai vo hamdam jahaa.n 'rehaana' rahtii thii

Akhtar Shirani
Nazm

hum log

Gaayat-e-suud-o-ziyaa.n suurat-e-aaGaaz-o-ma.aal
vahii be-suud-e-tajassus vahii bekaar savaal
muzmahil saa.at-e-imroz kii be-ra.ngii se
yaad-e-maazii se Gamii.n dahshat-e-fardaa se niDhaal
tishna afkaar jo taskiin nahii.n paate hai.n
soKHta ashk jo aa.nkho.n me.n nahii.n aate hai.n
ik ka.Daa dard ki jo giit me.n Dhaltaa hii nahii.n
dil ke taariik shagaafo.n se nikaltaa hii nahii.n
aur uljhii hu.ii mauhuum sii darbaa.n kii talaash
dasht o zindaa.n kii havas chaak-e-girebaa.n kii talaash

Faiz Ahmad Faiz
Nazm

fasle

ab vo aa.nkho.n ke shaguufe hai.n na chehro.n ke gulaab
ek manhuus udaasii hai ki miTtii hii nahii.n
itnii be-ra.ng hai.n ab rang kii KHuugar aa.nkhe.n
jaise is shahr-e-tamannaa se ko.ii rabt na thaa
jaise dekhaa thaa saraab

Amjad Islam Amjad
Nazm

KHatun-e-mashriq

chaa.ndnii, qaus-e-quzah, aurat, shaguufa, laala-zaar
ilm kaa in narm shaano.n par ko.ii rakhtaa hai baar?

Josh Malihabadi
Nazm

ise kahna

use kahnaa december aa gayaa hai
december ke guzarte hii baras ik aur maazii kii guphaa me.n Duub jaa.egaa
use kahnaa december lauT aa.egaa
magar jo KHuun so jaa.egaa jismo.n me.n na jaa.egaa
use kahnaa havaa.e.n sard hai.n aur zindagii ke kohre diivaaro.n me.n larzaa.n hai.n
use kahnaa shaguufe Tahniyo.n me.n so rahe hai.n
aur un par barf kii chaadar bichhii hai
use kahnaa agar suuraj na niklegaa
to kaise barf pighlegii
use kahnaa ki lauT aa.e

Arsh Siddiqui
Nazm

jahan zad

hasan vaqt maalik bhii hai devtaa bhii
muhaafiz bhii hai aur KHvaaja-saraa bhii
ye dekhaa hai mai.n ne
ki jab bhii dariicho.n me.n taaza shaguufa khulaa hai
havaa se vo hans kar zaraa saa gale bhii milaa hai
to KHvaaja-saraa kii nazar se kahaa.n bach sakaa hai

Ishrat Afreen
Nazm

hawa jam-e-sehat tajwiz karti hai

mujhe maaluum thaa
ye din bhii dukh kii kokh se phuuTaa hai
merii maatamii chaadar
nahii.n tabdiil hogii aaj ke din bhii
jo raakh u.Dtii thii KHvaabo.n kii badan me.n
yuu.nhii aashufta rahegii
aur udaasii kii yahii suurat rahegii
mai.n apne sog me.n maatam-kunaa.n
yuu.n sar-ba-zaanuu raat tak baiThii rahuu.ngii
aur mire KHvaabo.n kaa pursa aaj bhii ko.ii nahii.n degaa
magar ye kaun hai
jo yuu.n mujhe baahar bulaataa hai
ba.Dii narmii se kahtaa hai
ki apne hujra-e-Gam se nikal kar baaG me.n aa.o
zaraa baahar to dekho
duur tak sabza bichhaa hai
aur harii shaaKHo.n pe naaranjii shaguufe muskuraate hai.n
mulaa.em sabz patto.n par pa.Dii shabnam
sunahrii dhuup me.n hiire kii suurat jagmagaatii hai
daraKHto.n me.n chhupii naddii
bahut dhiime suro.n me.n gungunaatii hai
chamakte zard phuulo.n se ladii nannhii pahaa.Dii ke aqab me.n
nuqra.ii chashma KHushii se khilkhilaataa hai
parind-e-KHush-guluu
shaaKH-e-shagufta par chahaktaa hai
ghane jangal me.n baarish kaa Gubaar-e-sabz
sat.h-e-shiisha-e-dil par
mulaa.em u.ngliyo.n se marhabaa ke lafz likhtaa hai
ko.ii aataa hai
aa kar chaadar-e-Gam ko ba.Dii aahistagii se
mere shaano.n se haTaa kar
saat rango.n kaa dupaTTa khol kar mujh ko u.Daataa hai
mai.n khul kar saa.ns letii huu.n
mire andar
ko.ii pairo.n me.n ghu.nghruu baa.ndhtaa hai
raqs kaa aaGaaz kartaa hai
mire kaano.n ke aavezo.n ko ye kis ne chhu.aa
jis se lave.n phir se gulaabii ho ga.ii hai.n
ko.ii sargoshiyo.n me.n phir se meraa naam letaa hai
fazaa kii naGmagii aavaaz detii hai
havaa jaam-e-sehat tajviiz kartii hai

Parveen Shakir
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now